ين الحاسود خمسه بعين العدو

:عابت شايفتني احسد وتتعوذين بوجهي

-ولج انتي لو شايفه فتره الحمل كلها

ادعي ربي مابقى دعاء لاامام معصوم

مادعيته مايطلع اصلع مثل ابوه

هسه انتي كاعده تباوعين على شعره 
:ههههههههه خرب يومج

صدك هم زين ماطلع اصلع

-هههههههه شسوي خيه من ضيمي

:والقران بحياتي ماشفت وحده 
تحشش على زوجها مثلج

-يمعوده لساني بس يمج

:اي يمه ينبلع لسانج

اكلج هو يدري بيج مسافره

- اكيد يعرف 
شنو كال 
مايهمه المهم ماخسران من جيبه 
شي

عجيب امره اكو رجال بلدنيا لايصرف 
على عائلته 
زين وهو المن يشتغل ومتغرب اله يصرف 
عليكم 
يمعوده موجديده عليه من ازوجته لهسه 
قميص مامشتري الي لو لابنه 
زين انتي احجي وياه خل يدزلج مصرف

يعني اله هو مايدز من كيفه انه اكوله 
اكول اسكتي رحمه لاهلج ماناقصه هم 
خليني انسى شوي

سكتنا و نسمع اغاني الشباب  وركصهم

ولاجنهم اطباء استخفوا فد مره

وطريق طويل وسيف بيني وبين وهج

او حسن ياخذه يمه يبقون يلعبون وياه

وصلنه لسليمانيه وكانت الاجواء ساحره

والطبيعه الخلابه شي ماينوصف

كعدنا انه والبنات بشقه زغيره غرفه ومطبخ 
وصاله وحمامات

وحسن واصداقائه هم بشقه جيرانه

وكانت الشركه تاخذنه مكانات سياحيه

وشلالات ومصايف عدهم جدول

ويانه دليل السياحي 
ويصعدونه على  الجبال

والكل متونس بس انه محتاره بسيف 
لو يعاند لو يتناحس

جنت اشوف الشباب الي استوه مزوج

هو زوجته شون حلوين معزولين ويتغزلون بعض

والمخطوبين ٠٠٠٠٠ 
والي يصارح حبيبته لان كانت اجواء

حريه وطلعنه من ضغط الدراسه والردهات

واباوع على نفسي  انه ونائل حتى تلفون

كل تلاثه ايام يالله يتصل مره

مو اكثر من عشر دقايق ويغلقه

الكل جان يسالني ليش وين زوجج 
نريد نتعرف عليه

ماعندي اجابه اله مسافر مو بلعراق

لان ماعرف غير هذا الجواب ماعرف

شون عايش ويامن وين يقضي وقته

جنه نكعد.كروبات شباب وبنات

ومرات بلمطعم نكعد سوه ضحك وتحشيش

يعني صدك واحد ينسى همه نطلع 
مولات اسواق ماظل شي بنفسنه

بهاي الفتره

دكتور وسام صديق حسن 
شفته هواي بتقرب 
من وهج ٠٠٠٠٠ 

بس هاي وين قافله 
منتظره محمد ابن امه 
خطيه هواي تصفن وتتحسر 
ماعرف مرات الوم نفسي 
اكول انه السبب لان اتعرف 
عليها عن طريقي

****

بعدها خلصت عشره ايام ورجعنا

وبدينا بحلفه التخرج واهلي كلهم  حضروا

ولبست جبه وقبعه التخرج

واخيرا حلمي تحقق وصار واقع

صح كانت هواي معوقات بطريقي

هواي تاذيت دفعت الثمن زواج من انسان 
فاشل عديم المسؤوليه

لكن كله انسى واتبخر من بالي من صعدت على

منصه واستلمت شهاده التخرج

جنت بقمه السعاده ٠٠٠٠٠

بعد.ماكملت الامتحانات  استلمت النتيجه

وصرت دكتورا والحمد الله

هذا اللقب الي تعبت عليه وحصلته 
عمري كله احلم

مااجه من فراغ ولامن عدم

هواي ضحيت وتحملت حد.ماوصلت

كانوا اهلي كلش فرحانين وخصوصا

بابا سوالي حفله بلبيت ومولود

بعد العطله بديت اشتغلت  دكتورا 
تحت اسم مقيمه بلمستشفى 
او بالاحرة انتقل 
بين مجموعه مستشفيات

اما نائل بطل من شغله 
هذا الرجال ابد.مو طبيعي يعني 
مايثبت بشغله 
بعدها بقى بسوريا وانه هنا 
وكثرت مشاكله وياي ساعه يكول 
تعاي وساعه يكول ابقي حد.مالكه شغل 
جديد. 
بعدها 
اتعاقد ويه شركه كويتيه  مالت 
عقارات ومقاولات 
بواسطه اخوي لان واحد من اخوتي عندي 
يعيش بلكويت  مزوج هناك ومستقر 
وهاي الشركه عدها فروع بسوريا وتركيا 
وهو يتنقل بين هاي الدول 
الحمد الله نحلت مشكلته 
اما عيالي طلعتلهم لجوء لامريكا 
واستقروا بمشيكان

ولاجني جنتهم وعشت وياهم محد.يسال

عليه ولا على ابني اله انه اخابرهم

بعدها ظل نائل يلح لازم اسافر وياه

من بعد ماتخرجت ماعنده 
حجه ابقى بيت اهلي

ويكول لازم نستقر 
توسلت بي يرجع للعراق نعيش هنا

جان اكو تقديم على شركات النفط بلبصره

اتصلت بي كتلها قدم بلكي يطلع تعينك 
ونستقر بلبصره 
رفض  رفض قطعي رجوع للعراق

وقررنا نسافر ونعيش بسوريا 
حد.ما نشوف دوله ثانيه او نطلب لجواء 
ونسافر امريكا وننجمع ويه اهله

وكان هذا اصعب قرار ينفرض عليه

اعوف بلدي 
مثل هواي قرارات انفرضت بحياتي 
وارجع لضيم نائل وعيشته المره 
بس ماكان عندي خيار ثاني 
لازم اسافر لشوكت ابقى بيت اهلي 
وابني بعيد.عن ابوه 
دعيت ربي الله يهديه النه 
ويكون رجال كد.المسؤوليه 
بلكي يتغير من نكون عائله وحده 
ويبطل خرابيطه 
خابرني فديوم وكال 
الاسبوع الجاي ارجع للعراق 
حتى اكمل اجرارءت سفركم 
بعدها حجه ويه سيف ونهى الاتصال 
ماعرف شنو احساسي صح موافقه 
بس من صارت صدك. 
انهاريت شبعت بجي 
وكلعاده استسلم للواقع واسكت 
&&&&&يتبع 
&&&&&&&يتبع

قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331
‏لاتختار الشخص الجميل، إختر الشخص الذي يجعل حياتك جميلة ❤🌹
تاري

خ إنشاء القناة 2018/7/16
قناتنا2 @loves959

بارت ١٤
قلب مكسور 
رابع عشر 
بقلمي #بنت الرافدين #

وكان اصعب قرار بحياتي 
اعوف بلدي وماعرف شنو يتنظرني 
وقررنا نسافر 
اجه نائل للبصره بقى فتره لحد ماكملنه 
ودعت اهلي بدموعي 
وهما كلش تاذوا 
خصوصا بابا وماما لان تعلقوا بسيف 
هواي 
وصلنا بغداد بقينه يومين اجرنه فندق

قريب الاكاظم زرت الامام ودعيت ربي 
يخليني اتحمل الغربه وفراق اهلي 
٠٠٠٠٠٠٠ 
حجز طريق بري لسوريا

بعدها صار وقت نسافر طلعنه بسيارات كبار

لان كان وضع مو امان لازم السفر يكون

جماعي  او شركات مضمونه

شعور ما ينوصف بس احس روحي 
تريد.تطلع 
بقلمي بنت الرافدين ٠٠

الطريق كله دمعتي مانشفت

حسبي الله على كان سبب بلتهجير 
الي مصبرني

اخذ حبوب منومه حتى انام بقيت الطريق

كله نايمه انه و سيف

بحيث صرت حديث السياره كلها تعرفني

الكل تسال نائل ليش زوجتك هلكد نايمه 
شبيها مريضه 
او بنات يسالوني انتي حامل

بس ا،نزل وقت الاستراحه او الاكل اغير ملابسي وملابس ابني

ورجع انام ٠٠٠٠٠٠

حد.ماوصلنا لحدود سوريا بسيطرات التفتيش

بدت الهجه تختلف وكالوا دخلنا سوريا

ودعنا العراق

هنا انه انهاريت من البجي حتى الحبوب 
مانومتني 
يعني انتهت حياتي

بلعراق ٠٠٠٠٠

احلى ايامي اهلي اخوتي صديقاتي كلها

صارت ذكريات 
الله يساعد كل واحد.طلع قسرا من بيته

وتهجر وعاف محد.يحس هذا الاحساس 
اله الي مثلي

هواي ويانه مسافرين بس 
يجوز براضاتهم او يحسنون 
وضعهم

لكن انه حياتي حلوه ومستقره 
بس شسوي لحظي المصخم 
شبعت بجي 
حتى السايق وصاحب الشركه انكسر خاطرهم

