የኢትዮጵያ ፍርድ ቤቶች የቀጣይ ሦስት ዓመት የዳኝነት ትራንስፎርሜሽን ፍኖተ ካርታ ጸደቀ

ባሕር ዳር፣ መስከረም 30/2019 (የአማራ ክልል ጠቅላይ ፍርድ ቤት)

በአገር አቀፍ የሕግ ተርጓሚዎች ልዩ ጉባኤ የኢትዮጵያ ፍርድ ቤቶች የቀጣይ ሦስት ዓመት የዳኝነት ትራንስፎርሜሽን ፍኖተ ካርታ ለውይይት ቀርቦ ጸድቋል።

ልዩ ጉባኤው በባሕር ዳር ከተማ የተካሄደ ሲሆን፣ በመድረኩ የፌዴራል ጠቅላይ ፍርድ ቤት ፕሬዝዳንት ክቡር አቶ ቴዎድሮስ ምሕረትን ጨምሮ የክልል ጠቅላይ ፍርድ ቤቶችና የአዲስ አበባና የድሬዳዋ ከተማ አስተዳደር ይግባኝ ሰሚ ፍርድ ቤቶች ፕሬዝዳንቶች ተሳትፈዋል።

በጉባኤው የቀረበው የሀገሪቱ ፍርድ ቤቶች የሦስት ዓመት የትራንስፎርሜሽን ፍኖተ ካርታ፣ የዳኝነት አገልግሎት አሰጣጡን ለማዘመንና በመሠረታዊነት ለመለወጥ የተጀመሩ ጥረቶችን በተቀናጀ መንገድ ለማስቀጠል ያለመ ነው። ፍኖተ ካርታው በፌዴራልና በክልል ፍርድ ቤቶች መካከል ቅንጅትን በማጠናከር፣ የተሻሉ ተሞክሮዎችን በማስፋፋትና በቀደሙት የለውጥ ሥራዎች የተገኙ ውጤቶችን ዘላቂ ለማድረግ መሠረት እንደሚሆን በጉባኤው ተነስቷል።

የፍርድ ቤቶች የጋራ ትብብርና የተቀናጀ አሠራር የዳኝነት አገልግሎቱን ለማሻሻል ወሳኝ መሆኑም፣ የትራንስፎርሜሽን ፍኖተ ካርታው ቀርቦ በጸደቀበት ወቅት ተገልጿል።
ለዝርዝሩ
https://www.facebook.com/share/p/1euVVdDgx5/

የፌደራል ጠቅላይ ፍርድ ቤት ፕሬዝደንት ክቡር አቶ ቴዎድሮስ ምህረትን ጨምሮ የክልል ጠቅላይ ፍርድ ቤት ፕሬዘዳንቶች የአማራ ክልል ጠቅላይ ፍርድ ቤትን የለውጥና የማሻሻያ ስራዎች ጎበኙ

ባሕር ዳር፣ ጥቅምት 01/2019(የአማራ ክልል ጠቅላይ ፍርድ ቤት)

የሀገር አቀፍ የሕግ ተርጎሚዎች ጉባኤ በባሕር ዳር ከተማ ሲካሄድ የቆየ መሆኑ የሚታወስ ነው።

የጉባኤው ተሳታፊ የሆኑት የፌደራል ጠቅላይ ፍርድ ቤት ፕሬዘዳንት ክቡር አቶ ቴዎድሮስን ጨምሮ የክልል ጠቅላይ ፍርድ ቤት ፕሬዘዳንቶች እና የአዲስ አበባ እና ድሬደዋ ከተማ አስተዳደር ይግባኝ ሰሚ ፍርድ ቤት ፕሬዘዳንቶች፣ በአማራ ክልል ጠቅላይ ፍርድ ቤት በመገኘት፣ ጠቅላይ ፍርድ ቤቱ የክልሉን ፍርድ ቤቶች አገልግሎት አሰጣጥ በመሰረታዊነት ለማሻሻይ እየተገበራቸው ያሉ አሰራሮችን ተዘዋውረው ጎብኝተዋል።

በጉብኝታቸውም ጠቅላይ ፍርድ ቤቱ የዳኝነት አገልግሎቱን በማዘመን ተደራሽነትን ለማስፈት የሰራቸው የስማርት ችሎት፣ የኢ -ፋይሊንግ፣ የአንድ ማእከል ዲጂታል አገልግሎት እና የጥሪ ማእከል ጎብኝተዋል።

ምቹ የሥራ ከባቢ ለመፍጠር የተሰሩ ሌሎች የመሰረተ ልማት ስራዎች በጉብኝቱ የተካተቱ ሲሆን፣ የዳኝነት እና የፍትሕ አካላትን ታሪክ ሰንዶ ለማቆየት፣ ለሕግ ተማሪዎች እና ተመራማሪዎች የመረጃ ግብዓት ሆኖ እንዲያገለግል ታስቦ የተገነባውን የጠቅላይ ፍርድ ቤቱ የፍትሕ ሙዚየም ተመልክተዋል።

ፕሬዝደንቶቹ በጉብኝታቸው፣ የክልሉ ጠቅላይ ፍርድ ቤት የዳኝነት አገልግሎትን ተደራሽነት ለማስፋት የሰራቸው ሥራዎች የሚደነቁ መሆናቸውን ገልጸዋል።

