▫️بؤیوک آداملار کیچیک ایشلرده چوخ واخت باجاریقسیز اولورلار.

#ابو_تورخان
#شعر_اوجاغی
@SheirOcagi

دیالوق

▫️- بو قدر صابونا رئکلام دوزَلدیرلر، نییه کیمسه باریشی رئکلام ائتمیر؟!

🎬 Hiroshima Mon Amour
1959 فرانسه
#آلن_رنه
#شعر_اوجاغی
@SheirOcagi

▫️...ائله بیل اولمامیشدی،
دونَنکی کئشمکئش ده.
چیخدی گولَش اوزویله،
او بختوَر گونش ده.

«منیم ده قانلی، قانسیز
جیلوه‌لریم وار» دئیه،
چیخدی درین گؤیلره،
سیچرایاراق اوزمه‌یه.

یوکسلدیکجه گؤیلرین،
ساکیت گزن سولطانی،
قارانلیغین قالمادی،
دوداقلاریندا قانی.

چاشدیغیندان اوّلجه،
بولودلار دا قیزاردی.
دونن بولودلارین دا،
چوخ دؤنوک رنگی واردی.

بیر آز سونرا اونلار دا،
اکیلدیلر، گئتدیلر.
یئرده قالان بولودلار،
ماتمی ترک ائتدیلر.

«کیمدیر بو سولطان؟» دئیه،
سوردولار بیر-بیریندن.
ائشیدینجه آدینی،
آه چکدیلر دریندن.

آغاردیلار قورخودان،
چکیلدیلر داغلارا.
سیرمالی بختوَر ده،
قوناق گلدی باغلارا.

بیلمیرم گؤردونوزمو،
صاباح واختی چیچک‌لر،
چیخینجا چاشقین گونش،
نه دادلی ماهنی سؤیلر؟!

بو قیلدیقسیز² گونشین،
سئحر وار باخیشیندا.
بیر دفعه گؤروندومو،
گؤز یاشی آخیشیندا.

چیچکلی کیرپیگینده،
یاشدان اثر قالماییر.
قاش‌قاباقلی بولوددان،
بیر سالام دا آلماییر.

نشه‌دن حاللانیرلار،
ایچیرلر ذؤوقو اینجه.
چیچکلرده داد واردیر،
تا قارانلیق گلینجه.

- عؤموردن‌دیر بیر گون ده،
ائی چیچک، سئوین، هایدی!
+ یا باتمایایدی گونش،
یا چیچک اولمایایدی!

- بیر ده کی، بو حیاتدا،
گونش‌می یالنیز باتان؟
آز قالدی دئیه‌جکدیم:
بوتون حیات بیر یالان.

+ حیات یالان اولسایدی،
بیر جوشقون چیچکلر نه؟
یوخ، بیر گونلوک ده اولسا،
حیات حیات‌دیر یئنه.

دونن بیر نیشان یوخکن،
باغدا سسدن، سمیردن،
ائنینجه داغدان گونش،
قوشلار دا جوشدو بیردن.

قاریشدی قاققیلتی‌لار،
بوللور سسلی جهجهه.
یوکسَلدی هر بوداقدان،
بیر نازنین قهقهه.

سانکی بیردن چالیندی،
قومروو²، کامان، نای‌لا نئی.
دولدو شیرین سسلرله،
کؤلگه‌لی باغ، بوز گونئی.

مگر بعضاً حیات‌لا،
اؤلوم قارداش اولورموش‌.
اوچوشوردو یاناشی،
گؤیرچین‌له قیزیل‌قوش.

قورخمادان اوزه چیخدی،
ائلدن قاچان قیرقووول.
یوموشالدی اورک‌لر،
قالمادی شئیطان، چوغول.

ظالیمین بختی اوستون،
مظلوملارین آهیندان‌.
قوشلار نه گؤزله‌ییردی،
اؤلوم پادیشاهیندان؟

بوتون شهر سیلکینیب
اثر قویمادی پاسدان.
دونَنکی ماتم هانی؟
دوغرودان چیخدی یاسدان.

