‍ ▫️سندن آیری

گونلر کئچیر آغیر-آغیر،
سندن آیری.
یوللاریما گئجه-گوندوز،
چیسکین-چیسکین کدر یاغیر،
سندن آیری.

قولاغیمدا گولوشونون شلاله‌سی،
سندن آیری.
خیالیمدا تیترک، کؤورک دوداغینین پیاله‌سی،
سندن آیری.

دنیز گلیر دالغا-دالغا،
قیوریم-قیوریم دؤنور گئری،
سنسیز گؤروب ساحیل‌لری.

کولک‌لر ده سیغاللامیر چیچک‌لری،
سندن آیری.
نغمه‌لر ده نغمه‌لنمیر،
سندن آیری.
شرقی‌لر ده لپه‌لنمیر سنسیزلیکده.

بولودلار دا ییرغالانیر حزین-حزین.
حسرتیندن دلی‌لشیب قیرچین‌لاری،
گؤی دنیزین.
قوشلار سوسوب، نغمه‌لنمیر سنسیزلیکده،
شفقلر ده لپه‌لنمیر سنسیزلیکده.
ایندی سؤیله، من نئیله‌ییم؟

#رسول_رضا
#شعر_اوجاغی
@SheirOcagi

دیالوق

▫️- اینسانلاردان نیفرت ائدیرم، اونلاردان قورخورام، بوتون عؤمرومده اونلاردان قورخموشام. ان پیس بلالاری سئودیگیم اینسانلار باشیما گتیردیلر.
📺 Mr. Robot
2015-2019 آمریکا
#شعر_اوجاغی
@SheirOcagi

▫️یالنیز ایکی نفر سنی آنلار:
سنین دورومونو‌ یاشامیش اولان،
سنی چوخ سئون.

#نجیب_محفوظ
#شعر_اوجاغی
@SheirOcagi

▫️حیاتدا هئچ بیر شئی، حیاتین اؤزو قدر طعنه‌لی و پارادوکسیکال دئییل.

#رابرت_دنیرو
#شعر_اوجاغی
@SheirOcagi

▫️...سَییرده‌رک دارغالار،
ساغا-سولا آتینی،
سئچدیلر اهالینین،
یوخسولونو، تاتینی.

«شاه کئچه‌جک یوللاری،
کیرلَتمه‌سینلر» دئیه،
یولجولارلا یاناشی،
قوودولار دال جرگه‌یه.

اوردو تیراَندازلاری،
گیردیلر ائللیک باغا.
چالیشدیلار قالماسین،
آغاجدا بیرجه قارغا.

ساچاقلی خالی‌لارلا،
بزَندی باغلی چارشی.
بایراقلی میناره‌لر،
یوکسلدی گؤیه قارشی.

کلیسا قولّه‌سینده،
چالیندی زوربا چانلار.¹
آز قالدی دئیه‌جکدیم:
معده‌ن ده زوردان آنلار.

دانقیرتی‌یلا اؤتدو چان،
حاضیرلاندی باش کئشیش.
مسجید حیَطینده ده،
عئینی‌یله جانلاندی ایش.

دانیشدی شیشمان خوجا،
اوچ ساعاتدان یوخاری.
حاضیر قیلدی بئیعته،
مؤعمون موسَلمانلاری.

خاچ ایله کئشیش چیخدی،
موصحف ایله شئیخانا.²
چیخدیلار استقبالا،
خاچ‌لا موصحف یان‌-یانا.

اللرینده سور تسبئح،
گوموشلو بوخوردان‌لار.
نازلاناراق سَکیردی،
حاقدان قاچان اینسانلار.

داماغی چاغ، کئفی کؤک،
قارنی توخ تاجیرباشی،
دینگیلده‌ییب گئدیردی،
شئیخ‌لرله یاناشی.

اینسان الیندن یئره،
دوشمزدی ایینه آتسان.
یالنیز کوچه‌لر دئییل،
ائولر، گتیردی اینسان.

