#أريد_الوصول_لقلبك

الجزء الاول والثاني والثالث والرابع والخامس قصة كاملةبتمنا تعجبكن

اسمي لجين عمري 24 سنة..
عايشة لحالي..
طويلة 168 سم.. عيوني لون أسود و شعري لون أسود طويل..
أبي و أمي منفصلين عن بعض من لما كان عمري 10 سنين..
درست لحالي و تعلمت شغل البيت و اعتمد ع حالي من الصغر و خاصة إنو أبي تزوج بعد طلاقه من أمي..
و أمي كانت لساتا صبية و حلوة فـ تزوجت هيي كمان..
ضليت أنا مع ستي إم أبي لأنو أهلي شافو حياتن و نسوني..
عمي الصغير كان متزوج ببيت جدي لأنو جدي متوفى و ستي لحالا بالبيت ضلت بعد ما الكل تزوج و ما ضل غير عمي الصغير فـ تزوج و سكن معها هوي و مرتو..
وقت اللي أبي و أمي انفصلو و نسوني و رحت قعدت عن ستي كان عمي متزوج إلو سنتين تقريباً و مرتو حامل بالشهر الخامس..
مرت الأيام بسرعة كتير و ولدت مرت عمي و بلشت المشاكل تصير..
الحكي اللي يوصل ل عمي إنو أنا ما عم اشتغل بالبيت و ما عم ساعدها..
و هيي عندها البيبي تهتم فيه و ما رح تكون فاضية لكلشي...
أي أي بنت ال 10 سنين تعرضت لهالحكي
المهم.. قررت من ورا كل هالمشاكل اني ادرس منيح و ادخل الجامعة و يصير عندي بيت لحالي و بلا القعدة عند ستي..
وضع الدراسة شوي كان صعب بسبب الضغوط اللي مرت عليي..
سنة ورا سنة تعب و إرهاق و وجع و حكي و ضغط...
بس الحمدلله رب العالمين ساعدني إني كفي تعليمي..
وقت اللي وصلت لمرحلة تحديد المصير و بيوم كان شتي و الكهربا مقطوعة و قاعدة عم ادرس ع الشمعة..
نادالي عمي: لجين.. لجين إنتي يا بنت عم حاكيكي وينك..
تنهدت و قمت لعندو..

لجين: أي عمي كنت عم ادرس بالغرفة
عمي سالم:ناديتلك لقلك إنو إنتي هلا صار عمرك 17 سنة و عندك تحديد مصير لحتى تدخلي الجامعة بمعدل عالي أو لا، اللي بدي ياكي تعرفيه إنو أنا ما بهمني شو رح تجيبي معدل لأنو الفرع اللي بيطلعلك أنا رح سجلك ياه لأني ببساطة ماني مضطر إني ادفعلك مصاريف جامعة خاصة لهيك حاولي تدرسي منيح..
كنت مصدومة باللي قالو و عم اتطلع فيه و كأنو قاعد قدامي واحد ما بعرفو..
تركني قاعدة عم اتخبط بأفكاري و ليش عم يصير معي هيك و ما ارتكبت أي ذنب..
مسحت دموعي و قمت ع دراستي..
الوضع بالبيت ما كان بيسمح إني ادرس.. شغل و ضغط و طبخ و مسح و كلشي..
كنت خدامة البيت..
خلصت من البكالوريا و معدلي كان جيد
قدرت إني ادخل تجارة و اقتصاد..
رحت ع الجامعة، ما كان عندي رفقات أبداً حاولت إني اتعرف ع كتير ناس بس ما قدرت اوثق بحدا أو حب حدا لأني نسيت شو يعني حب و ثقة بعد كل اللي صار معي..
قررت إني اشتغل بأوقات فراغي و جمع مصاري من شغلي و اصرف ع حالي..
ضليت 3 ايام دور ع شغل لحتى لقيت محل تياب مكتوب ع واجهتو "يلزمنا آنسة للعمل "
دخلت و كانت صاحبة المحل مرا كبيرة بالعمر بس مبين عنها محترمة و أكابر كتير من لبسها و أناقتها و ترتيبها رغم كبر سنها.. تقديراً مني توقعت يكون عمرها بال 55 سنة..
حكيتلا جزء بسيط من قصتي لأني تعودت ع الكتمان بس خبرتها إني بحاجة كتيرررر لهالشغل..
وافقت إني اشتغل عندها من الساعة 4 للساعة 9..
طبعاً بس بالأوقات اللي بكون فيها بالجامعة.. لأنو بكون بالسكن فـ بروح بشتغل بدون ما حدا يعرف من عيلتي...
مرت 4 سنين الدراسة و صار عمري 22 سنة..
صار وقت إني شوف قديش لميت من مصروفي و من شغلي..
ما كانو كتار بس قدرت إني استأجر غرفة و حمام و مرتفعاتن و بأماكن شعبية
استأجرت الغرفة و ما ضل معي كتير مشان اصرف ع حالي..
بعد التخرج تعذبت كتير ل لقيت شغل بـ شهادتي..
اشتغلت شغلين سوا لاقدر اصرف ع حالي و جهز الغرفة ل اقدر انتقل عليها..
كنت اطلع من السبعة من البيت و خلص شغلي الساعة 4 و ضل عم دور بالشوارع للساعة 5 و اطلع ع شغلي التاني اللي كان كمان بمحل تياب بس بالسوق بالمنطقة اللي أنا ساكنة فيها..
لأنو كنت قايلة ل عمي إنو شغلي من 8 الصبح لل 8 المسا،
قدرت إني جهز الغرفة من خلال قعدة عربية (ع الارض)

ما قدرت إني اشتري كنباية أو صوفى أو حتى كراسي..
ما كان في عندي مطبخ بالغرفة ف لهيك حاولت إني علق ستار بقسم صغير من الغرفة حط وراه ادوات الطبخ المو كاملة اللي قدرت اشتريها بعذاب..
ضل الغاز و البراد يااا الله عندي كتير شغلات ما معي اشتريها
جبت فرشة صغيرة لاقدر نام عليها مع غطى بسيط يقدر يحميني شوي من برد الشتي..
و هلا صار عمري 24 سنة إلي سنتين عم اشتغل و اتعب و جهز الغرفة و حالي كرمال هاليوم.. اليوم الي رح اطلع فيه من هالعذاب من هالبيت اللي وجعني و دمرني و دمر ثقتي بالناس.. لاهرب من هالعيلة..
اليوم قوتي لازم تطلع..
مرت عمي سحر: لجين قومي بقا حاج نوم صارت 7 و نص ما بدك تروحي ع الشغل؟ شبك مو مضطرة أنا اجي فيق حضرتك..
فتحت عيوني و اتطلعت ع شباك الغرفة.. الشمس.. اليوم..
لبست و ضبيت غراضي بشنتي الصغيرة اللي جابولي فيها أهلي غراضي وقت تركوني عند ستي..
لجين: صباح الخير عمي و مرت عمي و سارة (بنت عمي) و ستي

عمي سالم: صباح النور صارت الساعة 8 وربع شو ما رح تروحي اليوم

ع الشغل؟؟
لجين: أي عمي رايحة.. بس رايحة و مو راجعة لهيك تأخرت كنت عم ضبضب غراضي.
لحظة صمت.. الكل عم يتطلع عليي و ساكت حتى سارة تركت كاسة الشاي من ايدها و اتطلعت عليي و كأني عاملة جريمة..
سالم: ما فهمت شو قلتي؟
لجين: أنا رح اطلع و اسكن لحالي ما بقا قادرة اني عيش بالذل هون و هلا أنا كبيرة و عندي شغلي ثابت و مصروفي ثابت رح ريحك مني و من مصروفي و ريح مرت عمي من وجودي بوجها كل يوم
سالم: شكلك جنيتي مو؟
وقف بسرعة و وقعت الكرسي ع الارض و اجا لعندي بسرعة و مسك ايدي بقوة و اتطلع عليي و عيونو مليانة شر
سالم: لتكوني مفكرة حالك عايشة بأوروبا و لا مفكرة إذا أهلك تركوكي و ما ربوكي أنا ما فيني ربيكي!؟
رفع ايدو التانية بدو يضربني ما بعرف من وين اجتني الجرأة والقوة اللي خلت إيدي تمسك ايدو و تمنعا من انو تقرب ع خدي
بلحظة حسيت حالي مو أنا دفشتو بعيد عني و عليت صوتي و كأنو الوجع اللي جواتي خلال هالسنين طلع بهالدقيقتين
لجين: اييييي شبككك وصلت معك ترفع إيدك، بدك تضربني؟ انتبه عمي أنا مو بنت ال10 سنين أنا بنت ال 24 سنة واعية كتييير منيح و ما بسمحلك ترفع إيدك عليي
سحر: شو قليلة ذوق هيك بترفعي صوتك باللي رباكي و علمك و كبرك.. تركا حبيبي تنقلع ع جهنم شو فارق معنا اصلاً اللي بتهون عليه العشرة.. كفيها إنتي لجين...
لجين: اهتم فيني و كبرني و رباني و علمني؟؟ هه والله كأنك مو عايشة معنا بالبيت شكلكن نسيتو البنت اللي كانت تدرس ع ضو الشمع بالليل لأنو بالنهار كانت خدامة تحت رجليكن..
سحر: إذا أهلك ما سألو عنك بدك نحنا نسأل!
لجين: برافو عليكي إنتي قلتيها انتو مو أهلي أنا ما إلي أهل أنا وحيدة.. أنا كنت خدامة بهالبيت و هالخدامة بطلت تشتغل عندكن.. بدكن قدملكن استقالة رسمية!؟

ستي: بنتي، لجين ليش هيك يا ستي ليش عم تعملي هيك بهون عليكي تتركيني و تروحي؟
دمعت عيوني بعد ما سمعت حكي ستي و دموعا ع خدودا
قربت لعندا و قعدت ع الارض مقابل كرستا و مسكت ايديها و بوستن و قلتلا سامحيني
وقفت اخدت تيابي و شنتايتي و طلعت برا البيت و كنت مستغربة إنو عمي ما حكا ولا كلمة بعد ما بعدتو عني معقول انصدم فيي؟؟ أو ما عندو جواب ع كلامي؟؟
وصلت ع الغرفة اللي كانت بعيدة شوي عن البيت حطيت غراضي و رتبت كلشي و اتسطحت ع الفرشة و بكيت بكيت بكيت بكيت كتييير و بعدا غفيت
و ما حسيت ع حالي إلا و الباب عم يندق فتحت عيوني و قمت لافتح الباب
و لما فتحتو كان ع الباب....#أريد_الوصول_لقلبك

الجزء التاني
فتحت الباب و إذ بلاقي قدامي شب طويل جسمو رياضي عيونو خضر و رموشو طوال.. دقنو خفيفة لابقتلو كان لابس شورت و قميص أبيض و كأنو رايح ع البحر -_-
من الصدمة اللي اجتني سكرت الباب بوجهو وقت اللي فتح تمو ليحكي
لجين شووو عملتي؟؟؟
فتحت الباب لقيتو واقف و حاسس حالو اهبل ع هالموقف
لجين: عفواً تفضل بشو بقدر اخدمك
الشب: ليش سكرتي الباب
لجين: اي أنا بصراحة هيك إنو سكرت يعني لأنو إنت يعني أي هيك فهمت عليي؟
الشب صار يضحك: لا والله ما فهمت شي
سكت لما شافني واقفة و عم اطلع عليه بدون اي رد فعل
الشب: أنا اسمي سامي و جايي لعند رفيقي هون ساكن بس ما بعرف وين بالضبط قلت بسأل و دقيت و طلعتي انتي.. اسم رفيقي طارق بتعرفيه شي؟
لجين: لا والله أنا منتقلة لهون عن جديد و ما بعرف حدا بالمنطقة بعتذر
الشب: طيب فداكي و بعتذر ع الازعاج سلام
لجين: ولايهمك سلام
سكرت الباب و لسا مصدومة من شكل الشب يا الهي مأجملو ما شفت شب بهالجمال اخ قلبي
لجين بلشتي تاكلي هوا سكتي ها (عم حكي حالي أنا الهبلة) قعدت اضحك بالبيت لحالي
بعد تلت ايام ع العيشة بالبيت الجديد كنت حاسة بشعور غريب شعور حلو مبسوطة مرتاحة
اااخ يا ربي ساعدني و ضل معي يااا رب
طلعت من البيت الصبح رايحة ع الشغل كالعادة..
أنا و عم امشي و فجأة بصير بالارض و الناس عم تتجمع من هون و من هون (الحمدلله ع السلامة) (صرلك شي) (فيكي شي يا بنتي) (انتي منيحة) (امشي ناخدك ع الدكتور)
و أنا لسا ع الارض عم حاول استوعب شو الي صار و كيف صرت بالارض هيك..!
لما رفعت عيوني شفت شب بجنن كتير قاعد ع الموتور و عم يطلع عليي،
نزل الشب من الموتور، و قرب و مد ايدو و قلي: أنا آسف كتير كنت مسرع و ما انتبهت،
بلشو الناس يلوموه و يقلولو لازم تنتبه ما بصير هيك شو اعمى
و الشب تلبك و ما عرف شو يعمل، قمت وقفت و اطلعت علين،
لجين: أنا منيحة،
الشب: خليني اخدك ع المشفى لنتطمن
لجين: لأ ما في داعي

