اجتي نامت بصفي على حافة الفراش .... اول مره اشوف مره بهالملابس ونايمه بصفي ... وحلالي ... بس مترهم اتقربلها بعد الي حجيته ... راح أتحس بيه ضعيف وماعندي كلمه وفوگاها باجر مسافر وهاي دنيا اني گلت كدام امي البنيه معذوره اذا اخذها هسه ويصير بيه شي بالطريق وتطلع حامل يتهموها بشرفها ومحد يصدك اني الي اخذتها ... يامن يلزمني فاطمه هسه )
تعالي اتقربي ليش نايمه على الحافه
زبيده: اتقربت ومنطيته ظهري
حسن : مره ثانيه من انتِ جوه واخوتي موجودين انتبهي على الخمار مينزل اكثر من جوه الرمش ومن فوگ تنزلي على حاجبج
زبيده : ان شاء الله
حسن : بقلبي شراح يخلصها هاليله حالي مثل الي يشوف العسل وميكدر يضوگه ... بقيت اتصفن .... ورا اكثر من ساعه
صحتها بصوت ناصي زبيده .... مجاوبت مديت راسي لگيتها نايمه .... مديت ايدي لزمت قماش ثوبها ناعم طمعت ... مشيت ايدي على جسمها ... وشعرها (الله لا ينطيج فاطمه ) ....شلت الچرچف من عليها .... شفت برجلها حجل .... گمت فتحته من رجلها بقلبي فدواتج يمه على هالمره.... باجر اني مسافر انزعها الحجل لحد يشوفه
زبيده: من بدا يتلمس جسمي حسيت عليه وقلبي راد يطلع من مكانه من الخوف ...نزعني حجلي گلت هذا ناوي ... بس من رجع تمدد بصفي ارتاحيت ...
حسن: افكر واجاوب نفسي ( وين حبك لزهره شو بس شفت زبيده روحك لابت عليها .....اي زهره تبقى بقلبي احبها بس هاي مرتي حلالي هم الها حقوق عليه ... نمت وفزيت على صلاة الفجر لگيتها نايمه قريب عليه .... زبيده .. زبيده
زبيده : نعم
حسن :گومي صلي
زبيده : صباح الخير ..... حسن عاكد حاجبي صباح الخير
زبيده: بقلبي اف شلون صباح بحاجب معكود ...
حسن : حضريلي ملابس دا اسبح
زبيده : نزلت وراه انطيته ملابسه وتوضيت صعدت صليت ... وراها صعد حسن سألته شنو احضرلك ملابس تاخذها وياك
فتحت باب الكنتور اجى من ورايه بحجه يگلي على الملابس الي يحتاجها حسيته يتقصد يطخني ... طلعتله الي راده وابتعدت عنه ... لبس ملابسه اندار عليه
حسن : راح اغيب تقريبا اسبوعين السطح متوصلي العطر الي جنتي مخليته متخلي وخمارج مثل مفهمتج ...يجونا خطار
غير اخوتي ونسوانهم متنزلين واني راح انطي علم لامي ميصيحون عليج .... تنتبهين على ملابسج واسعه ميبين منها شي ومن تحتاجين شي انطي خبر لامي لو لفاطمه يوصون ابويه يجيبه ... كحل متخلين بعيونج .. صار معلوم
زبيده : صار
حسن : يله اني اتوكل تريدين شي قبل لا اطلع
زبيده : لا سلامتك .... اجى باس راسي وطلع ...

زبيده : ورا ما طلع حسن ...بقيت بغرفتي افكر بوضعنا اني وحسن .. اني مجبوره اكمل وياه وهو بعد صار رجلي وام علي گلتلي الرجال سند للمره بعد الام والاب ...بس شلون اكدر اكسبه واخلي يترك ام السطوح ... شغلت دماغي كمت طلعت ثوب نوم ابيض كلت اشره بالسطح حتى ام السطوح من اتشوفه تعرف تقربلي بلكت اتجوز منه من وصلت باب السطح اتذكرت ...حسن منعني اوصل للسطح ... اف رحت وديت الثوب للغرفه لفيت خماري مضبوط ونزلت ... لكيت خالتي كاعده مخدره الچاي
صباح الخير
الحجيه : صباح العافيه ... ذبي خمارج يمه ماكو احد موجود بس عمج ...الولد طلعوا .... شلونه حسون وياج البارحه
زبيده : الحمد لله
الحجيه : ايمه انتِ اتچفي شره وسمعي كلامه حتى ميصير عصبي ... هو يغار هاي اني امه مره لگاني مخليه ديرم وصابغ شفتي ... لليل اجوي حمايه ومرته وابن حمايه علينا ... ماخلاني اطلع اكعد يمهم بس سلمت وجنت مخليه طرف فوطتي على حلگي تالي اخذت مرت حمايه وكعدنا بالغرفه تحججت مريضه
زبيده : ضحكت على سوالف خالتي ...
الحجيه : يمه متصحين هاي فطيم من ورا هالراديون ... تبقى سهرانه ... ولا تسميني خالتي گولي يمه احلى بعد انه امج والحجي ابوج
زبيده : صار يمه ...رحت كعدت فاطمه ... ولج فاطمه اكعدي
خالتي تريدج
فاطمه: زبيده انت مو چنتها روحي شوفيها شرايده اعتبروني اتزوجت
زبيده : ابتسمت گومي ... اني هم ضايجه
فاطمه: شو فو المصيبه ما خلصت من امي تطلعلي زبيده
زبيده : رجعت للحجيه ...يمه ماكدرت اكعدها ... الي تريدي اني اسوي
الحجيه :يمه سويلنا ريوك ... بيض وطماطه لعمج بين ما اصلي الضحى
زبيده : سويت الريوك وتريگنا وعمي بقى يسولف ويايه ويشاقيني اذا حسن يضوجني يطرده برا البيت ... ونسوان حمويني ٢ ويانه بالبيت گمت نظفت وياهن وكعدت اتعرفت عليهن وعلى جهالهن ... الى ان صارت ساعه وحده وشويه دخلت فاطمه للهول مطفيه ... الحجيه استلمتها
الحجيه : انت اذا عمرتي بيت هاي ايدي اكصها اذا ما رجعوج العيال ورا ٣ ايام ....من اليوم لا شفت هذا الراديون يم راسج والله لا اسوي ١٠٠ وصله
فاطمه: يمه انت متعبين يوميه تعيدين نفس الحجي وابويه يگلج عوفيها شتريدين منها ....يعني اخلص من ابنج تطلعيلي انتِ

الحجيه : ولج اخوج غايب وبدرب سفر ترى اگوم اكسر راسج
فاطمه: الله يحفظه ... شطابخين اليوم للغدا
الحجيه : صبور وتمن احمر
فاطمه: اكو واحد يكعد من النوم ياكل صبور
الحجيه : فطيم لا اطلعيني من طوري ذني مو البنيات كاعدات من صباح الله ليش ما تتعلمين منهن ... طلعتيلي على عمتج فهيمه تنام للظهاري..... سعاد يمه هاي من باجر عليج انت تگعديها ما كعدت سطل مي على راسها
زبيده : سبحان الله البنيه تطلع على امها فاطمه دمها خفيف وضاربه الدنيا برجلها ومبينه قلبها طيب ماعدها لئم وخالتي هم دمها خفيف ... وطيبه وماعدها لئم ... abbas hajiومن اهل الله
گتلها يمه اني اكعدها من باجر ويايه وماطول حسن ماكو خلي تصعد تنام يمي ...
الحجيه : خوش كلام سمعتي فطيم من اليوم تصعدين يم مرت اخوج... والراديون يبقى يمي
فاطمه: سمعت سمعت .... اشرت لزبيده اصطبريلي ... كامت تضحك
زبيده : لليل صعدت فاطمه يمي بقينا نسولف ونضحك ...
فاطمه: ولج اجيب الحنه ارسملج
زبيده : لا حسن ماموجود اخاف ميقبل
فاطمه: لا عادي ماله شغله اني وامي ونسوان اخوتي نخلي ميحجي
زبيده : لعد أخليها قبل يومين ٣ من يريد يجي سويلي
فاطمه: ترى طگت روحي ...خليني احفلج
زبيده : ولج قبل ٤ ايام حافه ... انت متكدرين تكعدين لازم اتسوين شغله
فاطمه: مو متعوده هالوكت اسمع بالراديو ...
زبيده : وشبي الراديو
فاطمه: ليش مسامعه بي
زبيده لا اعرفه مثل التلفزيون صح
فاطمه: ليش عدكم تلفزيون حتى اكتل روحي
زبيده : عدنا بس بغرفة اخوتي ميقبلون نتفرج بي ... بس هم يشغلوا بليل يتفرجون افلام
فاطمه:احنه ابويه يريد ياخذلنا واحد بس رجلج ميقبل وكل ما ابويه ينوي يجيبلنا واحد حسن يصير عصبي ويگول بس ادخلوا اكسره
زبيده : لعد اسكتي لتجيبيلنا المصايب
فاطمه: هو رجلج بس من يمي يرچف من يم ( بلعت لساني ردت اغلط واجيب طاري زهره كدامها عزه نسيت هي مرته )
زبيده: اعرف ام السطوح تقصدين صاحبته
فاطمه: فتحت عيني وين شفتيها
زبيده: من دخلنا الغرفه سمعت ضرب حصو على الشباك .... اخوج ارتبك .... وتالي طلع من الغرفه ... من طلعت اشرب مي
لكيت باب السطح مفتوح كلت اشوف بوري اشرب منه لگيته واگف يسولف ويا وحده
فاطمه: اصخام وشسويتي
زبيده : كلشي ما سويت ... لان عرفت يحبها ومجبور اتزوجني سمعت حجيهم
فاطمه: يمه شايله قلب لو حجاره هاي لو اني جات لطمت على وجهي وفضحته وفضحتها

البارت6

زبيده: ابتسمت انت شخصيتج مثل شخصية نجله اختي الي ضيفتكم .... لسانكم يخرب عليكم .... اخرب عليه وتالي ينفضحون وينجبر يتزوجها عليه واني احتمال يطلگني شنو الي حصلته من لطمت ... اسكت وافكر شلون اخلي يعوفها
فاطمه: شيعوفها ولج ... هي ما مطيته مفكه طول اليوم شاغله تفكيره بسوالفها وحركاتها بس يخلص شغل يجي يركض يصعد لغرفته ينتظرها تطلع ديشوفها .... ولج هو نحس ويانا واحنه ما شايفين باب البيت بس وياها يتمضحك ويغني ويتغزل ... مو هو غير واحد يصير ... وعادي عنده طالع وجهها وشعرها بالسطوح لو اني اسويها يدفني واني حيه
زبيده : والله يا فاطمه اخوج شخصيته متعبه ومينعرفله طريق
واني ما اكدر اصير مثلها وحالي من حالج هم ويايه كله ممنوع
قبل لا يطلع وصاني حتى السطح ما اوصله ردت .... اشر ثوب النوم حتى اخليها تتوقع هو اتقربلي وتبطل منه
فاطمه: وينه جيبي اني اشره
زبيده : فات الوكت اكيد تعرفه ماموجود بهالوقت
فاطمه: انتِ جيبي ومعليج اني اشره قريب على حايط بيتهم حتى اتشوفه
زبيده : انت تكولين هيج ولج الدنيا ليل اخاف احد يشوفج
فاطمه: دجيبي عباتج الف روحي بيها واطلع ....اخذت الثوب شريته ودخلت ..... راح انزل ابوگ الراديو واصعدلج ....نتونس عليه
زبيده : يله روحي بسرعه ..... صعدت فاطمه الراديو ... بقينا نستمع لفلم مصري استاذ حمام .... وهاي فاطمه حافظه اسماء اللمثلين ... واحد اسمه نجيب الريحاني
ثاني يوم صعدتلنا خالتي رزلتنا .... ها يمه أزبيده هاي عود اعتمدت عليج تعلميها ثاري هي علمتج على السهر والكعده للظهاري
زبيده : يمه مو هذا الراديو ياخذج ومتدرين بالوقت هالمره سامحينا من باجر نكعد من الصبح .....بوست راسها ...... كملنا شغل اني وفاطمه واتذكرت الثوب .... ولج فاطمه امشي اصعدي دخلي .....صعدنا سويه اني رحت لغرفتي وهي للسطح
اجتني تركض ولج الثوب ماكو
ضربت خدي عزه وين راح ...اخاف طار
فاطمه :لا اني قرصته بأيدي والله
زبيده : عزه العزاج زبيده بس لا احد طفر على السطح واخذه
فاطمه: وهسه شمدري الي اخذه هذا مالتج قابل احد شايفج لابسته
زبيده : لبسته كدام اخوج اول البارحه نمت بي
فاطمه : عادي غسلتي وشريتي
زبيده : ولج مو حذرني اوصل للسطح ....
فاطمه : گليله فاطمه شرته ولو هو محذرني اصعد للسطح .. والبارحه عاندته وورطتج ويايه فأستاهل الكتله

