يا كفيل الجنه گوم ،

الدنيا عثرت من طحت



جواد زغير

لا چفوف ،
أ.ولا عيون ،
أ.ولا مسافه أبلا سهم تغفه اعله جسمك ،
والضما الما فارگاك ،
والسنين التجزي بينا ،
وهيبتك تاج اعله حيطان السما

ياهو بينا أيعوف خاله ،
وقصر دولة ،
و رفكة الحكام ،
و يروح اويه اخوه الخيط سالفته الدمى ،؟

وياهو بينا الماي يمه وما أيدنگ للضما ،؟

السالفة اكبر ،
رفكة السكته عمى



جواد زغير

راس يتلفت لـ راس أوداع شوف

وليل يتبده على أوجوه الزغار
التنتظر چف الگمر يذبح الخوف

و نهر ضامي شما عطش يشرب چفوف



جواد زغير

راسك فر الولايات ،
متعلي اعله كل ذباح

ولية عطش ملگه الناس ،
ديره الهوى البيها أرماح

ضفتهم ،
وانت مو تايه ،
شماله الطين يتلگه البشارة بـ دم ؟

شماله الرمل غث الماي ،
چا هو الورد ينداف لو ينشم ؟

ولو معذور ،
اثاري الما يحب الفرح يكفر بيه

واثاري المستعز بالخوف ،
يزهگ من يشح طاريه

وانتَ بكلهن توازيت ،
چف دخانهم شخبط اعله أرسومك

لهسه الدنيا غربه أتفيض ،
لوما ضاويه انجومك

( حبيبي يا حسين ) 💔



جواد زغير

الحسين -ع-


تبحر والعطش موعد

تعثر والهوه المرعوب يم صدرك أيدور سد

حوافر تشتري المطروح وانته اعله الثرى أمدد

وتتلفت ولا گصه حفظها العيب ،
بس سبعين واهل البيت يم كل مستحه يفيضون

يـ رب الشوف ،
كل شباچ ما جاسه التعب لرگابكم مديون



جواد زغير

يـ وجه الله ،
غريب الـ ما يسافر بيك لـ عيونه

و اليقراك ثورة سيف لابد تعتگ ضنونه



جواد زغير

ليش حزن الناس موسم ،

وأنتَ حزنك ماله تالي ؟


- جواد زغير

ليل ،
وحيل راكد ملته الحيطان

مامش لا گمر يضوي ،
ولا نسمه التطيب خاطر الشباچ



جواد زغير

أنتَ يا أحلى المواسم ،
أنـه شنهي بغيرك أنتَ

أرخص بلياك ريل ،
واكبر بـ عين الخلگ
كلما تفز سچه لـ ودادك



جواد زغير

عليمن چا أمعطلني ؟
السفر واجب اذا كل السچچ غنت

و اذا رب المشابگ بارد بملگاي
أگص اچفوفي إذا صلت



جواد زغير