عليه وكلولي ولايمهج اختي ارجعج وياي

كتلهم لاعاي طلعت اتحمل واصبر

وصلنا سوريا كعدنا بشقه من شقق بابا

جانت عنده عماره منطقه السيده زينب

عليها السلام للايجار 
لان نائل ماعنده شقه يكول اكعد بنايه الشركه 
او مسافر

هواي جنت ازورالسيده زينب 
شوي يخفف عليه حزني من اذكر حياه

السيده استقوه يصير عندي اصرار

اواجه مصاعب الحياه وهموم الدنيا بدون

جزع او حزن كثال للصبر والاباه

نائل كان يطلع لشغل الصبح ويرجع

العصر او بليل 
يجيب وياه علاكه بيها طماطه وبيته 
ونوع واحد.فاكهه 
وخبز لاغير 
يعني شنو يصير غداء عشاء 
اضطر انه انزل اسوك 
طبعا من فلوسي 
بقيت على الحال حد.ماخلصت 
كم ابيع بذهبي ماجايبه وياي 
هواي بس كم قطعه لالبستهم 
كلهم بعتهم 
من بعد.الدلال والخير هذا حالي 
عمري كله ماممسوكه 

او شايله بيدي علاكه 
اهلي يتصلون اكلهم زينه ومرتاحه 
الى خلصت فلوسي كلهم 
ونائل لو يموت مايعوف 
بلبيت مصرف 
من غير المبيت بره البيت 
والشرب يجي نص اليل 
سكران ٠٠٠٠٠ 
حجيت لماما 
بعدها بفتره بابا مخابر نائل ومتعاك وياه 
ونائل مايرد عليه 
اجه عليه تعارك وياي ليش تحجين لاهلج 
ليش ماتضمين سر 
ماتعرفين هاي اسرار بيت 
اهلي كاموا يدزولي مصرف 
بس بابا اكثر من مره راد.يرجعني 
بس انه ارفض 
ماريد.اهدم بيتي عندي امل 
ينصلح حاله 
طبعا ماحجيت عن الشرب 
وشون يعوفنه وحده 
اله بابالو  يعرف هيج.اله يطير طير 
مو يسافر وياخذني 
بقيت على الحال تلاثه اشهر 
عشت ماساه بمعنى الكلمه 
وبابا ونائل مشاكلهم زادت الى حد 
ما اخوي الي بلكويت ادخل 
وكال انه راح اقدملج على تعين بلمستشفى 
واسويلج اقامه 
كلش فرحت على الاقل اعيش يم اخوي 
واعتمد.على نفسي 
وبلفعل كمل كلشي واجه اخذنه 
انه وابني 
وانائل بقى يسافر ويه الشركه الي يشتغل بيها 
وبعدين يتبعنا 
وصلنا للكويت وبقيت عايشه بيته

عنده شقه ضمن بيته او ملحق كعدت بي

وخلالي سايق خطيه كلش فرحانين بينه

حتى ابني كل وقته يمهم 
زوجته كويتيه من اصول عراقيه

بس كلش حبابه

قدملي اخوي على تعين طلع تعيني بمستوصف

نفس المنطقه بديت ادوم

الحمد الله اموري طبيعيه وابني سجلته حضانه

وبعدها روضه واخوي مامقصر وياي

حتى مسواك هم هو يجيبه مايفرقني عن بيته

هو عنده شركه مقا لات ومنهدس

والله مفضل عليه 
٠٠٠٠٠٠٠ 
وانه جنت متائمله انه راح نكون نفسنه

لكن نائل بلعكس كلش ابتعد بهاي الفتره عنا

كل سفر ونسه وشرب عايش لنفسه

يجي اسبوع و٣ اسابيع مسافر

بحجه الشغل يعني مثل الخطار

انه بهاي الفتره دوامي كلش مرتاحه بي لان ماعدهم مرضى قله كلش يعني اخلص وقتي

كله لو مراجع او اثنين

استغليت هاي الفرصه وبديت ادرس دراسات 
لان عندي وقت

فد.مره اجه نائل بقى يومين وكلش 
ضايج

-نائل شبيك ليش ضايج

نائل :ويهمج اله عرفتي

-اكيد.يمهمني ابو ابني مايهون عليه اشوفك

هيج

:ابو ابنج زين فكرتي بابنج

-ليش بشنو مقصره وياه 
اخر دلال مدللته حتى الروضه مسجلته انكلش

:اي بس هاي ومن يكبر مايردله اخو 
يكون اله سند.

-يعني شنو نائل مافهمت

شنو مافهمتي يعني اريد طفل 
اشو تخرج وتخرجتي وتعين ومتعينه بعد 
ليش ماتردين تسوين طفل

-تشوف حياتنا مستقره مالت اطفال 
واحنه بيت مثل العالم ماعدنا 
الى متى نكعد بيت اخوي 
يعني اولادنا مو مثل بقيه الاولاد

يردون 
بيت مستقل ومستقبل مأمن لو بس 
كثره بلاش ٠٠٠٠٠

:اكلج انتي تعيرني 
بعكدج بيت اخوج على اساس انتي 
واهلج صاحبين فضل عليه 
-،لاماكلت هيج ليش تاول الكلام

انتي،كلما حجيتي وكلتي بابا واخوتي 
واحنه هيج واحنه هيج. 
ترى خاف قبل جنت على كد حالي هسه 
طكيت وممحتاج منيه احد 
وطفل تسوين يعني تسوين

-هسه لي يسمعك ميت على الاطفال

اشو هذا ابنك ماتدري عنه بعدني احجي

اجاني راشدي

-تضرني نائل

:اضربج واكسر راسج ولسانج

ديري بالج يطول وياي

وعافني وطلع

مارجع اله بليل متاخر نام بغرفه سيف

بقى يومين وسافر لاخابر ولايسال

ياربي شنو بي هذا الرجال راح يجلطني

هو واحد.مامتحمل مسوؤليته هنوب

يريد بعد.لااحمل ولاشي 
شنو يريد يسوي خل يسوي 
بقيت هيج حياتي بين مد وجزر 
صار على وجودي بلكويت ٣ سنوات 
صار عمره بهاي الفتره ٥ سنوات ونص

ونائل يبتعد.يوم عن يوم ٠٠٠٠٠

حدما يوم كاعدين على الغداء

كال بعدج تفكرين بلموضوع ومانطيتني جواب

-ياموضوع نائل

ههههه شبيج ماعرفج هيج غبيه

-،لا بس يجوز ناسيه ذكرني

:موضوع الاطفال

-اوووه نائل تره انه تعبت من هل الموضوع

احنه ليش تغربنا وطلعنه من بلده مو

حتى نكون نفسنه ونبني حياه افضل 
اشو كل تغير ماكو هسه بالاول خل يكون

عدنا شقه بيت 
:انتي اشتري بيت ليش راتبج قليل 
-،انه اشتري هههههه اكيد تشاقى 
راتبي اصرف على البيت وعلى روضه

سيف تعرف شكد القسط الي ادفعه بلسنه

وحتى لو عندي مبلغ بس مايكفي حتى

اشتري شقه عقد

بس لو نساعد انه وياك اكيد.نكدر

انت لو تنطيني كل شهر خمس ورقات . 
اكدر اوفر بس مو وحدي 
:اكلج انتي هواي تلغين واني تعبت