በሀገር አቀፍ የህግ ተርጓሚዎች ልዩ ጉባኤ ለመታደም ባህርዳር የተገኙት ፕሬዝደንቶቹ፣ ከጠቅላይ ፍርድ ቤቱ በተጨማሪ በጣና ሀይቅ የሚገኙ ገዳማትን እና ባሕር ዳር ከተማን ተዟዙረው ጎብኝተዋል።

ለኦሮሚያ ጠቅላይ ፍርድ ቤት የቀድሞው ፕሬዝደንት አሸኛኘት ተደረገላቸው

ባሕርዳር፣ ጥቅምት 01/2019 (የአማራ ክልል ጠቅላይ ፍርድ ቤት)

ሀገር አቀፍ የሕግ ተርጓሚዎች ልዩ ጉባኤ መስከረም 30/2019 ዓ.ም በባሕርዳር ከተማ መካሄዱ ይታወሳል።

የሀገሪቱ ፍርድ ቤቶች በቀጣዮቹ ሶስት ዓመታት በጋራ የሚተገብሩትን የትራንስፎርሜሽን ማእቀፍ ተወያይቶ ያጸደቀው ልዩ ጉባኤው፣ ለኦሮሚያ ጠቅላይ ፍርድ ቤት የቀድሞው ፕሬዝደንት ክቡር አቶ ጋዛሊ አባሲማል የሽኝት መረሃግብር አካሂዷል።

የሀገሪቱ ፍርድ ቤቶች የትራንስፎርሜሽን ማእቀፍ ከሃሳብነት ተነስቶ እዚህ ደረጃ እስኪደርስ ከፌደራል እና ከሌሎች ክልሎች ጠቅላይ ፍርድ ቤት ፕሬዝደንቶች ጋር ከፍተኛ አስተዋጽኦ አድርገዋል ያለው ሀገር አቀፍ የሕግ ተርጓሚዎች መድረክ፣ ክቡር አቶ ጋዛሊ የፍርድ ቤቶች አገልግሎት አሰጣጥ በሀገር አቀፍ ደረጃ እንዲሻሻል መድረኩ እያደረገ ላለው ጥረት በአመራርነት ዘመናቸው ላደረጉት አስተዋጽኦ ምስጋና ይገባቸዋል ብሏል።

በክቡር አቶ ጋዛሊ አባሲማል ቦታ ለተተኩት የኦሮሚያ ጠቅላይ ፍርድ ቤት ፕሬዝደንት ክቡር ኦቶካና ኦዳ (ዶ/ር) መልካም የስራ ዘመን የተመኘው መድረኩ፣ የቀድሞው የጠቅላይ ፍርድ ቤቱ ፕሬዝደንት የተመደቡበት አዲስ የስራ ሀላፊነት ስኬታማ እንዲሆንላቸው መልካም ምኞቱን ገልጿል።

የማእከላዊ ጎንደር ዞን ከፍተኛ ፍርድ ቤት በ2018 በጀት ዓመት የፍርድ ቤቶች አፈጻጸም የተሻለ ውጤት በማስመዝገብ የዋንጫ ተሸላሚ ሆነ

ባሕር ዳር፣ ጥቅምት 01/2019 (የአማራ ክልል ጠቅላይ ፍርድ ቤት)

የአማራ ክልል ፍርድ ቤት የዳኞች ጉባኤ ከመስከረም 20 እስከ መስከረም 29/2019 ዓ.ም መካሄዱ ይታወቃል።

"የዳኝነት ተደራሽነትን ማስፋት፣ አገልግሎትን ማላቅ" በሚል መሪቃል ለአስር ተከታታይ ቀናት በተካሄደው የክልሉ ዳኞች ሁለተኛው ዓመታዊ ጉባኤ የመዝጊያ ሥነ-ሥርዓት መካከል አንዱ የዞን ከፍተኛ ፍርድ ቤቶች በበጀት ዓመቱ ባከናወኑት ስራ መሰረት የተሻለ አፈጻጸም ያስመዘገቡትን ለይቶ እውቅና እና ሽልማት መስጠት ሲሆን፣ በዚህም የማእከላዊ ጎንደር ዞን ከፍተኛ ፍርድ ቤት ከ14ቱ ከፍተኛ ፍርድ ቤቶች የተሻለ አፈጻጸም በማስመዝገብ የዋንጫ ተሸላሚ መሆን ችሏል።

የፍርድ ቤቶቹ አፈጻጸም በአማራ ክልል ፍርድ ቤቶች የማትጊያ ሥርዓት መወሰኛ መምሪያ በተቀመጡት መመዘኛ መስፈርቶች የተለካ መሆኑ በሽልማት ሥነ-ሥርዓቱ ወቅት ተገልጿል።

ከመለኪያ መስፈርቶቹ መካከልም፣ የዳኝነት አገልግሎት ቅልጥፍናን ማረጋገጥ፣ የዳኝነት አገልግሎት ጥራትን ማሻሻል፣የቴክኖሎጂ ተጠቃሚነትን ማሻሻል፣ የፍርድ ምርመራ እና ኢንስፔክሽን ሥራ፣ የማትጊያ ሥርዓት፣ የአመራር ብቃት፣ የሰው ሀብት ልማት ሥራ፣ ብዝሃ የፍትሕ መስጫ ሥርዓቶችን ማጠናከር፣ የቅሬታ ማስተናገጃ ሥርዓት፣ የሀብት አስተዳደር እና የበጀት አጠቃቀም ይገኙበታል።

ለዝርዝሩ
https://www.facebook.com/share/p/1EzmckfPDW/