إني أخاف الإرتباط و أخاف فقدان
ذاتي في كائن آخر لأني لن أصبح
وحيدًا بعد ذلك

-كافكا

#Rona

-‏طابت نفسي من كل شيء والحمدلله على هالشعُور ."

-يوماً ما سنلتقي ، انت تعرفني وأنا لا اذكرك ."

-‏أي شيء تخسره من أجل راحة بالك إعتبره مكسب ."

#زهره_البنفسج
1
طارق :أحمد نشن لي البت دي شوفها مزة 😍😊كيف أهو تكون اختصرت الموضوع دى زولة جاهزة معاك هنا وتبدو حياتكم سواء👫
احمد:م تقول لي زهرة البنفسج دى قدتنا بي بنفسجيها دا☹انا يا طارق م بحب نوع البنات العاملات فيها زى الرجال مغامرات وم بخافن هسه دى العاجبها في المرمطة دى شنو نحنا والله لو ما خلاص فاض بينا في السودان م كنا سافرنا السفرة دى بعدين السلعة المكشوفة م حلوة والجواب يكفيك عنوانو!
هم قايلني م سمعت حوارهم لكن سمعت كل شي وبعد قلت أمشي عليهم اوريهم المكشم بلا بصلة😬 لكن اتراجعت وقلت يا شذي انسيهم يااخ ديل خسارة زاتو تفتحي خشمك معاهم بذات الولد أبو قامة طويلة وعينين عميقتين وشعر ناعم مكفكف شميتو شمة السنين بي كلامو عني دا 😡وزعلت انو هو يحكم عني كدا من غير م يعرفني صحي الما بعرفك بجهلك ..شافتني تريزا مالو الجميل من الصباح زعلان وصاري وشو 😣
انا :لانو في ناس من الصباح يجلطوك وحكيت ليها الموضوع قالت لي من متين انتي بتركزى في موضوع اولاد وكلامهم وبعدين الولد كذااااب انا ملاحظة ليهو طووول الطريق يشيل ويعاين ليك كلامو دا عشان م قادر يصلك وانتي م اديتهو فرصة عجبتني😊
كلامنا دا طبعا في ايطاليا سافرنا انا وصحبيتي تريزا الجنوبية العسل هي أخت صديقي جيمس قرأ معاي الجامعة كلية الفنون الجميلة وكان بالنسبة لي اكتر من اخ تخرجنا سافر طوالي بلده عمل شغل حلو هناك اتصل علي قال تريزا اختي بتجي من جوبا عشان مهاجرة لي زوجها في بريطانيا عن طريق ليبيا حتجي تنزل عندكم لما تنتهي من اجراءت السفر.. انتي طبعا في مقام اختي يا شذي وبكون مطمئن وهي معاكم قلت ليهو علي طووول يا جيمس البيت بيتها يااخ ودى كمان عايزة استئذان.. طبعا انا الكلام دا بقي يزن لي في راسي وطول عمرى عندى حلم الهجرة الي أوربا كنت بقول لي امى وخيلاني انا السودان دا لا يشبع طموحي انا عايزة اعمل معارض عالمية ودا م بكون إلا في دول تحترم الفن كويس وكمان عايز ليهو إمكانيات ضخمة عشان كدا لازم أطلع برا عشان اطور نفسي وأعمل لي كيان براي خالي كان مسميني ليورنادو دافنشي عشان خاوتاهم بيهو😂المهم الحلم دا يساورني حينا وحينا يختفي مع مشاغل الحياة والدنيا لكن طبعا هو جواي بشكل قوى واكيد لو عزمت علي الشئ بقوة ستعمله ولو بعد حين المهم انك تكون مصر ومتيقن عليه