مش عاجبك العالم وعايز تغيره؟

غير نفسك .. هو ده عالمك انت .. وهو ده الي انت مسئول عنه في المقام الأول .

#التطوير_هو_الحل

#تفكير_الناجحين

ازاي تحقق أي هدف مهما كان كبير وصعب ؟

أي هدف مهما كان كبير .. بيتحقق بطريقة واضحة ملهاش بديل

الإنجازات الكبيرة = تصرفات صحيحة صغيرة + إصرار عليها + ترك كل ما يعطل عنها + وقت.

هنتكلم عن نقطه نقطة منهم ..

التصرفات الصحيحة الصغيرة .. هي تصرفات في الطريق الصحيح الي انت عايز توصله .. مش أي تصرف في أي اتجاه .. وعشان تعرف ايه التصرف الصحيح لازم تذاكر كويس الطريق بتاعك وتعرف ايه الي بيحقق فيه النجاح الصحيح .. وتقدر تسأل الخبراء .. لإنهم هيوفروا عليك الوقت والمجهود الي بيضيعوا في اللف والدوران.

محتاج كمان إن يكون عندك إصرار في الاستمرار على التصرفات دي .. تفضل مكمل مهما كانت العوائق .. ومهما تعبت .. ولما تقع تقوم تاني عادي جدا .. وبالتالي لازم تشيل كل الحاجات الي بتعطلك .. لو بتضيع وقت في حاجات تانيه .. وقف التعطيل .. لو بتحبط لأي سبب .. قاوم الإحباط .. اشتغل على عقلك .. معتقداتك وأفكارك .. ثق في الله تعالى إنه هيساعدك لما تستعين بيه .. ودايما هييسرلك الأسباب للنجاح لما تكون ماشي في الاتجاه الصحيح.

محتاج لوقت طبيعي تمشي فيه في الخطوات دي .. عشان تحقق النجاح .. مفيش نجاح حقيقي هيجي في يوم وليلة .. ولا في نجاح مستمر هيجي من خبطة في يوم .. النجاح بيجي للي سلوكهم هو سلوك الناجحين .. الي بياخدوا الطريق الصعب وبيصروا عليه لغاية الآخر.

الاستمرار على طريق النجاح نجاح .. الفكرة إنك لازم تستمتع طول ما انت ماشي في الطريق .. تستمتع بالنجاحات الصغيرة .. وتحتفل بيها .. وهتديك دافع عشان تكمل .. لإنك حققت نجاح أهه .. يبقى الباقي جي في الطريق .. بس محتاج أكمل.

أهم حاجة لازم تشتغل عليها هي معتقداتك وأفكارك .. في نفسك والي بتعمله .. وضوح الرؤية .. بيساعدك على الطريق .. إنك تكون عارف إنت رايح فين وليه .. ده الي بيديك الاتجاه والطاقة عشان توصل للهدف الي انت عايز تحققه.

#تفكير_الناجحين

التعلم بالأخطاء.

لما كنت صغير .. زيك زي أي طفل .. بيتعلم بطريقة جميله جدا .. بيتعلم بالأخطاء .. كل ما بيعمل حاجه غلط .. بيتعلم منها .. سواء عن طريق إنه بيفكر ازاي يعملها تاني صح .. أو حد يقوله ان الي عمله كان غلط .. مبيكونش عندك مشكله إنك تغلط .. وبالعكس كنت بتضحك على نفسك .. وبتضحك الي حواليك .. وكانوا بيعلموك .. وبتتعلم .. وبتكمل.

كبرنا ونسينا .. إن عادي إننا نغلط .. وبقينا نتكسف من أخطاءنا .. ونعيش فترات طويلة محرجين ومحبطين .. مع إن في الحقيقة .. الأخطاء والتعلم منها .. هي أحسن طريقة عشان نتطور ونكبر .. من أول ما كنا أطفال لغاية ما نموت.

الخطأ هو جزء من السلوك البشري .. ربنا ركب فينا القدرة على المعرفة والعمل .. وركب فينا الجهل والكسل .. ركب فينا اننا نقدر نكون وجهات نظر .. ممكن تكون صح وممكن تكون غلط .. بتتبني شخصياتنا بعوامل كتيرة .. منها الوراثي .. ومنها الي بناخده من تأثير أهلنا .. ومنها الي بناخده بتأثير البيئة الي نشأنا فيها .. ومنها الي بنضيفه لنفسنا .. كلها عوامل بتأثر على شخصياتنا وتصوراتنا وتصرفاتنا.