دوشمن شاهین گلیشی،
قانونی بایرام اولدو.
بیر چوخ دردلی اورک‌لر،
قانلی سئوینج‌له دولدو...

#احمد_جاواد
¹- اینام، اعتقاد (Qıldıq)
²- گیرده زنگ، زینقیروو (Qumrov)
#شعر_اوجاغی
@SheirOcagi
داوامی وار.

▫️بؤیوک هدفه چاتا بیلمک اوچون، کیچیک هدفلردن واز کئچمه‌یی باجارماق لازیمدیر.

#ابو_تورخان
#شعر_اوجاغی
@SheirOcagi

▫️دیک‌دابان

آجی حقیقتلر قورخودور دئیه،
اینسان عادت ائدیر خیاللار قورا‌.
کاش عاشق اولدوغوم رنگلی گؤزلرین،
آغ-قارا دونیامی ایشیقلاندیرا!

کاش کی سهولریمی سایماق یئرینه،
چوخ یوخ، بیرجه دفعه منی سایایدین.
یئره قویمادیغین تئلئفون کیمی،
منی ده یانیندان آییرمایایدین.

سنی قیسقانیرام اَیین-باشینا،
«یاراشیر» دئمزدیم سئوینمه‌سه‌یدین.
-منی پالتارین‌تک سئو- ایسته‌یردیم،
هر هفته تزه‌سین گئیینمه‌سه‌یدین.

«منی اینجیدیرسن، یورورسان» دئمه!
ایذن وئر قلبینه گیریم بو سفر.
سنه یوک اولمارام حیاتین بویو،
چیینیندن آسیلان چانتالار قدر.

هله هوندوردابان آیاق‌قابلاری،
ائله سئویرسن کی، اوتانیر عؤمروم.
او سنی بیر قاریش اوزون گؤستریر،
من سنی گؤرنده اوزانیر عؤمروم.

#صدام_لاچین
#شعر_اوجاغی
@SheirOcagi

دیالوق

▫️- بیر شاه‌لا بیر کؤله بیر-بیرینه بنزه‌ییرلر. هر ایکیسینین گؤرَوی خالقا کؤله‌لیک ائتمک‌دیر.

📺 Vikings
2013- 2020 کانادا، ایرلند
#شعر_اوجاغی
@SheirOcagi

▫️آمان، پاییز!

آمان، پاییز، او یاندان کئچ!
من او مقامدا دئییلم،
تبده، ایلهامدا دئییلم.
بیر کپنک هوسینده،
بو چمنین یاشیلی‌یلا،
مزه‌لنمک ایسته‌ییردیم.
بیر گئجیکمیش چیچک ایله،
تزه‌لنمک ایسته‌ییردیم.
دئمه دردی‌سریم یوخدو،
اوره‌ییمده یئریم یوخدو!
بو پاییزلا دانیشماغا،
چوخ دوشونوب داشینماغا،
ایندی منده یوخدو هوس.

آمان پاییز، او یاندان کئچ!
یارپاغین‌لا او یاندا سول!
کوله‌یینله او یاندا اس!
بو دفعه یوخ، بو دفعه یوخ،
بو دفعه دیندیرمه منی!
اوره‌ییمین سینیغینا-
دردینه ائندیرمه منی!
درینه ائندیرمه منی!
کؤنول دویوب گؤز باخسا دا،
ائه، بئله‌ییک بیز یوخسا دا.
قبریستانا باخیب کئچیب
سونرا دئییب-گولن کیمی،
بیر یالقیزین گؤز یاشینی،
اؤزگه‌نینکی بیلن کیمی،
بیر ناکامین اؤلومونه،
بیرجه آن وایسیماق کیمی،
بیگانه‌جه بیر حالدایام،
باشیم سویوق، کؤنلوم قیروو.