تماما وكمان انا نشأت في أسرة ديمقراطية كل زول حر في حياته ولو شايف الحاجة الهو بعمل فيها كويسة بالنسبة ليهو وم تتعارض مع مصلحته يعملا طوالي ودا بالتشاور مع كل أفراد الأسرة يعني موضوع انو اهلي م يخلوني أمشي وكدا دا ما مشكلة عندى لكن المشكلة كانت عندى القروش وأني اطمئن على السفر بالطريقة دى خصوصا اني سمعت الهجرة الغير شرعية الي أروبا مخاطرة وفيها كتير من ناس بموتو قبل يصلوا بقيت أفكر كتير وأسأل وأبحث عن الموضوع وقلت لما تجي تريزا توافيني بالخبر اليقين اكيد هى عملت الف حساب قبل الشروع في التنفيز..
تعالو معاي شويه نعرفكم بي أسرتي انا شذي الطاهر البت الكبيرة عمري 27سنة وامي شادية وعندى اختين شيراز ومدلعا روحها بشيري😊والصغيرة شروق ابوي متوفي وقاعدين في بت جدى مع خيلاني أمي من نوع ال بحب الحياة والحاجة السمحة وما تحب عيشة التلفقة يا قولها وكمان أبوي الله يرحمه زيها كدا دلعها دلع صاااح خصوصا هو كان راجل مرة وهي كانت صغيرة وجميلة وناعمة يعني عاجباها روحها😆هو كمان كان كدا النوع ال بحب الظهور والبهرجة تشوفو قاشر ومتشيك علي قول خالي تقول رجل أعمال ثري😎المهم أمي عاشت معاهو في نغنغة كدا لكن ما عندو شيتن فايت بس البلقاها يعزو بيها روحهم جد وانتهي البيان عشان كدا م كان عندنا بيت وقعدنا في بيت جدى الله يرحمه ادونا جزء مفصول برانا.. شيري اختي جاية بعدى زى أمي بتحب البوبار وفك الزرار 😁ومعيشة روحها أنها بت عز لمن غلط والبشوفها بقول عنها كدا لانها جد عازة روحها وبتقرا جامعة خاصة وأصحابها كلهم اولاد عز وكلهم مكسراهم لكن هي مدوراهم دويرا نشوفها قدام 😅أفلامها معاهم.. شروقة الصغيرة المصلح الاجتماعي علي قول شيرى دى فهمها براهو في الحياة.. نحنا التلاته كل واحدة لها اتجاه فكري مختلف.. شيري وشروقة في جامعة واحدة لكن كل واحدة اهتمامتها مختلفة عن التانية شيري اهتمامها كلو تكون حلوة وانيقة وشيك 💅👓👜👠 اليوم كلو جلبطة ولف شعر غايتو مجتهدة وهي اصلا مشاءالله حلوة وبي اهتمامها دا زايدا حلا ..شروق دي دغرية واتجاها واحد بتحب زميلها في الكلية اسمه مجدي حلاتووو كدا وزول حااار شطة بس 😆وهم اليوم كلو مع بعض مجدي مع شروق وشروق مع مجدي لكن والله بقي لينا زي اخونا لانو م عدنا اخ. امكن انا وشروق جاين مع بعض شوية.. لكن بنريد بعض شديد ونحنا صديقات وأخوات وكل شي وامي كمان صحبتنا لكن هي موجتها اكتر مع شيري.. الحمد الله انو قرارنا في ايدنا و دائما بنختار صاح ودا لانو اختيار ذاتي وبي قناعة تامة م حسينا ولو مرة بضغط لاي اتخاز قرار مصيري..
خلونا في السودان قبل السفر.
#يتبع