هسه قابل الحرامي راح يروح لحسن ينطي الثوب والله انت بطرانه
زبيده : ولج فاطمه اخاف هاي زهره اخذته
فاطمه: الا اذا تطفر يله تكدر تاخذه ... وهيج متخاف وصلفه تطفر على سطحنا وتاخذ الثوب .... ما اتصور ...انسي الثوب ماكو شي
زبيده : ان شاء الله ماخذه حرامي لو طاير ولا تطلع زهره ماخذته
مرت الايام ويوميه فاطمه تنام يمي بس ما نسهر نكعد من وكت نكمل شغلنا ونشغل الراديو ... سابع يوم سوولي السبعه اجوي خواتي ونسوان اخوتي ونسوان ابويه وكرايبي ونسوان قريبات حسن .... وجوارينهم لبست سبع ثياب( بدلات)
فاطمه: من شفت زهره جايه رحت لامي .... يمه هاي شكد گويه شفتيها جايه
الحجيه: خليها حتى أتشوف مرته احلى منها بلكت تعوفه بحاله
بس انت لتجيبين سيره كدام زبيده ما اريدها تعرف بهالسالفه
فاطمه: يمه تعرف وشايفته يوم عرسهم يحجي وياها هي سولفتلي خطيه ... ويجوز حتى عرفت زهره هسه
الحجيه : صخام...زوجته وما فكت منه هالمكموعه... هاي شلون مصيبه
فاطمه : يمه زبيده عاقله وعقلها جبير تتحمله
الحجيه : ولج فطومه اصعدي جيبي الكردان مال امي ... لبسي الها گولي هاي هدية حسن لان مموجود گلي انتي لبسيها لزبيده
زبيده : اول ما شفت ام السطوح ما عرفتها بس بعدين ركزت بشكلها ولان شفتها تباوعلي وتتبسبس ويا الي بصفها اتذكرت شكلها وعرفتها .... يمه شكد صلفه جايه لبيته ... اويلي بس لا هي ماخذه ثوب النوم
من لبستني فاطمه الكردان وكالت من حسن عيوني راحت عليها اشوفها شلون استقبلت الموضوع .... لا والله مبينه مامهتمه وگوية عين وتتبسم ... اوف يا زبيده هاي مبينه مصيبه ... سلمي امرج
لربج واكعدي واسكتي وين متوصل ويا هالرجال خلي توصل ...
لليل خلصت السبعه وكل واحد راح لغرفته واني وفاطمه صعدنا لغرفتي .... صعدت ورانا خالتي .... كعدت اتسولفلي على زهره وهم ما رادوها وحسن مخدوع بجمالها و دلعها ورجال مشايف هيج شي ينجر وينغري ... وبقت اتعلمني شلون اتعامل ويا حسن
گلتلي اني وراج بس انتِ اتحملي لتخليها تاخذ مكانج ترى هاي دهيه اذا حسن الي عقله يوزن بلد والي حجايته بالبيت مسموعه
وغيرته علينا خانگتنا تجي وحده مثل زهره مطلعه شعرها ووجها بالسطوح وتبقى واگفه وياه تسولف بكل عين صلفه مابيها ذره خوف تخاذ عقله ... شسميها هاي
زبيده : يمه راح اجرب وياه الي گلتيلي عليه واشوف تاليها
مرت ايام .... عرفت يوم الي توصل البضاعه معناها ثاني يوم يوصل حسن ... من عرفت بليل صعدت فاطمه سوتلي نقش حنه بأيدي جانت الرسمه نازگه بس بأصبعي الصغير ممتده على حافة جف الايد الى فوگ العضد بشويه بيومها ما نامت يمي خاف حسن يوصل الفجر .... من نزلت لبست ثوب مخصر وقصير نص ردن وفتحت شعري ولبست حجلي وترجيه وختمتها بالديرم .. بقيت انتظره ومخليه حجي خالتي براسي الى ان نمت ....
محاسه عليه من داخل للغرفه ومطلع ملابس وسابح الا من نزلت قطرات مي على وجهي من باسني من خدي ولف ايده على بطني ..انداريت ... جفلانه ... صار وجهه فوگ وجهي ... الحمد لله على سلمتك
حسن : الله يسلمج ... ارجعي نامي بعد وكت ..
زبيده : متفاجئه الله يهدي ... شو صاير حباب ....

يتبع

#المتواضعه

البارتات7_8__9

مساء سعاده لاحلى متابعين

حسن: من بستها من راسها وطلعت اتذكرت احجاية ابويه الرجال الي يريد الله يوسع رزقه من يطلع يبوس مرته ومن يدخل يبوسها حتى يرضيها ... وصدك من سافرت على عينها بعت البضاعه الي اشتريتها واني هناك بربح خير من الله ... تاجر چَلَب بالبضاعه الي اني ماخذها ... گتله ابيعك نصها بفلان سعر ... قبل واخذها ...عرفت على گولت امي عتبتها خير ... گلت من ارجع حتى لو احب زهره ومفكر اخذها فوگها لازم اصير زين وياها واعاملها بالحسنى
زبيده: اوف هسه غير اريد اشيل هالمستحه واصير جريئه مثل ما گلتلي خالتي ... اريد اخلي ايدي احضه استحي ... التفيت عليه صار وجهي گبال وجهه اريد امد ايدي احضنه مكدرت
حسن: طارت نومتج من ورايه
زبيده : لا بعدني نعسانه شلت ايدي خليتها على چتفه صدمني شكد لماح
حسن: شوكت خليتي الحنه
زبيده : البارحه من عرفت بيك جاي ... اخذ ايدي اتفرج على الرسمه عض اصبعي ...
حسن: بس اني ما اقبل تخلين حنه واحد ينتبه على هالاصابع الحلوه
زبيده : قلبي راد يوگف من هلكد ما يدگ سريع هو حلو وكلامه حلو اول مره اسمع هيج كلام .... مو عرفت من خاله وفاطمه انت متحجي من يخلون وفاطمه گلتلي اخوتي يحبوها عبالي انت هم اتحبها
حسن: احبها بس هسه كرهتها .... جريتها قربتها عليه ... اي شي يلفت انتباه احد عليج ما احبه ...
زبيده : وهسه شسويلها متروح اذا مو ورا اقل شي اسبوع
حسن : لبسي ردن طويله تنزل شويه على چف ايدج ابتسمت واذا ماعندج اني اوصي خياط يخيطلج حتى من تخليلي الحنه محد يشوفها غيري وبنفس المكان الي هسه مسويته عجبني...
زبيده : عندي اليوم اللبسها من انزل
حسن: دگومي شوفي شنو جبتلج ويايه غراض ...من كامت ابتسمت وبقلبي اليوم اجيبج للدرب جماره ...
زبيده : راح انزل اغسل وارجعلك
حسن: انزعي الحجل من تصعدين ألبسي
زبيده: راح اللبس ثوب طويل ميبين ...
حسن: لا انزعي
زبيده: نزعته نزلت غسلت وصعدت...فتحت الغراض لكيت علبتين وحده بيها حجل والثانيه بيها محبس من طلعتهن كدامه ارتبك گلي الحجل الج والمحبس لا ....عرفت بداخلي لحبيبته ... صرت ذكيه گتله هذا اكيد لفاطمه اني انطيهياه حتى تقوى علاقتي بيها
بقى ينطي ألوان ... بقلبي دصبرلي مو وكت خجل ومستحى ... رحت بصفه .. حسن اذا اطلب منك اتلبسني الحجل متضوج
حسن: عاكد حاجبي ( شلون نسيت ما ضميت محبس زهره هسه شنطيها ) جيبي
زبيده : تقصدت ارفع الثوب اكثر من ديلبسني ...عاشت ايدك حلو ان شاء الله يوسع رزقك
حسن: انت حلوه وكلشي عليج حلو ... مشفتي باقي الغراض
زبيده: كعدت بصفه چتفي على چتفه..بعدين اشوفها المهم اشوفك انتَ
حسن: جماره... خلي انتمم زواجنا ...
زبيده: حسن ميخالف نخليها لليل .. لحد ما اتعود عليك وانت هم نام ورتاح من تعب السفر
حسن:خليت ايدي على چتتفها ...باستني من خدي جماره ارجعي نامي قبل ما ابدل
زبيده: ابتسمت نام حتى انام بحضنك....بقينا سوا
سولفلي على سفرته واني هم سولفتله فاطمه تنام ويايه وبليل نبقى سهرانين ونسمع بالراديو..وسألته ليش متقبل ايجبون تلفزيون هو مثل الراديو
حسن: ليش انت متفرجه على التلفزيون ....
زبيده: لا بس اخوتي مخلي بغرفتهم يتفرجون بي
حسن: ها ... التلفزيون تطلع بي افلام بيها لقطات البطل يبوس البطله ... فاطمه بعدها بنيه ميصير اتشوف هيج سوالف وتطلع عينها فهمتي
زبيده: اي فهمت ...بدا يبوس بخدي
حسن: اتريدين اجيبلج واحد بالغرفه
زبيده: فتحت عيني هذا هو نفسه لو من سافر بدلوه لا ما اريد ... اريد راديو
حسن: اليوم يجيج من ارجع بليل اجيبه
زبيده: من نظراته وتلميحاته وحرشته وصوته ناصي يهمس بأذني فهمت صبره نفذ ... كلت خلي ابدي اصد ... يا حسن نسيت اصلي ... لهيتني ...
حسن: اكو واحد ينسى ربه ....ويلتهي ويا عبده
زبيده: التهيت وياك الله غفور رحيم ...راح انزل انت اخذ راحتك نام
حسن: لتعيديها بعد اني اذكرج من اصلي صلي ويايه
زبيده: ان شاء الله وبقلبي لتخاف ماكو شي ينسيني ربي ... بس مجبوره كذبت ... دربك يا حسن راح يطلعني عن اخلاقي
ها بديت اولها اكذب واحتال استغفرك ربي انت تعلم بالسبب
غسلت وصعدت صليت وبقيت اقرآ قرآن ... من خلصت التفتت حسن نايم صار وكت گعدت خالتي .... نزلت يمها
صباح الخير يمه
الحجيه: صباح العافيه ها يمه سويتي الي گتلج عليه ....
زبيده: سويته يمه صرت جريئه شويه وبعدها صديته ... وجايب وياه حجل الي ومحبس گلي مو الج سويت نفسي افتهمته لفاطمه مثل مفهمتيني ما ابين اله اعرف بسالفة زهره
الحجيه : عفيه يمه شويه شغلي دماغج امورج اتصير تمام ..
زبيده: والله يمه اني درب الحيله والكذب ما احبه مجبوره عليه اعرف حظي ميكعد بهالسوالف

