بعد ما وعيت لنفسك .. لازم تتحكم فيها .. والتحكم ده بيكون على مستوى التصرفات .. الي أصلها الأفكار والمشاعر .. وأصلهم المعتقدات ..

لازم توعى وتتحكم في معتقداتك .. في نفسك وفي الي بتعمله .. فكر معايا في الأسئلة دي ..

هل إنت معتقد إنك هتنجح ؟
هل إنت معتقد إن من زرع حصد ؟
هل إنت معتقد إن ربنا عادل .. مش هيضيع عملك وجهدك .. وإنه هيقتص من كل ظالم .. وهيرجع الحق لأصحابه ؟
هل إنت معتقد إن الخير موجود .. وإنك لما تعامل الناس بالحسنى هيعاملوك بالحسنى ؟

لما تظبط معتقداتك .. هتتظبط أفكارك ومشاعرك .. وبالتالي تصرفاتك ..

نيجي للمحور التاني .. المعرفة .. المعرفة بتزود الوعي .. وبتزيد بالوعي ..

المعرفة مهمة جدا في كل مجالات حياتك .. دينك .. علاقاتك .. شغلك .. صحتك ..
لازم تزودها من المصادر المحترمة .. من أصولها .. عشان تعرف الأصول .. ومن حُرم الأصول حُرم الوصول .. كل حاجة في الحياة ليها أصولها .. لازم تتعلمها عشان توصل للي انت عايزه.

والمعرفة مبتجيش بالعلم من غير تطبيق .. وهنا يجي محور الجهد .. إنك تشتغل .. وتطبق الي بتتعلمه .. وبالتالي معرفتك هتزيد .. ووعيك هيزيد .. وقوتك هتزيد ..

وعشان تطبق في الأول صح .. لازم تلازم أهل العلم والفضل .. الي تقدر تتعلم منهم صح وتطبق زيهم .. كلنا محتاجين للقدوة والمثال الي نطبق شبهه .. ربنا خلقنا كده ..

ومن أهل عوامل النجاح في التطبيق .. إنك متخفش من الجديد .. متخفش تخرج من منطقة الراحة بتاعتك متخفش تعمل حاجة جديدة عليك .. ممكن تتحبس عمرك كله في نفس المكان .. اخرج منه ..

وعشان تعمل ده .. محتاج للوعي .. إنك تكون واعي إنك لازم تخرج .. ووعيك بإنك رايح منطقة جديدة .. وإنك هتكون مقريف في الأول .. وبعدين الدنيا هتمشي .. وبعدين هتحقق نجاحك ..

وأكيد محتاج للمعرفة .. الي بتديك جرعة من الطمأنينة وانت بتخطي بره منطقة الراحة .. لإن في حد قالك هتعمل ايه وايه نتيجته ..

وأكيد محتاج لبذل جهد كبير في الأول .. لإن منطقة الراحة ليها جاذبية .. بتشدك جواها .. ومش عايزاك تطلع .. في الأول هتبذل جهد مضاعف وسرعتك هتكون قليلة .. وبعدين المجهود هيكون أقل وسرعتك أكبر .. وبعدها هتنطلق.

وأكيد هتحتاج للي يساعدوك ويشجعوك عشان تخرج بأمان ودعم منهم.

نيجي للمحور الرابع والأخير .. الإصرار ..

طبيعي جدا إنك تفشل في الأول .. أو تكون مخنوق وانت بتعمل الحاجة الجديدة أو بتقابل صعوبة كبيرة .. سعتها إنت محتاج تكمل عشان تشوف النتايج وتفرح ..

وأهم عامل عشان تكتسب الإصرار في وجهة نظري .. هو الإيمان ..

الإيمان يختلف عن المشاهدة .. المشاهدة هي إنك تشوف قدامك الحاجة بعينك .. لكن الإيمان هو تصديق القلب بما لم تشاهده العين .. والعمل على أساسه .. والتعامل معاه على إنه حقيقة ..