حتى دكولين ليش تواجدك قليل بلبيت

ماتشوفين اسلوبج وياي 
ذب الخاشوكه ودفع الكرسي وكام

حتى سيف خاف منه وكال ماما شبي

بابا ليش هيج عصبي 
-مابي شي ماماتي كمل اكلك حتى اغسلك

وتنام 
خلصت الاكل وغسلت لسيف ودخلته لغرفته

غطيته حتى ينام 
كملت غسل المواعين وترتيب المطبخ

ورحت سبحت

دخلت للغرفه امشط 
:طفي الضوء اريد انطمر

-ان شاء الله 
مشطت واجيت

تمددت  كتله نائل 
اممممم 
-اريد اكولك شي 
:مابيه حيل لغوتج 
-درت ظهري ونمت

:احجي اسمعج 
-مو على اساس تريد تنام

:طارت النومه من وراج 
غردي شعندج

-اريد اروح لاهلي

:شنووو 
-مثل ماسمعت اريد اروح للبصره

مشتاقه لاهلي صارلي ٣ سنوات طك كلبي عليهم

وثاني شي وهج زواجها هاي الايام

:اي وانتي شكو تزوجت او لا

شبيك هاي صديقتي واكثر من اختي 
شون ماحضر عرسها

ولاتشيل هم تكاليف السفر كلها حاسبه حسابها

كال اله هيج سهله وغمزلي وضحك

يالله تعاي يمي مشتاقلج وسحبني لحظنه

بقلمي بنت الرافدين 
خرب هذا الرجال شكد فليسي يموت ولا 
يخسر عليه او على ابنه فلس

وراه كم يوم كال اريد الجوازات حتى احجزلكم

بس اني اوصلكم وارجع عندي

التزام بلشركه ومن اخلص اجي عليكم

-اي زين بس ياريت 
نسافر بطياره اتعب بلسياره

:طريق سفوان مفتوح واحنه عدنا اقامه

سهله علينه تصير

-زين شوف الطيران مو احسن

بهاي الفتره اطور الطيران ومطار البصره

بد.يشتغل بشكل احسن

كال اوك . 
اخذت اجازه من دوامي ٢٠ يوم ودوام سيف 
وسافرنا ٠٠٠٠ 
من مطار الكويت لمطار البصره 
اخواني منتظرينا 
من نزلت وشميت هواء البصره الحار

شنو من احساس اووف ياريحه البصره 
تخبل حتى البيوت التجاوز والشاروع مليانه

زباله تخبل بعيني 
وصلت بيت اهلي وبابا منتظرني لباب اول مانزلت ذبيت نفسي بحظنه

الحمدالله الي رجعت وشفتكم 
وبعدها ماما حظتني وتبجي 
دكول كلت بعد مااشوفج مثل اخوانج 
لاماما هياتي رجعت 
شكد.حلو حظنج كون ابقى طول عمري 

كاعده هنا 
بعدها صبوا الغداء 
مسوين اشكال والوان وانه سويت 
هجوم على الصبور 
طبخ ماما خرافي 
نائل بقى يومين وسافر 
ورحت لوهج باركتلها 
طارت من الفرح كالت ماتوقعتج ماتجين 
شون ماحضر عرسج. 
غير اطك واموت 
وهج. نخطبت لدكتور وسام 
صديق حسن 
بعد ماقطعت علاقتها بمحمد. 
الي هاجر وزوج هناك ومن وحده 
عربيه واستقر بدنمارك

وهي لازم تشوف حياتها

&&&&&&&

قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331
‏لاتختار الشخص الجميل، إختر الشخص الذي يجعل حياتك جميلة ❤🌹
تاريخ إنشاء القناة 2018/7/16
قناتنا2 @loves959

بارت ١٥
قلب مكسور 
خامس عشر 
بقلمي #بنت الرافدين #

وهج انفصلت عن محمد ولازم تشوف 
حياتها 
كافي راح من عمرها كم سنه وياه 
وقرب موعد.زواجها 
وسوت حنه واتحضرت 
رحت ماكسي مول اشتريت بدله الي ولابني 
ومكياج وعطورات وتراكات بيت 
واشتريتلها عقد ذهب هديه 
وحجزت حلاقه 
بس وهج كلش مقهوره اذكرت زواجي

اووف ياوهج حظنا نفس الشي

ماعدنا فرحه ٠٠٠

صار يوم الحنه 
لبست بدله لون زيتوني قصيره وردن خفيف 
وبي خزر صدر مفتوح سبعه 
والظهر هم 
كعب عالي 
وسويت شعري كيرلي ومكياج نازك 
كانت حفلتها بلقاعه 
وسيف لبسته قاط 
كلش اتونسنا شفت كل صديقاتي 
ركصنا  ويه وهج الي طالعه 
سندريلا تخبل وكل ساع تبدل شكل 
بعدها اجه زوجها حناها 
ودخلوا اصدقاءئه لعبوا لعب 
ركص وهوسات من ضمنهم اخوي حسن

بعدها يوم العرس هم زفه وعرس بلقاعه 

بيوم العرس لبست 
فستان مستور وطويل وشال

كلش اتونسنت نسيت هم نائل 
وضيمه 
بعدها 
ودعت وهج راحت شهر عسل لايران

وبقيت حد ماخلصت اجازتي

طبعا اهلي يسالوني عن وضعي ويه نائل

وشونه وياج ماعندي اجابه .

بس الحمد الله

بس وفاء تعرف كلشي وتنصحي  اصبر 
بلقمي بنت الرافدين

بعدها رجعنا للكويت ورجع لنفس الاسطوانه

كل يوم يعيدها ومن احجي يكول

انتي لسانج طولان

-اكلك نائل ماتعبت كل يومبن تعيد.الكلام

نجيب طفل المن اشو انته كله مسافر

وانه ملتهيه بدوام ودراستي

منو اله الطفل لو من يهتم بي بس 
الخدم والمربيه

كبر سيف وسجل مدرسه ودخلته مدرسه لغات 
وانه ادفع اقساطها

وانه كملت المساتر وجاي ادرس دكتور ا فديوم اجه نائل من السفر وجهه 
مايكصه السيف 
يسب ويغلط بدون سبب 
واحنه كاعدين على العشاء

اشرلي على سيف 
-شنو 
:اريدج موضوع وحدنا

-اوك هسه انيمه واجيك

كملت العشاء والمواعين غسلت لسيف

دخلته لغرفته كال ماما احجيلي  قصه

كتله ماما ابوك عصبي نام وانه اعوضك باجر 
احجيلك قصتين 
كال راح العب بلي

اوك بس ساعه وحده مو اكثر

دخلت للغرفه لكيته كاعد يدخن ويزفر الدخان 
بحركه 
-كعدت يمه ولو انه اموت من ريحه 
الدخان بس اريد اعرف شبي

:زهراء اني استقاليت من الشركه

-ليش 
:احسن تعبت من السفر اريد 
استقر هاي مو عيشه كل يوم مكان وبلد

-اي الحمد الله من فكرت نستقر 
والله احسن قرار سويته 
بلكي يتحسن وضعنا

:ماراح ابقى بلكويت 
-لعد وين نروح نرجع للعراق

طفى الجكاره بنفاضه وتنهد وكال 
لا  اريد.اسافر امريكا اروح يم اهلي

تعبت ماكدر على فراكهم

-يعني عمتي سوتنا طلب لم شمل 
من يمته مقدم اشو ماكتلي

:اني راح اسافر وحدي حصلت اقامه بس مو عن طريق اهلي

-لعد

نائل :اني راح اسافر وحدي 
-جاي تحجي حرام ماجي افهم منك اي شي

رجاأء بلا لعب باعصابي 
شنو تقطر عليه بلقطاره الكلام

اريد.اعرف المعنى

طبعا صرت اعصاب حسيت اكو شي 
مو طبيعي 
:زهراء من الاخير احنه مايصير نكمل

سواه 
انه فتحت عيني على وسعها يعني شنو

؛يعني ننفصل 
شون كمت افتح بعيني واسدها 
مثل ماسمعتي ننفصل 
-ننفصل شوووون 
وليششش والطفل الي بينتا 
لعبه عندك انه وابني 
لا وتريد اطفال بعد.ولللك انت شنووووو 
:لاتعلين صوتج احسن الج والي 
اني تعرفت على بنيه لبنانيه عدها

جنسيه امريكيه وهي راح تسهل دخولي

لامريكا بس لازم ازوجها

-ماشاء الله ودكولها بوجهي عادي مايكول

عندي مشاعر ولا احساسيس

:اسمعيني اني تعبت اريد ارتاح

يم اهلي واخواني وماعندي غير هل الحل

فكرت هووواي وقرار صعب عليه بس

مابيدي شي اسوي

لازم ننفصل القانون الامريكي مايقبل بغير

زوجه وحده

تعبت وتريد.ترتاح واحنه الضحيه 
مافكرت بابنك 
تريد اهلك واخوانك تعوفنا النه

ماعندي غير هل الحل  واستقر هناك 
تعبت من السفر تعبت منج وانتي تعيرني 
بااهلج وانتي بت خير واني اقل منج 
ارييد اعوف كلشي 
وابدي حياتي جديده

