የሰሜን ወሎ ዞንና የወልድያ ከተማ አስተዳደር አመራሮች በሰሜን ወሎ ከፍተኛ ፍርድ ቤት የተደራጀውን የስማርት ችሎትና የቨርቹዋል ዳኝነት አገልግሎት ጎበኙ

ባሕር ዳር ፣ ጥቅምት 09/2019 (የአማራ ክልል ጠቅላይ ፍርድ ቤት)

የሰሜን ወሎ ዞን አስተዳደርና የወልድያ ከተማ አስተዳደር አመራሮች በሰሜን ወሎ ዞን ከፍተኛ ፍርድ ቤት በመገኘት የስማርት ችሎት (Smart Courtroom) እና የቨርቹዋል ዳኝነት አገልግሎት አሰጣጥን ጎብኝተዋል።

በጉብኝቱ ፣ የወልድያ ከተማ ከንቲባ አቶ ታምራት ደምሴና የአመራር ልዑካቸው፣ የሰሜን ወሎ ዞን ምክትል አስተዳዳሪ አቶ ሞላ ደሱ፣ የጉባላፍቶ ወረዳ ዋና አስተዳዳሪ አቶ ሀብታሙ በየነ፣ እንዲሁም የዳኝነትና የፍትሕ አካላት የትብብር መድረክ አባላት አመራሮች ተሳትፈዋል።

አመራሮቹ በጉብኝታቸው፣ የአማራ ክልል ጠቅላይ ፍርድ ቤት በሰሜን ወሎ ዞን ከፍተኛ ፍርድ ቤት ያደራጃቸውን ሁለት የቨርቹዋል ዳኝነት አገልግሎት መስጫ ስማርት ችሎቶችን ተመልክተዋል።

በጉብኝቱም በከፍተኛ ፍርድ ቤቱ የሚሰጠው የቨርቹዋል ዳኝነት አገልግሎት በሰሜን ወሎ ዞን የሚገኙ ተገልጋዮች የጠቅላይ ፍርድ ቤቱን የዳኝነት አገልግሎት ለማግኘት ወደ ባሕር ዳር መጓዝ ሳያስፈልጋቸው፣ በዞኑ ማዕከል በከፍተኛ ፍርድ ቤቱ በተደራጁት ስማርት ችሎቶች አማካኝነት አገልግሎቱን እንደሚያገኙ ተመልክቷል።
ለዝርዝሩ
https://www.facebook.com/share/p/14s8sV7RGR6/

የሰሜን ሸዋ ዞን ከፍተኛ ፍርድ ቤት የ2019 በጀት ዓመት መደበኛ ሥራውን ልዩ ልዩ መረሃግብሮችን በማካሄድ ጀመረ

ባሕር ዳር ፣ ጥቅምት 9/2019 (የአማራ ክልል ጠቅላይ ፍርድ ቤት)

የ2019 በጀት ዓመት መደበኛ የችሎት አገልግሎቱን በይፋ የጀመረው የሰሜን ሸዋ ዞን ከፍተኛ ፍርድ ቤት፣ በስራ ማስጀመሪያ መረሃግብሩ፣ በ2018 በጀት ዓመት የተሻለ አፈጻጸም ላስመዘገቡ ዳኞች፣ ሠራተኞች፣ ወረዳ ፍርድ ቤቶችና አጋር አካላት የእውቅና መርሃ ግብር አካሂዷል።

ፍርድ ቤቱ የ2019 በጀት ዓመት መደበኛ ሥራውን በድምቀት ባስጀመረበት መርሃ ግብር ላይ የደብረ ብርሃን ከተማ አስተዳደር ምክትል ከንቲባ አቶ ወርቃለማሁ ኮስትሬ፣ የሰሜን ሸዋ ዞን ከፍተኛ ፍርድ ቤት ፕሬዚዳንት አቶ ዮሐንስ ወንድሙና ሌሎች የዞኑ እና የከተማ አስተዳደሩ ከፍተኛ አመራሮች ተገኝተዋል።

አቶ ዮሐንስ ወንድሙ በመርሃ ግብሩ መክፈቻ ላይ ባስተላለፉት መልዕክት፣ መረሃግብሩ የተሰናዳው፣ ፍርድ ቤቶች በዳኞች የክረምት ዕረፍት ምክንያት በከፊል ዝግ ሆነው ውስን ሥራዎችን ሲያከናውኑ ከቆዩ በኋላ ከጥቅምት 2 ቀን 2019 ዓ.ም ጀምሮ ወደ መደበኛ ሥራቸው መመለሳቸውን በይፋ ለማሳወቅ እንደሆነ ገልጸዋል።
ለዝርዝሩ
https://www.facebook.com/share/p/1QBotHLMQA/

የደቡብ ጎንደር ዞን ከፍተኛ ፍርድ ቤት የ2018 በጀት ዓመት የመዝገብ አፈጻጸሙ ከ 83 በመቶ በላይ መሆኑን ገለጸ

ባሕር ዳር፣ ጥቅምት 9/2019(የአማራ ክልል ጠቅላይ ፍርድ ቤት)

ከፍተኛ ፍርድ ቤቱ ይህንን ያስታወቀው፣ የ2019 በጀት ዓመት ይፋዊ የችሎት ማስጀመሪያ መረሃግብር ባካሄደበት መድረክ በቀረበው የ2018 በጀት ዓመት የከፍተኛ ፍርድ ቤቱ የአፈጻጸም ሪፖርት ነው።

ፍርድ ቤቱ የ2019 በጀት ዓመት መደበኛ የችሎት ሥራ ማስጀመሪያ፣ የ2018 በጀት ዓመት ዕቅድ አፈጻጸም ግምገማ እና የ2019 በጀት ዓመት ዕቅድ ለአጋር አካላት የማስተዋወቅ መድረክ አካሂዷል።

የፍርድ ቤቱ ፕሬዚዳንት አቶ ታደሰ አማረ በመክፈቻ ንግግራቸው፣ የፍትሕ ሥርዓቱን በመጠበቅ በአዲስ መንፈስና ብርታት ወደ ሥራ በመግባት ማኅበረሰቡን በታማኝነት ማገልገል እንደሚገባ ገልጸዋል።

በመድረኩ የተገኙት የደቡብ ጎንደር ዞን ምክትል አስተዳዳሪ ገበየ ሃይሌ (ዶ.ር) በበኩላቸው፣ የፍትሕ ተቋማት የሕግ የበላይነትን ማስከበርንና ሥርዓት አልበኝነት እንዳይስፋፋ መከላከልን እንደ ቀዳሚ ተግባር በመውሰድ መሥራት እንዳለባቸው ተናግረዋል።

ሕብረተሰቡ ለሕግ ያለው አመለካከት እንዳይቀንስ፣ የፍትሕ ተቋማት ቀልጣፋና ታማኝነት የተላበሰ አገልግሎት መስጠት እንዳለባቸውም አሳስበዋል።
ለዝርዝሩ
https://www.facebook.com/share/p/1CqKQA2AJ7/