الإيمان بيزيد بالعلم والتطبيق .. كل ما تعرف أكتر عن الحاجة .. كل ما هتصدقها أكتر .. وكل ما تطبق وتشتغل هتشوف بخبرتك نتايج شبيهة .. وكل ما كان الإنسان واعي أكتر .. كل ما صدق إيمانه أكتر .. ومشي عليه .. وبالتالي إصراره على تحقيق أهدافه .. هيكون قوي ومستمر .. حتى لو شاف قدامه صعوبات أو انتكاسات أو تأخر.

بعتذر عن طول المقالة .. بس مينفعش تختصر أكتر من كده ..

حابب أسمع رأيكم وأسئلتكم وتعليقاتكم .. ولو لاقيتها مفيدة انشرها وفيد بيها غيرك .. كل كلمة مكتوبة هي خلاصة مواقف كتيرة ودروس كتيرة اتعلمتها في حياتي .. وبتمنى توصل لكل إنسان على وجه الأرض ويستفيد بيها .. أتمنى تساعدوني في ده.

صباح الفل

#تفكير_الناجحين

أهم مهارة محتاجها الإنسان في العصر الي احنا فيه .. هي Learnability .. هي القدرة على التعلم بسرعة.

مهم جدا للإنسان إنه عقله يكون مرن بشكل كافي عشان يتواكب مع التوجهات الجديدة والتغيرات الي بتحصل كل يوم في العلوم والأسواق والوظايف .. عشان تكون الأفضل في تخصصك .. لازم تكون قابل للتعلم بشكل مستمر لإن التطور بيحصل كل يوم.

تعليمك الجامعي ملوش نفس أهمية التعلم المستمر .. وعشان كده أكبر الشركات في العالم بتهتم بالقدرة على التعلم أكتر من أي مهارة تانية .. لأنها دايما بتطلب من موظفيها إنهم يطوروا مهاراتهم ومعرفتهم بشكل مستمر.

عشان تقدر تترقى في مسارك الوظيفي إنت محتاج للقدرة على التعلم .. لإنك في كل مستوى محتاج لمجموعة مهارات ومعارف جديدة .. إذا مكتسبتهاش .. مش هتنتقل من وظيفتك للوظيفة الأعلى .. ومش هتحقق النجاح المطلوب فيها.

القدرة على التعلم برده ليها بعد تاني .. وهو عقلية النمو .. اتكلمت عنها د. كارول دويك في كتابها العقلية Mindset .. خلاصتها .. إنك تقدر تتعلم من أخطاءك .. وتحسن من نفسك كل يوم .. وتقدر تقبل تحديات جديدة .. توسع فيها من مداركك وخبراتك .. بدل عقلية الثبات .. الي بتعمل نفس الي بتعمله كل يوم .. بدون تطوير وبدون إضافة .. وبتفضل دايما محلك سر.

أينشتاين كان بيقول .. الحكاية مش إني ذكي أوي .. الحكاية إني بعافر أكتر في حل المسائل.

متوقفش مستوى علمك عند مستوى معين .. وتقول أنا مقدرش أعمل أكتر من كده .. اتعلم باستمرار .. من تصرفاتك ومن الآخرين .. زود عقلك بالعلم والخبرات الجديدة .. هتكون أفضل كل يوم.

#دروس_اتعلمتها
#تفكير_الناجحين

زعلان على الفرص الي فاتت ؟

يلا قوم عشان تستغل الفرص الجايه ..

لو معملتش كده .. هتضيع الفرص الجايه كمان!!

#تفكير_الناجحين
#دروس_اتعلمتها

25 درس اتعلمته في الطريق للنجاح ..