مشكلتنا إن كتير مننا بيفتكر إن شخصيته وتصوراته وتصرفاته .. حاجات خارجة بالكامل عن تأثيرنا .. وإننا كده وهنفضل كده .. ومتحاسبنيش .. أصل أنا طبيعتي عصبي .. أنا مبقدرش أتحكم في أعصابي .. وكلام زي ده .. مع إن في الحقيقة .. الإنسان قادر على تغيير حاجات كتير في شخصيته وتصوراته وتصرفاته .. وبالتالي النتايج الي بيحققها.

منقدرش نهمل تأثير الظروف علينا بطبيعة الحال .. لكن تعالى نحلل مع بعض النتايج الي بتحققها بتيجي منين .. لو افترضنا إن مفيش ظروف حواليك .. افتراض بس دلوقتي .. وبعدين هنتناقش في تأثيرها عليك .. يلا بينا ..

النتايج بتيجي من تصرفاتك .. وتصرفاتك بتحصل بسبب أفكارك .. وأفكارك بتكون نتيجة معتقداتك جوا عقلك .. معتقداتك عن نفسك وعن الي عايز تحققه وعن الناس وعن النجاح ..

معنى كده إن المعادلة .. معتقدات > أفكار > تصرفات = نتايج.

مش هتكلم طبعا عن الناس الي بتكرر نفس التصرف .. وفاكره إن النتيجة ممكن تتغير .. زي ما قال عنهم أينشتاين .. من الجنون تكرار نفس التصرف مع توقع نتيجة مختلفة !!
لكن هتكلم عن الي بيحاولوا يغيروا النتايج عن طريق تغيير التصرفات .. وده كويس .. لكن مش عميق كفاية .. وعشان كده كتير مننا مش بيقدر يغير التصرفات بشكل عميق .. وبيرجع لنفس التصرفات تاني .. بسبب إنه أهمل تغيير الأفكار والمعتقدات .. الي بيسببوا التصرفات دي أصلا.

نرجع تاني للأخطاء .. مهما كانت قوتك .. لو عايز فعلا توصل لأفضل نسخة من نفسك .. انت محتاج تتعلم من أخطاءك .. الي هي التصرفات الغلط الي عملتها بناء على أفكارك ومعتقداتك .. من الآخر .. أخطاءك هي من صميم شخصيتك وتصوراتك ومعتقداتك وأفكارك .. بالتالي .. عشان تحقق أقصى نتايج ونجاح .. إنت محتاج تتعلم من سلوكك الغلط.

اتفقنا إن شخصيتك وتصوراتك ومعتقداتك وأفكارك .. بتتشكل من مصادر مختلفة .. من أهمها .. اختياراتك انت .. وده الي بيؤمن بيه أصحاب نظرية عقلية النمو وعقلية الثبات .. عقلية النمو مفهومها .. إن عقلك بيكبر كل ما بتكبره .. وبيثبت كل ما بتثبته .. يعني ايه ؟

يعني لما بتشتغل على طريقة تفكيرك .. وبتتعلم من أخطاءك .. والصعوبات الي بتدخل فيها .. كل ما عقلك بينمو .. لكن لو ما اشتغلتش على طريقة تفكيرك ومغيرتهاش .. هتفضل بنفس العقلية .. وبالتالي نفس التصورات .. وبالتالي نفس التصرفات .. وبالتالي نفس النتايج.

طيب .. هنا يجي السؤال .. في حاجات خارجة عن إرادتي .. خارجة عن قدرتي على تغييرها .. وده صحيح .. ومن الخطأ إننا نفترض إنها مش موجوده .. انت مش معزول عن العالم بكل تفاصيله .. لكن تيجي هنا القاعدة .. "الي تقدر تغيره غيره .. والي متقدرش تغيره .. تقدر تغير تأثيره عليك" .. وكل ده يرجع لنفس المعادلة .. إنك تغير معتقادتك وأفكارك وبالتالي تصرفاتك .. عشان توصل لنتايج أفضل.

دانيال بينك .. أحد أفضل مفكري الإدارة في العصر الحديث قال .. "واحدة من أفضل طرق تنبؤ أقصى النجاح .. ليس الموهبة الطبيعية .. ولا حتى الخبرة في تخصصك .. وإنما كيف تشرح إخفاقاتك ورفضك"

لو عايز تعرف الناس الي بيحققوا أقصى نجاح .. شوفهم بيشرحوا لنفسهم ولغيرهم .. سبب أخطاءهم ورفض الآخرين ليهم.
بدل ما يرموا المسئولية على غيرهم .. ويبرروا ويتعذروا لنفسهم .. بتلاقيهم بيفكروا في نفسهم أول حاجة .. عملوا ايه غلط !!

نرجع لمنهجية التعلم بالأخطاء .. ايه الخطوات العملية الي المفروض أعملها عشان أكون أفضل نسخة من نفسي ؟

١- انت حاطط لنفسك أهداف كبيرة تحققها لنفسك .. وعملت خطة عمل لنفسك .. تمشي عليها بشكل يومي .. شوف في نهاية كل يوم .. ايه الي عطلك عن تحقيق أهدافك اليومية .. واكتب الأخطاء دي.

