رأيكم بالقصة أن شاء الله عجبتكم 🌚🌚

بارت 29
بقلمـي
آلگآتبهہ‌‏ غدير آلحيدري
...

جينار:جنت منتظرتك

خله ايده بجيوبه واخذ نفس
ازاد:كولي اني اسمعج

تقربت يمه لزمت ياخة قميصه بقيت اباوع بعيونه

ازاد:شبيج
جينار:اني شنو بالنسبه الك؟
ازاد:بس وخري واكلج
جينار:لا خلينه هيج جاوبني ع سؤالي
ازاد:انتي مجرد بت عمي وراح تصيرين زوجتي لااكثر ولا اقل
جينار:هااا يعني انت متحبني

ضحك بأستهزاء

ازاد:هه انتي منو يحبج الكل يكرهج

وخرت من يمه ودفعته

جينار:المهم اني احب نفسي تعرف انت سهلتلي المهمه هواي
جينار:شلون يعني؟

تقربت يمه وهمست بأذنه

جينار:يعني زوجي العزيز النقيب ازاد حسين علي بعد زواجنه بأربع اشهر راح اطلكني
ازاد:هههههههههه واذا كتلج مااطلك
جينار:اني مو بحالك اخلعك هههه

جرني بقوه ولو ايدي ورا ضهري

ازاد:والله منا لأربع شهور ماادري احتمال يصير اسد منج
جينار:مراح اكون الك مره تحلمممم مثل حلم ابليس بالجنه
ازاد:لحد الان ماكو شي سيادة النقيب راده ومصار وانت من ضمن اشيائي اللي اريدهه تصير ملكي وبس واحرمهه من الدنيا كلهه
جينار:انت مريييض
ازاد:بييج
جينار:انت شتريد مني
ازاد:اسمعي ياحلوه

تقرب يمي ورجعت ورا لحد محصرني بالشجره

ازاد:مااريد منج شي بس اريد اكلج شغله ماكو شخص خلا راسه براس ازاد وعاش مرتاح
جينار:انت هواي شايف روحك
ازاد:يحقلي اشوفهه ع الضعفاء مثلج
جينار:طبعا هذا طبع الرجال يحبون يفرضون شخصيتهم ع المرأه
ازاد:اييي وخاصه انتي احب افرض شخصيتي عليج احب اشوفج مطيعه وهادئه حيييل

كان يحجي ويلعب بشعري دفعته بغضب

جينار:راح ابقه متمرده واحطم كل شخص يأذيني خليهه براسك بعد عندك وقت نفسخ لان اذا تزوجنه حياتك تنكلب جحيم ضحك بأستهزاء ورجع حصرني بالشجره

ازاد:ياحلوه خافي ع روحج الغرور الزايد مينفع
جينار:اكررررهك
ازاد:واني هم بس اريدج تكرهيني اكثر حتى استمتع بكرهج الي لان من طبعي احب اروض المهره المتمرده

تقرب يم وجهي وضحك

ازاد:بسبب غبائج ضاع كولشي عليج ههههه

وخر من يمي وراح كعدت بالكاع هذا مناويهه ع خير بسيطه كافي ضعف لازم اكون قويه صعدت لغرفتي واني اقارن بين ازاد اللي وعدني يساعدني وبين ازاد اللي خلف وعده دخلت لغرفتي تمددت بفراشي وبديت اتسائل جينار ليش متحبين ازاد رغم هو شخصيه ويمكن لو تعاملي بأهتمام يعاملج معامله تحلم بيهه الكل بس ليش من تجاهه احس بتحدي اوووف نامي جينار كمتي تخربطين هذا الكلام كان يتجول بداخلي نمت ومااعرف شخط الزمان من اقدار الي وماادري بخبايا الزمان والايام راح تحولني الى انسانه تايهه بين الحب اللي امامهه ودائرة الاشياء اللي لازم تنساهه راح اسير بطريق وهذا الطريق اسمه بين الحب والنسيااان
كعدت الصبح سبحت وبدلت نزلت جوه شفت احمد ويقين يتناكرون

احمد:بسيطه يقين
يقين:مسويت شي غلط الغلط بيك
احمد:اسكتي لا اسحلج هنا

ضحكت يمكن حياتي تصير مثلهم دخلت للمطبخ شفت نرجس ونور وماما يحضرون الاكل وعلي وحسام كاعدين ع الطاوله بله علي دايزحف لنور حسام شعنده

جينار:نرجس انطيني اسم الفيس مالتج ممصادقتج
نرجس:هااا بعدين انطي
علي:عجب نرجس مسويه ولج دكولي حتى اصادقج
نرجس:هسه من نكعد اشوفلكم صفحتي
جينار:اوك صدوك حسام شعندك كاعد بالمطبخ
حسام:اريد اشرب عصير
جينار:متكوم تشرب منو لازمك
حسام:هااا لا دانتضره يبرد
جينار:اهاا
علي:ماما شداتسوون ريوك
ام جينار:اكو غير الجبن والكيمر والمربى
علي:لا اني مليت اريد كيك عسل من الصبح

باوعتله يحجي ويباوع لنور وهي تضحك اجتي خاله نيرمين

علي:اهووو خربت اللحضه
ام ازاد:اووو نور شنو هالنشاط داتسوين اكل من الصبح وانت علي ماشاء الله اليوم النشاط فووول
علي:اي خاله وانتي بدخلتج للمطبخ سويتي نشاطي صفر
ام ازاد:يامسكييين قهرتني نوووور
نور:نعم ماما

ام ازاد:لغرفتج يلااا
علي:شووفي شكلت راح النشاط مني
ام ازاد:وانت علي كوم اكل كيك وعسل بالشارع لو كله لعمك هوه يأكلك
علي:لالا بطلنه نرضى بالقاسمه الله منريد شي يمعوده

كعدت اباوع واضحك ع سوالفهم طلعت من المطبخ صار بوجهي ازاد مبدل حتى يروح لدوامه مهتميت مشيت وعفته سمعته صاح

ازاد:يمه الفلوس خليتهه يمج اليوم تطلعون للسوك تجهزون الملابس والذهب اني وجينار نختاره بعدين

باوعلي بتكبر ومشه كعدت بالصاله يم عمو سيف

جينار:هففف اريد اروح لبغداد
سيف:بعدج ممقتنعه
جينار:لا ممقتنعه هنا
سيف:لو بس افهم شعندج بغداد
جينار:احبهه
سيف:بعد متتزوجين ازاد عود روحو تونسو بيت خالج
جينار:ايي انشالله

وعوجت حلكي

سيف:احجيلي شتسوين هناك
جينار:شسوي يعني اسولف وي بنات خالي ونسوي اكل اني وخالتي جنان حيل اتونس هناك يمهم
سيف:امم شتسوون اكل
جينار:خالتي جنان الاكل مالتهه حيل طيب تخيل اتونس من تعلمني ع الاكل
سيف:شتسوي اكل مثل شنو
جينار:برياني ودولمه وكبسه وبيتزا والحلويات مااسولفلك عنهه
سيف:اهاا
جينار:وعلي مشتاقه لأكلهه السايق مالتهم من يجي للبصره اكلهه تدزلي ويا حلويات
سيف:هااا بكيفج

كمت من يم عمو سيف حسيت تصرفاته غريبه مااعرف ليش رحت يم نور لكيتهه تبدل

جينار:وين
نور:للجامعه
جينار:مبقه وقت
نور:ماعندي محاضرات هسه
جينار:اهاا منو حيوصلج
نور:هههه علي
جينار:وخاله شلون قبلت
نور:اششش كل ضنهه السايق
جينار:اكلج ليش متخلين علي يخطبج وتخلصون
نور:لا جينار اني اريد اكمل دراسه وعلي اذا خطبني الناس متسكت بعدين اني وين رايحه باقيه اله ههه
جينار:انشالله
نور:شبيج وي ازاد
جينار:ماكو شي عادي
نور:اشو احسكم متعاركين لتزعلين من ازاد ترى ماكو بطيبته وحنيته وحتى يحبج نضراته بعمق تجاهج وحتى نضراته بأهتمام ومختلفه تخيلي بس انتي من تمرين من يمه يباوعلج صديقاتي من كانو يجون لهنا ميباوع ولا يهتم الهم
جينار:الله كريم هسه روحي داومي العصر عدنه طلعه
نور:هههههه اي عيني عرسج

عوجت حلكي بأنزعاج وطلعت برا صعدت فوك يقين مختفيه مدااشوفهه دكيت باب غرفتهم احمد مو هنا دخلت لكيتهه كاعده ع الميز

