سر الطموح .. هو الطمع في فضل الله.

وسر السعادة .. هو الرضا بقدر الله.

وسر النجاح .. أن تجمع بينهما .. فتطمع في فضل الله .. وترضى بقدر الله.

فتكون طموحا سعيدا.

#تفكير_الناجحين

أكبر عائق عن إنك تكون أحسن .. إنك كويس ..

الوضع الحالي الكويس .. ممكن يكون مقنع ليك عشان متحاولش تكون أحسن .. ومتستغلش قدراتك بشكل كامل ..

كلنا عندنا مناطق قوة كبيرة جدا .. لكن استغلالنا ليها هو الي بيحولها لقوة على أرض الواقع ..

كتير من مناطق قوتنا مش بنعرفها غير لما نخرج بره منطقة الراحة بتاعتنا .. ونتعلم ونشتغل .. والأهم إننا نجازف بشكل محسوب .. فنتعرف على العالم حوالينا .. ونتعرف على نفسنا أكتر .. وتنمو قوتنا أكتر .. وتزيد نتايجنا .. وبالتالي نكون أحسن كل يوم.

#التطوير_هو_الحل

#تفكير_الناجحين

إذا بتتعلم كل يوم .. إعرف إنك كل يوم بتزيد

إذا ما بتتعلمش كل يوم .. إعرف إنك كل يوم بتنقص

يا بتزيد يا بتنقص .. مفيش حاجة بتفضل على حالها في الدنيا

#تفكير_الناجحين

#التطوير_هو_الحل

#دروس_اتعلمتها

الاختيارات السهلة دلوقتي .. هتصعب الحياة قدام !!

والاختيارات الصعبة دلوقتي .. هتسهل الحياة قدام !!

عايز ترتاح دلوقتي .. هتعيش عمرك كله ندمان على الفرص الي فاتتك

لما تتعب دلوقتي .. هتعيش فخور بالي حققته وبتحققه في حياتك كلها

#دروس_اتعلمتها
#تفكير_الناجحين

أول ما تعطل ..

ارجع للأساسيات ..

واستخدم الأسئلة عشان تفهم أكتر ..

هتوصل للإجابة إن شاء الله

#تفكير_الناجحين

مش لازم تكون أحسن واحد في الدنيا ..

كفايه عليك تكون أحسن من نفسك قبل كده

#تفكير_الناجحين

#التطوير_هو_الحل

طول ما انت بتحاسب نفسك وبتطورها .. هتقدر تكون إنسان أحسن .. حتى لو فصلت شويه .. غلطت في حاجات .. فوت فرص .. لسه عندك القدرة إنك تتطور وتكون أحسن .. المهم إنك مترضاش بالوضع الي انت فيه .. وهو ده أساس المحاسبة.

#تفكير_الناجحين

إذا كانت أحلامك مش بتخوفك ..

يبقى أحلامك مش كبيرة كفاية !!

راجع حلمك تاني .. اسرح بخيالك .. اسع بكل قوتك .. واستعن بالله .. حتى لو كان الحلم كبير .. قول الله أكبر

#تفكير_الناجحين

مهما كانت شدة الابتلاء .. فاعلم ..

١. أن بيد الله كشفه .. قال الله تعالى: أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ

٢. أنه قريبا ما سينتهي .. قال الله تعالى: إِنَّ مَعَ الْعُسْرِ يُسْرًا

٣. أنه على قدر تحملك .. قال الله تعالى: لا يُكَلِّفُ اللَّهُ نَفْسًا إِلا وُسْعَهَا

٤. أنه ليعلمك وينقيك ويرفع درجتك .. قال الله تعالى: وَلَمَّا رَأَى الْمُؤْمِنُونَ الْأَحْزَابَ قَالُوا هَذَا مَا وَعَدَنَا اللَّهُ وَرَسُولُهُ وَصَدَقَ اللَّهُ وَرَسُولُهُ وَمَا زَادَهُمْ إِلَّا إِيمَانًا وَتَسْلِيمًا