-فهمتك نائل لاتبرر ولاتحجي

هو زواجنا فاشل من البدايه مو بلقوه 
نكمل سواه

بس تره العشره ماتهون على ابن الحلال

ماريد منك شي بس ابني الي

وباجر تحجزلي طياره ومن نوصل لاهلي

تكمل اجرارات الطلاق بس هنا ماريد.خبر

يوصل لاخوي 
تمام وهو المطلوب 
تلافي للمشاكل ماجبتله سيره 
هو بديره غريبه

حجيك وبابا ٠٠٠٠٠٠

عافني وطلع ولاهامه شي بلعكس مكيف وفرحان 
ظاهر مقرر 
ومتفق وانه ناميه على ذاني

ماعرف شكد.بجيت مو حب بي لا

بس على عمري الي راح سبع سنوات زواج

شفت ضيم الدنيا كلها وياه ماكو يوم فرح 
ضرب اهانه وغربه وتاليتها يكول تعبان

وسيف شنو ذنبه يعيش امه وابوه منفصلين

لا ويوميه مسوي مشكله ويريد طفل بعد

يجوزيسوي هيج يخلني التهي عنه

وهو يلعب بكيفه ٠٠٠٠٠٠٠

ثاني يوم انه بدوام وسيف هم

رجعت للبيت لكيته ماخذ كل ملابسه واغراضه

وحتى ماخذ كم قطعه من ذهبي

هم ياريت هو مشتري الي

كله اهلي وهدايا اخوتي 
وانه اشتري من راتبي

لاحجيت ولاخابرته  ولاعاتبته خل يولي

بعدها كمل اجراءت السفر

واجه عادي وطلعنا سوه عبالك مابيناتنا ش

ي 
طبعا اخوي سال شنو هل السفر المفاجى

كتله مشتاقه لاهلي وكذا شكله اقتنع او لا

وصلت لاهلي منهاره ومستغربين مني 
سالوني متجاوبت اكتفيت بدموع 
كانت جوابي

بعدها العصر فاتح بابا الي يصير

خاله عشتوا ٠٠٠٠

بلموضوع بحضور اخواني

وشويه كبت العيطه 
الكل طلع من الغرف على الصوت

عماد.متهجم عاى نائل لان كايله

ماريد بتكم واريد. ننفصل

دخلت واشوف عماد لازك نائل بلحايط 
ولازمه من ياخته وباقي اخواني عيونهم

بهامتهم من الاعصاب 
وبابا يصيح باخواني

بعدين بابا هدء الوضع

واتفقوا يكون الطلاق بمكتب محامي ويجيب 
سيد يطلك نفس اليوم 
لان الاخ مستعجل

والمحامي يكمل اجرارت الطلاك 
ونائل هو العايف حتى على ابنه نتازل منه

وانطوت صفحه نائل من حياتي

اسوء ايام عمري عشتها وياه

اخذت من عمري وشبابي

رجعت بيت اهلي ورجعت لغرفتي القديمه

وسيف فتحتله غرفه جنب غرفتي

سجلته بمدرسه لغات اهليه 
نفس مستوى مدرسته بلكويت

ماريد اقصر على بشي

هو كلشي بحياتي

نقلت اوراقي وداومت بمستسفى التعليمي

ويا اخوتي محمد وحسن وعماد

اروح وارجع ويه حسن

جاي اكمل دراستي حتى اتخصص

نذرت نفسي لابني و وشغلي 
وماحتاج رجال بحياتي

مااحتاج احد ينقص من شاني

ويقلل من قيمتي

المراءه كامله غلط الي يكول الرجل

يكملها 
المراءه قويه وتكون اقوى بدون رجل

ومؤهله ان تكون بيت وتسد نقص الرجل

مشت ايامي مرتاحه وانه بوسط اهلي

وابني ولاهتميت لنائل ونسيت موضوعه

حياتنا صارت احاى وابني كلشي موفرتله

شنو يريد وشنو يطلب الحمد الله شاطر 
بلمدرسه كله يطلع الاول

اخواني هواي يحبوه يطلعوا 
مسبح مدينه العاب ويسمي  بابا 
بابا مو جدو 
مرت سنه على انفصالي وكلش مرتاحه

بس لاحظت سيف هو يبجي وعصبي

على اقل شي يقفل على نفسه الغرفه

حتى مايلعب ويه ولد.خاله او يكسر

بالعابه بدون سبب

من اجي من الدوام هو يجي قبلي ماما

تغدي ويصعد.لغرفته

فديوم اجيت لكيته يبجي

-سيف ماما ليش تبجي

مسح دموعه وغطاه راسه بلطانيه

-سيوفي حبيبي شبيك احد.وياك

بلمدرسه بلبيت 
مايحجي 
-مريض اكو شي يوجعك

مايرد 
تخبلت 
وللك ماما شبيييييك احجججججي 
صعدت ماما على صوتي 
:شنو هل الصوت شبيكم

كعدت على طرف الجربايه

-منو وياه سيف 
:منو وياه هو منو الموجود

اجه من المدرسه بدل صحت عليه

تتغدى كال ماشتهي

-لعدشبييي ؟؟

:بيبي سيوفي بعد.كليبي منو وياك

هم مايرد 
بعدها 
صاح مابيه  شي اريد انااام اطلعوا

-وانه تخبلت صرت اعصاب

وللك سيف شنو هل الصوت من يمته تعلي صوتك منو علمك عدم الاحترام

ماريد اطلعوا 
سحبتني ماما من الغرفه

عوفي يابنتي شبيج تخبلتي 
يجوز مامجاوب او ضايج من احد.بلمدرسه

وماريد يحجي تسوين مشكله من لاشي

شبيج هاي انتي العاقله عوفي ينام ويرتاح

بعدين شوفي شنو بي

انتي تلعين صوتج وهو هم مايصير

يامي مو هيج التربيه

-ماعرف ماما ليش هيج يسوي وياي

ماما: بنتي الولد جاي يكبر مايحب هيج تعاملي

-كله ثاني ابتدائي وينه وين كبره هسه 
الي يسمع صار شاب

:تربيه الولد صعبه يحب يفرض 
شخصيته يحب يصير صاحب كلمه

خفي عليه شوي عوفي هو بحده يدرس وبحده

يكمل واجباته مو انتي واكفه فوك راسه

نزلت ماما وانه كلبي كارصني احس اكو شي وراه تغيره

يعني شنو يريد اهمله حتى بعد كم سنه ماكدر

اسيطر عليه

يارب اهدي الي وابعد.عنه اولاد الحرام

ثمره تعبي هذا

روحي بس بجسد.طفل وتمشي

على الارض اخاف عليه من الهواء

بقيت ساعات متاخره بليل وانه الف فكره بالي

احس نفسي متت جوع نزلت جوه اسويلي اكل

دخلت للمطبخ  ماعرف شنو اكل بعدين سويت

بيض وطمامه وحميت خبز وخليته على الميز

حسن :اممممم ريحه طيبه 
-شنو بزونه تمشي وراه الريحه 
جر الكرسي وكعد 
ماكو جاي 
سويتله جاي 
كعدنل ناكل وانه صفنه تاخذني وصفنه تجيبني

اشرلي حسن بايده

الو الووو 
وين وصلتي

-اوووف ياحسن مادري شنو اكول

:خير شبيج منو ياج

-سيف مادري شبي كله ضايج ويبجي 
:يمعوده خوفتيني عوفيي ياختي 
مابي شي جنه الورد 
بس انتي تفكرين زايد 
-ياريت ياحسوني ربي يسمع منك

حسن :ديلى اكلي يمعوده لاتهتمين وانه موجود 
نهايه الاسبوع ناخذ اجازه 
ونسافر لشمال شوفي شون تتغير نفسيته

-هههههه بس احنه نسافر 
للشمال بلشتاء عكس 
الناس شنو 
:يمعوده هي البصره هم بيها شتاء خل نشوف الثلج نبرد شوي

-بعد.عمري ياحسوني ربي يحفظك واشوفك عريس 
-اهووو مالي خلك النسوان وهوستهم 
اسحبي دعواتج

-ههههههه احسنلك ابقى طائر حر

بعدها غسلت المواغين وترتبت المطبخ 
وصعدت دخلت لسيوفي لكيته نايم 
اتقربت منه يارب يحفظك ويحميك الي 
ياروح الماما تمددت وتغطيت شويه اجه 
حظني اووي فدوه لعمرك ياروح وعمر الماما 
خليته بحظني وغفيت حد.مادك المنبه 
صليت وكعدت اراجع واقراء ابحاث وكتب طبيه

