دیالوق

▫️- قوجالیقدا ان پیس شئی نه‌دیر؟
+ بو کی، یادیندادی بیر زامان گنج اولدوغون.

🎬 The Straight Story
1999
#دیوید_لینچ
#شعر_اوجاغی
@SheirOcagi

▫️آذر پوئماسی

ائشسیز بیر یووانین یاشیل قوینوندا،
اؤپردی روحومو بایغین نفس‌لر.
آلداتدی، آه! اوَت، منی آلداتدی،
یالدیزلی* سئوگی‌لر، خائین هوَس‌لر.

وحشی گوللر قارشیمدا دیز چؤکَردی،
قومرولار آرخامجا بویون بوکردی.
هر گون ایچیمده بیر شفق سؤکردی،
اوخشاردی کؤنلومو سئودالی سسلر.

گولومسرکن منه چوبان اولدوزو،
سانیردیم اؤزومو گؤیلرین قیزی.
عؤمرومده دۇیمازکن اینجه بیر سؽزی،
قیردی قانادیمی آلتین قفسلر.

#حسین_جاوید
* اوزرینه قیزیل و یا گوموش سویو وئریلمیش- ظاهیری پارلاقلیق
#شعر_اوجاغی
@SheirOcagi
داوامی وار.

▫️اؤلوم بو دونیانین او اوزونده‌دی،
بو اوزو دونیانین گول‌دو، چیچک‌دی.
اؤلمزلیک، محبّت ذیروه‌سینده‌دی،
محبّت ابدی عؤمور دئمک‌دی.

سیزلاما اوره‌ییم، سن دؤزوملو اول!
بو دونیا هم آجی، هم ده شیرین‌دی.
بیر گؤزله سن آغلا، بیر گؤزونله گول!
بو دونیا عذابا دؤزن‌لرین‌دی.

هیجرانین یوللاری بیتمز، توکنمز،
ووصال یوللارینا قار اله‌نیب‌دیر.
عؤمرونو عشقینه قوربان دئین کس،
خیانت الی‌یله گوللـه‌له‌نیب‌دیر.

#علی‌بالا_حاجی‌زاده
#شعر_اوجاغی
@SheirOcagi

▫️سئوگی اولان یئرده، خوشبخت اولمادان دا یاشاماق اولار.

📚 یئر آلتیندان قئیدلر
#فئودور_داستایئوسکی
#شعر_اوجاغی
@SheirOcagi

▫️بیر شکیلده راحاتلاماغا احتیاجیم وار ایدی، آنجاق ایچیمی تؤکه بیله‌جه‌ییم تک اینسان یئنه اؤزوم ایدیم.

📚 شاهمات
#استفان_زوییگ
#شعر_اوجاغی
@SheirOcagi

▫️دیریلیک تعطیل‌دیر.

گؤیده نه اولدوز وار، نه آی، نه گونش،
باغریمی چاتلادیر قارانلیق گئجه.
یئر اوزو کدرلی، گؤی اوزو توتقون،
گؤره‌سن بو گئجه بیته‌جک نئجه؟

دیری یوخ ائولرده اؤلولر یاتیب،
مزارلیق‌دیر سانکی بو یازیق شهر.
هره اؤز دردلرین گؤموب ایچینه،
بوغورو هامینی جوربه‌جور قهر.

بو گئجه چوخ اوزون، چوخ داریخمالی،
سیرناشیق* دایانیب باخیر گؤزومه.
خولیالار، کابوسلار جانیمی سیخیر،
کئچمه‌ییر، دایانیب، دوروب اوزومه.

بو گئجه تانرینی ایتیریب گؤیلر،
بو سحر یوخلاییب گؤیده ملک‌لر.
تقویمده بیر سؤز وار، بیر صحیفه وار:
دیریلیک تعطیل‌دیر، اؤلوب دیلک‌لر.