1. إنك تقيم تجاربك .. وتشوف 3 حاجات:
• انت عملت ايه كويس وتشوف ازاي تحسنه ..
• الي عملته غلط .. تشوفه كان غلط ليه؟ وعملته أصلا ليه؟ .. عشان متكررهوش ..
• الظروف الي عطلتك .. تشوف هتتعامل معاها بعد كده ازاي؟

2. الي في ايدك هو تحت تأثيرك .. والظروف خارج تأثيرك .. لما تركز على الي في ايدك وتقدر تعمله .. هتلاقي الظروف بتتغير حواليك .. وبتبقى في صالحك .. وسعتها هتكون جاهز للفرص اكتر .. وهتقدر تستغلها .. وهتكون جاهز لمواجهة التهديدات وتقدر تقاومها بقوتك

3. التعب والاستثمار في التعليم بيعود عليك أضعاف أضعافه .. وقت ومجهود وتكلفة وثقة

4. اسمع دايما آراء الناس حواليك .. وتشجعهم إنهم ينتقدوك .. وحتى لو جالك الانتقاد من حاقد أو حاسد .. تاخد المفيد ليك منه وتتجاهل المبالغة أو الظلم فيه

5. متخافش تخرج بره منطقة الراحة وتجرب نفسك وتختبر قدراتك طول الوقت

6. مش لازم يكون معاك كل حاجة عشان تبدأ .. ابدأ بالي معاك .. ربنا هيرزقك الي مش معاك

7. من خاف سلم .. لكن الي بيترعب خسر .. خلي الخوف وسيلة إنك تعمل الحاجة صح بخسارة أقل .. لكن متخليهوش هاجس يرعبك .. مش هتتقدم خطوة .. وهتخسر أكتر

8. متبالغش في التعامل مع نفسك .. فلا تدلعها وتسمع كلامها طول الوقت .. فتفسدها .. ولا تقسى عليها وتحملها الي متتحملوش .. فتقع منك

9. تواضع للأعلم منك .. فيعلمك ويساعدك .. وترحم الأضعف منك .. فيقبل كلامك ويساعدك

10. متنطش في الطريق فتقع على رقبتك .. ولا تمشي ببطئ فمتوصلش .. لكن اعتدل في مشيك

11. متتوقعش إن الأمور والأوقات كلها شبه بعض .. السنة فصول .. حر وبرد .. بتتبدل .. واليوم نفسه نهار وليل .. وحتى نفسك .. بتشد وبتهدي .. تكيف مع التغيير بدل ما يوقفك

12. طاقتك محدودة .. متتوقعش إنها مش هتخلص .. استغل طاقتك في المهم .. واشحنها بعلاقتك بربنا .. وبالناس الي بتحبهم .. وبالراحة المناسبة .. الطريق طويل .. محتاج الطاقة عشان تكمل

13. الفرص موجودة طول الوقت .. متزعلش على الي فاتك .. اشتغل واجتهد عشان متضيعش الي جي

14. الي انت فيه هو فضل ربنا عليك .. اشكره على نعمه .. يزودها .. واشكر فضل الناس عليك .. يحبوا يزودوه .. ولو غلطت استغفر ربنا .. يغفرلك .. واعتذر للناس .. هيقبلوا عذرك

14. متستناش من الناس الدعم والمساعدة .. الي يعمل كده اشكره وحافظ عليه في حياتك .. ده كنز الرحلة .. وفي كل الأحوال محدش هيدعمك وهيساعدك مثل ربك

15. اطلب من الله .. واستعن بالله .. واشتكي لله .. وادع الله .. طول الوقت حياتك كلها هتتغير

16. لو حدت عن الطريق .. ارجع بسرعة .. ارجع بسرعة .. ارجع بسرعة .. مفيش وقت .. متسوفش وتقول بعدين .. مفيش وقت

17. متحلمش أحلام بسيطة .. ومتحطش أهداف صغيرة .. احلم وحط أهداف كبييييييرة .. واتحرك بكل قوتك .. ولو رجعت خطوة ولا خطوات .. انت مش هتبدأ من الصفر أبدا .. لما ترجع بسرعة هتلاقي نفسك سبقت نفسك

18. أول حد تتعلم منه هو نفسك .. واتعلم من كل واحد شاطر في مجاله شطارته .. واتعلم من كل واحد وقع سبب وقوعه .. عشان احنا بشر .. ووارد نكرر تصرفات بعض

