- فلان شاطر بس ليه مبيعملش كذا .. او ممعاهوش كذا ..

خطأ كبير بنقع فيه في أوقات كتير .. إننا نقيس الناس على نفسنا او اهدافنا احنا او مقاييسنا للنجاح ..

ليه ميكونش الشخص ده عنده هدف تاني بيحققه انت متعرفوش

او ممكن يكون بيمر بظروف أصعب بكتير مما تعرف او حتى متخيل

كفايه بالإنسان إنه يكون نسخة أفضل من نفسه باستمرار .. وده نجاح كبير

#تفكير_الناجحين
#دروس_اتعلمتها

عشان تكون ناجح .. لازم تتعامل مع نفسك إنك لسه مش ناجح

عشان تكون خبير .. لازم تتعامل مع نفسك إنك لسه بتتعلم

عشان تكون قوي .. لازم تتعامل مع نفسك إنك لسه ضعيف

طول ما بتتعامل مع نفسك إنك كامل .. عمرك مهتتقدم

ولما تتعامل مع نفسك إنك محتاج .. هتحاول دايما بكل السبل إنك تتقدم وتطور .. وهو ده الي هيخليك دايما في الطريق للنجاح.

#تفكير_الناجحين
#دروس_اتعلمتها

النجاح بيتحقق لما تسعى تحققه ..

مش لما تتمنى تحققه.

#تفكير_الناجحين

لو ظروفك صعبة .. او مش حابب الي بتعمله .. او مش حابب المكان الي انت فيه ..

اسأل نفسك سؤال .. بتحب نفسك ولا لا؟

لو آه .. اسأل نفسك سؤال تاني .. عايز تكون في مكان أحسن ولا لا؟

لو عايز تكون في مكان أحسن .. اسمع مني ..

طول ما انت بتتحرك هتقدر تغير .. طول ما انت واقف مفيش حاجة هتحصل ..

يعني ايه؟

يعني لو في حاجة مش عاجباك ونفسك تغيرها .. حبك لنفسك وحبك للمكان الأحسن الي انت عايز توصله .. هيديك الطاقة إنك تتحرك .. وطول ما انت بتحاول وبتتحرك .. هتقدر تغير كل حاجة مش عاجباك ..

الحركة بتجيب نتايج .. بتجيب قوة .. بتجيب قيمة .. وكل ما قيمتك بتزيد كل ما تأثيرك بيزيد .. وبالتالي هتقدر توصل للي انت عايزه ..

لكن كل ما وقفت وزعلت وادايقت .. كل ما نتايجك بتقل وقوتك بتضعف وقيمتك بتقل ..

الوقت بيعدي كده كده .. متقدرش توقف الساعة .. واستغلالك للوقت هو الي بيحدد قيمتك .. خلي الوقت يعدي وانت شغال وبتعافر وبتحاول تكون إنسان أحسن .. بدل ما يعدي وانت واقف وبتشتكي من الظروف.

#تفكير_الناجحين
#دروس_اتعلمتها

في ألف مبرر تقدر تعلق عليهم أسباب فشلك ..

لكن في سبب واحد عشان تبدأ في طريق النجاح ..

إنك تبطل تبرير .. وتبدأ تشتغل.

#تفكير_الناجحين
#دروس_اتعلمتها

لو كان النجاح سهل .. كان حققه كل الناس

ولو كان مستحيل .. مكانش حققه حد من الناس

لكنه صعب .. عشان كده بيحققه قليل من الناس

الي بيشتغلوا على نفسهم .. وبيسعوا ليه وبيتعلموا في الطريق .. ازاي يكونوا أحسن .. كل يوم.

#تفكير_الناجحين

جيف بيزوس .. مؤسس أمازون .. وواحد من أغنى الناس في العالم .. بيقول في لقاء .. كل حاجة عملتها .. بدأت صغيرة .

النجاحات الكبيرة في الحياة .. بتتحقق بالنجاحات الصغيرة .. اشتغل عليها وافرح بيها وكمل .. هتستمتع بكل خطوة في الطريق.

#تفكير_الناجحين

مفيش مجهود بيروح ..

ياما اشتغلنا على فرص وراحت مننا وربنا عوضنا بالأحسن منها ..