جينار:هاي وين مختفيه

بقت ساكته تقربت يمهه شفت وجهه بي اثر ضرب لزمتهه

جينار:يقين شبيج
يقين:ماكو شي مابيه

نصت راسهه

جينار:يقين احمد ضاربج؟
نزلت دموعهه ومسحتهه

جينار:شكو احمد ضربج موو؟

حضنتني وانهارت بالبجي بقيت اهدئ بيهه

يقين:جينار اريد امووت ولج اني تعبانه مدااتحمل
جينار:يقين قوي نفسج لتبجين خلص اهدي كولشي اله حل
يقين:احمد مأذيني ولج اكو عروس بليلة عرسهه تنضرب يهيني شنو ذنبي اني ذنبي الوحيد انهزمت يعني اموت روحي هنا
جينار:يقين لازم اكو تنازل تنازلي شوي سوي الشي اللي يريده لتبقين معنده وانسي اسعد حياتج هسه احمد وبس
يقين:كلي جيبيلي مي جبتله شمره بوجهي جينار تعبت من المذله
جينار:يقين صيري قويه ترا احمد يحبج وراح يتفهمج
يقين:مااطيقه كلبي يم اسعد موو يمه مااريده
جينار:اووف حاولي طلعت وعفتهه كلمن ملتهي بهمه دخلت لغرفتي حضرت ملابس للطلعه وبعدين نزلت اتغدا اجه ازاد باوعلي وصعد حضرنه الاكل شوي ونزل يحجي ويسولف وي عمامي تغدينه وصعدت نمت شوي كلت ارتاح وبعدين احضر نفسي
كعدت من نومي ع صياح علي وحسام فوك راسي

علي:حسام جيب ساعتي ماالك حق تاخذهه
حسام:اسكت كسرت ساعتي انت وهذا تعويض
علي:اي ساعتك ذيج 5 الاف تقارنهه بساعتي بورقه
حسام:لا والله الساعه اللي كسرتهه حضرة جنابك توصيه من اربيل
علي:اووووو شكذب كعدي جينار كوليله ينطيني الساعه
جينار:شبييكم شبيكم مثل الاطفال تتناكرون فوك راسي متكلون اكو فقيره مسكينه تريد تنام
علي:لبست ساعته وانكسرت بالغلط هسه يريد ياخذ ساعتي
حسام:اي اخذهه وماانطيهه وبكيفي

جينار:انطوني الساعه واني اكول المن انطيهه
حسام:اخذيهه

اخذت الساعه وشمرتهه ع الحايط تكسرت علي تخبل كام يصيح وحسام يضحك

علي:ولللج شسويتي ليييش
جينار:وحده بوحده وهاي الساعه تستاهل الكسر بسببهه راحت نومتي
حسام:عفيه عليج يابعد اخوج
علي:بسيطه جينار
جينار:بدل متفكرون بالمصيبه اللي اني بيهه تتعاركون ع ساعه من ورا خططكم الغبيه وكعت بالهاويه
حسام:ديلا عيني وين تلكين مثل ازاد هيبه وجمال واخلاق وفلوس وفوكاهه متحملج
جينار:حسام ليش متسكت بله
علي:هوه انتي بأحلامج تخيلتي تتزوجين واحد مثل ازاد
جينار:اييي سوو نبي براسي فد مره يلا برا اريد ابدل
علي:حرامات التعب بيج طلعو وعافوني ضحكت اخيرا علي تقبل حسام بس بينهم مناكره كمت بدلت وكشخت لبست جبه لون زيتوني وشال وحذاء وجنطه لون بيجي تمكيجت وطلعت نزلت جوه خالتي تحجي وازاد يسجل كعدت يمهم

ام ازاد:اكتب 4 كوستمات وي الشالات مالتهه والاحذيه والجنط
جينار:خاله ماكو داعي للقائمه احنه بالسوك نشوف ونشتري
ام ازاد:لا اخاف انسه مااريد جهازج ينقصه شي

باوعلي ازاد ونصه راسه درت وجهي بضوجه طلعت نور وجانت مبدله كعدت يمي

نور:شديسوون
جينار:ديسجلون احتياجات الملابس
نور:هههه والله امي عليهه سوالف
ام ازاد:اكتب مكياج وحمر وعطور وشامبو وصبغ اضافر وبرنس للحمام

باوعتلي نور وضحكت نصيت راسي ضايجه

ازاد:دفضيهه مخلصت القائمه كاعد اكتب مثل الجهال
ام ازاد:اشش اسكت متكيف اجهز عروستك

رفعت راسي شفته باوعلي بضوجه ورجع يكتب

ام ازاد:بعد شنسيت اممم
نور:تراكات كتبتو
ام ازاد:ايي..يااا نسينه شغله مهمه
ازاد:شنو هيه فضيهه
ام ازاد:ملابس النوم وسيت الزفه سجل سجل

حطيت ايدي ع وجهي ونور خربت ضحك وازاد بالكوه حابس الضحكه

ام ازاد:امم اكلك ازاد شنو الالوان التحبهه
نور:ماما عيب
ام ازاد:باجر اطلعي انت وازاد اشترو ذهب وكوستم خاص بالعقد حتى باليوم البعده ترحون للمحكمه وتبقى التجهيزات نرتبهه بعدين

نصيت راسي محجيت شي وصلنه للبيت ودخلنه كعدو يشوفون الملابس واني ممقتنعه

ام جينار:الله هاي البدله تخبل
ام ازاد:هههه اي جينار اختارتهه
ام جينار:كومي جينار كدريهه
جينار:لا ماما بعدين
ام ازاد:دكومي خلي نشوفهه عليج

جريت البدله ودخلت لغرفة البنات كصيفه وقصيره لونهه رصاصي وفوكاهه صايه ديكورهه حيل مرتب طلعت وشافوني

ام ازاد:اللهم صل ع النبي دشوفوهه شحلوه
ام جينار:اي تخبل جينار
نور:نياله لأخويه هههه
بقيت ساكته ماعندي شي اكوله وماعندي ابتسامه لأني اصلا مو فرحانه بقو ييوو افتري وارفعي ذاك وحلوه ومدري شنو دخل ازاد

ازاد:يمه وين ال...

شافني وبقه صافن والكل يضحك ركضت للغرفه هاي الفشلات من بدايتهه عود عباله داالبس البدلات وميته عليه اسمعهم يحجون

ام ازاد:ها ازاد شتريد
ازاد:ها لا ماكو شي

وسمعت طبكة الباب يمكن طلع وهمه يضحكون ذبيت البدله ولبست ملابسي صعدت لغرفتي ضايجه اجتي امي جنت متمدده ع السرير كعدت يمي ونمت ع رجلهه

ام جينار:ليش احسج مو فرحانه رغم الكل فرحان بس انتي احس بيج مو مقتنعه
جينار:ماما تعبانه
ام جينار:سلامة كلبج من التعب كوليلي اكو شي
جينار:ماما اني ما اريد..

قطعت كلامي مااكدر اكمل اكيد راح تزعل وتضوج خليهه تكمل فرحتهه

ام جينار:شنو الشي المتردي
جينار:ماكو شي ماما عاجبني انام بحضنج
ام جينار:ههههه تعالي

نمت بحضن ماما ودموعي تجري مخنوكه هواي ابجي بدون ماتدري غفيت بحضنهه حسيت بيهم يصيحولي ع العشه كمت غسلت وجهي ورتبته ونزلت كعدو سولفون ع الصالون والعرس والهوسه واني اصلا بالي مو يمهم

ازاد:حنة النسوان هنا بس الزفه اسويهه بالقاعه
الشيخ:لالا ليش ماكو بيت حتى ترحون للقاعه
ازاد:عمي اني مااحب سوالف البيت والهوسه
حسين:اي وتخلي مرتك الكل يباوع عليهه هاي مو حلوه منك ازاد
ازاد:بس افهموني الزفه بيناتنه بالقاعه مراح اجيب احد غريب وراح نوصي ام الصالون تخفف المكياج وترتب جينار
سيف:هههه واصدقائك الرائد والنقيب والعريف والملازم حينكلب عرسك جيش
ازاد:حسوي حفله مال حنة بالقاعه واعزمهم
الشيخ:والله ممقتنع بكلامك
علي:بابا دعوفهم ازاد يريد يسوي العرس ع طريقه جينار قاعات وكذا
جينار:اني شعليه
ازاد:هسه المهم الزفة تصير بالقاعه ومناك لفندق
علي:هلااااااااا اهم شي الفندق