قالت مراة كبيرة بالعمر: بنتي شوفي عم ينزل دم من رجلك
اطلعت ع رجلي و شفت الدم،
الشب طلع موبايلو و اتصل: آلو، سامي وينك، ليك اسمع تعا بسرعة ع اول الحارة بالسيارة ناطرك ولا تطول
بعد دقيقتين اجا الشب،
كان نفسو الشب اللي اسمو سامي و دق عباب البيت مبارح و عم يسأل عن طارق رفيقو،
الشب: سامي بدنا ناخد الصبية ع المشفى، وقعت بسببي،
سامي: قلنالك مية مرة يا طارق لا تركب ع الموتور، ما كنت تفهم
وبعدا اطلع عليي وابتسملي: تفضلي يا

انسة
لجين: لأ ما في داعي، أنا بروح لحالي
طارق: لا ما بصير، أنا السبب و لازم صلح غلطي
اطلعت بالسيارة من ورا و طلع سامي و طارق من قدام، خفت بالبداية إني معن بالسيارة لحالي بس كان باين إنن اكابر ومحترمين، السيارة كانت فخمة كتير، من نوع مرسيدس، صرت اطلع حواليي ع المقاعد، جلد اسود، نضيفة كتير، والشب الي اسمو سامي، كان شاطر بالسواقة كتير،
وصلنا ع المشفى، مسك ايدي طارق و ساعدني مشان وصل ل مكان الطوارئ، فحصتني الدكتورة و عقمتلي الجرح ولفتلي ياها بشاش و قالتلي انتبه كتير منيح أنا و عم امشي عليها،
طلعت و لقيتن واقفين و عم يحكو و يضحكو و ناطرين لاطلع،
اول ما شافوني قربو مني،
سامي: الحمدلله ع السلامة، ان شاء الله مو شي خطير؟
لجين: جرح بسيط، الله يسلمك
طارق: سلامة قلبك، آسف والله مو قصدي
لجين: مو مشكلة بسيطة
سامي: عفواً بس أنا وين شايفك؟
ابتسمت وقلت: مو حلك تنساني، مبارح اجيت تسأل عن بيت رفيقك طارق،
سامي: أي أي تذكرتك، صدفة غريبة
طارق: أي أنا رفيقو اللي عم يدور عليه، بيتي بالحارة اللي بعد حارتكن، صايرة فيلا بنهاية الشارع تقريباً
ابتسمت: الله يديم رفقتكن
سامي: تسلمي، وين بتحبي نوصلك؟
لجين: لأ مو مشكلة، أنا بكمل لحالي، بتقدرو تروحو
سامي: أكيد ما رح نتركك بهالحالة،
لجين: لا معلش، أنا لازم روح ع شغلي مو راجعة ع البيت، بتقدرو تروحو
طارق: وين بتشتغلي؟
لجين: شركة الورد، بشتغل فيها محاسبة، أنا خريجة تجارة و اقتصاد
اطلعو عليي بدون ما يحكو شي، بعدا طارق قال: عفواً وين قلتي بتشتغلي؟
لجين: شركة الورد اسمها، في مشكلة

سامي: هي الشركة بتكون لأبي، و أنا استلمت المدير التنفيذي فيها من يومين، و بكرا أول يوم إلي فيها
طارق ضحك: فظيعة هالصدف
لجين: الي سنتين اشتغل فيها، عنجد صدفة غريبة كتير، بس يعني ليش من قبل ما كنت تشتغل بالشركة؟
سامي: لأني كنت مسافر برا البلد و عم ادرس و اشتغل برا، وبعدين مليت من القعدة ببريطانيا و قررت ارجع لهون و اشتغل
طارق: و يتزوج كمان
صارو يضحكو، يا الله مأحلا رفقتكن، يا ريت عندي رفقات
ابتسمت: بالتوفيق يا رب
سامي: خليني وصلك ع الشركة
لجين: صدقني ما في داعي، أنا بحب اعتمد ع حالي،
بالأخير ما قدر يقنعني و اطلعت لحالي، رحت ع الشركة و صرت اشتغل كالعادة،

كان في بنت بالغرفة اللي جنبنا كتير حلوة و مهضومة، كانت تجي ع طول و تقعد عندي و تتسلى معي، اكبر مني بسنتين،
بس ما كنت كتير اوثق فيها، تجربتي المبكرة بالحياة خلتني ما اوثق بحدا، خلصت من الشغل و رحت ع البيت،
عملت غدا خفيف و اكلت، حسيت بالوحدة، بس يعني عادي ليش أنا ايمتا ما حسيت بالوحدة،
اكلت و خلصت و بعدا تسطحت ونمت شي ساعة،
فقت و قعدت، ما عندي شي اتسلى فيه،
نزلت من البيت و صرت اتمشى، رحت ع الكورنيش وصرت اتمشى جنب الشط، نسيم البحر ردلي روحي، أنا و عم اتمشى سمعت اصوات شباب و صبايا عم يضحكو، اطلعت كانو قاعدين ع الدرج مقابل البحر، كانو 5 شبين و تلت بنات، بنت شقرا و بنتين سمر وشب اسمر والشب التاني أسمر،
ما كنت شايفة ملامحن منيح لأنن بعاد شوي، صرت امشي باتجاهن و سمعتن شو عم يحكو لأنو صوتن كان عالي،
البنت الشقرا: لك يا الله رح موت من الضحك اسكتو
شب: لك ما عاد يجي سامي؟
بعدا شفتو ل طارق بيناتن وقال: بظن هوي مع سابين
بنت سمرا 1: شو كرهانتا لهالبنت، لك ما الو شي واصل من السفر و لحقت تاخدو من الكل
البنت الشقرا: عنجد مو طبيعية مأوقحا، لك بعد كل اللي عمليتو بغيابو لسا إلها عين تحكي معو
البنت السمرا2: حدا خبرو ل سامي؟
طارق: أنا شخصياً ما قلتلو شي

الشب الاسمر: شي اكيد ما رح تقلو، تخيل يعني جاي عم تقلو حبيبتك اللي تركتا من اربع سنين ووعديتك تضل معك انت و مسافر، كانت مع شب تاني و ع وشك إنو تنخطب
البنت الشقرا: لك و كانت عم تحكي معو ع الماسنجر بنفس الوقت اللي كانت عم تطلع مع الشب التاني
طارق: ما بقدر شوف سامي مخدوع هيك، بس بنفس الوقت ما عندي الجرأة خبرو
البنت السمرا1: يا عمري هوي رح ينكسر قلبو إذا عرف
الشب الاسمر: لازم حدا يخبرو، ما بصير هيك نسكت
البنت الشقرا: يا الله والله مشكلة هالشغلة، تعو نخبر اهلو بركي هني بقلولو
طارق: أنا ما بظن فيني خبر حدا، بتعرفو انو سامي قريب مني كتير، مستحيل اقدر خبر هيك شي
البنت الشقرا:شو رأيكن#أريد_الوصول_لقلبك
الجزء التالت

البنت الشقرا: شو رأيكن نخبرو كلنا سوا؟
انا و واقفة عم اطلع عليهن، اجت عيني بعينو ل طارق، ابتسملي و رفع ايدو،
ابتسمت و رفعتلو ايدي، نزل و قرب لعندي،
طارق: كيفك؟ كيف صرتي ان شاء الله أحسن؟
لجين: أي الحمدلله أحسن، كيفك إنت
طارق: أنا تمام، ليش عم تتمشي ما عم توجعك رجلك؟
لجين: عم امشي ببطء، ما عم توجعني،
طارق: لحالك؟
ابتسمت: أي لحالي
طارق: بتعرفي أنا لهلأ ما بعرف اسمك
رفعت ايدي و شلت شعري عن وجهي: اسمي لجين
مد ايدو وقلي: تشرفنا، بتمنى يكون الموقف اللي صار معنا بداية لصداقتنا
اطلعت ع ايدو الممدودة و طلعت بعيونو الخضر، بعدا ابت

سمت و مديت ايدي و سلمت عليه وقلتلو: إلي الشرف بمعرفتك
طارق: تعي لعرفك ع رفقاتي
لجين: بتشرف بمعرفتن اكيد، بس ما بدي خرب قعدتكن
طارق: إنتي رح تتعرفي علين، ما رح تعملي مشكلة، تعي يلا
مشيت معو و وقت وصلنا،
البنت الشقرا ابتسمت وقالت: أهلين أهلين أهلين، مين الحلوة؟
طارق: بعرفكن هي لجين البنت اللي قلتلكن ضربتا بالموتور،
لجين: مو ضربني بالموتور، بس ع السرعة اللي مر فيها من جنبي وقعت ع الارض،
طارق ضحك و قال: الله يجبر بخاطرك،
اشر ع البنت الشقرا: هي سيرين
اشر ع البنت السمرا1: هي غنوى
اشر ع البنت السمرا2: هي دارين
اشر ع الشب الاسمر: والافندي اسمو كريم
ضحك الشب وقال: تشرفنا انسة لجين، الحمدلله ع سلامتك
دارين&سيرين&غنوى: تشرفنا
ابتسمت: تشرفت بمعرفتكن

دارين: مأحلا شعرك، بتمنى لو شعري بيطول متلو (شعرا لدارين كان لون بني و قصير بيوصل لكتافها وعيونا من لون شعرها)
سيرين: اي ما شاء الله، بيشبه شعري بس غير لون (شعرها ل سيرين كان طويل و لونو أشقر و سابل فعلاً كان بيشبه شعري، عيونا بجننو من لون البحر)
غنوى: هلأ بتحسدوها للبنت (غنوى كان سمارها كتير ناعم و عيونا خضر وشعرا كيرلي و متوسط الطول)
طارق: اسكتو بقا
كريم: شلتنا ناقصة، لسا في شب اسمو سامي مانو موجود
طارق: شافيتو ل سامي، بتعرفو من قبل ماتعرفني، و بتشتغل بشركة ابوه ل سامي
دارين: شو هالصدف هي؟
سيرين ضحكت و قالت: بما إنو صار في صدف بينك و بين سامي عطينا رأيك بهالموضوع
كريم: عجبتني الفكرة، اسمعي لجين، سامي كان مرتبط ببنت لما كنا بالجامعة و كتييير حلوة، وقت سافر وعديتو قدام الكل انها تستناه، بس ما في شهر من سفرو لقيناها ارتبطت بغيرو، وحكينا بوقتا مع سامي و سالناه كيف علاقتو معها وقال تمام و كل يوم بيحكو سوا، قلنا بجوز ظلمناها، بس بعدين صارت القصة تزيد عن حدها كتير، و وصلت للخطبة قبل كم شهر من رجعتو ل سامي، صارت مشاكل بين العيلتين و فقست الخطبة وهلا بعد ما رجع سامي رجعو ل بعض، المشكلة ما منعرف اذا سامي عندو علم أو مخدوع، و كمان سابين بتعرف إنو كلنا عنا علم بموضوع خطبتا من هداك الشب بس مو مبين عليها الخوف، شو رأيك إنتي؟ ما بدنا يكون رفيقنا مخدوع و كمان ما بدنا نخرب علاقتن إذا كان عندو علم بالموضوع سامي،
تنهدت وقلت: برأيي فيكن تعرفو إذا هوي مخدوع أو لأ بطريقة بسيطة،
سيرين: شو هيي

لجين: ببساطة سيرين او دارين او غنوى، وحدة منكن تتصل ب سابين و تقلا بدي احكي معك بموضوع مهم و بمكان محدد و معزول نوعاً ما عن البشر، طارق أو كريم بيتصل واحد منن ب سامي بلاقيه بنفس المكان، اللي بتشوفا ل سابين تواجهها ببساطة بالموضوع قبل ما يوصل سامي، اذا قالتلك انو سامي بيعرف بتلغو الفكرة و بتروحو قبل ما يجي سامي مع كريم او طارق، و اذا قالتلك لا تخبريه وبان عليها الخوف، كملي معها بالحديث و هدديها بانك بدك تخبريه ل سامي بالقصة و ضلي ماطلي بالموضوع لوقت ما يوصل سامي و يسمع الحكي،
طارق: وكيف بدنا نعرف شو صار مع البنات؟
لجين: بس توصلو بتعرفو، خلو بيناتكن تقريباً عشر دقايق، و اذا خفتو انو تخلص سابين قبل ما توصلو، سجلو صوتها
دارين: عجبني هالحكي خلينا بكرا ننفذها،
كريم: وأنا موافق
طارق: كلنا موافقين، شو عندك بكرا؟
لجين: بخلص دوام ع ال4 وبعدا ما عندي شي
طارق: تمام لكن عطيني رقم موبايلك لاتصل فيكي بكرا
تلبكت كتير و ما عرفت كيف اتهرب من الاجابة
سيرين: اذا بدك بعطيكي رقمي اذا مو حابة تعطيه ل طارق
تنهدت و ابتسمت بتكلف: بصراحة ما معي موبايل، بس بكرا ان شاء الله بلاقيكن هون
دارين ابتسمت: بسيطة مانها هالمشكلة لا تتلبكي يا قلبي، تمام بكرا لاقيلنا هون ع الساعة 5
غنوى: ما بدي كون وقحة معك، بس أنا معي موبايل مو بعازتو شو رأيك تاخديه؟ في بقلبو شريحة
لجين: حياتي كلك ذوق، بس مافي داعي تتعذبي أنا بجيب واحد بس يصير معي
غنوى: بس بدك تشتري موبايل بتاخديني معك ماشي
ضحكت: تمام باخدك
تاني يوم خلصت من الدوام و رحت محل ما كانو بعد ما اشتريت سندويشة فلافل و اكلتا، حسيت حالي متطفلة بيناتن، بس كنت عم جرب كون اجتماعية
اجو الشباب و الصبايا و سلمو عليي،

