▫️سندن باهاسی یوخدو.

اورکلره گئدن یول،
گؤزل‌لیگین یولودو
بو دونیا باشدان-باشا،
گؤزللیگین یولودو.
سندن گؤزلی یوخدو.

هئچ بیر گولون، چیچه‌یین،
دونیادا سنین قدر،
عطری یوخ، رنگی یوخدو.
قشنگ اولانلار نه چوخ!
سندن قشنگی یوخدو.

هئچ بیر باغین، باغچانین،
حیاتدا سنین قدر،
گولو، غؤنچه‌سی یوخدو.
نه چوخدو بو دونیادا،
اینجه بئللی گؤزللر!
سندن اینجه‌سی یوخدو.

نه چوخدو یئر اوزونده،
ثروت دولو سینه‌لر؛
ایچی داش-قاش‌لا دولو،
عوَضسیز خزینه‌لر!
یوخدو، سندن وارلیسی،
سندن باهاسی یوخدو.
نییه‌سینی سوروشما!
داها نییه‌سی یوخدو،
داها داهاسی یوخدو.

#زلیمخان_یعقوب
#شعر_اوجاغی
@SheirOcagi

▫️سئویرم.

سفره چیخماغی سئویرم،
«کرم» کیمی، یانیمدا بیر
«للـه‌»م اولا!
اوزاق یولا کؤرپو سالا،
یول یولداشیم، کؤنول دوستوم!
بیر آیریجا عالم اولا!

جیدیرا چیخماغی سئویرم،
آتیم تکجه آت اولمایا،
اوره‌یینده چات اولمایا،
یاریشلاردا مات اولمایا،
سئوگی دولو بیر آت اولا!
قانادلاری اریمه‌میش
قیرات اولا، دورات اولا!

یاشاماغی سئویرم،
عؤمروم-گونوم
دولو گله، دولو کئچه!
بیر عؤمورده مین‌بیر ایللیک
یولو کئچه!

خسته‌لنمه‌یی سئویرم،
منی خسته‌لندیرن،
ایلاهی بیر گؤزل اولا!
تپه-دیرناق ایشیق ساچا،
ال کؤز اولا، کؤز ال اولا!

گؤزل اؤلومو سئویرم،
عزرائیلیم نه درد اولا،
نه آه اولا!
گده-گوده اؤلدورمه‌یه،
اؤلدورنیم آللاه اولا!

#زلیمخان_یعقوب
#شعر_اوجاغی
@SheirOcagi

▫️اؤلوم-دیریم

بوتون وظیفه‌لی‌لر آتالی،
بوتون شؤهرتلی‌لر خاطالی،
بوتون سئوگیلی‌لر بوتالی.*
مین دفعه اؤلور-دیریلیر،
اینسان ساغ-سالامات گلیب
بیر آرزویا چاتالی.

#زلیمخان_یعقوب
* غؤنچه (Buta)
#شعر_اوجاغی
@SheirOcagi

▫️قوجانین شیکایتی

جاوانلیق‌لا قوجالیق،
او گئتمه‌میش بو گلدی.
گؤزلریم یالان اولدو،
جییَریمدن سو گلدی.

دوچار اولدوم ناشی‌یلا،
زامان دؤیدو داشی‌یلا.
«گؤزلریمین یاشی‌یلا،
جنازه‌می یو!» گلدی.

نه ایشتاه وار، نه ده آش،
یاش اوستونه گلدی یاش.
گون باتدی یاواش-یاواش،
عؤمرون غوروبو گلدی.

#زلیمخان_یعقوب
#شعر_اوجاغی
@SheirOcagi

▫️دوغوم-اؤلوم

راحات یاشاماغا قویمور دونیانی،
چاخناشما گلنده راحاتلیق اؤلور.

احتیاج مئیداندا آت اویناداندا،
کاسادلیق دوغولور، آبادلیق اؤلور.

آزادلیق اؤلنده جلّاد دوغولور،
جلّاد دوغولاندا آزادلیق اؤلور.

#زلیمخان_یعقوب
#شعر_اوجاغی
@SheirOcagi

▫️آللاه اوتاندیرماز.

نه چوخدو تانرینین شاه‌اثرلری!
یازماقلا قورتارماز، دئمک‌له بیتمز.
دویماسا گؤردویو گؤزللیک‌لری،
شاعیرین سسینی آللاه ائشیتمز.

آللاهین سسینی ائشیدن شاعیر،
دونیانین شکلینی گؤزونه چکر.
اوجا یارادانین یاراتدیقلاری،
نه وارسا هر شئیی اؤزونه چکر.

ابدی نور کیمی آلیشار-یانار،
دوغان بیر گونش‌دی، بوشونا یانماز.
آللاه اوتاندیرماز سئون شاعیری،
آللاهین یانیندا شاعیر اوتانماز.