ضحكو كلهم واني بس صافنه كمت صعدت لغرفتي بقيت اكلب بالفون اندكت الباب

جينار:ادخل
دخل ازاد عدلت كعدتي ورفعت شعري ولفيته

ازاد:عندي كلام وياج
جينار:تفضل

سحب الكرسي وكعد يم السرير

ازاد:انتي صح ممقتنعه بالزواج مني واني مااكدر اقنعج بس وجهج شوي سوي طبيعي لتكلبين خلقتج وخلي بالج شغلة اذا قبلتي او لا نهايتج الي

عقدت حاجبي وكتفت ايدي

جينار:يعني شنو هي غصب نهايتي الك شنو هذا الكلام
ازاد:شوفي اني عندي استعداد اتزوجج وابقه لنهاية عمري انتي مرتي وحتى لو منتحاجه عادي عندي يعني مااهتم بس لانج رافضتني اني مااحب افرض روحي ع وحده رافضتني لذالك اذا خليتي الامور طبيعيه وابتسمتي وحسستيهم ان انتي فرحانه بظرف 6 اشهر وا

طلكج
جينار:انت شنو تلعب عليه تزوجني وتطلكني وتعوفني ومن هالخرابيط اني رأيي وين ازاد شنو نهايتي الك ليش حتى اكون الك
ازاد:من انتي وصغيره ازاد لجينار وجينار الازاد لو يخطبوج عشره مراح ينطوج لغيري فهمتي هسه
جينار:شنو هذا الجهل والتطفل ليييش اني مو لعبه بيدكم حرام عليكم
ازاد:اني كتلج وخلص عجبج عجبج معجبج براحتج استعمل اسلوب ثاني وياج

طلع وعافني لزمت راسي اني شنو صرت لعبه بيديهم صرت طوبه ياهو اليجي يدفرني لييييش ضربت وجهي ضاق نفسي اختنكت ودموعي تنزل اني وين اجيت شدايصير بيه اهلي مو نفسهم تغيرو جينار ضاع كولشي منج
كعدت بالكاع كرفصت ع روحي ودموعي تنزل اني شنو مكانتي هنا ليش احس روحي عبئ ثكيل عليهم ليش يردون يتخلصون مني
ساعات مرت واني افكر وعقلي انشل من التفكير حسيت روحي اختنكت الهوه ضاق بصدري كمت ادور هوه ماكو اباوع ساعه 2 ليل والكل نايمه بس جروحي صاحيه وكفت انتجي بالسرير بقيت امشي واكو وجع وضيق بصدري طلعت من غرفتي ارجف احس روحي خلص بدت روحي تطلع بديت انازع الموت البيت اظلم بس غرفة ازاد بيهه ضوه فتحت باب غرفته كان متمدد وصافن شافني وفز اشرتله مخنوكه وكعت بالكاع كمت مااسيطر ع روحي

اتيتك ولا تسأل لماذا؟
اتيتك وبداخلي انين
هناك جرح سببه انت!
وجرح سببه السنين..
لا ترسم الامل على الجدار المهدم
لأنك لاتعلم بهذا الجدار! ولا تعلم كم هو حزين

ركض عليه لزمني شالني من الكاع واني ارجف رش فوك وجهي مي بقه يضرب بوجهي ضربني بقوه وجريت النفس نزلت دموعي واني اتنفس بقوه واكح حضني بقوه مااعرف ليش هيج سوه بس انهاريت وبقيت ابجي مرت دقايق هديت شوي ودفعته كمت من الكاع ردت اوكع ولزمني دفعته وصحت وكفت واني مهزوزه

جينار:لتلزمني ولتقرب يمي اني مو ضعيفه ولا راح اضعف

وكف واشرلي بأيده

ازاد:خلص اهدي اهدي
جينار:انت خلفت بوعدك وسويتني لعبه جنت مأمنه بيك واكول ازاد ميخلف وعده بس طلعت مو كد كلمتك طلع كلامك لغوه زايده وبسس مو افعال

صاح بيه لزكت روحي بالحايط خفت منه هواي تقرب يمي واني مخليه ايدي ع راسي لزم ساعدي ونزله

ازاد:شبيج خايفه كملي كلامج هيج كارهتني هه عجيبه وياج انتي باوعت عليه بحقد

جينار:امووت منك تعرف شنو يعني اكرهك اصلا مااطيقك

ضربته ع صدره ولزم ايدي خلاهه ورى ضهري ولزكني بي

ازاد:مداتلاحضين تجاوزتي هواي وانتي تعرفين ازاد ماعنده طاقه زايده ينفجر
جينار:وخر يلا عوف ايدي
ازاد:ليش صرتي هادئه صيحي يلا عاجبني اعاقبج وانتي تعرفين عقوبة الصياح مالتج

وخر كذلتي من وجهي دفعت ايده براسي

جينار:لتحاول تتلاعب بيه والله اسوي ليلك نهار ونهارك ليل
ازاد:هوه من هسه انتي مسويه ليلي نهار مداتشوفيني كاعد منمت

جينار:انشالله عمرك كله متنام وخر يلا

ترك ايدي ودفعني ع الحايط ولزمني من وجهي بقوه

ازاد:انتي ليش لسانج طويل وتستفزيني بي
جينار:عوفني ومعليك بلساني
ازاد:ماعندج احترام لسانج سيف ويكص بيه انتي شنو متعقلين هسه ردتي تموتين
جينار:اموت انشالله ويدفنوني ومن تجي لكبري اجرك يمي تعيش ليله مصخمه كلهه عذاب وثاني يوم ادفرك برا

غمزلي وابتسم بمكر

ازاد:اعيش هذي الليله هنا ليش بالكبر ضيق

دفعته ومشيت رجع لزمني من ايدي وجرني

ازاد:اذا مطايقه تشوفيني وتكرهيني شعندج جايه هنا وتردين هوه لازم اني اوكسجينج
جينار:انته ثنائي اوكسيد الكاربون اصلا اجيت لهنا اكلك شغله رضيت الكل وفرحتهم بس مرضيت نفسي لذالك اني غبيه سلمت ثقتي بيدك وصدكتك المفروض من البدايه من اول يوم شفتك بيه احسبك ممخلوق بس مااعرف ليش الايام خلتنه نوصل لهذا الحد

بقه صافن بعيوني جريت ايدي وطلعت دخلت لغرفتي غسلت وجهي اذا لطمتي صرختي حركتي روحج النتيجه وحده كلهه راح تلكين ازاد زوجج هدي نفسج جينار وفكري بعقلانيه اجه وكت القوه لازم متضعفين تمددت بفراشي والف فكره براسي الف جرح بداخلي والف وجع يريد يقتلني بكل لحضه رغم هذا اني عايشه شلون ماادري ..

هناك في داخلي جروح كثيره
الام كبيره
ومواجع تهيج في كل ليله
الجميع انحنى لك الا قلبي لم ينحي
من انت؟ لماذا تستحل حياتي ؟
اتركني بحق السماء
فقد سئمت من ارهاق قلبي امامك

صحيت الصبح والشمس اخترقت غرفتي صوت ضحك ازاد تارس البيت فتحت عيوني مثل هذي الشمس اللي اخترقت الزجاج ونورت الغرفه راح اخترق الالم واثبت نفسي غسلت ونزلت شفت ازاد كاعد يحجي وي علي ويضحك علاقتهم هواي قويه دخلت للمطبخ كعدت ع الميز لزمت راسي دخلت يقين للمطبخ

يقين:شبيج جينار
جينار:هاا لا مابيه شي
يقين:جينار شكلج تعبانه
جينار:اني ماالومج من تنقهرين حقج بكولشي تسوي
يقين:شكوو
جينار:هه ماكو شي لتهتمين

طلعت برا اجتي خاله نيرمين كعدت يمي

ام ازاد:طلعي رقم عمتج زينب
جينار:ليش
ام ازاد:حتى اعزمهه ع الغدا باجر بيوم عقدكم
جينار:اوك

ازاد باوع ونصه راسه بقت خالتي تخابر واني ضايجه تريكنه وازاد يسولف وي عمامي

ازاد:علي الباجر اريد همتك ويانه مو بس محامي وخبصه رتبنه الامور مابيه حيل انتضر وهوسه
علي:انت الباجر بس تعال انت والسنيوريتا جينار وكولشي تلكا جاهز بس ملاحضه خالتي نيرمين تجي وتجيب جوكليت وتخبص المحكمه هلاهل
ام ازاد:اي علي ابقه قلد بعد
علي:ههههههه

كملنه ريوك واني ساكته صعدت ع الدرج مر ازاد من يمي وهمس

ازاد:العصر ب 4 الكاج جاهزه نطلع نشتري ذهب وكلمه زايده مااريد صعد وعافني صعدت لغرفتي بقيت اكلب بملابسي بعدين كعدت ع السرير صفنت صايره هواي اصفن اووف طلعت شفت حسام صافن

