#زهرة_البنفسج

-6-
الليلة كان عندى شغل مبالغة في المكتبة شي هدايا وشي مجسمات وشي تزيين سد مال لما يدي وجعتني 😥 مشيت البيت منهووكة قلت امشي ارقد طوالى انوم فتحت البيت طوالى لاقوني أمي وشيرى وشروق حضنوني وباسوني😘كل سنة وانتي طيبة يا أجمل شذي لما بكيت قلت ليهم الليلة عيد ميلادى بجد انا نسيتو شيرى قالت لي يا هبلة في زول بنسي عيد ميلادو والله حسسوني بالفرحة وانو في زول بجد مهتم بتفاصيل حياتك ياااخ دا أجمل احساس دخلت لقيت البالونات والزينة والبيت دا يرقش يسوى كدا👋أمي قالت لي يلا امشي غيري سريع عشان نبدأ الاحتفال مشيت استحميت وجاتني شيري قالت لي تعالي اظبطك اعمل لي شعرك سيراميك سريع وأعمل ليك ميك اب ظااابط كدا حتلبسى شنو انتي عشان اظبط ليك الميك آب عليهو بس أوعي تقولي لي لابسة بنفسج😌 قلت ليها ايون عندي غيرو😅... واااي يا شذي منك البنفسج دا قال منك الروووب تعالي ألبسي فستاني البينك بكون حلو فيك قلت ليها لا الليلة ليلتي البنفسجية عايزة اتبفسج فيها اتبنككى براك يا بتي😂.. شذي ياخ م تتعولقي فيني انا عازمة ناس مهمين.. يا بت قومي لفي مش عيد ميلادي مالي ومال ناسك إن شاء الله ألبس مقلوب🙃😆.. طيب خلاص قومي ألبسي الفستان عشان اعمل امكيجك قلت ليها اوعي تبقيني زى بت اللعاب شكرا شيرى مش ظبطتي لي شعري انا بعمله براي🙈... ياااااي الله يستر الناس م يجرو منك 🙊.. قومي انا لبسي هين امشي انتي البسي لانو عايزة ليك زمن طويل.. فستاني البنفسجي حلو وبحبه قصيتو لي التخريج🎓 اتسرحت تسريحة حلوة وم نسيت الوردة البنفسجية 🌸اهم شي عندى الوردة أختها في شعرى في الافراح😊بتحسسني بالبهجة والمسرة بحب البنفسج وزهرة البنفسج وعطر البنفسج وإحساس البنفسج.. عندما أرتدي البنفسج تصبح الحياة عندى بنفسجية يراودني شعور بالتحلق في فضاء نقي كله احساس بالحب والجمال والأمل وكل الأشياء المفرحة.. عندما ارتدي البنفسج أصبح أنثي استثنائية تنتشي فرحا لانوثتها برقة ورومانسية.. بعزة وقوة.. بزهو وجمال.. حالة البنفسج عندى حالة من الانتشاء اغوص فيها وحدى بعالمي حيث تأتيني الهاماتي الفنية سراعا تتجلي أمام مرأى عنيني فتكتسي الدنيا بألوان البنفسج ويرقص الكون فرحا طفولي الملامح حينها فقط أملا الدنيا ضجيجا وفرحا.. رقصا وعزفا بأغنية البنفسج🎻... طلعت لقيت كم غفير من الناس😳وكلهم بقو يعاينوا لي لما خجلت🙈شروق قالت لي شوشو اختي انتي طالعة نجمة ⭐مشاء الله تبارك الله حضنتي شديد كل سنة وانتي طيبة وإن شاء الله أشوفك عروسة طالة علينا بكل فرحة زى م عودتينا دايما😘وقعدنا نبكي جات شيرى هييي انتي وهي م تعملوها لي دراما هندية يلا يا شوشو الناس منتظرنك عشان تطفي الشمعة..
سنة حلوة يا جميل سنة يا جميل 🎼🎹🕯افففف اييييييييييي👏👏👏👏👏👏حضنتي أمي شديد وبكت معاي قالت ليهم يا جماعة شذي بتي دى اول فرحتي دى شذي عمري ونور عيوني💜 وخالي أمين الخال والاب الحنون جاب لي أجمل هدية مجموعة ألوان بروفيشنال من زمان عجباني لقيت أسعارها عالية خليتها خالو أمين حبيب قلبي💜وهدية شيرى اختي تؤم روحي ❤كانت رررهيبة ومجدى خطيب شروق هو العمل شغل الزينة دا كلو مع شروق وشيرى وجاب لي لوح جميل جدا زول ذووووق يااااخ وكل المعازيم م قصرو طلع احلي عيد ميلاد لأنو عندى أجمل واحن اسرة وأجمل أصدقاء.. المحبة والمودة من نعم الله أحمد الله كثيرا انو خصاني بمحبة الناس حولي بجد حسسوني اني انا مهمة في حياتهم قدر شنو م عندى مهم عيد الميلاد والهيلمانة دى بقدر م عندى اهم لمة الناس و الفرحة الفي عيونهم.. احبكم جميعا أسرتي واصدقائى 😍💜...
عملت لي خالى امين مجسم حلو هدية عشان بقي مدير فرع في بنك دخلت البيت لقيت شروق قاعدة براها قلت ليها وين أمي وشيرى قالت لي مشو عرس صاحب شيرى..غايتو أمي وشيرى اصلو م بعقلو من الحفلات دى☹ انا ماشة ناس خالو أمين أودي ليهو الهدية دى... استني يا شوشو امشي معاك عايزين نخش كدا نسمع ليك أميرة مرة خالي تقول ليهو..

#يتبع

#زهرة_البنفسج

-7-
اميرة بتتكلم مع امين خالي بتقول ليهو انت يا امين مخلي اختك وبناتها ديل علي كيفهم م بتسالهم خالص كل واحدة ماشة علي كيفها واسا عيد الميلاد دا شنو دي فوضي شديدة واصلا كان لي شذي دي م في زول يقول ليها تلت التلاتة كم والشغل تجي فيهو انصاص الليالي خالي بقول ليها يا اميرة خليك في حالك ديل بناتي ومافيهن كلمة.. طبعا انا وشروق بيقينا نعاين لي بعض اتهجمنا من كلامها لانها قدامنا اخر ظرافة وتضحك في وشنا وبي ورانا تعمل كدا انا كنت بشوف تعابير وجها لما واحدة فينا تنجح ولا تحصل لينا فرحة لكن سبحان الله م قايلاها بالصورة دي احسن الزول البعاديك عديييل لكن اب وشين دا خطر عليك دا بحفر ليك بي تحت قلت لي شرق يلا نمشي خالي بمشي ليهو بكرة في البنك اوديها ليهو م مشكلة شروق قالت لي يوم سمعتها بتقول لي نوسة انتي لسا حاتلة لي في الجامعة وشذي اتخرجت واشتغلت وكمان ماسكة البيت ياخ م تبقي مسؤولة شوية هردتي لي قلبي قلت ليها نوسة غايتو الله يعينها لانو امها عاملاها زي الريموت تمشي فيها يمين وشمال لما طمست شخصيتها غايتو خالي م يستاهل المرة دي ياخ مرة فارغة وراسها فاضي ومتبعة سيرة الناس يلا م عندنا شغلة بيها خليها تصطفل نحنا الحمد الله نيتنا بيضا وعلي قول حبوبة الله يرحمها النية البيضة بتاكل السودا ارحكي يا اختي نظبط لينا عشا وندردش شوية لما يجو صعاليك بنو امية 😂..م كلمتك يا شوشو انا ومجدي ناوين نزوج السنة دي ...اشي اشي يا ختي متين القرارت دي امي وشيري لو سمعوك بكتموك😷اكيد حيقولي ليك لما تخلصي والعرس عايز ليهو ترتيب وووو يطلعو ليك ستين حاجة عايزين يعملوها ...عشان كدا يا شوشو انا فتحت معاك الموضوع اول انتي رايك شنو? ....والله يا شروقة انا م عندي مشكلة لكن انتو مرتبين حالكم كويس دا زواج م خطوبة يا شروقة بعدين دي اخر سنة خلصي وبعدين اتزوجي ..مجدي قال لي امتحني من بيتنا عشان اشرح ليك كوبس وتكوني مستقرة ...اشي اشي يا عيني علي الحب يا جميل😍يعني عندنا م مستقرة يا بت☹....هههههه م كدا يا شوشو لكن انا بقصد استقرار الزواج🙈ياخ انا عندي اجمل اسرة مستقرة وحنينة 😍...بطلي بكش خلاص زعلانين مش م عايزة تقعدي معانا 😔شروقة انا والله مبسوطة منكم ومن علاقتكم الحلوة المتينة وانكم متفاهمين شديد ومجدي ولد مافي منو في احترامو وتهذيبو وشهامتو لكن بس لازم ترتبو وضعكم كويس اولا مراسيم العرس والسكن وووو دا كلو م ساهل خصوصا هو ياداب خريج قالت لي مجدي مرتب الامور دي من اتخطبنا شغال ليل نهار وكمان موضوع البيت مفروغ منو حنسكن في شقة ماجد اخوهو سافر امريكا وسلم مجدي المفتاح بي عفشها عشان كدا مجدي نشط في موضوع العرس دا هسا انا عايزة امهد الموضوع لي امي عايزاك تساعديني انا طبعا معتمدة علي مقدرتك القناعية ....شروقة حبيتي يااخ الف مبروك وربنا يتم ليك علي الخير طالما انتو مرتبين حالكم علي بركة الله والناقص اختك بتمو😎انا عندي كم شروقة ...شوشو يا احلي اخت كم احبكك😍😘..خلاص انا بكرة بتصل عليهو وبرتب معاهو الامور قبل م نكلم ريا وسكينة 🤓😂...صحي صدقتي ريا وسكينة ديل بخربو بلد 😁يلا يا بيبي تصحبي علي خير انا نعست😴 ...تلاقي الخير يا عروسة😍 انا مع شروقة نسيت تلفوني لقيت ليك رصة مكالمات من ضمنهم لقيت جميس صديقي العزيز ومي بت الناس المرطبين😎..جميس طوالي ضرب وين يا بت انتي جادعة تلفونك دا لو م بعرفك يا شادي بقول امكن خالطة😆طبعا اصحابي مسمني شادي 😑بعد ونسات كدا كلمني بي موضوع تريزا اخته وبعد داك رجعت لي مي لقيت صوتها حزين قلت ليها خير مالك? بس البت اتفقعت بالبكا قالت لي زولي الكلمتك بيهو قال مهاجر اروبا يعني تاني م حاشوفو😭..خلاص يا مي م تنكدي علي روحك بعدين خلي الولد يشق طريقه طالما الطريق مسدود بينكم يعني حتي لو قعد هنا م حيصل تغير في الموضوع فبعده احسن ليك واحسن ليهو شوية كدا حتنسيهو وتنشغلي بحياتك لو كان في زرة امل كنت قلت ليك اتمسكي بي حبك لكن عندكم الموضوع استحالة ان شاء الله يجيك زول ينسيك دا كلو قالت لي ما اظن اقدر انساهو لاني بحبه يا شذي لكن بعيش زي م الناس عايشة...حننتني وقطعت لي قلبي💔 ما عارفة ليه موضوع البت دي انا شاغلني كدا سرحت كدا جو ريا وسكينة هاجمين علي طبعا م عرفتهم 😳 نانسي وليلي علوي😂قلت ليهم انتو عملتو عملية تجميل ☺شيري قالت لي اتغيرنا مش كدا 😋شيري خبيرة التجميل اييييي👏شفتي كيف اختك رهيبة لكن عرس يا شذي مباااالغة ...سمح يا بتي ان شاء الله عرسك يااارب🙏 .ماماتي الحلوة بكرة جايانا ضيفة تنزل عندنا ..