في مرة كنت خارج من اجتماع مع عميل وكان فيه مشاكل كتير .. وانا خارج متدايق وبحسب انا عملت ايه غلط .. واد ايه خسرت بسبب العميل ده .. ولسه مكملتش ١٠ دقايق .. ولاقيت مكالمة من واحد من افضل العملاء الي اشتغلت معاهم بعد كده بيطلب اجتماع سريع جدا وبالفعل بدأنا الشغل بعدها بأسبوع !! وخلال فترة قصيرة عوضت اكتر من الخساير الي حصلتلي قبلها .. والحمد لله رب العالمين.

لو ضاعت منك فرصة متقولش ضاعت .. قول هتعلم واكمل ..

اشتغل على الي جي هتحقق اكتر من الي فات .. واتاكد ان الي بيرزق هو رب الارض والسموات ..

#دروس_اتعلمتها
#تفكير_الناجحين

لما تحقق نجاحك ..

مش هتشوف الصعوبات زي ما كنت شايفها ..

ولا هتشوف الناس زي ما كنت شايفهم ..

والأهم .. مش هتشوف نفسك زي ما كنت شايفها

حقق النجاح لنفسك .. وللي انت بتحبهم .. وقبل كل الناس .. لربك .. الي أنعم عليك بكل شيء

#التطوير_هو_الحل
#تفكير_الناجحين
#دروس_اتعلمتها

محدش هيهتم يسمع قصتك ..

غير لما يكون في آخرها إنك نجحت !!

ركز إنك تنجح .. عشان تكون قصتك فخر ليك وملهمة لغيرك

#تفكير_الناجحين
#دروس_اتعلمتها

ليه ميكونش هدفنا الي نسعى لتحقيقه .. بفضل الله ورحمته ..

قصر في الفردوس الأعلى

وما ذلك على الله بعزيز

#تفكير_الناجحين

بمناسبة تخطيطك للسنة الجديدة .. عايز أقولك على حاجة .. القرار لوحده مش كفايه !!

كتير مننا عنده معتقد إن التغيير بيحصل بقرار .. وللأسف دي صوره وردية للتغيير ..

صحيح التغيير بيبدأ بالقرار .. لكن محتاج معاه حاجات كتير ..

المثال الي دايما بقوله .. لما تكون راكب عربية واقفة .. هل هتطلع من 0 - 100 في ثانية واحدة؟

اكيد هتاخد وقت عشان توصل للسرعة دي ..

الحقيقة الأسوأ .. إنك مش في وضعية الثبات .. إنت بترجع لورا أصلا .. وكمان مش على طريق مستقيم مستوي .. لكن على جبل صعب .. ولو وقفت ثانية هتلاقي العربية بترجع أكتر ..

دي الحقيقة الي لازم تكون عارفها قبل ما تقرر إنك تتغير .. عشان تقدر تتغير بجد!!

هنعمل ايه؟

أول حاجة .. حط هدفك من التغيير ..

عايز تحقق ايه وتوصل لايه في وقت اد ايه .. وتكون صورة واضحة متتهزش لأي سبب .. محفوره جوا عقلك .. بتفكر فيها كل يوم

الفكرة من الصورة دي .. إنك تفكر فيها كل ما تلاقي نفسك محبط .. فتلاقي فيها محفز كفاية .. قوة الخيال عند الإنسان تقدر تخليه يعمل المستحيل .. لو قدر يستغلها إنها تكون محفز مش مخدر يخدر بيه نفسه ويعيش فيه .. وفي الآخر هتبقى مجرد حلم حلم بيه في يوم من الأيام

ثاني حاجة .. إنك تحدد الخطوات بشكل عملي ..

فاكر الصورة الي حطيتها عشان تحققها في وقت معين .. كسر الهدف ده وقسمه على سنين وبالتالي شهور وبعدها أسابيع وبعدها أيام .. عشان تكون عارف هتعمل ايه امتى ..

من العذاب لنفسنا .. إننا نبدأ يومنا واحنا مش عارفين المفروض هنعمل فيه ايه .. وخلي بالك .. نفسك إن لم تشغلها بالحق شغلتك بأي حاجة !!

مقاومتنا الحقيقية للمشتتات .. مش إننا نبعد عنها .. لكن إننا ننشغل بالي المفروض نعمله .. هتلاقي نفسك حققت كتير كل يوم إن شاء الله

ثالث حاجة .. لازم تقيم أدائك وتقومه ..

من غير التقييم والتقويم مش هتقدر تحقق حاجة على أرض الواقع ..