دارين اتصلت ب سابين و قالتلا تلاقيلا عند النهر، بعد عشر دقايق اتصل طارق ب سامي و قلو يجي ع نفس المكان بعد ربع ساعة،
وصلت سابين قبل ما يوصل سامي ب عشر دقايق،
كنا واقفين بعيدد عنن شوي،
سابين كانت عنجد بتجنن، طويلة و جسما بجنن و شعرا طويل خرنوبي وعيونها عسليات بيلمعو،
دارين كانت متصلة ع موبايل سيرين و سيرين عم تسجل المحادثة و نتسمع بنفس الوقت،
سابين: شو في دارين ليش اتصلتي و بدك تشوفيني
دارين: أنا اتصلت لقلك إنو اذا ما بتبعدي عنو ل سامي بالحسنى أنا رح خبرو بكلشي صار بغيابو
اتلبكت كتير سابين و ما عرفت شو تحكي، كنا منتبهين ع حركاتا الملبكة، بعدا قالت: بس أنا بحبو ل سامي
دارين: إنتي...
بس دارين سكتت لما شفت سامي وراها ل سابين مع طارق، كان مبتسم و بدو يحكي، بس طارق مسك ايدو واشرلو انو

لا،

دارين بلعت ريقها وقالت: بس إنتي خنتيه ل سامي بغيابو، و هوي ما بيعرف
اختفت ابتسامتو ل سامي وضل ساكت،
سابين: كانت غلطة و بس
دارين دمعو عيونا و قالت بصوت في غصة: وصلت القصة للخطبة و عم تقولي غلطة
سابين: بترجاكي دارين لا تقولي شي ل سامي بترجاكي، انا كتير بحبو
بس دارين ما بقا اهتمت فيها لانو سامي نزلو دموعو و برم ضهرو و راح،
دارين: سامي استنى
طارق: سامي لا تروح استنى شوي
تركوني رفقاتو واقفة و عم اطلع عليه و ركضو ل عندو، سابين ضلت واقفة مكانها و دموع الندم نازلين ع وجها،
رحت وراهن و وصلت لعندن كان سامي عم يحكي بهدوءو لطف مع طارق و كريم الي كانو مساكين ايديه و عم يهدوه، هاللطف و الهدوء بدل التعصيب والعياط خلوني اعرف قديش هوي محترم و بيعرف كيف يتعامل مع رفقاتو و خاصة إنو ما إلهن ذنب،
سامي: طارق، كريم، الله يوفقكن رفقاتي اتركوني بدي روح
طارق: وحياة رفقتنا خلص، اهدى شوي
كريم :اهدى شوي
دارين: حياتي يا سامي اهدى، ما تروح انت و هيك
سيرين قالت من بين دموعها: امانة لا تروح و إنت هيك سامي
غنوى: إنت رفيقنا الغالي يا سامي لا تكسرنا هيك، خليك مشانا
مسح دموعو سامي وابتسملن: خلص هاه هديت
كانو بيعرفو انو قلبو محروق بس مشانن ابتسم
كان لازم ادخل و احكي، لأنو وجعني قلبي عليهن و خاصة سامي، ما بعرف ليش حسيتو دخل ل قلبي، يمكن لأنو كتير لطيف و كتير منيح، يمكن موقفو مع رفقاتو، يمكن لأنو ما بهدلها ل سابين بالوقت اللي كان لازم يعبر عن مشاعرو و غضبو،
لجين: الله يجعلها أكبر المصايب
اطلعو عليي كلن، سامي اتفاجئ إنو أنا موجودة قدامو،
سامي: انسة لجين، انتي هون، كيفك و كيف صرتي؟
لجين: انا تمام كيفك إنت، كيفو قلبك؟
ابتسملي بلطف: مجروح بجرح الخيانة بس بطيب ان شاء الله
لجين: سلامة قلبك، ان شاء الله بطيب بسرعة
طارق: سامي، لجين ساعدتنا بإنو تعرف بهالخدعة اللي كنت عايش فيها، ما رضت إنك تضل عايش بخدعة و ساعدتنا
ابتسم: شكراً إلك آنسة لجين، بس ما كان في داعي تزعجوها للآنسة بمشاكلي
لجين: لا تخاف بيلتئم جرحك، و ان شاء الله بتلاقي الاحسن منها

مرت القصة هيك و من وقتا و شكلو ل سامي الهادي ما عم يروح من بالي، يا الله قديش هوي شخص محترم و راقي، كنت فكر فيه كتير، و بالشركة لمحتو اكتر من مرة، ببساطة ببساطة ببساطة، دخل لقلبي و صرت حبو، بس أكيد هوي مجروح و تعبان و طالع من قصة جديدة و أنا كبنت مو قادرة قلو إني بحبو هيك،
حاولت فكر كتير كتير إنو كيف بدي وصلو حبي أو كيف بدي افتح معو موضوع أو التقى فيه أو أي شي ممكن إنو يصير و احكي معو، بس هالقصة صارت لحالها و بدون ما عذب حالي، كنت طالعة بالاصنصير ع الطابق السابع مشان شغلي بالشركة، و وقف الاصنصير بالطابق التاني و دخل سامي،
ابتسملي اول ما شافني: يي آنسة لجين كيفك
لجين: أنا تمام استاذ سامي كيفك انت
سامي: شو هي استاذ، قولي سامي وبس
لجين: لكن قول لجين وبس
ضحك: طيب، لوين طالعة
لجين: بدي اخد الملفات و حطن بالادارة فوق
سامي: اذا بدك بساعدك انا وباخدن و بحطن، انا طالع ع مكتبي
فكرت بيني و بين حالي بفكرة و بعدا ابتسمت: يا ريت،
اخد الملفات مني بابتسامة ناعمة و لطيفة قلي: تكرم عيونك السود لجين
ضحكت، وصل ع السابع، طلع من الاصنصير سامي و أنا نزلت ع الطابق الاول، لو ما ساعدني كان ممكن إني ضل ساعة عم رتب فيهن و خاصة انهن بالارقام،
خلص الدوام و رحت وقفت عند سيارتو ل سامي وانطرتو،
بعد نص ساعة طلع من الشركة و الموبايل بايدو، رفع راسو و إجت عينو بعيني.....#أريد_الوصول_لقلبك
الجزء الرابع

رفع راسو و إجت عينو بعيني، ابتسم و قرب لعندي،
سامي: شو بلاقيكي ما رحتي
لجين: لأ ناطرتك،
سامي: بدك وصلك بطريقي، طلعي
لجين: لأ، بدي ردلك جميلك
سامي: عن أي جميل عم تحكي؟
لجين: مو إنت ساعدتني بالملفات، وأنا بدي اعزمك ع قهوة، مو قدرتي اعزمك ع غدا، بس حابة نشرب فنجان قهوة سوا
ضحك سامي و لمعو عيونو: طيب قبلتا للعزيمة، بعرف كافيه كتير حلوة و هادية جنب البحر، منروح لهنيك شو رأيك
لجين: أكيد بدون تردد...
طلعت بالسيارة معو و رحنا ع الكافيه،
طلبنا قهوة، قهوتو حلوة، وقهوتي سادة،
سامي: كيف فيكي تشربيها سادة فهميني
ضحكت: بحبها هيك، مرة متل حياتي
سامي: ليش شبها حياتك؟
لجين: عندك إخوات؟
ابتسم: لأ أنا وحيد لأبي و أمي
حسيتو جاوبني بسرعة وابتسملي مشان ما يحرجني بالاجابة عن سؤالو، يمكن حس عليي إني اتدايقت من السؤال
لجين: ما بتتمنى يكون عندك إخوات؟
سامي: طارق و الشلة عوضوني عن الاخوة، هني عيلتي التانية
لجين: كيف بتعرفو ل طارق من زمان و اجيت تسأل عن بيتو؟ وخاصة انو بيتن فيلا يعني أكيد مو بالمكان اللي كنت عم تسأل فيه
سامي: طارق كان ساكن بفيلا قريبة من الفيلا اللي أنا ساكن فيها، و الشلة كلا تقريباً بنفس المنطقة، قبل ما إجي لهون بسنة طارق و اهلو اشتروا فيلا جديدة و انتقلو عليها، و أنا ما بعرفها للمنطقة منيح، لهيك سألت
لجين: إنت وحيد، مدلل، معك كلشي، دخلت ع مكان

شعبي و ناس فقيرة، ما خفت مثلاً يسرقوك و ياخدو مصاريك و سيارتك؟
ابتسم ابتسامة عريضة: لأ، أنا صح وحيد بس بعتمد ع حالي من صغري، و دلال أبي و أمي إلي محدود، مو كلشي بتمناه بيوصلني، علمني أبي إنو كلشي بهالحياة بدي ياه لازم اسعى لاحصل عليه، و إمي دكتورة، علمتني إنو البشر نفس الشي و ما في هاد فقير و هاد غني، في هاد بشر وهاد بشر، هاد لحم و دم و هاد لحم ودم، ما بقدر ميز بيناتن، لأنو بالأخير كلو إلى فناء، و علموني أهلي ع طول إنو حب الناس، حتى لو عاملوني بسوء، بالنهاية أنا عايش لارضي رب العالمين مو لارضي البشر

لجين: حابة اتعرف ع ابوك و امك كتير
سامي: بتنورينا إيمتا ما حبيتي بتجي وبتتعرفي عليهن
لجين: إلي الشرف، مانك عصبي أبداً و كتير رايق
سامي: ما بفيدني التعصيب، انا هادي و رايق من صغري، واوقات غضبي كتير قليلة
لجين: كامل مكمل
سامي: لا مو لهالدرجة
وصرنا نضحك،
سامي: عندك انتي اخوات واخوة؟
لجين: ما بعرف
سامي: عفواً، ما فهمت كيف يعني ما بتعرفي
لجين: أبي و أمي منفصلين من صغري ، أمي متزوجة و أبي متزوج، و ما بعرف عنن شي و ما بعرف إذا عندي إخوة
سامي: آسف لو بعرف ماا كنت سألتك
لجين: لأ عادي، اسأل اللي بدك
سامي: مع مين ساكنة؟
اخدت رشفة من الفنجان و ابتسمت: لحالي
اطلع بفنجانو وسكت، ما عرف شو يقلي،
لجين: رفقاتك كتير حبابين
سامي: أي كتيييير حبابين و أنا كتير بحبن و بعتبرن أغلى من روحي
لجين: الله يحفظلك ياهن، ويبعتلك بنت الحلال اللي بتتمناها
سامي: تسلمي كلك ذوق
مرت الايام و صرت شوفو ل سامي كتير، بالشركة أحياناً و أحياناً يعرض عليي يوصلني، وأحياناً يقلي إنو الشلة بدن يطلعو مشوار و اطلع معن، الشباب و الصبايا حبوني كتير و أنا حبيتن كتير، ومع مرور الوقت والايام بسرعة كبيرة، عرفت انو بعد اسبوع من اليوم عيد ميلادو و رفقاتو بدن يعملولو عيد ميلاد و أما اشتركت فيه،
كنت قاعدة بالبيت و عم فكر فيه، شو بدي جبلو هدية و أنا المبلغ اللي معي دوبو يكفيني لاخر الشهر، قررت إني اعملو منديل قماش و طرز عليه بالابرة و الخيط اسمو و رسومات بسيطة،
جبت المنديل و عملتو، حطيت اسمو باسفل المنديل ع جنب و رسمت حواليه ورد و قلوب و عصافير صغيرة واوراق خضر،خلصتو للمنديل و طويتو منيح و حطيت بكيس صغير و حطيت الكيس بشنتايتي لوقت الحفلة،
اتسطحت وقعدت فكر فيه، ( علمني أبي إنو كلشي بهالحياة بدي ياه لازم اسعى لاحصل عليه) جملتو هي خلتني ابتسم و قول بصوت عالي: و أنا بدي قلبك يا سامي و رح اسعى و اعمل المستحيل لأحصل عليه، إنت الشي الوحيد اللي بتمنى ما اخسرو، يا رب اجمعنا سوا