جينار:هاا صاير تصفن مثلي
حسام:ها لا مو صافن
جينار:منو الماخذه عقلك
حسام:محد
جينار:مدااصدك محد
حسام:اوووو دسكتي بلا

مشه وعافني هاي شكو ياستار

حسام

نرجس كل يوم تشوفهه متغيره هواي صايره احلا سمنانه وطوال الوقت تاكل كاكو وتباوع تلفزيون الصبح كعدت من نومي اسمع صوت سوالفهم جوه نزلت وصوت ضحكهه اميزه من بيت الاف شافتني سكتت بس بقت تباوعلي تريكنه وحجو عن ازاد وجينار اباوع جينار ضايجه وماكو بيدي شي اسوي الهه رحت للمطبخ اشرب مي شفت نرجس تصب لروحهه عصير كلت خلي اضوجهه شوي تقربت يمهه وعطرهه يخبل جريت الكلاص وشربت منه شوي ورجعته ع الميز باوعتلي بغرابه ابتسمت بخبث وطلعت للمزرعه اباوع لروحي كولشي يختلف عن السابق لزمت جيبي طلعت محفظتي متروسه فلوس باوعت لروحي ارقى الملابس واكف بمكان جنت احلم بي من سنين تذكرت موقف قديم

حسام:اني راح اتخرج ويحتاجلي بدله للتخرج
ام حسام:بعيوني بس انتظر عليه شوي اجمعلك الفلوس واشتري
حسام:اووف والله تعبت لشوكت ابقه اني هيج شو ابن حسن علي وابويه مشايفه بس فهميني شنو اني
ام حسام:يمه حسومي والله ادبرلك الفلوس لتضوج يبعد امك هسه تتخرج ويتحسن وضعنه
حسام:ليش متخلينه نروح لهذا الشيخ ع اساس ابويه خلي يعترف بيه ينطيني فلوس شنو اني هيج حياتي
ام حسام:يمه شسويلك اني مااريد اذلك واذل روحي صحت بصوت عالي وكانت هاي اول مره اصيح بيهه ع امي

حسام:شنووة اني ابن منوو كوليلي وين ابويه وين اهلي تعبت واني عايش عيشة ابن الحرام

نزلت دموع امي اللي كانت سلاحهه الوحيد ضعفت هواي كدام هذي الدموع تقدمت يمي واني اباوع لملابسهه البسيطه لوجهه التعبان بس رغم هذا كانت حلوه لزمت وجهي وابتسمت ابتسامتهه الم وانكسار مو طبيعي وكالت

ام حسام:اني كل اهلك انت مجرد وجودك ويايه نعمه احمد ربك راح يجي يوم وتملك كولشي بس متلكاني يمك وتذكر هذا الكلام اني صح فقيره وعيشتك عيشه صعبه بس عمري مفكرت بحرام ولا راح افكر بي

وكامت وعافتني عوده للحاضر

باوعت ع الفلوس ع وضعي وملابسي ع القصر رفعت راسي للسما ونزلت دموعي

حسام:اسف يمه اني محتاجج الج مااريد فلوس وبيت وسياره اريدج الج

كعدت بالكاع لزمت راسي ودموعي تنزل احسهه تجوي بيه من بعيد شفت ام جينار وابويه الشيخ يمشو

ن ويضحكون يمكن تصالحو بحياتي مشفتك مفكر بيه وبأمي كل مااشوفهم اكرهم وينملي غليلي عليهم وارجع واكول يجيهم يوم ويشربون من الكاس الشربت امي منه واني وراهم والزمن طويل
مسحت دموعي وتذكرت من جنت ابجي امي تكلي الزلم متبجي وكفت ودخلت للبيت شفت نرجس تغني وتبرد بأضافيرهه وكفت وراهه وهي متدري بيه

نرجس:قد الحروف اللي بأسامي العاشقين بحبك...قد الثواني والدقايق والسنين بحببك بقيت صافن واضحك وهي تغني

حسام:خفي علينه اصاله نصري حبتج حيه بسبع روس

باوعت عليه واخترعت باوعتلهه بطرف عين

حسام:قد الحروف اللي بأسامي العاشقين تحبي هي هي
نرجس:اي احبه وانت شحرك دمك
حسام:ييييع صوتج يضرب بالراس يدوخ
نرجس:روح ابلع حبايه منوم ونام لعد
حسام:هو كلمن ثرم زلاطه صار مغني والله ياالله
نرجس:اصعد لغرفتك ومعليك بيه عساني اغني واركص انت شعليك

خزرتهه وصعدت ادردم حتى تسمع

حسام:نزعت الاحترام والادب ماشاء الله

دخلت لغرفتي سبحت وصاحو ع الغدا نزلت تغديت

جينار

نزلت اتغدا اكلت شوي وكمت لغرفتي سبحت وبدلت وبديت اتحضر حتى اطلع باوعت الساعه بالاربعه كعدت ع سريري اندكت الباب عرفته ازاد ماشاء الله منتظم بمواعيده طلعت وشافني بقه يباوع جنت لابسه ثوب طويل بنفسجي فاتح وبي فتحه من يم الرجل صغيره ومرتب هواي وشال وحذاء وجنطه لون زهري ومخليه عطر قوي والحذاء يطكطك بقه يباوع ودار وجهه هو كالعاده كله اسود بنطرون وستره كلاسك سوده وقميص ابيض نزلنه سوه وصعدنه بالسياره

جينار:عود احنه ليش نشتري ذهب
ازاد:حتى نحطه ونباوع عليه
جينار:احنه مو اشترينه بالخطوبه
ازاد:بت الشيخ تختلف جنيوره
جينار:اكلك شغله
ازاد:كولي
جينار:اني وياك منرهم سوه فكرت بخطه
ازاد...
...
قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331

بارت 30
بقلمـي
آلگآتبهہ‌‏ غدير آلحيدري
...

جينار:اني وياك منرهم سوه فكرت بخطه
ازاد:اشش سدي حلكج لاخطه ولا شي محصلنه من خططج وخطط اخوج غير البلاوي
جينار:يعني اني بلوه
ازاد:اي
جينار:بلوه اي بلوه راح اشوفك البلوه شتسوي
ازاد:لتهددين

سكتت مجاوبت باوعلي وضحك
ازاد:صح بلوه وطركاعه بس حلوه

ضحكت ودرت وجهي

ازاد:هاها ضحكتي
جينار:اسكت

وصلنه للسوك ونزلنه دخلنه لمحل الذهب وازاد سلم ع الرجال

ازاد:طلعلي الذهب الوصيتك عليه جاهز
:اي جاهز تفضل

طلعنه علبه جبيره بقيت صافنه فتح ازاد العلبه وكان بيهه تخم كامل ذهب حلو هواي رفع المداليه باوعتلهه قلب ونازل منه حرف A ابتسمت رفع السوار حتى اشوفه هم حرف A موجود بي باوعت ع ازاد

جينار:انته موصي ليش جايبني اختار
ازاد:اذا معجبج هذا اوصي ع غيره
جينار:شو كله حرفك شكو شعدنه
ازاد:حتى وين متروحين تتذكرين بأزاد
جينار:وليش عود
ازاد:اني احب اتملك الشي ابسط مثال انتي مرتي احب اخلي كولشي يخصني بيج اصلا احمدي ربج مااخليج توشمين ع جبهتج اسمي
جينار:ياستار ياربي سترك
ازاد:هسه عجبج الذهب لو لا
جينار:لا حلو خلي مشكور كم شهر وترجع تبيعه
ازاد:اي واشتريلج احلا
جينار:لا مااقصد هيج
ازاد:اعرف قصدج

باوع ع ابو المحل وتفقو ع السعر نطا الفلوس وسوينه وصل وطلعنه

جينار:انت متملك وتحب تتملك الشي موو
ازاد:اي
جينار:بس اني مو شغله من اشيائك حتى تملكني
ازاد:بقانوني المره اللي تصير زوجة ازاد اذا انتي او غيرج تكون ملكه اله بوحده خو هاي اذا احبهه احبسهه والله
جينار:انت مريض
ازاد:لو اتعامل بتملك ويه وحده تحبني كان زاد حبنه وصار اقوه لان ماكو بنيه متحب حبيبهه يصير الهه بوحدهه هذا مو مرض هذا حب مدمر
جينار:لتسولفلي ع الحب اختنك
ازاد:لازم مجربته
جينار:لا الحمد الله بس اكره هيج مواضيع
ازاد:هههه ضحكتيني والله تعالي ندخل لهذا المحل لازم تشترين كوستم للمهر باجر
جينار:اوك

