SVU Programming - Mohamad Ameen

وقت الي بدي اشتري لابتوب أكيد اول شي بسأل عنو هو المعالج تبعو يعني ال CPU الي هو يعتبر محرك اللابتوب يعني متل الدماغ عند البشر وهو الي بعالج العمليات الي بقوم فيها اللابتوب وكل ماكان المعالج اقوى كل ماكان لابتوبك بيقوم بعمليات اسرع وبوفر طاقة أكتر ...
وأكيد وحدة من أشهر شركات المعالجات هي شركة intel الي اصدرت بالسنوات الاخيرة معالجات من النمط intel core
ف نحن منسمع انو في معالج
intel core i3
intel core i5
intel core i7
intel core i9

ف أول شي منطلع عليه بحكم العادة انو المعالج كور أي شو ؟ لحتى نحدد قوة المعالج وبالطبع كل ماكان الكور أعلى معناها المعالج أفضل.... لكن بالحقيقة هاد غير كافي أبدا ومعرفة الاصدار مانها الشي الوحيد الي بحدد قوة المعالج في أمور تانية الها دور مهم متل جيل المعالج و تردد المعالج وعدد الانوية وعدد الخطوط الي اسمهن ال threads و في حرف أخير مهم جدا ب الاسم التسلسلي للمعالج بيدل ع قطاع الطاقة الخاص بالمعالج او فئة المعالج ورح وضح كل وحدة منن على حدى :

1- جيل المعالج :
جيل المعالج هو نسخ أو إصدارات مختلفة لمعالجات تنتمي إلى نفس السلسلة وكل ماكان الجيل أعلى يعني تطور أكتر وتقنيات أكتر وسرعة أكبر و توفير طاقة أكتر ودعم أمور مختلفة وقدرة أكبر ع التوافق مع باقي قطع الهاردوير مثل شرائح الذاكرة ومنافذ الاتصال
على سبيل المثال المعالجات الي من الاجيال القديمة مابتدعم شرائح الذاكرة DDR4 بس DDR3 وحتى لو ركبت رامات DDR4 ف انت مارح تستفاد من قدراتها اذا كان جيل المعالج تبعك قديم
مثلا اذا معالجك جيل تالت وركبت رامات DDR3 ف انت كأنك ركبت DDR2 ومارح تستفاد من الميزات الجديدة لانو اصلا المعالج مابيدعم هيك سرعة من الرامات.

2- عدد الانوية :
المعالج بشكل عام بيكون فيه شريحة معالجة فعلية وحدة او أكثر منسميهن انوية وكل مازاد عدد الانوية يعني شرائح أكتر يعني القيام بعمليات أكثر بنفس اللحظة وحاليا أقل معالج موجود بالسوق فيه نواتين معالجة أو أكثر

3- تردد المعالج:
التردد يعني عدد العمليات الي بيقوم فيها المعالج بالثانية الوحدة وكل ما ارتفع تردد المعالج كل ماكان اسرع بالقيام بالعمليات والتردد بيتم قياسو بالهرتز (متل مادرستو بالبكالوريا) وطبعا موضوع التردد مهم كتير وأكثر أهيمة من عدد الانوية.

4- عدد خطوط المعالجة ال threads:
عدد الخطوط هي الطرق الي بتمشي فيها التعليمات وهي رايحة ع المعالج لحتى يتم تنفيذها ع التوازي يعني مثلا انت بدك تفوت ع قاعة والقاعة الها باب واحد وفي 100 شخص بدو يفوت ف بتعملو طابور وبتفوتو بالدور ف لما يكون القاعة الها بابين ف بتعملو طابورين وبتفوتو منهن بنفس اللحظة وهيك بتكون العملية اسرع وهاد المقصود بالتفرع او التوازي
ولما يكون يكون في خطوط أكتر يعني تنفيذ العمليات المتوازية بنفس اللحظة بتكون أكبر بالتالي هاد الشي بيعطي سرعة أكبر بتنفيذ التعليمات.

5- فئة المعالج او اللاحقة ( power segment):
هاد دليلو بيكون الحرف الأخير في اسم المعالج، ويُعتبر أكثر جزء يعطي معلومات هامة عن المعالج وهاد نقطة مهمة جدا لازم يتم أخذها بعين الاعتبار وابدا مالازم تهملو اللاحقة الخاصة بالمعالج
وهاد شرح كل حرف من هالحروف واللاحقات:
U : موفر للطاقة، لا يصلح للألعاب نهائيًا –أقل أداءً
K: يمكن كسر سرعته، يقدم أعلى أداء
F: المعالج غير مدمج به بطاقة رسومية ويكون أقل سعرًا؛
G: المعالج مدمج به بطاقة رسومية، ويكون سعره أغلى
G1-G7 : الأرقام من 1 إلى 7 تعبر عن جودة وقوة البطاقة الرسومية
المدمجة مع المعالج
H: معالج يتميز بالأداء العالي، مصنوع خصيصًا للحاسوب المحمول
والأكثر انتشارًا في هذه الأجهزة
HK: معالج أداؤه عالٍ للحاسب المحمول ، ولكن يمكن كسر سرعته وتقديم أداء أعلى،
وهو الأفضل للحاسب المحمول
HQ: معالج أداؤه عالٍ للحاسب المحمول، رباعي الأنوية،
لا يمكن كسر سرعته
S : نسخة خاصة، ويمكن وضع هذا الحرف مع أي حرف آخر،
وسيعطي نفس المعنى للحرف الآخر ولكنه “نسخة خاصة” منه
X : المعالج من الفئة الفاخرة ويتميز بعدد كبير من النوى وخيارات متقدمة للتخصيص

وهلق بعد ماوضحت شو هنن العوامل المؤثرة بقوة المعالج رح وضح كم نقطة مهمة :
انا بدي اشتري معالج تمام :
اول شي بروح بطلع عليه هو الجيل بس يكون في فرق منيح بالجيل يعني اذا قلتلي معالج جيل عاشر ومعالج جيل خامس ف أكيد الجيل العاشر أفضل مهما كان حتى لو كان تبع الجيل العاشر CORE I3 وتبع الجيل الخامس CORE I5
تمام ؟
بس اذا كان الاجيال قريبة من بعضها او نفس بعضها مثلا جيل تاسع وجيل عاشر او المعالجين جيل عاشر ف هون انا مابطلع بس ع الجيل بطلع ع السلسلة انو هو كور آي شو وكل ماكان أعلى كل ماكان أفضل...يعني بالطبع المعالج CORE I5 جيل عاشر أفضل من CORE I3 جيل عاشر
وعلى فكرة الجيل العاشر من CORE I3 اداؤه تقريبا نفس الجيل التاسع من CORE I5 الى حد ما

❤3👍2

397 viewsedited 22:52