٢- اعترف بأخطاءك .. وحللها .. بالطريقة الي قلنا عليها .. شوف ايه الي انت عملته غلط .. وتحمل مسئوليتك عنه ..

والي معملتوش دوّر على مسئوليتك في تأثير الآخرين عليك.

٣- كده انت عرفت غلطك .. تعالى نحلله أكتر .. ونعرف سببه .. وهنا نيجي للمعادلة ..
معتقدات > أفكار > تصرفات = نتايج ..
متحللش التصرفات بس .. إنما حلل الأفكار الي ورا تصرفاتك .. وحلل المعتقدات الي ورا الأفكار .. ازاي ؟
دايما اسأل نفسك .. ليه ؟ .. واعرف السبب الي وراه .. واسأل تاني .. ليه ؟ واعرف السبب الي وراه .. وتفضل كده تفكر بعمق أكتر في كل خطوة .. وبالمناسبة مش هتقدر تعرف كل الحاجات العميقة دي من أول مرة .. هتفضل تتعلم عن نفسك أكتر كل يوم .. وتفهم أخطاءك وتحللها وتفهم نفسك أكتر كل يوم.

٤- عالج المعتقدات والأفكار والتصرفات الغلط .. ببدايل أفضل منها .. عشان تقدر توصل لنتايج أفضل .. وغالبا مش هتقدر تحط البدايل الأفضل لوحدك بمعرفتك الحالية الي سببت الخطأ ده أصلا .. انت محتاج تتعلم ايه الصح الي كان لازم تعمله .. ومحتاج تراجع الخبراء .. دايما بقول .. كلمة من أستاذ في مجالك توفر عليك سنين من اللف والدوران.

٥- هتكتب الخطأ بشكل يومي .. وهتكتب التصحيح على مستوى المعتقدات والأفكار والتصرفات .. وبعدين تقيس نتايج التصحيح بشكل يومي .. عشان تقيس ايه الي قدرت تحققه من تطور .. خلي بالك من نقطة .. من غير القياس اليومي .. والمتابعة لنتايج التطور .. غالبا مش هتقدر تغير حاجة .. الأخطاء هي من صميم تصرفاتك الي اتبنت في سنين .. وعشان تغيرها .. محتاج لوقت ومتابعة مستمرة .. ومحتاج لإعادة تقييم الي عدلته .. لإنك ممكن تكون محتاج تعدله تاني وتالت .. وبالتالي تتطور أكتر وتكون أحسن كل يوم.

٦- آخر نقطة هنتكلم عنها .. وهي دي الضمان الوحيد لتحقيق التطور .. هو الاستمرار ..
طبيعي تلاقي الدنيا صعبة في البداية .. وطبيعي تلاقي نفسك بتقع في نفس الخطأ تاني .. لكن مقدار نجاحك وتطورك .. هو مقدار مقاومتك وإصرارك واستمرارك في التغيير.

هكلمك عن حاجتين مهمين جدا عشان تقدر تقاوم رجوعك للخطأ القديم ..

أولا .. إنك تفكر في نتيجة الخطأ ده .. الي دايما بتخليك مدايق من نفسك وبتحسسك إنك بتفقد فرص كتير .. كل مرة تلاقي نفسك بترجع لنفس التصرف .. افتكر النتيجة السيئة.
ثانيا .. إنك تعرف إنك مش لوحدك .. وإن ربنا هيعينك طول ما انت بتستعين بيه .. وإنك تقدر تكون إنسان أحسن .. وإن الخطأ الي عملته والفشل الي وقعت فيه هو فرصتك عشان تتعلم .. متقولش مش قادر أتغير .. استعين بالله وهتتغير.

معلش المقالة طويلة شويه .. بس الموضوع مهم ومحتاج يتفصل عشان الصورة تكتمل ..

مستني منك مناقشتك للمقالة والأفكار الي فيها .. وبالتوفيق عشان تكون النسخة الأفضل من نفسك .. بالتعلم من أخطاءك.

إيه الي بيخلينا نعمل للي مينفعناش .. مع إننا عارفين ؟

للأسف لسببين .. إما إنه أسهل .. أو أمتع ..

انت عارف ده معناه ايه؟

معناه إنك لما بتعمل الحاجة الي انت متعود عليها .. زي شغلك الروتيني اليومي .. انت بكده بتهرب من الحاجة الأصعب .. الي ممكن تكون أنفع ليك .. زي التخطيط أو الاستعداد أو التطوير .. دول أصعب من الشغل الروتيني اليومي .. وعقلك اللاواعي مبيحبهمش .. لإنهم ببساطة محتاجين تركيز ومجهود وتقبل للخطأ والتعلم منه ..