#يتبع

#زهرة_البنفسج


-8-
امي قالت لي ضيفة من وين دي كمان؟ قلت ليها أخت زميلي جميس جاية من جوبا مسافرة أوربا... اها مالو حبابا عشرة بلا كشرة.. تسلميلي يا ماماتي الحلوة 😘😘مشيت انوم لكن بقيت أفكر في كلام الهجرة والموضوع بقي لي غريب وبعيد لكن صحي فيني أحلام وردية قربت تموت جواي تاورت تاني وبقت احلم لما نمت.. الصباح طلعت بدرى لأني اليوم عندى كم حاجة عايزة اعملا ومجدى كمان جايني ومي كمان رسلت لي مسج قالت لي جاينك انا وزولي قلت ليها تشرفوني قلت كدى أشوف الولد البكي البت دي كنت مشوقة اشوفو لكن تاني اعتذرت قالت قال عندو مشاوير كتيرة مزحوم يلا ذاتو وفرو انا ذاتي مزحومة شديد جاني مجدى من الصباح الولد شفقان علي العرس قعد معاي خططنا لقيتو ليك خطير مجهز لي كل شي.. مجدى انا في موضوع كدا في رأسي عايزة استشيرك فيهو... خير إن شاءالله يكون موضوع عريس ☺... عريس في عينك العريس انت دا😃انا عايزة اسافر أروبا.. أروبا دى كيف يا شذي زيارة يعني؟... هجرة عدييل عن طريق ليبيا... يا بت انتي جادة ولا بتهظري؟!.... لا جادة معاااك لكن م كلمت زول جاية صحبتي من الجنوب وانا ماشه معاها... يا بت ماشة معاها دى حسستيني ماشة امدرمان!!! دى أروبا وهجرة غير شرعية انتي مستوعبة الأمر دا؟؟!! الكلام دا فيهو مخاطرة ومرمطة وموت أوعي شيلي الفكرة من رأسك تماما مفهوم... لي يا مجدى ياخ بدل تشجعني تقول لي كدا انا قلت خلاص اتقوى بيك تجي تقفل لي الباب في وشي... اشجعك شنو انتي مجنونة ولا قنعانة من نفسك!!! بعدين الجنوبين ديل عندهم عادى الهجرة دى زى السلام عليكم لكن عندنا هنا الولد لو قال ماشي زى الهجرة دى البيت كلو يقيف ليهو خلي البت كمان أنسي الفكرة تماما.. طبعا م حبيت تاني اناقشه لأني عارفة مجدى صعب شوية لكن الفكرة خلاص استحوذت علي بس باقي التخطيط ليها بقيت أفكر كدا عمو حمزة بقي ينادى فيني يا شذي في بت دايراك من شفتها عرفتها أخت جميس قالت لي انتي شذي قلت ليها ايوا تريزا طوالي سلمت عليها وطلعنا مشينا البيت ناس بيتنا استقبلوها بي احتفال هي ذاتها مشاء الله زولة مرحة ودمها خفيف بشكل ملامحها جميلة وهادئة ملامح الزاندا الجميلة ديك ذات القوام الممشوق والوجه الرقيق تفاصيل وشها حلوة شديد طبعا استلمتها شيرى قالت لي تريزا دى حتكون صحبتي لما تسافر لانو عندى أخوات دمهم تقيل بشكل 😏.... مبروك عليك الصحبة يا تريزا بس رأسك حيوجعك استحملي قالت لي انتي اطلعي منها نحنا بنتفق😅..اتغدينا وقلت ليهم خلو تريزا تاخد راحتها قالت لي خلاص تعالي اوريك شمارات صاحبك😄اتونسنا كدا قلت ليها يا تريزا انتي ما خايفة من السفر وخصوصا انو فيهو مغامرة قالت لي ابدا جون زوجي مبسط لي الحكاية جدا صاح فيها خوف وتوجس لكن انا الناس البعرفهم طلعو كدا كلهم وصلو بخير الحمد الله قلت ليها طمنتيني الله يطمنك انا يا تريزا قررت اسافر معاك عاينت لي بدهشة شديدة...انتي جادة يا شذي... أيوة جادة وكمان شديد وعايزاكي تديني تفاصيل اكتر واكتر بكل صغيرة وكبيرة قالت لي جميس عارف الكلام دا قالت ليها لا لانو م كنت متأكدة من قرارى لكن بتصل أكلمه المهم م تجيبي سيرة لي أمي وشيري تمام يلا اخليك تنومي.. مجدى جا كلم أمي وخالي أمين بي موضوع العرس وشرح ليهم اي شي خالي أمين قال ليهو طالما أنتو متفقين واموركم واضحة نحنا م بنقيف في سعادتكم ربنا يوفقكم ويسعدكم علي بركة الله واقفين أنا وشروق برانا مجدى سألني شذى بقيتي علي شنو في الموضوع قلت ليهو بقيت عليهو تب بإذن الله... يا زولة انتي قدر القرار دا قلت ليهو قدرو وزيادة كمان... شروق قالت لي موضوع شنو دا مجدى عارفو ونحنا م عارفينو قلت ليها بعدين بكلمك... الفترة دى بقينا في تجهيز عرس شروق وجية تريزا دى جات في محلها بالرغم انو شيرى م ادتنا فرصة خااالص فيها كل يوم يتلبسو ويمرقو يوم عرس ويوم منتزهات ويوم رحلات غايتو اتفسحت مع شيرى زمان كل يوم شكلة معانا انا وشروق لما تلقانا كدا تسوق أمي معاها عشان كدا لما لقت تريزا زيها م صدقت عدتها كلها حوامة والعجب مشاوير السوق عشان العرس شيرى اليوم والتاني في السوق طبعا شروق قعدت في الدخان وبيتنا بقي إحساس عرس وبهجة وفرحة وامي وشيري مصرين عليها ترقص وهي رافضة والشكلة والجوطة قلت لي شيرى انتي لما تعرسي ارقصي واقلبي الهوبه خليها شروق كل يوم عاملة لينا وجع رأس انا طبعا مشغوولة بي موضوع السفر لكن أمي نقشتني قالت لي شذي يا بتي اليومين دى انتي م عاجباني في شنو؟ بتحبي 😍... ماماتي الحلوة حاحكي ليك الموضوع لكن بلييييز م تعصبي 😣أنا عايزة أسافر مع تريزا أروبا!! سجمي يا بتي أنتي قنعتي من روحك. دى ماشة بالبحر وفيها غرق وموت بري م بخليك تمشي نهائي الكلام دا مفهوم م أكرر الكلام دا يلا خلي الكلام الفارغ دا عندنا ستين حاجة دايرين نعملا😡

#يتبع

#زهرة_البنفسج

-9-
خلي الكلام الفارغ دا😥أمي صدمتني دا حلمي يا جماعة من يومي وانا بحلم للسفر الي لندن وكنت بقول إن شاء الله يجبني عريس يوديني هناك😂لكن عرساني كلهم محلييين😑ماذا أفعل بحلمي وطموحي الذي تغلل بداخلي لندن هي المهد الصالح لهذا الطموح الجامح فني ومعارضي واملي الواعد ينبوع سعادتي.. آه يا أمي لو تعلمين حلمي لتركتيني اذهب حافية القدمين الطموح وحده من يجعل المرء يهيم علي وجهه كما العاشق الولهان كما كان شاعرنا الطموح يهيم ضربا في الصحراء يفتش عن طموحه الجامح ويتحول في أشعاره مع سيف الدولة الحمداني يبتغي العلا في دولته والمجد في مدحه زمنا طويلا.. منز صغري وانا معجبه بالمتنبئ واشعاره وبيته الذي يقول فيه...
علي قدر أهل العزم تأتى العزائم..
وتأتي علي قدر الكرام المكارم..
وتعظم في عين الصغير صغارها.. وتصغر في عين العظيم العظائم😎.. هذا البيت هو من جعلني أسبق جيلي في التفكير وفي التمسك باهدافي وطموحاتي برغم صعوبة الأمر وكيفية الوصول إليه إلا انه ظل يراودني حتي بت اشوفو في أحلامي كتير😅علماء النفس يقولون إذا كان حلمك كبيرا وهدفك بعيد المنال اجعله نصب عينك وردده كثيرا بداخلك سيكون هو فقط همك وشغلك الشاغل حينها ستتزلل الصعاب ويسهل الطريق إليه كما فعلت انا الآن ربنا جاب لي تريزا دى من السماء عشان هي تبقي لي السبب.. ولندن بالنسبة لي كسيف الدولة للمتنبئ.. رغم حبي لوطني إلا انني لا استطيع أن احمي حلمي فهناك من يقتلون الحلم في مهده الأول يمارسون القمع والخنق لذا قررت الرحيل بحلمي بعيدا عن موطني وهل هذا سهلا؟؟ ليس سهلا علي المرء أن يترك وطنه وأهله .. فالوطن هو الملاذ والحضن الدافئ هو برغم الوجع الفييهو لكنه مصدر الدفئ لبرودة مشاعرنا الباااااردة فكم التهبت نيران عشقه اناسا مثلو التاريخ وانارو الطريق وكسرو متاريس الطريق ليثبتو لنا انه هو السودان وهو من يفتح ذراعيه ويضمنا بحنان لا يفرز واحد منا ابدا... ما هنت يا سوداننا يوما علينا😎.. رغم صوبة المشوار ورغم ضرورة التيار.. عزيز انت يا وطني رغم قساوة المنحن!!... أمي طبعا من خوفها علي م ادتني مجال للنقاش قلت لازم اعمل جدعة كبيرة في عرس شروقة عشان ترضي عني شوية وتلين😂... لقيتهم عاملين مؤتمر القمة وشروق زعلانة قالت أمي وشيرى قالو ليها إلا نحجز في صالة راقية للعرس ونسبة للمعازم هلاي كلاس تبع شيرى😎 لازم نتبع الأوامر انا الحمد الله ربنا خصاني بصفة احمد الله عليها وسيلة الإقناع يعني لساني حلو😊😍حتي في الشغل لما اشتغل حاجة لي زبون قبل م يشوف شغلي بطريقة كلامي بقتنع طوالى.. أولا بديت بي شيرى قلت ليها انا عارفة يا شيرى يا اختي انتي عايزة الحاجة السمحة لي شروق لكن كمان برضو الناس ديل عندهم حسابات م عايزين نتخطاها عشان م نخرب عليهم بعدين انتي ياخ لما تعرسي ان شاء الله تعمليهو في قصر القيروان مافي حد واقف في طريقك انتي خليك في الشئ البتحبيهو الميك اب والفستان والحاجات الانتي بتفهمي فيها دى باقي الأشياء دى خليها لي انا إن شاء الله حيطلع احلي عرس ومجدى زاتو مخطط كويس م تشيلو هم خاااالص وانتي كمان يا ماماتي الحلوة المال الجابهو الناس ديل بيكفي الحمدالله انتو بس رووقو المنقة ممكن نجيب خيمة حلوة ومكيفة وانا من عندى بعمل فيها إضافات ما سألة في السنبلة ذاتو المهم أمي قالت لي عاد يا شذي كان خزلتينا بننخنقك😬.. عندنا زميلنا صاحبنا شديد عندهم محل مناسبات راقي اتصلت عليهو اسأله قال لي احلي خبر عايز تزوج أخيرا يا شادى😆قلت ليهو أخيرا لقيت عروسة مرطبة عقبال ليك يا زميل😅فقال لي م عندك أي مشكلة يا شذي هسا بحجزا ليك كمان قال لي فيها كوشة وعشا فاخر جدا يعني الحمد الله الأمور ماشة كويس خالص..الحمد الله تريزا ساعدتنا كتير عملت لينا جدعات حلوة لحنة شروق اجدعو جديع هي وشيري وكانت الحنة روووعة... الخيمة طلعت مباااالغة عملت فيها شغل فني جميل والعجب الكوشة اضفت فيها فنيات طلعت أكثر من روعة يااااخ العرس كله طلع رووووعة والعجب شروقة طلعت نجفة بعد الجرتق طوالي العرسان مسافرين وانا طبعا بودع في شروق وعايزة اتفقع من البكا لانو انا تقريبا رتبت أموري كلها م باقي كتير لسفرنا بكيت لما رأسي وجعني مشيت طوالى انوم لانو تعبت شديد في العرس شلت التلفون قلت أشوف الحاصل شنو ألقي ليك رسالة من مي كاتبة لي سافر يا شذي وسافرت معه روحي تركني وحيدة أحمل ذكرى حبي له كم أتحرك شوقا لرؤياه الجميلة لا أستطيع نسيانه فحبه يجرى في دمي... مي كمان وجعت لي قلبي اكتر مما هو موجوع على فراق اهلي💔😥