وقال تعالى: وَتِلْكَ الأَيَّامُ نُدَاوِلُهَا بَيْنَ النَّاسِ وَلِيَعْلَمَ اللَّهُ الَّذِينَ آمَنُوا وَيَتَّخِذَ مِنْكُمْ شُهَدَاءَ

وقال تعالى: وَجَعَلْنَا مِنْهُمْ أَئِمَّةً يَهْدُونَ بِأَمْرِنَا لَمَّا صَبَرُوا وَكَانُوا بِآيَاتِنَا يُوقِنُونَ

فلا تجزع .. فإن الجزع مناف للصبر
واصبر نفسك على قدر الله
وتفهم حكمة الله في قدره فيأتيك الرضا عنه
واعلم أنه خير لك ورزق واسع فتشكر .. وهذه أعلى مراتب التعامل مع الابتلاءات.

والحمد لله رب العالمين.

#ليدبروا_آياته

#تفكير_الناجحين

عايز تشحن نفسك .. وتبدأ يومك بأقصى حماس .. وتقاوم شيطانك ..

فكر في نعم ربنا عليك .. واشكر فضله ..

وَإِذْ تَأَذَّنَ رَبُّكُمْ لَئِن شَكَرْتُمْ لَأَزِيدَنَّكُمْ

#تفكير_الناجحين
#دروس_اتعلمتها
#أحبك_ربي

وقتك هو اغلى حاجة في حياتك ..

فيه بتحقق نجاحك وسعادتك في الدنيا ..

وعلى أساسه بتحقق فلاحك وسعادتك في الآخرة ..

الناجحين في كل المجالات دايما بخلاء بالوقت لإنهم عارفين قيمته ..

عشان كده .. متفرطش فيه ..

ومتديهوش لحاجة او لحد مش مهم ..

دايما ركز على الاكثر اهمية

#دروس_اتعلمتها
#تفكير_الناجحين

من عرف ما يريد ..

هانت عليه مشقة الطريق

#تفكير_الناجحين

الي بينجح .. هو الي شايف حلمه حقيقة ..

وبيسعى كل يوم إنه يحقق جزء منه .. ويشوف قدامه جزء ورا جزء بيتحقق

ولما بيقابل صعوبات بيروح لحلمه ويشوفه قدامه .. يشحن نفسه .. ويقوي قلبه .. ويكمل في دربه

لما تقابل صعوبة .. متقولش صعبة .. قول ربي أكبر .. وبيه هحقق حلمي ..

#تفكير_الناجحين

مش عيب إنك تقع ..

العيب إنك تبطل تحاول تقوم ..

صباح الفل

#تفكير_الناجحين

ملكش دعوه بقصص حياة الناس ..

قصتك انت محتاجه بطلها ..

خلي بالك انك هتحكي القصة دي في يوم من الأيام ..

تحب تحكيها فخور .. ولا تحكيها ندمان

#دروس_اتعلمتها #تفكير_الناجحين

الي بتعمله في وقت شغلك .. هو الي بيعمل حاضرك .. وبيأكلك عيش

والي بتعمله في وقت فراغك .. هو الي بيعمل مستقبلك .. وهيخليك تمتلك فرن عيش

ركز ومتضيعش وقتك

صباح الفل

#التطوير_هو_الحل
#دروس_اتعلمتها
#تفكير_الناجحين

ازاي تغير واقعك؟
روشتة مختصرة عشان تمشي عليها

الواقع عشان يتغير .. محتاج لحلم .. وعشان تحلم إنت محتاج تؤمن إنك تقدر تغير واقعك .. وتكون فعلا عايز تغيره ..

والحلم عشان يتحقق .. محتاج لأهداف .. وعشان تحط أهداف محتاج تخطط بواقعية بالعلم والخبرة ..

والهدف عشان يتنفذ .. محتاج لمخاطرة .. والمخاطرة محتاجه إيمان بالله وبنصرته ليك لما تسعى ناحية هدفك ..

والمخاطرة عشان تنجح .. محتاجه تطوير .. والتطوير محتاج تواضع واعتراف بالأخطاء والتعلم المستمر ..