فاكر الجدول الي كنا بنحطه للمذاكرة .. مكناش بنلتزم بيه 100% وكنا بنقطعه ونعمل واحد تاني .. وده كان بيخلينا نلحق شويه .. لكن لو قطعناه ومعملناش خالص هنلاقي نفسنا لبسنا ومحققناش حاجة

قيم نفسك كل يوم .. شوف إنت حققت ايه من الي عليك النهارده .. وليه حققته وليه محققتوش .. حتى لو النتيجة في اليوم كانت 0 .. كمل تقييم واعرف سبب النتيجة .. والتزم بالتقييم كل يوم .. هتلاقي النتيجة أحسن إن شاء الله

رابع حاجة .. لازم تتبسط وتشحن ..

انبساطك بيجي من إنك تفكر في الصورة الي انت حاططها لنفسك .. لإنها إنت .. لكن في المستقبل .. مش مستحيلة لكن صعبة .. بس حلوه .. وانت بتفكر فيها .. متقولش أنا بعيد .. لكن قول اعمل ايه عشان اوصل

فكر في نفسك لما تحقق حلمك هتكون فين وبتعمل ايه ومبسوط اد ايه .. على كل مستويات حياتك .. وأول حد تفكر فيه هو ربنا .. ازاي هيكون راضي عنك لما تحقق هدفك وتنفع نفسك وغيرك .. وفكر في الي بتحبهم .. واد ايه فخرهم بيك وبالي حققته .. وحتى الناس الي مبتحبكش .. اد ايه قدرت تثبت إنهم مكانوش صح .. وازاي هتكون قدوة لغيرك عشان يحقق أكتر

ومن الحاجات الحلوه كل ما تحقق حاجة كل يوم بتقربك من هدفك .. احتفل بيها .. واتبسط كل يوم .. وكافئ نفسك ولو بحاجة بسيطة .. المهم تحمد ربنا على نعمته وتوفيقه ليك .. عشان تقدر تكمل

خامس حاجة .. استعن بالله ولا تعجز ..

كل توفيق في الحياة وكل نعمة معاك وكل رزق هيجيلك .. هي من الله تعالى .. ادعي ربنا واطلب كتير ولح في الدعاء .. ارفع سقف طلباتك وطموحك .. مفيش حاجة بعيدة ولا كبيرة على ربنا القوي العزيز ..

وخلي بالك إنك في كل خطوة بتسعى فيها هتلاقي الشيطان بيمنعك من الاجتهاد والسعي فيها .. هو مش عايزك ناجح بتشكر نعم ربنا وبتفيد غيرك .. فهتلاقي حزن على الي فاتك .. وهتلاقي غم وخوف من المستقبل .. وهتلاقي مقارنات بغيرك .. وتخويف إنك مش هتقدر تعمل حاجة .. كل دي أسلحة الشيطان عشان يعطلك ..

استعيذ بالله من الشيطان الرجيم .. ومن أسلحته .. النبي صلى الله عليه وسلم كان بيتسعيذ من الهم والحزن .. والعجز والكسل .. ومن الجبن والبخل .. ومن غلبة الدين وقهر الرجال .. كل يوم .. مرتين على الأقل .. زي ما هو ثابت عنه في أذكار الصباح والمساء ..

ادع ربنا .. اطلب منه .. ملناش غيره .. هو القادر على كل شيء ..

سادس حاجة .. تواصى بالحق وتواصى بالصبر ..

كل ناجح .. ليه موجهين .. وليه أصحاب على الطريق .. ممكن ميكونوش معاه من البداية .. لكن بيجمعهم وهو على الطريق .. اشتغل وانجح .. وقرب من الصالحين المجتهدين الي بينصحوك بالصح .. وبيصبروك وبتصبرهم في الطريق .. ربنا خلقنا محتاجين لبعض .. بنقوى ببعض ..

دي نصايح مهمة حبيت أقولك عليها وانت بتخطط .. لإن الفشل في التخطيط .. هو تخطيط للفشل !!

ربنا يعلمنا ما ينفعنا وينفعنا بما علمنا.

#تفكير_الناجحين
#دروس_اتعلمتها
#التطوير_هو_الحل

لكل شيء في الحياة ثمن ..

الجنة لها ثمن ..
النجاح له ثمن ..
محبة من تحب لها ثمن ..