#يتبع

#زهرة_البنفسج


-10-
كيف الوداع لما يحين وقت السفر😥...
أمي بعد تعب رضيت لي لكن برضو كانت حزينة علي فراقي لأني بنتها البكر بنفكر سوا ونخطط سوا صاح هي بتمشي أمورها مع شيري لكن في حاجات عقلانية إلا انا أكون معاهم وخصوصا انو خالي أمين م فاضي لينا كتير المهم اقنعتها وما كان الإقناع بسهولة بعد دخلت جون زوج تريزا وشرح ليها الحاصل كلو المهم بعد تعب اقتنعت لكن كانت متغيرة مني شوية وانا زاتي لما خلاص بقيت علي السفر بقي لي بمبي... أصحابي عملو لي قعدة كااااربة في شارع النيل كان وداعا حافلا ممزوجا بشجن وانفعالات وجدانية حزينة 😰لكن كالعادة لطفو الجو عشان مافي زول يبكي😭😆.. أمي طبعا جهزت لي أي حاجة م خلت شي قلت ليها م تعبي روحك انا بمشي حالي قالت لي كيفن اخليك تمشي ساااي كدا كان قمتي روحتي من الطريق لازم يكون عندك زاد 😄والله لكن بجد حاجاتها دى نفعتني نفع شديد ياااخ الأمهات ديل نعمة عظيمة💜.... بكرة بإذن الله مسافرة وانا زى ام العروس داخلة ومارقة تريزا قالت عايزة تنوم من بدرى وانا نمت حاضنة أمي وشيرى م قادرة افارقهم والله قلبي مقطوع💔.. لكن اعمل شنو لازم اسافر واصبر عشان أحقق حلمي الحمد الله رب العالمين عندي عائلة جميلة ومتفهمة ابدا م وقفوا في طريقي آي صاااح هم عارضوا لكن بعد شافوا وجهة نظرى في الموضوع واصراري الشديد علي الأمر وافقوا لأنهم شافوا امكن تكون مصدر سعادتي في ذلك فالعائلات الذين يقفون عقبة لنجاح ابنائهم بحجة خوفهم عليهم هم بالعكس بدمرونهم بذلك لأنهم بكونو شقو طريقا آخر ليس برغبتهم وإنما برغبة ذويهم لذلك باؤوا بالفشل... لا تخنقوا رغبات ابناءكم بل اتركوهم لرغابتهم ثم راقبوهم بالنصح والمشورة كدا بحسو بالثقة في انفسهم وأن لهم كيان ذاتي لوحدهم... فالعقبة الأولي في وجه تطور الفرد هي العائلة... عائلتي هي من دعمت نجاحي معنويا وماديا لهم كل الحب💜... قبل أن انووم بقيت اعاين مرة لي أمي ومرة لي شيرى أصابني قلق وتوجس من بكرة بقيت مغمضة عيوني واتلو في سورة الانشراح كلما تعبت وضاق صدرى اظل اتلو هذه السورة سبحان الله بعدها ينشرح صدرى ويزول همي وعسري.. ثم تبسمت وتذكرت مقولة الأديب الروسي ليو تولستوي فأنا من عشاق كتاباته(يجب أن تنهضي من فراشك في ساعة مبكرة.. وأن تقولي لي نفسك... انا قوية... انا سعيدة ).. ظللت اردد انا قوية انا سعيدة لما نمت أمي صحتني شذى.. شذي.. قمت مخلوعة قالت لي سجمي يا بتي السفر دا عايز يجننك صحيت لقيتك تقولي انا سعيدة انا قوية 😂😂😂.. عقلي الباطن شغال زى الطاحونة🤓... كويس قمت ومشيت صحيت تريزا اجهزنا خلاص وشيرى كانت كلمت لينا الولد بتاع الغمزة😉داك شكلهم بقو فرد😆م قصر وصلنا.. ياااااخ والله شيرى اختي أبت تتفكك مني تبكي باعلي صوتها لما قربت اخلي السفر زاتو😔.. تريزا قالت ليها يا بت انتي عبيطة بس تصل هناك وكل يوم معاك تاني بالصورة والصوت لما تزهجي منها.. قالت ليها م بتكون زي هي معاي احضنها واشم ريحتها... قلت ليها يا شيرى ياااخ كل يوم بتقولي لي عطورك الزي نسوان الظار دى اوعي تجي تحضنيني خليكي بعيد.. هسا انتي خليكي بعيدة مني☹قعدنا نضحك كلنا... وداعا أيها السودان العظيم✋

#يتبع

#زهرة_البنفسج

11
تعد ليبيا وجهة عدد كبير من المهاجرين القادمين.. خاصة من دول جنوب الصحراء الإفريقية عن طريق شبكات من المهربين موجودة في السودان والنيجر تتعاون مع شبكات تهريب أخري موزعة داخل المدن الليبية وتنطلق رحلات التهريب من الشواطئ الليبية غرب البلاد خاصة صبراته ومصراتة وزوارة... لم أكن اعرف أن طريق الهجرة شاقا ومرعبا الي هذه الدرجة كان فوق التحمل..عندما وصلنا مدينة زوارة والتقينا بالمهربين وتم احتجازنا حتي يحين موعد الهجرة ورغم ما يصل الي مسامعنا من حالات غرق المهاجرين الا أن ذلك لم يردعنا عن مواصلة المجازفة.. هنالك عائلات بأكملها رجالا ونساءا وأطفال صغار ورضع ومئات الآخرين من الراغبين في الهجرة و الباحثين عن حلم الوصول الي أوروبا وأغلبهم من جنسيات أفريقية... كان ثمن الرحلة 800دولار وأحيانا تصل الي 1200دولار علي حسب المهربين.. تدفع قبل الصعود الي السيارة التي ستنقلتا الي الشاطئ.. في حدود منتصف الليل قدمت شاحنة واقلتنا الي الشاطئ وهي من الشاحنات المخصصة للتبريد تجمدنا داخلها.. الشاحنة ماشة وانا طوالي اتذكرت مسلسل سورى كدا كان بحكي عن الهجرة الي أروبا طبعا سوريا بعد الحروب دى كلهم فرو هناك سواق الشاحنة عمل حادث ومافي زول انقذهم ماتو متجمدين.. لما اتذكرت المشهد دا قلت خلاص يا شذي اشهدى علي روحك ودى النهاية تاني بقيت أدعي واقرأ دعاء السفر كتير هديت حبة من الخوف وبقيت متماسكة كان هذا اكتر موقف خوفني ونحنا في الشاحنة دي.. كنا حوالي 50شخصا لن أنسي هذه اللحظات وستبقى في ذاكرتي ما حييت.. الوصول الي الشاطئ لم يكن نهاية الرحلة البرية مشينا سيرا علي الأقدام حوالي 10دقائق في المياه لنجد في انتظارنا زوارق مطاطية تكفلت بنقلنا الي المركب المخصص لرحلة العبور الي الضفة الأخرى من المتوسط.. ثم نقلنا دفعات علي امتداد الساعتين حتي نجتمع كلنا في هذا المركب ثم اقتيادنا الي الشاطئ واجبرنا من التخلص علي كل امتعتنا والهواتف النقالة وذلك من أجل تفادى أي حمولة زائدة علي المركب قد تؤدى الي الغرق في البحر.. كانت المخاطرة حقيقية واحتمال الموت كبيرا جدا.. واكتر ما حز في نفسي أن المهربين كانو يعاملونا كأننا بضاعة.. في حدود الساعة الساعة الثالثة صباحا أطلق القبطان محركات المركب.. البحر هادئ والطقس بااارد وظلام الليل حااالك اي إنارة من المركب قد تسبب في الكشف الي أمره.. يخيم الصمت علي المهاجرين الكل يفكر في مصيره وفي نهاية هذه المغامرة ويعانق أحلامه.. وأنا بجد خفت اتخيلت ان المركب حدث ليهو ثقب والموية دخلت وغرقنا وطلعونا جثث زى ما نشوف ونسمع عن الهجرة الغير شرعية وكيف الناس بتموت زى الصراصير في عرض البحر.. بقيت مرة اعاين في وجوه الناس ومرة في البحر وبقيت اقول هسه انا كان مالي ومال حرق الأعصاب دا مش كان أكون في بيتنا معززة مكرمة بين أحضان أمي العزيزة وجالت في خاطرى حلتنا وناس حلتنا واتذكرت حسين سيد الدكان وشكلتي معاهو لما اجي اشيل منو الفول اقول ليهو هسه فولك دا بشبع ليهو طفل زيد الفول دا شوية يوم رسمتو وهو ببيع في الفول وخاتي في الكمشة خمس فولات بس وطفل صغير بقول ليهو اديني فول بي خمسة جنيه يا عمو حسين وريتو الرسمة وقعد يقول لي والله يا بت الطاهر انتي سواتك دي بطفشي مني الزبائن دحين ما تسوي كدا وانا اقول ليهو لو صلحت بيعك م بعمل سواتي لكن لو م صلحتو بالحيل بعملا يقول لي خلاص بصلحو يا اخونا الشافعة دى المسلطة علي شنو؟ 🤔😂😂جننته جن واتذكرت جارتنا نفيسة انا وشيرى مسمنها نفيسة مستلمة لأنها بتستلم المواضيع طوالي واي شمار في الحلة جايبة خبرو برضو رسمتها مرة هي جارية وشايلا سفنجتها الكحلية ديك لاحقة شمار تحصلو شافت الرسمة قالت لي وووب علي يا بت شادية خبارك معولقاني كدا قلت ليها شفتي يا خالتي نفيسة كل البباري الشمارات بتعولق كدا لكن لو خليتها برسمك رسمة مجيهة قالت لي سمح يا بت شادية عاد زين بخليها كدي النشوف تجيهني كيفن😅😅يا حليلهم كم كنت أحبهم وأمسك ريشتي فى رسمهم بكل حب وأولاد حلتنا الكانو بجننو البنات بالمشاغلة كل يوم بقول ليهم برسم ليكم لوحة وعندى معرض كبير بمشي اعرض فيهو لوحاتي وانتو اول لوحة بتكونو بهددهم طوالي 😆.. وكم شخصيات جالت بفكرى وانا في عرض البحر المظلم.. تاني قبلت علي البحر.. يا بحر قم حرك تحرك او فعد نحو ابتداءك فالنهايات البعيدة لا تحد.. قد سألت البحر يوما هل انا يا بحر منك.. يا بحر لا لا تغدر بنا فأنت الكريم وانت الوفي.. ومرة اعاين لجوه الناس إلا أركز شديد من شدة الظلام ولمحت عينين لامعتين قريبتين مني بعد تمعن عرفتو شاب في مقتبل العمر عيونو تلمع زى كديستنا😹😹لكن عجبتني تلك العينين.. عاينت لي تريزا لقيتا مطمئنة لي الآخر عجبا لهذه الفتاة الشجاعة كم كانت معي نعم الرفيقة في هذه الرحلة المؤلمة😢.. مرات تجيني لحظات جنون أود أن أصرخ بملء صوتي ثم أعود ادراجي وأخيرا اهتدي بالقرآن اقرأ كل ما جالت في خاطرى سورة وادعي كثيرا كثيرا.... كنت علي

هذه الحالة 10ساعات من بداية الرحلة ثم دخل المركب الي المياه الإيطالية الحمد الله رب العالمين الحمد الله الذي بنعمته تتم الصالحات وصلنا الي السواحل الإيطالية.. الكل لم يصدق بعد كل هذا العناء وهذا الشقاء... ثم ذهبنا الي الفنادق وهناك تفرق الناس طبعا بعد وصلنا إيطاليا جون كان معانا خطوة بخطوة وفي زول في إيطاليا حيستقبلنا ويكون دليلنا حتي نصل الي بريطانيا.. في إيطاليا تمعنت في الشابان القطعو فيني ديل وفي واحد ياهو زاتو اب عيون لامعة زى كديستنا نويت له شرا حارسمو وابشع بيهو☹تاني قلت يا شذي مالك ومالو خلي الشر😡الحمدالله انك وصلتي بالسلامة تاني تشوفي خلقتو دى وين😑... المهم ما بعرف مصير الناس تاني من إيطاليا دى شنو؟ قعدو قبلهم ولا فرتكو زينا في باقي الدول الأوربية.... أنا وتريزا الزول ركبنا القطار والي لندن.... الي حلمي المرتجي.. 😎