والتطوير عشان يستمر .. محتاج إصرار .. والإصرار محتاج يكون عندك حماس للي بتعمله بحبك ليه ونتايجه الي هتوصلها وتركيز على التصرفات الي تنفعك بس وتشتغل عليهم كل دقيقة في يومك ..

والإصرار عشان يستمر .. محتاج للطاقة .. والطاقة بنجيبها من علاقتك بربنا سبحانه وتعالى .. وحب الناس الي بتحبهم .. والراحة المناسبة لعقلك وجسمك ..
—————

التطبيق العملي ..

لو عايز تعرف إنت هتنجح اد ايه في تغييرك لواقعك .. قيس نفسك على النقاط دي .. والي ناقصك انت محتاج تكمله ..

- هل انت فعلا عايز تغير واقعك؟
- هل إنت مؤمن إنك تقدر تغير واقعك؟
= كده تقدر تحلم ..

- هل انت فاهم واقع وضعك الداخلي جواك .. وواقع الوضع الخارجي حواليك؟
- هل انت بتعلم نفسك ازاي تخطط بالشكل الصحيح؟
= كده تقدر تحط أهداف صحيحة ..

- هل انت بتستعين بالله في كل خطواتك وبتسعى لتنفيذ أهدافك؟
- هل إيمانك بيغلب خوفك؟
= كده تقدر تخاطر ..

- هل بتعترف بأخطائك وبتتعلم منها وبتحط آلية للتصرفات الصحيحة؟
- هل بتعلم نفسك باستمرار من الخبرات السابقة والخبرات الجديدة ومصادر العلم الصحيحة؟
= كده هتقدر تطور ..

- هل بتحب الي بتعمله وبتحب النتايج الي انت عايز توصلها .. وبالتالي هيكون عندك حماس؟
- هل بتركز على التصرفات الصحيحة وبتشتغل عليها طول الوقت .. وبتتجاهل الي بيضيعلك وقتك وطاقتك؟
= كده هيكون عندك إصرار ..

- هل بتشحن طاقتك باستمرار .. من علاقتك بربنا .. وحب الي بتحبهم .. وراحة عقلك وجسمك بالشكل المناسب؟
= كده هيكون عندك طاقة عشان تكمل ..

اسأل نفسك الأسئلة دي .. ومتجاملش نفسك .. ولا تجلدها أكتر من اللازم .. وشوف ازاي تكمل الي ناقصك في أقرب وقت واشتغل عليه .. صدقني .. كل الناجحين بيسألوا نفسهم .. وبيكملوا نقصهم .. وبالتالي بيحققوا نجاحهم ..

لو شايف إن في نقطة ناقصة الروشتة دي قلي عليها ..
ولو شايف إن الكلام ده مفيد .. حاول تفيد بيه غيرك ..
ربنا يعلمنا ما ينفعنا وينفعنا بما علمنا .. إنه على كل شيء قدير ..

#تفكير_الناجحين
#دروس_اتعلمتها

مش عاجبك العالم وعايز تغيره؟

غير نفسك .. هو ده عالمك انت .. وهو ده الي انت مسئول عنه في المقام الأول .

#التطوير_هو_الحل

#تفكير_الناجحين

ازاي تحقق أي هدف مهما كان كبير وصعب ؟

أي هدف مهما كان كبير .. بيتحقق بطريقة واضحة ملهاش بديل

الإنجازات الكبيرة = تصرفات صحيحة صغيرة + إصرار عليها + ترك كل ما يعطل عنها + وقت.

هنتكلم عن نقطه نقطة منهم ..

التصرفات الصحيحة الصغيرة .. هي تصرفات في الطريق الصحيح الي انت عايز توصله .. مش أي تصرف في أي اتجاه .. وعشان تعرف ايه التصرف الصحيح لازم تذاكر كويس الطريق بتاعك وتعرف ايه الي بيحقق فيه النجاح الصحيح .. وتقدر تسأل الخبراء .. لإنهم هيوفروا عليك الوقت والمجهود الي بيضيعوا في اللف والدوران.