دخلنه للمحل اكو هواي ملابس دخت كمت مااعرف اختار لزمني ازاد واشر ع كوستم لونه اوف وايت (كريمي) عجبني فصاله ستره بيهه كريستال يلمع وكيمونه حلوه وتنوره ميدي بيهه فتحه من الرجل عجبني

جينار:حلو هذا الكوستم
ازاد:شوفي اختياري طبعا حلو
جينار:لتشوف نفسك زياده
ازاد:تعالي نشتري بس هذا كصيف عليج ناخذ اعرض
جينار:لا مااريد هواي عريض
ازاد:اووف تعالي

بقينه نتناقش ع القياس وبعدين اشتريته للكوستم وطلعنه من المحل

جينار:ازاد بقت شغله
ازاد:شنو هي
جينار:لازم اشتريلك ملابس مال باجر ماما كالت ع حسابي تصير
ازاد:اشتري بس مو ع حسابج من فلوسي
جينار:ازاد مترهم لعد اني هم مااريد منك
ازاد:انتي معليج بالملابس الاشتريهه الج هاي لازم
جينار:وانت هم لازم يلا ودينه لمحل بي خير حتى اشتريلك ع ذوقي

افترينه دخلنه لمحل معجبنه شي دخلنه لمحل ثاني بقينه نفتر شفت ستره لون بيج

جينار:ازاد بربك مو هاي الستره حلوه
ازاد:اي حلوه
جينار:تعال نشتري ونسق الالوان اني وياك حتى اللي يشوفونه الباجر يكول ذوله واحد ميت ع الثاني ميدرون احنه نتكافش من الشعر
ازاد:هههههههه

اشتريتله ستره وبنطرون بيجي وقميص نيلي وطلعنه اشتريت حذاء كعب وجنطه وشال لون نيلي كلت انسق وي ازاد دخلنه لكوفي وكعدنه تعبت من الفره

ازاد:هسه شنو البقه حتى نشتري
جينار:مبقه شي هاهيه
ازاد:يعني بعد ممحتاجه شي
جينار:لا سلامتك
ازاد:باوعي اريد اكلج شغله
جينار:كول
ازاد:الباجر راح يجون عماتي وانتي تعرفيهم شنو بس يدورون نقطه ع الواحد لذالك اريد منج متبينيلهم شي ادري انتي ممقتنعه بس هي بعد صارت
جينار:يعني هم مجبوره امثل
ازاد:جينار ليش تمثلين يعني انتي بالحقيقه تضوجين مني لذالك بكل حالتي كارهتني
جينار:ازاد يعني انت شتريد حتى انقذ نفسي وكعدت اني بحفره وبكل حالاتي هنا اتزوج اذا انت او غيرك واني فهمتهه اذا اريد الاستقلال لازم اتعذب وانكسر
ازاد:جينار يمكن انتي متعرفين الشخص اللي راد يزوجه عمي الج شلونه بكد ابوج ومتزوج 3 ونسوانه ينحلف بيهم بالكوه اضافه ان همه مدري شلونهم انتي تتحملين تعيشين هيج عيشه
جينار:لعد ليش بابا قبل ينطيني الهم
ازاد:هه ع فلوسهم ولان شيخ يليق بنت الشيخ بس عمي من تقدمتلج شافني احسن منه ويعرفني اني شنو وافق
جينار:مااعرف ليش نعقد محكمه حتى من اطلك تصير مطلقه اسمي
ازاد:يضمن حقوقج وتصيرين زوجتي امام الكل
جينار:مااعرف اني مثل الطوبه الكل يدفرني مد ايده ع الميز ولزم ايدي

ازاد:شوفي احنه صح هسه ممتراهمين بس اذا نتزوج وحياتنه مابيهه مشاكل مااطلكج
جينار:شلون يعني
ازاد:يعني اذا قبلتي تكونين زوجه وحياتنه حلوه مابيهه هوسه اني مااطلكج لان بساطه ماالكه مثلج ولا انتي تلكين مثلي بينما لو تعاركنه ومتفاهمنه اني اطلكج ويرجع كولشي لمكانه
جينار:راح اتخلص منكم كلكم وارجع لبغداد لااريد زواج ولا شي
ازاد:براحتج اني هم مخسران شي اتزوج قابل بس انتي مره
جينار:اصلا اني لتعتبرني زوجتك هيج اعتبرني اختك

باوعلي بطرف عين ودار وجهه شربنه عصير وطلعنه بقينه نمشي بالسوك اجه واحد ع

ازاد وسلم عليه

:شلونك سيدي
ازاد:ياهلا بحميد شلونك انت
:بخير سيدي
ازاد:وين هالغيبه مدانشوفك
:والله نقلني الرائد سيف لدائرة الصحه وهناك دااشتغل
ازاد:ع الخير تعال فد يوم للمركز نشوفك
:انشالله
ازاد:طمني متزوجت هههه
:لاوالله بعدني انشالله يقتنعون اهلهه
ازاد:انشالله
:انت سيدي مبروك الخطوبه كالو خطبت
ازاد:ههه اي خطبت ومن هسه معزوم بعرسي
:المن خطبت ؟

باوعلي ازاد وابتسم

ازاد:بت العم
:ع الراس انت وبت عمك هههه وتنسيم وين راحت
ازاد:تولي راحت من زمان كلعتهه
:ههه انشالله اجيك واسولف وياك اخذو راحتكم سيدي
ازاد:هلا بيك
مشينه من يمه وبقيت صافنه تنسيم منو

جينار:شكد لوكي خبصنه سيدي وسيدي
ازاد:طبعا يكلي سيدي لان اني نقيب
جينار:اي طبعا

عوجت حلكي ممقتنعه صعدنه للسياره

ازاد:ابقي اعوجي بحلكج
جينار:ممسويه شي غلط
ازاد:بله هاي حركات تليق بزوجة ازاد

باوعتله بغرابه ودرت وجهي

جينار:تعمقت انت بالدور كلهه كم شهر وارجع لبغداد وانت ارجع لحبيباتك
ازاد:ههه منيلي حبيبات
جينار:والله يمكن تنسيم كانت تجي عليه ضحك بقوه ولزم وجهه

ازاد:شوف الغبيه كامت تغار
جينار:ومن شنو اغار عشتووو
ازاد:ولج تنسيم وحده تافهه عمرهه 35 سنه تجي للمركز تشوف زوجهه مسجون اشو هاي شافتني ولزكت بيه تكلي اطلك من زوجي واتزوجك وكل العساكر يدرون بيهه عاد اني طردتهه ومن ذاك اليوم بعد مشفتهه
جينار:ومنو كلك احجيلي قصة حياتك وي تنسيم العجوز
ازاد:هههههه اي عجوز اكبر مني وتحبني لعد اني شكد هيبه

وبقه يمسح بكتفه بفخر ويضحك باوعتله بأستهزاء

جينار:الهيبه افعال مو بكثرة عجب النسوان بيك
ازاد:واني كلي افعال كون تجين للمركز تشوفيني
جينار:والله ياالله

بقه يضحك وصلنه للبيت ونزلت جنت ضايجه دخلنه شفت علي صاير نار من الغضب وجهه احمر جريته ع صفحه

جينار:علي شكو
علي:عوفيني بداعة الله لااحركه للبيت حرك
جينار:ولك شبيك
علي:دااكلج ولييي

اجه ازاد لزمه

ازاد:مخبل شبيك
علي:وخر ازاد رحمه لربك
جينار:شكوووو

اشرلي ازاد بمعنى ادخلي جوه دخلت جوه شفت امي ضايجه خليت الاغراض ع التخم واجيت يم امي

جينار:ماما شكوو
ام جينار:ماكو شي
جينار:شبي علي
ام جينار:مخبل
جينار:ماما شكو فهميني
ام جينار:صعدت وكان ضايج كلي اكوي قميصي اجيت اكوي درجة المكوى عاليه واحترك اشو بده يصيح ويعد ويغلط مثل المخبل

بقيت صافنه هذا مو عذر اكيد اكو غير شي دخلت لغرفة البنات نرجس تلعب بفونهه ونور متغطيه ونايمه

جينار:نرجس ليش نايمه نور
نرجس:طلعت لبيت صديقتهه ورجعت ضايجه وكبل نامت

عرفت الشغله بيهه ان خابرت ازاد وفتح

جينار:وين علي
ازاد:كاعد يمي بالمزرعه
جينار:مفهمت شبي
ازاد:ميقبل يحجي
جينار:خلي يجي للبيت عندي كلام ويا
ازاد:ماشي

