▫️دؤولت نه قودرتین، نه هونرین‌دیر،
منصب ده، ثروت ده ناکس‌لرین‌دیر.
فلکین ذاتیندا قالمامیش نیشان-
ایگیدلیک، صداقت و آداملیقدان...

#خاقانی_شیروانی
#شعر_اوجاغی
@SheirOcagi

▫️قارا چکمه‌لی قادین

گؤزللیگین گؤزودور،
قارا چکمه‌لی قادین.
لاپ حسرتین اؤزودور،
قارا چکمه‌لی قادین.

بویلانیر گیله-گیله،
کوچه‌دن بیزیم ائوه،
پاییزی سئوه-سئوه،
قارا چکمه‌لی قادین.

خزل-خزل جان آتیر،
الی قوینوندا یاتیر.
اورمو گولونده باتیر،
قارا چکمه‌لی قادین.

گونش اولور، قیز دوغور،
باخیشی دنیز دوغور.
ایچیمده اؤزون بوغور،
قارا چکمه‌لی قادین.

بوراندی، سویوق کسیر،
باشیندا آغ شال اسیر،
اؤزگورلویه تله‌سیر،
قارا چکمه‌لی قادین.

«تبریز اوستو ماراغا
تئلی گلمیر داراغا».
شعری چکیب دوستاغا،
قارا چکمه‌لی قادین...

#دومان_سفراوغلو
@SheirOcagi

‍ ▫️خوشجا قال!

سیاه-بیاض دوگمه‌لرینده پیانومون،
سنی چالیرام ایندی.
چالدیقجا چوخالیرسان اوتاقدا.
سن آرتدیقجا من ایتیرم.

سنی دوغورورام گئجه‌یه،
آدینی قویورام آیا باخاراق.
هر شئی سن اولور، هر یئر سن.
من اؤلورم.

سسینی ائشیدیرم رؤیالاریمدا،
گؤزلریمی قاماشدیریر ایشیغین.
یئل، سن کیمی توخونور منه،
من یارانیرام.

ائشیتمک ایسته‌دیکلریمی سؤیله‌میرسن هئچ،
توخونمورسان منه،
سن کیمی بیر شیمشَک چاخیر،
تام قلبیمه دوشور ایلدیریمی.
من گئدیرم...

#اؤزدمیر_آصاف
#شعر_اوجاغی
@SheirOcagi

▫️اؤزومو بو یاد دونیادا چاره‌سیز، هاوادا قاناد چالان شاهین طرفیندن اوولاناجاغینی بیلن، کیچیک بیر قوش کیمی حیسّ ائدیرم...

📚 زامان ماشینی
#هربرت_جورج_وئلز
#شعر_اوجاغی
@SheirOcagi

▫️بئله‌لیکله «اسمیرالدا» بو قارانلیق زیرزمی‌یه قاپادیلمیشدی. اوّل‌لر گونشین شوعاع‌لاری آلتیندا اونو گولرکن، دانس ائدرکن گؤرَنلر، ایندیکی دورومدا گؤرسه‌یدیلر، اختیارسیزجا تیتره‌یردیلر. او، گئجه کیمی قارانلیق، اؤلوم قدر سویوق ایدی....

📚 پاریس نوتردام کیلسه‌سی
#ویکتور_هوگو
#شعر_اوجاغی
@SheirOcagi

▫️سنی گؤزله‌ییرم.

ائندی یوللارین اوسته-
چن؛ سنی گؤزله‌ییرم.
دوشدو قارا تئل‌لره-
دن؛ سنی گؤزله‌ییرم.

اؤزگه گولو درمیرم،
یایلیق اوسته سرمیرم.
تورپاغام، گؤیرمیشم،
دن! سنی گؤزله‌ییرم.

قویما عؤمور قیسالا،
توی یئرینی یاس آلا!
هامی چاتدی ووصالا،
من سنی گؤزله‌ییرم...

#زلیمخان_یعقوب
#شعر_اوجاغی
@SheirOcagi

▫️عشق، ایکی اینسانین کوچه داعواسینا بنزر،
چونکی آییران همیشه بیر اؤزگه‌سی‌دیر...

#اؤزدمیر_آصاف
#شعر_اوجاغی
@SheirOcagi

▫️آلزایمر

هانسی گون سنه وورولدوم،
بیلمیرم.
گؤزلرینده دوغولدوغوم آن،
اؤزومو سنه پای وئردیییم زامان.
سئودالار سوی‌‌قیریمینین ایل دؤنومودور،
بلکه سئوگی‌ اینتحاری.
خاطیرلامیرام
سنه اؤلدویومو،
داملا-داملا گؤزومدن قوپدوغونو،
سنه کؤلگه‌ کیمین سوروندویومو.
هئچ یادیمدا دئییل،
ایلک دفعه،
سسینین قولاغیم‌لا اؤپوشمه‌سی.
ایتیرمیشم آدرسین،
سنه توخوندوغوم خیاوانین.
هانسی گولون قوخوسونو سئویردین؟
هانسی ماسانی نیشانلامیشدین
سئوگیمیزه؟

اوره‌یی دؤیونور پنجره‌میزین،
قاییداجاقسان‌می؟!
بیلسه‌یدیم،
قیرمیزی خالچا سرردیم،
کوچه‌میزدن.
قارانلیق یاخامدان آسیلی.
آه سئوگیلیم!
آخیر گولوشومدن
ویداع ائتدییم ده یادیمدا دئییل.
سن گئتدین‌سه،
آلزایمر سیلدی بئینیمی،
هئچ نه یادیمدا دئییل.