إذا لم تكن مستعدا لدفع الثمن ..
فلا تنتظر أن تحصل على شيء.

#دروس_اتعلمتها

عايز تحقق نتيجة .. حاول مرة

عايز تكون ناجح .. حاول كتير

عايز تكون عظيم .. اعمل نظام مستمر للمحاولات

#تفكير_الناجحين

من هم المخبتين الذين بشرهم الله في كتابه؟

قال الشيخ السعدي رحمه الله في تفسيره:

والمخبت : الخاضع لربه .. المستسلم لأمره .. المتواضع لعباده

وقال ..

ثم ذكر صفات المخبتين فقال:

(الَّذِينَ إِذَا ذُكِرَ اللَّهُ وَجِلَتْ قُلُوبُهُمْ) أي: خوفا وتعظيما .. فتركوا لذلك المحرمات .. لخوفهم ووجلهم من الله وحده ..

(وَالصَّابِرِينَ عَلَى مَا أَصَابَهُمْ) من البأساء والضراء وأنواع الأذى .. فلا يجري منهم التسخط لشيء من ذلك بل صبروا ابتغاء وجه ربهم محتسبين ثوابه مرتقبين أجره

(وَالْمُقِيمِي الصَّلَاةِ) أي: الذين جعلوها قائمة مستقيمة كاملة بأن أدوا اللازم فيها والمستحب وعبوديتها الظاهرة والباطنة

(وَمِمَّا رَزَقْنَاهُمْ يُنْفِقُونَ ) وهذا يشمل جميع النفقات الواجبة كالزكاة والكفارة والنفقة على الزوجات والمماليك والأقارب والنفقات المستحبة كالصدقات بجميع وجوهها ..

وأتي ب (من) المفيدة للتبعيض ليعلم سهولة ما أمر الله به ورغب فيه وأنه جزء يسير مما رزق الله ليس للعبد في تحصيله قدرة لولا تيسير الله له ورزقه إياه ..

فيا أيها المرزوق من فضل الله أنفق مما رزقك الله .. ينفق الله عليك ويزدك من فضله.

#تفكير_الناجحين
#ليدبروا_آياته
#أحبك_ربي

ازاي تقدر ترتاح في منطقة عدم الراحة؟

بطبيعتنا كبشر بنحب نرتاح جوا منطقة الراحة بتاعتنا .. وبنعمل فيها الي احنا متعودين عليه بدون مجهود كبير .. لا خوف ولا مخاطرة وكمان بنكون متوقعين النتايج بتاعت تصرفاتنا فيها .. ودي المنطقة الي للأسف بتقفل سقف إنجازنا وبتحدده في مستوى معين.

أول ما نفكر نروح لمنطقة عدم الراحة .. بتبدأ المخاوف .. وبيبدأ العقل نفسه يرمي آلاف الأسباب الي تخليه يفضل جوا نفس منطقة الراحة بتاعته .. لإنها محتاجه مجهود كبير وجديد ونتايج غير مضمونة.

كده احنا اتكلمنا عن كام عنصر ؟ .. المجهود .. والنتايج .. والعادة.

تعالوا نحللهم مع بعض ..

عشان نقدر نحقق نجاح في منطقة عدم الراحة محتاجين لمجهود كبير .. لإنك لما بتعمل حاجة جديدة عليك .. بطبيعة الحال مضطر تبذل مجهود أكبر .. لإنك لسه مش عارف ايه الي المفروض تعمله .. وبتحاول تبذل مجهود أكبر عشان تحقق نتايج أحسن.

وبتكون دايما النتايج مش مضمونة .. انت مش عارف ايه الي هيحصل .. مشفتوش بعينك قبل كده .. لسه كل حاجة مش واضحة .. وده بيخليك قلقان جدا .. وخايف من الخطوة دي ..

وبطبيعة الحال .. ده بره العادة بتاعتك .. فبتكون مش مرتاح ومقريف .. وعايز ترجع للمنطقة الدافئة تاني بأي شكل .. لإنها كانت أضمن وأريح وبمجهود أقل.

ايه ده .. انت بتخوفنا أكتر ولا ايه ؟

بصراحة .. اه .. أنا بوصفلك الوضع على حقيقته .. عشان تكون عارف ايه الي هيحصل .. وكده كده انا معاك .. عشان نقدر نطلع بالطريقة الصح من منطقة الراحة بتاعتنا .. الي للأسف بتجيبنا ورا !!