وطبعا كتير مننا بيهرب للي يبسطه شويه .. حتى لو هيضيع عليه وقته وعمره ومستقبله .. لإنه ببساطة أمتع !!

العقل اللاواعي .. مبيحبش المجهود .. ولا المسئولية .. عشان كده بيهرب منهم وبيبدأ يطلع مبررات وأعذار ..

هتعمل ايه بقى يا بطل؟

هتعمل زي ما بيعمل الناجحين .. بيسألوا نفسهم .. ينفعك؟

أول ما تلاقي عقلك اللاواعي بيروح للأسهل أو الأمتع .. قوله .. ينفعك؟

هتلاقيه بدأ يفكر .. وسعتها العقل الواعي هيقفشه .. وهيوقفه عند حده ..

الكلام ده مبيجيش مره واحدة .. العادة الي خدت وقت عشان تتكون .. أكيد هتاخد وقت عشان تتغير .. دي طبيعة الحياة.

لو ركزت على الي ينفعك أكتر من الي مينفعكش ..

هتلاقي نفسك بتحقق أكتر مما كنت متخيل إنك تحققه ..

والمفاجأة .. إنك هتلاقي نفسك بتحبه أكتر .. وبتعمله بفن أكتر .. وبتستمتع بتفاصيله .. وتبقى دي عادتك الجديدة.

#تفكير_الناجحين
#التطوير_هو_الحل

الي بتحلم بيه .. إن شاء الله هتحققه ..

بس انت تحلم وتسعى ..

ولما تعطل .. اتعلم وحاول تاني واستعن بالله

هتوصل لأكتر من حلمك

#دروس_اتعلمتها
#التطوير_هو_الحل
#تفكير_الناجحين

أسهل حاجة إنك تقول انا كده وطبعي كده وهفضل كده

وأصعب حاجة إنك تعدل من نفسك وسلوكك بناء على المتغيرات الي حواليك

للأسف الأول هو صاحب عقلية ثبات .. والتاني صاحب عقلية نمو

النجاح في العمل وفي العلاقات محتاج عقلية نمو .. بتراجع أفكارها ومبتخليش مشاعرها تتحكم فيها وبتطور تصرفاتها بناء على كده

الحياة طول الوقت بتتغير .. ولو مقدرتش تتغير انت كمان هتخسر أكتر بكتير مما هتكسب

#التطوير_هو_الحل
#دروس_اتعلمتها
#تفكير_الناجحين

لو كانت سهلة .. كان كل الناس حققوها

ولو كانت مستحيلة .. مكنش حد حققها

لكنها صعبة .. اختبار لكلام وأفعال الناس

الي عايز يحققها هيبذل عشانها كل الي يقدر عليه

#دروس_اتعلمتها
#تفكير_الناجحين

احسب حساباتك براحتك ..

المهم تعرف ان الحسابات كلها بايد الله ..

احسب الأول قدره عندك ..

وهتحقق أضعاف ما حسبت

#دروس_اتعلمتها

#تفكير_الناجحين

عندك حلم .. اشتغل عليه كل يوم ..

هتلاقي ناس مش مؤمنين بيك .. وناس بيقللوا منك .. وناس بيحاربوك .. كل ده مش مهم .. المهم هو انت شايف نفسك ازاي؟

شايف نفسك إنك هتنجح؟
اتعلم واسعى وصر على نجاحك .. هتنجح

شايف نفسك عندك مشاكل؟
كل مشكلة ليها حل .. كل مشكلة مؤقتة .. كل مشكلة تقدر تتحملها.. كل مشكلة هي فرصة عشان تتعلم وتكون أحسن

اشتغل عشان نفسك .. اشتغل عشان الناس المؤمنين بيك .. اشتغل عشان الناس الي انت مسئول عنهم .. وقبل كل ده .. اشتغل عشان ترضي ربك

عاداتك السيئة بتعيقك !! .. قولها .. "وبعدين؟"
أنا الي صنعتك .. وأنا الي أقدر أبدلك بعادات حسنة

زعلان على الفرص الي فاتت!!
طول ما بتتنفس .. لسه عندك فرصة عشان تكون أحسن

ربنا سبحانه وتعالى عظيم .. غفور رحيم .. بيجازي كل مجتهد .. وبيعين كل من استعان بيه .. وبيوفقك للخير .. طول ما انت بتسعى للخير .. ونيتك فيه وجهه الكريم

صحح نيتك .. اتعلم واسعى واجتهد .. وتوكل على الله .. هتحقق كل الي تتمناه.

