سَبَقَ المُفرِّدون

••
السَّلَامُ عليْكُم ورحمَـةُ اللـَّهِ وبركَاتُه،

[ لَعلها الجملة الأفضَل في أن نُمثل عليها القول فضلًا عن الأدنى منها في صراحتها المزيّفة ..]

جملة معَ شياكتها وما شابهها؛ تكاد تكون سَبب في إنها تنهي وُد قلوب كثيرة ناحِيَة قَلب مَن صارَحَ بِها، وإن لَم يكن ظاهريًا فالوُد المخبوء لَن يعُد له حِسّ بعد الآن.

ليه دومًا أنا مُخفف الجروح، ومُواسي المجروح؟ ليه دومًا أنا اللي بضمّد الجراح؟ وأنا الشمعة اللي بتحترق لأجل الآخرين؟

مش يمكن أنا المجروح وفيه اللي وَسَاني وصبّرني بقدر ما سعىٰ وجزاهُ اللَّه عني خَيْر؟
مش يمكن أنا اللي كُنت الآخرين، وكان فيه حد هو الشمعة اللي بتحترق من أجلي؟

مش بني آدم ضعيف أنا زي باقي البني آدمين؟
هل يُعقَل تكون كامل ونحن لا ندري؟
كلنا فينا من النقص ما يستوجب الاحترام للآخرين سواء مشاعر أو ضعف أو غيره.

ليه نَمُنّ على اللي حوالينا بحاجة من المفترض إنه واجب وحق إنه يُفعَل مني لهم بدون نقاش؟
ليه نتفضّل على الآخرين الفعَلة البسيطة اللي عملتها معهم، وإن كنت أَحسنتها أصلًا؟

فلنترك هذا الأمر جانبًا ونسأل في الأهم: ألَم تَكُن لِلَّه؟ واللي لِلَّه .. لِمَ نُخبِر الناس عنه؟
واروح واجي قائلًا: (واسينا اللي حوالينا، وملقناش اللي يواسينا ..)!! طب ساعدت وجبرت ليه طالما بترجع تحزن وتبكِ على الأطلال؟ ..
بعد جملة زي ديه تشاركها أو تقولها؛ فكُل اللي واسيتهم.. قلوبهم أصبحت مستغنية تمام الاستغناء عن هذه المواساة المزيفة، ولِسان حالهم: "أنا مش هطلب منه شيء تاني ولو حاول يساعدني مش هوافق على مساعدته اللي بيمشي يكلم الناس عليها ديه" ..

فيا أصحاب، إنها وإنْ كانَت للَّه .. في غالِب الظن لم نكن نسمع عن كرمكُم الفاحش في احتوائكُم لِلآخرين !

مش هو {وَلَا تَمْنُن تَسْتَكْثِرُ}؟ ولا انت فعلًا بتستكثر ومُنتظر عَطيّة ..
مش هو {لِوَجْهِ اللَّهِ لَا نُرِيدُ مِنكُمْ جَزَاءً وَلَا شُكُورًا}؟ ولا انت عايز نفس اللي اتعملك، وأوقات مُصِرّ تكون من نفس الشخص ..

كُلنا بنتجرح وأذىٰ البشر سُنة كونية، وزي ما لقيت اللي جرحني لقيت اللي يواسيني بفضلٍ مِّن اللَّه .. فمش لطيف أبدًا نتَكَلّم عن الجرح وأصحابه وننسى اللطف وأصحابه أيضًا .. كلنا كُنا الطرفين إن شاءَ اللَّه تعالىٰ، وأمور زي ديه لا تَستحِق أن نتكَلّم عنها، وكَما أن المشاعر لا تُناقَش فأيضًا اِحترام المشاعر ومُشاركتها لا تُناقش ولا يُخبَر بها، ويكأننا بِصدق بنذِلّ اللي حوالينا = أيوة أنا اللي كنت جمبك وقت جراحك وشدتك وملقتش حد جنبي أيوة أنا.. هو ذنبه ايه بشعور الثقل اللي هيعتريه بعد جملة زي ديه؟
فلأ خلاص اتفضل من غير مطرود مش محتاج وقفة حضرتك جنبي ولو بِكَلِمة. كذلك أن اللَّه "جل جلالُه" هو اللي بيسخرنا لِبعض، هي مش منك بَل مِن اللَّه وحدُه، انت مجرد سَبب ولو مش عايز تكون السبب ده وهتفضل تمن؛ فَفيه غيرك ملَايين مش واحد فقط.

وإن كُنت فعلًا محتاج حد يكون جنبك لأنه بالفِعل مفيش؛ فاطلُب من ربّك .. مش احنا ملناش غيره ولا ايه؟ لكن ليه رايح جاي تقول للناس: أنا ساندتهم ومش لاقي .. وقتها يعني هتيجي الناس تواسيك وتصعب عليهم؟ بالعكس .. الناس هتنفر منك انت، وإن لم يكن في أول الأمر فحتمًا ولا بُد آخره.

عدم التفكير في الطرف الآخر ورد فعله لما يقرأ مَكتوب زي ده انت مشاركه هيكون ايه غير إنه هيشعر بثقل رهيب في قلبه وندم شديد على أي مشاركة شاركك فيها مِن مآسيه اللي انت أصلًا كُنت أمّنته عليها بمجرد مشاركته لك فيها؟

هِيَ للَّه؛ فاصدق هذا وأخلِص لهُ "عز وجل" فيه ..
ثم إنْ كُنت تحب مَن حولَك بِصدق؛ ستخشىٰ على قلبه أي شعور سيء يعتريه من قِبلك، بَل الفِطري أنك تسعى لِرضاه في اللَّه أيضًا.

[ القلوب لَا تُحِب مِثل هذا؛ فتَجنّب أذيّتها ].
••
غفَر اللَّه لنا إنْ كُنا فعلنا مِثلَ هذا، ولَا جعَلنا مِن أصحاب المَن والأذى والثِّقَل أبدًا ..

اللَّه يرزقنا الصّدق في أفعالنا ويديم لَنا أحبابنا أصحاب الكرَم وعدم المَنّ ويبارك لنا فيهم ..

اللَّهُم لَا يُضام القَلب النّازلين بِه بِسوءٍ مِّنا عن قَصد أو غَيْرِ قَصد أبدًا أبدًا أبدًا ..

آمين آمين آمين !

94 views02:55