آمان پاییز، او یاندان کئچ!
قوشلارینی او یاندا قوو!
یووالاری او یاندا سؤک!
گؤز یاشینی او یاندا تؤک!
الیم چینار یارپاغی‌دی،
اللریم سولماق ایسته‌میر.
بیر سرسری آغ بولودام،
گؤزلریم دولماق ایسته‌میر.
او یانا دؤندر اوزونو!
حئییف‌دی قیزیل بدنین،
قوی قیمتدن دوشمه‌یه‌سن،
زر اندامدان دوشمه‌ین‌سن!
بو دونیانی بیلیب، دویوب
آدامی اینسان ائله‌ین،
او مقامدان دوشمه‌یه‌سن!
بو دفعه یوخ، بو دفعه یوخ،
بو دفعه دیندیرمه منی!
اوره‌ییمین سیناغینا،
دردینه ائندیرمه منی!

آمان پاییز، او یاندان کئچ!
یارپاغین‌لا او یاندا سول!
کوله‌یینله او یاندا اس!
قیزیل دونو او یاندا بیچ!
یاشیل تئلی او یاندا کس!

#موسی_یعقوب
#شعر_اوجاغی
@SheirOcagi

▫️سئو منی،
بزک‌سیز، روتوش‌سوز، اؤرتوسوز!
منی اولدوغوم شکیلده،
ساده و ایچدن سئو!
چیچک‌لری چؤلده،
اولدوزلاری گؤیده سئودیگین کیمی!

#نزار_قبانی
#شعر_اوجاغی
@SheirOcagi

▫️سنی منه یاساقلاییرلار.
و قورخمورلار،
سونوندا گؤی‌اوزونون دوزَنینی قاتاجاق اولان،
دؤنَنجه‌سیز* دربه‌در اولدوزدان.

#منوچهر_آتشی
* مدار (Dönəncə)
#شعر_اوجاغی
@SheirOcagi

▫️...غریبه شئی‌دیر اینسان:
آل الیندن جانینی،
ایسته‌ییرسن اوووجلا،
هورتلات آخان قانینی!
قوپاریب از قلبینی،
اَیلن چیرپینماسی‌یلا،
سوروکله‌ییب یئرلرده،
بئینینین یاراسی‌یلا!

هئچ باخما ایسته‌ییرسن-
صافلیغا... گوناها اَس!
بیر ییرتیجی جلّاد اول،
دوغرا پارچا-پارچا، کس!

قادین‌سا، توت بوغ اونون،
قان قوسان فریادینی!
قوی چیخارسین یادیندان،
سئودیگینین آدینی!

قیزسا، آتین دؤشونده،
لهلَت گون قیزماریندا!
گلین‌سه حرّاجا قوی،
اسیرلر بازاریندا،
سونرا چکیل، اوزاقدان،
مغرور باخیشلا بیر باخ!
گؤره‌جکسن اؤلن‌لر،
بالدیریندا باغیرساق،
«سنین قانلی الینده،
بیتمز قووّت وار» دئیه،
حاضیردیر باغیشلاییب
دادسیز-دادسیز گولمه‌یه.

بو یوخسول اینسانلاری،
قیردیردین‌می بیر کره،
قهرمان اولاجاقسان،
دوشه‌جکسن دیل‌لره...

کئچمیشده جوشماییردی،
مظلومون قانلی کینی.
او زامانلار گوج ایدی،
خالقین یگانه دینی...

#احمد_جاواد
#شعر_اوجاغی
@SheirOcagi
داوامی وار.

▫️اویانماق

بیر شهر گؤرورم یوخولاریمدا
قارانلیق کوچه‌لرینده شوشه‌سی آچیق بوراخیلمیش بوش ماشینلار
دیوارلاریندا قان اسپریسی ایله یازیلمیش غضبلر
پولیسلرین ایشلری یوخدور غضبچی‌لرله
اسپری ساتانلاری آختاریرلار
و میللتین قانینی سوْروب میللته باهاسینا ساتان اسپری‌چی‌لر
اللرینده تاپانچا، چییینلرینده پارلایاراق اولدوزلار
کوچه‌لرده ایت کیمی فیرلانیب آختاریرلار جاناوارلاری...

