#EthiopiaCheck Scam Alert

በኢትዮ ቴሌኮም ስም የተከፈተ ይህ ሀሰተኛ ገጽ የፌስቡክ ማስታወቂያ (sponsorphip) ጭምር በመጠቀም በርካቶች ጋር ተደራሽ በሚሆን መልኩ የግለሰቦችን ገጽ/ፓስወርድ እስከመቀየር የሚያስችል ሊንክ አጋርቷል።

ማጥመድ (phishing) በመባል የሚታወቀው ይህ ዘዴ ታማኝ የሚባሉ ገጾችን ስም በመጠቀም አልያም በኢሜል በሚላክ የሽልማት፣ የግብዣና ተመሳሳይ ማታለያዎች ተጠቃሚው ዝርዝር መረጃውን እንዲያስገባ የሚጠይቅ ነው።

በኢትዮ ቴሌኮም ስም የፌስቡክ ማስታወቂያ ተጠቅሞ የተለቀቀው መረጃም በሽልማት መልክ የቀረበ ማታለያ ሲሆን በፎቶው እንደምትመለከቱት ሊንኩን ተጠቅማችሁ ስትከፍቱት ከፌስቡክ ጋር ተመሳሳይ የሆነ የመግቢያ ገጽ (login page) ይመጣላችኋል።

ይህ ገጽ በብዙ ነገሩ ከዋናው የፌስቡክ ገጽ ጋር ስለሚመሳሰል ሰዎችን የማታለል አቅሙ ከፍተኛ ነው። ተደራሽነቱ ደግሞ ለብዙ ሰዎች እንዲሆን ማስታወቂያ ተከፍሎበት እየተሰራ በመሆኑ ሁኔታውን እጅግ አደገኛ ያደርገዋል።

ምን አይነት ጥንቃቄ ማድረግ ይኖርብኛል?

ብዙ ጊዜ በሽልማት ወይም በግብዣ መልክ ተመሳሳይ ሊንኮች በፌስቡክ ገጻችን፣ በቴሌግራም እንዲሁም በኢሜላችን በኩል ሊደርሱን ይችላሉ። ይዘታቸውን በውል የማናውቀውን መልዕክቶች አለመክፈት የመጀመሪያው እርምጃ ነው።

በተለይ ግን ከላይ በተጠቀሱት መንገድ የሚሰሩት ማታለያዎች መረጃዎችን እንድንሰጥ የሚጠይቁን ስለሆነ አስቀድሞ ሊንኩን መመልከት ከዚያም ከትክክለኛው ድርጅት ወይም ተቋም ስለመላኩ ማጣራት ይጠበቅብናል።

ማስታወሻ: መረጃ እንድናስገባ የሚጠይቁን የምዝገባ ፎርሞች፣ የመግቢያ ገጾች ሲያጋጥሙ ሳያረጋግጡ መረጃ አይስጡ።

Via Tikvah Magazine
@EthiopiaCheck