محتاج كمان إن يكون عندك إصرار في الاستمرار على التصرفات دي .. تفضل مكمل مهما كانت العوائق .. ومهما تعبت .. ولما تقع تقوم تاني عادي جدا .. وبالتالي لازم تشيل كل الحاجات الي بتعطلك .. لو بتضيع وقت في حاجات تانيه .. وقف التعطيل .. لو بتحبط لأي سبب .. قاوم الإحباط .. اشتغل على عقلك .. معتقداتك وأفكارك .. ثق في الله تعالى إنه هيساعدك لما تستعين بيه .. ودايما هييسرلك الأسباب للنجاح لما تكون ماشي في الاتجاه الصحيح.

محتاج لوقت طبيعي تمشي فيه في الخطوات دي .. عشان تحقق النجاح .. مفيش نجاح حقيقي هيجي في يوم وليلة .. ولا في نجاح مستمر هيجي من خبطة في يوم .. النجاح بيجي للي سلوكهم هو سلوك الناجحين .. الي بياخدوا الطريق الصعب وبيصروا عليه لغاية الآخر.

الاستمرار على طريق النجاح نجاح .. الفكرة إنك لازم تستمتع طول ما انت ماشي في الطريق .. تستمتع بالنجاحات الصغيرة .. وتحتفل بيها .. وهتديك دافع عشان تكمل .. لإنك حققت نجاح أهه .. يبقى الباقي جي في الطريق .. بس محتاج أكمل.

أهم حاجة لازم تشتغل عليها هي معتقداتك وأفكارك .. في نفسك والي بتعمله .. وضوح الرؤية .. بيساعدك على الطريق .. إنك تكون عارف إنت رايح فين وليه .. ده الي بيديك الاتجاه والطاقة عشان توصل للهدف الي انت عايز تحققه.

#تفكير_الناجحين

التعلم بالأخطاء.

لما كنت صغير .. زيك زي أي طفل .. بيتعلم بطريقة جميله جدا .. بيتعلم بالأخطاء .. كل ما بيعمل حاجه غلط .. بيتعلم منها .. سواء عن طريق إنه بيفكر ازاي يعملها تاني صح .. أو حد يقوله ان الي عمله كان غلط .. مبيكونش عندك مشكله إنك تغلط .. وبالعكس كنت بتضحك على نفسك .. وبتضحك الي حواليك .. وكانوا بيعلموك .. وبتتعلم .. وبتكمل.

كبرنا ونسينا .. إن عادي إننا نغلط .. وبقينا نتكسف من أخطاءنا .. ونعيش فترات طويلة محرجين ومحبطين .. مع إن في الحقيقة .. الأخطاء والتعلم منها .. هي أحسن طريقة عشان نتطور ونكبر .. من أول ما كنا أطفال لغاية ما نموت.

الخطأ هو جزء من السلوك البشري .. ربنا ركب فينا القدرة على المعرفة والعمل .. وركب فينا الجهل والكسل .. ركب فينا اننا نقدر نكون وجهات نظر .. ممكن تكون صح وممكن تكون غلط .. بتتبني شخصياتنا بعوامل كتيرة .. منها الوراثي .. ومنها الي بناخده من تأثير أهلنا .. ومنها الي بناخده بتأثير البيئة الي نشأنا فيها .. ومنها الي بنضيفه لنفسنا .. كلها عوامل بتأثر على شخصياتنا وتصوراتنا وتصرفاتنا.

مشكلتنا إن كتير مننا بيفتكر إن شخصيته وتصوراته وتصرفاته .. حاجات خارجة بالكامل عن تأثيرنا .. وإننا كده وهنفضل كده .. ومتحاسبنيش .. أصل أنا طبيعتي عصبي .. أنا مبقدرش أتحكم في أعصابي .. وكلام زي ده .. مع إن في الحقيقة .. الإنسان قادر على تغيير حاجات كتير في شخصيته وتصوراته وتصرفاته .. وبالتالي النتايج الي بيحققها.

منقدرش نهمل تأثير الظروف علينا بطبيعة الحال .. لكن تعالى نحلل مع بعض النتايج الي بتحققها بتيجي منين .. لو افترضنا إن مفيش ظروف حواليك .. افتراض بس دلوقتي .. وبعدين هنتناقش في تأثيرها عليك .. يلا بينا ..