حد.ما صار وقت الدوام كعد سيوفي 
كملت جنطتنه وراجعتله شوي وبدل

ونزلنه جوه لكيتهم كاعدين يتريكون

صباح الخير 
بابا ياهلا بلصباح 
بست ايده 
وسيف

هم مثلي

عساج بخير بابا ربي يريح بالج 
كملنه الريوك واجه خط سيف

وبعدها طلعنا انه وحسن

بنهايه الاسبوع سافرنا للشمال

بيت اخوي عماد وماما وحسن وانه وابني 
وهج وزوجها وسام سوينا هجوم  على سلميانيه واربيل

&&&&&&&&يتبع

قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331
‏لاتختار الشخص الجميل، إختر الشخص الذي يجعل حياتك جميلة ❤🌹
تاريخ إنشاء القناة 2018/7/16
قناتنا2 @loves959

بارت ١٦
قلب مكسور 
سادس عشر 
بقلمي #بنت الرافدين# 
سافرنا للشمال بقينه اسبوع 
على الرغم من الجو البارد. 
بس كلش تونسنا 
ونطلع مولات واسواق 
وفاء ووهج من يدخلون للاسواق 
ينسون نفسهم ماخلينه بنفسنه 
شي كلشي اشترينه 
ملابس مكياج عطورات اكسسورات 
هدايا جبنه ويانه 
جمعه ونسه كلش ارتاحينه 
الكل نفسيته تحسنت 
وسيف كلش تونس وتعبني هواي يروح 
على المكانات الوعره والمخيفه 
ويصعد الها واظل اصيح عليه  اموت خوف 
وهو ولاهامه 
لو يلعب بلماي واخاف يتمرض 
وماما واخواني يصحون عليه 
عوفي شبيج وياه 
بعدها رجعنا للبيت وبدء روتين الدوام

فد يوم اجيت للبيت تغديت وارتاحيت

وراجعت دورس سيف

لليل صاحتلي ماما 
هلو ماما رايدتني كالت تعاي بلغرفه

ياستار بلغرفه يعني اكو شي جبير

دخلت للغرفه 
اكعدي.امي 
خير ماما احجي 

كالت  الحياه لازم تستمر وماكو شي 
يبقى على حاله

طبعا ماما دائما من تحجي بمقدمات

خطيه فقيره على نياتها بس ظروف الحياه تجبر الانسان 
يظاهر بلقوه 
-ماما حبيتي احجي بلا مقدمات عبالك 
كاعده مؤتمر 
مشكوره يابعد امج

-لا ماما موقصدي بس ادخلي بلمفيد 
رحت بست راسها شبيج زعلتي مني

شوفي بنتي ادخل بلموضوع 
اليوم اجو ناس يخطبوج

دكتور اسعد.دكتور وياكم جراح وابن عائله 
ومتمكن ومثقف ونفس متسواج

كافي كافي :لاتكملين شنويخطبوني شنو 
اجو 
منو كال انه اريد.ازوج

:اسمعي مني شبيج هيج انفعلتي 
بعدج زغيره ومن حقج تزوجين وتعيشين حياتج وتتختارين الشريك المناسب

-ماما يازواج وابني تردين اعوفه وعلى اي اساس انتي تستقبلين ناس وتحجون عني 
بدون علمي 
تردين ابني يصير يتيم 
وواحنه عايشين وبعدين اله افكر بهل الطريقه 
شنو فرقي عن نائل الي اختار حياته 
ومسائل عنه

:انتي كلتيها  ماسائل عنه هو بالاصل تنتازل عنه يعني من حقج حتى لوازوجتي ابنج وياج 
يامي عيشي لنفسج ابنج يكبر ويعوفج 
والعمر يمشي يأمي 
وانتي هم تعتبرين زواجج من نائل زواج 
اشو بس مشاكل وضيم 
عيشي وراتاحي وحتى ابنج يعذرج 
ومايزعل منج اله يحبج 
-شوفي ماما راح اكولها اليوم وبعد.ماعيدها

حياتي وحياه ابني خط احمر ماريد احد. 
يدخل بيها 
كافي خلص الكلام 
وماريد.كل يوم وثاني نفس الشي  ينعاد 
جايج فلان وعلتان 
عفتها وطلعت

صعدت لغرفتي بالله شنو احجي شبيهم 
اهلي ليمته يفهمون ومايدخلون بحياتي 
بعد.هذا ناقصني اجيبلي هم ثاني 
ماكافي سيف الي مادري شنو علته

بقيت اقراء شويه بعدها غفيت 
ماعرف بيش الساعه واسمع 
الفون يدك 
يارب سترك منو 
وصوت بابا يصيحلي 
نزلت اركض حتى ماشفت من الي دك

ها بابا شكو تصيح عليه

:كل خير بنيتي 
مرت عماد ولدت وامج دك عليج حتى تبقين يمها 
-ياصلوات على النبي شوكت اشو محد كلي عدها ولاده 
:روحي وانتي تعرفين

رحت بسرعه بدلت دشداشتي مالت النوم 
لبست تراك ودخلت غرفه لسيف

-ماماتي كوم  كوم بسرعه خاله 
وفاء جابت نونو

اخذته ولرحنه بيت عماد ركض 
اجيت على وفاء 
وحظنتها حمد الله على سلامتج 
حبيتي 
تتربى بعزكم 
بس خل اشوفها 
اخذتها  خليتها بحظني
-يمه شنو هاي متاكده هاي بنتج 
وفاء كوه تحجي متاذيه :مو ستوني ولدت

ولج اخاف مبدليها

:مامااسم الرحمن شنو هل الكلام 
-،والله ماما موحلوه ماعبالك امها وفاء

:لاتخافين تكبر وتصير تخبل البنيه 
ام سبع وجوه 
بعدين خليته بحظن سيف وتخبل عليه 
مايقبل يعوفها 
وخري بتي من ابنج ولج هذا مثل ابو 
مو راحه 
-والله وتلكين احلى من سيف 
مو نعمه ولكيتي 
معجب لبنتج

بقينه نسولف ونضحك ماما كالت انه تعبانه 
انتي ابقي داريها 
بقلمي بنت الرافدين 
راحت للبيت٠٠٠٠٠٠ 
ووفاء رضعت الطفله وتغطت ونامت 
وهاي على فد صوت صرعتني من الصريخ

وفاء اكعدي رضعيه 
: هستوني رضعته اريد انام 
لعد شنو اسويلها 
انتي داريها تعبانه 
بقيت سهرانه وياها حد ماصار الصبح 
خبلتني بس تبجي 
اهزها اسمعها قران مايفيد 
بس طلع الضوء بدء الصبح اشو هاي نامت

وصارت طفله برئيه 
-وفاء هاي بتج تخوف من هسه حياله 
هههههه احسن من تطلع فاهيه على عمتها 
٠٠٠٠٠ 
رجعت للبيت ميته من نعاس بدلت وطلعت

دوامي بقيت ويه وفاء اسبوع حد.تحسنت صحتها 
تستاهل وفاء ماي العين شنو اسويلها ما يجي 
شي ويه وكفاتها وياي

بعدها رجعت ادوام طبيعي بلمستفى 
وبين فتره وفتره يجي واحد يتقدملي

لو من المستشفى لو من اصدقاء اخوتي مهندسين محامين يوميه

وكنت ارفض بدون ماسمع حتى منو وشنو مؤهلاته 
وماما يوميه فتحت نفس الموضوع تحجيلي 
على اليتقدملي 
واسكتها لو اغير الموضوع 
وكنت حريصه ماخلي ابني يسمع ان احد يتقدملي

فد يوم صار المغرب وهو مانزل ولاشفته

كله بغرفتها رحت عليه قبل مافتح 
الباب واسمعه ٠٠٠٠٠ 
يحجي بلتلفون ويكول 
كلش مشتاقلك بابا يمته تجي واشوفك

انه هنا تخربط احوالي 
كعدت بلارض رجليه ماتشيلني

يعني كل التغير الي هو بي من وراه

نائل ٠٠٠٠٠٠ 
الله ينتقم عليك بعدك ورايه 

ماخلصت منك

زين انه الغبيه ليش مالاحظت هذا الشي 
من يمته هو يخابر 
نزلت لماما وحجيت وياها

كالت ياماما عادي هو ابوه 
يعني لازم يتواصل وياه

-بس ليش بلسر ومايكلي ابوي اتصل عليه 
او عندي اتصال بي 

زين هو تنازل عنه هسه شنو تغير 
من يمته هو يتهم بي

ظلت ماما تهديني وتكلي ماكوشي وطبيعي وعادي

بس عقلي فصل ماكمت افكر

اخذ منه الفون اي اخذه لو احضر رقمه 
بس يمكن يتمرد عليه بلازيد.