#دروس_اتعلمتها
#تفكير_الناجحين

ازاي توصل للي انت عايزه ؟؟

هم ٤ محاور متداخلة ومتكاملة .. لازم تشتغل عليهم كلهم عشان توصل فعلا للي انت عايز تحققه .. وهم الوعي - المعرفة - الجهد - الإصرار ..

الوعي .. هو انك تكون واعي بنفسك وواعي للهدف الي انت محدده لنفسك .. وازاي هتقدر تحققه .. واعي بالموقف الي انت فيه .. واعي لمشاعرك والاتجاه الي بتروح فيه .. واعي لأخطاءك والي عملته قبل كده .. واعي لنتايج الي انت بتعمله ..

الوعي هو عكس اللاوعي .. واللاوعي هو انك تمشي بدون هدف واضح .. تمشي بعاداتك الي اتعودت عليها .. نفس التصرفات .. نفس الأخطاء .. بسبب نقص إدراكك وتحكمك في مشاعرك وأفكارك.

وأكتر حاجة بتزود الوعي .. هي التفكير في النتايج .. ايه الي هوصله لما أعمل كذا .. بتخليك تفوق .. بتخليك شايف كويس ايه الي بيحصل .. وايه حقيقة كل حاجة حواليك.

الوعي يتطلب الإدارة .. إنك تاخد خطوة ناحية الي انت عايزه فعلا .. متكونش ريشه في هوا .. والهوا هو أهواءك .. بتاخدك وتوديك من غير تحكم في نفسك.

بعد ما وعيت لنفسك .. لازم تتحكم فيها .. والتحكم ده بيكون على مستوى التصرفات .. الي أصلها الأفكار والمشاعر .. وأصلهم المعتقدات ..

لازم توعى وتتحكم في معتقداتك .. في نفسك وفي الي بتعمله .. فكر معايا في الأسئلة دي ..

هل إنت معتقد إنك هتنجح ؟
هل إنت معتقد إن من زرع حصد ؟
هل إنت معتقد إن ربنا عادل .. مش هيضيع عملك وجهدك .. وإنه هيقتص من كل ظالم .. وهيرجع الحق لأصحابه ؟
هل إنت معتقد إن الخير موجود .. وإنك لما تعامل الناس بالحسنى هيعاملوك بالحسنى ؟

لما تظبط معتقداتك .. هتتظبط أفكارك ومشاعرك .. وبالتالي تصرفاتك ..

نيجي للمحور التاني .. المعرفة .. المعرفة بتزود الوعي .. وبتزيد بالوعي ..

المعرفة مهمة جدا في كل مجالات حياتك .. دينك .. علاقاتك .. شغلك .. صحتك ..
لازم تزودها من المصادر المحترمة .. من أصولها .. عشان تعرف الأصول .. ومن حُرم الأصول حُرم الوصول .. كل حاجة في الحياة ليها أصولها .. لازم تتعلمها عشان توصل للي انت عايزه.

والمعرفة مبتجيش بالعلم من غير تطبيق .. وهنا يجي محور الجهد .. إنك تشتغل .. وتطبق الي بتتعلمه .. وبالتالي معرفتك هتزيد .. ووعيك هيزيد .. وقوتك هتزيد ..

وعشان تطبق في الأول صح .. لازم تلازم أهل العلم والفضل .. الي تقدر تتعلم منهم صح وتطبق زيهم .. كلنا محتاجين للقدوة والمثال الي نطبق شبهه .. ربنا خلقنا كده ..

ومن أهل عوامل النجاح في التطبيق .. إنك متخفش من الجديد .. متخفش تخرج من منطقة الراحة بتاعتك متخفش تعمل حاجة جديدة عليك .. ممكن تتحبس عمرك كله في نفس المكان .. اخرج منه ..

وعشان تعمل ده .. محتاج للوعي .. إنك تكون واعي إنك لازم تخرج .. ووعيك بإنك رايح منطقة جديدة .. وإنك هتكون مقريف في الأول .. وبعدين الدنيا هتمشي .. وبعدين هتحقق نجاحك ..

وأكيد محتاج للمعرفة .. الي بتديك جرعة من الطمأنينة وانت بتخطي بره منطقة الراحة .. لإن في حد قالك هتعمل ايه وايه نتيجته ..

وأكيد محتاج لبذل جهد كبير في الأول .. لإن منطقة الراحة ليها جاذبية .. بتشدك جواها .. ومش عايزاك تطلع .. في الأول هتبذل جهد مضاعف وسرعتك هتكون قليلة .. وبعدين المجهود هيكون أقل وسرعتك أكبر .. وبعدها هتنطلق.

وأكيد هتحتاج للي يساعدوك ويشجعوك عشان تخرج بأمان ودعم منهم.

نيجي للمحور الرابع والأخير .. الإصرار ..