#يتبع

#زهرة_البنفسج

-12-
لندن عاصمة الضباب!!!
هناك علاقة متينة بين السودان ولندن.. بحكم المستعمر الانجليزى فثقافتنا كانت انجليزية في العهد الماضي.. فكم من الأدباء والسياسيين والمفكرين السودانين درسو في لندن واقامو بها... كنت مشوقة أشوف الهايدبارك... وقصر باكنجهام.. ساعة لندن.. برج لندن... نهر التايمز.. وشغفي اكتر بالمتاحف في لندن... وكمان عايزة اشوف خط هيثرو بتاع الفاتح جبرا القادانا بيهو😂😂... لندن بلد جميلة شديد بالرغم الحشود ال فيها لكن الإنجليز ناس منظمين شديد... انا بعتبر حظي حلو شديد لأني كنت مع تريزا و نزلت معاهم طوالي وجون زول مشاء الله عليهو شغال كويس وعندو شقة حلوة ووضعو كويس قلت ليهو طيب لي م رسلت لي تريزا فيزة وتجي معززة مكرمة قال لي حاولت كتير بس الورق م طلع في النهاية قلت ليها نختصر الموضوع وتعالي انا كمان زمان جيت كدا والحمد الله هسه عملت علاقات ووضعي كويس الايام الأولي م مقصر معانا اتفسحنا وم خلينا شي...جون عرفني بي انجليزية لزيزة كدا اسمها صوفيا عندها كشك بتاع ورد وزينة وكلمها عشان اشتغل معاها فرحبت بي طوالي انا طبعا لغتي الإنجليزية كويسة خالص درست كمية معاهد وأكاد اتقنها تماما عشان كدا م كانت عندى مشكلة لغة...بديت الشغل مع صوفيا وبما انو أقرب حاجة لي اندمجت فيهو بسرعة وهي زاتها شغلي عجبها شديد شافتني بستهلك البنفسج كتير قامت علقت لي انو معظم شغلي بزهور البنفسج وزينة البنفسج 😅قالت لي انتي زول رومانتك😍.. انا م شفت حبيبك يجي هنا خالص.. ضحكت وقلت ليها انا م عندى حبيب انا لوحدى😰.. اندهشت وقالت لي كيف شذي ما يكون عندك حبيب ضرورى يكون عندك حبيب عشان إنتي أنثي حلو... انا أنثي حلوة 😆ياااخ انتو احلي شعب😍 في السودان مسمني شادي زاتو نسيت الانوثة🐸😂.. صوفيا زولة جميلة ناجحة في شغلها بجد استفدت منها كتير هي زاتها حبتني شديد كنت بضغط روحي شديد في الشغل عشان اعمل قروش اكتر واعتمد علي نفسي.. وخاصة كنت عايزة أجر لي سكن صغيروني كدا لانو بجد ما معقولة أكون مع الناس ديل طوالي حبيبك لو عسل م تلحسو😐بقيت أفكر في موضوع السكن دا كيف؟؟ ....الكشك دا بقرب من جامعة يوم زهجانة كدا قلت امشي اتضهب شوية قدام الجامعة فترت قعدت لي في بينش كدا بعد شوية جات واحدة قعدت جنبي م ركزت ليها لكن لما اتكلمت طوالي عاينت ليها لقيتها ملامحها سودانية ياااخ السودانين ديل ماركة مسجلة 😂😂😂اصلو م تهفي منهم هي ذاتها قفلت وسلمت علي بي انجليزية طوالي رديت ليها بالسوداني قامت ضحكت قالت لي بتدرسي هنا قلت ليها لا انا فنانة تشكيلية قالت لي تمام انا بحضر في الدكتوراة قلت ليها مشاء الله ربنا يوفقك يا محاسن الصدف لقيتها مأجرة شقة وعايزة زولة كويسة تشاركها في السكن عشان تخفف عليها المنصرفات قلت ليها ياااخ انتي جيتني من السماء اسمها نادين عثمان وانا كدا مشكلتي اتحلت بي معرفتي بي نادين طوالي طرت طيران لي تريزا قلت ليها يلا سريع لمي معاي حاجاتي عشان انا لقيت سكن كويس وقريب من الشغل.. طبعا دقت جرس قلت ليها مافي نقاش لانو بجد م قصرتو معاي نهائي انا م عارفه أشكركم كيف💜جات معاي ولاقينا نادين اتعرفت بيها وقعدت حبة ومشت.. نادين بت جدعة مستواهم المادي عالي درست اقتصاد في السودان وجات لندن لرسالة الماجستير والدكتورة بقت لي نعم الأخت م كان في تكليف ولا حواجز حتي نعرف بعض اكتر.. هي زاتها زولة عملية شديد.. نادين بقت خبيرة بي لندن بحكم سنوات الماستر وهسه الدكتوراه.. طبعا انا مليت ليها الشقة كلها الوان ولوحات عايزة ارسم وارسم عشان اعصر كل شتات الغربة عايزة افجر هذا البركان الفني الجواي.. نادين قالت يلا نمشي المتحف البريطاني وكمان عايزة أعرفك علي خطيبي جا ليهو يومين في لندن شغال بيزنس علي الطريقة الصاح مشاء الله 😎.. الي المتحف.

#يتبع

#زهرة_البنفسج

-13-
مشينا المتحف ونادين اتصلت علي خطيبها معتصم انو يجينا هناك يااااخ لكن هو متحف رأسي لفة من الجمال والروعة😇ونحنا لافين كدا أشوف ليك الفنان التشكيلي المشهور راشد دياب م صدقت مشيت عليهو طوالى يا استاذ يا استاذ.... مرحبا انت معاي؟ قلت ليهو ايوا مش انت الأستاذ راشد دياب يااخ والله انا محظوظة شديد اني قابلتك اليوم انا فنانة تشكيلية أسمى شذي الطاهر ولي فترة هنا في لندن ومن المعجبين شديد بي فنك ومعارضك العالمية والمحلية.. رحب بي شديد وقال لي هسة عندنا معرض عن الفلكلور السوداني بخص كل الفنانين والمبدعين السودانيين والجالية السودانية في لندن قلت ليهو انا عندي أعمال كتيرة تخص الفلكلور قال لي كويس خالص انا من الناس البشجعو الشباب الزيكم تعالي ورينا إبداعاتك واداني كرته وكنت عايزة أطير من الفرح 😍😎نسيت ليك نادين وخطيبها زاتو😅.. نادين عرفتني علي خطيبها قالي شايفك مع راشد دياب لكن انت جيتي كبيرة طوالى☺.. قلت ليهو الحمد الله هذا من فضل ربي هووووي ما تسحرني عين الراجل فيها فيها مناجل😆قعد يضحك ضحك قال لي انتي بت حبوبات شكلك😄قلت ايون عشان كدا خلي بالك من ندوش دى اليوم التزعلا حبوبة بتجيك بي عكازها☹...قعد يضحك ضحك ظررريف ياااخ معتصم قال لينا خلاص الليلة عازمكم عشا فاخر.. نادين قالت ليهو م كلمتك لاقيت طحنية اتصل علي واتقابلنا كم مرة لسه في جنو داك ولسة مع الطحنية بي زبادي ضرب علي قال لي عازمك غداء لقيتو عامل لي زبادى بي طحنية قلت ليهو يااااخ م مكن يعني تكون لسا معلق في الزبادى بي الطحنية دى يا ولد فوق انت الآن في لندن😂ولد مجنون خلاص... ههههههه اي كلمني قال لي مشيت لي نادين وجكستها وخلاص ح ادردقك يا حبة نحنا هنا مع بعض انت خليك مكنكش في السودان هههههه.... اي لسانو طويل خلاص لكن ما شفتو يا معتصم مشاء الله بقي آخر وسامة.... هووووي يا بت تقوليها في وشي😡.. قلت ليهم إنت وهي انا لا بعرف زبادى لا بعرف رووب بالله لما تكونو براكم اتكلمو عن شخصيتكم العجيبة دى قعدو يضحكوا معتصم قال لي نادين رأيك شنو نشربكه مع شذي دى اصلو بي لسانو الطويل دا خليها توريهو نجوم عز الضهر😣.....اي والله صدقت يا معتصم هسه اضرب ليهو خليهو يجينا هنا معتصم اتصل وين يا مان شوقنا طحنية ياااخ اه عازمك عشا مخير غايتو ضيعت الفرصة كنت حتلاقي بت مزة نص عمرك ضاع.... قال مضغوط شديد في الشغل م بقدر يجي قال ليك يخسي يا حاسدة م بتعرفيني بي المزز ليه فلاحتك بس تجيبي لي السحلية بتاعتك دى😂... وب علي منو صاحبك دا لسانو طويل بشكل دى أميمة يا معتصم معاي في القسم كل م يلاقني تكون معاي😆.. قلت ليهم زولكم النجاض دا لموني فيهو انا بنظمو ليكم وبشهيو الطحنية والزبادى بتاعتو دى ☹😅معتصم قال لي خلاص مبروك عليك من هسا استلميهو😊اتعشينا واتونسنا كتير بعدين معتصم وصلنا البيت ظبطت لي شاي كااارب كدا نادين كانت بتتكلم مع معتصم قالت لي معتصم عايزاك طوالي قلت ليهو يعني الزول م يشتاق ليك ولا شنو ادينا فرصة نهضم شوقنا شوية م معقولة هسا شوفنا خلقتك تاني تمعطنا بي التلفون😐😂... أنا زاتي قلت كدا يااااخ انتي المزة بتاعتي ياها زاتها😍😂😂😂... انت الزبادى و الطحنية الليلة وقعت في شر أعمالك ☹جيتني بي كرعينك استحمل الجاييك هسة نويت ليك بي رسمه تجنن قال لي رسليها لي واتس دا رقمي سجليهو عندك... شربنا الشاي وكل واحدة مشت تشوف مشاغلها اشتريت لي مجموعة ألوان رهيبة قعدت أرسم تاني اتذكرت الولد الطحنية رسمتو هو بياكل في طحنية بي زبادي والشرفة ظاهرة فيهو لما الزبادي عامل ليهو شنبات😤 وسحلية مارة بي جنبو نظام قرفانة منو🐸🙊😂😂😂غايتو بشتنتو بشتنة صورت اللوحة ورسلت ليهو الصورة طوالي.. ناديت ندوش قلت ليها تعالي شوفي صاحبكم ضحكت لمن دمعت قالت لي وووب علي منك يا شذوية قولعتي جنس عولاق 😱والعجب اميمة هي زاتها قرفانة منو🙊😂😂😂قلت ليها ايوة عشان سخر منها عولقتو كدا😱😐قالت لي النصيحة يا شذي الولد قرض شديد لكن تصدقي ملامحه قريبة لي رسمتك دى زى كأنك شوفتيهو قلت ليها انا رسمتو علي واحد كدا كان غايظني لسوء حظه عتر فيني😑ندوش صورتها قالت ترسلا لي معتصم 😂😂شوية كدا تلفوني ضرب... قلت الو جاتني ضحكة حلوة😂😂😍

