ချစ်ခင်ရပါသော နွေဦးပျားလေးများ ခင်ဗျာ

SpringBees version 1 မှ version 2 သို့ ကူးပြောင်းရာတွင် ကော်ဖီခွက်ပေါင်းများစွာ ၊ မရေမတွက်နိုင်သော အစည်းအဝေး ဆွေးနွေးမှုများ၊ အိပ်မပျော်သော ညအချို့နှင့် အသိုက်အဝန်း အဖွဲ့သား မှ "Pollen ဘယ်လောက်ရမလဲ?" ဟု မေးမြန်းခဲ့သော မေးခွန်းပေါင်း 17,483 ခန့်ကို ဖြတ်သန်းပြီးနောက် SpringBees v2 ကို အောင်မြင်စွာ မိတ်ဆက်နိုင်ခဲ့သည့် SpringBees အဖွဲ့သားများ အား ဂုဏ်ပြုဝမ်းမြောက်အပ်ပါတယ်။

ဒီနေ့ဟာ SpringBees အတွက် စိတ်လှုပ်ရှားဖွယ် အခန်းကဏ္ဍသစ်တခု၏ အစပဲ ဖြစ်ပါတယ်။ SpringBees version 2 ကို ပိုမိုစမတ်ကျစေရန်၊ ပိုမိုပျော်ရွှင်စရာကောင်းစေရန်နှင့် Community Members များအတွက် ပိုမိုအကျိုးရှိစေရန် ရည်ရွယ်၍ ဖန်တီးထားပါတယ်။ တခါတရံမှာ စွန့်စားလိုစိတ်ပြင်းပြသော ပျားလေးအချို့သည် မျှော်လင့်မထားသော လမ်းကြောင်းများသို့ ပျံသန်း သွားနိုင်သော်လည်း၊ ယခု ထွက်ရှိသည့် Version အသစ်မှာ ပါဝင်သူတိုင်းအတွက် ပိုမို ကောင်းမွန်သော အတွေ့အကြုံတခုကို ဖန်တီးပေးမည်ဟု ကျွန်တော်တို့ ယုံကြည်ပါတယ်။

အရေးကြီးဆုံးမှာ SpringBees ဆိုတာ Pollen များ မဟုတ်၊ Reward များအတွက် သာ မဟုတ်ပါ။ ကဏ္ဍအသိီးသီးမှာ တက်ကြွလှုပ်ရှားသူများ၊ သင်ယူလေ့လာလိုသူများ၊ အားပေးထောက်ခံသူများ၊ တီထွင်ဖန်တီးသူများနှင့် အိပ်မက်ကို ယုံကြည်သူများကို စုစည်းကာ ပါဝင်ကူညီခြင်း၊ တိုးတက် ဖွံ့ဖြိုးခြင်း ဖြင့် နွေဦးဂလက်စီ ဂေဟစနစ် (Spring Galaxy) နှင့် မြန်မာနိုင်ငံသစ် ၏ အနာဂတ်ကို အတူတကွ ပုံဖော်တည်ဆောက်ရန် အတွက် အသက်ဝင်သော Community တခု ဖြစ်ပါတယ်။

SpringBees Team နဲ့တကွ အဖွဲ့သားအားလုံး ၏ အပ်နှံကြိုးစားမှု၊ ဖန်တီးနိုင်စွမ်းနှင့် ဇွဲလုံ့လကို အထူးကျေးဇူးတင်ရှိပါတယ်။ ဒါ့အပြင် Community Members များ၏ ဆက်လက်အားပေးမှု၊ အပြုသဘောဆောင်သည့် အကြံပြုချက်များ၊ စိတ်အားတက်ကြွစေသော ဝန်းရံညီညွတ်မှုများနှင့် Pollen အကြောင်းကို မပျက်မကွက် မေးမြန်းပေးခဲ့ကြသည့် သစ္စာရှိမှု အတွက်လည်း ကျေးဇူး အထူးတင်ရှိပါတယ်။

@SpringBeesBySDB version 2 နှင့်အတူ နှစ်လိုဖွယ်ခရီးလမ်းကို ဆက်လက် လျှောက်လှမ်းသွားနိုင်ရန် မျှော်လင့်နေပါတယ်။

ပျော်ရွှင်စွာ စူးစမ်းလေ့လာကြပါစို့၊ သင်တို့၏ Pollen များလည်း တိုးပွားကြွယ်ဝကြပါစေ။ 🐝🌼

ကယ်လ်ဗင်
အမှုဆောင်အရာရှိချုပ် (CEO)
နွေဦးဖွံ့ဖြိုးရေးဘဏ် (SDB)

၂၀၂၆ ခုနှစ် ဇွန်လ ၂၂ ရက်

Spring Institute of FinTech (SIF) စတင်ဖွင့်လှစ်ခြင်းအတွက် ဂုဏ်ယူဝမ်းမြောက်ကြောင်း သဝဏ်လွှာ

ချစ်ခင်လေးစားရပါသော လုပ်ဖော်ကိုင်ဖက်များ၊ လူထုမိဘပြည်သူများနှင့် မိတ်ဆွေအပေါင်းတို့ခင်ဗျား 

@SIFinstitute နွေဦး ဘဏ္ဍာနည်းပညာ ကျောင်းရဲ့ တရားဝင် ပလက်ဖောင်း စတင် ဖွင့်လှစ်လိုက်ခြင်းအပေါ် လှိုက်လှိုက်လှဲလှဲနှင့် ဂုဏ်ယူဝမ်းမြောက်စွာဖြင့် ဂုဏ်ပြုလိုက်ပါတယ်ခင်ဗျာ။

