የፌደራል እና የክልል ጠቅላይ ፍርድ ቤት ፕሬዘዳንቶች የጣና ሀይቅ ገዳማትን እና ባሕር ዳር ከተማን ጎበኙ

ባሕር ዳር፣ ጥቅምት 02/2019 (የአማራ ክልል ጠቅላይ ፍርድ ቤት)

የሀገር አቀፍ የሕግ ተርጎሚዎች ጉባኤ በባሕር ዳር ከተማ ሲካሄድ የቆየ መሆኑ ይታወቃል።

የጉባኤው ተሳታፊ የሆኑት የፌደራል ጠቅላይ ፍርድ ቤት ፕሬዘዳንት ክቡር አቶ ቴዎድሮስን ጨምሮ፣ የክልል ጠቅላይ ፍርድ ቤት ፕሬዘዳንቶች እና የአዲስ አበባ እና ድሬደዋ ከተማ አስተዳደር ይግባኝ ሰሚ ፍርድ ቤት ፕሬዘዳንቶች የጣና ሀይቅ ደሴቶችን እና በባሕር ዳር ከተማ የተሰሩ መሠረተ ልማቶችን ጎብኝተዋል።

በብዙ ደሴቶች እና ገዳማት የተከበበውን የጣና ሀይቅ የጎበኙት ፕሬዘዳንቶቹ፣ የክብራን ገብርኤል ገዳም በመገኘት ቀደምት የሆነውን ቤተክርስቲያን እና በስፍራው የሚገኙ ቅርሶችን ጎብኝተዋል።

ፕሬዝደንቶቹ በባሕር ዳር ቆይታቸው፣ በከተማዋ የሚገኙ መሠረተ ልማቶችን የጎበኙ ሲሆን፣ የባሕር ዳር አለም አቀፍ ስቴዲየምን ተዘዋውረው ጎብኝተዋል።

ከባህርዳር አለምአቀፍ ስታዲዮም በተጨማሪ፣ የአባይ ድልድይን ጨምሮ ሌሎች የከተማዋን መሰረተ ልማቶች ተመልክተዋል።

ባዩት ነገር የተደነቁ መሆናቸውን የገለጹት ፕሬዘዳንቶቹ፣ ለተደረገላቸው መልካም አቀባበል አመስግነዋል።

የአማራ ክልል ፍርድ ቤቶች መደበኛ የዳኝነት ሥራቸውን በይፋ ጀመሩ

ባሕር ዳር፣ ጥቅምት 2/2019 (የአማራ ክልል ጠቅላይ ፍርድ ቤት)

በአማራ ክልል የዳኞች አስተዳደር ጉባኤ ማቋቋሚያ አዋጅ ቁጥር 282/2014 መሰረት ከነሃሴ 01 ጀምሮ እስከ መስከረም 30 ዓመታዊ የዳኞች የዕረፍት ወራቶች መሆናቸው ተደንግጓል።

አላማውም ዓመቱን ሙሉ በመዝገብ ሥራ ያሳለፉት የክልሉ ዳኞች እረፍት አድርገው በሙሉ አቅማቸው፣ በአዲስ ጉልበት እና የሥራ መንፈስ ወደ ዳኝነት ስራቸው ተመልሰው የተጣለባቸውን ሕገ መንግስታዊ ሃላፊነት በአግባቡ እና በላቀ ቅልጥፍና እንዲወጡ ማስቻል ነው።

በዚህም መሰረት፣ ከነሃሴ 01/2018 እስከ መስከረም 30/2019 ዓ.ም በከፊል ዝግ ሆነው የቆዩት የክልሉ ፍርድ ቤቶች፣ የ2019 በጀት ዓመት መደበኛ የዳኝነት አገልግሎታቸውን ሙሉ በሙሉ ጀምረዋል።