دوزدنچی...
سؤیله هارالی ایدین؟
آدیمی نه چاغیریردین؟
آدین نه ایدی سنین؟!...

#دومان_سفراوغلو
@SheirOcagi

▫️یالوارما!...

کونول، وفاسیز اولان نازلی یاره یالوارما!
نه اعتبار اونا؟ بی‌اعتباره یالوارما!

داریخما! یاخشی-یامان روزگاریمیز گئچه‌جک،
بو بئش گون عؤمره گؤره روزگاره یالوارما!

سنین ده بیر گون اولار نوبهارین، ائی بولبول!
خزان جفاسینا صبر ائیله، خاره یالوارما!

فقیره، عاجیزه، مظلومه احترام ائیله،
عدویه، قان ایچنه، ظولمکاره یالوارما!

وطن یولوندا اؤلوم مرد اوچون سعادت‌دیر،
حیات اوچون فلکِ کج‌مداره یالوارما!

مُخالف اهلینه باش اَیمه، سن ده «منصور» اول!
«اناالحق» اوسته چکیلسن ده داره، یالوارما!

نه اولدو دولتِ جمشید، مُلکِ اسکندر؟
نه تاجداره، نه بیر شهریاره یالوارما!

اگر حیاتینی «واحید!»، خوش ائتمک ایسترسن،
نه گول جفاسینی چک، نه ده خاره یالوارما!..‌‌

#علی‌آقا_واحید
@SheirOcagi

▫️ووصال‌لا راحاتلایاجاق اولان شؤوقه، گووه‌نیلمز...

#محی‌الدین_بن_عربی
#شعر_اوجاغی
@SheirOcagi

▫️غوربت

داریخمیشام وطن اوچون،
خیفّت‌ده‌یم، خیفّت‌ده‌یم.
سانکی قارانلیق گئجه‌ده،
ظولمت‌ده‌یم، ظولت‌ده‌یم.

هدر کئچیر عؤمور، هدر.
سئوینمک یوخ ذرّه قدر.
منی گؤزدن قویمور کدر،
دیقّتده‌یم، دیقّتده‌یم.

قلبیم، ایچی یانان نئی‌دی،
دویغولاریم قارا گئیدی.
دوغمالیق چوخ یامان شئی‌دی،
حسرتده‌یم، حسرتده‌یم.

ساغیم دردلی، سولوم غملی،
یاناق یاش‌دی، کیپریک نملی.
واخت آمانسیز، عؤمور کم‌دی،
ذیلّتده‌یم، ذیلّتده‌یم.

ایستیلیک یوخ اود-اوجاقدا،
سؤز دؤنور دیلده-دوداقدا.
دوغما یوردوم چوخ اوزاقدا،
غوربتده‌یم، غوربتده‌یم...

#زلیمخان_یعقوب
#شعر_اوجاغی
@SheirOcagi

▫️گؤزونه بیر چؤپ باتسا، اونو چیخارماق اوچون تله‌سرسن. لاکین ذهنین خسته اولاندا موعالیجه‌سی اوچون نییه تلسمیرسن؟ باشلاماق، -ایشین یاریسینی بیتیرمک- دئمک‌دیر. اؤز عاغلینلا دوشونمه‌یه، عاغیللی اولماغا جسارت ائت، باشلا!...

📚 ادبی مکتوبلار
#هوراس
#شعر_اوجاغی
@SheirOcagi

▫️آغلاییر.

بو هاوانین دردی چوخدو،
ائله آغلاییر، آغلاییر.
کرم دئییر «گرک یانام!»
له‌له آغلاییر، آغلاییر.

دردی چمن-چمن شاعیر،
اوره‌یینده وطن شاعیر،
ائل-اوباسی ایتن شاعیر،
بئله آغلاییر، آغلاییر.

«شوجاعت»ام، بختیم دویون،
دؤزمور اورک، دؤزمور بئیین.
منی سوروشسالار، دئیین:
هله آغلاییر، آغلاییر...

#شوجاعت_کلبجرلی
@SheirOcagi

▫️تانریم! بیزه بؤیوک‌سن،
بویور یوخاری باشا!
دوردوم، سن اَیلشه‌سن،
یئریمه سن اول پاشا!

بو یولو من می سئچدیم؟
سنین ده تاماهین وار.
یولومو چاشمیشام سا،
سنین ده گوناهین وار.

هئی دوغولوب اؤلوروک،
باشا چاتمیر هله یول.
تانری اَیلنجه‌سینده،
یاددان چیخیب بیزیم رول.