19. مفيش حد كامل .. مترفعش سقف توقعك في الناس .. بدل ما يتهد على دماغك مع أول غلطة شفتهاله .. أو انت فاكر إنه غلطها .. عادي جدا إنك تفهم غلط .. وعادي جدا إن الناس تغلط .. خد الحلو منه وتجاوز عن خطأه .. إلا لو كان خطأه في الصميم وميتسكتش عليه .. وبرده عامله بالمعروف في كل الأحوال

20. افرح لنجاح كل ناجح بيقدم قيمة .. وادعيله .. وحاول يكون في دايرة معارفك .. وساعده بكل الي تقدر عليه

21. اقطع علاقتك بكل حد مبيحاولش يكون أحسن .. أو بيقلل من غيره .. أو بيشتكي طول الوقت

22. لو حد آذاك متئذيهوش .. ليك رب عليم بصير عدل .. بيجيب الحقوق في الدنيا والآخرة .. لو تقدر تجيب حقك من غير أذية اعمل كده .. غير كده إنت مش حمل تتحمل ذنب أذية حد .. الحساب أصعب بكتير .. إنك تكون مظلوم أرحم مليون مليون مره من إنك تكون ظالم

23. صالح نفسك وادعم نفسك وابسط نفسك .. استمتع بكل نجاح أو إنجاز أو نعمة في ايدك .. ومترفعش سقف توقعاتك من الي مش في ايدك .. اسعى تزود نفسك .. لكن لو مجاش .. ارضى بالي معاك

24. النجاح هو الطمع في فضل الله .. والسعادة هي الرضا بقضاء الله .. اطمع وارض .. هتكون ناجح وسعيد

25. خلي ربنا سبحانه وتعالى واليوم الآخر هو نيتك وعملك ونصب تركيزك .. هتلاقي كل أفكارك وضحت في عقلك .. وكل مشاعرك هديت في قلبك .. وهتلاقي ربنا سبحانه وتعالى تجاهك .. بييسرلك أمرك .. وبيجمعلك شتات نفسك .. وبيألف القلوب حولك

لو شايف الدروس دي مفيدة .. شاركها مع غيرك

#دروس_اتعلمتها
#تفكير_الناجحين
#ليدبروا_آياته

أحيانا لما تحط لنفسك هدف كبير ..

ده مبيكونش كفايه عشان يحفزك انك تشتغل ..

عقلك اللاواعي الي بيحب الراحة ممكن يقولك .. الهدف ده أصعب من إننا نحققه بإمكانياتنا الحالية

وسعتها كلامه هيكون صح .. وممكن ده يخليه يزود عليك ويقولك .. ايه الداعي للفرهدة دي؟

وعلاج النقطة دي .. هو إنك تكسر الهدف ده لأهداف صغيرة توصلك للهدف الكبير بشكل منطقي ومفرودة على وقت مناسب لكل هدف

بكده تقدر تشتغل وانت محفز بعقلك الواعي الي بياخد الخطوات وعقلك اللاواعي كمان الي هيحب إنه بيحقق إنجازات وخصوصا لما تدلعه بالاحتفال بإنجازاتك دي مع كل خطوة بتاخدها

#دروس_اتعلمتها
#تفكير_الناجحين
#زود_انتاجيتك

عمرك ما هتبطل حاجة بتحبها !!

اكره ما يؤذيك

#دروس_اتعلمتها
#تفكير_الناجحين

متعالجش الأعراض .. عالج الأسباب ..

انخفاض الطاقة .. عرض

انخفاض الحماس .. عرض

الإحباط .. عرض

التشتت .. عرض

بقالك سنين في نفس مكانك .. عرض

الأسباب ..

هي إنك مش محدد أهدافك ..

مش حاطط خطة لتحقيق الأهداف دي بشكل واضح ..

وبالتالي مش بتسعى عشان تحققها بجد وبتلف حوالين نفسك ..