الحجيه: ميخالف يمه صبري خلي عينج بعين الله وهي تسهل
زبيده : خلصنا الريوك وكملنا الشغله رحت يم فاطمه اسمع وياها بالراديو...
حسن : فزيت من النوب على ضرب الحجار ... بسرعة كمت همزين زبيده ماكو ... طلعت للسطح لكيت زهره تنتظرني
لان اني متفق وياها من اسافر يوم الي ارجع اخليلها نيشان على السياج من اتشوفه معناها موجود والوقت الي ضربت بي الحجار هو نفس وقت رجعتي من الشغل قبل الغدا ....
زهره : هلا بالعريس ان شاء الله ما اخذتك من خلوتك
حسن: شنو هالاستقبال مال وحده حاقده مو مشتاقه
زهره: شلونها العروسه القبيحه مريحتك
حسن: خزرتها.. زهره جري عدل زبيده متجيبين سيرتها مو يمج البنيه ونبهتج من ذاك اليوم صارت مرتي ....
زهره: طلعت الثوب الابيض ... مغزر الثوب والله ...شلونها اليله جانت ...
حسن : هذا منين جبتي
زهره :مرتك شارته مكيفه بروحها كلت اخذه حتى اخش بعينك ومتنكر انت متقربلها وللعلم شفتها حلوه ... كمت اتبچبج هاي تاليها تضحك عليه ... وانت مكضي الليل كله وياها ولو هي شكلها عادي المفروض ما اغار منها بس غرت اخذت مكاني
حسن: جيبي للثوب بعصبيه
زهره: هاك شمرته بعصبيه وزعل دخلت للبيت شو هذا لا صاحني لا اهتملي ...
زبيده : قبل صلاة الظهر ... نزل حسن يصيحني بعصبيه
طلعتله ... الله اليستر من هالوجه
حسن:تعالي
زبيده: والله رجلي حسيتها انشلت خالتي وفاطمه ومرت حمايه على صياحه طلعوا گلولي شكو ... گتلهم ما اعرف شبي عصبي
سمعت العيطه الثانيه سويت الدرج ٤ بايات .... لكيت باب السطح مفتوح .... وهو بالغرفه ... دخلت نزعت حجابي جرني من ايدي وبأيده الثانيه ثوب النوم ...ردت اموت من الخوف والهبطه كلت هاهيه اليوم يدفني حيه ...
حسن: هذا شوداه للسطح
زبيده : جاوبته طلعت شريته وراها ملگيته والله ( مكدرت اگول فاطمه لان فوك ما ساعدتني احملها الذنب ويروح يضربها وتزعل مني وخالتي هم يجوز تزعل كله ولا زعلهم لان خالتي بظهري هو ميكدر يسويلي شي )
مشفت بس وجهي اندار من الراشدي وبعياط لزمني من شعري ليش اني مو نبهتج متوصلين للسطح ... رجع ضربني ...والله اليوم لا اكسرج دا اشوف شلون اگلج حجايه وتسويها من ورايه
انت بعد تريديني اامن بيج خلي يجي ابويه يشوف بت حجي سلمان الي تصون غيبتي .... بهالاثناء فتحت الحجيه الباب
ولك حسن تمد ايدك عليها لان اني گتلها لفلفي نفسج و اطلعي شري ملابسنا شتريدها تكسر كلمتي ... ثانيا كل الملابس نزلتها اشمعنا هذا ما لگته وانت وين لگيته واحنه خبينه عليه السطح
زبيده: انضربت بدون ما اطلع صوت بس دموع تنزل لان عرفت ام السطوح ورا هالسالفه خفت لا موجوده وباب السطح مفتوح ما ردتها تسمع صوتي وتعرف ديضربني .... /من دخلت خالتي ورزلته عافني
بقى مرتبك على سؤالها وين لگاه ... هو يعرف هي تعرف منين جابه بس كدامي ماجاوبها .... يتوقع اني ما اعرف بموضوع زهره ... رادني ابقى نايمه على اذني ... اخذ غترته ونزل ....
الحجيه: شافتني ابچي انتِ وفطيم حسابكم بعدين .... جان وديتَنا بمصيبه زين ما سوتلج بي مصيبه تهمه اوف ماكو عقل براسجن من اليوم ما تخطين خطوه اني ما ادري بيها والله يذبحج وما يرفله جفن ها عود انه نبهتج عليه يغار لو ما ادخل عليج جان سواج جنازه ليش ما گلتيله فطيم الي طلعت ... خفت يضربها ... يا وانت تنضربين بدالها لعد ابو زايد تستاهلين الكتله
صعدت فاطمه ويا ما دخلت الغرفه نزعت خالتي الي برجلها وضربتها بي ... عساني ما خلفتج ولا شفت المشاكل ... نزلت خالتي .... وهاي فاطمه تتمضحك ...
ها ولج زبيده ما مكتوله قبل .... مهضومه ..على روحج ... مره ثانيه لا تصيرين خوش ادميه گليله فاطمه ... اني متعلمه عليه
ومستگويه بأبويه ....
زبيده: ادموعي تنزل وضحكتني هالفطيره
فاطمه: دضحكي انت ماطول اخذتي هالشماعيه(مخبل)راح تنضربين ... لو تجرين عدل وتسوين الي يريده بدون نفس مثل الخروف ما تنضربين لو تصيرين مثلي بطله واسوي كلشي براسي واخذ الكتله واني متونسه لان جربت الي منعني عنه ...لج هذا الراديو اكلت كتل من وراه لان اسهر عليه ومكابلته الى ان بزعته وجاز مني لان اتمسكن كدام ابويه
زبيده: متت ضحك على ضحكتها وسوالفها ... زين خالتي شلون عرفت دا انضرب على موضوع الثوب
فاطمه لج مو اني صعدت اتجسس وراكم حسيت العيطه وراها كتله ... من شفت باب السطح مفتوح عرفت زعيره ورا السالفه اتذكرت الثوب ونزلت سولفت لامي على سوايتنا ...گتلها ماطول ديضربها ما گلتله فاطمه الي شرته ... روحي عالجي السالفه گليله انتِ شريتيهن ... رزلتني گلتلي ليش هو يدري بيه انة اشتغل غير اطبخ ... عجبتني الحجيه طلعت هم دهيه ... خلته ميعرف يحجي كلمتين ... لج زبيده طلعي عينه اليوم ... تمسكني

وراح اصعدلج فراش فرشي بالگاع خلي يتخبل ... هسه عرف انت بريئه 🤣🤣🤣 وامي ورا طلعتج للسطح ينقهر لان هو عصبي بس بسرعه يتندم من يحس غلط .... اليوم تجيج هديه
اني ورا كل كتله يدللني ويجيبلي شغله من يرجع
زبيده: لج فاطمه اني بحياتي ما مضروبه هاي اول مره انضرب
فاطمه: ماطول اني وراج راح تاكلين كتل 🤣🤣

البارت8

زبيده : صاحت علينا خالتي ...من هلكد ما انثولت وصلت لباب الغرفه بدون حجاب
فاطمه: لج البسي حجابج ... شنو حنيتي لكتله ثانيه
زبيده: مو هاي سالفة من موجودين الولد البسه ومن ما موجودين انزعه ثولتني متعوده بيت اهلي ما اللبسه فأنساه
رجعت لبسته ولفيت الطرف على وجهي .... نزلنا نحضر الغدا رحت افرش السفره بالهول ...اني عبالي هو طالع ما ادري بي بالهول كاعد ويا عمي والولد خليت السفره شو هذا من دنگت گام اخذ السفره مني هو فرشها ... رجعت ...اخذت الاكل كام ياخذ مني وهو يخلي على السفره .... فاطمه من شافته ... تتمضحك رجعنا للمطبخ ننقل بقيه الاكل
فاطمه: لج زبيده هذا شماعيه المفروض تموتين عليه ... شوفي الغيره وين وصلته حتى ما ادنگين هو گام فرش ويخلي الاكل ... يمه كون اخذ واحد مثل حسون حتى مسح اخلي يمسح اجلطه كل شويه اطلع رجلي من امسح حتى يغار وميخليني امسح ...
الحجيه: فطيم شعندج تتبسبسين... متولين تودين باقي الاكل
فاطمه: عوذه كل ما اريد احلم بفارس الاحلام يكعدوني من الحلم امي وابنها .... عابت شوكت الله يخلصني منهم
زبيده : متت ضحك عليها ...من ضحكت طلعت صوت شويه مكدرت اسكت من ورا شكلها وحركاتها انوب گلتلي اريد واحد يشبه انور وجدي واني ما اعرف انور وجدي وهي مشايفته بس على طريقتها العفويه بالكلام اتذب الحجايه بفطاريه وهي تموت ضحك
دخلت للهول الضحكه بعيني خايفه اطگها كدام حسن واحصلي كتله مثل القبلها .... من انطيته الماعون حط ايده فوگ ايدي .. رافع حاجبه ويحجي وياه بثكل تعالي اكعدي بصفي .... من التمينا كعدت بصفه جر ثوبي غطى رجلي ... خلصنا الغدا ... گلي خلي فاطمه تنطيج الماعين وانت وديهن ... گتلها لفاطمه ... تناوشني وتضحك ....من تروح للمطبخ ربي مثل شماعيه اريده
خلصنا السفره ... صبينا الجاي رجعت كعدت بصفه ... عمي يموت على خالتي من دخلت بيدها الفواكه صاحها تكعد بصفه ....وهو بهالعمر متحلاله الكعده الا وهي بصفه ويتريگ وياها الصبح ويشاقيها ....ومن يدخل للبيت ويطلع يبوسها من راسها ويتلگاها ها الله يساعدج ام ناظم ... ابويه مو مثله ميسوي هالسوالف ... فاطمه گلتلي حسن شخصيته مثل ابويه ابويه هم متعب امي من هم شباب بسالفة الغيره ... بقلبي شفايتلي من نكبر اني وشماعيه نصير مثلهم اقبل بخبالاته هسه اذا هاي تاليتنا ....
حسن: وين صافنه
زبيده: تنهدت.... ب بت ابو سلمان الي متصون رجلها من يغيب
حسن: رجلها اذا عنده جماره حقه يغار عليها .... رجعي ايدج وره
زبيده: التفتت عليه... يبتسم ... رجعتها .... لزم ايدي ويحرك ايده عليها شبك اصبعه الصغير بأصبعي الصغير المحنه ...
قلبي كام يدك والله شكلي بديت احبه خبلني ساعاته مو سوا كل ساعه بحال ... بس تصرفاته كلها من ورا غيرته ... حتى لو بعده ماحبني معناها مهتم بيه وحريص عليه ...
صاحتني فاطمه... رحت وراها للمطبخ ولج شو اكلتي الكتله بدون زعله ...
زبيده: اوه فاطمه والله قلبي خلصان احس نفسي تعبانه ... من التفكير لج اني ما احب الحيله احب اعيش حياة طبيعيه
فاطمه: كيفچ خلي لعد يشوفج هينه تالي يگوم كدامج يطلع يشوفها لزعره ...
زبيده: هو شبه اعتذر
فاطمه: تعالي راح انطيج دوشك صعدي
زبيده: لج مابيه حيل كتله ثانيه
فاطمه: عادي تتعلمين ... شلعي قلبه شويه حتى يلتهي بيج ينسى زعره
زبيده: ولج انت منين متعلمه هالسوالف
فاطمه: من الراديو وافلام انور وجدي ونجيب الريحاني البطله من تزعل يركضون وراها ...
زبيده: اي خوش خلي اخوج يدري بيج لا يكسره على راسج
فاطمه: كسره والله هذا واحد ثاني جابلي ابويه
زبيده: هو اخوج اظاهر رايدله وحده گويه توگف بوجهه تاكل كتله وتمشي حجايتها
فاطمه: ههاي... ادمغت العروسه وداعتج بس اسمعج تندگين ادخل وياج جوه ايده نندگ سويه لحد ما نهد حيله... ونربي لشماعيه كتله وتنسي ووراها هديه بعد اكو احلى من هيج دلال
زبيده: اضحك لج انت مصيبه والله خايفه لا يرجعني لبيت ابويه
مو علمود اخاف يطلگني اخاف ما اشوفج
فاطمه: شكد چذابه ... شماعيه بعد اسبوع يخليج اتحبي ...
بس يستخدم اساليب التودد ...
زبيده: انت وين شايفته
فاطمه: اگلج بس مو تحجين والله جنت صاعده للسطح اول ما اشترولي الراديو ... متلفلفه ما مبين مني غير عيوني دا افر احصل بث القناة على حظي حسن يجي قبل موعده يصعد للسطح وينتظر زعره