نمت بهديك الليلة و انا عم فكر فيه،
فقت الصبح ورحت ع الدوام كالعادة،
صرت اشتغل أنا وعم فكر فيه، خلصت دوام و طلعت لبرا، كان واقف عند سيارتو عم يحكي ع التلفون و لما شافني ابتسم و رفعلي ايدو، ابتسمتلو و رفعتلو ايدي، ضليت ماشية و عم فكر يا ترى مع مين عم يحكي معقول مع سابين، أنا و عم فكر بتوقف جنبي سيارتو، بينزل من السيارة وبقلي: شو ناوية تروحي مشان تهربي مو
اتفاجئت بحكيو،
لجين: اهرب من شو؟
سامي: تهربي من انو تسلمي عليي، لتكوني بتكرهيني؟
لجين: اكرهك؟ انت شبك اليوم؟ شو هي اهرب من انو سلم عليك و بكرهك؟
سامي: ما بعرف قلت يعني معقول تروحي بدون ما تسلمي عليي؟ معناها اكيد بتكرهيني
لجين: شفتك عم تحكي ع الموبايل ما حبيت اجي و اقطع حديثك
سامي: مرة تاني اقطعيه لحديثي معلش بسمحلك
ضحكنا سوا،

سامي: طلعي لوصلك
لجين: لأ ما في داعي، حابة اتمشى
ركب بسيارتو و حطها عطرف الطريق بطريقة صح و نزل قفلها وقرب لعندي،
سامي: يلا
اطلعت عليه باستغراب: ما فهمت
سامي: مو إنتي بدك تتمشي للبيت؟ وأنا بدي وصلك، رح وصلك مشي تفضلي
ضحكت: مأحلاك
سامي: بعرف، قصدي شكراً عيونك الحلوين
ضحكنا و صرنا نتمشى، ونحكي ونتسلى و من حديث لحديث،
سامي: قليلي لجين، إنتي شي مرة ارتبطتي و انجرحتي بجرح الخيانة؟
لجين: لأ
سامي: شكلو حبيبك كتير بحبك
ضحكت: أنا مو مرتبطة، و بحياتي ما ارتبطت
سامي: معقول!؟ ولا حتى بالجامعة؟
لجين: لأ
سامي: ليش

لجين: لسا ما إجا الشخص المناسب
سامي: ان شاء الله بتلاقيه و بكون ابن حلال و يحبك و يحترمك،
لجين: تسلم، عقبال ما تلاقي البنت الي تنسيك خيانتا لـ سابين
سامي: إن شاء الله
ضلينا نمشي لوقت ما وصلني ع باب الحارة،
سامي: كتير بعيد عن الشركة ما تعبتي؟
لجين: مبلا تعبت، بس متعوده ع التعب انا
سامي: رح اتصل بطارق يجي ياخدني، روحي إنت و بشوفك بكرا
لجين: ماشي اتفقنا
مشيت و تركتو واقف و ناطرو ل طارق....
مر الاسبوع بسرعة و هوي ما غاب عن بالي ولا ثانية وحدة، إجا يوم عيد الميلاد و اجتمعنا كلياتنا بمكان قريب من النهر، وزيناه للمكان و جبنا الكيك و جهزنا الطاولات، كنا نحنا الستة و ناطرين ليجي سامي،
لما اجا سامي صار يضحك،
سامي: ولك شو عاملين
دارين: اليوم عيد ميلادك، معقول ما نعملك حفلة متل كل سنة؟
سيرين: بس هالسنة في بيناتنا حدا جديد،
غنوى: لجين طيوبة مت

لنا، مبسوطين بوجودها بيناتنا مو
طارق: اكيد مبسوطين
كريم: كل عام و إنت بألف ألف خير سامي، يا أغلى رفيق ع قلوبنا كلنا
سامي: دخيل قلبكن شو بحبكن، و إنتو بألف خير، ان شاء الله بتضلو جنبي لحتى ختير و يهرو سناني
صرنا نضحك وبعدا قطعنا الكاتو، بس الفرحة ما كملت، اجت سابين،
سابين: كل عام و إنت بخير سامي
اطلع عليها سامي وضل صافن فيها،
دارين: شو جابك لهون
كريم: سابين روحي من هون ما بدنا تخرب فرحتنا بهاليوم
نزلو دموعا ل سابين: مشان الله سامحني سامي، إنت بتعرف قديش بحبك، سامحني وحياة ايامنا الحلوة سوا
طارق: سابين روحي
سيرين: خلص بقا تركيه بحالو، شو قصتك إنتي، حالفة تخربي حياتو و كل لحظاتو الحلوة
قربت مني و مسكت إيديي وقالت: مشان الله ساعديني، أنا ما بعرف شو اسمك، بس الكل ضدي، ساعديني الله يوفقك، قليلو إني بحبو ومستعدة اعمل كلشي ليسامحني
قربت غنوى منها و شالت ايديها عن ايديي وقالت: خدعتيه بما فيه الكفاية، لا تخلينا نفتح كل صفحات دفترك الاسود، خلي ببالو ل سامي شي حلو عنك و تركيه بحالو، يلا روحي من هون، لجين ما تردي عليها هي وحدة تافهة و كذابة
سابين: قليلو إني بحبو لجين، مشان الله ساعديني، ما رح انسالك هالمعروف ابداً
مابعرف كيف بشو كنت عم فكر لما اطلعت بسامي و قلتلو: سامي أنا بحبك
سكوت تام بالمكان، العيون المصدومة كلها عم تطلع فيي، سابين من بين دموعها لمحت لمعة الصدمة و الكره سوا، سامي اطلع عليي و هوي مصدوم و مو قادر يحكي، البنت اللي بحبها من سنين واقفة قدامو و البنت اللي بيعرفها من كم شهر بس عم تقلو بحبك، أنا واقفة بحرب خاسرة، بعرف إنو قلبو مو إلي،
لجين: ما بعرف كيف صار هيك، يمكن غلط مني، بس.....

قاطعتني سابين وقالت: بس بس بس لك شو عم تحكي إنتي
ما رديت عليها و كملت: بس حبيتك و حبيت حنيتك و لطفك مع الكل، حبيت طريقتك بالتعامل مع الناس، حبيت كتير ال....
الي سكتني هوي كف من إيدها ل سابين ع خدي،
هاد الكف رجعني يمكن للواقع المر، أنا البنت الفقيرة، هوي الشب الغني، حبيبتو ملكة جمال، و أنا مجرد بنت عادية،
ابتسمت وطلعت المنديل من الشنتة وقربت منو، مسكت ايدو و حطيت المنديل فيها،
لجين: كل عام و إنت بألف خير
كان عم يطلع عليي و بعيونو في لمعة، متفاجئ، محتار، مو عارف شو يقول، اختصرت عليه الطريق و قلتلو: كل إنسان بيستاهل تعطيه فرصة بحياتك،
ضل عم يطلع عليي بدون ما يحكي، شلت شعري عن خدي الاحمر من الكف،
لجين: متل ما بتعطي فرصة ل إنسان بحياتك، ممكن إذا غلط ترجع تعطيه فرصة تانية، وبوقتا هوي بقرر يا بيستغل هالفرصة يا لا، رب العالمين بسامح، سامحها و عطيها فرصة تانية، إنت بتستاهل تعيش مع الانسانة اللي بتحبها، خلي هالمنديل ذكرى مني، مو قدرتي جبلك هدية بتليق فيك و بكرمك و بقيمتك، بتمنى تعجبك
برمت وجهي و رحت، وتركتن ساكتين و متفاجئين، يمكن بعد كلامي سامي يرجعلها ل سابين، قلبي انكسر بس عادي، هي مو أول مرة بينسكر فيها،

وصلت ع الغرفة و اتسطحت و قعدت اطلع ع السقف، دموعي عن ينزلو لحالن، قلبي موجوع و عيونو ل سامي ما عم يروحو من بالي،

تاني يوم فقت وما رحت ع الشركة، لبست تيابي و رحت اتمشى لحالي، كان الجو شوي مغيم و حسيت إنو رح تمطر، تمنيت إنو تمطر لأني بحب المشي تحت المطر كتير، صرت اتمشى واتمشى واتمشى، رجليي اخدوني ع بيت ستي، وقفت و عم اتفرج ع البيت، دموعي عم تنزل اشتقت ل ستي كتير، يا ترى مرت عمي منيحة معها ولا لأ؟ قربت و دقيت الباب و فتحتلي بنت عمي سارة ولما شافتني ضلت صافنة فيني،
ابتسمتلا: كيفك سارة
سارة: لجين إنت إجيتي!!
لجين: إجيت اطمن عليكن
سارة: فوتي فوتي الجو بارد
دخلت وضمتني وقالتلي شتقتلك كتير يا اختي الكبيرة
لجين: وأنا شتقتلك كتير يا قلبي وينا ستي و عمي وإمك؟
سارة: أمي بالمطبخ و ستي قاعدة بالصالون و مشتاقتلك كتير وابي بالشغل
فتت ع الصالون و لما شافتني ستي بكت وقالتلي: يا عمري لجين يا بنتي شتقتلك كتير
قربت منهاا وضميتا، صارت تبكي و تحرك إيديها ع شعراتي، صرت ابكي من كتر ما كنت مقهورة، هالحياة قهرتني كتير يا ستي، ما تركتلي يوم افرح فيه، اشتقت ضمك و شم ريحتك، ما إلي غيرك بهالحياة، آآآخ شو تعبانة و شو موجوعة وشو مقهورة، كيف بدي اشرحلك كل هاد كيف،
بعدت عنها و ابتسمتلا ومسحتلا دموعها،
قربت بست خدودها وقلتلا: شتقتلك كتير
سمعت صوت من ورايي: أهلين لجين
وقفت واطلعت فيها ببرود: أهلين فيكي
بعدها سمعت صوت عمي عم يقول: سحر لك نسيت دفتر الحساب هون وينك
دخل ع الصالون و سكت لما شافني واقفة جنبها ل ستي و ستي ماسكة ايدي وعم تبكي
عمي سالم: لجين!!

كنت عم اطلع عليه بعيون مدمعة، رغم كل اللي صار هوي بضل عمي، بضل بحبو، بضل إلو مكانتو جواتي،
دمعو عيونو: وينك يا بنتي، فتلت الدني عليكي و ما كنت لاقيكي
قرب مني و ضمني و صار يبكي متل الولد الصغير، سامحيني يا بنتي
ضميتو وبكيت،كان سندي الوحيد بهالدني
سحر: سامحيني لجين ع اللي عملتو معك، اللي عملتو ما برضاه لبنتي، ما بعر

ف كيف صار هيك بيناتنا، سامحيني
قربت و ضمتني، ضميتا و دموعي ع خدودي،
ستي: لجين. بنتي ما بقا بتطلعي برا البيت ابداً، إنتي هاد بيتك
عمي سالم: هلأ منروح أنا و إنتي و منجيب غراضك وبترجعي لهالبيت، ولغرفتك ولجمعتنا سوا، وما بدي اي نقاش، معقول ما اشتقتيلنا
لجين: والله شتقتلكن كتير
سحر: وأنا؟ ولا لسا بتكرهيني؟
لجين: أنا بحياتي ما كرهتك مرت عمي، واكيد شتقتلك
بعدها رحت أنا و عمي ع البيت بسيارتو لعمي، جبت الغراض من البيت و سلمتو ل صاحبو، طلبت منو يمر ع الشركة، قدمت استقالتي و بعتا مع البنت اللي كانت عطول تقعد معي مشان ما شوفو لسامي، و طلعت
رجعت ع بيت ستي، و صرت اشتغل مع عمي بالسوبرماركت الصغير اللي لالو،
كنت مبسوطة برجعتي ع بيت ستي بس قلبي ضل عندو ل سامي، اللي ما بقا عرفت اخبارو ولا اخبار الشلة من يوم عيد ميلادو
مرت ايام و اسابيع وبيوم من الايام....#أريد_الوصول_لقل

الجزء الخامس و الأخير
مرت ايام و اسابيع وبيوم من الايام، بتدخل ع السوبرماركت دارين، و أول ما بتشوفني بتتوجه لعندي بسرعة،
دارين: لجين، هاد انتي، لك وين اختفيتي هيك فجأة، خفنا عليكي كتير و سامي كان عم يدور عليكي
لجين: أهلين دارين، ما اختفيت بس رجعت ع بيتي الاصلي، و ما قبل عمي ضل عم اشتغل بعيد و صرت اشتغل معو هون، كيفكن انتو و كيفو سامي، ليش عم يدور عليي؟
دارين ابتسمت و قالتلي: ما رح قلك شي إنتي بتعرفي لحالك،
تركتني و طلعت برا المكان بدون ما تشتري شي، خفت كتير من حكيا و خفت كمان من سامي، يا ترى ليش عم يدور عليي،
خلصت شغلي انا و عمي ع الساعة 7 المسا
عمي سالم: يلا بنتي استعجلي شوي، مشان نلحق نتعشى كلنا سوا
لجين: يلا عمي هاه فوراً،
طلعنا و ركبت معو بالسيارة و رحنا،
وصلنا ع البيت و مرت عمي كانت محضرة العشا،
سحر: لك تأخرتو ولو، يلا بسرعة بسرعة بدلو تيابكن و تعو، كتير جعنا
ستي: أي والله كتير جعنا،
رحنا و بدلنا تيابنا و قعدنا، اكلنا و لميت السفرة انا و سارة و جلينا و ضبينا الجلي و نحنا عم نضحك و نتسلى، بينما عمي و مرت عمي و ستي قعدو بالصالون و نطرونا،
عملت أنا و سارة شاي، و حطينا مكسرات،و نحنا و عم نشتغل حكيتلا عن سامي، و هيي حكتلي عن شب بالمدرسة بحبها،
ضحكت و قلتلا انو لسا بكير و اهتمي بدراستك و بالجامعة بتلاقي الاحسن، اخدنا الوقت نحنا و عم نحكي و ما حسينا الا و مرت سحر ع باب المطبخ عم تعيط علينا لأنو تأخرنا، ضحكنا و طلعنا، خلصت السهرة و رحنا نمنا،
الصبح فقت بكير كتير، لبست تيابي و طلعت، كانت مرت فايقة و عم تدندن غنية بالمطبخ و تعمل قهوة،
لجين: يسعدلي هالصباح
ضحكت سحر: و صباحك يا رب، شو ليش لابسة بكير كتير
لجين: ما بعرف ليش حابة اطلع بكير، رح اتمشى شوي و بعدين رح روح و افتح المحل، قليلو ل عمي اي
سحر: ماشي، انتبهي ع حالك

