#خورشیدبانو_ناتوان
#شعر_اوجاغی

┏━━━━📝━━━━┓
🆔 @text_turk 👈
┗━━━━📝━━━━┛

▫️آغلارام

هیجران ائدیبدی کؤنلومو برباد، آغلارام
چوخلار توتار بو حالیما ایراد آغلارام.

کؤنلوم ائوی خرابتر اولدو فراقدن
وصلین بو مولکو ائتمه‌دی آباد، آغلارام.

دام-ی فراقده کن، چوخ ایل آه و لابه‌لر-
ائتدیم؛ نه سود؟! ائتمه‌دی آزاد، آغلارام.

نه هیجر-ی یاره طاقت و حالیم وفا ائدر
نه وصله چاتماز ال، ائدیبن داد آغلارام.

چکدیکجه جؤور-ی هیجرینی کؤنلوم فرح تاپار
شادام بو امره، بس نییه ناشاد آغلارام؟

کویینده محرم ائتدی رقیبی، صفا ایله
قهر ایله ائتمه‌دی منی هم یاد، آغلارام.

هیجرینده خوشدور آغلاماق آه و فغان ایله
سس وئرمه‌سه بو ناله و فریاد، آغلارام.

چون «ناتوان»-ی زار و ضعیفم فراقدان
بو گون ده یار ائتمه‌سه ایمداد، آغلارام...

#خورشیدبانو_ناتوان
کؤچوردو
#شعر_اوجاغی
@SheirOcagi

▫️دیلبره درد-ی دیلیمدن بئله عونوان ائتدیم

دیلبره درد-ی دیلیمدن بئله عونوان ائتدیم
کی غم-ی هیجرده دیل مولکونو ویران ائتدیم.

مومکون اولماز منه وصلین بیلیرم «حشر»ه کیمی
اول سبب مسکنیمی کوه-و بیابان ائتدیم.

عشق سولطانی منیم قتلیمه فرمان گتیریب
ائتمه‌دیم ترک-ی وفا، طاعت-ی فرمان ائتدیم.

سر-ی کویوندا قویوب باشیمی، بیر اوف دئمه‌دیم
سر-ی صیدقیله دیل-و جانیمی قوربان ائتدیم.

یا «طبیب» آدینی ترک ائیله، طبابت ائتمه،
یا منیم دردیمی تاپ، گؤر نییه طوغیان ائتدیم؟!

یوخدو بیر کیمسه منیم دردیمی بیلسین یا رب!
کی من اؤز قانیم ایله دردیمه درمان ائتدیم.

درد-ی هیجرینده گؤزوم یاشی توتوب دونیانی
نوح توفانی کیمی گؤر کی نه توفان ائتدیم!

«ناتوان!» ائتمه‌دی اول سنگدیله ناله‌م اثر
گئجه-گوندوز نه قدر ناله و افغان ائتدیم.‌‌..

#خورشیدبانو_ناتوان
کؤچوردو
#شعر_اوجاغی
@SheirOcagi

‍ ‍ ▫️سؤیله حسین'ه، ائی صبا، کرب‌و‌بلایا گلمه‌سین!
گلسه دوشر بو دشتده درد و بلایا؛ گلمه‌سین!

سؤیله‌گینن گتیرمه‌سین کوفه‌یه نازلی اکبری!
ظولم ایله قانینا باتار طُرّه‌ی مُشکِ عنبری.
بلکه فیرنگه‌تک آپار جمله‌ی آلِ حئیدری،
ذبحِ عظیم اوچون بو گون کوهِ منایا گلمه‌سین!

سؤیله گتیرمه قاسم'ی، قاتیلی ائیله‌ییر شتاب!
تویدا اولور یقین اونون قانینا اللری خضاب.
گؤرمه روا کی شمرِ دون دین ائوین ائیله‌سین خراب!
رحم ائله‌‌سین او زینبِ بختی‌قارایا، گلمه‌سین!

گلمه‌یه یوخدو فورصتیم، قان ایله نامه یازمیشام،
اؤلدوره‌جکدی مسلم'ی کوفه‌ده فرقه‌ی ظولام.
قارداشینین اوزون قولو گؤرمه روا اولا قلم!
باجیلاری آیاق‌یالین، دشتِ بلایا گلمه‌سین!

یئتسه اگر خبر سنه: اؤلدو بو مُسلمِ عقیل،
ابن زیاد نعشیمی گرچی ائدیبدی چوخ ذلیل،
غُسل و حنوط اولمادی، اولدو قناره‌ده قتیل،
ایسته‌میرم، عیالینی قویما، عزایا گلمه‌سین!

بادِ خزان اسر سنین غؤنچه‌صیفت عیالینا،
رحم ائله یاوَریم حسین، قاسمِ خوش‌‌مقالینا!
جانی تصدّق ائیله‌دیم اکبرِ مه‌جمالینا،
ساغ اولا اول امام حسین، غم اُسرایا گلمه‌سین!

سؤیله عم‌اوغلوما منِ بیکسی ائیله‌سین حلال!
عرضیمی بیربه‌بیر ائله، آلِ عبایه شرحِ حال!
ایکی آچیلمامیش گولوم کوفه‌ده زار و دل‌ملال-
قالدیلار؛ اکبر ایله اول قاسم هارایا گلمه‌سین!

حسرتم اول جمالینا، آه چکیم بو سینه‌دن،
کوفه‌ده واردی قاتیلین، گلمه حزین مدینه‌دن!
قویما یئتیم خدیجه‌نی آیری اولا سکینه‌دن،
باشینا ال چک، آغلاییب شور و نوایا گلمه‌سین!

سؤیله اونون آناسینا باشینا قارا باغلاسین،
ایکی بالادان آیریلیب، کون و مکانی داغلاسین!
توتسا عزا، خدیجه‌دن سؤیله کی گیزلی آغلاسین،
بلکه یئتیملیگین توزو ماه لقایا گلمه‌سین!

فاطمه‌نین کنیزی، بو قصّه‌نی ائیله کیم تامام!
بیر-بیره دَیدی مرد و زن، شوره گلیبدی خاص و عام.
نؤوحه ائدر بو «ناتوان»، روز و شب آغلایار مودام،
تاپماسا بیر درِ نجات، دارِ بقایا گلمه‌سین!

#خورشیدبانو_ناتوان
#شعر_اوجاغی
@SheirOcagi