واني ختلت ورا البيتونه طلعت زعره شو هذا انگلب حتى شكيت بي اخويه طلعت راسي دا اتأكد هو نفسه شماعيه
يتغزل ويدلعها جماره ويضحك وياها
زبيده: كل الي حجته فاطمه ما اثر بيه بكد كلمة جماره كرهت هالكلمه لان طلع يگولها لزعره على گولت فاطمه ... بقيت للعصر ويا فاطمه ادري بي صعد ويجوز ينتظرني اصعد وراه ..نزل عاكد حاجبه ويتعارك ويا ذبان وجهه ..ديطلع ويا عمي للشغل ويرجعون بليل .... من شفت وجهه ثكيل عليه عرفت لان مصعدت وراه .. بقلبي خليك ضوگ ( ذوق)الدوخه الي مدوخنياها بسوالفك
حسن: من ضربتها ونزلت ...ورا ساعه هديت رجعت للبيت ... كلت اراضيها من نصعد ورا الغدا ... هي بقت جوا ..واني بقيت انتظرها ... حتى النوم طار من عيني على حجايتها تفكر ببت ابو سلمان الي متصون رجلها بغيبته ... معناها لا الضرب ولا بقية الحجي مأثر بيها بس هالحجايه تاكل بقلبها وحاقده عليه
بسببها ... كل ما تستعدل اموري وياها اذبلي حجايه اخليها تكرهني بالزايد
من نزلت اروح للشغل ويا ابويه مرت من يمي زبيده .... امي صاحتها ..... رحت لغرفة فاطمه صحتها .... جيبيلي الراديو
فاطمه: انجلطت بقلبي صخام بس لا يفلشه وينتقم مني ... وديتله الراديو
شو هذا شافه ورجعلياه ... عادي المخابيل كلشي يطلع منهم
من اخذ الراديو حسيت اخذوا ابني الرضيع ومن رجعه رجعولي قطعه من قلبي گلي هذا مو نفس الي كسرته مره
جاوبته لا هذا اصغر ذاك چبير ... عاكد حاجبه .. منو الاحسن
جاوبته هذا الصغير ابويه يگول احدث
بنتر يا بلوه.... انتِ من سمعتي بيهن منو الاحسن
جاوبته هذا يلتقط احسن .... گلي يله مع السلامه
فاطمه : مع السلامه
زبيده : رجعت لفاطمه منين اخذ الدوشگ حتى اصعده
فاطمه: خلي خالتج تلتهي وابوگه من النضده مالتها ...
زبيده : والله للمغرب دا اصلي بالغرفه اجتي فاطمه جايبه الدوشك ... خلصت صلاة لگيتها فارشته ومخليتله چرچف ومخده
فاطمه: تقبل الله
زبيده: منا ومنكم
فاطمه: لا اني حتى لو اصلي تاليتي ويا ابو لهب
زبيده: ضحكت لا اسم الله
فاطمه: مكابله الراديو واحب انور وجدي واحرضج على اخويه ومطلعه عين امي ....
زبيده: بس قلبج طيب وماعندج اذيه على احد هاي عد رب العالمين چبيره
فاطمه: هو اني هم اگول دعوة الغريب مستجابه ادعيلي الله يعقلني ... واتزوج واحد مثل شماعيه لان ما اكدر اتوالم غير ويا واحد مثله ... صارت عندي خبره اتعامل ويا المخابيل
زبيده: لا خطيه مو مخبل الغيره مو بيده
فاطمه: زبيدان .. صار ساعه انتظر امي تطلع حتى ابوگ الدوشگ والله انزله ..رحت لميته
زبيده: اضحك ولج اوگفي ... انام على الدوشگ والله ما انام بصفه ... بس اقصد خطيه هو مو بيده هالطبع لج هو كعدت بصفه محد يشوفني بس اذا اكو احد معلگ بالسگف .. جر ثوبي غطى رجلي معناها هالتصرف لا ارادي
فاطمه: لعد ليش ويا زعره ... ماعنده مشاعر غيره
زبيده: والله ما ادري وهذا الي محيرني يجوز مو حب يجوز لان هو يتعامل بشغله ويا النسوان واكيد اشكال يمرن عليه ينغري بأصواتهن بدلعهن ويجوز اكو مكشفات ينغري بشكلهن هو اخوج حتى الاصبع يغري متشوفي يغار يتوقع كل الزلم مثله تبصبص على النسوان .... فمن شاف زهره مكشوفه تعلق بيها وتخيل نفسه يحبها لگاها منفذ يشبع نظره ومسامعه من خلالها وهي ... ملعبه عرفت شلون تكسبه عيشته الدلال والكلمه الحلوه الي هو يحتاج يسمعها حتى ميمشي بدرب الغلط
گلك اتزوجها ...حتى تلبي رغباته وميتحمل ذنبها لان تصير مثل الي لعب عليها ولان هو يخاف الله فيخاف يعاقبه بيج ويتسلط احد عليج يقشمرج بالحب ..فهمتي
فاطمه: رفعت حاجبي ومديت بوزي ... والله زبيدان طلعتي تفتهمين ... فدواتك ربي ما اخذت شويه من عقلي وخبطته ويا عقل زبيدان جان طلعتني ذكيه ومرحه ... مو غبيه ومرحه
زبيده: خليج هيج احسن الامور عندج تصفى من حالها اني اتعب من التفكير ما اكدر اعبر يبقى الكلام ياكل بقلبي واحلله
واكبره براسي

البارت9

فاطمه: ولج زبيده ويا الدوشگ رايد نقش حنه برجلج ...
زبيده :لا دخيلج هاي بيمن اضمها بله ايدي نزلت الردن ...
فاطمه:زين خلي اشوف استعداداتج لليله ... شعندج ملابس اوف لو تتلابسين ويا سعاد عدها بلاوي
زبيده: تعالي شوفي ...طلعتلها ملابسي اختارتلي وحده لونها سماگي تلبس ورا سنه زواج من تروح المستحى ... هاي حفرتها جبيره مربعه واسقيات عريضه ستن وقصيره فوگ الركبه ... لا فاطمه استحي اللبسها والله ...
فاطمه: لعد شريها برا بلكت تجيج مصيبه من وراها تلبسها بدل منج زعره ... لج دشوفيها شتحجي وياه تكولين رجلها ... وانت رجلج تستحين منه
زبيده: اني مو مثلها والله اخجل واحس روحي رخيصه اذا اتوددله واتجرء
فاطمه: ... اممم خلصنا من موضوع الثوب ... حلو رايدله خطت كحل والعطر الي تكولين جايبه وياه من الهند واضربي الحجل

وشعرج فتحي .... هسه راح انزل انت تحضري اصعدلج قبل العشا اشوف الرتيبات اخاف نسينا شي ...
زبيده: لا ورا العشا ارتب نفسي اخاف ميقبل على العطر والحجل
فاطمه: ابقى لعد اخجلي وخافي الى ان يجيب زهره ضره عليج
زبيده: كافي فاطمه تخوفيني ... خلي يجيبها شسويله ما الي خلگ
فاطمه: بكيفج انت تعرفين مصلحتج راح انزل...هسه بعدين نتفاهم
زبيده : نزلت سبحت صعدت صليت العشا...فكرت بحجي فاطمه گلت يم ام سطوح مخليها بكيفها ويمي كلشي بمزاجه ... انگتل خلي يكتل ... شويه اتعبه مثل ما متعبني ...لعب بعقلي حجي فاطمه سويت الي گلتلي عليه (بالمناسبه فاطمه اكبر مني بسنتين
بس تحسوها اصغر مني بتصرفاتها وعقلها ماخذه الدنيا ضحك وراحه واكبر هم مياخذ براسها عشر دقايق )
لبست شوب عريض وطويل بي تخصيره لفيت حجابي مثل الخمار ونزلت .... للحجيه گلت احجيلها الي راح اسوي اخاف تصيرلي مشكله وتعتب عليه لان وصتني من اخطي خطوه انطيها علم ..... كعدت سولفتلها الي ناويه اسوي
بالاول ماقبلت گلتلي حرام المره تمتنع عن رجلها ... گتلها يمه اذا اكو وحده براسه غيري ...شلون اشيلها من راسه اذا مو اشغله بيه .... صفنت ... گلتلي بكيفج انت هم تفتهمين وعاقله ....طبعا ما جبتلها سيره فاطمه تعلمني او گلتلي لان اخاف ترزلها لان تحرضني على اخوها مهما يكون هي ام )
واني يم خالتي سمعت حسن يصيح زبيده
الحجيه: تعال يمه يمي ....
زبيده دخل لگاني مطلعه وجهي ولاعبه بي شويه مخليه سبداج لوجهي مورد خدودي وكحل وحمره حمره جايبها هو وياه ...
حسن: الله يساعدج يمه
الحجيه تعال يمه اكعد
حسن: اسبح وابدل ملابسي واجيج اشرت لزبيده يله حضريلي ملابسي
زبيده: كمت.. غطيت وجهي مريت من يمه .... بس سمعت اني اعلمج .... بقلبي يبو عليج زبيده اليوم الكتله الثانيه تاخذيها قبل لتنامين ... صعدت وهو ورايه عصبي ... مابيها مجال زبيده تلوگي وصيري جريئه
دخلت للغرفه دخل ورايه سد الباب لزمني من ايدي بنتر
شنو هالثوب والكحل والعطر اني شنو فهمتج ....شو دتعاندين
زبيده : وين العناد مو انت رجلي واني عروس غير اترتب علمودك
منو يباوع عليه اخوتك اخوتي وابوك ابويه ...وممبين مني بس العيون
حسن: بدلي الثوب ولتخلين عليه عطر وامسحي الكحل ما ارتاح من تنزلين هيج حتى ماكو غريب ثانيا هذا شنو المفروش منو ينام عليه
زبيده : (نزعت ثوبي المخصر ... شاف ثوبي السماگي الي لابسته جوه شفته تهداوخفف عصبيته)... جاوبته اني انام عليه ....
حسن : ليش
زبيده : شنو ليش كل الي سويته وحجيته وتسألني ليش .... ضربني على ايدي بالشقى شنو حجيت ... دغدغني
كافي حسن مو وكت الي يعجبك تضحك وتشاقى وكت الي تعصب تهيني ... جرني حضني
حسن: منو يهين جماره ..واني موجود
زبيده: انت ... تكلي ما اصون غيبتك هاي حجايه مو حلوه وثگيله
بس الأرتست متصون رجلها ... وبعد لتگلي جماره
حسن: بله الاولى فهمتها مقهوره... وطلعت مني بساعة عصبيه
حشاج ما قصدتها صدگ... بس جماره ليش اتضوجين منها
هاي تنگال على الحلوه
زبيده: اي وكم حلوه گايللها جماره ...غيري
حسن: ( بس لا حست بزهره ) عمي بعد ما اگلج جماره .... زبده احلى
زبيده: خليني ابدل دا انزل اساعدهم
حسن: همستلها بأذنها زبده وين راح تنامين
زبيده: على الدوشگ...صار عصبي
حسن: دخلي اصعد والگاج نايمه على الدوشك ساعتها شوفي الي يجرالج دا اشوف حجايتي لو حجايتج تمشي بهالغرفه...
زبيده : نزل وعافني ... ركع الباب
لفيت الدوشگ وشلته ...خليته على صفحه ... لبست ثوب عريض ومسحت الحمره والكحل ونزعت حجلي ونزلت ... طالعه الدنيا من عيني بعدني اسبوعين ونص من اتزوجت واني بس مشاكل ويا هالرجال ماشفت راحه وياه والله بيج بخت يا نجله ما اخذتي جان انفجرتي من سوالفه
نزلت لگيته اعصاب .. حتى رزل حمايه الصغير ناصر لان ناسي الختم بالمحل ...
الحجي : بابا انت شبيك كلشي عندك بالعصبيه والعياط واذا نساه باجر نجيبه
زبيده: شفته اترخص بحجة نعسان .... گلهم لحد يصيحني على العشا ... صعد اجتي فاطمه كعدت بصفي ...
فاطمه: امي تگول اصعدي وراه هذا عصبي لان اكو مشكله بينكم ...ترى يطلع عصبيته عليج ... واني اجيبلج العشا
زبيده: لا ما اريد .... خلي اصعدله .... صعدت لگيته مطفي الضوه .... شو ما اعرف ليش اجاني شعور انقهرت عليه ...
نزعت خماري وثوبي ...بقيت بملابس الغرفه ... رحت گعدت بصفه هو متمدد ..... حسن نمت .... مجاوبني
حسن گوم انت منايم ....
حسن: شكو
زبيده: بوسته من زنده حضنته وخليت خدي على ظهره ...حجايتك انت الي تمشي ... انت رجلي وولي امري والي يريحك اني اسوي
حسن: التفتت عليها حضنتها ... انزلي اتعشي وياهم
زبيده: ما اشتهي ...اذا تتعشى اتعشى وياك
حسن: والله ما اشتهي ... انزلي انتِ..
زبيده: اريد ابقى وياك ... ...تم زواجنا ... من هاليوم حبيته لان عنده حنيه وطيبه ما الها علاقه بعصبيته
حسن: زبده جبتلج الراديو خليته بالكنتور ... وقماش وصي امي ادز على الخياطه تخيطلج ثياب بالغرفه تلبسيها
زبيده: تعيش وتجيب ان شاء الله