مبدئيا كده .. مفيش تطور حقيقي هيحصل في حياتك .. لو فضلت جوا منطقة الراحة بتاعتك .. ومخرجتش منها .. هتفضل في نفس المستوى من الإنجازات .. ومع الوقت هتقل قيمة الإنجازات دي .. لإن الدنيا بطبيعتها التغيير .. ولو انت كمان متغيرتش .. هتقل قيمة الي بتحققه.

لازم تاخد الخطوة بإنك تخرج من منطقة الراحة باختيارك .. بدل ما تتزق ليها بالعافية بسبب تغير الظروف الي حواليك .. والي بتتغير بشكل أسرع بكتير مما انت مستعد ليه

يلا ناخد الخطوات دي مع بعض ..

1. الإيمان
مبدئيا كده مبنقدرش نستمر في حاجة ونقاوم محاولات عقلنا في الرجوع لمنطقة الراحة غير لما يكون عندنا الطاقة الي تخلينا نبذل المجهود المطلوب .. والطاقة دي بتيجي من الإيمان ..

الإيمان إن ربنا معانا .. لما نستعين بيه .. زي ما وصانا النبي صلى الله عليه وسلم .. استعن بالله ولا تعجز .. يعني استعين بربنا ومتقولش مقدرش
الإيمان إننا الي هنستفيد لما نتغير ونروح للمنطقة الجديدة .. هو ده سر النجاح .. مفيش نجاح كبير هتقدر تحققه وانت في منطقة الراحة .. دي فرصتك انت عشان تكون أحسن

الإيمان إن النتايج هتظهر مهما اتأخرت .. انت مش شايفها صحيح .. بس هي هتظهر .. كل الي عليك إنك تكمل .. وتاخد الطريق لغاية الآخر

الإيمان بيهون علينا تعب وخوف وقريفة العادة الجديدة .. وبتكتسب عادة جديدة .. وهي عادة التغيير ناحية النجاح .. ودي عادة ليها متعة خاصة لكل الي جربها .. وتقدر تسأل عنها الناجحين .. هتعرف أنا أقصد ايه

2. التغيير التدريجي
عشان تاخد على برودة منطقة عدم الراحة مش لازم تنط فيها مرة واحدة .. عقلك زي جسمك بيتكيف على التغيير .. كل ما تاخده بالتدريج

مش لازم تاخد الطريق كله مرة واحدة .. خده واحدة واحدة .. متحاربش كل أعداءك مرة واحدة .. حارب على قد إمكانياتك وبعدين جيب المدد وكمل في الخطوة الي بعدها وهكذا .. عشان كده مهم جدا إنك تتدرج في عاداتك وتكون واقعي ..

حط أهداف كبيرة مقلناش حاجة .. بس قسمها على أهداف صغيرة .. ونظم نفسك ونظم مجهوداتك وطاقتك .. عشان تضمن الأهم من التغيير .. وهو الاستمرار في التغيير.

3. اوعى ترجع
أكتر حاجة بتتعبنا هي الرجوع .. انك بتلاقي نفسك مش مرتاح وتعبان فترجع تاني للي كنت فيه .. وتحس إنك ضيعت وقتك ومجهودك .. عشان كده دايما فكر في العواقب .. ايه الي هيحصل لما أكمل ؟ ايه الي هيحصل لما أرجع ؟

الترغيب والترهيب هما وسيلة طبيعية ربنا ركبها في الإنسان عشان يحقق سلوك أفضل .. الترغيب في النجاح والترهيب من الفشل .. العواقب .. دايما فكر في العواقب .. على نفسك وعلى الي انت مسئول عنهم وبتحبهم.

4. الاستمتاع والمكافأة
مع كل خطوة بتاخدها ناحية أهدافك وعاداتك الجديدة والحركة في منطقة عدم الراحة .. لازم تستمتع بالرحلة بتاعتك عشان تقدر تكمل فيها ..

لازم تقارن نفسك قبل الخطوة دي كنت عامل ازاي .. ودلوقتي بقيت عامل ازاي .. ده بيديك قوة دافعة كبيرة جدا ..

احتفل بإنجازاتك وكافئ نفسك عليها حتى لو كانت صغيرة .. وكمل بيها للإنجاز الي بعده ..