#يتبع

#زهرة_البنفسج

-14-
قلت آلو... اسمع ضحكتو والعجب صوته.. صوته دافئ وحنون قال لي لكن بالغتي فيني ليه كدا انا عملت ليك شنو لما تبشتنيتي كدا😤😂.. قلت ليهو عجبتك الرسمة انا كنت متأكدة انها حتعجبك☺.. قال لي لسا انتي زايدة في وجعي يعنى😢لكن م قلتي لي انتي شفتيني في خيالك ولا شنو بجد الصورة تشبهني شديد شكلك حلمتي بي اعترفي سريع😍.. ههههها ما تحلم بالشتاء الدافئ يا اخوي وكت احلم. احلم بيك انت ☹بس كان في زول جواي غايظني وقلت اكيد بتكون شبهو رسمتك عليهو🤓قال لي دا حبيبك😍.... حبيب شنو دا آخر من يكون حبيبي اقول ليك زول غايظني😬تقول لي حبيبك انت ما تفهم😑... قال لي مش قلتي جواك البكون جواك دا معناهو حبيبك او أعز عزيز كويس انك تشبيهني بي زول جواك برضو خطوة حلوة.... ياااخ الولد دا مرض دا الشنو اللايوق دا😐.. قال لي علي العموم خلاص عرفت... قلت ليهو عرفت شنو قال لي عرفت انو انا جواك😆... خلاني بجد اضحك قال الحمد الله الضحكتي ياااخ ضحكتك دى بالدنيا قلت ليهو لا بالله صدقتك يا طحنية.. قال شفتي كيف سمتيني حاجة حلوة😍قلت ليهو بس انا بكره الطحنية.. قال لي م مشكله ياااخ الكره زاتو أنواع في كره بؤدى الي حب وفي كره بؤدى الي كره شكلك من النوع الأول انتي😍.. قلت ليهو ادمو شكلك عايز تعمل لي فيها فيلسوف زمانه بالله انا ما ناقصة معطة🤓.. قال لي ادمو دا شنو هههه... قلت ليهو دا اسمك😆انا زاتي ما عارفة اسمك منو؟! قال لي برضو حلو يعني دلعتيني كمان مش قلت ليك انتي حبيتيني 😍طيب انتي اسمك منو.. ما ح أوريك انت جلطتني عارف نفسك قال لي سلامتك من الجلطة يا حوايتي.. قلت ليهو حوايتي😳.. قال لي أيوة دا اسمك هههههه... ادمو شكلك انت ما عندك موضوع يلا مع السلامة وما عايزة اشوف وشك دا نهائي.... قال لي انتي شفتيني وخلاص شفتيني في احلامك😍😊... غايتو ولد معااااط... لكن بيني وبينكم لزيز ووننسته حلوة 😊قفلت لقيتو مرسل لي واتس الوجه😭😭😭كاتب لي حوايتي نزلت مني دمعة عشان قلتي ما عايزة أشوفك بس انا عايز اشوفك في كل لحظة وكل ثانية.. حوايتي الجميلة كوني دائما بخير لأنك انتي من تجلبين الخير لحياتي💜... قلت دا مالو شكلو عندو حمي😟... اتصلت علي شيرى قالت لي ما شفتي يا شذي عم علي وقعت فيهو الحيطة وكسر رجلو والترقوة وحبوبة سميرة ماتت كان شفتي نحنا لينا كم يوم م روقنا... كر علي يا شيرى شنو الأخبار المحزنة دى 😢.. قالت لي لكن في خبر حلو حيفرحك شروق حامل ☺... يا سلام أجمل خبر يعني حابقي خالة😍.. هي ومجدى أمس اتصلو علي ما كلموني والخط قطع قلت أرجع ليهم انشغلت... قالت لي تكون كانت عايزة تكلمك انا كمان اليومين دى بجهز لي التخريج فقدتك والله يا شيرى 😔.. حبيبتي م تزعلي بكون معاك خطوة بي خطوة وحتكوني احلي خريجة 😊.. قفلت منها نادين قالت لي لكن م خليتو شمار طاير في الحلة😅.. طبعا يا شذي معتصم اتفقع من الضحك في رسمتك قال لي شذي قدرت عليهو ههههههه... اها استعدادك كيف لي المعرض؟؟ ... ماشة كويس ولسه في زمن عندى أفكار حلوة عايزة ارسما... طيب يا بيبي بالتوفيق عندى قراية بالكوووم... جاتني رسالة من ادمو كاتب لي نجمتي صاحية؟ 😍... قلت ليهو نجمة البحر ولا نجمة السماء؟؟.. قال لي انتي عايزة شنو؟.. نجمة البحر عشان اغطس حجرك يا بيبي😐... يا سلام بيبي دى حلوة منك مش قلت ليك انتي ماشة معاي طحينة بس😍... م تفرح تقول بكرة العيد😃.. تاني قام اتصل قال لي من عرفتك أيامي كلها بقت اعياد😍... ههههها شكلك حناك ونوعك دا م بياكل معاي عيش😑... م مشكلة يا ستي خلينا ناكل طحينة بس😆... ضحكني بجد عبيط ياااااخ... يا سلام علي الضحكة الحلوة هسا بتعملي في شنو؟ برسم عندى معرض قريب عن الفلكلور السوداني... تمام والله عندى ليك أفكار حلوة... وجرت المكالمة لوش الفجر م قدرت اقفل منو صوته دافئ وافكاره حلوة بجد اداني افكار حلوة افادتني كتير.. كلامه ساحر كلماته تخش جوا القلب 💜لكن مع ذلك غيااااااظ☹😂.. قمت صليت وقريت قرآن ونمت حبة عشان امشي الشغل.. صحيت لقيت رسالة منو.. كاتب لي..
من انتي؟! سوف تمر أيامي وانسجها ستارا... من انتي؟! نجمتي... حوايتي... انثتي... حيثما تكونين فشوقي إليك يستعر استعارا...
اتفضلي إذنك معاك... فجي المسامات وادخلي... 💜... ومقطع صوتي غنية محمود عبد العزيز دى👆😍😍... غلبني الكلام!!! طلعت الشغل صوفيا قالت لي في حاجات أمشي جيبها.. وأنا جاية لاقيت زول في المترو م كنت متوقعة اني اشوفو نهائي..!!
يتبع#

#زهرة_البنفسج

-15-
في الميترو أشوف الولد أبو عيون لامعة وكمان شايل ليهو ديوان شعر لي بدر شاكر السياب يقرأ فيهو هو م لاحظ لي لكن انا ركزت فيهو اتكهربت منو يعني هو كمان جا لندن 😐قلت يا شذي يعني هي لندن حقتك براك أمة لا الله إلا الله كلها هنا مالك ومالو يكون في لندن ولا السما الأحمر لكن برضو واجعني كلامه عني قلبي قال لي امشي شيلي منو الكتاب واخبطي في وشو اعملي فيها مجنونة😂😂كمان قال بقرأ شعر هو بعرف يشعر الثقيل دا 😣اشيل وأحمر ليهو لما نزلت وهو مع كتابه ما جايب خبر مشيت الكشك انتهيت من شغلي وقلت اغشي تريزا لأني طولت منها أبت اصلا تفكني كلمتها بي الولد ضحكت قالت لي شكلو الولد دا وراك وراك قلت ليها يلا انا امشي عشان ماشة السوق مع نادين عايزة اشترى حاجات لي شيرى معتصم خطيبها مسافر بكرة قالت لي دقيقة اديك الفستان انا من السودان كلمتها قلت ليها فستان التخريج علي اشتريت ليها فستان رررهيب بي جزمته وطقمه غايتو تريزا دى زولة عسل بشكل 💜قلت ليها خلاص ريحتيني بس انا بشترى ليها الميك آب.. اتلاقينا انا ونادين اشترينا حاجاتنا وعندنا أغراض لي البيت جبناهم معانا قالت لي معتصم عازمني عشا إلا تمشي معانا قلت ليها امشي انتي يا ختي م ابقي ليك حقنة دا عشا وداع قالت لي خلاص بنضرب لي ادمو وتكوني معاهو قلت ليها ياااخ مزاجي م رايق امشي انتي انبسطي💜بعد تجو راجعين بودع معتصم.. غلفت حاجات شيرى كويس واشتريت حاجات بيبي لي شروق😘😘قلت امشي أرتب افكاري وارسم شوية جاتني لوحة حلوة كدا شفتها في غرب السودان لما مشينا ايام الكلية بديت ارسم كدا تلفوني ضرب لقيتو ادمو سلمت عليهو قال لي مالو صوتك الليلة م عاجبني قلت ليهو مافي شي بس الليلة كان يوم مرهق الشغل كتير ومشيت السوق مرتين تعب بس قال لي طيب عايز اشوفك الليلة قلت ليهو بجد م عندى مزاااج قال لي يعني انتي ما عايزة تشوفيني؟؟... لا م كدا لكن بجد مرهقة وعايزة أنجز شغلي عشان المعرض قرررب غير كدا الليلة لاقيت زول قفل لي نفسي😑... طيب انا ذنبي شنو؟ ربطاني معاهو لي شنو؟ ولا دا الزول الجواك😏... ادمو ممكن م نتكلم في الموضوع دا لانو بجد بنفرزني ويجب كسافتي😣... م بخليك الا توريني الزول دا منو؟ ومالو معااك؟.. ياخ انا زاتو م بعرفه ولا عايزة اعرفه معليش ممكن نتكلم بعدين... يااخ م تزعلي صارة لي وشك دا تشبهي لورى عمك الزبير😣.... ههههههه لورى عمك الزبير دا شنو كمان؟.... لورى عمك الزبير دا لورى قديم ومكركب من شدة قدمه لما معالمه مطموسة وهو مصر عليهو يشغلو واليوم التاني معانا في الورشة وم مقتنع انو هو فاقد الصلاحية زاتو... هههه انت كنت شغال في ورشة ولا شنو؟ أيوة انا مهندس ميكانيكي كان عندى ورشة لكن قرفت من الشغل واتفكفكت وجيت هنا... م مشكلة هنا الفرص أوسع بس طول بالك... اطول بالي زى لورى عمك الزبير😆... غايتو الله يكون في عونه عمو الزبير دا جننته معاك😅😅... ايوا كدا اضحكي وخلي الدنيا تضحك😊يلا اسيبك ترسمي عايزينك تكوني الأولي يا دافينشي لو احتجيتي اي حاجة م تتردى وراك رجل يا بت😎... سمح بس نحنا م عندنا رجال بياكلو الزبادى بالطحنية نحنا رجالنا بياكلو الشطة الحاااارة بي الدكوة😜😂... اصبري بوريك الشطة الحارة دي كيف؟ 😡بس اشوفك... هههه طيب يلا سلام... رفعت ضغطه لكن والله عرف يمتص زهجي ذكرني خالي بي دافينشي دي💜.. اشتغلت كتير قلت أرتاح حبة جاتني فكرة جهنمية أنو أرسم عمك الزبير ولوريهو القديم خصوصا اللوارى الزمان دى بقت منقرضة رسلت لي ادمو الزبير ولوريهو بشبهو كدا؟... رسل لي ما بوريك شوفي ليك واحد شطة يوريك 😏... م مشكلة خليك اللورى اصلا معروف وعمك الزبير برسم ملامح حسين سيد الدكان😆... هووي يا بت كمان جابت ليها سيد دكان 😣غايتو بت غياااظة خلاص عندى صورة محتفظ بيها برسلا ليك م عايز لي ضهب في الدكاكين مفهوم😡... حااضر..عجبتني الهرشة 😅يااااخ ادمو دعمني كتير بأفكاره وبالمعنويات💜.. جات نادين قالت لي معتصم عايز يسلم عليك.. اوو فنانتنا العظيمة مشتاااقون كتير فتحتي خط بهناك وفتحتي لينا😉لكن أمورك ماشة طحنية😍😂 .. واااي اصلا بكره الطحنية وادمو كرهني ليها اكتر ☹.. هههه اسمو الجديد رهيب شديد يا شذي تاني حنسميهو كدا.. جبت ليهو الشنطة ادتو تلفون شيرى ودعنا ومشي.. نادين قالت لي انا تعبانة عايزة انوم تصبحي علي خير😘.. تلاقي الخير😘..