ماعرفت شنو اسوي ياربي 
مرت ايام وسيف يتواصل ويه 
ابوه بلسر مايخليني اسمعه 
بعدها ٠٠٠٠٠ 
كمل السنه ونحج سيف من ثاني 
وراح صف ثالث وانه كلش فرحانه 
وحتى بابا واخوتي

كال بابا هديه سيف سفره لايران 
واخواني كلهم جابوله هدايا 
وهو ماعجبه يشمر الهديه 
شمر حتى مايفتحها

نفسيتي تعبت وكل ماحجي ويه ماما او وفاء

يكولون انتي تفكرين زايد وماكو شي

سافرنه لايران ورزنا الامام الرضا

كلش تنونسنا 
بعد ما رجعنا باسبوع 
صار الي افكر بي بهذا 
اليوم الي صار سبب دماري وتعاستي 
طول العمر ٠٠٠٠٠ 
والعجيب من الامر الانسان لويحس 
اكو خطر بحياته ولازم ياخذ احتياطته 
يجي انسان ويحبط تفكيره 
يكولولي هذا الشي وساوس او قله ايمان او تفكير 
اكثر من الازم 
وهذا الي صار وياي بلضبط كل مااكول 

يصير شي خطير يكلولي وساوس 
تعوذي من الشيطان وسلمي امرج للله

هواي مرات اسمع سيف يخابر ابوه وكل 
مااريد امنعه مايقبلون اهلي 
ويكولون هاي قطيعه رحم .وحرام عليج 
خلي يتواصل ويه ابوه ولاتصيرين انانيه 
لاتخلين الي بينج وبين ابوه ياثر عليه 
وبعدين تنعكس على شخصيته 
ويصير انسان معقد او عدائي

استسلمت  لكلامهم واسكت 
واساير الوضع 
الي فد.يوم احه ابن خال نائل لبيتنا 
وبعد الاستقبال والضيافه 
اجه بابا صاحلي 
-نعم بابا 
:تعاي كعدي باباتي 
اسمعيني بنتي ابو ابنج مايكول اسمه 
لان زعلان منه 
جاي للعراق وداز امجد ابن خاله يريد 
يشوف ابنه 
- شنو يشوفه لو يموت سمعت لو يمووت

:شبيج بابا تراه من حقه والله مايقبل 
بهذا كلامج 
-ياحق بابا ليش هو هم ابو مثل العالم 
فد يوم  اهتم بي صرف عليه  سال 
صارله سنتين هسه عرفه حتى من جان عنده 
هو هامله وانتي تعرف كلشي

:يابنتي احنه متحاحين فلوسه حتى يصرف 
عليه ليش انه مقصر وياكم 
والله حتى لو يدز مصرف انه ماقبل 
ابنج ابني مدام هو بيتي مسؤول مني

-ربي يحفظك ويخلك النه ومايحرمنه من حنانك 
: الله يخليج بنيتي 
كومي استهدي بلرحمن وعوفي هل الكلام

وبدلي لابنج خل ينزل يسلم على عمه 

حتى يروح وياه 
طولت على الولد.كاعد.بحده 
شنوووو!! 
ماخلي يروح ماامن بنائل كلشي يسوي 
يريد يشوفه يجي هنا بيتنا

منو كلج انه اريد يدخل لبيتي لو يموت 
مايعتب بابي 
امجد.رجال صاحب كلمه وهو دك صدره 
وكال انه اخذه او رجعه 
بعد لاتسويها قصه يابنتي 
زين شوكت يجيبه 
:كال  ظرف ساعتين وانه اجيبه بايدي

-بابا اخاف يكذب 
:زهراء شنو كلام عيب بابا 
-اسفه موقصدي 
روحي بنتي  استهدي بلرحمن وجهزي ابنج

صعدت ولكيت سيف محظر ملابسه 
ويريد يبدل 
هله هله كملت عليه 
هاي ماما جاي تسوي 
مجاوب٠٠٠٠٠٠ 
ابوك اتصل بيك مو 
سكت 
احجي لاتخاف 
كال يعني انتي مازعلانه مني لان اخابره 
جريت نفس 
وكتله لاماما مازعلانه اعرف ابني حبيبي 
شكد.يحب ماماته موو 
حظني اموت عليج ماما بس 
ياروح الماما انت 
بس شنوو؟؟

انه هم احب بابا

اي اعرف 
يالله انزل جدو يريدك. 
نزل ركض 
سوه الدرج بايتين 

اووف ياسيف ربيني وانه ابن ابوي

طلع سيف وانه بقيت طول الوقت متوتره 
اروح وارجع ماعندي راحه

وشيطان تربع بعقلي كل ساع فكره شكل 
ياخذه وينهزم بعد.مايرجعه

يجوز هسه طلعوا من البصره

الف فكره سوده اجت بالي

حد.ماوصل انه تعبت من التفكير حظنته

ونمت يصورلي راح ينهزم بليل مني 
بقى على الحال اسبوع يوميه 
داز عليه وشويه طولت  القصه

صار ياخذه من الصبح لحد.اليل يالله يجي

الى نهايه الاسبوع المشؤم 
وصل سيف متاخر وانه انتظره وميته 
من القهر والتفكير 
اول ماوصل ظليت اصيح بي

ليش هيج اتاخرت ليش هل الوقت بعدك

هناك مو المفروض دكلهم يرجعوك

وماتتاخر مادكول امي باقيه تنظرني

: ليش تصيحين عليه انه صرت رجال 
بكيفي اتاخر

-وللك انته منين متعلم هيج تحجي 
والرجال مايصير اله من يصيع بلشوراع 
وصوتك يعلى على امك 
هاي تربيه ابوك موووو 
طبعا انه مسويتله نظام بلنوم مايسهر 
بس ايام العطل ومايتعدي ١٢ 

الالعاب الالكترونيه الها وقت

بس بهذا الاسبوع كلشي تخربط

اي تربيه ابويه احسن من تربيتج 
وانه ماريدج اريد ابوي

انه اسمعت هيج ماحس على نفسي اله 
املخ بيه وراشدايات

واهلي كلهم تجمعوا على صياحي

فرغوا مني بلكوه  اخواني ويحجون عليه 
تخبلتي شبيج وين عقلج ومن هل الحجي

بس انه ماسمع منهم

وهو مستمر يرد.عليه انه راح اسافر 
ويه بابا وماريدج 
مليت منج ومن قوانينج لااطلع لااروح

لاارجع كله بأمرج 
كله محبوس بلب

يت 
يمته ماجيتلي ادرس وادرس

راح اسافر امريكا  وارتاح  واتحررمنج

اريد اهد عليه اخواني لازميني

طبعا الكل انصدم من جرائته ولسانه 
مبين مدرسه نائل مضبوط 
اخذوا مني وقفلوا عليه الباب

وانه ظليت ادك والطم حد اغمى عليه

كعدت لكيت الكل نايم

اباوع على نفسي بيدي كانونه شديلي مغذي


فتحت الكانونه من ايدي 
وصعدت فوك لكيته غرفته مقفوله

دخلت لغرفتي ظليت اروح وارجع 
شنو اسوي شون امنعه يسافر 
اخاف يسويها صدك وياخذه 
والله اموت 
شون اعيش بعده 
لااسم الله ماكو شي 
بقيت افكر اخر شي 
ماكو غير حل واحد.ولازم اسوي 
حتى لوصعب بس انسب شي 
لهاي المصبيه الي وكعت على 
راسي 
اوووف نائل انت لعنه عليه وماخلص 
منها مثل الخبيث يمشي 
بلجسم وكل ما يبترون جزء 
يعبر على الجزء الثاني

طلعت

جوازه جنسيته وكل مستكماته

حركتهم 
&&&&&&&يتبع

قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331
‏لاتختار الشخص الجميل، إختر الشخص الذي يجعل حياتك جميلة ❤🌹
تاريخ إنشاء القناة 2018/7/16
قناتنا2 @loves959

بارت ١٧
قلب مكسور 
السابع  عشر 
بقلمي #بنت الرافدين #

ظليت افكر شنو اسوي حتى لايفكر 
يسافر اجت بالي 
اخذ كل اوراقه وحركتهم 
جوازه وكل مستمسكاته 
اخت تلفونه كسرته هو وسيم كارت 
بعد.خل اشوف شون يسافر 
حسبي الله ونعم الوكيل على يانائل 
هسه صار ابنك عزيز 
لو تريد تنتقم مني 
ماراح اخلص من همك حتى وانه بعيده 
عنك 
تبقى مشاكلك تلاحكني 
بقيت منهاره حتى دوام ماادوام واخاف

ابني ينهزم بيقيت قافله عليه الغرفه 
حتى اكله بلغرفه 
هو ابد ولااعتذر مني ولاتاسف 
مو كم يوم راح شاف ابوه 
لا سواله غسيل مخ

اهلي حجوا وياه غلط هيج تصرفين 
وهو طفل مايعرف شنو يكول 
وانتي اذيته وضربيتي 
بشنو اذيته بشنو 
يعني لااريد.احافظ عليه 
واخاف عليه اكثر من روحي 
كم مره بابا حاول ياخذ المفتاح 
ويطلعه 
رفضت 
شكد.ظل يحجي وينصح 
ماجنت اسمع منه ابد.