#زهرة_البنفسج

-2-
انا دخلت الفنون الجميلة عن رغبة اكيدة بعشق الرسم وبلقي نفسي فيهو لدرجة بعيدة جدا كنت كتير مميزة في الكلية بلوحاتي واختيار الواني كان عندنا دكتور اسمه دكتور عوض بقول لي انت هائلة يا شذي ريشتك كأنها فنان مبدع متمكن انا بتنبأ ليك بمستقبل واعد وهو كمان كان النوع الي ما بجمال نهائى في محاضرته وفي شغل الورش عشان كدا كنت بنبسط لما يعلق لي لوحة رسمتها عجبته.. طبعا كلكم يتعرفوا كلية الفنون الجميلة وجنون الطلبة 😂شيرى اختي بتقول لي بتحسسوني انكم وسخانين ومقرفين😬😂ايام الكلية كانت أجمل ايام حياتي شرقنا وغربنا فيها والله السودان دا فيهو طبيعة خلابة ومناظر ساحرة في كل انحاءه شرقا وغربا شمالا وجنوبا لفينا لف ايام الكلية😇ونحن نحمل لوحاتنا من جهة الي جهة وغني وهيصة في الطريق لما نصل معانا زملاء فنانين أصواتهم جميلة عشنا الفن بي كل طرقه رسم وموسيقى وغناء ورقيص م خلينا شي.. خالي كان بقول لي انتي اكتر واحدة مريحة من ناحية الصرف لا بتهتمي بلبس لا غيرو بس ياها لوحاتك والوانك دي كان اديتي شوية شيرى معاك.. شيرى اختي طبعا فظيعة في الأشياء جنها تسوق🛍وكأنها اميرة الاميرات ومحبوبة بصورة عجيبة لدى الجنس الآخر رغم أنها دايما مدياهم علي راسهم🔨😆دائما انا جايطة معاها تقول لي يا بت أنسي انا م اجبرتهم علي شي😌غايتو مستفدين نحنا كمان معاها مرة مشينا السوق كان يوم وقفة العيد نجيب حاجات لي البيت قشرت تقول ماشة حفلة قلت ليها شيري دا كله لي السوق😳قالت لي دايراني ابقي زيك مبهدلة هسا امكن يلاقيني زول من جامعتنا انا طوالي كدا يا شذوية😍 انا طبعا النوع الممكن يكون غسل وشه بس وخلي كريعنه😅عااادى عندى اتلفلفت لي بي توب ومشيت معاها كوشم كوشم 😕وهي برنسيسة بس👩‍🌾 السوق م بعيد من بيتنا دخلنا محل راقي كدا نشتري ملايات في ولد شافنا جا سلم علينا اوووو شيري في السوق ياااخ انتي بتسوقي براك يا شيري انتي المفروض تطلبي بس و الحاجات تجيك في بيتكم😎شيرى قالت ليهو اووو نيزو دى احلي مفاجأة بجد قلت أطلع أشوف الدنيا ياااخ و بالمرة أجيب معاي حاجات طلبتها ماما.. سنة يا انا طبعا انا بقيت م فاهمة حاجة بعاين ليهم ما فاهمة حاجه ياربي دى شيري اختي ولا حنكوشة لقيتها هسة في السوق😆.. قلت احم شيرى شوفي ديل مش حلوين الولد التفت علي قال ليها معليش دى معاك م سلمت عليك ياخ شيري قالت ليهو أي دى فرويني بتنا الحبشية😳نكرتني طوالي المتخلفة.. بالله يااااخ بتكم أجمل منك قصف جبتها قصفا 🤓عجبني وسر بالي😅.. طبعا يا نيزو نحنا عشان حلوين بنجيب الحلوين حناااكة ياااخ اختي☺اخترنا ملايات جميلة وغاالية طلع ظريف قال إلا يدفع الحساب وهو كمان أختار زيهم وبعد داك وصلنا لي البيت البباري شيرى اختي برتاح راحة😊قالت لي دا ولد مرطب شديد في الكلية وشايف نفسه شوفه 😎 قلت ليها انتي بتقدرى عليهو يا بت امي😏😂😂جينا محملين بي الملايات الما خمج وعيدنا عيد الهنا 😍😊..
#يتبع