#میرحسین_دلداربناب
* سیرتیق، اوزسوز
#شعر_اوجاغی
@SheirOcagi

▫️عؤمرونده بیرجه یول

عؤمرونده بیرجه یول گؤزل اولموسان،
یولوما چیخمیشدین چیینی گۆیۆم'لۆ¹
آی بۇتا سئوگیمه سو وئریب سوسان!
سؤیله‌، سنمیسن‌می او آغ گئییملی؟!

دوزده داغ بیتمیشدی بیر بؤلوک چندن،
گؤی یئرده گزیردی ایتمیش آیینی.
بییان‌‌لی²، کولک‌لی، کئفلی چمندن،
ائوه آپاریردین کهریز³ پایینی.

آی شئهلی یارپاقدا شکلی یویونان،
تایینی تاپمیشدی بو کؤنلو کۆسکۆن.
گۆیۆم'دن اووجوما سوزولن سویلا،
دویغون اوره‌ییمه داممیشدی او گون.

دیلین گول آتیردی دیله‌یی آجا،
چپلیگین اورتایا چپر گریردی.
سنین دوققوز یاشین ائله اورداجا،
منیم اون یئددیمه دوققوز گلیردی.

آی اؤزو یان اؤتوب گؤزله چاغیران!
یئرییَن یولوم دا یئتمیردی سونا.
هرله‌نیب-فیرلانیب کسه جیغیرلا،
قارشینا چیخیردیم اون آددیم سونرا.

روحوم گیروو کیمی، سئوگیم آند کیمی،
قانیما هوپوردو حاللیجا⁴ هیم-جیم.
دولاشیب هؤرویه قالان آت کیمی،
بیر اووسون جیزیغی کئچه بیلمیردیم.

چیچه‌یین پؤرتموشدو، آی اوردا اسَن!
لاله قیزارتمیشدی باشینداکی شال.
بوندان یانیملی‌یدین⁵ اوندا دئیه‌سن،
بوندان چوخ دادلی‌یدی سؤزونده‌کی بال.

نئجه یاراشیردین بییانلی چؤله!
نئجه ایلاهی‌یدین- سئوَندن سوروش!
هر آللاه بنده‌سی دئیه‌سن ائله،
عؤمرونده بیرجه یول گؤزل اولورموش.

#آغا_لاچینلی
¹- میس سهنگ.
²- شیرین‌بیان
³- قنات
⁴- شیشمان- دولغون
⁵- جان‌یاندیران
#شعر_اوجاغی
@SheirOcagi

▫️آذر پوئماسی

...قاپانیب پرده، همن جوشدو پرستش، آلقیش.
رقصه دعوت ائده‌رک چالغی سسی،
یئنیدن پارلادی هر چؤهره‌ده سئودالی باخیش.
یئنیدن دوغدو ساریلماق هوَسی،
یئنیدن دولدو قدح‌لر. هر کس-
آزاجیق آلدی نفس.
صحنه‌دن پارلادی خوش بیر مهتاب،
وئردی هر قلبه جاواب.
جانلی هئیکل‌لر...
او هر سۆسدن اوزاق، صاف، عوریان،
گول بدن‌لر وئرییور روحا قیدا.
موسیقی معبدینین تانریسی دلبر قیز دا،
دوشونور اورتادا حئیران-حئیران.
«بو نه صنعت، نه ظرافت، نه ملاحت!» درکن،
پرده‌لر ائندی همن.
چیخدی هر کس، آزاجیق مؤحتریس¹ اینسان قالدی.
مجلیس آرتیق یئنی بیر رنگ آلدی.

سوزولدو نشئه‌لی گؤزلر،
کؤنوللر آچدی چیچک.
بئش-اون «آمئرکا»لی زنگین ده سونرادان گله‌رک،
ساچیلدی آلتین‌لار.
دمین² عوریان دوران پریلر ده،
سۆس‌لنیب قوندولار بیرَر ماسایا.
هر قدح تاپدی چاره بیر درده،
کیمسه دونیانی آلمییوردو سایا.

نشئه‌دن دؤندو مؤحتریس قافالار،
چیلغین ائشلر چکیلدی لوژالارا.
پرده‌لردن دویولدو قاه‌قاهالار،
داها محرم‌جه ذؤوقه گلدی سیرا.