سديت الخط وشوي ودخل علي وازاد ورا صعد علي لغرفته بدون كلام وازاد كعد بالصاله طلعت خالتي كعدت صعدت ورا علي لكيته متغطي ونايم

جينار:كوم عندي حجي وياك
علي:عوفيني جينار
جينار:علي دااكول كووم
علي:شتريدين
جينار:انت متعارك وي نور
علي:انعل ابويه لابو ابو نور زين هسه
جينار:ها بديت تفلت وتغلط شوي استحي شكو شصاير
علي:سلامتج
جينار:علي لتدوخني كول شكو
علي:روحي اسئلي الغبيه نور اسئليهه شكو روحي اني جوابي مراح يقنعج اني عار وحبيت ساقط كلب ابن كلب
جينار:يبوووو بديت تغلط اروح انزل جوه اشرفلي

نزلت جوه ع نور كعدتهه متقبل تكوم

جينار:نور اكعدي عندي كلام وياج
نور:عوفيني جينار
جينار:اكعدي دااكلج

كعدت باوعت عيونهه وارمه مبين عليهه باجيه

جينار:كومي لغرفتي
نور:مااصعد
جينار:علي مو بالغرفه كومي والله مو هناك

كامت جريتهه وصعدت فوك دخلت للغرفه وبجت

جينار:شبيج وي علي شصاير
نور:علي حقير خاني جينار بعيوني شفته
جينار:شلون يعني
نور:رحت ع صديقتي وبيتهم بشارع اللي بي مكتب علي طلعت اتمشى كلت اروح ع علي واني ويا نرجع سوه للبيت وصلت للمكتب ودخلت فرحانه راح اشوف حبيبي

متحملت بجت واني لزمتهه

جينار:كملي
نور:لكيته حاضن بنيه وهي تبجي ويمسح دموعهه يكلهه لخاطري لتبجين لتأذيني

بقيت مصدومه من كلامهه وهي تبجي وتشهك لزمتهه

جينار:انتي متأكده
نور:اي وشافني وتعاركت ويا وهنا يكلي انتي ماعندج ثقه بيه
جينار:يعني موضحلج
نور:لا يكلي انتي بنظرج اني خنتج براحتج ابقي هيج
جينار:نور اكو سوء فهم اكيد
نور:خلي يروح خاين بعد مااريده
جينار:نور لتخربين حبكم بسبب سوء فهم ابقي هسه اصيحه واجي

طلعت صحت علي بالكوه يلا اجه دخلنه للغرفه نور وكفت دارت وجهه

جينار:يلا هسه تفاهمو
نور:ماكو تفاهم هو خاني
جينار:نوور تفاهمو
علي:نور بربج حب 15 سنه اخونج هسه انتي مخبله
نور:حاضنهه وتكلهه لخاطري واتأذه هاي مو خيانه لك اني اضوج من جينار اذا تضحك وياهه اغار وتروح تحضن ذيج الساقطه مدري منين جايه
علي:لتغلطين عليهه احترمي
نور:شفتي جينار شفتي دايدافع عنهه روح علي من اليوم ماكو شي يربطني بيك
علي:ويطبج مرض غبيه مفكرتني حموت بلاج هااا شكاكه وماعندج ثقه بيه بكد الذره
نور:كلي ليش لازم ايدهه
علي:انتي الشك ماكل راسج ومراح تصدكين لو احلف بمية امام واني ع مدى 15 سنه مشفت الراحه وياج بس عركه وشك
نور:هه كول انت خنت وماعندك كذبه تكذبهه
علي:اني غبي ضيعت سنيني حب وياج

طلع وعافنه بقيت مصفنه كعدت نور بالكاع ضربت راسهه وبجت

نور:انتهه كولشي انتهه
جينار:راح احاجي وافهم منه
نور:الثقه راحت بينه خلص جينار انتهه حب السنين

كعدت يمهه لزمتهه من ايدهه

جينار:ليش متتمسكين بحبج ليش تكولين انتهه
نور:حتى لو اتمسك مراح يفيد ثقه وانكسرت ومتصلح ابد لو ازاد يأذيج ويخونج راح تكرهي اصعب شي شعور الخيانه
جينار:وهسه
نور:هسه علي وكع من عيني ومن كلبي مثل مدخل
جينار:نور تنهون كلشي بسهوله شبيكم
نور:الخلل بي مو بيه هو حتى مكلف روحه يفسر يشرح كله يكلي اشك خلص اني اشك وبعد مااريد اي شي يربطني بي

هكذا هو الحب
هو اشبه بسقوطك من عند جبل الهموم
وتستقر روحك بأحضان الحبيب
تبدأ بحفر مقرا لك داخل صدره
تتعمق في شرايينه
تصبح وتينه..اي ببساطه روحه التي ليس
بعدها رووح!!
تنهال عليك المشاعر من حيث لاتعلم
تبدأ بتغطية مشاعرك البارده لكي تنعم بدفئ الحبيب..
وبعد مده..ستتعب وتكتشف ان كل شيئ فعلته سينقلب ضدك..سيذهب الدفئ وتصبح روحك بارده تخلو من المشاعر
ستصبح محطم كبقايا ركام او رمادا
هذا هو الحب يفرحنا يوم ويبكينا الف يوم
لذلك لاتتعب نفسك في الحب بقلمي

طلعت نور من يمي وفعلا محطمه كانت تعشينه لاعلي اكل ولا نور صعدت لغرفتي خابرت خالتي جنان حاجيتهه شوي بعدين نمت لان تعبانه كعدت الصبح ع صوت امي وخالتي مخبوصين كمت سبحت وبدلت ونزلت جوه حطولي اكل اكلت بسرعه

ام ازاد:يلا جينار بسرعه اصعدي بدلي حتى نروح نحللكم ومناك للمحكمه
جينار

:اوك

صعدت فوك بدلت لبست الكوستم وفوكاه جبه وشال كريمي خليت مكياج شوي قوي ولبست الكعب نزلت جوه ازاد كاعد وخالتي تفتر يمه رفع راسه بقه يباوعلي نزلت ع كيفي كعدت يمه اجتي خاله

ام ازاد:يلا عبير تعالي
جينار:بس ماما تروح شنو بابا ميجي
ام ازاد:بلي حيجي ابوج
جينار:اهاا

طلعنه بسياره ازاد اني وامي وخاله ليوره وازاد وبابا كدام وصلنه للمستشفى نحلل ونسوي الاجرائات اني من زمان اخاف من سحب الدم

جينار:اووو ليش نفحص
ازاد:حتى يشوفونه متوالمين لو لا اخاف جهالنه يطلعون سكط
جينار:اللي يسمع كلامك يكول حجيبلك عشره هي كم شهر والله وياك
ازاد:جنيور امشي حللي واسكتي

كعدت وسحبو مني دم وازاد لازم ايدي كعدنه ننتضر التحليل طلعت النسبه متوالمين اني وازاد كيفت خاله كملنه الاجراأت ورحنه للمحكمه شفنه علي هناك شوي ودخلنه جوه كلبي راد يكف ودموعي تريد تنزل وكفنه جوه وذيج كانت لحضات صعبه الي ومرعبه كملنه عقد نزلت دموعي هاهيه صرت مرتك ازاد خاله كامت تهلهل وباركو الكل النه ازاد يبتسم واني الحزن مسوي حفره جبيره بداخلي بس مسويه روحي فرحانه رجعنه للبيت بس بالسياره جنت افكر بشي المقدم والمؤخر هواي مخلين شدعوه دخلت للحديقه ازاد اشر للحراس يروحون ذبلي الجبه وشلتهه لزمني من ايدي

ازاد:يلا ندخل

دخلنه سوه للبيت عماتي هناك والبيت مخبوص اشتغلت الهلاهل والجكليت عبالك مدري شكو باركو النه كعدت اني وازاد واجه عمو حسين بوسنه وباركلنه وعمو سيف كذلك صبو الغده كمت

ازاد:هاا وين
جينار:ابدل الكوستم مضوجني
ازاد:خوش البسي دشداشه برتقاليه فضحينه لعد
جينار:شكو شبيك
ازاد:ابقي بالكوستم ميصير بعدين بدلي

كعدت بملل اجتي عمتي انوار ام صابرين😒
انوار:يحفظكم الرحمن تخبلون
ازاد:شكرا عمه
انوار:هههه منسقين بالملابس شحلوين
ازاد:هههه والله هذا طلب حبيبتي جينار