#زهرة_البنفسج

-3-
خلصت العطلة البنات نزلن الجامعة وانا طبعا خلصت جامعة واشتغلت في مكتبة كدا في نص السوق ماشي حالي بيها والحمد الله وعملت لي علاقات حلوة شديد في النهاية الزول بجيب احترامه لنفسه بتعامله مع الآخرين عشان كدا كل الناس كانوا بحضرموني وم حصل في زول ضايقني خالص.. في يوم رجعت البيت لقيت شيرى وشروق رابنها شكلة 😡يا بنات في شنو شروق قالت لي انا بحكي ليك وانت احكمي يا شذي كنا قاعدين انا ومجدي نتونس بعدين قام مشي قال لي خليك دقيقة وبجيك جاتني شيرى ومعاها واحد من اصحابهم سلم علي وعرفتنا بي بعض وقعدو معاي شيرى مشت خلت الولد قاعد شوية كدا مجدي جا عرفتوه عليهو مجدى قعد والزول داك بقي يسأل فيني وانا بجد اضايقت منو مجدى قال يلا نمشي قام الولد قال ليهو شنو يا حبيب ما شايفة قاعدة معاي ولا انا ما مالي عينك؟! مجدى قال ليهو هو انت منو؟ والجابك شنو؟! دى حبيبتي انت المقعدك معاها شنو؟ الولد طوالى قام مسك مجدى من قميصو مجدى طوالي كشطو كف لما جا واقع والناس اتلمت والجوطة جات شيرى قعدت تقول لي المتخلف بتاعك دا اصلا طوالى متهور وجنو مشاكل هسا الغلطان منو يا شذي؟ قلت ليهم طبعا الغلطان الولد وكمان لئيم وانتي يا شيرى اصحابك ديل خليهم بعيد من شروق ومجدى شيرى قعدت تجوط انا ذاتي البخليني أعرفكم بيهم شنو اصلو انتو م شبهكم زاتو خلي مجدى بتاعك دا يضوي ليك بعدين شيرى قالت لي الولد مرطب وعاجبهو شروق شديد كل مرة يقول لي عرفيني بي أختك دى م صدقت لقيتها براها طوالى غمزت ليهو انو دى فرصة ما قايلة المتوحش داك بجى يعمل فيهو كدا انا طبعا عرفت بتكون دى من افلام شيري 😂لأنها طوالي بتنق لي في مجدى عايزة تطيرو منها قلت ليها انتي ما عندك بيها شغلة هي ما شايفة زول غيرو خليك انتي في حالك.. بعد فترة شروق قالت لي مجدى جايب اهلو يخطبني وشيرى وامي عملوهو موضوع مافي خطوبة من غير م تخلصي الجامعة وهو زاتو عندو شنو طالب حيجيب قروش الخطوبة من وين؟ وقومة وعقدة شيرى قالت ليهم نحنا م حنعمل أي حاجة بس حنلبس الدبل وخلاص مافي داعي لكبير المواضيع شيرى استلمت الموضوع كيف يعني مافي داعي أولا لازم الخطوبة تكون في صالة ونعمل شنة ورنة وهيصة وبيصة ولا هو م عايز يجيب ليك قروش كمان😏قلت ليهم كدى اهدو يا جماعة انتي يا شروقة متفقة معاهو علي شنو؟ قالت لي نحنا متفقين م نعمل حاجة بس قعدة بسيطة وانتهي البيان وحتكون بعد أسبوع أمي قالت ليها كيف يعني بعد أسبوع ونحنا م مجهزين حالنا والبيت حالتو كيف؟ قلت ليها كل شي بيظبط وببقي حلو بالفعل بديت أنظم في البيت شيرى طبعا قالت هي م عندها شغلة بالموضوع دا نهائي بقينا نرتب انا وامي و خالتو نادية مشيت اشتريت لي بوهيات لي البيت شروق قالت لي مجدى واصحابو بيجو بضربو لينا البيت خالتو نادية قالت ليها اجي ياهو دا كمان الفضل 😳شروق قالت ليهم مالو يعني مجدى غريب من البيت 😁قلت ليهم آي والله بكونو وفرو لي حق العمال😬انا بخلط ليهم الألوان وهم بضربو فعلا جو العريس واصحابو وظبطنا البيت تمام طلع جميل برعاية شذي😊عملنا ليهم فطور كااارب شفتو نسيبنا يا يمة نسيب السرور لقيت الاولاد متحمسين ونشيطين استغليتهم زيادة 😐عملت لي أشكال جزوع ومعاقد في الحوش واجدعت واتفننت فيها طلعت رهيبة شديد لما كيفتني الأولاد قالوا لي خلاص نتفق نعمل شركة انتي المعلم ونحنا العمال😅 البركة في خطوبة شروق الجيهت لينا البيت.. مجدى أدى شروق القروش عشان نجيب حاجات الخطوبة قلت لي شيرى انتى خليك يا حلوة بنمشي انا وشروق برانا عشان م يتشاكلو لي فى السوق.. اشترينا حاجات حلوة وراقية وبي أسعار مناسبة المهم يوم الخطوبة شيرى قالت إلا نمشي الكوافير وقالت هي بتدفع الحساب😎وانا بقيت في جيهة البيت والنظام والأكل والشراب وعملت ليهم كوشة كدا نجرتها من رأسي طلعت ظريفة شديد و خالتو نادية قالت عندها فنانه راابة كلمتها ياخ طلعت أجمل خطوبة والعجب العروسين طلعو حلوين حلا مباااالغة وشيرى ال قالت م عندها شغلة في الموضوع استلمت ليك الخطوبة 😂وعزمت أصحابها وصحاباتها أهل مجدى طلعوا ظريفين شديد واتكيفوا مننا شديد وانتهت الخطوبة علي خير شفتوا كيف لما يقتعنوا اتنين بي ببعض ويتمسكوا بي ببعض أمورهم بتسهل كيف مافي داعي ابدا نقعد الحياة.. عايزة انوم جاتني شيرى قومي يا عسل عايزاك في موضوع مهم قلت ليها شيرى حبيبتي ممكن تأجيلهو الصباح لأني م حاستوعبك خاااالص قالت لي طيب يا بيبي انا كمان عايزاك تستوعبيني كويس يلا نومي تصبحي علي خير😘
يتبع#