مش بتوازن بين روحك (علاقتك بربنا) .. وعقلك (وظيفتك) .. وقلبك (الحاجات الي بتسعدك) .. وجسمك (صحتك وراحتك)

محاوط نفسك بناس دمهم خفيف .. لكنهم محبَطين أو محبِطين .. أو على أقل تقدير سلبيين مبيحققوش حاجة في حياتهم

بتضيع وقتك في اللاشيء بدل ما يكون التطوير والكورسات والكتب والبودكاستات الملهمة هي وقتك الحقيقي

ركز على الأسباب .. عشان تقدر تتحرك .. وقتك هو أغلى حاجة تملكها .. هتندم بعد السنين ما تعدي .. استغله دلوقتي

#التطوير_هو_الحل
#دروس_اتعلمتها
#تفكير_الناجحين

- الدنيا صعبة اوي .. وكل خطوة بصعوبة .. وممكن بكارثة ..
= ده طبيعي جدا !!

- طبيعي إني ألاقي كل خطوة أصعب من الي قبلها بالشكل ده؟
= آه طبعا .. امال هتتعلم ازاي .. وهتكون أقوى ازاي؟

وبعدين لو كان الطريق سهل .. ده معناه انك ماشي غلط ومش هتحقق نتايج تذكر

النجاحات العظيمة .. بتيجي من تضحيات عظيمة .. وتعب وألم ..

دي طبيعة الدنيا .. لو كانت سهلة كان حققها كل الناس ..

ولو كانت مستحيلة مكانش حققها حد من الناس ..

لكنها صعبة .. عشان كده بيحققها قليل من الناس .. الي مستعدين يبذلوا ويضحوا ويصبروا

وهو ده الفرق بين الناجحين وغيرهم

#دروس_اتعلمتها
#تفكير_الناجحين

روشتة النجاح المختصرة ..

عشان تحقق النجاح .. محتاج للـ 6 حاجات دي ..

1

إنك تكون محدد هدفك بشكل مكتوب وواضح ومنطقي

كبير وتقدر تقسمه على أساس سنوي وربع سنوي وشهري ويومي

وتراجعه بشكل مستمر

2

إنك تشتغل على عقليتك إنها تكون عقلية نمو

إن نجاحك بيحدده الي بتقدر تعمله .. مش الي ناقصك ومش معاك .. وبالتالي تركز على الي معاك

وبكده هتطور نفسك باستمرار عشان تقدر تستغل الي معاك بأفضل صورة ممكنة

وده لما تكون مؤمن ان رصيد إيمانك بالله ومعرفتك ومهاراتك .. أهم من كل ما تمتلكه أو متمتلكوش

3

إنك تقاوم عقلك اللاواعي الي عايزك ترتاح وتتمتع بالمتع المؤقتة

وده لما تفكر نفسك بأهدافك وأثر تحقيقها عليك

وبالتالي تركز على التصرفات الصحيحة في كل دقيقة انت عايشها

4

إنك توازن بين روحك (علاقتك بربنا) وبين عقلك (وظيفتك والي بتعمله كل يوم) وبين قلبك (الحاجات الي بتبسطك) وبين جسمك (صحتك وراحتك)

اكتر حاجة بتاخد طاقتك هي شغلك .. عشان كده انت محتاج المحاور التلاتة الروح والقلب والجسم عشان تلاقي رصيد تقدر تسحب منه وبالتالي تقدر تأدي بأعلى أداء ممكن

استثمارك في علاقتك بربنا وسعادتك بنعمه عليك وصحتك ونومك وأكلك بيعود عليك بقوة كبيرة

5

إنك تصبر نفسك على الصعوبات والإحباطات الي طبيعي تحصل لإنك في طريق النجاح .. الصعوبات دي هي الي بتفرق بين الناجحين الي بيعدوا الصعوبات وبين غيرهم الي بيستسلموا

وصبرك بيجي من إيمانك بالله وإنه مطلع عليك وبيكافئ الي بيسعى بأكتر من الي بيعمله .. وحجم معرفتك ومهاراتك الي بتخليك بتدور على الحلول باستمرار

متيأسش ومتحبطش لإن ربنا معاك .. لو وقعت هتقوم تاني .. هترضى عن الي حصل وتقول ده قدر ربنا .. لكن مش هترضى عن أدائك .. وهتحسنه وتطوره عشان المحاولة الجاية هتكون فيها أقوى .. وربنا كان بيعلمك بالي حصل

6

كل الكلام الي قلتهولك ده مش هيكون حقيقة تحس بفرقها في حياتك غير لما تشتغل عليه وتقيمه كل يوم ..

