لازم تتألم .. عشان تتعلم

ولازم تعرف إنك هتموت .. عشان تعرف تعيش

مفيش سعادة من غير تضحيات .. ومفيش نجاح ميسبقوش فشل

هي دي قوانين الدنيا ..

ولو مش مستعد تضحي بمؤقت المدى .. مش هتاخد طويل المدى ..

لكن متنساش .. إن حلاوة طويل المدى .. أجمل بكتير من متعة مؤقت المدى

وطول ما بتختار مؤقت المدى .. بتستمتع مؤقتا صحيح .. بس بتاخد معاه ندم طويل المدى

النجاح والسعادة يستاهلوا .. كل تعب في الطريق ليهم.

#تفكير_الناجحين
#دروس_اتعلمتها

النعم الي معاك فضل ربنا عليك .. وحفاظك عليها واستثمارها هو اجتهادك .. وتوفيق ربنا ليك

احمد ربنا سبحانه وتعالى .. واجتهد أكتر .. تزيد النعم.

#صباح_النجاح
#تفكير_الناجحين
#ليدبروا_آياته

فرَّق بين الوسيلة والهدف !!

الوسيلة هتوصلك للهدف .. لكنها مش هدف في حد ذاته .

الفلوس وسيلة .. مش هدف .
العلم وسيلة .. مش هدف .
الشغل وسيلة .. مش هدف .

الهدف هو الي تعيش عمرك عشان تحققه .. وتعمل بيه فرق في حياتك وحياة غيرك .. باستخدام الوسايل المتاحة ليك .

لما تركز على الهدف .. هتقدر تفهم حياتك أكتر .. وتعرف تستخدم الوسايل أحسن .. وتقدر تحقق نجاح أكبر .

#تفكير_الناجحين

سر نجاحك مش إنك بتعرف تتكلم ..

لكن إنك بتعرف تسمع ..

الدنيا مليانه ناس بتتكلم .. لكن القليل منهم هو الي بيعرف يسمع

اسمع كويس .. هتحقق كل الي بتتمناه

#تفكير_الناجحين
#دروس_اتعلمتها

فاكر زمان لما كنت بتذاكر .. وكنت بتحط لنفسك جدول للمذاكرة .. كل يوم هتذاكر كذا وبعديه كذا لغاية معاد الامتحانات .. فاكر؟

فاكر بقى لما مكنتش بتلتزم بالجدول .. كنت بتعدل فيه وتعمل جدول جديد ..

هي الحياة كده .. بنعمل خطط حلوة وجميلة .. لكن لما بنشتغل على أرض الواقع .. يا إما بسبب تقصيرك أو سوء تخطيطك أو ظروف خارجة عن إرادتك .. بنحتاج نعمل جدول جديد ..

أنا مش جي عشان أقولك لازم تلتزم بالجدول .. لكن عايز أقولك .. استمرارك في إنك تحط جداول وخطط لنفسك .. هيخليك طول الوقت في الطريق للنجاح .. حتى لو اتأخرت .. لكن هتفضل مكمل .. وده أفضل بكتير من إنك متحطش جدول أصلا .. وتقول همشي كده وخلاص !!

وخلي بالك .. إن استمرارك على طريق النجاح في حد ذاته نجاح.

#دروس_اتعلمتها
#التطوير_هو_الحل
#تفكير_الناجحين

لما تقابل أي حاجة صعبة عليك ..

اسمع نصيحة حبيبك محمد صلى الله عليه وسلم ..

الي قال .. استعن بالله ولا تعجز ..

يعني ايه؟

يعني متقولش مقدرش .. قول استعنت بالله

#تفكير_الناجحين
#ليدبروا_آياته

عشان توصل للي انت عايزه ..

لازم تتحمل الي انت مش عايزه

صباح الفل

#تفكير_الناجحين

التغيير الحقيقي يبدأ من داخل عقلك .. قدرتك على التحكم في أفكارك وبالتالي تستطيع السيطرة على مشاعرك .. وبالتالي تخرج تصرفاتك بأفضل صورها

لذلك إذا أردت أن تحصل على أعلى حماس في الوقت الذي تعاني فيه من أكبر الصعوبات والإحباطات .. عليك بـ ٣ أمور ..

١. أهداف واضحة كبيرة .. تحرك العقل والقلب.

٢. مراجعة هذه الأهداف لأكثر من مرة في اليوم.

٣. تنظيف عقلك كل يوم من كل ما يعطلك عن تحقيق أهدافك.