#المتواضعه

البارتات10_11__12


زبيده : من يوم صباحيتنا...زادت غيرته اضعاف
حسن... كوم عيني ... بعد شويه يأذن
حسن: صباح الخير حضريلي ملابسي
زبيده : صباح النور ... يله انتظرك حتى نصلي سوا .....
حسن: جماره دخلت قلبي من سلمت انداريت ولگيتها كاعده تقرا قرآن ورايه
شكلها من اهل الله وطاهره حتى ويايه اني رجلها تخجل واحسها تجبر نفسها تسوي كلشي يطلع بأيدها حتى ترضيني
من خلصت سألتها .... تعرفين تقرين
زبيده: اي اعرف جان اكو ملا اعمى الله يرحمه يجيبه ابويه يعلمنا نتهجه القرآن ويحفظنا بالتكرار
حسن: انت هسه حافظته
زبيده: الحمد لله ولو اكو سور انساها
حسن: الراديو بي قرآن اسمعي وارجعي اتذكري السور
زبيده: ان شاء الله ... من تجي الظهر اخليك اتعلمني
حسن: خلي فطومه اطلعلج اذاعة القرآن
زبيده: وانت .. حافظ
حسن: مو كله سور قصيره وكم جزء قصير
زبيده : هو مو بالحفظ المهم تعرف شرع الله وطبقه مو مهم نحفظه انما الاعمال بالنيات خلي عملك خالص لرب العالمين
يرضى عليك ويوفقك وابتعد عن الي يغضب الله ودائما فكر الي ميشوفه الناس الله يشوفه راح تخجل تسوي شي يغضبه
حسن: ابتسمت... انتِ تدرين اني انصدمت من شفتج اول يوم بعدين عرفت السالفه من امي
وكل يوم اتصدميني بشغله .... والله ابويه عرف يختارلي ...
زبيده: اني ابويه گلي عليك الرجال البار بأهله يبر بمرته ...
حسن: كله دين الي ازرعه بحياة امي وابويه احصده بحياتي ويا جهالي يردولي الدين مثل ما اني رديته لاهلي
زبيده: لميت مصلايتي ولفيت حجابي على وجهي .... راح اسوي ريوك البارحه انت متعشيت اكيد هسه جوعان
حسن : وگفت ... دوگفي ننزل سوا ...
زبيده: وگف كدامي كعد يعدلي الحجاب نزله على حاجبي ....
حسن: مبتسم هيج ارتاح اكثر ... هسه كاعدين ديصلون
زبيده: نزلنا ... لگيت خالتي دتفوت لغرفتها
صباح الخير يمه التفتت صباح العافيه من شافت حسن نزل ورايه ابتسمت ... صباح الخير يمه ... صباح العافيه أحبيب
دخلت للمطبخ ... شفت حسن واگف يم خالتي مسمعت الي حجاه بس شفتها ضحكت بوس راسها ... دخل ورايه ..امي وابويه يتريكون ويانا حسبي حسابهم
سويت الريوك ووديته بالصينيه ... لان بس عمي وخالتي اشرلي انزله ...قبل ادنگ
بهاليوم عمي ما خلاه يروح للشغل بقى بالبيت ...الى انطلعوا اخوته اجاني من دا انظف بالمطبخ فتح الحجاب
حسن: ماكو احد بالبيت بس اني انزعي ...اجتي فاطمه صوتها يلعلع ( زبيده تعالي اخليج حنه برجلج وتضحك ... من دخلت وشافتني خافت ... ضحكت عليها ... خليلها انداريت على زبيده
اذا تخلين تلبسين جواريب
فاطمه: هو منو اكو وتلبس جواريب ... خزرني روحي هسه تجي
زبيده: من طلعت فاطمه... ليش تعاملها هيج والله كلش حنينه وقلبها طيب ... ابتسم ادري بس عنوديه ويايه اني وياها رويسيه
بيناتنا ٣ سنوات من هيه صغيره شالعه قلبي بعنادها ...... انت صعب مو هي ....هسه گلي انت عاجبك اخلي الحنه
حسن: اي عاجبني بس من تنزلين البسي جواريب ....
زبيده: حسن ليش ما تغطي عيني وچف ايدي
حسن: والله تريحيني .... ضحكت
زبيده : حسن الله يخليك بدون جواريب ...
حسن: بجواريب تريدين روحي خلي هسه مقبلتي ماكو لتخلين
زبيده: قابله
حسن : راح اصعد اتمدد
زبيده : قلبي لعب اخاف راح يشوف زهيره ....ابقى ويايه ورا الغدا نصعد سوا ...
حسن: لعد راح اروح يم امي اتمدد بغرفتها
زبيده: فرحت ... روح نام حتى من اخلص اجيك اشوفك الرسمه
حسن : خليت حجابها على رگبتها ... هذا خلي انتبهي لا يجي احد حبيبه لتجلطيني مثل فاطمه اسمعي كلام
زبيده: روح نام عيوني انتَ .... التفت شاف ماكو احد باسني من خدي .... خلصي بسرعه وتعالي يمنا ....
ورا يومين سمعت صوت حصو على الشباك ... وهو بالشغل ...رحت لخالتي حجيتلها گتلها خلي نحط اسفنج على الشباك حتى من تضرب ميسمع .... صعدت خالتي للسطح خلت اسفنج على الشبابيك .... گلتلي من يسألج ... گولي جنت نايمه ولگيت خالتي دتخلي الاسفنج استحيت اسألها ليش خلته .... من عدها خلصت من سالفة الحصو وهو بطل يطلع للسطح گلت ياربي بلكت بطلت منه وهو نساها .... هو منتبه على الشباك والاسفنج ... الا ورا ايام سألني جاوبته الي گلتلي عليه خالتي .... جاوبني احسن حتى محد يشوف خيالج اخاف يبين الظهر
حسن بنفس اليوم نايمين الظهر گعدتها زبده اكعدي ..... جاوبتني حسن شويه واجيك
وين تجيني أحبيبه ... انتِ بحضني گومي حتى اوديج اتشوفين ابوج اعوفج يمهم لليل وارجعلج
زبيده: الله يحفظك الي والله قلبي نار على شوفتهم ...
حسن : دكومي حتى نطلع من وكت... بين ما تبدلين اجيب الربل
طلعت جبت ربل للباب ... وصعدتلها شفت ملابسها مضبوطه .... يله .... وصلت لبيت اهلها هي سألتني ....

زبيده: حسن انزع الخمار كدام محمود ... لو متقبل
حسن: ليش محمود مو اخوكم
زبيده: لا ابن عمي المرحوم يصير اخو محمد اخويه ومن هو صغير متربي ويانا والناس تعرفه ابن ابو سلمان لان يسمي ابويه يابه واحنه حاسبي مثل اخويه
حسن : يعني انت مكشوفه عليه
زبيده : بس وجهي
حسن: استغفرك ربي شلون غثيتيني
زبيده: حسن من گتلك لان اعرف انت ولي امري وما اسوي شي من وراك ... ومحمود اخويه حريص علينا اكثر من اخوتي حتى من يفوت يدنگ راسه ويسمي يله يدخل حتى ننتبه
حسن : لا متنزعي....من وصلنا ودخلنا لبيت عمي بدلت گتلها راح ابقى وياج لليل
زبيده: هيج ارتاح اكثر .. حتى ما اشتاقلك ....بقى يم ابويه والولد ... لان محمود موجود ... مكدر يعوفني ... واني هم ارتاحيت راح يبقى ويايه ... معناها ما باله يشوف زهره .... ياربي خلصني منها .... والله احبه وما اريد وحده اتشاركني بي
دخلت تلگتني نجله ... ولج زبيده حضنتني ... شلونه رجلج ...
زبيده: تعالي ..اسولفلج .... بقيت ويا نجله ...ومرت اخويه ونسوان ابويه ام محمود گلتلي ليش لابسه خمار يمه منو اكو عدنا غريب .... جاوبتها يمه هو هيج يرتاح ...نجله جاوبتها رجلها يغار عليها ميقبل تنزعه .... امها لنجله گالت ومنو عدنا يغار عليها منه ...جاوبتهم نجله رجال ميريد مرته تنكشف على ابن عمها سويتنها سالفه تعالي اخذتني ... للمطبخ سوينا العشا للرياجيل .... واني ونجله تعشينا وحدنا بغرفتها حتى انزع الخمار اجاني محمد ... دگ الباب ..زبيده .. حسن يگول يله
بدلت وتخمرت طلعتله ضحكت على سوالفه نظراته كلها يم محمود يشوفه خو مو يباوعلي من راح امر .... صعدنا بالربل
گام يدندن اغنيه ... سألته هاي المن ...
حسن: ليلى مراد .. من ارجع ادورلج بالراديو ... اغاني نسمعها سوا بليل
مرت الايام حياتي ويا حسن هادئه وكلت خلصت من زهره والحمد لله وصرت حامل وهو الرجال ممقصر ويايه ... صح يعصب مرات بس بسرعه يبرد .... من دخلت بشهر السابع
نزلت على غرفة خالتي ... ردت اسالها على شغله من وصلت يم الباب سمعت عمي يگلها تروحين لاهلها تگليلهم خلي بتكم تكف عن الولد انوب تروحله للمحل ... حتى ننفظح ... خالتي گلتله شلون اروحلهم انوب يجلبون بي تعال اتزوجها من يعرفون بيها تحبه ويحبها
اخر جزء لهذا اليوم ... نلتقي باجر نكمل القصه

البارت11

زبيده :هنا من سمعت لطمت على وجهي من القهر ... رحت لفاطمه ....طكيت بچي
فاطمه:زبيده شبيج يا ستار صاير شي
زبيده: اخوج بعده يحبها .... وتروحله للمحل
فاطمه: صخام منو گلج
زبيده: سمعت عمي يريد خالتي تروح تحجي ويا اهلها
فاطمه: هذا ابويه شديخرط غير يجلبون بحسن ويتزوجها
زبيده: خلي يتزوجها ...خليها تشلع قلبه ... اني اصلا طلع من قلبي ... بعد ما اريده
فاطمه: سدي حلگج لحد يسمعج ... انوب خلي يتزوجها بقيت اهدي بيها ... وهي طلعت عصبيه وتفقد من تنقهر
زبيده: وداعت الي ببطني اني اخطبها اله... بس اريد من الله يبين حوبتي بيهم ... على المداراه الي مداريتها اله وبعده عينه عليها بعد ما اريده .... من يخلي راسها براسي ويفضلها عليه
انتهت وياه
فاطمه: گامت تشهك انقهرت عليها خلتني ابچي وياها لج موزين عليج .... الي بطنج خطيه شنو ذنبه
زبيده : اوف يا فاطمه احس روحي راح تطلع من القهر ...
سعاد: شكو شبيها زبيده
فاطمه: تعالي ادخلي ...
سعاد : حسن والولد اجوي
زبيده : ما الي خلگ اشوفه
فاطمه: كومي اصعدي لغرفتج ... لتصيرين مخبله ...ارجعي لعقلج وفكري صح
سعاد: شكو خليتوا بالي
فاطمه: زهره .....تروح لحسن للمحل
سعاد: وهاي انتِ مورمه عينج عليها ... يطبها مرض منو يگول هو منطيها مجال يجوز هي تروح تتحارش بي ... ليش تكبرين الموضوع گومي غسلي وجهج
زبيده: طبكت عندي.... لان احبه گلت لو يبقى الي وحدي لو ازوجها اله ويحرم عليه كرجال ليوم الدين ميقبل يطلگ ابقى وياه كل واحد بصوب طلعت من فاطمه صعدت للغرفه لگيته بعده ما صاعد اظاهر ويا اخوته .... بقيت ابچي وقلبي تزيد ناره الى ان دخل
حسن: عكدت حاجبي ... فزيت من شفتها تبچي شكو شبيج
زبيده: فقدت ابچي واحجي الي بيه زهره ... الي شكد حاولت اخليك تنساها ما نسيتها .. حرت شلون ارضيك والهيك عنها ماقصرت وياك وصبرت وتحملت عصبيتك وكتمت بداخلي حتى ما ابينلك اعرفك مرافگها ... ادور شرف من يمي من يمها
مو رجال .... من حجيت هالحجايه ضربني ... بحرگه گتله من اليوم انت انتهيت بالنسبه الي ...نزلت من عيني ... واني اروح بأيدي اخطبها الك حتى اتصدگ ...
حسن: صرت عصبي ضربتها بس خفت على الطفل عفتها فقدت لان گلتلي مو رجال
يصير خير يا زبيده اذا ما خليتج تروحين تخطبيها واخذها فوگاج وأخليج خدامه الها بعيني ... بيج بخت حامل ولا هسه ارمي عليج اليمين