بیر شهر گؤرورم یوخولاریمدا
مجنون دَییشیب جنسی‍ّتینی
آه لئیلا، لئیلا، لایلایلا، لایلا...
فرهادی وازئکتومییا ائله‌تدیریب خسرو
شیرین کولونگ گؤتوروب قازیر بیستونو
لئیلی نجدین دوزلرینده مجنونلاشمیر، لئزبیین‌له‌شیر.

کوراوغلو دؤرد نالا چاپسا دا آتینی چنلی‌بئلده
نیگارین گؤزلریندن شهوت یاغیر مئترو ایستانسییاسیندا
ساغ الی‌له آچیر گؤزونو ایللردیر تاریخده‌کی حیله‌کار کور حسن
سول الینده اسپری، دیوارا طرف قاچیر...

آغا محمدی کور ائله‌ییر اوتوز مین ساری‌کیرمانا بنزر کیرمانلیلار
محمودو¹ آختالاییر ساغ یانیندا دایانمیش آیاز²
بابکین قوللارینی دئییل، ساچینی وورورلار گولوستان ساراییندا
کئچل حمزه شوشه‌سی آچیق بوش ماشینلاری اوغورلاییر کوچه‌ده
باشینا توک اکدیرمک اوچون.
صاباح احمدین³ باشینا پاپاق کئچیرده‌جک‌لر، تاج عوضینه.

بیر شهر گؤرورم یوخولاریمدا
زنجیر کیمی بیر-بیرینه باغلانمیش ساوادلیلار
باخمادان کئچیرلر دردین اؤنوندن.
صادق⁴ گازی آچیب انتحار ائله‌ییر شهری
رامیزین⁵ چییینینده چانتاسی،
اؤزونه بیر یئنی وطن دوزلتمه‌یه گئدیر.
غلامرضانی⁶ خسته‌خانادان قاچیردیر آروز اوغلو باسات
لوایی⁷ شیکاقودان بویلانیر خوجانین رنگ‌به‌رنگ داغلارینا.
آینالار زامانین⁸ قیریشمیش آلنینی هدفه آلیر
دومانین⁹ عینه‌یینی اوغورلاییر کافه‌ده‌کی دوستلاری
گؤردوکلرینی گؤره بیلمه‌سین.
یوخ، عذرلو سایین عزیز شَهَرداشلار
یازا بیلمه‌سین گؤردوکلرینی.
چهرایی رنگلی آداملارین طرفینده دایانیر چالغین¹⁰
هر ایل آپرئلده، شهریمین پاریس آدلی خیابانیندا
گولله‌له‌ییرلر نارگیسین¹¹ ایچینده‌کی مارلین مونرونو...
واریثین¹² گؤندردییی مکتوبون ائرمنی‌لر الینده یاندیریلدیغینین خبرینی آلیرام پوست اداره‌سیندن.
بلدیه باشقانی «شهرین گؤزللییی» وئریلیشیندن سونرا
گئجه‌لر ماشیندان دوشوب دیوارلارا ایشه‌ییر
غضبلر آخیر سودویه قاریشمیش قانلی دیوارلاردا
و صاباحدان تاریخی ترسینه اوخویاجاق مکتب اوشاقلاری
خیاباندان کئچرکن...

- عزیز ایزله‌ییجیلر، حؤرمتلی بلدیه باشقانینین حالی چوخ پیس ایدی، نؤوبتی یوخولارینیزا قدر، ساغ قالین!

#علی_چاغلا

¹ محمود غزنوی
² ملیک آیاز
³ احمد شاه قاجار
⁴ صادق هدایت
⁵ رامیز روشن
⁶ غلامرضا امانی
⁷ محمدرضا لوایی
⁸ زامان پاشازاده
⁹ دومان اردم
¹⁰ محمد چالغین
¹¹ نرگیز اسماعیل‌اووا
¹² واریث یولچویئو

@SheirOcagi

▫️بعضا بؤیوک حیات اوچون یارانمیش اینسانلارین عؤمرو کیچیک و داریخدیریجی صحنه‌لرده کئچیر. بو حالدا اونلار اؤز معنوی احتیاجلارینی آنجاق ادبی قهرمانلارین حیاتیندا تاپا بیلیرلر.