ဒါဟာ အဖွဲ့အစည်းအသစ်တခုကို ဖွင့်လှစ်လိုက်ရုံသက်သက် မဟုတ်ဘဲ ကျွန်တော်တို့ရဲ့ ဘဏ္ဍာရေးနည်းပညာ (FinTech) က နည်းပညာကဏ္ဍနဲ့အတူ လူ့အဖွဲ့အစည်းရဲ့ အနာဂတ်ကို ပုံဖော်ပေးကြမယ့် မျိုးဆက်သစ် ခေါင်းဆောင်တွေ၊ လုပ်ငန်းရှင်တွေ၊ နည်းပညာရှင်တွေနဲ့ လူမှုအကျိုးပြု ပြောင်းလဲရေးသမားတွေကို ပြုစုပျိုးထောင်ပေးဖို့၊ အရည်အချင်းတွေ မြှင့်တင်ပေးဖို့နဲ့ ဆန်းသစ်တီထွင်မှုတွေကို အားပေးဖို့ ခရီးစဉ်တခု စတင်လိုက်တာလည်း ဖြစ်ပါတယ်။

အရှိန်အဟုန်နဲ့ တိုးတက်ပြောင်းလဲနေတဲ့ ဒီနေ့ခေတ်ကြီးမှာ အသိပညာ၊ ဖန်တီးနိုင်စွမ်း၊ ခေါင်းဆောင်မှုနဲ့ လူသားအရင်းအမြစ်တွေက ကျွန်တော်တို့အတွက် အဖိုးတန်ဆုံးအရာတွေ ဖြစ်လာမှာပါ။ အနာဂတ်ကို မျှော်ကြည့်တဲ့အခါမှာလည်း မြန်မာနိုင်ငံတော်သစ်ကို ပြန်လည်တည်ဆောက်ဖို့အတွက် အကြီးမားဆုံး စိန်ခေါ်မှုတခုက အရည်အချင်းရှိပြီး ကျင့်ဝတ်နဲ့အညီ ရှေ့ဆောင်တွေးခေါ်နိုင်တဲ့ လူသားအရင်းအမြစ်တွေကို မွေးထုတ်ပေးဖို့ပဲ ဖြစ်ပါတယ်။ ဒါကြောင့် SIF ကနေတဆင့် ကျွန်တော်တို့ဟာ ကျွမ်းကျင်မှုနဲ့ ပညာရေးတင်မကဘဲ ခိုင်မာတဲ့ အဖွဲ့အစည်းတွေ၊ တက်ကြွတဲ့ လူ့အဖွဲ့အစည်းတွေနဲ့ သာယာဝပြောတဲ့ နိုင်ငံသစ်တခု တည်ဆောက်ဖို့အတွက် အဓိကအကျဆုံးဖြစ်တဲ့ "လူသားအရင်းအမြစ်" တွေကိုပါ ရင်းနှီးမြှုပ်နှံနေတာ ဖြစ်ပါတယ်။

ယနေ့လို မှတ်ကျောက်တိုင်တခုကို အောင်အောင်မြင်မြင် စိုက်ထူနိုင်ဖို့အတွက် ကိုယ်စီမျှော်မှန်းချက်တွေ၊ ပေးဆပ်မှုတွေ၊ မနားမနေ ကြိုးပမ်းအားထုတ်မှုတွေနဲ့ ဝိုင်းဝန်းကူညီပေးခဲ့ကြတဲ့ SIF အဖွဲ့သားများနဲ့တကွ ပတ်သက်ဆက်နွယ်နေသူ အားလုံးကို အထူးပဲ ကျေးဇူးတင်ရှိပါတယ်။ ကျွန်တော်တို့အားလုံး လက်တွဲပြီး လူတဦးချင်းစီရဲ့ စွမ်းဆောင်ရည်ကို မြှင့်တင်ပေးနိုင်မယ့်၊ ကျွန်တော်တို့ရဲ့ နွေဦးဂလက်စီ ဂေဟစနစ်ကို ပိုတိုးတက်စေမယ့်အပြင် မြန်မာနိုင်ငံတော်သစ် ပြန်လည်တည်ဆောက်ရေးနဲ့ ဖွံ့ဖြိုးတိုးတက်ရေးကို ရှေ့ရှုပြီး မျိုးဆက်သစ်တွေက ရှေ့ကနေ ဦးဆောင်၊ ဆန်းသစ်တီထွင်ပြီး ပါဝင်ကူညီနိုင်မယ့် ပလက်ဖောင်းတခုကို ဖန်တီးပေးနေကြတာ ဖြစ်ပါတယ်။

ခုလို ထူးခြားပြောင်မြောက်တဲ့ အောင်မြင်မှုမှတ်ကျောက်အတွက် ထပ်လောင်း ဂုဏ်ယူဝမ်းမြောက်မိပါတယ်။ ကျွန်တော်တို့ရဲ့ အနာဂတ်က ဒီနေ့ကတည်းက စတင်နေပါပြီ။

လေ့လာစို့။ ဦးဆောင်စို့။ တည်ဆောက်စို့။ အားတက်စေစို့။


ခင်မင်လေးစားစွာဖြင့်

ကယ်လ်ဗင် 
အမှုဆောင်အရာရှိချုပ် (CEO)
နွေဦးဖွံ့ဖြိုးရေးဘဏ် (SDB)

၂၀၂၆ ခုနှစ် ဇူလိုင်လ ၁ ရက်