النتايج بتيجي من تصرفاتك .. وتصرفاتك بتحصل بسبب أفكارك .. وأفكارك بتكون نتيجة معتقداتك جوا عقلك .. معتقداتك عن نفسك وعن الي عايز تحققه وعن الناس وعن النجاح ..

معنى كده إن المعادلة .. معتقدات > أفكار > تصرفات = نتايج.

مش هتكلم طبعا عن الناس الي بتكرر نفس التصرف .. وفاكره إن النتيجة ممكن تتغير .. زي ما قال عنهم أينشتاين .. من الجنون تكرار نفس التصرف مع توقع نتيجة مختلفة !!
لكن هتكلم عن الي بيحاولوا يغيروا النتايج عن طريق تغيير التصرفات .. وده كويس .. لكن مش عميق كفاية .. وعشان كده كتير مننا مش بيقدر يغير التصرفات بشكل عميق .. وبيرجع لنفس التصرفات تاني .. بسبب إنه أهمل تغيير الأفكار والمعتقدات .. الي بيسببوا التصرفات دي أصلا.

نرجع تاني للأخطاء .. مهما كانت قوتك .. لو عايز فعلا توصل لأفضل نسخة من نفسك .. انت محتاج تتعلم من أخطاءك .. الي هي التصرفات الغلط الي عملتها بناء على أفكارك ومعتقداتك .. من الآخر .. أخطاءك هي من صميم شخصيتك وتصوراتك ومعتقداتك وأفكارك .. بالتالي .. عشان تحقق أقصى نتايج ونجاح .. إنت محتاج تتعلم من سلوكك الغلط.

اتفقنا إن شخصيتك وتصوراتك ومعتقداتك وأفكارك .. بتتشكل من مصادر مختلفة .. من أهمها .. اختياراتك انت .. وده الي بيؤمن بيه أصحاب نظرية عقلية النمو وعقلية الثبات .. عقلية النمو مفهومها .. إن عقلك بيكبر كل ما بتكبره .. وبيثبت كل ما بتثبته .. يعني ايه ؟

يعني لما بتشتغل على طريقة تفكيرك .. وبتتعلم من أخطاءك .. والصعوبات الي بتدخل فيها .. كل ما عقلك بينمو .. لكن لو ما اشتغلتش على طريقة تفكيرك ومغيرتهاش .. هتفضل بنفس العقلية .. وبالتالي نفس التصورات .. وبالتالي نفس التصرفات .. وبالتالي نفس النتايج.

طيب .. هنا يجي السؤال .. في حاجات خارجة عن إرادتي .. خارجة عن قدرتي على تغييرها .. وده صحيح .. ومن الخطأ إننا نفترض إنها مش موجوده .. انت مش معزول عن العالم بكل تفاصيله .. لكن تيجي هنا القاعدة .. "الي تقدر تغيره غيره .. والي متقدرش تغيره .. تقدر تغير تأثيره عليك" .. وكل ده يرجع لنفس المعادلة .. إنك تغير معتقادتك وأفكارك وبالتالي تصرفاتك .. عشان توصل لنتايج أفضل.

دانيال بينك .. أحد أفضل مفكري الإدارة في العصر الحديث قال .. "واحدة من أفضل طرق تنبؤ أقصى النجاح .. ليس الموهبة الطبيعية .. ولا حتى الخبرة في تخصصك .. وإنما كيف تشرح إخفاقاتك ورفضك"

لو عايز تعرف الناس الي بيحققوا أقصى نجاح .. شوفهم بيشرحوا لنفسهم ولغيرهم .. سبب أخطاءهم ورفض الآخرين ليهم.
بدل ما يرموا المسئولية على غيرهم .. ويبرروا ويتعذروا لنفسهم .. بتلاقيهم بيفكروا في نفسهم أول حاجة .. عملوا ايه غلط !!

نرجع لمنهجية التعلم بالأخطاء .. ايه الخطوات العملية الي المفروض أعملها عشان أكون أفضل نسخة من نفسي ؟

١- انت حاطط لنفسك أهداف كبيرة تحققها لنفسك .. وعملت خطة عمل لنفسك .. تمشي عليها بشكل يومي .. شوف في نهاية كل يوم .. ايه الي عطلك عن تحقيق أهدافك اليومية .. واكتب الأخطاء دي.