طلعت من البيت و حطيت ايديي بجيبة الجاكيت، و صرت اتمشى، كنت عم ابتسم لحالي انا و ماشية كل ما مر سامي ببالي، وصلت ع المحل و فتحتو وفتت، ظبطت المكان و قعدت استنى عمي، انفتح باب المكان و لما اطلعت لشوف مين بتفاجئ بسامي قدامي، وقفت و اطلعت عليه وانا متفاجئة،
لجين: س..سامي
سامي: إنو شو عملتي إنتي خربطتي كل حياتي و رحتي؟
لجين: أنا ما عم...عملت شي
سامي: عنجد!؟
لجين: اتفضل اقعد
سامي: بتجي بكل هدوء و بتقليلي سامي أنا بحبك و تاني يوم بتختفي، البيت بتتركيه و الشركة بتتركيها و بعدها بتقليلي انا ما عملت شي!!!
اتلبكت و ما عرفت شو قول، ضليت عم اطلع عليه و الخوف بعيوني،
سامي: اللي بحب التاني بيشتقلو و ما بيتركو صح؟
لجين: الساعة 7 ليش جايي بهالوقت المبكر كتير
ضحك و قلي: إلي واقف هون من ال 6، ناطر حضرتك لتجي، ما قدرت نام مبارح، تخيلي إنو القدر عم يحاول بشتى الطرق إنو يجمعنا، و كأنو عم يقلنا إنتو خلقتو لبعض و لو شو ما صار أنا رح اجمعكن سوا،
ضليت ساكتة و عم اطلع فيه و بعيونو اللي شتقتلن كتير،
سامي: أول مرة وقت سألتك عن بيت طارق، كيف رجليي أخدوني لقدام باب بيتك، وتاني مرة وقت اللي طارق وقعك بالموتور كيف اتصل فيني أنا بالتحديد لإجي و أخدك ع المشفى، وتالت مرة وقت عرفت إنك بتشتغلي بشركتنا، ورابع مرة وقت شفتي طارق ع البحر مع الشلة و سمعتي قصتي مع سابين و كلو بالصدفة، و خامس مرة وقت دخلت لهون دارين بالصدفة كمان و شافيتك و إجت لتخبرني،
حسيت بدقات قلبي زادت كتير، عيوني عم تلف بالمكان من محل لمحل وعم دور ع مكان اهرب فيه من الاجابة ع كل هالحكي،
سامي: إنتي قلتيلي بهداك اليوم، كل إنسان بيستاهل تعطيه فرصة بحياتك، و بنفس الوقت كل انسان بيستاهل تعطيه فرصة تانية وهوي بيختار يا يستغلا يا لا،
لجين: بترجاك سامي مو حابة احكي بشي و خاصة بهالموضوع
سامي: القدر حاول يجمعنا و يقربنا اكتر من خمس مرات و إنتي بكل مرة بتهربي،
لجين: ما عم اهرب بس ما بدي ادخل بحرب أنا خسرانة فيها
ضحك سامي: حرب شو هي؟
لجين: علاقتك مع سابين هيي الرابحة
سامي: لو هيي الرابحة ما كنت دورت عليكي،
لجين: إنت..

ليش... دورت عليي
ابتسملي بلطف: دورت عليكي لقلك إني سامحتا ل سابين
حسيت قلبي وقف لما قال هيك،
سامي: بس ما عطيتا فرصة تانية لأنها ما بتستاهل فرصة تانية،
لجين: سامي أنا...

سامي: اسمعيني لجين، بالوقت اللي قضيتو معك رغم انو قصير كتير و هني كم شهر مو اكتر، بس قلبك و طيبتك و حنيتك و الحزن بعيونك الحلوين، دخلو ل قلبي و بنولك قصر جواتو مو بس مكانة، الخيانة صعبة كتير و من المستحيل إني ارجع لإنسان خدعني، إنتي بتستاهل فرصة بحياتي لجين، وللصراحة بتمنى كون بستاهل فرصة بحياتك
اطلعت عليه و حسيت دموعي عم يتسابقو مين بدو ينزل بالاول،
سامي: أنا بحبك لجين، إذا بتقبلي تعطيني فرصة بحياتك، اليوم بتصيري إلي أنا و قدام الكل،

لما قال هيك بلشت ابكي وابكي و قعدت ع الكرسي و غمرت وجهي بايديي، قرب لعندي و جثى عركبو قدامي و مسك ايديي و ابتسملي،
سامي: لا تبكي لجين
لجين: قلي إنو مو أنا السبب بفراقكن عن بعض إنت و سابين
سامي: سابين لو احترمتني و حبتني متل ما احترمتا و حبيتا ما كان في قوة بتبعدني عنها، الغلط غلطها هيي مو غلطك إنتي، بعدين شو بدك فيها هلأ، قليلي بدك تعطيني فرصة؟
لجين: أكيد بعطيك فرصة و تنين و تلاتة وعشرة
ضمني وصرت ابكي اكتر و اكتر، بعد عني وقلي: وين بيتكن لجين؟
دليتو ع البيت و قلي اليوم المسا رح يجي مع اهلو يطلبوني،
خبرت عمي باللي صار و قلي أهلا وسهلا والله يقدم اللي فيه الخير
المسا اجا مع أهلو و طلبوني، كانت امو حبابة و حلوة كتير، و ابوه كان شخصية بشكل، وكان باين عليهن الحب و الاحترام، و ما بينولنا أبداً انو هني اغنياء و نحنا لأ،
هلأ عرفت ليش سامي حلو هالقد، آخد كل الصفات الحلوة الموجودة بأبوه و أمو،

تم النصيب و خطبنا، ضلينا مخطوبين تلت شهور، و بعدها عملنا العرس وتزوجنا،
كان شهر العسل باسبانيا، أحلا أيام حياتي، قربو مني و ضحكتو و الشغلات اللي بيعملا مشان يسعدني ويشوف ضحكتي، صرت حبو أكتر و أكتر، و بآخر يوم قضينا السهرة بمطعم كتير حلو و راقي، كنت لابسة فستان اسود طويل و شعري رخي، وحاطة مكياج خفيف، وهوي كان لابسة بدلة ناعمة و حلوة، كانت لابقتلو كتير و طالعة فيها جنتل مان،
قمنا بنص السهرة و رقصنا ع اغنية
" I will always love you "
كل الرقصة وهوي عم يطلع عليي،
سامي: طالعة بتجنني و عيونك بتجنن، وشعراتك بجننو،
ضحكت بخجل: مأحلاك
سامي: شو بحب هالكلمة منك،
لجين: دخيل قلبك
سامي: أنا بحبك كتير لجين، أكتر بكتير مما إنتي بتتخيلي،
لجين: رح ضل حبك لحتى موت، رح حبك أكتر و أكتر بكل يوم و يوم، رح تضل فرحتي بهالدني
سامي: رح يضل حكيك هيك حتى بعد ما نكبر ويصير عنا ولاد وتصير مشاكل بيناتنا؟
لجين: رح يضل هيك، لوقت نكبر و نختير و يهرو سنانا
ضحك: يا كل الدني
لجين: أنا، أنا كل الدني؟؟؟
سامي: لأ، إني الدني و اللي فيها، وقلبي و روحي و عمري وحياتي، إنتي الحلا اللي بصحى و بشوفو كل يوم، إنتي الأمل لأيامي الجاية، إنتي اللي رح تصيري إم لولادي
لجين: رح تحب ولادنا أكتر مني؟
سامي: رح حبهن ع محبتك يا عمري
ضميتو و قلتلو: بحبك كتير

مرت خمس سنين وصار عنا ولدين بنت وصبي، نور و نوار
كنا قاعدين ع البرندا عم نشرب قهوة و قلي سامي: بتتذكري شو قلتيلي من خمس سنين بآخر يوم بشهر عسلنا؟
ابتسمت: أي بتذكر
سامي: ارجعي قوليه
لجين: لأ بدي قلك شي تاني
سامي: شو هوي؟
لجين: لو بينعاد عمري مرة تانية بختارك شريك لحياتي مرة تانية
ابتسم سامي و لمعو عيونو،
فتح تمو ليقول شي بس ابني نوار عمرو 3 سنين دخل لعنا و ركض لعندي وقلي إنو جوعان،
ضحك سامي: قومي يا ماما و طعميني أنا و نوار
ضحكت و قمت ع المطبخ لحضر الفطور ل ابني و زوجي الغاليين،
قعدو ياكلو قدامي و يضحكو و يمزحو سوا، وأنا عم اطلع عليهن واتأمل جمالهن بابتسامة عريضة مع بنتي الصغيرة اللي بحضني وعم تكاغي عمرها 3 شهور،
لجين: الله لا يحرمني صوت ضحكتكن بهالبيت.
النهاية❤️ .....

( الحُب )
بـِ عمرك ما تقيس درجة حُبك بـ الإشيا المادية اللي مُمكن تقدمها لـ حبيبك من هدايا " مفاجأت " ومصاري
الحُب أصدق وأعمق وأطهر وأكبر وأبقى وأنقى من هيك ..!!

و إذا تطلعنا شوي عَ العلاقات الزوجية ح نشوف إنو نسبة النفور والطلاق وصلت حدها ..!!
كونو أغلب الرجال بيغطوا إهمالهن بـ الإشيا المادية اللي بيقدموها لـ زوجاتهن من دهب " موبايل جديد " أو قطعة تياب ..!!
وبينسوا إنو الإهتمام والإحترام والتفاهم والإحتواء والإنسجام
( هنن اللي بيعملوا حُب صح .. وعلاقة أبدية أصح ) ..!!

الحُب .. فينك تاخده من نكدها .. لما تلاقيها عم تعمل مشكلة من الولاشي وتدقق عَ أتفه وأصغر التفاصيل بـِ علاقتكن وتشوفها عم تحاوطك بـِ غيرتها وتمنع أيَ صبية غيرها تفكر إنها تقرب منك أو تحاكيك ..!!

الحُب كمان .. فينك تاخده من خجلها .. لما تكون قدامك
ولـ مجرد إنك تطلع فيها ح تتكركب وتتلبك وتبطل تعرف تكفي حكيها .. وتبلش تشوبرلك بـِ إيديها وتقلك : إنو كيف بدي إشرحلك .. أكيد فهمت عليّ ما ?!
وبنفس الوقت نظرتها البريئة إلك .. ح تخليك تحس إنو قلبك عم يتاكل عشق فيها ..!!

وبـِ عمرك ما تحصر الحُب بالـ مطربين والروائيّن والشعراء
إنت فينك تكون أحسن وأفضل منهن بكتير ..!!
مثال .. جربت شي مرّة إنك تغنيلها بـِ صوتك الـ مش حلو .. وخبرتك إنها بتحسه أكتر صوت بـِ الدني حلو ?!
جربت إنك تكتبلها قصيدة لو ما كانت متناسقة أو زابطة .. وخبرتك إنها أول قصيدة بـِ العالم بتدخل قلبها وبتحسسها إنها طايرة من الفرح ?!
ما تستغرب وتسميها مجاملة .. الصبية لما توصل لـ قمة عشقها ما بتعرف تجامل وكلشي بتحكيه صدقه ..!!
( ولك إي إي هاد هو الحُب ) ..!!

الحُب كمان .. فينك تاخده من إهتمامك فيها وخوفك عليها
لما تشوفك عم تعمل الـ مستحيل كرمال تحافظ عَ وجودها
بـِ حياتك .. والأكيد هيّ ح تعمل أكتر منك تـ تحافظ عَ وجودك بـِ حياتها ..!!

الحُب .. هو صبية ضايعة لقت حالها فيك .. وشب متلك بعد ما لقاها حافظ عليها للأبد ..!!

وضروري كتير إنك تعطيها المساحة اللي تحسسها إنها متل طفلة صغيرة قادّرة تركد وتلعب وتتخبى .. وبيلزمك كمان إنك تحترم وقتها " كيانها " والأكيد أحلامها
لما تقلك : عَ بالي كون هيك بـ المستقبل
الحُب .. هو إنك تساعدها بتحقيق هالـ حلم وبـِ إيدك تاخدها عَ المستقبل اللي حلمت فيه .. تـ يصير واقع ..!!