دكوا علينا الباب ابويه وامي .... جاوبتهم بعصبيه انزلوا لا احرك البيت هسه عليكم ....
الحجي: افتح ابني
حسن : فتحت الباب هاي الي ردتوها كلكم بسيطه هاي دتسمعوني ... اذا امي ما اخذت زبيده هالايام وخطبتلي زهره
اطلك زبيده ..
الحجي: گتلك متعتب باب بيتي
حسن: واني گتلكم الي ناوي عليه .... عفتهم وطلعت برا البيت
الحجي: بنتي هسه هو عصبي.. ويحجي بكيفه بس يتهدا ...يرجع لعقله
زبيده: لا يابه خلي ياخدها اني هم تعبت طول ما هي وراه اني مشلوع قلبي خلي ياخذه هو رايدها ... هاهيه اروح اخطبها اله
الحجي: يابه انتِ هسه هم تحجين لحالج لان مقهوره ... بس ترجع الامور بينكم زينه متقبلين بهالحجي ... استهدي بالرحمن بنيتي
فاطمه: نزل ابويه ... گتلها لامي شنو شايف ابويه شي
جاوبتني لا من رايح للمحل شايف زهره واگفه ويا حسن بحجة تشتري قماش ... ابوج طاردها ... ومرزل حسن ... يگول يحلف هي تجي كل فتره من تمر بالسوگ توگف يمي تحجيلها كم حجايه اصدها تروح ... ابوج يگول ما صدكته... رزلته .. انت ماعندك غيره انوب كاعد تتمحبب يم باب رزقنا اليوم اخلي امك
تروح على اهلها ... حسن متخبل گايله تريد تفضحها وتفضحني
تالي يورطوني اتزوجها ...
يمه يعني حسن ميريدها ...
الحجيه: لا هو ابوج اظاهر كبر السالفه لان يكرهها يخاف يرجع حسون وياها
فاطمه: يمه يعني صارت مشكله بدون دليل على حسن لا سامعي يتغزل ولا شايفين علي شي مو عدل
الحجيه: والله يمه هذا اني السمعته من ابوج
فاطمه: الله لا يوفقك راضي ... طلع الولد ميريد ياخذها وانت بسوالفك خربتها
الحجيه: ولج لا تدعين على ابوج لا كسر راسج
فاطمه: يمعوده يمه سواله مشكله وهذا ابنج من يقفل يقفل ...
هسه انوب انتوا فتحتولنا باب ... اخاف جان ناسيها ... وماشيه اموره ويا مرته ... نبصتوا زهره بينهم ... حرام اذا تعرفون تصرفون
الحجيه: اصعدي شوفي البنت اني هم اروح اشوف ناصر يطلع يشوف اخو وين طلع بهالليل
فاطمه: دخلت للغرفه لگيتها متمدده و تبچي ولج زبيده انت شحجيتي وخليتي يتخبل ويگول اخطبوها ... وهو طلع ميريدها
زبيده: حتى ما اتذكر شنو حجيت بس چفصت بمصارينه من حرگت قلبي ... لو ميريدها ميتواهد وياها بالمحل
فاطمه: لج هذا ابويه .. شايفها واگفه يم المحل وطاردها ومرزل حسن ...حسن گايله هي تجي كل فتره واني اصدها ... شسويلها
ابويه گايله لعد اني ادز امك تگل لاهلها يخلوها تكف عنك
حسن مقابل گايله تريد تفضحها وتفضحني ويعرفون جنت مرافگها ( يحبها وتحبه)وتالي يجلبون بيه اتزوجها عوفها هي تبزع من حالها
زبيده: صخام بوجهي زدت بچي اني لعد خبلته للرجال من گتله انت يمها مو رجال
فاطمه: عوذه من هالحلگ .. اكو وحده تگله لرجلها انت مو رجال ... والله طلع مو مخبل اثاري عاقل وحس على روحه ... انت حامل ...لو مو حامل جان سگطج والله ... هاي اكليها لعد اخويه واعرفه .. من يركب الشيطان براسه يقفل يسويها شغلة عناد
زبيده: كافي فاطمه والله ما متحمله روحي هاهيه اروح اخطبها .. وين تريد توصل خل توصل .. بزعت
فاطمه: گومي انزلي ويايه غسلي وجهج وتوجهي لربج هو يحلها ويهدي بينكم
زبيده: نزلت غسلت وصعدت اذكر الله هو يفرجها ويفك كربتي
نسيت نفسي وأني اقرا قرآن ودموعي تنزل الى ارتاح وبرد قلبي
تمددت على فراشي ...
صعدت فاطمه گلتلي يريد ملابس شطلعله ... لان راح ينام بالهول ..
گمت طلعتله ملابس ونطيتها لفاطمه ...نزلت بقيت للصبح ما اكدر انام ...هاهيه اروح اخطبها وارضى بلي قاسمه الله ...
ثاني يوم اني عبالي هو طلع للشغل ويا عمي ثاري نايم بغرفة فاطمه ... نزلت على خالتي گتلها يمه اني راضيه اروح اخطبها ... خل ياخذها تطلع من نفسه ... هي بالحالتين داخله حياتي .. ومخربتها ... الحجيه
والله يمه هاي مو بكيفي ولا بكيفج هاي بكيف عمج ... للظهر وصل عمي للبيت .. صاحتني خالتي گلتلي اني فهمته لعمج
حتى منكسر حجاية حسن وكدامه انتي قابله تجين ويايه نخطبها
وعمج هو يخرب السالفه عليه المهم حجاية حسن عليج ....تتنفذ گتلها ماشي ...

البارت12

سألت فاطمه عليه شو ماكو ويا عمي گلتلي البارحه منام للصبح
وتالي من گعدت اصلي گلي راح اروح انام بغرفتج وانتِ اصعدي يم زبيده ...بقيت كاعده
زبيده :وراها صبينا الغدا خالتي گلتلي يمه راح اخلي فاطمه اتصحي ...انتي ابقي بعيده عنه منا الى ان يبرد ... گتلها يمه لعد اني ما اكعد وياكم على الغدا ...
الحجيه: ميخالف يمه تحملي شويه والله يهدي الامور
زبيده : صعدت للغرفه ...صعدت فاطمه ورايه
فاطمه: اجيت اتغدا وياج الوجوه جوه ... تلعب النفس
زبيده: حسن كعد يتغدا
فاطمه: اويلي على الحب يمه كعد على الغدا وعيونه تلعب مضيعله شي ويدور عليه ... وجماله مأمن بأخته يسأل عليج ...گتله بغرفتها ... گلي اصعدي يمها ولتگليلها سألت عليها

جاوبته لا ما اگلها ...
زبيده: اوف يا فاطمه بس الله يعلم الي بقلبي وبحالي ... اليوم الصبح ... ظهري مكدرت اگوم ... خفت لا الطفل يصير بي شي
انوب لا الرجال ولا الطفل
فاطمه: ليش ولج ... شايله ثگل ...
زبيده: لا مشايله شي
فاطمه: اخاف من ضربج حسن
زبيده : لا ضربني على وجهي
فاطمه: دكلي ... وخلي ام اتجيبلج الدايه
زبيده : لا بس انام على ظهري ارتاح ... ماكو شي ان شاء الله ..
فاطمه: خلصنا الغدا گتلها نامي ... وبطلي تاكلين بروحج ...
نزلت دخلت للهول ما لگيت حسون رحتله للغرفه بحجة تريد جاي
شفته ضايج ... بقلبي ابو قلب حنين ضايج على مريته ...
حسن : لا ما اريد
فاطمه: لعد راح اروح لامي ادز على الدايه اذا تريد شي صيحني ... فز
حسن: المن الدايه
فاطمه : زبيده واكعه البارحه من الدرج .... جاوبني عاكد حاجبه لونه انخطف بيها شي
ما ادري بس لگيتها تبچي من ألالم ...
حسن : روحي لأمي بسرعه خلي تشوفها ...
فاطمه: رحت لامي يمه جذبت على حسن گتله زبيده واكعه من الدرج ودتبچي من الألم ... روحي اصعدي بلكت قلبه يحن ويطير شيطانه ... هي صدگ گلتلي ظهرها يوجعها
الحجيه: هسه صاعده
فاطمه: اول مره ادري بالحجيه تمثل ويا الريحاني شو سوت روحها قلقانه... ودخلت على حسن يمه ... روح جيب الدايه
حسن : يمه شكو شبيها
الحجيه : يومه موجوعه ... اخاف يصير بيها شي
حسن : هسه رايح .... طلعت بسرعه رحت جبت الدايه ورجعت بقيت قلق ليصير بيها شي
زبيده : صعدت خالتي والدايه ...
الحجيه : يمه خلي تشوفج ليش ظهرج وجعج اخاف تصير عندج ولاده بسبيعي
الدايه : ماكو شي ... يمكن ما نيامه عدل لو شايله ثگل لو مشتغله زايد لتخافين حجيه
الحجيه : اي الحمد لله
فاطمه: نزلت امي تلگاها حسن ها خيرها
الحجيه : يمه من وراك تقهرها ...وهي حبله تاكل بروحها ...وتبچي من البارحه لليوم ... يمه حسون ما دريت بيك هيج قلبك محجر... يمه خطيه اصعد شوفها مريتك شايله ضناك
حسن : ماكو داعي ..
الحجيه : بكيفك يمه
زبيده : مرت يومين لا اني شايفته ولا هو شايفني ... من يريد شي يدز فاطمه
صعدتلي خالتي الظهر گلتلي اليوم نروح .. للي ما تسمى
زبيده: نزلت دموعي وقلبي انخطف بداخلي ياربي لو ميته ولا شايفه هاليوم ... ياربي والله قلبي ما يتحمل يمكن اذا يتزوجها اموت من القهر ... لا اله الا انت سبحانك اني كنت من الظالمين ربي موكلتك امري وراضيه بقضاك...
الحجيه : يمه لتخافين نروح ... بس نكسر حجايته وعمج مايخلي يتزوجها لو يعرف يروح لاهلها
زبيده : ان شاء الله ....
فاطمه : من دريت بالسالفه اليوم صعدت لزبيده لگيتها تنحب وكاعده على سجادتها .... قلبي وجعني عليها وبجيت عليها ما مار عليه بيوم باجيه على احد وقلبي محترك مثل ما احترك على زبيده .... نزلت فتحت الباب على حسن حتى بدون ما ادكه ... كلت حتى لو يضربني ابقى احجي ....اريد احجي مكدرت من البچي
حسن : فزيت كلت احد مات ... شكو ولج
فاطمه: (ابچي )ترى والله حرام عليك ...لان شريفه وتخاف الله
انت مستگوي عليها وتريدها تروح اليوم تخطبلك ام السطوح ... يعني لو عدو هم متسوي بي هالسوايه ... وفوكاها حامل ادري الي بطنها مو ابنك يعني يجي للدنيا يلگى امه مكسوره ولا حول ولا قوه لان ابو كسرها بوحده متجي لاظفرها
حسن : روحي ولج... لا اطلع قري بيج ... كمت .. خافت مني عبالها جاي اضربها ... عفتها وصعدت للغرفه ... فتحت الباب لگيت زبيده كاعده تقرا قرأن وتشهگ
كعدت ... على الفراش انتظرها تخلص
زبيده: من دخل حسيت قلبي يدگ بسرعه وراح يوگف من الخوف...وجسمي كله خدر من الرچفه رجلي انشلت من سديت القرآن كلت هاهيه الي كاتبه الله اشوفه اذا قاسمها اله لو شسوي راح ياخذها
حسن : عاكد حاجبي وقلبي يرف عليها اخ جماره والله مشتاقلج من شفتها خلصت ... وگفت ... طلعة من البيت ماكو
متروحين لاحد ... تبقين بس انتِ مرتي ...
زبيده : من سمعته التفتت عليه مي بارد ونزل على قلبي ممصدگه هالهم انزاح الدموع الي بقت تنزل تحولت دموع فرحه وشكر لرحمة رب العالمين
حسن: وعلى الحجايه الي حجيتيها طلعتي من قلبي والي بيناتنا بس الي بطنج
زبيده: اسمعه واگول ميخالف خلي يطلع الي بقلبه حتى يبرد.. وراها اصلح غلطتي وياه المهم يبقى الي حتى لو نبقى كل واحد
بصوب اتحمله العمر كله الى ان قلبه يلين
حسن: نزلت ... قلبي مرتاح صار كم يوم ماضايك الراحه ... صحت فاطمه ...
فاطمه: معبسه بوجهه نعم
حسن : گلي لامي ماكو روحه لبيت زهره موضوع وينسد ما اريد اسمع بي بعد
فاطمه: من الفرحه رحت بوسته لتزعل مني بس اني احبها على حبي ألكر
حسن : لا ما ازعل منج ... روحي لأمي بلغيها