٢- اعترف بأخطاءك .. وحللها .. بالطريقة الي قلنا عليها .. شوف ايه الي انت عملته غلط .. وتحمل مسئوليتك عنه ..

والي معملتوش دوّر على مسئوليتك في تأثير الآخرين عليك.

٣- كده انت عرفت غلطك .. تعالى نحلله أكتر .. ونعرف سببه .. وهنا نيجي للمعادلة ..
معتقدات > أفكار > تصرفات = نتايج ..
متحللش التصرفات بس .. إنما حلل الأفكار الي ورا تصرفاتك .. وحلل المعتقدات الي ورا الأفكار .. ازاي ؟
دايما اسأل نفسك .. ليه ؟ .. واعرف السبب الي وراه .. واسأل تاني .. ليه ؟ واعرف السبب الي وراه .. وتفضل كده تفكر بعمق أكتر في كل خطوة .. وبالمناسبة مش هتقدر تعرف كل الحاجات العميقة دي من أول مرة .. هتفضل تتعلم عن نفسك أكتر كل يوم .. وتفهم أخطاءك وتحللها وتفهم نفسك أكتر كل يوم.

٤- عالج المعتقدات والأفكار والتصرفات الغلط .. ببدايل أفضل منها .. عشان تقدر توصل لنتايج أفضل .. وغالبا مش هتقدر تحط البدايل الأفضل لوحدك بمعرفتك الحالية الي سببت الخطأ ده أصلا .. انت محتاج تتعلم ايه الصح الي كان لازم تعمله .. ومحتاج تراجع الخبراء .. دايما بقول .. كلمة من أستاذ في مجالك توفر عليك سنين من اللف والدوران.

٥- هتكتب الخطأ بشكل يومي .. وهتكتب التصحيح على مستوى المعتقدات والأفكار والتصرفات .. وبعدين تقيس نتايج التصحيح بشكل يومي .. عشان تقيس ايه الي قدرت تحققه من تطور .. خلي بالك من نقطة .. من غير القياس اليومي .. والمتابعة لنتايج التطور .. غالبا مش هتقدر تغير حاجة .. الأخطاء هي من صميم تصرفاتك الي اتبنت في سنين .. وعشان تغيرها .. محتاج لوقت ومتابعة مستمرة .. ومحتاج لإعادة تقييم الي عدلته .. لإنك ممكن تكون محتاج تعدله تاني وتالت .. وبالتالي تتطور أكتر وتكون أحسن كل يوم.

٦- آخر نقطة هنتكلم عنها .. وهي دي الضمان الوحيد لتحقيق التطور .. هو الاستمرار ..
طبيعي تلاقي الدنيا صعبة في البداية .. وطبيعي تلاقي نفسك بتقع في نفس الخطأ تاني .. لكن مقدار نجاحك وتطورك .. هو مقدار مقاومتك وإصرارك واستمرارك في التغيير.

هكلمك عن حاجتين مهمين جدا عشان تقدر تقاوم رجوعك للخطأ القديم ..

أولا .. إنك تفكر في نتيجة الخطأ ده .. الي دايما بتخليك مدايق من نفسك وبتحسسك إنك بتفقد فرص كتير .. كل مرة تلاقي نفسك بترجع لنفس التصرف .. افتكر النتيجة السيئة.
ثانيا .. إنك تعرف إنك مش لوحدك .. وإن ربنا هيعينك طول ما انت بتستعين بيه .. وإنك تقدر تكون إنسان أحسن .. وإن الخطأ الي عملته والفشل الي وقعت فيه هو فرصتك عشان تتعلم .. متقولش مش قادر أتغير .. استعين بالله وهتتغير.

معلش المقالة طويلة شويه .. بس الموضوع مهم ومحتاج يتفصل عشان الصورة تكتمل ..

مستني منك مناقشتك للمقالة والأفكار الي فيها .. وبالتوفيق عشان تكون النسخة الأفضل من نفسك .. بالتعلم من أخطاءك.