وجرني يمه حوط ايده ع كتفي واني صافنه راحت عمتي وهو بعده محوطني

جينار:هاي شكو مو عبالك دخلت بالدور هواي

باسني من راسي وكرصني

ازاد:الله يخليج الي فدوه شكد حلوه

بقيت صافنه باوعت عماتي من بعيد يباوعون هيج لعد وخر ولزم ايدي ويبتسم

ازاد:ابتسمي اضحكي سوي شي شلعتي كلبي
جينار:ههههههههه

ضحكت بقوه وهو بقه فاتح عينه

ازاد:صخام بعينج شنو هالضحكه نصي صوتج مو هيج عاد عبالهم دااسويلج شي
جينار:تريد ضحكه اقوه
ازاد:اش يمعوده خليهه سكته ضحكتج مال وحده ممصدكه تعقد

بقينه نسولف صبو اكل والكل كعد واني كعدت يم ازاد بس متضايقه من الكوستم

ازاد:كتلج اشتري اعرض هسه زين راح يتشكك عليج
جينار:اهووو
ازاد:اكلي حبي

خله اكل يمي الكل يباوعلنه ويبتسم عبالك مدري شمسوين انتبهت يقين متاكل واحمد يخزر بيهه ونور وعلي واحد مطايق الثاني ونرجس مدري شبيهه فرحانه بعدين شفتهه كامت تبجي ودخلت لغرفتهه كملنه اكل وكمت غسلت اسمع يقين تحجي وي احمد
يقين:خليني براحتي دمرتوني بعد شتريد مني ماكو احقر منك بعدني مناسيه عملتك السويتهه بيه البارحه

بقيت صافنه هذا شمسوي صعدت لغرفتي سبحت وبدلت لبست دشداشه سوده برمودا وتمددت ع سريري شوي وانفتحت الباب وسمعت صوت ازاد

ازاد:ياريت لو من تصعدين تاخذين جنطج اني مو...

فتحت عيوني شافني وبقه صافن جريت الغطه وحطيته عليه دار وجهه

ازاد:بعد لتنسين اغراضج جوه

خله الجنطه ع الميز وطلع يووه الا يشوفني يعني

احمد

مشكلتي احب يقين بس كل مااشوفهه تصفن اكول بصفنتهه اسعد اتعمد اأذيهه دخلت للحمام حتى اسبح خلصت المي الحار وطلعت

احمد:هاي شنو الماي حار هواي افتحي بارد ويا انسمطت

باوعتلي بطرف عين ودخلت بسيطه ياايقين بدلت وتمددت ع السرير انتظرت 5 دقايق طلعت وكانت ترجف

احمد:حار هواي مووو افف من البصره الشمس متربعه بيهه خلي افتح سبلت

فتحت المكيف وهي بقت متبسمره بمكانهه باوعتلهه اخذت ملابسهه وبدلت بالحمام وطلعت ترجف لفت شعرهه ونامت بالكاع وتغطت بالبطانيه كمت جريت البطانيه ونطيتهه شرشف

احمد:جيبي بطانيه بهالحر تغطي بشرشف كانت تخزر بيه ومتحجي شي شوي وطفيته للمكيف لكيتهه ترجف ونايمه لزمت راسهه مصخنه اخذهه احمد صخنت النوب عفتهه ورجعت لمكاني بس كلبي منطاني اعوفهه مااكدر رغم هذا احبهه كمت شلتهه جسمهه حار من الصخونه خليتهه ع السرير نطيتهه خافض حراره وخليتلهه كمادات بدت تهذي وكلامهه ممفهوم نوبه تبجي نوبه تغلط مفهمت منهه غير احمد الحقير

احمد:اي احمد الحقير دايسويلج كمادات دطيبي وشوفي شيسوي احمد الحقير
يقين:الكل ميحبني اني لو اموت احسن
احمد:دموتي لعد
يقين:مو الحقير ميقبل اموت يريد يعذبني

باوعت عليهه هاي داتخربط بقيت احطلهه كمادات صارت ب1 بليل وهي مصخنه هسه شبيج متتحملين شقه خابرت صديقي دكتور

احمد:اكلك رأفت زوجتي مصخنه نطيتهه خافض حراره وكمادات بس مدايفيد
رأفت:روح للصيدليه كلهم لاصقات مال صخونه واكو دوه هسه ارسلك اسمه جيبه وخليهه تشربه
احمد:اي وبعدين
رأفت:لتغطيهه بطانيات ومدري شنو واذا استمرت الصخونه خلي تسبح

بقيت صافن اخذهه احمد النوب تسبح يبو ع هالعمله طلعت بسرعه جبت العلاج من الصيدليه اليمنه ونطيتهه انتضرت شوي خفت بس بعده مصخنه لازم تسبح شلون ياربي نزلت ع نور ماعندي غيرهه دكيت الباب وكعدت طلعت مصدومه

نور:شكو
احمد:امشي اكو شغله
نور:وين وين

جريتهه فوك دخلتهه للغرفه

نور:شبيهه يقين
احمد:مصخنه ولازم اسبحهه واريدج انتي تدخليهه للحمام خيتي ماعندي غيرج
نور:وليش شكو انت مو زوجهه اني شعليه
احمد:نور تساعديني لو شلون
نور:افففف تعال

شلت يقين دخلتهه للحمام ونور صافنه

نور:تروح تموت من البرد
احمد:الدكتور هيج كال
نور:خرب

اجتي نزعتهه واني طلعت برا هسه اني شجابني وفتحت السبلت يبو ع حضي المصخم مناوي يرتاح ويكعد شوي وصاحتلي نور

نور:تعال استغفر الله البنيه كامت ترجف والله انتو اوف ياربي

شمرت المنشفه عليهه وبقيت داير وجهي ويقين نايمه بس تون لبستهه نور وصاحت
نور:تعاال ساعدني بس واكف ولا عبالك مرتك شنو انتو عدكم المره تموت ومتديرولهه بال
احمد:سدي حلكج اجيت شتردين
نور:سد السحاب يلا وشيلهه للفراش خرب بللتوني

سديت السحاب انتبهت بضهرهه شامه حيل حلوه درت وجهي شلتهه وديتهه للسرير طلعت نور تدردم خليت يقين يمي نايمه وغطيتهه

احمد:نووور ديريبالج تجيبين سيره لأي احد ولتكولين ليقين انتي سبحتيهه
نور:ليش بله
احمد:معليج يلا روحي وطفي الضوه

باوعتلي بملل طفت الضوه وطلعت اباوع ليقين ترجف حضنتهه بقيت اوخر شعرهه عن وجهه شكد جنت احلم بهيج لحضات شكد جنت متمنيج الي تقربت بستهه من خدهه وبجت وحضنتني بقوه
يقين:اسعد ليش عفتني اكيد جبروك تعوفني مو

الشياطين صعدت براسي دفعتهه وكمت احس روحي اريد اكطعهه طلعت برا بالبالكون كسرت المزهريه وتناثر الكزاز كدامي ليش يقين مو حبيتج هذي جزاتي عندج تجيبين طاري اسعد الباعج كدامي اوووف رفعت راسي للسما ربي تعبت اريد اشاره وحده منك اريد شي يخليني ابقه وماانكسر بقيت كاعد للفجر اذن صليت ورجعت نمت حرارة يقين انخفضت بقيت اباوعلهه لزمت وجهه تحركت حضنتني ولزمت ايدي هي ونايمه وكالت بتعب

يقين:لتعووفني

بقيت صافن هي مو مصخنه يعني مداتهذي معقوله تريدني ابقه يمهه كلبي رجع يدكلهه مااعرف ليش بسرعه اسامحهه غمضت عيوني واني نايم يم حبيبتي اللي منتظر

هه من سنين بس مااعرف شمنتضرني من الام ارهقني حبك
لدرجة كبيرةةةة
اصبحت ابحث عن امل واحد
بصيص صغير,ضوء يدلني الطريق
اصبحت ابحث عن سبب لكي ارجع قلبي لك
ودقاتي تصبح بأسمك
وروحي لا تود معانقه غيرك
ساعديني على حبك
كي لا اشعر انني وحيد
فالوحده قاتله
وانتي لاتودين ان اصبح مجرم

يقين

فتحت عيوني بيوم مختلف صباح مختلف احساس مختلف باوعت اني نايمه بس مو بالكاع اني نايمه بحضن احمد ولازمته من قميصه بقوه محوطني من كل مكان حاولت اوخر شصار البارحه تذكرت ان نمت بالكاع من البرد زين شجابني هنا تحركت جسمي مكسر وخرت عنه الملابس اللي لابستهه مو مال البارحه البارحه لبست تراك وردي هذا تراك احمر بقيت دايخه لزمت راسي اتذكر شصار شصار ياربي مااذكر شي كعد احمد باوعلي بطرف عين وكام للحمام