دیرماشمیشدی اوشاقلار،
مازغاللی³ دیوارلارا
بویلانیب دوروردولار،
اورکک، ضعیف، آوارا.

دام اوستونده قیزلارین،
سولغون دوداقلاریندا،
بویلانان گلین‌لرین،
ایسلاق یاناقلاریندا،
سولان حوزون یئرینده،
ایندی واردیر بیر ماراق.
نه چیچکلر یئتیریر-
بو قان قوخولو تورپاق!

ساییلیرکن اوّلدن،
بیر اؤلکه‌نین پناهی،
قاریشمیشدی خالقینا،
اؤلکه‌نین مغلوب شاهی.

شاهین بو گون آغیر داش،
آسیلمیشدی بوینوندان.
چیخماییردی اللری،
خلعتینین قوینوندان.

کئچن گونده ائدیرکن،
او، آللاه ایدّعاسی،
ایندی بو سون جلالا،
کسیلدی، دوردو عاصی:

گیر یئره، ائی پادیشاه!
سنین بو بوش باشیندان،
نه‌لر چکدی مملکت!
بیر سوروش گؤز یاشیندان!...

#احمد_جاواد
¹- کیلسه زنگی، ناقوس (Çan)
²- بیزیم شئیخ
³- قالا دیوارلاریندا و... آتیشما اوچون قویولان دئشیک (Mazğal)
#شعر_اوجاغی
@SheirOcagi
داوامی وار.

▫️سن یاخشی بیر آدامسان. اونا گؤره ده سنی چوخ اؤلدوروبلر.

📚 قاریشقانین سو ایچدیگی
#یاشار_کمال
#شعر_اوجاغی
@SheirOcagi

▫️خوشبختلیک آدامین قاباغینا مین دوندا چیخیر. مگر اونو تانیماق قولای‌دیر؟!

📚 قوجا و دنیز
#ارنست_همینگوئی
#شعر_اوجاغی
@SheirOcagi

▫️شعرلیک آدام

خیال قورما، آی‌اوزلوم!
عؤمور ایجازه وئرمز.
ائله «عؤمور» دئمیشکن،
منیم نه عؤمروم وار کی؟!
دؤرد فصیللیک آدامام.
عؤمور قیسا، آرزو چوخ،
من شعر موؤَلّیفی یوخ،
تام شعیرلیک آدامام.

منی سئومه، عزیزیم!
سن بیر عؤمورلوک قادین،
من بیر ایللیک آدامام.

#صدام_لاچین
#شعر_اوجاغی
@SheirOcagi

▫️گئده بیلمه‌ین آدام

هارا چیخیب گئده‌سن؟!
گئتمه‌یه یئر ده یوخدو.
ویداع ائتمه‌یه آدام،
سیخماغا ال ده یوخدو.

داها یازماق دا اولمور،
بو بویدا تنهالیغی.
بیر آز جان سیخینتیسی،
بیر آز نیگارانچیلیق.

اوره‌ییم بوش، الیم بوش،
آغلاییرام، سوسورام.
قاپی زنگی چالینیر،
پنجره‌یه قاچیرام.

داها داریخماق اولمور،
آدام کیمی داریخماق.
مای'ین تام اورتاسیندا،
اوشویورم، دونورام.

سیخیر منگنه‌سینده،
منی سویوق دیوارلار.
بو قاپینین او تایی،
گونَشلی‌دیر، ایستی‌دیر.

هارداسا چوخ اوزاقدا،
اؤله‌زییَن اومید وار.
ان بؤیوک فاجیعه‌دیر،
کیشی اومیدسیزلیگی.

سن سونونجو اومیدسن،
بو یادلار آراسیندا.
بیرجه دفعه «گئتمه!» دئ،
قالیم بیرگه یاشلاناق!
بیرجه دفعه دیلیندن،
گؤزل سسلَنسین آدیم!