الحُب .. موجود بـِ قلب كل حدا فينا
بس مش كل حدا فينا .. بيعرف يعبر عنه أو يعيشه بـِ الطريقة الصح ..!!

بحبك .. يعني مستحيل مل أو إشبع منك
بحبك .. يعني إنك تكوني مني .. وكون منك
بحبك .. والله يلعن أبو هالـ كلمة إن ح قولها : بيوم
لـ غيرك .. أو تقبلتها غير منك ..!!
ــــــــــــــــــــــــــــــــــــــــــــــــــــــــــــــــــــــــــ
يحيى محمود خليفة

اتزوجوا عن حب.. 🌸💜

مشان بس تجيبوا ولاد تخلوهن يعيشوا بحب ويتعاملوا مع كل الناس بحب

مشان لما يزيد وزنك ما يقلك ليش هيك صايرة نحفي حالك
لا بقلك حبيبتي أم كرش وبجبلك عشا كمان

مشان بس يكون عندك مشوار مع رفقاتك ما تقعد تنكد عليك و ليش تاركني و ليش لهلأ
بالعكس بتشجعك تطلع بهمها تشوفك مبسوط

مشان بس ينذكر اسم حدا منكن قدام التاني عيونكن تلمع

مشان لما بتحرقي الطبخة ما يقعد ينق وينكد
يا بياكلها غصب عنو يا بلف زعتر

مشان لما يكون عندك مباراة وتكون مولوش بحالك
تقعد تتابع معك وتدعيلك يخسر الفريق التاني
مع إنو مو فهمانة شي

مشان لما حدا منكن يغلط بكفي يعترف بغلطو والحب بصلح الباقي

مشان لما تكونوا سوا تعرفوا إنكن بالمكان الصح وكلشي مر قبل كان غلط

مشان بس تمرضي وتكوني مو مشطة شعرك يقلك شو إنك حلوة وشو بحبك مع إنو بتعرفي إنك بتكوني طالعة جعفر

مشان يعاملك ع إنك انسانة خاصة فيه ومهمة

مشان بس يسألوها عنك تقلن ما بقدر أوصفو مارح أوفيه حقو

مشان بس تكون بحاجة لحضن تلاقيها ضاممتك بقلبا

مشان بس تتصوري ما يقعد يقلك حاج بالعكس بوقف حدك وبيعمل حركات بايخة

مشان يكون عندك رفيقة قبل كلشي

مشان بس تقسى عليك الحياة تمسك إيدك وتحارب معك
وما تكون هيي والدنيا عليك

مشان بس يفيقك من الصبح مشان تدوريلو ع فردة الجرابات يلي هيي قدامو ما ترتكبي جريمة
بتقومي بتعطيه ياها مع بوسة
(يفضل البوسة تكون من الروتين اليومي)

خدي واحد ماتخجلي تغني قدامو وقت بتطلع أغنيتك المفضلة بالعكس بقوي الصوت وبغني معك مع إنو أصواتكن نشاذ

خود وحدة ما تخجل قدامها تطلع الطفل يلي جواتك

خدوا عن حب

لأنو الحب هو الشي الوحيد يلي بخليكن تتقبلوا بعض بكل الحالات وبكل الظروف

♡جمعتنا الغربة♡
{الجزء الأوّل والثاني والثالث
🖤🖤🖤🖤
من بلد عتيق،،من حارات صغيرة،،من

شوارع الشام العتيقة يلي عاش فيها

الناس بأمان وسلام بمختلف الأديان

والألوان والأعراق،،من ساحاتها

لمليانة حب وريحة ياسمين،،ومن

بداية عام 2011 بديت مأساة

سورية سرقت فرحة أهل هلبلد راح

الأمان ونمحت لضحكة من لبيوت

ولقلوب يلي استحلها ألم الفقدان

والظلم والتشريد،،ويوم عن يوم

ضاقت المطارح وكترت لخيبات

وابتدت الهجرة يلي حملت معها

حكايا منها لحلو ومنها لمر وحكايتنا

وحدة من هلحكايا يلي غيرت قدر

وحياة ناس كتير23\1\2016
الحدود السورية ولمطر غزير كأنو

سما هلوطن عم تبكي ع أهل الأرض

يلي عم يصارعوا قدرهم ويواجهوا الموت...

المهرب حيدر: جاهزين كلكم ؟ادامنا طريق طويل

المجموعة :اي جاهزين

ابو جابر: بنتي بلالنا ياها ولله قلبي مو مطمن

لانا: لاء بابا انا مالح اتراجع وعتمد

عليي لح نخلص من هلحرب ولح

نبلش حياة جديدة بدون مانصحى

عصوت لطيران وننام عصوت المدافع

ابو جابر: ----حسبي الله ونعما الوكيل

مسكت لانا أيد أبوها وكأنها عم

تحاول تعطيه شوية أمان وأنو كلشي

لح يكون منيح بلرغم من الخوف يلي ساكنها

وجنبهم في بنت بعمر ال 25 لحزن

مغطي جمالها وعيونها دبلانين

حاضنة طفل رضيع بين إيديها.

حد المهرب حيدر كان في شبين كل

لوقت ساكتين وعيونهم متل البركان

المهرب حيدر: يالله لكل ينزل عنا

مشي مسافة قصيرة وبعدها لح

نوصل على نهر لازم نقطعو سباحة

وبدكم تكونوا حريصين ماني مسؤول
عن أيا غلطة بتغلطوها..

نزلوا كلهم وبلشو مشي بلبساتين

وكانت الساعه 11 بليل وكلهم عم يمشوا سوى
وحيدر عم يراقب لطريق

لانا سرحت ورجعت فيها الذاكرة

**فلاش بااااااك*****

قصي: انا ماني مضطر ياست لانا

أتحمل عنادك قلتلك مليون مرة هي
أمي وانا مافيي زعلها

لانا:أمك ياقصي لك وأنا شوو كرمال

الله فهمني لك مفكر ماعندي كرامة

ولا بتشتريني بمصريك ياابن الاكابر

قصي: هاد الحاضر وهاد الموجود،،،

لانا : ياخسارة لحب فيك تركت

كلشي كرمالك ونطرتك سنين ياقصي

وانت كافيتني كتر خيرك ممنونتك

**فلاش باك*******

المهرب حيدر: هلق بدكم تركدوا

وصلنا على النهر وحاولوا بدون صوت

ركدو لكل لوصلوا للنهر وبلشوا يمشوا

شوي شوي ولمي غامرتهن وصلوا كلهم لنص النهر وكان كلشي

تمام لوقت ما بلش ابن ياسمين يبكي

لكل وقفو بأرضهم بدون أيا حركة

حيدر ضرب بإيدو ع جبينو

ولجندرما ركدو باتجاههم ومعهم المصابيح
لانا:لاااء ياررب يااااربي دخيلك

نمسكوا كلهم وماكان في أيا ملجأ

وصلت لجندرما ومسكو الشبين

رفع إيدو العسكري ليضرب جود كف

ولسبب لأنو لوحدو بدون عيلة

لانا بسرعة وبدون ماتفكر: لاااء تركوه

لزوجي ركدت لعند جود ومسكتو من إيدو وعم تبكي

حيدر بقلبو: دخيل ربك نفدنا

ياسمين:وقفت حد علي لتبينلهم انهن عيلة لحتى ماينضربوا لشباب

ورجعو كلهم مع حيدر ع بيتو ل يبقو ليلة ويحاولوا تاني نهار من طريق تاني...وصلو كلهم علبيت وكانت لانا عم تضحك كتير وتتزكر شكل جود وقت قالتلو انت زوجي

جود: شو لهيئة مرتي مبسوطة الله يقدرني وفرحك عطول

لانا: بدال ماتشكرني يا ..

جود: انا جود

لانا: تشرفنا وانا لانا

ابوجابر: اي لانا تعرفي علعالم بعد مارفعتولي ضغطي من لرعبة

لانا: باااباا حبيبي انت بس دعيلنا وقويلي قلبك شوي لنعيش سوا احلى حياة لمهم ضلك معي

ابوجابر: لك ليش انا الي غيرك بهل دنية

حيدر: انا طالع جيب أكل وأرجع

ياسمين وهي خجلانة:لووسمحت

حيدر: اي تفضلي

ياسمين:فيي أطلع معك بدي جيب كم غرض ل أبني

حيدر: اي مافي مشكلة ناطرك عند الباب

جود:علي شو صار معك حاكيت أمك

علي: لاولله شريك ماعم اقدر اوصلها شبكة زفت

جود:شفتلي هل بنات يلي معنا اخوات رجال

علي: اي ولله الله يستر عليهم

جود: آمين يارب

حيدر وياسمين ماشيين بطريق الضيعة ليوصلو على اقرب دكان

حيدر:معلش سؤال

ياسمين: اي،،تفضل

حيدر: يعني انتي لحالك ومعك هلطفل مالك عيلة وزوجك ليش مو معك

ياسمين: انا ارملة وبعد مااستشهد زوجي عرفت أني حامل

حيدر: الله يرحمو،،يلا وصلنا

فاتو علدكان وشافهم صاحب لدكان رجل كبير بلسن اسمه ابو عبدو من سكان لضيعة

ابوعبدو: شو ياحيدر شايفك تجوزت بعد سلمى

حيدر عصب وخبط ايدو عطاولة:انت اهتم بشغلك وماعليك من غيرو

اشتروا الغراض ورجعوا وحيدر نار

وشاعلة بقلبو،،وياسمين عم تراقبو

بصمت ومستغربة من ردة فعلو وشو قصتو مع سلمى وصلوا عل بيت ودخلوا ياسمين ولانا عل مطبخ يجهزوا أكل

ياسمين:ماشالله عنك متل لقمررر

انتي من وين وشو قصتك

لانا: ولله هلقمر تعبان

ياسمين:حكيلي اذا بتحبي!!!

لانا: انا من الشام وكنت مخطوبة لشب ونطرتو كتير كنت مفكرتو بحبني بس طلع دلول امه وببيعني كرمال كم قرش

ياسمين: اييي وبعدين؟؟؟؟؟؟؟؟؟

لانا:ولا قبلين تركتو وكرهت شي اسمو حب وقررت اترك لشام علحالتين لبلد خربانة ومابقيلي فيها شي،،،وانتي حكيلي؟

ياسمين: اناا،،تزوجت من سنتين وبعد زواجي بفترة استشهد زوجي وكنت حامل منو

لانا:الله يرحمو،،بس اهلك وين !

ياسمين: لأرملة بهل بلد بتصير تقيلة علكل وصارو بدهم يزوجوني لرجال اد ابي وبدهم ياني اترك ابني

لانا: لك مافي بقلبهم رحمة

ياسمين:هيك لدنية كلها ظلم بظلم

جود:شو رأيكم شغللكم ام كلثوم لك جعنا
لانا: وعم تتأمر كماان

جود:لا غلطنا ومنك لسماح

ياسمين:يلا خلصنا

أكلو كلهم وحسوا بشوية أمان بعد ماعرفوا بعض وكل واحد هانت عليه مصيبتو وقت عرف مصايب غيرو

حيدر:بكرا لح نطلع من طريق تاني ولح يكون فيو جدار عالي وبدو سرعة وخطير كتير

لكل:اي؟

حيدر:يعني أيا واحد بيوقع او مابلحقنا مستحيل نقدر نساعدو او نوقف كرمالو

طار لنوم من عيون لكل وافكار عم تاخدهم وتجيبهم،،كتير شعور صعب
انك تكون مابين الحياة والموت
لحظات بتشوف فيها شريط حياتك ادام عيونك
○○○○○○○○○
الساعة 5 وجه لصبح ع ضو لشمعة

جود:علي معقول نموت بكرا

علي: لك وضريب يأشك شو نكدي
توكل ع الله شريك

لانا:اذا متت انا ديرو بالكم ع أبي

ابوجابر:برضايي عليكي يابنتي خلينا نرجع

لانا:اااخخ يابي ياريت موت وروح عند امي واحكيلا اديش انا تعبانة

ياسمين:ياربي ابني بس تحميلي ابني مابدي شي من هلدنية

حيدر: ولله هيك دنية مابينزعل عليها

طلع لصبح وحيدر عم يتصل بلمهرب لتركي ليعطيه أشارة اذا الطريق أمان

حيدر:جهزو حالكم اليوم طالعين
غابت الشمس وركبو بلسيارة عطريقهم المجهول

وصلو على الغابة ولبرد عم ينخر بعضامهم نخر

لانا: دخيلكم ماعد اقدر

ابوجابر: اديش باقي لنوصل

حيدر:في لسا قدامنا ساعة بدكم تتحملو

ياسمين:دخيييلك يالله ابني

حيدر:هاتيه احملو عنك

ضمو حيدر لصدرو وحس ل أول مرة بشعور الأب

علي:ولله رحنا فيها شريك

جود:شد حالك وبعمرك شفت حمار اخدوه اسعاف

علي: يعدمني ياك شو دمك خفيف

وبقيو 3 ساعات عم يمشو لوصلو على الجدار

حيدر: اذا مااسرعتوا لح تموتو

طلع ابو جابر وياسمين وابنها وبعدهم علي

جود:لانا طلعي قبلي

لانا:ياربي انا خايفة

حيدر:لك حرررركي مامعنا وقت

طلعت لانا ونكشفت من قِبل العساكر الأتراك وبلشو يأطلقو نار بلهوا

لاناا:جووووود ساعدنييي
والنار معبي السما

وقعت لانا ولدم معبي صدرها
حيدر:لك حملها وطلااااااع لك طللعوووو
🖤🖤🖤🖤🖤🖤
_يتبع_♡جمعتنا الغربة♡
{الجزء الثاني}
ارتمت لانا بحضن جود
حيدر: بسرررررعة طلااااع لح ارفعك حط جود كل قوتو وضم لانا لصدرو ونط وهو حاملها
لحقهم حيدر
ابو جابر ركد ع لانا :كرمال الله فتحي عيونك وعم يبكي وعيونو بتشهد ع ضعفو أدام بنتو يلي مكللة بالدم
حيدر:عسريع ركدووووا وراااييي مافي وقت
ضل جود حامل لانا وهيي غرقانة بحضنو وعم تلقط أنفاسها بصعوبة
جود:كرمال الله تحملي لح تعيشي لاناااا لح توصلي بأمان مالح تموووتي
وشعر لانا الاسود نازل ع أيدين جود ويدفيه
كانت لانا متل طفلة صغيرة خدودها حمر وعيونها لخضر ماعد فتحوو
لانا:ق..قص..قصيي انا...