#زلیمخان_یعقوب
#شعر_اوجاغی
@SheirOcagi

▫️اعتراض

سنه بیر ایشیم دوشوب؛
بو ایش دوزه‌له‌نه‌دک،
قارتیییب قوجالمیشام،
آغزیمدان دیشیم دوشوب.

اومیدیمی قیرما،
بوغازینی جیرما،
آستا دانیش، باغیرما!
سن اونو ایسته‌ییرسن،
ایشی دوزه‌لن کیشی،
اَییلدیکجه اَییلسین،
حوضوروندا باش اَیسین.
سنین دوزَلتدیگین ایش،
سنین باشینا دَیسین!

#زلیمخان_یعقوب
#شعر_اوجاغی
@SheirOcagi

▫️اؤلوم دورور نؤوبه‌ده.

بیر آز قلبیمی دیندیر،
بیر آز کؤنلومو ایسیندیر!
منی سرت قایغی‌لارین،
وحشی پنجه‌سیندن آل،
روحوما بیر لایلا چال!
سیغاللا تئلیمی،
دارا ساچیمی!
اؤده اللرینه اولان
ظریف احتیاجیمی!
سویوتما باخیشلارینی،
گؤزومه یاخشی باخ!
اوشوتمه سؤزلریمی،
سؤزومه یاخشی باخ!
یاخشی باخمیشدین،
اوتوزوما، قیرخیما، اللیمه،
اومیدیمه، تسلّیمه.
دونن باخدیغین کیمی،
دوخسانیما، یوزومه یاخشی باخ!
اؤده قلبیمین، روحومون، دیلیمین، دوداغیمین احتیاجینی! اؤده!

واختا بیر شئی قالماییب،
اؤلوم دورور نؤوبه‌ده.

#زلیمخان_یعقوب
#شعر_اوجاغی
@SheirOcagi

▫️بو گون منیم اوره‌ییم...

بو گون منیم اوره‌ییم،
دونیادا بیر دونیادی.
«مؤولانا»نی تاپان «شمس»دی.
«شمس»ی ایتیرن «مؤولانا»دی.
«حاجی بکتاش»ین سیغیندیغی گوشه‌دی،
درویشین درگاهدان آلدیغی نشه‌دی،
«یونوس»ون گزدیگی چؤلدو،
«مجنون»ون دولاشدیغی صحرادی،
«طاهیر»ین دوشدویو دریادی،
«کرم»ین پایینا دوشن کولدو،
«خان‌چوبان» آدیندا یانان کؤنولدو،
«کوراوغلو»نون چالدیغی سازدی نیگار خانیما،
دورنا تئلی گتیرن «ائیواز»دی،
«باغداد»دان گلن سسدی،
«تبریز»دن گلن نفَسدی،
«غریب»ی «تیفلیس»دن «حلب»ه گتیرن «خیدیر ایلیاس»ین آتیدی،
«واقیف»ین وورولدوغو گؤزل‌دی،
«ویدادی»نین دیلینده‌کی بایاتی‌دی،
«سارا»نی آپارات سئلدی،
قارشیدا بیر اوردودو،
آرخادا بیر ائل‌دی،
«فضولی»نین «شبِ هجران»یدی،
«شهریار»ین چاغلایان ایلهامی
آغرییان جانی‌دی.

بو گون منیم اوره‌ییم،
مین ایللرین باغریندان قوپان،
سازین یادداشینا هوپان،
اؤزونو «دده قورقود»دا تاپان،
دده‌سی «یونوس» کیمی
سینیق کؤنوللر یاپان
جانین ایچینده‌کی اورک‌دی،
اوره‌یین ایچینده‌کی جاندی.
آللاه عاشیقی،
پیغمبر وورغونو،
اینسان پروانه‌سی، «زلیمخان»دی.

#زلیمخان_یعقوب
#شعر_اوجاغی
@SheirOcagi

▫️عاغلی باشدان آلان سس

چاغیر منی، گلیم سنه قوشولوم،
سحر-سحر شاه بوداقدا اؤتن قوش!
بولبولسن می، قومروسان‌می، قوشسان‌می،
زومزومه‌یله آخیب گئدن سوسان‌می؟
سسی قالخیب فلک‌لره یئتن قوش!

بیر آنلیغا کاش سولئیمان اولایدیم،
کلمه-کلمه آنلایایدیم دیلینی!
بیر بیله‌یدیم اوخویورسان نه‌دن، قوش!
سس دئییل کی، سسده روح‌دو اوخویان،
سنسن یئنه عاغلی باشدان آلانیم،
منم یئنه عاغلی باشدان گئدن، قوش!

#زلیمخان_یعقوب
#شعر_اوجاغی
@SheirOcagi