يقين:احمد شصاير اني ليش نايمه يمك
احمد:اسئلي روحج

دخل للحمام وعافني بقيت مصدومه لزمت راسي شصاير ياربي شوي وطلع احمد باوعلي بطرف عين

احمد:عود الشامه اللي بضهرج حلوه

لطمت ع وجهي وكمت ارجف

يقين:شنوو انت شسويتلي
احمد:صخنتي من البرد وخابرت دكتور صديقي وكلي خلي تسبح انتي نايمه متكدرين واني سويت اللازم
يقين:شنوووو انت شفتني يعني شفت جسمي
احمد:كووولشي شفت بعدين اني زوجج يعني مو حرام اووك لتصيرين سيد براسي
يقين:انت شنو انت حقير بسببك بسببك تمرضت وهيج صار بيه

اجه يمي وجرني من شعري

احمد:لازم مو عاجبج اني مووو؟ تردين اسعد طبعا اسعد تردين اني منو اني عار وذبوج براسي وقبلت بيج ياساقطه
يقين:وخر عني وخر
احمد:شوفي لحد هسه ساكت لعبالج مراعي مشاعرج لالا اني مااراعي مشاعرج ابد بس كارهج ولعبانه نفسي منج من يعجبني اخذ الاريده واشمرج مثل مضحك عليج اسعد
يقين:اسعد مسوالي شي
احمد:نشوف شلون مسوالج شي بس مو هسه بعديين

دفعني وكعت بالكاع طلع وعافني كعدت ابجي اني شسويت بروحي ذبيت ملابسي وبدلت رتبت نفسي ونزلت وصار الغدا وهو يخزر بيه واني ضايجه منه كملنه الغدا وصعدت لكيته متمدد ع السرير
احمد:تعااالي
يقين:خير
احمد:طفي اللامب
يقين:ترا هو يمك طفي انت
احمد:دااكول تعالي انتي

رحت بملل طفيته ردت امشي جرني يمه وكعت فوكا دارني ع الجهه الثانيه وغطاني

يقين:وخررررر
احمد:بكيفي
يقين:اكرهك
احمد:واني اموووووت منج بس عاجبني هيج اسوي
يقين:حقير
احمد:اشششش نفس واحد بعد ماارحمج

سكتت ومحجيت شي بقيت نايمه اخ لو اسعد هنا شكد تمنينه هيج لحضات اني متأكده اسعد ميبيعني ويروح بس همه مهددي اكيد صفنت ع روحي يقين حرام انتي نايمه يم زوجج وتفكرين بغيره استغفر الله هاي خيانه ولج انشالله يرجع اسعد واكون اله وتخلص من كولشي

نرجس

بيوم عقد جينار وازاد بدلت لبست تنوره كصيفه لون ماروني وقميص هم كصيف لون ابيض وفوكا مثل السلاسل لونهه ماروني الا اخبلك ياحسام تمكيجت قوي ورتبت حاجبي طلعت شافتني امي وبدت تبسمر

منال:هاي شكو اشو متحضره يابعد عيني

تحجي وتعوج بحلكهه مهتميت اشتغلت وياهم واضحك واباوع حسام مشال عيونه عني بس يباوع فديته كملنه اكل وصبيت جاي للكل رحت لحسام و نطيته جاي

نرجس:ازيدلك الحلو
حسام:لا يكفي الواكف كدامي

ابتسمت وشفته حس ع روحه دار وجهه وسوه روحه ممهتم دخلت للمطبخ فرحانه سمعت عماتي يسولفون

:هههه وعلي ازاد وجينار حلوين
:اي بس عبالك يقين مفرحانه بزواجهه مبين
:ولج همه بنات منال مثل امهم ماعدهم حظ ومصخمين شوفي نرجس حبت وتزوجت وتطلكت وهسه المسكينه تلبس وترتب بلكي توكع زلمه وتتزوجه

سمعت كلامهم واحس ضاق نفسي كانو يحجون ومحاسين بوجودي وكعت الاستكاين مني وعيوني نترست دموع شافوني وانصدمو اجه علي وحسام وام جينار للمطبخ لزمتني ام جينار

ام جينار:خاله بيج شي

بقيت صافنه بوجهه وتنزل دموعي هزيت راسي لا مسحت دموعي وطلعت اركض من المطبخ حسام باوعلي راد يفهم مني طلعت برا بنهاية الممر ورحت للمزرعه ابجي احس روحي تحترك من جوه اني بهذا لبسي مااحاول اوكع احد واتزوجه اني مو هيج بقيت اشهك وابجي شكو ضعف طلع بذيج اللحضه حسيت حسام جرني شافني ابجي مسح دموعي

حسام:نرجس شكو ليش تبجين
نرجس:ماكو شي روح حسام
حسام:نررجسس كوولي شكووو
نرجس:معليك بيه معلييك عوفني وروح اني منبوذه الكل يكرهني ومحد يفكر بيه ان اني بشر عندي احساس ومشاعر اني بنضر الكل شي عدم ميحس انت ليش تسأل ليش مهتم
حسام:شبيج نرجس فهميني اني اساعدج والله بس كوليلي شكو احد اذاج بشي
نرجس:هههههههه ليش هو اكو احد مأذاني ترا من يتعب احساسي والزم الشخاطه واريد اذبهه ع روحي اني مو غبيه بس تعبت احترك بنار الله احسن مااحترك بناركم كل يوم ومحد يحس
حسام:بس فهميني شكو كوليلي شبيج
نرجس:شغله وحده بس اريد اعرفهه اني بشر لو حيوان اني عندي احساس لو عدم اني شنووو
حسام:انتي نرجس نرجس وبس انتي اللي حاولتي تطلعين روحج من صمتج وطلعتي انتي اللي حاولتي تقوين نفسج وقويتي مااعتقد اكو شي راح يكسرج

نزلت دموعي كعدت بالكاع كعد يمي

حسام:احد اذاج بكلمه

باوعتله وابتسمت بألم

نرجس:اني مسكينه ارتب روحي وابدل اكشخ واحط مكياج البس ملابس جديده تعرف ليش ههه اني اريد اوكع رجال واخلي يتزوجني ايي اني صرت سلعه بنضرهم صرت رخيصه بس ميوصل بيه الحد اوكع زلم بحبي

بقه فاتح عيونه ومصدوم
حسام:منو كال هذا الكلام
نرجس:اهلي
حسام:منو يعني
نرجس:عماتي

بقه فاتح عينه لزم وجهه وفركه

حسام:ذوله شنو من بشر
نرجس:لا كلامهم صح اني مااستحي وساقطه اني مطلقه المفروض مااكشخ وماالبس لييش لأني مطلقه المفروض اموت بس هذا الشي الدااسوي لنفسي مو لأحد والله

نزلت دموعي بقه يباوع بعيوني مسح دموعي ونصه راسه

حسام:حبي كافي بجي اني اعرفج شنو
نرجس:محد ميعرفني حتى اني مااعرف نفسي
حسام:نرجس لتهتمين لكلامهم انتي مو هيج واني اعرفج
نرجس:اني تعبت تعرف شنو تعبت بعد ماافكر ولالحضه بحياتي اني والميت سوه شكو عايشه اصلا ليش باقيه

كمت اباوع وين وين اروح انتبهت ع باب المزرعه افتحهه واطلع للشارع دقيقه وحده اشوف سياره واخلص من حياتي ومااحس بألم ركضت ولحكني حسام لزمني ودفعته

حسام:نرجس وين نرجسسسس
نرجس:رايحه للحياة اني هنا ميته

فلتت ايدي وركضت فتحت الباب طلعت بوسط الشارع اجتي سياره جبيره من بعيد اباوع السياره سريعه وحسام واكف واني بنص الشارع باوعت ع حسام نضره اخيره نضرة انسان عاجز ويودع رفعت ايدي الوحله وبعد محسيت بشي..

يكفي ان ابدأ حياتي بك..
وانهيها بنضره منك..
يكفي ان اصبح خيال..
يسير معك ويرافقك..
انا بعين المجتمع عدم
وكنت بعينك الدنيا
لكن مابال قلبي ان ابى واراد الحياة
سأفتقدك كثيرا
...
للحكايه الم ودموع
قناة للقصص العراقيه الواقعيه حصرا
بوت تواصل @DH_2018bot دَنـُـــوشٌ┊dиσσѕн ║
#حسام_العراقي @HD12bot
#معرف_القناة @Stories331