خد وقت راحة مناسب .. تقدر تاخد فيه نفسك .. وتتعود فيه بشكل تدريجي على العادة الجديدة والمنطقة الجديدة للنجاح بتاعك.

5. التوجيه والدعم
زي ما اتفقنا المنطقة الجديدة نتايجها مش واضحة .. لكن بوجود الموجهين لينا .. الي بيكونوا راحوا المنطقة دي قبل كده ..

فهم شايفين أكتر مننا .. وعارفين ايه الي بيحصل هناك .. وتروح ازاي .. لازم نكلمهم وناخد نصيحتهم ونصدقها .. لإن كلمة منهم بتوفر عليك كتير .. وبتديك قوة دافعة كبيرة .. ووجودهم بيرفع سقف عزيمتك أضعاف.

وكلنا محتاجين للي يقولنا كمل .. وهو دور الداعمين لينا .. من الناس الإيجابية الي بيحبولنا الخير .. وشايفين الحياة فرص .. ومؤمنين بينا وبإننا نستحق نكون في مكان أفضل.

حاوط نفسك بالأساتذة الخبراء الحريصين عليك .. وبالي بيدعموك عشان تكون أحسن .. وابعد عن المحبطين والي بيجيبوك ورا .. عشان تقدر تطلع لقدام.

بالطريقة دي .. هتقدر تروح لمناطق جديدة عليك .. تكون بيها أقوى .. وتستعد للمناطق الي بعدها دايما .. بنفس الروح .. وتحقق النجاح الي بتتمناه.

#تفكير_الناجحين

من أكبر ما يعينك على الاستمرار في الطريق .. أن تعلم أن التعب فيه صفة لازمة له .. فكل من سار في طريق النجاح لابد وأن أصابه التعب والفشل والإنكار .

وأن تعلم أن مقياس نجاحك ليس بما حققته في آخر الطريق .. ولكن بالانتصارات الصغيرة في كل يوم .. وحتى وإن خسرت معركة صغيرة .. فالحرب ما زالت مستمرة .. ومازالت المعارك تأتي .. ومازالت فرصة النجاح أمامك .. فاستمر في الحرب .. واكسب نفسك وحياتك.

#تفكير_الناجحين

اتعلم .. كأنك متعرفش حاجة

نفذ .. كأن معندكش الي تخسره

#دروس_اتعلمتها

مفيش إنسان ناجح إلا ..

بيتحكم في أفكاره ومشاعره ..

مش سايب هواه يسوقه

صباح الفل

#تفكير_الناجحين

ازاي نحب الي بنعمله؟

حب أي حاجة بنعملها .. بيجي من حاجتين .. المعرفة والنتايج ..

لما نعرف الحاجة الي بنعملها .. بالعلم الصحيح .. بنحب الحاجة أكتر ..

الإنسان عدو ما يجهل .. ولما بيبصله من بره بدون علم .. بيستصعبه أو مبيشوفهوش بالشكل الصحيح .. لكن كل ما يتعلم أكتر عنه .. كل ما بيحبه .. ويحب تفاصيله .. ولما يكمل العلم بالتطبيق بتجيله الخبرة والتمرس بيه .. وبالتالي بيحبه أكتر.

والحاجة التانية .. التفكير في النتايج الي بتفيده ..

كل ما الإنسان يفكر في النتايج الي هتعود عليه بالنفع .. هو والي يهمهم أمره .. بيلاقي نفسه بيحب الحاجة أكتر .. ونفسه تميل للتضحية عشانه .. لإنه شايف قدامه الي هيحققه .

الكلام ده ينطبق على أي حاجة بنعملها وعايزين نتقنها ونحقق فيها نجاح كبير .. لازم نتعلمها أكتر ونفكر في نتايجها ونفعها أكتر .. وبالتالي هنلاقي نفسنا بتتحمل المشاق فيها .. وبتستمتع بالمشاق كمان .. ويا ريت نزود على النتايج .. الاستمتاع بالنتيجة والاحتفال بالإنجازات الصغيرة .. هنلاقي نفسنا سعيدة أكتر .. وبتبذل مجهود أكبر .. وبالتالي النتايج هتكون أحسن.

ربنا يوفق كل مجتهد نيته خير من الي بيعمله .. ويكرمنا جميعا بالنجاح .. فكله بفضله وكرمه علينا .. سبحانه وتعالى.

صباح الفل

#دروس_اتعلمتها
#تفكير_الناجحين