توستون توتوب دونیانی،
گؤز گؤزو سئچه بیلمیر.
قبیرین اوتایینا،
کیمسه ساغ کئچه بیلمیر.

سنین باشین قال اولدو،
دونیانی سئل آپاردی.
سن یازدیغین رومانا،
آداملار ال آپاردی.

دور چیخ حیطه، تانری!
عئینین آچیلسین بیر آز!
دونیانی واراقلاییب
یئنیدن بیر رومان یاز!...

#فیروز_رحمانی
@SheirOcagi

▫️اونوتماغین شعری

اونوتموشام آرتیق سنی،
گؤزلریمین یادداشیندان.
سنسیز اوچماز دوشونوردوم-
کپنک‌لر ده قارشیمدان.

هئچ سوروشما بیر قورتوم دا،
من نئجه‌یم، نه تهرم.
ایندی سن اؤزگه بیریسن،
من‌سه کیمسه‌سیز شهرم.

باریشمیشام بو عؤمورله،
آرزولاریم گؤز اوجودور.
بیر بیله‌سن، سنسیز هر گون،
یاشاماق دا یوروجودور.

نه‌یسه، آرتیق اونوتموشام،
بیر سن اؤتدون بو عؤموردن.
تانری قدر سئودیم سنی،
کولک‌لر اسدی اؤنومدن...

#ائلمیر_حسن
#شعر_اوجاغی
@SheirOcagi

▫️قیزیل قایدانی یادیندا ساخلا: قایدالاری قیزیلی اولانلار قویور...

📚 وارلی آتا، کاسیب آتا
#روبرت_تی_کیوساکی
#شعر_اوجاغی
@SheirOcagi

▫️سن هئچ عؤمرونده ائله خسته‌لنمیسن کی، ساغالاندان سونرا حیاتین قدیر-قیمتینی، لذّتینی تزه‌دن حیسّ ائده‌سن؟...

📚 گون وار عصره برابر
#چنگیز_آیتماتوو
#شعر_اوجاغی
@SheirOcagi

▫️تبریز

بيلدی کی مجنونون پروانه‌سی‌يم،
منی دولانديردی باشينا تبريز.
اوغلونو اوجادا گؤرمک ايسته‌دی،
قالديردی داغلارين قاشينا تبريز.

بير عؤمور ياشاديم ياغ-بالدان شيرين،
بير حقيقت گؤردوم خيالدان شيرين.
دونيادا نه وارميش ووصالدان شيرين؟!
قاريشدی گؤزومون ياشينا تبريز.

سئوینجی، مین دفعه غمیندن شیرین،
غمی صؤحبتیندن، دمیندن شیرین.
نه وار بو شهَرین طامیندان شیرین؟
دوست، قارداش، سئوگیلی، آشينا تبريز.

درد اوسته، ساز اوسته، بير حياتی وار،
ديلينی گؤينه‌دن مين باياتی وار.
گؤردوم شهريارين يئددی قاتی وار،
باخدیم تاریخینه، یاشینا، تبریز!

گؤروندو گؤزومه بير ملک كيمی،
گؤردوم بوتؤوله‌شيب گله‌جک كيمی.
ياغديم ياغيش كيمی، گول-چيچک كيمی،
هوپدوم تورپاغينا، داشينا، تبريز!...

#زليمخان_یعقوب
#شعر_اوجاغی
@SheirOcagi

▫️اوره‌ییمی یئدیم سئوگی تاپینجا،
دیلینده بیر ایچیم سؤز وئرمه‌میشدین.
قارا گؤرونوردو یوللار صاباحا،
ایشیق وئرمیشدین‌سه، گؤز وئرمه‌میشدین.

گؤزومدن دوشدو آغ-قارا هر زادیم،
دیلیم قیفیللاندی، چکیلدی آدیم.
سنه، اؤز باشیما ائلچی یوللادیم،
سویوق ایلقاری دا دوز وئرمه‌میشدین.

گؤیلونه سو سپدیم، یانیمدا قالا،
باشینی قاتمیشدین بوش قالما-قالا.
گؤزومو آلدادیب هؤرموشدوم یولا،
بیر قورو خبر ده تئز وئرمه‌میشدین.

منده نه گؤروبسن پورانلاماقدا؟
سنه گوونمیشم حاقدا، ناحاقدا.
من ده حاقلییام کی بیر دوراجاقدا،
یاوان گولوشومه اوز وئرمه‌میشدین.

سن اؤز چیخارینی بیلمه‌دین البت،
کؤلگه‌ده گیزلندی سنده کی غیرت.
آخی، من نه‌یینه چکه‌یدیم مینّت؟
چؤرک وئرمه‌میشدین، دوز وئرمه‌میشدین...

#یعقوب_نیکزاد
@SheirOcagi

▫️ائه، بیلیرسینیز... اینسان بعضاً بیر قاشیق سودا بوغماق ایسته‌دیگی اینسانلارلا مجبوری باغلیلیق قورور...

📚 قومارباز
#فئودور_داستایئوسکی
#شعر_اوجاغی
@SheirOcagi