#المتواضعه

البارتات الاخيرات

فاطمه: يمه حسن الله هداه مقبل تروحون
الحجيه : الحمد لله ... شر ونزاح كون تزوج ونخلص منها
فاطمه: صعدت لزبيده ... ها ولج ام فاطمه
زبيده: منو ام فاطمه
فاطمه: بت حسون اذا اجتي تسموها فاطمه...بعد التعب الي تعبته وياكم .. لازم تجازوني تسموها فاطمه
زبيده: ابتسمت والله اسميها وكون تطلع عليج خلقه واخلاق
واذا ولد اسمي على اسم عمي راضي
فاطمه: عوذه منج مكيفه راضي ...تريد ترضي عمها وتقهر الولد ... سمي انور ... وجدي ... نجيب...
زبيده: لا راضي
فاطمه: حتى اروح اني اخطب زهره لحسن ...
زبيده: اضحك ... لج اخوج يريد يسمي راضي واذا بنيه گلي خديجه
فاطمه:اذا فقد الذاكره حسون سمي أنور..بداعتي عاد ما اشوف انور وجدي اشوف انور حسن ...
زبيده: ضحكت ...الله ينعل شيطانج
فاطمه: هسه شنو صفت بيناتكم
زبيده: گلي طلعتي من قلبي وبس الطفل بيناتنا
فاطمه: اممم... ترى هو قافل عليج وحقه ... حجايتج ميلبس عليها ثوب
زبيده: ادري والله بس طلعت مني بدون تفكير ...الله يصلح حالنا
فاطمه: دمشي ننزل ... نكعد ويا وامي والبنات ..حسن طلع
زبيده : زبيده نزلت ... وبقيت ويا خالتي والبنات ... خالتي كعدت تنطينا مواعظ شلون نتحمل الرجال ونكسبه...لا هي ولا عمي يدرون اني حاجيه هالحجايه ويا حسن ...عرفت من فاطمه .
لليل... دنسوي العشا ... اني وفاطمه ..اجى للمطبخ
حسن: فطومه جيبيلي مي ونزليلي ملابس .. دا اسبح
زبيده: من راح فاطمه گلتلي روحي وديله المي ... حتى لو يفشلج... بلسانه... بس بداخله يفرح
زبيده: اخذتله المي والملابس ... رحت دگيت الباب
حسن : تعاي .. دخلت زبيده بيدها المي والملابس
زبيده: مديتله ايدي انطي المي ...بقى متجاهلني ما اخذه مني خليته بصفه هو والملابس وطلعت ...
بعدها كملنا العشا وودينا للهول ... عمي گلي تعالي بابا اكعدي ويانا عوفج منه ...كعدت بصف خالتي ...دخل حسن كعد گبالي
متجاهلني..خلصنا العشا التمينا بالهول اندگت الباب ... طلع ناصر رجع وياه خالهم ومرته وولدهم٢ ... دخلوا ...الناس التهت بالسلام ..حسن من گام يسلم عليهم اشرلي اگوم اكعد بصفه ...رحت كعدت بمكانه وهو بصفي ..يمه شكد مشتاقتله...ديسولفون حركت ايدي على ظهره
حسن: لحد يشوفج ...
زبيده: نزلت ايدي .. بصوت ناصي حسن راح تبقى تنام بغرفة فاطمه
حسن: اليوم مجبور اصعد انام بغرفتج افرشيلي بالگاع
زبيده: بقلبي ان شاء الله هالخطار يطولون...حسن راح اصعد ظهري اذاني من الكعده
حسن: اصعدي
زبيده: اترخصت ورحت لغرفة فاطمه اخذت ملابسه وغراضه الي بيها صعدتها للغرفتنا ... رتبت نفسي .. ما فرشتله ... حتى ينام على فراشه
حسن: صعدت للغرفه ... صار كم يوم ماشايف غير بس عيونها ... وين الفراش
زبيده: مو ماجبت لان عدنا خطار واخاف يحتاجوا جوا
حسن: بعصبيه زبيده ..خليها بالج انام بالگاع وما انام بصفج انتِ خلص غير الي بطنج ماكو شي يربطني بيج ... انزلي جيبي الفراش وخلي الليله تعدي لطلعين حسي يمنا عالم
زبيده: لبست هو راح تمدد ويا ما دا افتح الباب انزل نتر بيه تعاي گام من مكانه وگف ...سألني مخليه عطر جاوبته اي من قبل ما تصعد خليته .. گالب وجهه ابقي اني انزل ... دخل للغرفه جايب فراشه ... فرشه وتمدد عليه
گمت جبت الراديو... شغلته بقيت افر بي الى ان سمعت اغنيه سليمة مراد اريد الله يبين حوبتي بيهم ... بقيتها ...
حسن: ابتسمت من سمعت الاغنيه ...هي تعرف احب سليمه مراد ... واحب اغنية نوبه مخمره لان تنطبق على زبده .....گتلهاطفي دنام
زبيده: ضوجني ... اي والله اريد الله يبين حوبتي بيهم ... رفع راسه
حسن: ولج اجيج ... (بقلبي..بعد وبعد يا جماره مشفتي مني شي )
زبيده: راح انام حتى اخلص ... گام من فراشه عصبي منين تخلصين ولج ...جاوبته ..من حبك شو هذا ضحك رجع لفراشه
حسن: نامي زبيده جلدج يحكج اظاهر
زبيده: اصعد نام بصفي وأنام
حسن: نامي عاد وفهمي الي حجيته
زبيده: نام انتَ وعوفني بحالي ...
حسن: اروح انام بالسطح احسن
زبيده: اوف رجعنا للسطح ..والله اذا تنام بالسطح اطلع اگعدلگ على باب السطح ....خاف تفتر عليك ذبانه
حسن: (ضحكت )استغفر الله ...عاشرتي فاطمه تخبلتي مثلها
زبيده: لا والله حبك خبلني
حسن: راح انام كلمه ما اسمعلج ورايه شغل تمددت وبداخلي اضحك جماره تعلمت الفطاريه من فاطمه )
زبيده: بقيت انتظره الى ان نام ... نزلت نمت بصفه شلت ايده وخليتها على بطني اقشمر روحي على اساس هو حاضني
حسن: حسيت عليها( ابتسمت) ... لا هاي تعدت خبالات فاطمه
شويه ونامت گمت من الفراش حتى ترتاح بنومتها ما يكفينا اثنينه وهي حامل صعدت نمت بمكانها ... ريحتها بمخدتها غفيت عليها

زبيده: فزيت على الاذان لگيته نايم فوگ حقدت عليه ... كعدته حتى يصلي ضايجه منه وگالبه خلقتي عليه ... صليت ورجعت صعدت نمت على فراشي ظهري ميبس من نومة الگاع...مكعدت الا للعشره ... على صوت فاطمه
فاطمه: گومي يا عروس ... ساعة عشره ترى الحجيه ما صاحتج لان رجلج گلها متنزل طول ما رضا موجود ... وعبالها انتِ كاعده بغرفتج لو تدري بيج نايمه جان صعدت تهتف عليج
زبيده: صباح الخير ... ولج يا عروس اخوج طير نومة عيني البارحه قافل عليه ما منه رجعه
فاطمه: خلي قافل المهم زهيره طارت
زبيده: طول ماهو قافل ويايه اني قلبي يلعب منه وما مأمنه موضوع زهره خلصت منه
فاطمه: گومي رضا طلع ويا اخويه عبد و مرت خالي سألت عليج وامي گلتلي صعدي شوفي مرت اخوج اخاف بيها شي ...
زبيده: دمشي خلي ننزل عيب .....للظهر رجعوا الزلم للبيت ... دخل حسن سلم ... گلها لخالتي اتصبون للزلم وحد والنسوان وحد ... صاحني زبيده تعالي ...
رحت ورا گالبه وجهي عليه ... هو هم عاكد حاجبه وضايج مني طول ما رضا بالبيت متعتبين الهول والممر فاهمه
جاوبته مفتهمت ساعة مابيناتنا غير الطفل وساعه ما اعتب الهول
حسن: بعصبيه سوي الگتلج عليه لا اشوفج شي ميعجبج .

البارت الاخير

بقلمي. ام مريم اماسي الليل
الجزء الرابع عشر والاخير
حقوق النشر محفوظه
زبيده: صار
حسن: والحجي نفسه موجه لفاطمه...امي ادزكم گولولها حسن ميقبل ... وابويه اذا صاح هم متروحن اني اگله ..يله روحي
زبيده: رجعت لفاطمه..اخوج يگول لتعتبين الهول والممر ...
فاطمه: ادري موصي امي الصبح عليه وعليج قبل ميطلع وهسه ديأكد لج هو جامعها من ابويه وهذا خالي وسامعه من بنات خالي رضا هم مثلهم كلهم مطلعيهم من نفس الشماعيه
زبيده: لا عمي يختلف عن حسن مو دا اشوفه وياج وويا خالتي
فاطمه: غير هو كبر وعقل وامي هم كبرت واني بنته وين شايفني احد غيره وغير اخوتي حتى يغار ...متشوفيني معنسه ...
زبيده: فطومه ماكو مثل الاهل ودلالهم وبعدج صغيره يجي نصيبج ان شاء الله
فاطمه: والله الي يريدني ياخذني واني وابني ( الراديو)...ولا عانس وابني ويايه ولا مزوجه ويحرموني من ابني
زبيده: هههه لج منو يگول الي تاخذي يقبل يخليج تسمعين الريحاني وانور وجدي وسوالفهم بالافلام
فاطمه: والله لو يطلگني ما اعوف ابني الي ما كدر يحرمني منه رجلج ... يجي الغريب يحرمني منه والله لا طگ حوصلته
زبيده: هههه لج فطومه.. شو اتخيلج تاخذين واحد فقير على كد ايدج
فاطمه: اني هم مرات احس هيج بس اريد واحد مثل شماعيه
زبيده: ورا الغدا... خلصنا شغل اجى ناصر ... حسن يگول خلي زبيده وفاطمه يصعدولي للغرفه
فاطمه: يا ستار ولج سويتي شي
زبيده : لا والله بعد ما شفته وين اسويله شي
فاطمه : صعدنا بالدرج مفتوح باب الغرفه لگينا كاعد وجه ميبشر بخير ... كلت مكتولين مكتولين بس انقهرت عليه ينهد حيله ب٢ ... كلت اصير عاقله وما اقاومه ابقى جوه ايده ... ليفحط
زبيده: يبو هاي شبي حسوني
فاطمه: لج يا حسوني اليوم مكتوله مكتوله لتذلين نفسج ناخذ الكتله ( اماسي الليل)بشرف
زبيده: دخلنا للغرفه گلي سدي الباب وتعالن
حسن : اني اليوم الفجر اسافر وماعندي وقت احجي وياج ( فاطمه) غير هسه لان معزوم بعرس واجي متأخر يجوز الگاج نايمه
انت عرفتي شنو سبب جية بيت خالي ...
فاطمه: لا
حسن: يخطبوج لرضا
فاطمه: فتحت عيني ردت امثل دور الخجل كدام حسون ما كدرت ( ربي دعوتي مستحابه عندك ... دزيتلي شماعيه)حسن
حسن: بس ترا هو نحس وسامع بي متعب
زبيده: عادي شايفه واحد مثله مراح تتفاجئ
فاطمه : ضحكت
حسن:انداريت خزرتها لزبيده...انت صوتج الافضل ما اسمعه
زبيده: هو الي يحجي الحق محد يريده
حسن: بعصبيه يعني انت تحجين الحق ( اني مو رجال)
زبيده: اتذكرت چفصتي لا مو دائما حقانيه ... مرات اتبلى واذب تهم
حسن: انداريت على فاطمه... اني مامقتنع بي لان يتعبج وانت ماعندج صبر وعنوديه( اماسي الليل)
فاطمه: ما ادري بيكفك انت وابويه
حسن: ابويه موافق... بس انت اذا معترضه ..اني اگله لابويه
زبيده: مراح تگلك لان تستحي منك اني انطيك جوابها بليل
فاطمه: لا ما استحي من حسن... يله قابله بس الراديو شلون
زبيده: اني وحسن ابتسمنا ...
حسن: يله روحي بس مثل ما فهمتج ... لا هول ولا ممر
فاطمه: ماشي بس انت همتك بسالفة الراديو
حسن: زبيده اكعدي بصفي
زبيده: كعدت
حسن: شوفي اني رايح بطريق سفر وهاي دنيا موضوع زهره ... انتهى ورا ايام من زواجنا ... لان من قارنت بينج وبينها وبين تصرفاتي وياج وتصرفاتي وياها عرفت متهمني ومجرد جانت نزوه شباب انت تعرفين اني شغلي ويا النسوان.. من شفت زهره اول مره بالسطح وذبتلي حجايه كرهتها ... بس كلامها عجبني واني شاب اعزب جذبتني بكلامها ودلالها ... ولان اخاف الله جنت محسب اخذها واغيرها من غصبني ابويه اخذج بداخلي جنت متوعد ابزعج ... بس من اول يوم شفتج ..انقلب حالي .. بليلة الي صرتي بيها مرتي ... وگلتيلي دائما خلي الله كدامك من تسوي شي بالخفيه هو يشوفك ... من يومها بطلت اطلع للسطح واشوف زهره ..