وراه يومين  اجه عم نائل وابن عمه 
بعد.مااستقبلهم بابا فتحوا الموضوع وياه 
يردون ياخذون سيف يشوفه ابوه

وبعدها حسب الكلام الي سمعته دازهم يخيرونه 
لو ارجع لنائل واسافر امريكا 
لو ياخذ ابنه 
يعني بكل وقاحه وعين صلفه 
نسى هو الي عافنه وتنازل 
وازوج وشاف حياته هسه راجع 
لاويجوز ارجع ويه ضره 
ماعرف شنو من بشر مايغزر بعينه 
عشره ولا قرابه 
هنا اخواني تعصبوا 
ظلوا يحجون وطرودا عمه 
كلش انغثوا من كلامهم وعرضهم 
السخيف 
بقلمي بنت الرافدين 
ظلوا يحجون ويهددون يسبون بنائل 
واهله ٠٠٠٠ 
بابا ماقابل بس بس مايحب 
المشاكل والفوضى دائما يتصرف بعقل 
وحكمه وماعنده   تهور او تهجم 
عكس اخواني الي 
طلعوا بوقت الظهريه اياد وعماد 
وجانوا كلش غاضبين وحتى سلاح 
خذوا وياهم واكيد بدون علم بابا 
مانعرف وين راحوا 
لحد اليل اجت الشرطه بابنه 
وياه امر القاء القبض على اخواني 
الكل البيت مستغرب شنو و ليش الشرطه

اخواني اسم وشهادات ومثقفين شنو تجي 
الشرطه لباب بيتنا 
مو سهله واصلا اخواني مو اصحاب مشاكل 
حتى يسون القى القبض عليهم 
وتاخذهم اله الشغله جبيره 
البيت كله انخبص ومانعرف شكو المشكله

وبابا راح اخذ محامين وضباط من معرفته 

بعدها 
طلعوا اخواني  والحمد لله 
ومحد يعرف شنو الموضوع 
وكل مانسال محد.يجاوب

وبابا حالته حاله ويدخن بكثره

وعصبي وصغطه معلك حتى العلاج ماينفع 
ويااا 
ومايحجي ويه احد بلبيت 
واله يحجون هو اخوتي بسريه تامه 
مايخلون احد بلبيت يسمع كلامهم 
هذا الشي الي خلانه نقلق اكثر 
ماما هم كانت متوتره وصحتها بنازل 
يعني تعرف بلموضوع بس ماكانت 
تحجي كوله ساكته 
كل ماأسالها ماما شنو هاي الهوسه 
ليش بابا متوتر وانتي هم. 
دكولي مشاكل بشركه 
لاتهتمين٠٠٠٠٠ 
بس الشغله اكبر من مشاكل 
شغل دائما تصير مشاكل عدهم بس 
ما يخلوها تاثر عليهم او يوصلها للبيت 
دائما من يجون يذبون مشاكلهم برى البيت 
بس هل المره غير 
اكوشي جبير صاير 
يعني وضع البيت كله متكهرب

وراها ماطلعوا  اخواني  للدوام ابد 
كوله بلبيت

بهل الايام ناس  تجي بكثره النه ماليه

الديوان بيتنا شيوخ ،معكلين ،مانعرف السبب

الي مر على الحادثه اسبوع واحنه 
نفس الهوسه والخبصه 
الي ان يوم 
صاحلي بابا :بس يحجي بعصبيه كلي

روحي افتح الباب لابنج 

شنوووو؟؟؟ 
مثل ما سمعتي 
-ليش شكو افتح الباب

:روحيييي مثل ماكتلج كوه 
واكف على حيلي ماعندي قوه بعد.

شنو الموضوع لادكولي هاي الهوسه 
الي صارلها كم يوم علمود.سيف

يابنتي انطيني المفتاح ولعني الشيطان

-مافتح الباب اله تكلي وين تريد وتودي اكيد

راح تنطي لابوه موووو

:عافني وطلع يضرب بلابواب بقوه 
واخواني اكثر منه كلهم متوترين

رحت على ماما كتلها احجيلي 
شنو الموضوع ولادكولين شغل وشركه 
هي جانت كاعده على سجادتها تقراء قراءن 
صدقت وسدته 
طبعا انه احجي وارجف 
شبيج شكو جايه هاده وترجفين 
اهدئي 
ياهدوء هذا كولولي شنو الموضوع 
كعدت للارض اللطم على وجهي 
يعني مااخلص يوميه مصيبه شكل 
هسه درات الدنيا عليه ترديد.تاخذ وحيدي 
مني 
اجت تهدي بيه ودكولي محد.ياخذه 
منج ومنو الي يوصله 
بعدها 
اجه محمد كعد يمي وانه متهيه 
من البجي وحالتي حاله

اسمعيني خويه : شوفي ابنج محد ياخذه 
لو اعرف نسويها دموم 
ولاتنقهرين وتاذين نفسج 
لعد.شكو شنو هاي الهوسه 

احجيلي ريحني ليش انه اخر 
من يعلم ليش ضمون عليه 
مو المشكله تخصني وتخص ابني 
وانتم تتصرفون من كيفيكم 
ليشششش هيج متجاهلين 
اهدي شوي وانه احجيلج كل القصه 
بعديش تحجيلي بعديش 
شوفي ليش مانكولج هاي تخلصينها لطم 
وبجي ماتعرفين غيرها 
وقافله الباب على الولد 
ماكلتي ينتحر يسوي بنفسه 
شي يكهرب روحه ويموت 
يعني انتي اكو براسج عقل 
خلصت الحلول كوله بقت بس 
القفل  ٠٠٠٠ 
يعني الولد اكثر من اسبوع صارله 
محبوس نحلت المشكله برائيج 
مادكولين يصير يكرهج اكثر 
ويريد يخلص منج باي طريقه 
ياختي الحرمان يولد العصيان وابنج 
يصير ض

دج مو ياج 
يعني ابوه يحجيله عن امريكا والحريه 
والوناسه هناك 
وانتي هنا قافله عليه وتضربي

-شسوي يامحمد تعبت والله ماعندي 
شي امنعه اله هاي الطريقه 
يرد يروح لابو 
اخاف ينهزم ويه ابوه 
اذبحه بايدي ما انطي اله

:خويه محد ياخذه منج

شوف زهوره بيوم الي اجه عمه  يخيرنه

لو ترجعين لو ننطيهم الولد

-ارجع المن لو يمووت ارجع  لضيمه 
وخيناتها هنوب لاهنا ولاهنا امريكا

:،راحوا الولد.ومكسرين نائل تكسير ايده 
رجليه وسنونه 
عزااا يمته هذا الحجي 
ها لعد هاي الهوسه على شنو واسمعي 
النذل مقدم بيهم بلاغ وتعرفين الباقي

بعدها رحنه انه والحجي 
وبعد وسطات طلعناهم وهو تنازل بس 
سويناها عشائريه

حتى نحل الموضوع وياهم واليوم الكعده

وطالبين ابنج بلكعده حتى يسالوه

-يسالوه على شنو٠ 
ياختي والله تعبان مابيه احجي انتي 
ماتعرفين هاي الايام حتى نوم مانام 
يسالوا ويخيروا بين امه وابوه وبس 
محمد.والله مامرتاحه كلبي كارصني 
اخاف هاي مكيده عليه 
زين اله طلب ابوه وهو نفسه 
يكولي اريد ابوي ماريدج 
ياختي شبيدي عليج 
هاي لزمونه من ايدنه الي تعوجعنا 
تقبلين بهل البهذله الي احنه بيها 
وابوج الي صحته دهورت 
انطيني المفتاح راح اكعد وياه وانصحه 
وافهمه ابوه مايفيدك 
بلكي  نحل هل المشكله 
ونخلص نريدها تفض عافين دوامنا وعيادتنا 
هاي تاليتها فصول وكعدات عشاير