اليوم هو وحدة الزمن بالنسبة للناجحين .. والوقت هو مادة صناعة النجاح .. لذلك عليك أن تسعى لأن تحقق كل يوم كل ما تستطيع أن تحققه .. وبالتالي ستحقق ما تريد مهما كانت أهدافك كبيرة .

#تفكير_الناجحين

خلي بالك .. ممكن الأهداف تسببلك إحباط !!

كل ما الهدف يكون كبير هيكون محفز .. وكل ما تفكر فيه تلاقيه حلو وجميل ويبسطك ..

لكن في مشكلة .. ان الهدف لو كان صعب أو بياخد وقت في تنفيذه .. بيكون محبط لما تيجي تفكر في التنفيذ ..

عشان كده مهم جدا إنك تكسر الهدف في شكل خطوات وأنشطة تعملها شهريا وأسبوعيا لغاية ما توصل إنها تكون يومية ..

وفي الواقع كل ده مش هيخليك تحقق الهدف .. غير لما تقيس أدائك كل يوم وحققت اد ايه من أهدافك .. وتكون صريح مع نفسك .. ومتتكسفش لما تلاقي نفسك محققتش حاجة بقالك يومين تلاته ..

كتير مننا في اللحظة دي بيبطل شغل اصلا .. أو يعيد حساباته من الاول ويقعد يحط خطة جديدة .. وكلنا فاكرين طبعا جداول المذاكرة الي كنا بنعملها زمان ..

الصح إنك ترجع تشتغل تاني كإن مفيش حاجة حصلت .. وتفكر نفسك بالهدف الكبير .. وهيكون وضعك ايه لما تحققه .. عشان تشتغل بقوة وحماس من جديد

لما تراجع أدائك كل يوم .. لازم تكون واضح ومحدد في تحديد أسباب إنك معملتش شغلك النهارده كويس .. وتعرف ازاي هتعالج السبب ده .. لما يظهرلك تاني وانت شغال ..

اوعى تقلل من أسباب تعطيلك عن تحقيق النجاح .. خلي بالك إنها من صميم سلوكك اليومي .. ومش سهل إنك تغيرها .. ولو مغيرتهاش .. هتفضل تتأخر كل مره تفكر فيها إنك تحقق أهدافك !!

استعن بالله ومتقولش مقدرش .. واسعى بكل قوتك .. عالج عاداتك الغلط .. حط جمبها دايما عادات حسنة .. ومتبطلش محاولة .. العادات الكويسة هتشيل العادات السيئة .. وهيكون تحقيق النجاح هو عادتك الجديدة.

#تفكير_الناجحين

سر السعادة .. هو الرضا بقدر الله.

وسر الطموح .. هو الطمع في فضل الله.

وسر النجاح .. أن تجمع بينهما .. فتطمع في فضل الله .. وترضى بقدر الله.

فتكون طموحا سعيدا.

#تفكير_الناجحين

- فلان شاطر بس ليه مبيعملش كذا .. او ممعاهوش كذا ..

خطأ كبير بنقع فيه في أوقات كتير .. إننا نقيس الناس على نفسنا او اهدافنا احنا او مقاييسنا للنجاح ..

ليه ميكونش الشخص ده عنده هدف تاني بيحققه انت متعرفوش

او ممكن يكون بيمر بظروف أصعب بكتير مما تعرف او حتى متخيل

كفايه بالإنسان إنه يكون نسخة أفضل من نفسه باستمرار .. وده نجاح كبير

#تفكير_الناجحين
#دروس_اتعلمتها

عشان تكون ناجح .. لازم تتعامل مع نفسك إنك لسه مش ناجح

عشان تكون خبير .. لازم تتعامل مع نفسك إنك لسه بتتعلم

عشان تكون قوي .. لازم تتعامل مع نفسك إنك لسه ضعيف

طول ما بتتعامل مع نفسك إنك كامل .. عمرك مهتتقدم

ولما تتعامل مع نفسك إنك محتاج .. هتحاول دايما بكل السبل إنك تتقدم وتطور .. وهو ده الي هيخليك دايما في الطريق للنجاح.

#تفكير_الناجحين
#دروس_اتعلمتها

النجاح بيتحقق لما تسعى تحققه ..

مش لما تتمنى تحققه.

#تفكير_الناجحين

لو ظروفك صعبة .. او مش حابب الي بتعمله .. او مش حابب المكان الي انت فيه ..