ساچیب دا اورتایا مغرور آمئرکا ثروتینی،
امَردی عیشوه‌لی آوروپانین بکارتینی.
فقط بو سوسلو تاماشایا قارشی «آذر»ده،
اویاندی نیفرت‌لر.
یاخیندا رنگی سولوق اوچ قادین گلیب درده،
آچیلدی صؤحبت‌لر:...

#حسین_جاوید
¹- اؤزونو قورویان- اؤزونو ساخلایان
²- بیرآز اؤنجه- بایاق
#شعر_اوجاغی
@SheirOcagi
داوامی وار.

دیالوق

▫️- گؤزل بیر گله‌جک اوچون، کئچمیشینی اونودا بیلمزسن!

🎬 Brick Mansions
2014 آمریکا
#کامیل_دولمار
#شعر_اوجاغی
@SheirOcagi

▫️اؤزونه عذاب وئرمک، اؤزونو آلچالتماق بعضاً اینسانا لذّت وئریر.
اؤزوموزو گوناهکار چیخاراندا، باشقا هئچ کسین بیزی گوناهلاندیرماغا حاقّی اولمادیغینی دوشونوروک.

📚 دوریان گرایین پورتره‌سی
#اوسکار_وایلد
#شعر_اوجاغی
@SheirOcagi

▫️آی نیسگیلیم، آی دردیم!
نییه سئومه‌دین منی؟
عؤمرومو سنه وئردیم،
نییه سئومه‌دین منی؟

حسرت قارا یئل اولدو،
گؤز یاشلاریم سئل اولدو
قلبیم قانلی گؤل اولدو
نییه سئومه‌دین منی؟!

سن اومیدیم، پناهیم،
عرشه دیرَندی آهیم.
آخی نه‌یدی گوناهیم؟
نییه سئومه‌دین منی؟

#علی‌بالا_حاجی‌زاده
#شعر_اوجاغی
@SheirOcagi

▫️بعضی توخونوشلار وار، روحونوزلا علاقه قوروب دانیشا بیلیر.

📚 ان
#مسعوده_جاببار
#شعر_اوجاغی
@SheirOcagi

▫️قاباقکی یولداشلارینین هامیسیندان اوزاقلاشمیش، قاباقکی آلیشقانلیق‌لاریندان ال چکمیشدی.
اونون تزه دوستلاری ایسه یوخ ایدی، بونا گؤره ده یالنیز کیتابلارلا قانع اولوردو.

📚 مارتین ایدئن
#جک_لندن
#شعر_اوجاغی
@SheirOcagi

▫️موغاندا، هونرسئور خالقین گئنیش اشتراکی‌یله، «آخماق تولکو» نوماییشینین آچیلیش مراسیمی کئچیریلدی.

یازار: محمد پاشاپور
یؤنتمن‌لر: محمد پاشاپور، واحید فیروزی
آراشدیریجی: همت شهبازی

ا.ی: بو نوماییش، تیر آیی‌نین ۴-جو گونوندن ۷-جی گونونه دک ایجرا اولاجاق.
#شعر_اوجاغی
@SheirOcagi

▫️بیر بیلئت آلاسان، اونا چاتاسان،
باخا گؤزلرینه، دئیه «هارداسان؟»!
سوساسان...سویوقدان تیر-تیر اسه‌سن،
اؤپه‌سن، اؤپه‌سن، سؤزون کسه‌سن!

دؤنه‌سن باشینا، ائله دؤنه‌سن،
قاییتدیغی یئرده، دؤندویو یئرده.
دؤنه‌سن باشینا، ائله دؤنه‌سن،
هئچ بئله دؤنمه‌ییب گونشه یئر ده.

«داریخدیم» دئیه‌سن، گوله سؤزونه،
باغرین چات-چات اولا، دیلین توتولا!
«داریخدیم» دئیه‌سن... بو داریخماقدا،
گؤزلرین حبس اولا، الین توتولا!