یاخشی خاطیرلاییرام،
سونونجو گئدیشیمی:
پئنجه‌ییمی گؤتوردوم،
گئتدیم و قاییتمادیم.

باخ! گئتسم، بو کوچه‌لر،
سنی داریخدیراجاق.

#جلیل_جاوانشیر
#شعر_اوجاغی
@SheirOcagi

▫️بیز بؤیوک یارادانین قارشیسینداکی بورجوموزو، اونون یاراتدیقلارینا اؤده‌مه‌لی‌ییک.

#ابو_تورخان
#شعر_اوجاغی
@SheirOcagi

🔹تحکییه ادبی درنه‌یی(431-جو جلسه)
🔹حئکایه: تاکسی‌ده‌کی قان ایچن– هاروکی موراکامی
🔹ژاپون نثری
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 4 مهرماه 1402
🔹ساعت:17-19:30
@tahkie
Butajournal.com
#ادبییات #آذربایجان_تورکجه‌سی #داستان #مودئرن_نثر #تحکییه #اورمو # هاروکی_موراکامی #ژاپون_نثری #حئکایه #

▫️مگر اونلار بیزیم‌ ائوده شعردن باشقا دا بیر شئی تاپاجاقلارینا اومیدلی‌یدیلر؟
دوغرودور، شعر اؤزو ائله ان‌ گوجلو سیلاحدی، آما هر شئیدن گؤروندویو کیمی پولیسلر بونو آنلامیردیلار.

📚 «پایلو نئرودا»یلا یاشانان عؤمور
#ماتیلدا_اوروتیا
#شعر_اوجاغی
@SheirOcagi

▫️...آچیلدی بایراقلار، چالیندی بورو*
فلک گؤرمه‌میشدی بو وورهاوورو.

توز عرشه دایاندی، گؤی دومانلاندی،
تورپاق شاها قالخدی، توز دا جانلاندی.

قیوریلا-قیوریلا بوز بیر اژدها،
گلیردی سالاما، پوزولموش شاها.

بؤیودو، جانلاندی دونوق نؤقطه‌لر،
- اونلار آتلی‌لاردی، نؤقطه نه گزر؟!

بیر آز یاخشی دینله، هئی قیی'ا بیر باخ!
دؤردنالا گلیرلر آتلار چاپاراق.

دوشمنین ده اولسا، باخ، بیر آز اَیلن!
اؤزلری ایگیددیر، آتلاری کؤهلَن.

اولونجا کئفین کؤک، یوللار دا هموار،
قیزیشمیش آتلاردا باشقا لذّت وار...

او گون دوغرودان دا جوشموشدو آتلار،
اوچاراق یئتیشدی قیرخ، اللی چاپار.

یاناشیب ادب‌له ائل قارغامیشا،
دئدیلر: یولدادیر گردونه‌ی شاه.

قاچدی مغلوب شاهین بتی-بنیزی،
جوشدو، دالغالاندی اینسان دنیزی.

ایستیدن باییلا، ددردن بوغولا،
بیردن بوتون باشلار چئوریلدی یولا.

گؤزلر قیییلاراق قاشلار چاتیلدی،
گله‌نین بورجونده توپلار آتیلدی.

بزَکلی قوربانلار سریلدی یئره،
پارلادی بیچاقلار تک بیرجه کره.

اوّل بیر سیزیلتی، سونرا تپینمه،
- «دینمه، یازیق حئیوان، اؤلسن ده دینمه!
چئوریلمیش گؤزونله یوللارا بیر باخ!
بو گلن گردونه، اوغورسوز قوناق،
حئیوان قانی ایچر، بیلیرسن‌می؟ قان،
ایچمه‌یه قان ایستر، اولماسا اینسان.
باخ، بئله آلقیشلا، چیرپینیب دور دا!
سنین ده پایین وار بو وورهاووردا.
بئله بیر جلالی گؤرمه‌میسن سن.
قاباقدا قیرآتین اوستونده گلن،
او سئیرک ساققاللی، بوخاغی ساللاق،
یئددی توغ آردینجا گلن جلال‌لا،
او قانلی شرابدان دویمایان خاقان،
سندن قان ایسته‌ییر، بیلیرسن‌می؟ قان»...