#زهرة_البنفسج

-4-
قمت من الصباح لقيت شيرى في رأسي صباح الخير علي أجمل أخت
.. صباح النور يلا شيرى جيبي من الآخر عشان انا م اتأخر علي ا. غل وانتي من تتأخرى من الجامعة
.. ههههه يعني انتي عرفتني عايزة حاجة.. طيب يا بيبي رانيا صحبتي يوم الخطوبة عجبتيها وخطبتك لاخوها هم طبعا مروقين شديد وناس هاااي والعريس زول عسل وكل شي فيهو تمام تعرفي انا م بجيب ليك حاجة مجهجة اها قلت شنو يا بيبي؟
.. قلت أصبحنا وأصبح الملك لله شيرى حبيبتي مقاييسك غير مقاييسى عشان كدا م تتعبي روحك ساااي وانتي لو عاجبك عرسبهو انتي
.. يا ثقيلة أولا انا م اختاروني ثانيا انتي ليش م عايزة تعيشي مرتاحة وفي عز عايزة تكونى زى شروق غاويات فقر☹
.. منو القال ليك لما انا أختار كدا بكون مرتاحة الراحة دى بتختلف من شخص لآخر خلي حكمك السطحي دا وفرتكي من قدامي... شيرى اختي مفهوم السعادة عندها مربوط بالقروش والعيشة الهاااي عندها اهم شي الشكليات والمظهر.. بس الأشياء دى بالنسبة لشريك الحياة حاجة ثانوية بالنسبة لي المهم حرشت لي أمي وجاطت معاي وفي النهاية القرار قراري لوحدى.. يوم قاعدة في المكتبة جوني مرة وبتها دخلو قالو عايزين شذي قلت ليهم مرحبا انا شذي قالو لي نحنا جيناك مخصوص لانو شفنا شغلك وعجبنا عايزة اغلف شيلة ولدى قلت مافي مشكلة جبتوها معاكم قالو لي لا في البيت انتي تمشي معانا وم بنختلف في السعر قلت ليهم مافي مشكلة كلمت صاحب المحل وشلت معاي كل البلزمني للشغل العربية السايقاها البت زاتا زى الصاروخ وصلنا البيت بقيت أتلفت شمال ويمين😂وهم شابكني اتفضلي فيلا خرافية الناس ديل إلا يكونو حرامية😆والعجب الشيلة طبعا قلت ليهم دى كلها عايزة تغليف😳قالو لي طبعا اكيد بقلبي قلت ليهم حرام عليكم دى تعرس لي اولاد حلتنا كلهم😅بجد في ناس في السودان دا عايشين في عالم براهم وياما عملت شيلات بسيطة جدا لعروسات وكتير بعزموني مرات بمشي يطلع احلي عرس لكن زى البزار دا نادر م ينجح ويمشي لي قدام... قلت ليهم عايزة ابدا طوالى عشان م اتأخر عندى صحباتي اتنين كتير بستعين بيهم لما ازنق اتصلت عليهم يجو يساعدوني رسلت ليهم العنوان.. أخت العريس اسمها مي جات قعدت جنبي شوية جاها اتصال كانت بتتكلم براحة وتاني قامت الشمطة لفتها ليك مع الطرف التاني لما انا زاتي راسي لفه معاها😇قالت لي الاولاد ديل مهما تدليعهم يطلعو في رأسك قلت ليها انتي مدلعاهو لي من اساسو؟! هو خطيبك؟ قالت لي م وصلنا مرحلة الخطوبة لانو اصلا اهلي رافضين قلت ليها لي هو زول م كويس قالت لي هو زول كويس جدا لكن وضعو ما زي وضعنا قلت ليها عادى ممكن تجاوزى النقطة دي واقنعيى اهلك لو بتحبيهو م كتير بتلقي زول كويس وبحبك ضحكت وقالت لي نحنا م عندنا حاجة اسمها حب حتي لو عايزة تكسري رقبتك فيهو وهو م قدر المستوي م تحلمي انو يكون زوجك هسا اخوى دا كان بحب زميلته في الجامعة وياما عمل عمايل عشان بزوجها لكن بابا رفض تماما واختار ليهو بت شريكو في الشغل بت ناس السماني البشير قلت ليها اووو طبعا الاسم لامع في عالم البيزنس ونحنا ناس إبراهيم الدسوقي اكيد بتعرفيهم قلت ليها وهل يخفي القمر 😊قلت ليها لكن مع احترامي ليكم انتو كيف بتربطو مصيركم بي مصالح تجارية نجحت نجح الزواج فشلت فشل الزواج اهلكم ديل جنو عليكم بجد قالت لي م تذكريني لانو حياتنا مليانة أموال بس تعيسة قلت ليها انتي بتحبيهو قالت لي ايوا بحبو شديد هو زاتو بتحبا ويخش القلب 💜قلت ليها يا عيني علي الحب انتي يا بت مددشة علي الآخر قلت ليها تعالي اهربي معاي وازوجي حبيبك وانسي اهلك زاتو😆قعدت تضحك قالت لي انتي افكارك مجنونة ياخ بجد حننتني دى عيشة شنو دى كلها نفاق اجتماعي بس مافي اي مساحة للمشاعر والأحاسيس بتكلم برأي كدا جوني صحباتي منطيطين عيونهم 🙄قالو لي دا شنو ياخ سجن الهدي دا لما وصلنا هنا مرينا بي كم بوابة وبي كم حرس قلت ليهم خلو النقة يلا انجزو قالو لي شذي دى كلها شيلة تعالو نسرق لي ود الفاتح كل واحدة تشيل حاجة 😂😂😂 ود الفاتح دا زميلنا في الجامعة بلم لي عرسو ليهو سنين قلت ليهم هي أصلا م بتفرق معاهم في شئ لكن بنتفضح نحنا بالكمرات😅يلا يا بنات الهمة.. فت قعدة دى خلصنا الساعة12 اتصلت بي امي قلت ليهم م تقلقوا انا الليلة بتاخر.. بقينا مارقين حاسبونا لما اتهجمنا للقروش بتاعتنا طبعا صورت الشغل لانو توثيق لدعاية شغلي وطلع الشغل ررررهيب جات مي صورتو وطوالى رسلتو لي حبيبها قلت ليها حرام عليك م تطيري قلب الولد😕غايتو لو اقتنعتي ب فكرتي انا جاهزة💜السواق وصل كل واحدة بيتها..
يتبع#