تحدد أهدافك وتراجعها كل يوم .. تراقب وقتك وتستغله في التصرفات الصحيحة ومتضيعهوش في الي ملوش لازمة .. تفكر ازاي تكون كل يوم أحسن من اليوم الي قبله ..

وده مش هيحصل غير لما تقيم نتايجك كل يوم .. وتعرف ايه الي خلاك متحققش أهدافك النهارده ومتعملوش تاني .. وايه الي هيخليك تحقق أحسن وتشتغل عليه .. بدون توقف

ربنا يعلمنا ما ينفعنا وينفعنا بما علمنا

هتحقق نجاحك لما تكون قصتك هي الي شاغلاك عن كل قصص العالم

لما يكون وقت فراغك هو المذاكرة والتطوير مش الحواديت والماتشات الي بتشوف غيرك هو الي بينجح فيها

لما تدمن صفحات الكتب .. وفيديوهات الكورسات .. ومتابعة المقالات

ده الفرق بين الناجحين وغيرهم ..

الناجحين بيعملوا نجاحهم .. وغيرهم بيتفرج عليهم وهم بيعملوها ..

اعمل زيهم هتكون منهم

#تفكير_الناجحين

السلام عليكم
بكره ان شاء الله عندنا محاضرة كيف تكتسب عقلية النجاح
هبعت اللينك بتاع المحاضرة هنا بكره الصبح
معاد المحاضرة هيكون الاربع 27 الساعة 6:30 مساء ان شاء الله

مستنييكم

ايه الفرق بين اللي بيشتغل طول الوقت وبين اللي بيوصل فعلا ؟؟

في ناس بتشتغل 12 ساعة في اليوم 12 شهر في السنة
وتيجي في الآخر تحس إنها ما اتحركتش خطوة حقيقية كبيرة
وفي نفس الوقت ناس تانية بتعمل نقلة كبيرة كل سنة في عمرها !!

ليه؟
الفرق مش في كمية الشغل .. الفرق في التركيز على الهدف مش على الشغل

لما تفضل مركز في المهام اليومية .. هتغرق في التفاصيل .. هتدوّر على الكمال .. وممكن تنسى ليه بدأت أصلا !!

لكن لما تركّز على الهدف النهائي .. كل مهمة هتبقى وسيلة مش غاية

اللي بيكتب خطة .. مش اللي بينفذها حرفيًا .. هو اللي بيغيّر اللعبة!!

الناس اللي بتنجح مش أكتر ذكاء .. لكن عندهم بوصلة بتقولهم:
"هل اللي أنا بعمله النهارده بيقربني لهدفي؟ ولا لأ؟"

اللي بيبص على الهدف بيشوف الصورة الكبيرة ..
أما اللي غرقان في التفاصيل، بيشوف بس الحاجة اللي قدامه

والنتيجة إنك هتلاقي نفسك متحمس للي بتعمله من غير ما يسحبك في دوامة مملة من التفاصيل الي ممكن تتوهك معاها .. وتلاقي نفسك بتلف حوالين نفسك من غير نجاح كبير حقيقي

وعشان تقدر تعمل ده ..
1. حدد أهدافك بالشكل الصحيح
2. اكتبها واقراها باستمرار
3. حطلها خطة عمل في شكل خطوات
4. امشي في خطواتك وانت مركز على الهدف مش الي بتعمله
5. لما تقابل صعوبة أو تأخر في خطتك .. قيّم أدائك وحدد سبب التأخر واشتغل إنه ميحصلش تاني
6. علي على نفسك وارفع أهدافك عشان تحمس نفسك باستمرار وتحقق أكتر كل يوم
7. استمر في التعلم والتقييم والتصحيح في كل مرحلة من حياتك