طبيعي جدا إنك تفشل في الأول .. أو تكون مخنوق وانت بتعمل الحاجة الجديدة أو بتقابل صعوبة كبيرة .. سعتها إنت محتاج تكمل عشان تشوف النتايج وتفرح ..

وأهم عامل عشان تكتسب الإصرار في وجهة نظري .. هو الإيمان ..

الإيمان يختلف عن المشاهدة .. المشاهدة هي إنك تشوف قدامك الحاجة بعينك .. لكن الإيمان هو تصديق القلب بما لم تشاهده العين .. والعمل على أساسه .. والتعامل معاه على إنه حقيقة ..

الإيمان بيزيد بالعلم والتطبيق .. كل ما تعرف أكتر عن الحاجة .. كل ما هتصدقها أكتر .. وكل ما تطبق وتشتغل هتشوف بخبرتك نتايج شبيهة .. وكل ما كان الإنسان واعي أكتر .. كل ما صدق إيمانه أكتر .. ومشي عليه .. وبالتالي إصراره على تحقيق أهدافه .. هيكون قوي ومستمر .. حتى لو شاف قدامه صعوبات أو انتكاسات أو تأخر.

بعتذر عن طول المقالة .. بس مينفعش تختصر أكتر من كده ..

حابب أسمع رأيكم وأسئلتكم وتعليقاتكم .. ولو لاقيتها مفيدة انشرها وفيد بيها غيرك .. كل كلمة مكتوبة هي خلاصة مواقف كتيرة ودروس كتيرة اتعلمتها في حياتي .. وبتمنى توصل لكل إنسان على وجه الأرض ويستفيد بيها .. أتمنى تساعدوني في ده.

صباح الفل

#تفكير_الناجحين

أهم مهارة محتاجها الإنسان في العصر الي احنا فيه .. هي Learnability .. هي القدرة على التعلم بسرعة.

مهم جدا للإنسان إنه عقله يكون مرن بشكل كافي عشان يتواكب مع التوجهات الجديدة والتغيرات الي بتحصل كل يوم في العلوم والأسواق والوظايف .. عشان تكون الأفضل في تخصصك .. لازم تكون قابل للتعلم بشكل مستمر لإن التطور بيحصل كل يوم.

تعليمك الجامعي ملوش نفس أهمية التعلم المستمر .. وعشان كده أكبر الشركات في العالم بتهتم بالقدرة على التعلم أكتر من أي مهارة تانية .. لأنها دايما بتطلب من موظفيها إنهم يطوروا مهاراتهم ومعرفتهم بشكل مستمر.

عشان تقدر تترقى في مسارك الوظيفي إنت محتاج للقدرة على التعلم .. لإنك في كل مستوى محتاج لمجموعة مهارات ومعارف جديدة .. إذا مكتسبتهاش .. مش هتنتقل من وظيفتك للوظيفة الأعلى .. ومش هتحقق النجاح المطلوب فيها.

القدرة على التعلم برده ليها بعد تاني .. وهو عقلية النمو .. اتكلمت عنها د. كارول دويك في كتابها العقلية Mindset .. خلاصتها .. إنك تقدر تتعلم من أخطاءك .. وتحسن من نفسك كل يوم .. وتقدر تقبل تحديات جديدة .. توسع فيها من مداركك وخبراتك .. بدل عقلية الثبات .. الي بتعمل نفس الي بتعمله كل يوم .. بدون تطوير وبدون إضافة .. وبتفضل دايما محلك سر.

أينشتاين كان بيقول .. الحكاية مش إني ذكي أوي .. الحكاية إني بعافر أكتر في حل المسائل.

متوقفش مستوى علمك عند مستوى معين .. وتقول أنا مقدرش أعمل أكتر من كده .. اتعلم باستمرار .. من تصرفاتك ومن الآخرين .. زود عقلك بالعلم والخبرات الجديدة .. هتكون أفضل كل يوم.

#دروس_اتعلمتها
#تفكير_الناجحين

زعلان على الفرص الي فاتت ؟

يلا قوم عشان تستغل الفرص الجايه ..

لو معملتش كده .. هتضيع الفرص الجايه كمان!!

#تفكير_الناجحين
#دروس_اتعلمتها

25 درس اتعلمته في الطريق للنجاح ..