سمع جود لانا عم تقول قصي وحس بشعور غريب ووجع فات ل قلبو

وضلهم عم يمشو حوالي ساعتين وعلي وجود عم يتناوبو بحمل لانا لوقت ماقربوا عحدود (انطاكيا) وحالة لانا من سيء ل اسوء

ولكل تعبوا ورجليهم ماعد حملتهم
حيدر بقيلنا طلعة هلجبل ومنوصل ع بيت نستريح فيه

ياسمين وقعت عركبها :انا تعبببت وصارت تبكي

قرب حيدر وقلها عطينا إيدك

ياسمين نظرت نظرة وجع وماقبلت

حيدر: عتبريني اخوكي ابوكي شو مابدك والله يحرمني شبابي اذا نيتي أءزيكي

عطتو ياسمين إيدها وقطعو لجبل لوصلو علبيت

كانوا لكل فارطين تعب ورجليهم كلها طين وقلوبهم مطفية من يلي صار معهم

ابوجابر:لاناااا ياابنتي

حيدر:ماعليك عمي في هون خالتي ام صطيف بتساعدنا

ام صطيف:شو صاير معها هل بنت

جود:كاا>>كانت علجدار وتصاوبت

ام صطيف:صفاا بنتي هاتيلي لشنتا

صفا:يالله امي

فاتت صفا وبلشت هيي وأمها علاج ل لانا وطبعاً هنن مارق عليهم حالات كتيرة وعالجوا ناس كتير اثناء النزوح يلي صار

جود كل ليل سهران حد لانا وعم يتأملها ويتزكر كيف ساعدتو واديش كانت تجاكرو وبنفس لوقت مانسي اسم قصي يلي كانت عم تقولها بدون ماتوعى

أكلوا الكل وأعدوا حد صوبية بهل بيت لصغير وكل مين همو طامرو

ام صطيف:شو ياحيدر لإيمت بدك تضل عم تعاقب حالك وأنت مالك ذنب

حيدر:كرمال الله ياخالتي تركيني بحالي

ام صطيف:لك ياابني لشي يلي عم

تعملو بحالك ربك مابيرضاه

حيدر:وسلمى يلي ماتت بسببي وابني ياخالتي ابني يلي مات قبل مايفتح عيونو عهل دنية

ام صطيف: يا أبني هاد قضاء الله وقدرو ولموت علينا حق

حيدر: وانا ماشي بهل درب للاقي لموت

ياسمين سمعت حديثهم وبلشت تفهم ليش حيدر عم يخاطر بحياتو وشو سر يلي خلاه يشتغل هلشغل

علي:لووسمحتي

صفا:ااه ؟
علي: بس بدي تلفون حاكي امي اذا في مجال؟؟

صفا:اي تكرم

وجابت صفا تلفون ل علي وقدر يحاكي امه وخبرها اديش لطريق سهل وحاول مايخوفها ولايشغللها بالها

صفا:تشرب شاي؟

علي:اي ليش لاء

الساعة 6 لفجر

لانا:م...مم..ميي

جود: لاااانا حكت عميييي ياعمي

وصحيت لانا كانت لاصابة بكتفها بس لحمدلله مرقت ع خير ولكل كانوا فرحانين

لانا:يسلم إيديك جود حكالي أبي عن وقفتك معي

جود:____بسيطة لمهم انتي منيحة
حست لانا في شي غريب بجود

جود:فيني اسألك سؤال؟؟؟

لانا:اي اكيد

جود:مين قصي

لانا بعصبية:وانت من وين بتعرفو وشو دخلك

جود:ليش معصبة

لانا :لك ماني معصبة

طلع جود يدخن بلجنينة وكان كتير متدايق من تصرف لانا معو

لانا:احممم.....ليك بدون مقدمات انا آسفة

جود: لا تعتذري اصلا عادي هي حياتك وانتي حرة

لانا:قصي كان خطيبي

جود:_____

لانا: تركني من فترة وكرهت لبلد وكلشي فيها كان احلى شي بحياتي درسنا سوى بلجامعة وكنا مخطيين لمستقبلنا رسمت حياتي معو

جود:وبعدين؟

لانا:هو حالتو لمادية كتير منيحة أبوه وأمه عندهن شركات بلبلد وهو استلم شغل أبوه ومن بعدها صار شخص تاني ماعد لقيت لحنية لمتعودة عليها

جود:ومين يلي ترك

لانا: أنا ماقدرت كفي معو وحتى أهلو مابدهن ياني يعني علاقتنا ماكانت لح تستمر لو تزوجنا

جود: وشو ناوية تعملي بتركيا

لانا: في بنت خالتي لح تساعدني ع بين مالاقي شغل واخد ببت
اعدو تنيناتهم على المقعد

لانا بلشت تغني وصوتها لملايكي برد الروح: آه على قلب هواه محكم 🎶فاض الجوى منه فظلماً يكتم 🎶ويحي أنا بحت لها بسري اشكو لها قلباً بنارها مغرم،،،ولمحت من عينها ناري وحرقتي قالت على قلبي هواها محرم،،كانت حياتي فلما بانت بنأيها صار الردى آهٌ عليّ ارحم🎶🎶🎶كل القصايد من حلا عنيكي من دفا اديكي كتبتن وقلتن🎶🎶

جود قلبو عم يدق وعيونو عم تلمع وعم يراقب حركات ايديها هيي وعم تغني وشعرها لاسود يلي عم ينزل ع خدها وكل شوي بترفعو بطرف اصابعها وكيف بتغمض عيونها وقت تغني
علي: اي شو هل صوت يا لانا ولله غير شكل

لانا: اي من انا وصغيرة بغني

حيدر وياسمين واقفين حد بعض عم يشوفو لانا وجود

حيدر: يما لحب شو قصتهم هدول

ياسمين:هه الحب عطول بسمع عنو

حيدر: لحب متل مابعيشك احلا ايام عمرك بيقدر ياخد منك فرحة عمرك

ياسمين:بعدك بتحبها ل سلمى
حيدر:____الندم ماعم يفارقني

####اليوم التاني####

جهز حيدر السيارة وركبو كلهم ووصلو على تركيا بعد معاناة طويلة
_____________♡
{مدينة اسطنبول}

لانا: ياربي ماعم صدق اانااااا صرت بتركيا وعم تضحك وتضم ابوها

جود:لك علووووش وصلنااااا

علي: ولله وحنبلش حياة جديدة ياشريك

حيدر وياسمين كانو عم يتطلعو ببعض وكأنهم ماتمنوا يوصلوا

علي:في هون جنينة شو رأيكم نستريح شوي بعدين كل واحد بيتيسر

لانا وياسمين:اي ولله بكون أحسن لان رجلينا تكسرو

جود:شرفوا يالله

ومشيو كلهم ووصلو علجنينة

لانا:ديرو بالكم عحالكم وانا عندي صفحة علفيس منضل نتواصل

جود كان حاسس بحزن كبير وحس انو روحو تعلقت ب لانا

علي: اي لنوش انا بضيفك عندي اول ماجيب موبايل

ياسمين حطت ابنها حدها لتريح إيديها وتغسل

وحيدر كل الوقت عيونو على ياسمين

ابو جابر: لانا اتصلي ببنت خالتك وقليلا وين نحنا

لانا: اي بابا يالله

ياسمين:ابنييييييي لك وين عمرررر؟؟؟؟؟؟؟؟؟؟؟

لكل وقفوا شووو

جود:لك هدااااك وركد جود وورا الخاطف حيدر وعلي

وضاع منهن الخاطف وهنن مابيعرفوا حدا باسطنبول ولاحتى بيعرفوا الطرقاات

رجعوا الشباب لعند ياسمين

ياسمين عم تبكي ولانا ماسكتها:شوو لك وين اخدوووه ولاد حرام

دخييييلك يااااربي بدي ابني ووقعت بلأرض

لكل:ياااسميييين

ركد حيدر وحملها واستأجرو سيارة وصلو ع فندق بسيط

تلفون حيدر عم يرن،،،،،،،،

صفا: دخيلك ياحيدر ساعدني أمي

ردت اجتها النووووبة وانا بلمشفى

❤❤❤❤
_يتبع_♡جمعتنا الغربة♡
♡الجزء الثالث والأخير♡

جود: شووفي حيدر ليش نخطف لونك

حيدر :خالتي ام صطيف بلمشفى

لانا: لييييش شووووو صاير معها

حيدر: قلبها ضعيف وكل فترة عم تصير معها نوبة

ابوجابر:هلق ياولادي فكرو شو بدنا نعمل مالازم نضل هيك واقفين وهلمسكينة ياسمين كيف بدنا نلاقي ابنها

حيدر: لاتاكل هم عمي مالح اترك ياسمين إلا ل لاقيلها ابنها ولو على جثتي

وقفت لانا ومسحت دموعها وأيديها عم ترجف: سمعو نحن لازم ننقسم نصين حدا منا يروح لعند صفا ولباقي يبقو مع ياسمين لنلاقي عمر

حيدر:___وهو هيك

بلشت ياسمين ترجع لوعيها:عم...عمرر....ابنيي

لانا مسكت إيدها: ياروحي أنا معك

جود:انا وعلي رايحين لعند صفا بس بدنا حدا يدلنا علطريق انا مو فهمان شي بهل بلد

حيدر:لح اخدلكم سيارة توصلكم

ابوجابر:وانا جاية معكم

جود وعلي وابوجابر راحوا سوى ليوقفو مع صفا وام صطيف

بالفندق بقيو لانا وياسمين وحيدر

ياسمين نازلة عركبها وماسكة أيد حيدر:ببووس أيدك بببببوس إيدك لاقيلي ابني ودموعها متل لنار وقلبها متل لجمر

حيدر حس بنار بقلبو من دموعها :خلص انتي لازم ترتاحي

ياسمين: ارتااااح لك ااااااااااخخخخ ياربي حاربت أهلي وناسي وطلعت من بلدي وشفت لموت كرمال أبني لك كيف بدي ارتاااااح

لانا:كرمال الله اهدي خلص صدقيني لح نلاقيه بس لاتبكي

ارتمت ياسمين ع حضن

لاناا :ااااااخخخ يالانا لك قلبي عم ينعصر عمر لشي لوحيد يلي عايشة كرمالو

حيدر: وعد مني ابنك يرجع ل حضنك ومالح اتركك قبل ماتنحل هل قصة

لانا:اي سمعتي هي حيدر لح يساعدنا ومعنا جود وعلي وفي بابا كلشي لح يكون منيح روقي

ياسمين حست بشوية أمل من حكي حيدر وحست انو الها سند بعد ماتكالبو عليها أقرب لناس

السند شي كتير حلو بتحسي في شخص واقف بضهرك وبيحميكي بتحسي بلأمان والدفى وأنو لوشو ماصار لح تكوني منيحة بوجود هيك شخص بحياتك

____مستشفى اسطنبول____

صفا آعدة علمقعد وعيونها دبلانة من لبكي
علي ركد لعندها: كيف هيك صااار

صفا:ماا،،،مابعرف،،علي انا عم موووت ازا امي بصرلها لح انكسر عممم تفهم عليي

صفا كانت بصدمة كبيرة لأنها كانت مفكرة أنو امها رجعتلها صحتها

علي: رووقي اهدي

ابوجابر:طولي بالك يابنتي

جود: اديش بدها لتعدي مرحلة لخطر

صفا: قلي الدكتور بدها 12 ساعة

جود:الله يعافيها وبدي ياكي تكوني متل أمك قوية وصبورة

علي كان مقهور كتير على صفا وعيلي عم يصير معها وعم يدور ع أيا طريقة يخفف عنها

جود: علوش تعا شوي

علي: اي شريك

جود:انا راجع عل أوتيل ماكان لازم نترك حيدر لحالو انت خليك مع صفا وعمي دير بالك عليهم