#احمد_جاواد
* نفَسله چالینان، گورولتولو سس چیخاران موسیقی آلَتی (Boru)
#شعر_اوجاغی
@SheirOcagi
داوامی وار.

▫️سئودیگین قادینا پاپاتیا وئرمه‌لیسن! حتّی وئرمه‌سن ده اولار.
«بو تورپاقلاردا بیر یئرلرده سنین اوچون یاشایان پاپاتیا چیچک‌لری‌وار. باخ، او پاپاتیالار یئرینده نئجه گؤزل‌سه، سن ده منیم یانیمدا ائله گؤزلسن. بیزی قوپارماسینلار!» دئسن یئتر.

📚 صاباح یوخوم
#احمد_باتمان
#شعر_اوجاغی
@SheirOcagi

▫️دورولا بیلمیر.

زامان‌ بولاندیریر احوالیمیزی،
آخشامی صافلاشیب دانی دورولمور.
مین دورو چئشمه‌نین گؤزلرینه باخ!
یئنه ده آدامین قانی دورولمور.

بیر اوچان سارای‌دی هر سینان کؤنول،
هیمیندن چؤکورسه، دورولا بیلمیر.
بیر آنین ایچینده بولانان کؤنول،
بیر ایلین ایچینده دورولا بیلمیر.

#زلیمخان_یعقوب
#شعر_اوجاغی
@SheirOcagi

▫️اونودولمازلار شکیل‌لر

🔺اوتورانلار (سولدان ساغا)

1. جلیل مممدقولوزاده
2. حسین جاوید
3. ا.‌حاق‌وئردی‌‌اف
4.‌ جاببار افندی‌زاده
5. س. ثانی آخونداف
6. ایبراهیم امین‌بَی‌لی
7. حاجی کریم سانی‌لی

🔺آیاق اوسته دورانلار (سولدان ساغا)

1. خلیل ایبراهیم
2. جعفر جاببارلی
3. سید حسین
4. سولئیمان روستم
5. میکاییل موشفیق
6. عابدوللاه شاییق
7. احمد جاواد
8. محمّد راحیم

#شعر_اوجاغی
@SheirOcagi

▫️بیز نورمالدا اؤزوموزو یوخ، باشقالارینی گؤروروک.‌ اؤزونو گؤرمه‌یین یولو ایسه، اؤزونه باشقالارین گؤزو‌ ایله باخماق‌دیر.

#ابو_تورخان
#شعر_اوجاغی
@SheirOcagi

▫️«پیرایه» اوچون یازیلمیش شعرلر 20

بو گئج واخت،
بو سون باهار گئجه‌سینده،
کلمه‌لرین‌له دولویام؛
زامان کیمی، مادّه کیمی ابدی،
گؤز کیمی چیپلاق،
ال کیمی آغیر،
و اولدوزلار کیمی پیریل-پیریل کلمه‌لر.
کلمه‌لرین گلدیلر منه،
اوره‌ییندن، بئینیندن، اتیندن‌ ایدیلر.
کلمه‌لرین گتیردیلر سنی.
اونلار: آنا،
اونلار: قادین
و یولداش اولان...
محزون‌ ایدیلار، آجی‌یدیلار،
سئوینجلی، اومیدلی،
قهرمان‌ ایدیلار؛
کلمه‌لرین، اینسان ایدیلار...

#ناظیم_حیکمت
#شعر_اوجاغی
@SheirOcagi

▫️بیلیردی کی، شرطلر دَییشنده اینسانلار دا دییشیر.