قولي في التعليقات .. ايه أكتر حاجة بتشتتك وبتعيقك عن تحقيق أهدافك .. عشان نشتغل عليها سوا مع بعض

شارك البوست ده مع أصدقائك .. ممكن يعمل فرق كبير في طريقة تفكيرهم ونتايجهم

#تفكير_الناجحين

ازاي تقدر تحقق أكبر إنجازات بشكل مستمر في حياتك ؟؟

هم ٥ حاجات ..

١. انك تحط أهداف طموحة عالية -لكن مش أعلى من قدراتك بكتير- بحيث إنها تحفز قدراتك ومجهودك .. وتكون كاتبها وبتقراها كل يوم

٢. انك تقرا وتتعلم طول الوقت في المجال بتاعك .. التطوير مش بس بيضيف ليك معلومات وقدرات .. لكنه بيضيف ليك طاقة مش طبيعية بتخليك تحس إنك فعلا هتقدر تحقق الأهداف بتاعتك

٣. انك تشتغل بكل قوتك .. وتستعين بالله تعالى على كل صعب .. وتصحح نيتك من كل عمل بتعمله .. عشان يوفقك ربنا لكل خير .. والتوفيق ده هو فرق السما من الأرض في العمل ونتايجه .. وتستفيد بأجره في الدنيا والآخرة

٤. انك تتابع مستوى أداءك والنتايج الي بتحققها .. فلما تحقق نتيجة كويسة تسأل نفسك ايه السبب الي خلاك تحقق .. ولما متحققش النتيجة الي انت عايزها تسأل نفسك ايه الي خلاك متحققش وبالتالي تصلح الخطأ ده المرة الجاية

٥. انك تحتفل بكل نصر بتحققه ولو كان صغير .. وتفرح وتفرح الي حواليك .. وتاخد نصيبك من الراحة كل فترة بشكل مناسب .. عشان تقدر تكمل المشوار .

#تفكير_الناجحين

عملت انجاز .. الي بعده

خرجت من ازمة .. الي بعده

انت جوا أزمة .. الي بعده

اعرف ان الحال لا يدوم .. وان كل شيء بقدر الله وتوفيقه وحكمته

فالزم العمل والاستعانة بالله

هتلاقي الخير في طريقك

رب الخير لا يأتي إلا بالخير

أحسن الظن بالله وأحسن العمل .. يفتح لك خزائن رحمته وفضله

#دروس_اتعلمتها
#أحبك_ربي
#تفكير_الناجحين

مقالة مهمة جدا

https://www.facebook.com/share/1C5GBsgbes/?mibextid=wwXIfr

لما تعمل حاجة كويسه جديدة عليك .. أو دمها تقيل على قلبك ..

وتحس عقلك بيتألم وانت بتعملها ..

اعرف .. إن ده ألم مؤقت .. هتستفيد بعده سعادة طويلة ..

لإن مفيش حاجة مفيدة مش متعبة ..

ومفيش حاجة غير مفيدة إلا وسهلة ..

محمد علي كلاي كان بيقول .. أنا بحسب وقت التمرين من أول ما عضلاتي بتوجعني ..

لإن ده معناه إن عضلاته بدأت تتمرن فعلا من أول ما اتوجعت !!

اتحمل الألم المؤقت .. وابعد عن المتع المؤقتة .. عشان توصل للسعادة الطويلة .. الي هتغير حياتك للأفضل

وعايز أفكرك بالكلمة الي دايما بقولها ..

الي بتعمله دلوقتي هو الي بيأكلك عيش ..

والي انت بتتعلمه دلوقتي .. هو الي هيخليك تمتلك فرن عيش ..

ركز .. اجتهد .. اتعلم .. اتطور باستمرار

#صباح_النجاح
#دروس_اتعلمتها
#تفكير_الناجحين
#التطوير_هو_الحل