#ابو_تورخان
#شعر_اوجاغی
@SheirOcagi

دیالوق

▫️- خوشبختلیک لووغالانماق‌لا دئییل، ایفاده ساتماق‌لا دئییل، دئمک‌له دئییل. خوشبختلیک بیر دویغودور، اونو حیسّ ائتدیگین زامان خوشبختسن.

🎬 طعم گیلاس۱۳۷۶
#عباس_کیارستمی
#شعر_اوجاغی
@SheirOcagi

▫️عطیر چیچه‌یینده آرتان قوخو،
دنیزلرده اوغولتولار،
و ایشده دولغون بولودلاری و عاغیللی تورپاغی‌یلا سون‌باهار...

سئوگیلیم!
یاش، کمالینا چاتدی.
منه ائله گلیر کی،
بلکه مین ایللیک بیر عؤمرون ماجراسی کئچدی باشیمیزدان.
آمّا بیز هله ده،
گونشین آلتیندا ال-اله، یالین‌آیاق قاچان،
حئیران‌گؤزلو اوشاق‌لاریق...

#ناظیم_حیکمت
#شعر_اوجاغی
@SheirOcagi

▫️ایل‌لردیر کی،
بئینیم‌له قلبیمین آراسیندا قان داعواسی وار؛
بیری وورولار،
بيرى زیندانا دوشر.

#سئور_شهابى
@SheirOcagi

▫️بورج سو، دَییرمان دولاندیرماز!

#آتا_آنالار_سؤزو
@SheirOcagi

"سیز ده بیر اونودولموش آتا-آنا سؤزونو آرتیرین👇"

▫️یاشادیغیم سوره همیشه سئوینجلی اولماغیما گرک یوخ.
گرکلی اولان، هر حالدا شرفلی یاشاماغیم‌دیر.

#امانوئل_کانت
#شعر_اوجاغی
@SheirOcagi

▫️من سنه سورگون اولدوغوم زامان، نئجه دئپرئس اولا بیله‌رم؟!
اینسانین، سئودیگی قادینا سورگون اولماسیندان داها گؤزل نه اولا بیلر کی؟!

#نزار_قبانی
#شعر_اوجاغی
@SheirOcagi

▫️بؤیوک ایش، کیچیک ایشلرین توپلانماسیندان یارانمیر. بؤیوک ایش اوچون بؤیوک ایدئولوژی‌لر لازیمدیر.

#ابو_تورخان
#شعر_اوجاغی
@SheirOcagi

▫️ابراهیم کیمی

کاش سنی ابراهیم کیمی،
یاندیرالار، یانمایاسان!
عزرائیل گیره یوخونا،
یاتاسان، اویانمایاسان.

بیر دوداقدا آه اولاسان،
گاه اؤله‌سن، گاه اولاسان.
یوسوف کیمی شاه اولاسان،
غوللوغونو دانمایاسان.

اینسان، نه گئج اویانمیسان؟!
هئچ اؤزوندن اوتانمیسان؟
موردار سودان یارانمیسان،
اؤزونو پاک سانمایاسان!

آللاه سئور عار ائده‌نی،
گوناهینی خوار ائده‌نی.
نییه سنی وار ائده‌نی،
بیرجه دفعه آنمایاسان؟

سو وئریب، سن ده ایچمیسن،
او سالان یولدان کئچمیسن.
قانمازلیغی سن سئچمیسن،
مومکون دئییل قانمایاسان.

بسدی اولدون هاییل-ماییل!
اینسان اول، اینساندان ساییل!
آییل، اینسان‌اوغلو، آییل!
آییل کی، یوبانمایاسان.

#صدام_لاچین
#شعر_اوجاغی
@SheirOcagi

روباعی

▫️تهدید ایله کئچدی روزگار، ای واعظ!
فوت اولدو شرابِ وصلِ یار، ای واعظ!
گر کوثر و حور ایسه غرض، وئرمه عذاب،
نه تَرک بویور، نه انتظار، ای واعظ!

#حکیم_ملامحمد_فضولی
#شعر_اوجاغی
@SheirOcagi