#زهرة_البنفسج

-5-
وصلت لقيت ناس بيتنا نايمين اجدعت طوالي نمت لأني بجد الليلة بزلت مجهود جبار بالشيلة دي قمت متأخرة من النوم صليت لقيت نفسي م قادرة أمشي الشغل طوالى جريت تلفون لي عم حمزة قلت ليهو انا م بقدر اجي اليوم قال لي اخدى راحتك يا بتي جربتها ليك نومة لي الضهر أمي قالت لي اجي يا شذي يا بتي الناس ديل م يكونو خدروك سجمي قومي افطري واشربي شاي يا حليلا أمي الوقت دا كلو منتظراني بالفطور م اكلت💜قلت ليها فعلا يا أمي خدروني بي كمية القروش العندهم قعدت احكي لي أمي وريتها الصور قالت لي يا يمة إن شاء الله سعدك وسعد اخواتك قلت ليها لا يا أمي عليك الله م تدعي لي بحياة زي دي السعادة بي جنبهم ما عتبت شويتين جات شيرى زي العصار شوشو اختي ياخ انا من أمس م شفتك مشتاااقون يا قلبي💜😘أمي قالت ليها تعالي شوفي أختك كانت أمس غاطسة وين؟ شافت الصور جاتا حالة نفسية قلت ليها شيري معليش كنت عارفاك حتنفسني بس ولا يهمك بعمل ليك أحسن منها قالت لي عارفاك حتغلفي لي حلو بس عايزة زى كمية الشيلة دي..يا منفسنة اصلا الخير م بنفع فيك😏... شوشو عليك الله الناس ديل م عندهم ولد تاني أرسم عليهو... لا حبيبتي اقيفي بعيد وارسمي شخيط الناس ديل عرسهم بي مصالح مشتركة انتي عندك شنو؟؟ ☹... هيي يكا عندي جمال وأسلوب وذكاء ومحبة بتك يا الطاهر احمد 😍😊.. طيب يا بت الطاهر احمد قومي اظبطي لي فنجان قهوة عشان أوريك المدخل كيف؟ 😆... يلا عايزة تستغليني براي بعرف الطريق شكرا لخدماتك آنسة شذي😁.. جات أمي يا شيري جاية هسا خالتي السرة أمشي ظبطي القهوة.. يا سلام سريع بمشي أغير واعملا حالا... قلت ليها تعالي هنا منو خالتي السرة دى لما قمتي نشيطتي كدا هسا انا ابيتي لي😐قالت لي دى الزيت زاتو يا شوشو انا تاني اعمل بيك شنو مرقن قلت ليهم عملتو كويس رقدت تاني في سريري بعد مسافة قلت امشي اشوفهم مهبيبين شنو؟ لقيت أمي و خالتو نادية وشيرى وسميرة بت جيرانا صحبة شيرى ومعاهم المرة دى شغالين ودع قلت ليهم اها دا مؤتمر القمة بتاعكم أمي قالت ليها كدي يا خالتي السرة ارمي حمد لي شذي بتي دي مابية العرسان خااالص 🙁.. كشو كشو قالت ليها بتك دي بالها بعييد وطريقها ماشي بعيد وقاطعة بحر أمي قالت ليها إن شاء الله تقطعو مع عريسها وشيرى وسميرة كل واحدة تقول ليها شوفني ما جايني عريس مرطب وهي تشيل وتمني فيهم بالامنيات الجميلة ضحكت فيهم وقلت ليهم الله يهديكم احسن امشي أتم نومتي نمت قمت العصر عندى ازيار في الشارع مشيت املاها عملاها سبيل لي ابوى الله يرحمه جاتني شيري واقفة معاي نتونس قالت لي مافي اي موضوع ياااخ قلت ليها انتي عايزة اي موضوع أمشي افتحي التلفزيون اتونسي مع شروق في كم موضوع ممكن تخليقهو قالت لي يخسي عليك يا شوشو عايزة شروق تمعطني بي مجدى 😂عليك الله دا الشنو الموضوع الضااارب دا... قلت ليها يا حقارة انتي لاقية مجدى وين؟ طيب تعالي ساعديني املي معاي الازيار... معقولة يا بيبي اليدين الحلوين ديل يملو ازيار😜... لا خلاص يا مارلين مونرو☺بتكلم معاها كدا جا ولد وقف عربتو سلم علينا قال لينا ازياركم حلوين قلت ليهو شكرا وشيرى مشت ركبت معاهو قالت يلا يا بيبي م بتاخر قلت خلاص اكيد واحد من اصحابهم في الجامعة انتهيت دخلت البيت أمي قالت لي أختك وينها؟ قلت ليها اختطفوها 😅شروق قالت لي شيرى بتخطف لكن م بخطفوها😂.. قلت لي أمي الليلة نفسي في مهلبية بتاعتك الرهيبة ديك قالت لي م بعمل ليك إلا توريني شيري مشت وين؟ قلت ليها كانت واقفة معاي وجا واحد من اصحابهم سلم علينا ومشت معاهو نحنا نتكلم كدى جات داخلة أمي قالت ليها يا بت كنتي وين قالت لينا مشينا أكلنا انا وياسر آيس كريم وجبت ليكم معاي كمان امي قالت ليها ياسر دا م عرفتو يا شيري قالت ليها اى صاحبناهو جديد المهم الز مافي الموضوع اكنا الآيس كريم وبعدين ضربنا المهلبية😍.. قلت لي شيرى كدى وريني شمار ياسر دا قعدت تضحك قالت لي عرفتك الحنك م مشي معاك الولد ماشي براحة ويعاين لي غمزت😉ليهو طوالي عمل يوتيرن جانا 😅لقيتو خفيف ولفيف قلت ليها ووب علي🙆بقيتي كمان تغمزي للأولاد قالت لي بطلي هبل النصيحة الولد قررض بس برضو م بنفع معاي ممكن نخليهو اسبير😐... شيرى اختي حتفتح شركة اسبيرات😆قريبا..