1. إنك تقيم تجاربك .. وتشوف 3 حاجات:
• انت عملت ايه كويس وتشوف ازاي تحسنه ..
• الي عملته غلط .. تشوفه كان غلط ليه؟ وعملته أصلا ليه؟ .. عشان متكررهوش ..
• الظروف الي عطلتك .. تشوف هتتعامل معاها بعد كده ازاي؟

2. الي في ايدك هو تحت تأثيرك .. والظروف خارج تأثيرك .. لما تركز على الي في ايدك وتقدر تعمله .. هتلاقي الظروف بتتغير حواليك .. وبتبقى في صالحك .. وسعتها هتكون جاهز للفرص اكتر .. وهتقدر تستغلها .. وهتكون جاهز لمواجهة التهديدات وتقدر تقاومها بقوتك

3. التعب والاستثمار في التعليم بيعود عليك أضعاف أضعافه .. وقت ومجهود وتكلفة وثقة

4. اسمع دايما آراء الناس حواليك .. وتشجعهم إنهم ينتقدوك .. وحتى لو جالك الانتقاد من حاقد أو حاسد .. تاخد المفيد ليك منه وتتجاهل المبالغة أو الظلم فيه

5. متخافش تخرج بره منطقة الراحة وتجرب نفسك وتختبر قدراتك طول الوقت

6. مش لازم يكون معاك كل حاجة عشان تبدأ .. ابدأ بالي معاك .. ربنا هيرزقك الي مش معاك

7. من خاف سلم .. لكن الي بيترعب خسر .. خلي الخوف وسيلة إنك تعمل الحاجة صح بخسارة أقل .. لكن متخليهوش هاجس يرعبك .. مش هتتقدم خطوة .. وهتخسر أكتر

8. متبالغش في التعامل مع نفسك .. فلا تدلعها وتسمع كلامها طول الوقت .. فتفسدها .. ولا تقسى عليها وتحملها الي متتحملوش .. فتقع منك

9. تواضع للأعلم منك .. فيعلمك ويساعدك .. وترحم الأضعف منك .. فيقبل كلامك ويساعدك

10. متنطش في الطريق فتقع على رقبتك .. ولا تمشي ببطئ فمتوصلش .. لكن اعتدل في مشيك

11. متتوقعش إن الأمور والأوقات كلها شبه بعض .. السنة فصول .. حر وبرد .. بتتبدل .. واليوم نفسه نهار وليل .. وحتى نفسك .. بتشد وبتهدي .. تكيف مع التغيير بدل ما يوقفك

12. طاقتك محدودة .. متتوقعش إنها مش هتخلص .. استغل طاقتك في المهم .. واشحنها بعلاقتك بربنا .. وبالناس الي بتحبهم .. وبالراحة المناسبة .. الطريق طويل .. محتاج الطاقة عشان تكمل

13. الفرص موجودة طول الوقت .. متزعلش على الي فاتك .. اشتغل واجتهد عشان متضيعش الي جي

14. الي انت فيه هو فضل ربنا عليك .. اشكره على نعمه .. يزودها .. واشكر فضل الناس عليك .. يحبوا يزودوه .. ولو غلطت استغفر ربنا .. يغفرلك .. واعتذر للناس .. هيقبلوا عذرك

14. متستناش من الناس الدعم والمساعدة .. الي يعمل كده اشكره وحافظ عليه في حياتك .. ده كنز الرحلة .. وفي كل الأحوال محدش هيدعمك وهيساعدك مثل ربك

15. اطلب من الله .. واستعن بالله .. واشتكي لله .. وادع الله .. طول الوقت حياتك كلها هتتغير

16. لو حدت عن الطريق .. ارجع بسرعة .. ارجع بسرعة .. ارجع بسرعة .. مفيش وقت .. متسوفش وتقول بعدين .. مفيش وقت

17. متحلمش أحلام بسيطة .. ومتحطش أهداف صغيرة .. احلم وحط أهداف كبييييييرة .. واتحرك بكل قوتك .. ولو رجعت خطوة ولا خطوات .. انت مش هتبدأ من الصفر أبدا .. لما ترجع بسرعة هتلاقي نفسك سبقت نفسك

18. أول حد تتعلم منه هو نفسك .. واتعلم من كل واحد شاطر في مجاله شطارته .. واتعلم من كل واحد وقع سبب وقوعه .. عشان احنا بشر .. ووارد نكرر تصرفات بعض

19. مفيش حد كامل .. مترفعش سقف توقعك في الناس .. بدل ما يتهد على دماغك مع أول غلطة شفتهاله .. أو انت فاكر إنه غلطها .. عادي جدا إنك تفهم غلط .. وعادي جدا إن الناس تغلط .. خد الحلو منه وتجاوز عن خطأه .. إلا لو كان خطأه في الصميم وميتسكتش عليه .. وبرده عامله بالمعروف في كل الأحوال

20. افرح لنجاح كل ناجح بيقدم قيمة .. وادعيله .. وحاول يكون في دايرة معارفك .. وساعده بكل الي تقدر عليه

21. اقطع علاقتك بكل حد مبيحاولش يكون أحسن .. أو بيقلل من غيره .. أو بيشتكي طول الوقت