اسأل نفسك سؤال .. بتحب نفسك ولا لا؟

لو آه .. اسأل نفسك سؤال تاني .. عايز تكون في مكان أحسن ولا لا؟

لو عايز تكون في مكان أحسن .. اسمع مني ..

طول ما انت بتتحرك هتقدر تغير .. طول ما انت واقف مفيش حاجة هتحصل ..

يعني ايه؟

يعني لو في حاجة مش عاجباك ونفسك تغيرها .. حبك لنفسك وحبك للمكان الأحسن الي انت عايز توصله .. هيديك الطاقة إنك تتحرك .. وطول ما انت بتحاول وبتتحرك .. هتقدر تغير كل حاجة مش عاجباك ..

الحركة بتجيب نتايج .. بتجيب قوة .. بتجيب قيمة .. وكل ما قيمتك بتزيد كل ما تأثيرك بيزيد .. وبالتالي هتقدر توصل للي انت عايزه ..

لكن كل ما وقفت وزعلت وادايقت .. كل ما نتايجك بتقل وقوتك بتضعف وقيمتك بتقل ..

الوقت بيعدي كده كده .. متقدرش توقف الساعة .. واستغلالك للوقت هو الي بيحدد قيمتك .. خلي الوقت يعدي وانت شغال وبتعافر وبتحاول تكون إنسان أحسن .. بدل ما يعدي وانت واقف وبتشتكي من الظروف.

#تفكير_الناجحين
#دروس_اتعلمتها

في ألف مبرر تقدر تعلق عليهم أسباب فشلك ..

لكن في سبب واحد عشان تبدأ في طريق النجاح ..

إنك تبطل تبرير .. وتبدأ تشتغل.

#تفكير_الناجحين
#دروس_اتعلمتها

لو كان النجاح سهل .. كان حققه كل الناس

ولو كان مستحيل .. مكانش حققه حد من الناس

لكنه صعب .. عشان كده بيحققه قليل من الناس

الي بيشتغلوا على نفسهم .. وبيسعوا ليه وبيتعلموا في الطريق .. ازاي يكونوا أحسن .. كل يوم.

#تفكير_الناجحين

جيف بيزوس .. مؤسس أمازون .. وواحد من أغنى الناس في العالم .. بيقول في لقاء .. كل حاجة عملتها .. بدأت صغيرة .

النجاحات الكبيرة في الحياة .. بتتحقق بالنجاحات الصغيرة .. اشتغل عليها وافرح بيها وكمل .. هتستمتع بكل خطوة في الطريق.

#تفكير_الناجحين

مفيش مجهود بيروح ..

ياما اشتغلنا على فرص وراحت مننا وربنا عوضنا بالأحسن منها ..

في مرة كنت خارج من اجتماع مع عميل وكان فيه مشاكل كتير .. وانا خارج متدايق وبحسب انا عملت ايه غلط .. واد ايه خسرت بسبب العميل ده .. ولسه مكملتش ١٠ دقايق .. ولاقيت مكالمة من واحد من افضل العملاء الي اشتغلت معاهم بعد كده بيطلب اجتماع سريع جدا وبالفعل بدأنا الشغل بعدها بأسبوع !! وخلال فترة قصيرة عوضت اكتر من الخساير الي حصلتلي قبلها .. والحمد لله رب العالمين.

لو ضاعت منك فرصة متقولش ضاعت .. قول هتعلم واكمل ..

اشتغل على الي جي هتحقق اكتر من الي فات .. واتاكد ان الي بيرزق هو رب الارض والسموات ..

#دروس_اتعلمتها
#تفكير_الناجحين

لما تحقق نجاحك ..

مش هتشوف الصعوبات زي ما كنت شايفها ..

ولا هتشوف الناس زي ما كنت شايفهم ..

والأهم .. مش هتشوف نفسك زي ما كنت شايفها

حقق النجاح لنفسك .. وللي انت بتحبهم .. وقبل كل الناس .. لربك .. الي أنعم عليك بكل شيء

#التطوير_هو_الحل
#تفكير_الناجحين
#دروس_اتعلمتها

محدش هيهتم يسمع قصتك ..

غير لما يكون في آخرها إنك نجحت !!

ركز إنك تنجح .. عشان تكون قصتك فخر ليك وملهمة لغيرك

#تفكير_الناجحين
#دروس_اتعلمتها

ليه ميكونش هدفنا الي نسعى لتحقيقه .. بفضل الله ورحمته ..

قصر في الفردوس الأعلى

وما ذلك على الله بعزيز

#تفكير_الناجحين