📚 حوضور
#احمد_حمدی_تان‌پینار
#شعر_اوجاغی
@SheirOcagi

▫️اونلار اوچون نه موسیقی وار ایدی، نه فیلم مدنیّتی، نه رسّاملیق، نه کیتاب، نه فلسفه.
او بیلیردی کی، اطرافینداکیلاری آنجاق پول، یئمک، قادین و بینالار ماراقلاندیریر. پوللارینا آنجاق شادلیق سارایلاری تیکدیریب موغنّی‌لره باهالی هدیّه‌لر ائدیردیلر. آمّا نه بیر کیتابین چاپیندا، نه بیر تئاترین تعمیرینده، نه بیر مکتبین آچیلیشیندا بو پزه‌ونگ‌لردن* بیر شئی گؤزلمک اولمازدی.

📚 ملک
#قاراقان
* زوربا آدام (Pəzəvəng)
#شعر_اوجاغی
@SheirOcagi

▫️...نه‌دن‌سه قاتیللری،
بوغماییرمیش گؤز یاشی.
گلدی اوغورسوز خاقان،
اَییلدی خالقین باشی.

باخاراق آزغین-آزغین،
قان دامان گؤزلری‌یله.
اورَکدن مغلوب شاهین،
اَیلندی سؤزلری‌یله.

قالخدی باشلار سجده‌دن،
باشلاندی چیرکین حئساب.
دوداقلار اوزَنگی‌ده،¹
اؤپولدو‌ چاخچور²، جوراب.

سامور کورکون اته‌یی،
اؤپولدوکجه مارچامارچ،
آیین'ی تقدیس ائتدی،
موصحف ایله قیزیل خاچ.

نه فیتوالار چیخاردی،
آج‌گؤزلو، یالتاق خوجا!
کئشیش ده خاچ چئویردی،
یالان قوسدو بوللوجا.

دین بیر چک‌اوزاندی‌سا،
هم اوزانیر، بوکولور،
هم قاینار قطران اولور،
بوغازلارا تؤکولور.

سئحرلی بیر حالی وار،
حاق چیخاریر یالاندان.
یئنی بیر فیتوا تاپیر،
هر اولاندان-قالاندان.

قالمادی دال جرگه‌ده،
بوردا دا تاجیرباشی.
کئشیش-خوجا بیر یئرده،
دورموشدولار یاناشی.

«اصلی»سی گلدی سانکی،
باغری یانیق «کرَم»ین.
ائدیلن دوعالارا،
اورکدن دئدی «آمین!»

آغ‌ساققالی بیر قوجا،
بیر احتشام اسیری،
اوغورسوز حؤکمدارین،
بئش توغلو باش وزیری،
یئتیردی مغلوب شاها،
بویروغونو خاقانین:

«مالین، مولکون بیزیم‌دیر،
آماندا آنجاق جانین.
قارشی چیخدین خاقانا،
توتمادی، سؤندو باختین.
قیلینج چالدیق، قازاندیق،
بیزیم‌دیر تاج و تاختین.»

«یاشاسین!» باغیرتیسی،
قوپونجا هر بیر یاندان،
حرکت امری وئردی،
للک‌لی باش کوماندان.

دال قیلینج رکابدارلار،
یاریب کئچدی ایره‌لی.
یول آچدی گردونه‌یه،
باغریشاراق سرسری.

بئله‌جه اسکی پارچا،
بیر چیرتمایلا آتیلدی.
بوتون بو اؤلکه خالقی،
چوخ اوجوزجا ساتیلدی.

قالدی بوتون کناردا،
جان وئرن‌لر، اؤلن‌لر.
ساتیشی تصدیق ائتدی،
توخ قارین‌لا گولن‌لر...

#احمد_جاواد
¹- آتا مینمک اوچون یهَردن ساللانان دمیر حالقالاردان هر بیری، رکاب
²- کئچمیشده بیر نؤوع شالوار
#شعر_اوجاغی
@SheirOcagi
داوامی وار.