የክልሉን ጠቅላይ ፍርድ ቤት ጨምሮ በተዋረድ የሚገኙ ሁሉም የክልሉ ፍርድ ቤቶች ከዛሬ ጥቅምት 02/2019 ዓ.ም ጀምሮ ሙሉ አገልግሎት መስጠት የጀመሩ ሲሆን፣ ህብረተሰቡ ወጭ፣ ጊዜ እና ጉልበት ቆጣቢ አገልግሎት ማግኘት እንዲችል ቀልጣፋ፣ ዘመናዊ እና ተገማች የዳኝነት አገልግሎት መስጠት በሚያስችል ቁመና ተደራጅተው ይገኛሉ።

የዳኝነት አገልግሎት አሰጣጡን ዘመን ባፈራቸው የቴክኖሎጂ መሰረተ ልማቶች በማገዝ ላይ የሚገኘው የአማራ ክልል ጠቅላይ ፍርድ ቤት፣ ሕብረተሰቡ የላቀ የዳኝነት አገልግሎት፣ በአነስተኛ ጊዜ እና ጉልበት ማግኘት እንዲችል አማራጭ የዳኝነት አገልግሎት መስጫዎችን በማስፋፋት ላይ ይገኛል።
ለዝርዝሩ
https://www.facebook.com/share/p/1Cg8hAfxCF/

በክልሉ የሚገኙ ከፍተኛ እና ወረዳ ፍርድ ቤቶች የ2019 በጀት ዓመት የችሎች ሥራቸውን በይፋ ጀመሩ

ባሕር ዳር፣ ጥቅምት 03/2019 (የአማራ ክልል ጠቅላይ ፍርድ ቤት)

የአማራ ክልል ፍርድ ቤት ዳኞች ሁለተኛው ዓመታዊ ጉባኤ ማጠቃለያ ሥነ-ሥርዓት ላይ የክልሉ ፍርድ ቤቶች የችሎት ሥራ በይፋ መከፈቱ ይታወቃል።

በዚሁ አግባብ የጉባኤው ተሳታፊ የክልሉ ዳኞች ጉባኤውን አጠቃለው ወደ ከፍተኛ እና ወረዳ ፍርድ ቤቶቻቸው በመመለስ፣ ሰኞ ጥቅምት 2/2019 ዓ.ም ልዩ ልዩ መረሃ-ግበሮችን በማካሄድ የ2019 በጀት ዓመት መደበኛ የችሎት ሥራቸውን በይፋ ጀምረዋል።

ለ10 ተከታታይ ቀናት በክልሉ መዲና በመገኘት ለዳኝነት ሙያቸው ተጨማሪ አቅም በሚፈጥሩ የተለያዩ ርእሰ ጉዳዮች ላይ ስልጠናዎችን፣ ገለጻዎችን እና ከትምሕርት፣ ከንባብ እና ከተግባር የተቀዱ ሙያዊ ማብራሪያዎችን ሲከታተሉ የቆዩት ሁሉም የከፍተኛ እና ወረዳ ፍርድ ቤት ዳኞች፣ ከትላንት ጥቅምት 2/2019 ጀምሮ በፍርድ ቤቶቻቸው በመገኘት የበጀት ዓመቱን የችሎት ሥራ በላቀ ወኔ እና የአገልጋይነት ስሜት ጀምረዋል።

የሰሜን ሸዋ፣ ምስራቅ ጎጃም፣ ደቡብ ወሎ፣ ምእራብ ጎጃም፣ ሰሜን ወሎ፣ የባሕር ዳር እና አካባቢዋ፣ የኦሮሞ ብሄረሰብ ዞን፣ የማእከላዊ ጎንደር ዞን ከፍተኛ ፍርድ ቤቶችን ጨምሮ በሁሉም ከፍተኛ እና ወረዳ ፍርድ ቤቶች የ 2019 በጀት ዓመት የፍርድ ቤቶች የችሎት ስራ በቴክኖሎጂ ታግዞ፣ በላቀ የሙያ ሥነ-ምግባር ቀልጣፋ፣ ፈጣን እና ወጭ ቆጣቢ የዳኝነት አገልግሎት ለመስጠት በመዘጋጀት በይፋ ሥራውን ጀምሯል።