▌喺上一篇文我哋提到，#TVB 自我審查過《#鐵拳英雄》劇本，將戲內欺負泰國華僑嘅美國軍官，改為M國軍官，今次我哋唔討論政治問題，因為我哋發現無綫劇組連道具同歷史都係設定得 #是是但但。

▌劇集入面總共出現過兩名美國軍人，由德國演員 #易宇航 飾演嘅George Millen係美國綠扁帽軍官，佢仲有個無名跟班，不過根據其領章顯示，易宇航嘅職級係上尉(兩間)，跟班就反而係上校(鷹)，即係上校跟上尉出街搵食？唔係唔得，奇怪啲啫。

▌喺1960年，一個陸軍上校同上尉喺泰國蝦蝦霸霸係咩概念？我哋嘗試用有限嘅歷史知識去求證，當時美軍仍然未正式進駐泰國(1964年)，相信喺泰國只有美軍顧問團(JUSMAGTHAI)有美國陸軍嘅存在，而領導呢支顧問團嘅軍階大約係准將/上校級，換言之，當時駐泰嘅美國高級軍官唔係關注緊越南戰爭，亦唔係訓練緊泰國軍隊，而係無所事事走出街調戲婦女，或者走去同 #陳展鵬 打交，WOW，TVB又一次顛覆咗我嘅歷史觀，不過喺過往嘅TVB劇集，二戰都竟然可以出現聯合國同《日內瓦公約》，我又點能夠奢望佢寫到正確歷史。

▌補充資料：《鐵拳英雄》由 #馬百良藥廠、#太和洞藥廠 贊助

▌最近《鐵拳英雄》嘅劇情入面，講述上世紀60年代，有個美國軍官喺泰國唐仁街勾結黑幫，喺街頭作惡，郁啲就打人抆槍，甚至走私軍火、姦殺婦女，不過唔知點解，其他角色談及呢個軍官嘅國籍時候，就用M國嚟形容，做法非常突兀，既要煽動民族情緒，點解又要自我審查？同埋喺嗰段歷史時期，美軍都係駐紮空軍為主，係咪真係有美國陸軍軍官周街走呢？

▌呢一套《鐵拳英雄》原名《唐人街》，喺2019年已經拍好咗，但係就多次延期播映，無綫嘅官方理由係要配合全球同步播放，而劇中演員張國強就表示，劇本部份字眼要修改，並且重新配音，頭先提及嘅M國、唐仁街，相信就係更改部份，此外，喺某啲畫面，軍官制服嘅US ARMY字樣亦顯得模糊，可能亦經過處理，相信呢啲改動都係為咗滿足中國當局嘅要求，但手法是高是低就見仁見智。

▌喺中國，雖然仇美氣氛熾熱，但係如果虛構劇本牽涉到軍事或外交內容，有關部門嘅審查就會特別嚴謹，即使係《戰狼》電影系列，吳京都只係可以打「前」美國特種部隊、美國「籍」僱傭兵，好少扯正規軍落水，TVB為咗將《鐵拳英雄》推上中國播放，自然要「有所取捨」，將萬惡嘅美國軍官改成「M國軍官」，呢點都可以理解，不過我係估唔到，喺香港播嘅版本同中國版本一樣係閹割版，呢啲因為自我審查而出現嘅字眼，以前我以為只會出現喺中国民間字幕組、小說或者討論區當中，點知今日，翡翠台亦淪落至此。

▌後記：有網民補充，其實同樣情況喺2020年劇集《飛虎之雷霆極戰》中國放映版本都有出現，當時嘅英國、美國、俄羅斯、日本等國家分別被「修正」為茨國、美利國、法利群島、笠邦等，但翡翠台播放版本則未被修正。

▌補充資料：《鐵拳英雄》由 #馬百良藥廠、#太和洞藥廠 贊助