استسلمت للواقع وانطيته المفتاح عندي امل 
سيف يحبني ومايعوفني 
اخذ المفتاح وراحوا واخذوا سيف وياهم 
نزل حتى مايخلي عينه بعيني 
انه هنا عرفت هو راح واختار ابوه 
ظليت اصرخ وبجي حد.افقد الوعي

وصار الي صار وبهذا اليوم الي توقفت بي 
عقارب الساعه  وتوقف عمري وياها 

وبلكعده خيروا سيف يبني وبين ابوه 
باعتبار عمر ٩ سنوات صبي مميز

يسموه بلقانون يفهم ومسؤول عنه اختياره

وطلعت حقير  مثل ابوه مع الاسف

يشبهني بلشكل لكن اطباعه لابوه

واختار ابوه والعيشه بامريكا

ويعيش حياه التحرر ويطلع 
من سجني وقيودي

ونسى مثل مانسى ابوه كل  تعبي 
واهتمامي بي وطلعوني بلشينه

وراح سيف ٠٠٠٠٠٠

وانظلمت بقوانين العشاير الجائره على المراه

لاخلوه القانون يدخل ولا القضاه هما حلوه

بطريقه رخيصه ولازم انه الي ادفع الثمن

وطلع نأئل هو المنتصر ٠٠٠٠٠٠

ماقبل ياخذ فصل او تعويض عن الضرب

واسنانه الي وكعن بس 
اكتفى بسيف من اخذه  مني يريد. 
ينتقم ماعرف عقده النقص الي عنده 
الي يشوف نفسه اقل من عدنه دفعته 
يسوي هيج وانه ادفع 
الثمن  ٠٠٠٠٠٠

اجه بابا واخوتي من  والكعده وانه استوني

راجعلي الوعي اشوف بابا يمشي مشيه

واحد.مكسور شون جنه دافن عزيز واستوه 
راجع من المقبره هيج حال بابا

فهمت ابني راح 
ظليت اصرخ ظلالالالام

انطيتواااا مووووو

حراااااام عليكم رحتوا سلمتوووا بايدكم 
واجيتوااا 
ارتايتحوا هسه ليش هيج لييييش

لزمت محمد من صدره مو كتلي محد.يدناه

ومو انت دكيت صدك   اليه ويييين وعدك

واضرب على صدره خطيه هو ماحرك ساكن

تقبل واحد.ياخذ ابنك

تقبل واحد. وحيدك.

ليشششش هيج سوتوا

محمد مو صدكت بيك سلمتك ابني تنطي

شون انطاك كلبك

كلكم ظلام مو بس نائل

كلكم ذبحتوني 
خطيتي بركبتكم لليوم الدين

واصرخ واضرب براسي بلحايط 
كل مايلزموني ادفعهم طلعت عندي 
قوه عجيبه حد.ماقفدت

كعدت بوقت متاخر لكيت راسي ملفوف

ظاهر متعوره ومعالجيني ونايمه بغرفه بابا

كعدت اريد اتذكر شنو الصار 
استغربت ليش نايمه هنا 
وليش راسي هيج 
يقلمي بنت الرافدين 
جاي استرجع ذكرياتي واكول هذا 
حلم لا كابوس مخيف 
محد.ياخذه مني

سيف ميعوفني

رحت اركض لغرفته متصوره الكاه 
نايم بفراشه 
واشوفها فارغه 
يعني مو حلم  حقيقه صدك اخذوا 
يعني صدك فضل ابوه عليه 
رجعت اصرخ واملخ بروحي

حد.ماكعدوا البيت الكل مفزوع

بابا الي رجليه ماتشيله يصعد.درج

اجه ركض عليه حظني وظل يبجي 
على بجي 
ذاك الرجل مثل الجبل الي بحياته ماشفته

منهار او حزين دائما يظهر القوه

يبجي وياي وينحب نحيب الثكلى

ظليت على هل الحال حد.مايهدوؤني بالابر

اهداء وانام وبس تخلص مفعول الابره ارجع

لحالتي ماما من تسمعني تتخربط وضغطها

يعلك حد ماتكدر تشوفني بس تسمع صوتي

تتخربط بابا الي عاف شغله والتراماته وظل

ملازمني مايعوفني يخاف اسوي بروحي

شي ٠٠٠٠٠ 
دوام عفته الاكل هم عايشه على المغذي

تلفوني كله يمي واله نمت وكعدت اركض

عليه اشوف بلكي اكو اتصال منه 
بلكي غير رائيه يكول ماما ماعوفها

غرفته اهلي قفلوها حتى لاادخل الها

ظليت بس الصور كل ماقلبي يعورني

واختنك اخلي صورته على قلبي ارتاح

وارجع اتنفس ٠٠٠٠٠٠٠

الكل يجي و يحجي ويواسني

ويحجي قصص وعبر

ويصبروني لكن ماكو شي يصبر

قلبي الي انكسر وصار نصفين نصف

سافر ويه سيف

والنصف الثاني هو الي بقى وياي

عباره عن مضخه تضخم الدم للجسم حتى

يبقى على قيد الحياه فقط

بقيت على هل الحال وبابا الي تعبت

صحته عليه واخواني خطيه الي كل مااجوني

يعتذر

ون ويطلبون مني السماح

بس ماجنت ارد وصلت مرحله صوتي راح

مره مو مبحوح او خلل بالاوتار الصوتيه

حاله نفسيه صارت وياي خلتني غير

قادره على النطق  طبعا متعارف عدنا بلطب 
تصير هيج حاله اله الانسان تعرض 
الى ضغط نفسي يوصله الى مرحله الانهيار 
بقيت على الحال 
واهلي الي تعبوا وهما يداروني 
حتى المهدئات كامت ماتهدئني 
جسمي نحل كلش 
اهلي احتاروا بيع بس يردون يطلعوني 
من حزني

الى فد يوم  اخذوني للزياره للكربلاء

راحت وياي ماما وفاء

وصلت لكربلاء امشي  جثه

بلاروح ماما  وفاء لازميني وهما يمشوني

اكعدي هما وامشي منا

ماعرف فاقده كل احساس

وصلت لحضره العباس سلام الله عليه

وفاء لازمتني حد وصلتني باب الشباك

بس عيوني تصب ماعرف اعبر على البداخلي

بعد.رحنا للامام الحسين عليه السلام

وصلت للشباك اتذكر مصيبه الحسين

واتذكر شون عبدالله الرضيع

انذبح

على صدره

شون علي الاكبر اسشتهد.كدام عينه

صدك هانت عليه مصيبتي

وراها  رجعت للبصره

وبعدني على حالتي تعبانه  معزوله دمعتي مانشفت

بس الصور وياي

الكل تعب مني وكانوا يكولون تبالغين هواي

هو الي اختار هو الي راح برضاته

محد.جبره  مامقصرتي وياه انتي 
ولااحنه قصرنه وياه الكل مدلله 
شدعوه هيج متاثره لشوكت تبقين هيج

ماعرف يمكن كلامهم صح

بس مو بيدي ياريت عقلي يستجيب

وقلبي يوكف حزن

ياريت اكدر اتناسى واعيش  حياتي 
مثل البشر 
ياناس هذا ابني ابني قطعه من روحي 
مو سهله عليه 
٠٠٠٠٠٠ 
هواي ناس تتعرض لصدمات ومأسي

بلحياه بس متنهار هيج وترجع لعقلها

هذا قانون الحياه

هواي نساء يفقدون اولادهم بسب موت

او انفصال بس مايسوون مثلي

هذا الكلام كان ينعاد عليه هواي

بس انه ابد حالي مايتحسن

صرت جلد وعظم شكل ميت

بس يمشي على الارض

يعني الي يشوفني يتخرع

بقيت على الحال وصار من وقت الحادثه

٣شهور وماتحسنت ولاايست 
الى فديوم الفجر نمت مادري اغمى عليه

وكعدت على صوووت صرخه هست البيت

لكن ماكنت صرخه عاديه

لاصرخه كسرتنا كلنه اولهم انه

صرخه خلت هم همين وطفت اخر نور بقلبي

&&&&&يتبع

بقلمي بنت الرافدين

قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331
‏لاتختار الشخص الجميل، إختر الشخص الذي يجعل حياتك جميلة ❤🌹
تاريخ إنشاء القناة 2018/7/16
قناتنا2 @loves959