چیخا آخیرینا گؤز باخا-باخا،
اوره‌یینه گیره، عاغلیندا قالا!
کیشیسن... آغریدان قیوریلما ایندی!
کیشیسن... آغریما، دؤز باخا-باخا!

دوشه‌سن دونیانین ان پیس گونونه،
خرچنگ طالعینه، ایلان ایلینه!
دیز چؤکوب دئیه‌سن «باغیشلا منی،
باغیشلا، باغیشلا منی الینه!»

غفیل، اوره‌یینین سانجیسی توتا،
اونا نفَسینی قوربان کسه‌سن.
یارا نفس نه‌دی، یارا سس نه‌دی؟!
اومیدی کسه‌سن، الی کسه‌سن.
اومید ده، آرزو دا بیردن چوخ اولا،
بیر سۆرۆ کسه‌سن، کاروان کسه‌سن!

بیر بیلئت آلاسان، یارا چاتاسان،
دئیه‌سن: گلمیشم، دئییم... گئدیرم،
دئییم کی «سئوگیلیم!» دئییم کی «یاریم!»،
بئله ننه‌م دئمیش، «قادام»، باغیشلا!
قانیما قیرمیزی، گؤزومه ایشیق،
روحوما جان وئرن آدام، باغیشلا!

#باهار_زامان‌اووا
#شعر_اوجاغی
@SheirOcagi

▫️یئر اوزونده اینجیدیلمه‌میش آدام تاپیلارمی هئچ؟!
منی او قدر اینجیدیبلر کی، داها اینجیمکدن یورولموشام.
نه ائتمک اولار کی؟! اینسانلار باشقا جور ائده بیلمیرلر.

📚 آنا
#ماکسیم_گورکی
#شعر_اوجاغی
@SheirOcagi

▫️هئچ بیر قانیتی اولمایان شئیلره اینانان‌لاری، قانیت‌لا قانع ائتمک اولماز.

#جیمز_رندی
#شعر_اوجاغی
@SheirOcagi

دیالوق

▫️- منیم یاشیمدا، شاملار دوغوم‌گونو کئکیندن چوخ خرج گؤتورور.

🎬 MR. Nobody
2009
#ژاکو_وان_دورمال
#شعر_اوجاغی
@SheirOcagi

▫️اولسا ایدی اثری ناله و افغانیمیزین
یئنه بیر رحمی گلردی بیزه جانانیمیزین.

آغلادیق صبح آچیلینجا گئجه‌لر کویوندا،
اۆزۆ گولسون بیزه بلکه مهِ تابانیمیزین.

بیزه هجران گونو ظلمت گئجه، گوندوز کیمی‌دیر،
ائله روشن‌دی چراغی، دلِ سوزانیمیزین.

نازنین حوری‌لقالار بورویوب دونیانی،
بوندان آرتیق نه‌یی وار روضه‌ی رضوانیمیزین؟!

خمِ ابرولرین اوخشاتدیق هلاله او مهین،
عوذرو مقبول دئییل عالمده بو نقصانیمیزین.

چکدیک، افسوس، عبث زولفو سیَه‌لر فکرین،
سببی بیر ده بودور حالِ پریشانیمیزین.

بو تفاخر منه «واحید!»، یئتر اؤلسم ده اگر،
من ده بیر شاعری‌یم آزربایجانیمیزین.

#علی‌آقا_واحید
#شعر_اوجاغی
@SheirOcagi

▫️حیاتیمدا ان بؤیوک یانلیشیم «باشقالاری‌یلا ایشیم اولماسا، اونلارین دا منیمله ایشی اولماز» دئیه دوشوندویوم‌ ایدی.

#وودی_آلن
#شعر_اوجاغی
@SheirOcagi

▫️سنی رام ائله‌مک،
اهلی‌لشدیرمک،
و یا ایلکین طبیعتینی دوزَلتمک
الیمدن گلمیر.
بو ایمکانسیز بیر شئی‌.

من هوشومو سنله سینامیشام،
ائله‌جه ده آخماق‌لیغیمی.
سونوندا دا یئنیلمیشم.

#نزار_قبانی
#شعر_اوجاغی
@SheirOcagi