#يتبع

#زهرة_البنفسج

-16
نادين صحت قبلي انا لأني ساهرت في شغلي كتير لكن أنجزت الحمدالله وكمان ادمو م قصر معاي يا حليلو الليل كلو معاي مخلي شغلو ويدعم فيني بجد مشاء الله عليهو عندو أفكار رهيبة ممكن ينجح هنا ويبتكر في مجاله اكتر. طول الليل معاي بالتلفون. شوقني اشوفو حسيت بإحساس مختلف م حسيتو ابدا إحساس زول دخل حياتك وانت فرحان بيهو شديد احساس بأنه هو ملأ حياتك وما حاسي بي وحدة ولا خوف رغم الغربة والبعد عن الأهل.. احساس كل ما جاتني رسالة ولا تلفوني دق اقول دا هو. زمان م كنت بجيب خبر لي التلفون إلا بكون عايزة اضرب لي ناس بيتنا ولا حاجة تخص شغلي لكن الآن بقي تلفوني هو الرابطني بيهو💜... م عارفة لكن بجد هو زول بخليك تسمعه حتي لو م عايز تسمع أسلوبه في الكلام منمق وحلو بعرف كيف المداخل عمرى وطول حياتي العريضة مافي ولد شداني زى ماهو شداني ليهو زول مثقف لأبعد الحدود وكتاااااب ياااخ بكتب لي كلام كلام مساطيل بس😂بحب الشعر والكتابة تلفوني زاتو بقي تقيل من كتاباته وشعره😐😅... غايتو أتمكن جواى م عارفة ليه فجاة اتذكرت مي واحساسها بي الحب لي زولها داك.. امكن يكون دا حب؟! 💜... لقيت نادين جهزت الشاي بتشرب قالت لي صباحك قشطة لكن أيامك يا برنسيسة م بدرى الليلة م عندك شغل.... صباح البنفسج 🌸عندى لكن قلت لي صوفيا بجي متأخرة شوية هي عارفة عندى معرض وانا شغالة بحضر... صوفيا دى لزيزة شديد يا شذي غايتو انتي مشاء الله محبوبة😍.. وكمان ادمو متكسر لما بهناك😊😂... ههههه شفتي من نعم الله علي الناس الحولي ديل كلهم عسل تريزا وجون وصوفيا وانتي ومعتصم انتو في كفة وادمو براهو في كفة😉😆.. شوفي البت وقوة العين الحالة بدون وضوء لو شفتيهو تعملي شنو؟ وثم ثانيا انتو ليكم زمن ياااخ المخليكم تصبرو قدر دا وم تشوفو بعض شنو 😳.... بدون وضوء دا شنو اول؟ دا واحد قالو ليهو صلاتك سمحة ياااخ قال ليهم الحالة بدون وضوء...... ههههههههههههههه دا عسل كل م نقول عايزين نتقابل م ألقي طريقة ياهو يكون مشغوول خايفة بس نتلاقي يوم العرس ☹😂.... والله لكن قلتي لي آخر تطورات يعني انتي خلاص وقعتي وما سميتي ☺والله يا شذي اقول ليك كلام أحمد يستاهل كل خير زول مشاء الله عليهو جنتل مان هو طبعا صاحب معتصم من الجامعة درسو هندسة سواء واصلا م اتفرقو خااالص هو الصاحب الانتيم ليهو يوم معتصم شافك قال لي والله شذي دى مناسبة لي أحمد كمان بتشابهو م حصل اتلاقيتو معاهو قلت ليهو والله دايما مشغولين وهو زاتو مشغول شديد ماسك وردية ليل نهار وهو زول عملي وبحب الشغل بعدين لزيز وقيافة ودمو خفيف شربات بس☺ختي في بطنك بطيخة صيفي 😋... ندوش أحمد منو؟؟ اجي يا بتي بتستهبلي انتي😳تحبي الليل كلو وتقولي أحمد منو🤓... ادمو اسمو أحمد 😆والله اتشرفنا لكن والله م عارفه اسمو ولا هو عارف أسمي قال لي اسمك دا حلو خليني بس بالاسم دا وتاني نهائي م سالتو من اسمو وانا وانتي طولنا م قعدنا قعدة زى دى... أحمد اسمه حلو😊.... غايتو يا شذي انتي عسل لكن يا ختي هو شافك وشبع فيك شوف عشان كدا مكنكش فيك احمد وين يلقي صبر قدر دا يا حليلك... شافني وين؟ 😳.. يوم مشينا المعرض مش معتصم صورنا وفي المطعم كمان أتصور معانا سليفي معتصم كاواهو بي الصور وعايز يموت من الغيظ عشان ما جا معتصم قال لي جنني جن بي الصور بس ياها دى زولتي بقي مجنون بيك عدييل قال لي اليوم كلو شابكني شذى شذى😊 كان عندى صور ليهو هنا تعالي أوريك ليهو اخخخخ شكلي مسحتهم لكن خلي معتصم يرسل لينا صوره هسا.. شوفي الولد دا غتاتو اصلو ما قال لي انا شفت صورتك خليهو م تشغلي بالك كتير كلها يومين و اشوفو في المعرض ندوش إحساس الحب كيف؟ ...ههههها زى إحساسك دا يا بيبي ☺يعني إنتي يا شوشو اصلو م حبيتي معقولة😳... تصدقي يا ندوش م حصل حياتي كلها شغل وشقاوة أصحابي مسميني شادى😆... عشقتو شادن عيونو ساحرة وقوامو لادن جاي عليك المقطع شديد حارسلو لي احمد 😂والله الله اداهو احمد عشق فتاة جميلة قلبها بكرا😍😊... ايون شفتي وين الرهابة يا بت🤓... اتصلت شيرى وقالت قابلت معتصم والحاجات عجبوها شديد اتكلمت مع ندوش قالت ليها انا ومعتصم بقينا فرد وتاني تشوفيهو في الكاميرا الخفية😜.. هووووي يا شيرى العبي بعيد😡... خستكنا كالعادة قالت لي غايتو تعبتيني تعب خالتك خديجة دى بعد تعب لميت فيها اديتها القروش ودعت ليك جنس دعاء يا شذى يا حليلا ادتني قفة هدية قفة فرح☺ قلت ليها م عندك مشكلة انا زاتي بسوق ليك حاجاتك دى والعجب عم حمزة معطني معطة السنين شذي وشذى قال فاقدك شديد شكلو حباك يا شذي اختي😆... شيرى يا مجنونة خلاص يلا اقطعي وشك دا مني☹.. أجمل حاجة في الدنيا لما تعطي حاجة لي زول ويكون هو مبسوط بيها وانت زاتك بتنبسط اكتر... خالتي خديجه دى بتعمل القفف والهبابات وكل حاجات السعف ظروفها صعبة شديد عندها أطفال أيتام كانت بتجيني في المحل كنت بساعدها بديها ألوان وقروش وبسوق ليها شغلها ... سعادة الآخرين هي مصدر سعادتي الآن 💜... صوفي

ا لقيتها شغالة وكمان الليلة معاها زوجها مستر جاك بعد جيت قالو ماشين عزموني عيد زواجهم صوفيا قالت لي كلمت جون وزوجته لازم تجي... سرحت شديد في الشغل م انتبهت إلا بتلفون تريزا..
يتبع#

#زهرة_البنفسج

-17-
تريزا قالت لي اجهزى عشان نمشي لي صوفيا سريع جهزت لي هدية حلوة تليق بالمناسبه وندوش برضو مشت معانا.. منزل صوفيا حلو و أنيق واحلي حاجة فيهو الحديقة الرائعة مهتمين بيها بعناية فائقة.. الاحتفال كان حلو مجموعة من أصدقاء العائلة واحلي مافي الحفلة طفليهما الحلوين ديفيد وهنري كم كانو رائعيين هذين الطفلين عزفو وغنو مشاء الله رهيبين في العزف غنيت ليهم اغنية أبو عركي غنو معايا غنوة العيد والفرح الليلة يوم ميلاد فرحنا💜... وحنيت لي لمة السودان قعدت أغني اريدك يا بلد كلك.. أريد شمسك أريد ضلك.. أريد الأرض والإنسان.. أذوب في تمازج الألوان.. أريد ناسا عزاز بالحيل... قلوبا عامرة بالإيمان.. أريد صحراك أريد النيل.. أريد ضل نيمة تحتو سبيل.. أريد اللمة في الحيشان.. هنا السودان.... انفعلت بالغنية خلاص عايزة ابكي😭... لكن اتكيفو بالايقاع السوداني وانبسطو شديد ونحنا كمان انبسطنا أسرة صوفيا أسرة مليانة حب وفرحة كان أجمل تعبير لي جاك وصوفيا يعبر عن حبهما في هذا اليوم و الرباط المقدس الذي جمع بينهما💜... جينا البيت نادين قالت لي الليلة ابدعتي يا ختي صوتك حلو يا شذي كيفتينا يااااخ قلت ليها دا كلامك انا كنت مغنية الكلية😎😅.. قالت لي خلاص غني انتي وادمو واعملو فرقة😃... اها جبنا سيرة القط التلفون بدق.... يا بت انتي وين لا شغالة بي مسج ولا تلفون زهجتيني زاتو😣... انا في آخر فرحة اعمل بيك انت شنو؟ 😑... فرحة بلاي ناقصة😏اول شوفي كمية المسجات الرسلتها ليك... قلت ليهو ياهو عمارك مليت لي تلفوني بي مسجاتك☹طيب يا بيبي اغير واشوف المسج وارجع ليك.... م كنت بتفكك منو...... كاتب لي😍..
حبيبتي انتي... روحي وعقلي... رسمتك جواي كما ترسمين ب انامليك الرقيقة لوحاتك.. لا اريد في هذا الكون سوي أن ألتقي بعينيك الجميلتين... عيناك غابتا نخيل ساعة السحر... او شرفتان راح ينأي عنهما القمر.. عيناك حين تبتسمان تورق الكروم... وترقص الأضواء... كالاقمار في نهر.... عيناك لي سقيا وحلاة اللقيا...... حوايتي انتي ضئ عيني.....بريديك يا شريرة😡....مجنون حد الجنون الولد دا☺... م رجعت ليهو قام اتصل قال لي يعني دمك تقيل تقيلة☹كلو الكلام دا ولا حتي نقطة. ما رسلتيها....ما برسل ليك تقول لي شريرة وأرسل ليك ثم ثانيا عيناك عيناك فلقتني لما جبت لي حساسية في عيوني🤓... قال لي اعمل شنو عيونك لكن عذبتني من يوم شفتك!!... شفتني وين؟ شفتك في الصورة طبعا جننتيني عدييل يا شذي.... كمان عارف اسمى يلا مع السلامة... قفلت منو الخط يضرب أبيت كلو كلو أرفع ليهو قام ضرب عن نادين قال لي عليك الله م تزعلي مني ما جات المناسبة أوريك انو انا شفت صورك وهسة انتي بكرة المعرض بتاعك مافي داعي تزعلي ياااخ عشان عايز أرتب معاااك... ادبتو ادبة😕... لكن كل مرة اشيل واقرأ في الرسائل لما حفظتها😅.. قلت خلاص اراضيهو... كتبت ليهو.... كتبت ليك لا بيني بينك ريدة لا قصة غرام.. اخترت ليك أجمل حروف.. وأصدق فواصل نادرة في لغة الكلام.. لا قصدى ألهو معاك بي كلمات غناي.. لا حروفي ليك مرجيحة من شعر الغمام... قام تامها لي طوالي... كتبت ليك والله يا قمر الزمان.. شان جيتي بي زمن المحنة وشفت في عينيك حس اهلي الحنان.. وكتبت ليك ووفقت ليك لامن لقيتك جاية في قلب الطريق.. ولمحت فيك راحة المشاوير البعيدة... ونفحة النسمة الحنينة الجاية من جوف المضيق.. عينيك حس أطفال ينادو القمرة للغياب يعود وجبينك الضواي حجا الحبوبة في الزمن السعيد.. وانا حيلتي ايه قول لي يا قمر الزمان غير اتكئ وأحلم معاك واحضن اماسي الصحو والأمل البريق...... طبعا بعد الكلام دا المفروض أبدع إبداعا لي بكرة😍

#يتبع


قمر الزمان بمناسبة ذكرى الفنان الإنسان مصطفي سيد أحمد له الرحمة والمغفرة..