لان انتِ مليتي عيني ورا فتره .. كامت تجيني للمحل بفترات متباعده من تمر بالسوگ اصدها ... تعاتبني اجاوبها اتزوجت وابويه خيرني بينه وبينج اختاريته واختاريت رضا... گامت تجي كل فتره بحجة تشتري قماش ... اصيحلها ناصر يتعامل وياها حتى ما انطيها مجال تحجي ويايه ... اخر مره اجى ابويه للمحل لگاني احجي وياها لان بيومها مجان اكو احد غيري بالمحل ... ومن گتلها زهره كافي بعد تجين للمحل ... راح تجيبين لنفسج الحجايه اني رجال متزوج محد يعيبني ... بس انت اهلج واخوتج مو خطيه تجيهم من وراج حجايه ... الي جان بيناتنا غلط وانت جريتيني اله من قبل ما اعرفج انت تطلعين بالسطح مكشوفه من ورا اهلج ...ومن اتزوجت حبيت مرتي ....جاوبتني الله لا يوفقك ويطلعها بأختك وبمرتك ابويه اجى شافها طردها .... أنقهرت عليها بداخلي وخفت من دعوتها ... من رجعت للبيت ما ادري ابويه موصلج الحجي او انت شلون عرفتي ...وگلتيلي ادور شرف من يمي ومن يمها مو رجال...ساعتها حسيت نفسي مو رجال لان جنت اضحك على بت العالم وخفت على اختي وعليج من دعوتها... وبساعة عصبيه گتلج اتروحين اتخطبيها وجنت ناوي اخليج تروحين ... حتى ضميري يرتاح والله ميعاقبني ... بس بعدين من بردت وحجيت لولد صاحبي متدين ويعرف شرع الله بدون ما اذكرله الاسم حتى لا افضح البنيه ... گلي الله ميعاقب احد بذنب شخص ثاني كل واحد يتحمل اخطاءه ويتحاسب عليها ولان انت طيب الله ما رادلك هالبنيه رزقك ببنيه طيبه مثلك الطيبون للطيبات والبنيه الله يستر عليها انت ما قشمرتها حتى تشوف وجهها وشعرها .. هي اصلا مكشوفه ماعليك ذنبها بس تتحاسب لان جنت واهمها بالحب استغفر ربك وبعد لترجع لغلطك واستر على البنيه اذا احد سألك بيوم عنها لا تذكرها بسوء وغض بصرك عنها
كلامه ريحني وگتلكم محد يروحلها بس بقيت متأذي من حجايتج ولحد هاي اللحظه ... ما اكدر انساها الج ... ولا كادر ابلعها وامشيها كأنه مسمعتها ...
زبيده: حسن اني لان احبك قلبي احترك اني من اول يوم دخلت لبيتكم شفتك وياها مهتميت لا ن مجنت احبك بس بعدين حبيتك ومتحملت وحده تشاركني وتاخذك مني طلعت مني الحجايه بساعة عصبيه مو قاصدتها ... لان انقهرت شلون اتساوى وياها ليش من يمي تحاسبني على كلشي ومن يمها منطيها حريه وتالي تاخذها عليه حسن انت خانگني بغيرتك واني مرتاحه على هالشي ما متذمره لان اعرفك رجال ورجولتك تتحكم بيك .. وتريدتحافظ عليه بس الك وهالشي يخليني اعرف انت شكد تحبني .. وشكد اني مهم الك ....مو لازم تحاسبني على حجايه وتعرف اني مقصدتها ولا تشيل بقلبك مني .. انت اغلى واحد عندي ورا ابويه من يوم الي زعلت و نزلت تنام جوه اني مشايفه النوم الا البارحه حتى لو تنام بغير مكان بس المهم ويايه بالغرفه وقريب عليه انت علمتني اني الك وحدك ومحاوطني بكل مكان وقريب عليه ...اكعد انت بصفي انام انت بصفي اكل انت بصفي اصلي انت بصفي حتى من اسمع راديو انت ويايه شلون تريدني اتحمل تبقى بعيد عني ... انت تكدر اني ما اكدر
حسن: بقيت بس اسمع كلامها ... وقلبي يرف عليها جذب ما شايل منها ولا حاقد عليها بس ادلل براسها ... حبيت حرشتها والحجي الي تذبه ... حبيت حبها الي الي طلعها من دور العقل والرزانه وصارت خبله مثل فاطمه ... وصدك اني خانگها وهي ماتذمر ومطيعه لان تعرف هالشي يريحني من تبقى الي وحدي بينما فاطمه اختي جانت تذمر وتعاند )..كلت بعد خلي احسسها بغلطتها .... گمت من يمها هسه بعدين نكمل حجي ورايه طلعه حضريلي ملابسي ..
زبيده: بقلبي اف شلون راس يابس ... موتني شوكت نتصالح
ويحن ...بقيت ادردم رايح حنه يتونس شكو يدوخ راسه بزبيده
حسن: تعالي طلعيلي فانيله....اجتي فتحت الكنتور ضايجه...
زبيده: اجى من ورايه جر الفانيله.. يدندن ... والله حنيت اسوي حنه ... بيوم حنتي جنت معبس ... مجبور على العروسه
زبيده: حاسه بيك لان جربت هالشعور بيوم العرس...
حسن:ابتسمت... بله اني گلولي العروسه محلوه .... انت شبي العريس گلولج عليه شايب لو اجگم
زبيده:مكلولي خلوني اعيش الصدمه اول مصعدت الربل
حسن: ضحكت... مجان شايفج عباله راح يخترع ....بس هو هم فز من شافج
جريتها حضنتها طلعت العروسه جماره ... راح اروح هسه ما اتأخر لخاطرج وسفر مراح اسافر باجر.... هسه اخلي واحد من اخوتي يروح بدل مني ... بس فكري بالحجايه الي تطلع منج قبل متحجيها ويايه
زبيده: والله غلطه متكرر ...
حسن: جماره اجي الگاج منتظرتني
زبيده: ابو طبع ميجوز من طبعه .... بوسني طلع ورا دقايق صعد
جماره مو تنزلين راح يجون خطار علمود بيت خالي يمنا ... انطيت لامي خبر متصيح عليج.... حبيبي فدوه العينك اذا انزل وين يشوفوني قابل راح يجون للمطبخ لو لغرفة فاطمه... عيب نسوان اخوتك يطبخون للخطار واني ابقى هنا وفوكاها اضوج وحدي ابقى اتصفن بوسته من خده ... خلي اروح يمهن لا اوصل ممر ولا هول وما اصعد للدرج الا من انت تجي اصعد وياك

حسن: زين انزلي ويايه
زبيده: لفيت خماري.. قبل ما انزل رفع طوف دشداشتي اخاف لابسه حجل وناسيته... شاف كلشي مضبوط يله خلي اوديج يم البنات ... ...
فاطمه اتزوجت رضا بعد شهر ...وسافرت للمحافظه الي هو بيها
غيابها عن البيت جان كلش واضح على الكل واولهم اني ورجلي ... الي گام يروح يشوفها بين فتره ولخ ... ومرات يجيبها وياه تبقى يمنا ويرجعها ومرات رجلها يجيبها ... سبحان الله من كثر ما جانت تدعي تريد رجال مثل اخوها ... طلع رجلها نفس الطبع واكثر ... منعها حتى من الراديو ....بس بعدها روحها حلوه ...اني صار عندي علي...خالتي نذرت اذا ولد يسموا علي
محمود ابن عمي اتزوج وحده كرايب امه .... ونجله بوكتها ... انقهرت ..بعدين اتزوجت ...ابن خالتها....
زهره هم تزوجت ... وخلصت منها جان يوم عرسها .... مفتاح الفرج ونهاية لقصة زهره وحسن ....
كبرنا وحسن نفس طبعة وغيرته واعصابه .... وبقيت اني مثل خياله لازم وين يروح وين يكعد اني بصفه ....صار عندي ٥ ولد و٣ بنات وبسنة من التسعينيات بيوم الخميس جانو ولدي وبناتي منجمعين عدنا .....وجانوا احفادي يلعبون اتاري .... بي ٢ يتلاكمون .... ابني الوسطاني أنور الي عمته ... فاطمه سمته على انور وجدي ...
أنور: يابه تعال العب انت وامي خلي نشوف منو يغلب
زبيده: كعدنا اني والحجي ونطوني لزمه لونها اسود بيها دكم وكدامي بالتلفزيون ملاكم ابيض وملاكم اسود .... علموني ادوس الدكم العب بحركة قلب وادوس الدكم كلهن سويه شفت الملاكم الابيض يضرب الاسود فرحت .... اي ولك اضربه احجيها بحركة قلب
انور : شوف امي شكد شالع قلبها ابويه دطلع حيفها باللعبه
يمه ترا انت الي شبعانه بوكسات ابويه الابيض وانت الاسود الي دينضرب
زبيده : التفتت على حسن ماريد هذا انطيني الي بيدك هذا مايشتغل زين
ولدي وبناتي يضحكون يابه فكها شويه خليها تفوز عليك ريح قلبها
حسن: اضحك يابه ترى جماره مو هينه لو خلتني بعقلها ... تجيبني للدرب ...مو حجيه ( هي تفهم قصدي )
زبيده: ضحكت ..والله انت الي براسك براسك ... ما اكدر عليك بيبي علموني اريد اغلبه لجدكم ...
انتهت القصه وانتهى زمانها بكل ما يحمل من
مكارم الاخلاق ( زمن الاهل يدورون الستر لبناتهم ولولدهم بزمن الچنه بنت للعيال والعمه والعم ام واب....زمن مخافة الله وصفاء النيه لا غيره ولا حقد ولاكذب.... زمن الوجوه الحقيقيه والقلوب الطيبه زمن الرجوله والغيره والالتزام والعفه.... وداعا لاصحاب الزمن الجميل .... الابطال في ذمة الله والرحمه على جميع اموات المسلمين

#حبايب شنو رئيكم بالقصه
#اريد ارائكم حول القصه

بداية القصة 🤍

قصة جديدة : #قلبي_الصغير_لايتحمل

قراءة ممتعة🫶🏼