22. لو حد آذاك متئذيهوش .. ليك رب عليم بصير عدل .. بيجيب الحقوق في الدنيا والآخرة .. لو تقدر تجيب حقك من غير أذية اعمل كده .. غير كده إنت مش حمل تتحمل ذنب أذية حد .. الحساب أصعب بكتير .. إنك تكون مظلوم أرحم مليون مليون مره من إنك تكون ظالم

23. صالح نفسك وادعم نفسك وابسط نفسك .. استمتع بكل نجاح أو إنجاز أو نعمة في ايدك .. ومترفعش سقف توقعاتك من الي مش في ايدك .. اسعى تزود نفسك .. لكن لو مجاش .. ارضى بالي معاك

24. النجاح هو الطمع في فضل الله .. والسعادة هي الرضا بقضاء الله .. اطمع وارض .. هتكون ناجح وسعيد

25. خلي ربنا سبحانه وتعالى واليوم الآخر هو نيتك وعملك ونصب تركيزك .. هتلاقي كل أفكارك وضحت في عقلك .. وكل مشاعرك هديت في قلبك .. وهتلاقي ربنا سبحانه وتعالى تجاهك .. بييسرلك أمرك .. وبيجمعلك شتات نفسك .. وبيألف القلوب حولك

لو شايف الدروس دي مفيدة .. شاركها مع غيرك

#دروس_اتعلمتها
#تفكير_الناجحين
#ليدبروا_آياته

أحيانا لما تحط لنفسك هدف كبير ..

ده مبيكونش كفايه عشان يحفزك انك تشتغل ..

عقلك اللاواعي الي بيحب الراحة ممكن يقولك .. الهدف ده أصعب من إننا نحققه بإمكانياتنا الحالية

وسعتها كلامه هيكون صح .. وممكن ده يخليه يزود عليك ويقولك .. ايه الداعي للفرهدة دي؟

وعلاج النقطة دي .. هو إنك تكسر الهدف ده لأهداف صغيرة توصلك للهدف الكبير بشكل منطقي ومفرودة على وقت مناسب لكل هدف

بكده تقدر تشتغل وانت محفز بعقلك الواعي الي بياخد الخطوات وعقلك اللاواعي كمان الي هيحب إنه بيحقق إنجازات وخصوصا لما تدلعه بالاحتفال بإنجازاتك دي مع كل خطوة بتاخدها

#دروس_اتعلمتها
#تفكير_الناجحين
#زود_انتاجيتك

عمرك ما هتبطل حاجة بتحبها !!

اكره ما يؤذيك

#دروس_اتعلمتها
#تفكير_الناجحين

متعالجش الأعراض .. عالج الأسباب ..

انخفاض الطاقة .. عرض

انخفاض الحماس .. عرض

الإحباط .. عرض

التشتت .. عرض

بقالك سنين في نفس مكانك .. عرض

الأسباب ..

هي إنك مش محدد أهدافك ..

مش حاطط خطة لتحقيق الأهداف دي بشكل واضح ..

وبالتالي مش بتسعى عشان تحققها بجد وبتلف حوالين نفسك ..

مش بتوازن بين روحك (علاقتك بربنا) .. وعقلك (وظيفتك) .. وقلبك (الحاجات الي بتسعدك) .. وجسمك (صحتك وراحتك)

محاوط نفسك بناس دمهم خفيف .. لكنهم محبَطين أو محبِطين .. أو على أقل تقدير سلبيين مبيحققوش حاجة في حياتهم

بتضيع وقتك في اللاشيء بدل ما يكون التطوير والكورسات والكتب والبودكاستات الملهمة هي وقتك الحقيقي

ركز على الأسباب .. عشان تقدر تتحرك .. وقتك هو أغلى حاجة تملكها .. هتندم بعد السنين ما تعدي .. استغله دلوقتي

#التطوير_هو_الحل
#دروس_اتعلمتها
#تفكير_الناجحين

- الدنيا صعبة اوي .. وكل خطوة بصعوبة .. وممكن بكارثة ..
= ده طبيعي جدا !!

- طبيعي إني ألاقي كل خطوة أصعب من الي قبلها بالشكل ده؟
= آه طبعا .. امال هتتعلم ازاي .. وهتكون أقوى ازاي؟

وبعدين لو كان الطريق سهل .. ده معناه انك ماشي غلط ومش هتحقق نتايج تذكر

النجاحات العظيمة .. بتيجي من تضحيات عظيمة .. وتعب وألم ..

دي طبيعة الدنيا .. لو كانت سهلة كان حققها كل الناس ..

ولو كانت مستحيلة مكانش حققها حد من الناس ..

لكنها صعبة .. عشان كده بيحققها قليل من الناس .. الي مستعدين يبذلوا ويضحوا ويصبروا

وهو ده الفرق بين الناجحين وغيرهم

#دروس_اتعلمتها
#تفكير_الناجحين