#زهرة_البنفسج

-18-
لا تحسبن المجد تمرا انت آكله..
لن تبلغ المجد حتي تلعق الصبرا..
بلوغ المجد ليس بالتمني وحده إنما بالتمني والكد والتعب... أن تسعي إليه... وأن ليس للإنسان إلا ما سعي وأن سعيه سوف يري..... هذا القرآن العظيم لو عملنا به لكنا كما في سابق عهدنا قوة وصلابة... علم وهيبة... العمل هو مربط الفرس لتقدم الدول وازدهارها.... والعمل من أكبر العبادات صلاحا وتقوى... الدول الغربية عرفت معني أن تعمل بإخلاص عشان البلد تترتقي وتتطور وتزدهر... عمل منظم ومتقن.. الفرد بتقن العمل يبتغي فيه صلاح الدولة وصلاح نفسه... في لندن اتعلمت قيمة الوقت وقيمة العمل.. وديل الاتنين عندنا ضااايعين ضياع شديد.. كيف نحنا تتطور وم عندنا قيمة للوقت ولا العمل يعني الواحد إذا عندو غرض في مؤسسة معينة بس يغني تعال بكرة او بعد بكرة وتفضل ماشي وجاي العندو واسطة او برشوة امورو تمشي زى الحلاوة والماعندو يعمل الدرب ساساقة في النهاية يتعب ويترك الموضوع... حتي الشباب النشط ال عايز يعمل وينجح من غير اتجاه الوظيفة المرض☹ واتجه الي المشاريع الخاصة الضرائب و المحلية يطلعو زيتو يزهج ويخلي ليهم الجمل بما حمل.. عندى صحبتي مهندسة زراعية عملت مشتل خاص جننوها ناس المحلية كل م المشتل تتعب فيهو ويكون حلو وجميل المحلية ترحلو جهة أخرى زى جني الكديسة😆.. في النهاية زهجت اتبرعت بالشتول للمدارس والمساجد وقفلت المشتل لانو النباتات دى زاتها م تستحمل ترحيل من حته الي حته... مافي تشجيع في بلدنا بالعكس تحطيم الا تكون من الجماعة الطيبين ديل وخشمي وعندى😷ولو حكومتنا بتعمل زى م تتكلم كنا بقينا قوة💪وبقينا جمال😍... لكن حنعمل ح وح نعمل وعيش يا حمار☹😰... السوداني برا بنجح عشان بلقي أرض خصبة لي افكاره ولي عمله المتقن في بلاد تحترم القانون والعمل والوقت.... اكتملت كل لواحاتي كل لوحة أجمل واحلي 😎.... قبل ان أتحرك ضرب لي الفنان راشد دياب قال لي اها جاهزة يا بتنا المعرض فيهو منافسة قوية..... قلت ليهو جاهزة موية ونور.... فعلا كان المعرض أكثر مما كنت أتصور مجموعة من الفنانين السودانيين حتي من خارج المملكة المتحدة حشد فني رهيب لكن انا بجد اجتهد ساهرت الليالي علي الرسم.. من طلب العلا سهر الليالي😎😆.... اشتريت لي فوطة وسكسك وودع واتمشطت لبست لبس شرق السودان... كنت روووعة😍🤓فلكلور سوداني بجد والعجب لواحاتي كانت كلها مميزة حتي الأستاذ راشد انبهر شديد بشغلي... فأنا عندما أمسك الريشة ارسم بقلبي وعقلي وروحي أذوب في عالمي واغرس بزور الفن في تلك اللوحات فتنمو وتتفتح كازهار الربيع🌹🌺🌷💐... الزوار كانو كتيرين شديد وانا كنت كل مرة اعاين لي المدخل عايزة اشوف أحمد مالو اتأخر لانو قال لي بيجي بدرى💜نادين كانت واقفة جنبي وتريزا وصوفيا وهنري وديفيد حبايبي الحلوين.... في واحد كان عايز يشترى اللوحة بتاعة عمو الزبير واللورى بتكلم معاهو كدا اسمع ليك واحد يقول اللوحة م للبيع رفعت راسي ألقي ليك الولد بتاع إيطاليا الغيااااظ داك طوالي حمرت ليهو انت الجابك شنو ودخلك شنو أبيع ولا م أبيع ياااخ بقيت شايفة عشرة عشرة😡😣... نادين قالت ليهو أهلا أحمد مالك اتأخرت قلقت بي البت دى.... قلت ليها أحمد وينو؟.... اجي يا شوشو الليلة عاد مع النجاح الباهر دا معليش م بتشوفي الواقف جنبك دا...دا أحمد؟!! 🙄.. جاتني صدمة حقيقية وما مستوعبة الحاصل لكن قلت اتماسك عشان انا الليلة في عرش الفن... قلت لي الزول شيل اللوحة والسعر مكتوب عليها مسك يدي قال لي شذي اعقلي شوية انا بجد عايز اللوحة وبعدين بفهمك.... من فضلك انا م عندى معاك كلام ولا حتي بعرفك هسة ممكن تخليني أشوف شغلي... نادين وتريزا مشو عليهو وساقو مني بعيد شوية وانا اشيل وأحمر ليهو تاني انشغلت بي الزبائن م اشتغلت بيهو كتير وأكتر شي الخواجات عجبهم لبسي يشلو ويصورو فيني وعمنا داك دمو فااااير يشيل ويعضعض في شفايفه ويكرش في سنونه😬... لو اديتو فرصة كان جا كسر التلفونات من الناس... المعرض كان أكثر من رااااائع لوحاتي كانت أكثر مشاهدة ومبيعا... الحمد الله نجحت شديد في المعرض وراشد دياب أشاد بي شديد قال لي إن شاء الله حيكون عندك مستقبل باااااهر انتي مبدعة بجد وكويس اني لاقيتك انا فخور بيك شديد واخدنا كم صورة انا هو كتوثيق لهذا الحدث 💜والاحتفال كان مصور وموثق وتريزا صورت فيديو كويس عشان نرسلو السودان اهم شي ناس السودان اهلي الحنان 💜كان يوم حلو اتعرفت علي فنانين كتار بجد بشكر الفنان الكبير راشد دياب لأنه بجد وقف معاي ودعمني فنينا له التحية.. وادمو كان له أثر كبير في نجاحي 💜ادمو بس وليس احمد😣... انتهي الإحتفال وبقينا طالعين واحمد ماسك فيني واتكلم معاي وأنا كأنه الكلام م معاي في النهاية نادين قالت ليهو خليها يا أحمد تهدأ وانا بتصل عليك تمام... وصلنا البيت بجد كنت مرهقة لاني الفترة الفاتت بزلت مجهود جبار... شوشو حرام عليك الولد خلاص عايز يبكي ياااخ خلاص سامحيهو... أنت مش عارفة عمل شنو؟ ك

ان بمثل علي كل الفترة دى خلاص أنتهي كل شيء بينا... بس يا شذي هو لما قال عنك الكلام دا م كان بعرفك يعني يا بيبي اي بت تسافر كدا بيقولو أهلا وين ولي يخلوها تتعرض لي المخاطر دى خصوصا إذا كانت صغيرة وحلوة زيك تساؤلات كتيرة بتخطر علي البال يعني م أحمد براهو أيوة هو المفروض م يقول عنك كدا ولا ليهو الحق بس اديهو فرصة يا شذي... انتي بتقولي كدا يا نادين لا احسن يعرفني وبعدين يقول كدا!!! يعني انتي لما حكيت ليك برضو قلتي كدا؟؟!! لا اكيد م قلت يا شذي لأني اصلا عرفتك وعرفت اي نوع من البنات انتي بي مية راجل بالرغم رقتك م استغربت فيك... لكن أحمد يختلف... م تبرري ليهو خلاص طلع من نفسي معليش نقفل الموضوع دا عشان عايزة اتصل بي ناس بيتنا💜...

#يتبع

#زهرة_البنفسج

-19-
اتصلت بي ناس بيتنا لقيتهم كلهم مجتمعين حتي شروق ومجدى معاهم قلت ليهم شفتو الفيديو..أمي قالت لي لكن مشاء الله يا بتي رفعتي راسي ربنا يحفظك ياريت لو كنت معاك😔... قلت ليها أمي يااخ م تبكني انا زاتي نفسي أكون معاكم وشيرى تتشالق والله يا شوشو لكن طلعتي قرررررضة باللبسة الكسلاوية حالبسا في حنتي😋.. مجدى قال لي انا كنت معترض علي سفرك لكن بعد شفت نجاحك قلت بركة السافرتي😁الف مبروووك يا شذي وانتي تستاهلي كل خير وشروقة اختي يا حليلا كلو عدتو معاي بكي😭قالت لي والله فاقدنك يا شوشو واشتقنا ليك شديد يا حليلهم بجد فقدهم شديد💜... رسائل أحمد أبت تقيف خااالص... شي مقاطع صوتيه وشي كلام غايتو الولد اصلا ما نام الليل كله يكتب ويعتذر م اشتغلت بي كلامه قفلت التلفون لكن م قدرت انوم تاني فتحت التلفون اقرأ في كلامه.... شذي حبيبتي الفريدة لقد أحببت جمالك من شفتك ولكن بدأت في حبك الخااالد عندما عرفتك وعرفت روحك الجميلة والشفيفة... لو تركتيني سأعيش ولكن سأعيش دون معني ودون هدف انتي ابتعاث سعادتي... وميلاد حبي لا تتركيني فدونك كل شي ينطق بالكآبة... لو تعرفين حبي لك لما فعلتي بي هكذا... لم تهدأ روحي منز ان فارقتك... زلة لسان طلعت مني من غير ان اقصد لا تحكمي بإعدام حبي لك بكلمات احسبها طلعت دون أن أفكر فيها.... من حقك أن تزعلي... أن تخاصميني.... أن تصرخي في وجهي... لكن لا تتركيني وتذهبي انا هنا في غربة انتي لي الوطن والسكن والاهل💜....الإنسان الذي يقدر علي الحب يقدر علي كل شي وانتي قلبك مليان حب❤ قادرة ان تسامحيني.... يا فنانتي الجميلة دعي ريشتك تخبرك عن أحمد الذي ظل معك طوال الليالي ساهرا معك كلميها عنه ستخبرك بما يكنه لك... هناك الكثير الذي سنفعله معا... أمسك يدك ونمشي تحت المطر ونترتل انشودة الحب... لو كنت أستطيع أن أجر عجلة الزمن لفعلت حين كان لقاءنا الأول ولقلت انتي من كنت أبحث عنك انتي من رأيت صورتك وانا احلم بيك... حوايتي... شذويتي... حلمي الذي شفته في السودان وصار حقيقة لا تدعيني اتعذب أكثر من ذلك.... فأنا غلطااااان وبعتذر بشدة....غني لي اغنية صلاح مصطفي وكان صوته حزين في الغنية.....
م عدت قادر أنتظر... سامحني غلطان بعتذر.. م كنت قايل من عتاب تحكم علي بالوحدة والشوق والعذاب...
أنت القبيل شلت الصعاب... في دربو عديت الف باب.... لو انت زهو الحسن في عيونك بدأ... خليك أمين في العشرة لي آخر مدى... كيف تنسي لهفة قلبي ليك... تنسي الحنان الكان لديك.. لو مرة اسمك في البعيد شايلو الصدي.... بلل النسايم الحلو بي قطر الندى... تلقاني واقف مرتعش ضارع إليك.. عارف تمام دا المستحيل الحسن والطبع النبيل.... لحظات خصام المرة تمدد شهور... صدقني لو اغلط معاك دايما اقول... أنت الاصيل.. أنت الوفي.... عن حبي ما ممكن تميل... من بعدو ما داير دليل....
ما عدت قادر أنتظر...
سامحني غلطان بعتذر...
وجع لي قلبي زياادة💔 كلماتو أثرت فيني انا زاتي حنينة يااخ لكن هو غااااظني شديد.... كتب ليهو أحمد.... قال لي روحه وقلبه وعقله وكله.... في شي ما فهمته قلت شفتني في السودان؟؟!!!!...... هسه بجي افهمك كل شي.... لا الزمن اتأخر شديد يلا انا زاتي تعبانة عايزة انوم....... يعني سامحتيني أكون فرحاااااان يوم تكون جنبي يا حبيبي 💜...... خلاني اضحك بالرغم من غيظي منو 😡لكن كلماتو تداوى جروووح 😍😊... الصباح مرسل لي حبيبتي حلمت بيك انتي حلمتي بي☺.... قلت ليهو لو حلمت بيك تشوف قعر اضانك👂😂.... قال لي الحمد الله رجعتي شريرة😡 صباحك بنفسج يا زهرتي البنفسجية لازم اشوفك اليوم.... ما عندى مزاج اليوم ألاقيك وعندى مواعيد مع استاذ راشد... نعم نعم راشد دا حدو المعرض وخلاص ما كفاية أمس وتشيلي وتصورى معاهو... أنت مالك يااخ دا لقاء فنانين لما تبقي فنان وتعرف تنقي كلماتك تعال اتفاصح مفهوم😣.... ندوش جات حضنتي قلت ليها خير إن شاء الله انتي كمان حلمانة بي معتصم😆.. قالت لي مبروك تم صلح الحديبية فرحتيني والله كنت شايله هم أحمد... قلت ليها الخفيف اللفيف كلمك... م صلح كامل نص نص 😏...جرس الباب دق ندوش فتحت الباب لقتو أحمد جا ناطى طوالي قال لي يلا البسي عشان نفطر سواء قلت لي ندوش يلا نمشي قال لي نادين شبر ما بتبارينا... كويس يا أحمد بجي الخريف واللواري بتقيف☹ م عندك وجهة غيري... م ذكرني اللواري شذي باعت لوحتي التعبان فيها😞... تعبان فيها😳... أيوة الفكرة مش حقتي اعترفي.... مشينا مطعم حلو بصراحة م اشتغلت بيهو أكلت بي نهم لأني كنت جعااانة😵... قال لي ليك كم يوم م اكلتي😑.... اي لي زمن شهيتي مقفولة عشان كدا هسة باكل من غير نفس😋.... رأيك شنو تاكليني انا!!!.... م باكل أكل مسيخ يا بيبي😏.... خليتو يضحك... اها مواعيدك الساعة كم؟... مواعيد شنو؟... مش قلتي عندك مواعيد؟ولا عايزة تغيظيني.... ما انت كمان غايظني وفاقع مرارتي... أحمد يحكي وشذي تستمع بكل حواسها... ماذا يقول احمد؟؟؟