علي: خلص ماعليك تيسر

ورجع جود علفندق

لانا: انا برأيي نرجع عل جنينة يلي كنا فيها بلكي يلي منلاقي ايا دليل يساعدنا

حيدر وجود:لبسو ناطرينكم تحت

رفعت شعرها لانا كعكة ولبست بوط رياضة أبيض وافرول

وياسمين حطت شالها ولبست روب ناعم

نزلوا تنيناتهم
لانا يالله نحنا جاهزين

التفت جود واجت عينو بعين لانا
حس بدهشة من جمالها وأديشها طالعة حلوة كان عم يتأمل عيونها لخضر كيف عم يلمعو من اشعة لشمس

لانا: شبك ولا دب لاكون فزاعة

جود: ااااه،، لا حرام هلق لفزاعة بتزعل

لانا: مهضوووم

ياسمين:يلاا وقت نقاركم هلق

ونزلوا عل جنينة هنن الاربعة وبقيوا لليل اعدين وعم يسألوا ويدور

لانا: لك مافي اثر

حيدر:خلينا ننطر كمان

مضت هل ليلة وكانت كتير قاسية علكل

علي بقي مع صفا

وجود ولانا وياسمين وحيدر بلجنينة ناطرين
الساعة 3 بليل

صفا نامت ع كتف علي
وطبعاً علي بحياتو مو محاكي بنت ومابيعرف يتعامل مع لبنات
علي عم يحاكي حالو: لك هي ليش هيك نامت ع كتفي
بس لا يااجدب عيب تفيقها،،طيب شووو اعمل فيها،،وينو جود يساعدني صار بدو يروووح هل حيوان

وبقي علي عم يحكي مع حالو وصفا غرقانة بلنوم ع كتفو

_الحديقة_

لانا وجود آعدين على المقعد ومكسرين من لتعب

لانا: جوود

جود: نعم

لانا:هلق انت عرفت شغلات كتير عني بس لهلق ماحكيتلي شي عنك

جود:دخيلك وبلا ماتعرفي قصة حياتي العظيمة

لانا: امانة حكيلي وين أهلك وشو دراس كلشيي

جود:أبي كان عندو معمل خياطة وأمي مستلمة أدارة المعمل

لانا:ياااي اكيد اخدو بعض عن حب

جود:اي وبنوا حياتهم سوى وكانو سند لبعض

لانا:اييي وشو صار

جود:ماتوا سوى بحادث سير

لانا: يااربي عهل حياة مابتكمل مع حدااا وبعدييين شو صار معك

جود:انا عشت عند بيت عمي وكانت مرت عمي مابتطيق أمي ولا بتطيقني

لانا:اييي

جود:نصبو لورتة هيي وعمي وانا اشتغلت لحالي وطلعت على سكن شبابي وهنيك شفت المغضوب علي

لانا:ههههههه بس باينتكم رفقة كتير

جود: اي مالي غيرو ماقلتلك مغضوب لهيك طلعت بحياتو

لانا: لااا انت بتجنن ومحظوظ انو تعرف عليك

جود: ايوااااااه وحط ايدو ع قبة قميصو

لانا بلبكة:انو اي عادي شبك ليش هيك عم تطلع فيي

ياسمين:حيييدر صووووت عمر

حيدر:شووو وين

لانا وجود ركدوا معهم لوصلو على لبحيرة يلي بلجنينة ولقوا مرة مبينة حالتها صعبة وجها شاحب وتحت عيونها اسود حاملة عمر

ركدت ياسمين:عمررررر ابني ولفتو لحضنها باستو وشمتو وكأنو الحياة رجعتلها

حيدر مسكها للخاطفة من إيدها بعنف: انتي مو هون مكانك،،مكانك بلسجن

لانا:استنى شوي انتي ليش اخدتيه وشو سبب يلي خلاكي ترجعيه احكييي

الخاطفة:منشاااان الله سامحوني وصارت تبكي

جود:طيب احكي

الخاطفة: ماتوا ولادي بلحرب حملتهن بين ايدي بلا روح قلتلهن فيقو ياامي بدي غنيلكم واطبخلكم فيقو ياامي بدي جبلكم اواعي لعيد بس مافاقو وتركوني لحالي وراحو علجنة اي اي راحو وتركوني كل يوم عم اطبخلهم ماعم يجو ياكلو عم اكل لحالي وانا اخدتوا لطعميه بس ماحب لأكل وضل عم يبكي

نزلوا دموع لانا وياسمين

وحيدر ترك إيدها

ياسمين ضامة ابنها وعم تبكي

حيدر: بعين الله هيك لحرب بتعمل كرمال يستحلوا ارض بموتو وبيحرقوا قلوب البشر

رجعو كلهم عل فندق وياسمين مو عاطية فرحتها لحدا

حيدر: انا رايح عل مستشفى

ياسمين:طيب ارتاح شوي بعدك لهلاء مو نايم

حيدر لفتوا اهتمام ياسمين فيه:مومشكلة مالح طول

لانا عم تضحك وتتمسخر ع ياسمين : ثو رايك ترتاح ثوي

ياسمين:وليك بلا غلاظتك

لانا:لك بدك تقنعيني انك مو حاببتيه لحيدر افندي

ياسمين:لك لاا مو هيك لقصة

لانا: اها وهو بدو يساعدك وصار حمش وحملك وقت دختي هيك ل الله

ياسمين: حملني؟؟

لانا: لا حملني ل الي هههههههه

ياسمين:اصلا

تعي لقلك ومسكتها من ادنها

لانا:ولي شبك

ياسمين:وانتي ومستر جود شووو مشان الانسجام والمشاعر الفياضة

لانا:اناااااااا

ياسمين: لاء اناا وكيف صفن فيكي اول مانزلتي

لانا: اناااا

ياسمين: ولعية تلعيكي لسا انا اناااا اي انتي

لانا: نو حبيبتي مستحيل

ياسمين: لنشوف ال نو تبعك وين لح تودينا

وصلو جود وحيدر عل مشفى وعلي خدودو حمر وكان خجلان من صفا

جود: ولي على آمتي شو عاملين بلصبي ليش هيك خدودو حمر

علي: لك كم مرة بدي قلك تسكر تمك

جود: بعت نفسككك ياعلي لك ايمت لحقت تركتك ليلة وحدة

صفا:_______

حيدر:اتضبضبو حسابكم بعدين

صفا كيف صار خالتي

صفا:لحمدلله منيحة وبدنا نخرجها بعد شوي

حيدر: ولوين لح تروحوا

صفا: مابعرف بس مستحيل خاطر وارجع ع انطاكيا كانت امي لح تروح من بين ايدينا

ابوجابر:شو رأيكم نضل سوا عبين مانلاقي بيت وكرمال صحة ام صطيف

جود طار عقلو لان لح يضل قريب من لانا

وعلي كل مالها درجة حرارتو عم ترتفع لانو لح يضل وشو بوش صفا

حيدر :طيب ماشي عمي خلينا هلق نخرجها ونرجع لعند لبنات

وصلو عل فندق مع ام صطيف وصفا

لانا:علوش شبك حاسستك مو ع بعضك

جود بصوت نايص: باع نفسو هلحقير

لانا:شوو

علي سفقو طيارة حسابك بعدين فضحتني الله وكيلك كزززب

وبعد مرور اسبوع لقو بيت كبير واعدوا سوى

وبهل فترة قضت لانا اغلب وقتها مع جود
وياسمين وحيدر ارتاحوا لبعض كتير

وعلي خدودو لحمر مافارقوه وصفا تضحك عليه

جود حس حالو ولد من جديد ولانا نسيت كلشي كان بلماضي حتى قصي ماعد اثر فيها وكان جود معبيلها كل وقتها يطبخوا وينضفوا لبيت سوا واغلب اوقاتهم عم يتقاتلوا لان لتنين عنيدين
صفا بلشت تعلم علي لحكي التركي ويدوروا على شغل

أما حيدر وياسمين كانوا عم يربوا عمر سوى وحيدر مهتم بياسمين وعمر وماخلاهم يحتاجوا حدا وكتير حنون عليهم

أما لعم ابو جابر مقضيها لعب طاولة مع ام صطيف وخدوا ع هاد خسرني ولتاني غش عليي
_____
جود وحيدر وعلي سهرانين بلقهوة

جود:شباب بدي قلكم شي

حيدر:تفضل روميو

علي: انو عساس انا حيط ومالي عرفان انك حبيتها ل الست لانا

جود:اي حبيتها بس بدي نرتبط بشي رسمي وخايف ماتوافق

حيدر:ليش لحتى ماتوافق

علي:شبااااب وانا،،،

جود:ايووواااااااه ولا سلال احكييي واعترف انت شو

علي: يعدمني ياك يعني عم قول تصير لفرحة فرحتين وأطلب إيد صفا

حيدر: ليكو شباب خليهم تلت فرحات

جود وعلي: رحلوووووووووووو واحلا عرسان

يوم الجمعة المسا وصلو جود وحيدر وعلي وكانوا متشيكين وريحة عطرهم معبية لبيت

لانا:شو يا عندكم موعد غرامي ومالي دريانة

ياسمين ركدت علصالون:شووو لك لوين رايحين

صفا لحقتهم: ومين تعيسات الحظ وهيي عم تضحك

علي وجود وحيدر:انتوووووو

البنات:شبنا

الشباب:تعيسات الحظ

وهون لبنات فاتو ببعضهم وهربوا ع غرفتهم

تمت لخطبة واتزوجوا بعد كم شهر

استقلوا كل مين ببيت لحالوا وكانو لبيوت بنفس لمنطقة وعملوا كلهم مشروع بلمصاري يلي معهم وفتحو مطعم صغير بلمنطقة ونجحوا فيه

تساعدوا بكلشي واشتغلوا من قلبهم

عمر عم يكبر بحضن حيدر وياسمين

ولانا حامل وماخلت اكلة إلا ماتوحمت عليها وطبعا جود لأهبل هو وعلي خايفين تطلع بوش لصبي ورايحين جايين عم يجيبولا اكل اشكال والوان

وام صطيف بقيت ساكنة مع بنتها صفا واستلمت صفا الطبخ بلمطعم لأنها طباخة غير شكل

وطبعاً مانسيوا عادات سوريا كانوا كل يوم جمعة يطلعوا مشوار ويفطروا فطور جماعي
♡♡♡♡♡♡♡♡♡♡♡♡
1\1\2020
لانا:لك علي ضب ابنك ها عم يضربها ل شام

علي: ولله هي بنتك مشكلجية وطالعة تنحة لأبوها

جود:وليه شام جبتك انا لتجيبلي مسبات

شام: ثو انك تز يا ألي

علي: لك سمعتهااااا شو عم تقلي طز اكيد انت يا وقح معلمها هلحكي

جود فاااااارط ضحككك : لاحبيبي طفلة بريئة الله انطقها

حيدر: اما شو تخلفة انتو تنين شي ناهي

ياسمين: حيدر شوف عمر ليوم الانسة حطتلو نجمة وجايب علامة عالية

حيدر: لك يااااروح البابا انت

ركد عمر لعند حيدر وضمو

ام صطيف:ايييه ايام عم تركد بتتزكروا ياولاد من كم سنة كيف كنا

لانا: اي ولله ياخالتي لحمدلله الله حمانا

جود:صح كانت ايام صعبة بس سبحان الله علغربة كيف جمعتنا

حيدر:عم يضحك هو وياسمين ويتزكروا مناظرهم وهنن عم يركدوا بلغابة

صفا: لك التلج عبا الدنية برا

ياسمين:بشرفكم خلينا نطلع نلعب ولله مليت انا

جود:نحن لها مو هيك شريك

علي: يلا جهز حالك ولله امسح فيك تلج تركيا

طلعوا كلهم وصارو يلعبو بلتلج،،علي وجود ماقصروا ببعض وضحكتهم عبت لحارة

لانا: ولا علي شوي شوي ع جوزي

علي: اي مو على عيني وسفقها تلجة براسها

ياسمين وحيدر:حيووو شباب

صفا: يلا بيبي علي كسرهم

وكان هالتلج بيشبه قلوبهم البيضا ومتل روحهم الحلوة

♡♡♡♡نهاية القصة♡♡♡♡♡
~~~~~~~~~~~~~~
هيك لعبة القدر

بتمر علينا إيام صعبة

منخسر لبلد او منخسر ناس غالية علينا ومننكسر من ناس ماكانو اد لثقة

بس كل نهاية هيي بداية لشي أحلى
المهم الأمل يلي بقلوبنا يضوي دربنا

ونخلي ثقت

نا بربنا كبيرة وكل خسارة في بعدها عوض حلو

بتمنى كون وصلت لأمل لقلوبكم

وتركت فيكم اثر حلو
بشكركم ع تفاعلكم ودعمكم لو بكلمة حلوة

هي كانت أول قصة بكتبها اذا حبيتوها ودخلت قلوبكم دعموني