«វិមានសាមគ្គីភាព» នឹងសម្ពោធដាក់ឱ្យប្រើប្រាស់ជាផ្លូវការនៅថ្ងៃទី ២១ ខែ សីហា ឆ្នាំ ២០២៦ ក្រោមព្រះរាជាធិបតីភាពដ៏ខ្ពង់ខ្ពស់បំផុតរបស់ព្រះមហាក្សត្រ

អគាររដ្ឋបាលថ្មីរបស់ព្រឹទ្ធសភានៃព្រះរាជាណាចក្រកម្ពុជា ដែលមាននាមថា «វិមានសាមគ្គីភាព» នឹងប្រកាសសម្ពោធដាក់ឱ្យប្រើប្រាស់ជាផ្លូវការនៅថ្ងៃទី២១ ខែសីហា ឆ្នាំ២០២៦ ខាងមុខនេះ។

ពិធីដ៏មហោឡារិកនេះ នឹងប្រព្រឹត្តទៅក្រោមព្រះរាជាធិបតីភាពដ៏ខ្ពង់ខ្ពស់របស់ ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដោយមានការអញ្ជើញចូលរួមអមព្រះរាជដំណើរពីសំណាក់ថ្នាក់ដឹកនាំកំពូលៗរបស់ជាតិជាច្រើនរូប។

គួររំលឹកថា «វិមានសាមគ្គីភាព» គឺជាសមិទ្ធផលដ៏ធំធេងមួយដែលត្រូវបានស្ថាបនាឡើងយ៉ាងប្រណីត ដោយផ្អែកលើរចនាបទស្ថាបត្យកម្មខ្មែរទាំងស្រុង និងបានបញ្ចប់ការសាងសង់ជាស្ថាពរនៅកំឡុងដើមឆ្នាំ២០២៦ នេះ។

ព្រះករុណាជាអម្ចាស់ជីវិតលើត្បូង ព្រះបរមរាជានុញ្ញាត គណៈប្រតិភូសន្និសីទ ISC-2 ចូលក្រាបបង្គំគាល់

ភ្នំពេញ ថ្ងៃទី២៧ ខែសីហា ឆ្នាំ២០២៦--

ព្រះករុណា ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ព្រះបរមរាជានុញ្ញាតជូន សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា និងជាប្រធានសន្និសីទប្រធានសភា នៃអន្តរសភា លើកទី២ (ISC-2) ព្រមទាំងគណៈប្រតិភូជាតិ និងអន្តរជាតិ ចូលក្រាបថ្វាយបង្គំគាល់ នាព្រឹកថ្ងៃទី២៧ ខែសីហា ឆ្នាំ២០២៦ នៅព្រះបរមរាជវាំង រាជធានីភ្នំពេញ។

រូបថត៖ ក្រសួងព្រះបរមរាជវាំង