#يتبع

#زهرة_البنفسج

-20-
والاخيره

وفي الحب 💜حكايات ووقصص...
تعرفي يا شذي انا لما شفتك معانا في السفر م شلت عيوني منك ابدا بس انت م لاحظتي لكن كنت مراقبك طوول الوقت وطارق صاحبي كل مرة يقول لي انتهز الفرصة وامشي اتعرف عليها لكن م لقيت فرصة فيك وانتى زاتك كنتي قافلة نفسك بس مع صحبتك زهجت منك زهجة تاني قلت يااخ أنسي يا أحمد دى م حتكون فيري اكيد.. رفعتي كثافتي وانا اصلا بصراحة عندى رأي في البت البتشالق وداخلة في دور الأولاد لكن انتي كسرتي القاعدة في رأسي... لما قلت فيك كدا طارق صاحبي قال لي والله كذااااب كذب انت ميت فيها لكن م لاقي طريقة... بصراحة م كنت قايل نفسي التقيك مرة أخرى لما شفتك في صور معتصم جن جنوني وحكيت لي معتصم كل القصة لم أكن اعرف ان القدر يجيبك لي مرة أخرى بالقرب مني... انا من شفت صورتك مع مي وانا بفكر فيك م عارف ليه!!! ودخلت صفحتك الفنية وشفت كل شغلك وبقيت واحد من معجبين صفحتك وانتي م بتعرفيني😞..... قاطعته دقيقة يا أحمد قلت شفت صورى مع مي بس م تكون مي الدسوقي؟؟.... أيوة... يعني انت زولا ال كانت بتحبه😳😰.... أيوة بس انا م وعدتها بشئ لانو اصلا علاقتنا محكوم عليها بالإعدام.... ليه يا أحمد يعني كل م اقول اتخطي عثراتك تطلع لي بعثرة أكبر انت عارف انو انا كنت خطوة بخطوة مع مي في علاقتك بيها الي أن سافرت انت هى كانت متعلقة بيك كان قلبها ينزف لفراقك💔... مي دى بت زى النسمة ليه تعمل فيها كدا؟؟؟.... الأمر ليس بيدى يا شذى انا اتعرفت علي مى فى الطريق كانت سايقة عربيتها والعربية وقفت وانا كنت في نفس الطريق وقفت صلحت عربيتها وحصل بينا التعارف ولما عرفت انها بت ناس الدسوقي م حبيت اتعمق معاها لانو هى زاتها حكت لي انو اهلها مستحيل يقبلو عريس إلا من طرفهم لكن لا أنكر انها هي حبتني كنتي عايزاني اعمل شنو يعني أهرب بيها مثلا!!!!..... تخيل انا فكرت كدا لما حكت لي وكنت مشوقة اشوفك ليتني شفتك كنت وفرت لي كل هذا المشوار..... انتي هسة عايزة تختي اللوم علي دى قصة عدت وخلاص...... لا يا أحمد ليست بقصة عدت عندى لم تعدى معليش يا أحمد لا أستطيع ان أواصل معك انا وانت طريقنا م واحد..... شذي انتي مجنونة وبعدين مي زاتا اتزوجت وشافت حياتها لي عايزة تربطينا بي ماضى كان صدفة وعد زى م بتعدى كل الصدف انا وانتى أبناء اليوم جمعتنا أشياء كثيرة وأصبحنا واقع معاش أرجوك م تتهورى وتهدمي كل شي..... معليش يا أحمد امكن لو كنت أي بت كنت عديت الحكاية والسلام بس انا بطبعي إحساسي مفرط في الأشياء م بقدر أكون معاك وانا اتخيل مي بتحكي لي عنك وعن حبها الجاااارف ليك م بقدر يا أحمد اعذرني حبيبي أيوة بعترف اني حبيتك ولم يدخل قلبي رجلا سواك حبيتك بكل أعماقي تمنيتك وكلما ازددت قربا لي ازددت حبا لك..... طيب يا شذي ليه عايزة تفرقينا من بعض أرجوك لا تفعلي تكوني بجد انتهتي مني لو عايزني أعيش جسدا بلا روح افعلي هذا 😭😞...... عندما يبكي الرجل فالموضوع أكبر من تحمله.... وأنا أيضا بكيت دمعا ودما لكني لا أستطيع....وافترقنا وافترقت أرواحنا معنا😢💔..........
نادين خلصت الدكتوراة وكانت فخرا لشباب السودان الناجح رجعت السودان وتم زواجهم هي ومعتصم كان زواج تحفة اي نعم م حضرتو بس الله يخلي السوشل ميديا كأني معاهم خطوة بخطوة..... بجد فقدتها شديد من يوم سكنا مع بعض لم نفترق لحظة كانت لي نعم الأخت والصديقة💜...... واصلت رحلتي الفنية وكنت علي تواصل تااام مع الفنان راشد دياب عملنا معرض تاني في سويسرا وشاركت مشاركة قوية... اتعرفت علي فنانة انجليزية مشهورة اسمها ماريا غاريل دى بتعمل أكبر المعارض في الاتحاد الأوربي.. اتعرفت عليها في المعرض الدولي للشباب من كافة أنحاء العالم وانا اشتركت كانت لوحاتي تحكي عن التاريخ الإسلامي عن كل الغزوات و الفتوحات الإسلامية سطرتها بريشتي وكأنها في حياتنا اليوم منز إعلان قيام المعرض وانا معتكفة في قراءة السيرة النبوية والتاريخ الإسلامي م تخيلت انبهار العالم الغربي بهذا العمل وكانت ماريا تمثل لجنة الفن لاختيار أفضل عمل فني وقفت معاي كتير وناقشتني كتير جدا اندهشت لما لقيتها حافظة التاريخ الإسلامي عن ظهر قلب كويس انى كنت ملمة بكل شي لأني بحثت ودققت كتير في الموضوع.. بعد المناقشة مع كل أفراد اللجنة اختير عملي كأفضل عمل فني في كل العالم... كيف لا وهذا هو التاريخ الإسلامي... الإسلام دين الحضارة والرقي و الفكر والتجديد... لم أصدق نفسي و كافة القنوات العالمية تبث هذا الحدث وانا في مقدمة الركب.... في كل لقاءاتي التلفزيونية تكلمت كثيرا عن ديننا الحنيف وعن الإسلام ومدي ارتباطه بالفن والحضارات وعن الشباب وطموحه.... الشئ الذي أسعدني وكنت طايرة من الفرحة ماريا أسلمت هي كانت عارفة كل حاجة بس كانت ناقصاها القناعة وأخيرا اقتنعت من القلب💜وكمان صوفيا وأسرتها ما اجملهم وهم يقتنعون الإسلام دينا لهم💜...... بعد الإحتفال لما جيت البيت طبعا كمية من الرسائل م بقدر أرد علي كل النا

س لهم التحية جميعهم💜... كنت أبحث عنه بين كل هذه الأسماء وجدته ودق قلبي بعنف ويحك يا شذي كل هذه السنوات وما زلتي تحبينه.... مهنيني كاتب لي حبيبتي التي يندر مثلها كنت عارف انك ستنجحين وتتوالى نجاحاتك... رغم كل شيء سأنتظرك 💜... أحمد سافر المانيا وقعد هناك واشتغل في مجاله الهندسي طبعا الأخبار من نادين اول باول😊...ولقيت رسالة من مي كاتبة لي شذوية حبيتي والله فرحت بي نجاحك وبفرح اكتر لما تزوجي أحمد طبعا انا عرفت قصتكم ومبسوطة بي حبكم لأنكم بتشابهو.. انا سعيدة مع زوجي خالص 💜فرحتني والله حسيت نزل مني هم... سافرت الريف الانجليزى كان عندى معرض هناك وانا في الفندق عايزة أرتاح حبة من الوقفة اتصلت نادين قلت لي شذي افتحي النيل الأزرق قلت ليها في شنو؟ بس افتحي التلفزيون وبعدين برجع ليك... فتحته لقيت برنامج أسمه ناجحون في الغربة مستضيفين أحمد من شفتو جاتني رجفة.. الحب يا جماعة جميل😍ومؤلم💔كنت عايزة اخش جوا الشاشة واحضنو... كم اشتقت له... اتكلم كلام حلو عاد هو سيد الكلام😎... عمل تصاميم جديدة في موديل قديم من العربات وكانت الفكرة ناجحة جدا والالمان طبعا هم جودة في الصناعة وقال عندو أعمال جديدة شراكة بين المانيا والسودان اكبر شركة تصنيع للعربات باسم زهرة البنفسج... ليه يا أحمد كدا قلبي وقف محتاجة صقعة كهربائية مستعجلة😆....

سبع سنوات متواصلة في الغربة شكلت الفنانة التشكيلية السودانية شذي الطاهر تحمل كل سحنات وطنها العظيم فترسمه وتظهره لكل العالم... جئت وانا حاملة الجواز البريطاني من المطار كبكبة شديدة ليه يا جماعة الجواز السوداني دا مالو عيبو لي في شنو؟؟! حلااااتو😔😍 الكبكبة إلا للغرباء😂... دمكم ولحمكم م احترموتنا بقينا غربيين آخر احترامات 😳😏..... شوووووووق للخرطوم....
فيا الخرطوم إذا نامت عليك عيون...
تشوف الضلمة في الضحي والنهار مخنوق...
ولو غنيت الغني للسلام مخنوق...
اعرفي انك الزمن اللي جاي شروق..
واعرفي إنك الزمن الحبيبو حنون...
فيا الخرطوم عيون الحق م بتنوم...
اكيد الزمن اللي جااااي شروق... م كلمتكم شروق جابت بتين زى القمر شذي وندي مشاء الله كلبوصات وفصيحات فصاحة حبايب قلبي😍😘... وشيرى اشتغلت في شركة كبيرة عرست ولد صاحب الشركة مقيمين في دبي وهو ماسك الفرع هناك عندهم عمرو 😘... بقيت خالة تلاتة وأنا في الصياعة علي قول امي😆.... اشتقت لي بيتنا ونيمتنا والسبيل... وحلتنا وشوارعها وناسها 💜.....
اول من جيت عملت معرض كبير في قاعة الشارقة ضم عدد كبير من الفنانين علي رأسهم طبعا الفنان راشد دياب😊.... لقاء بشوق ولهفة مع حبايبي نادين ومعتصم والامورة لين 💜.... معتصم قال لي بي شخبيطك دا يطلع منك كلو دا😂.... ندوش امسكي راجلك دا مني قبل م اشخبط ليهو وشو دا😣......
بحبكك وانتي شريرة اكتر 😡... عاينت في اتجاه الصوت لقيتو أحمد قلبي💜 وقع م عرفته مشي وين؟؟..... لابس قميص بنفسجي وشايل بوكيه ورد بالنفسج.... بكل حنان قال لي يا زهرة البنفسج هل تقبلني زوجا لك؟ 💜....

**************

زهرة البنفسج من الزهور اليانعة الجميلة منظرها جميل وبتدى طاقة إيجابية حلوة للروح كما أن البنفسج لون الحب العميق💜😍😊...
الطموح ليس له سقف محدد... الأحلام في فضاءات شاسعة تتمدد وتكبر وتصل اقاصي الدنيا وحدها الأحلام هي التي تجعلك ترغب في تحقيقها لانك سعدت بيها فأكيد حنعمل المستحيل علي تحقيقها حتي لا تهرب السعادة من بين ايدينا... يقول الدكتور غازي القصيبي رحمه الله... إن اكون أصغر إنسان واملك احلاما والرغبة في تحقيقها... أروع من إن اكون أعظم إنسان بدون أحلام.. بدون رغبات...
دعونا جميعا نحلم لي بكرة فالزمن اللي جااي شروق والزمن اللي جااااي جميل😍🌹....
بشكركم جميعا اعزائى علي المتابعة والي أن نلتقي لكم مني كل الحب💜🌹...



الي الــلقاء في روايه اخــره❤️