#يتبع

#زهرة_البنفسج

-6-
الليلة كان عندى شغل مبالغة في المكتبة شي هدايا وشي مجسمات وشي تزيين سد مال لما يدي وجعتني 😥 مشيت البيت منهووكة قلت امشي ارقد طوالى انوم فتحت البيت طوالى لاقوني أمي وشيرى وشروق حضنوني وباسوني😘كل سنة وانتي طيبة يا أجمل شذي لما بكيت قلت ليهم الليلة عيد ميلادى بجد انا نسيتو شيرى قالت لي يا هبلة في زول بنسي عيد ميلادو والله حسسوني بالفرحة وانو في زول بجد مهتم بتفاصيل حياتك ياااخ دا أجمل احساس دخلت لقيت البالونات والزينة والبيت دا يرقش يسوى كدا👋أمي قالت لي يلا امشي غيري سريع عشان نبدأ الاحتفال مشيت استحميت وجاتني شيري قالت لي تعالي اظبطك اعمل لي شعرك سيراميك سريع وأعمل ليك ميك اب ظااابط كدا حتلبسى شنو انتي عشان اظبط ليك الميك آب عليهو بس أوعي تقولي لي لابسة بنفسج😌 قلت ليها ايون عندي غيرو😅... واااي يا شذي منك البنفسج دا قال منك الروووب تعالي ألبسي فستاني البينك بكون حلو فيك قلت ليها لا الليلة ليلتي البنفسجية عايزة اتبفسج فيها اتبنككى براك يا بتي😂.. شذي ياخ م تتعولقي فيني انا عازمة ناس مهمين.. يا بت قومي لفي مش عيد ميلادي مالي ومال ناسك إن شاء الله ألبس مقلوب🙃😆.. طيب خلاص قومي ألبسي الفستان عشان اعمل امكيجك قلت ليها اوعي تبقيني زى بت اللعاب شكرا شيرى مش ظبطتي لي شعري انا بعمله براي🙈... ياااااي الله يستر الناس م يجرو منك 🙊.. قومي انا لبسي هين امشي انتي البسي لانو عايزة ليك زمن طويل.. فستاني البنفسجي حلو وبحبه قصيتو لي التخريج🎓 اتسرحت تسريحة حلوة وم نسيت الوردة البنفسجية 🌸اهم شي عندى الوردة أختها في شعرى في الافراح😊بتحسسني بالبهجة والمسرة بحب البنفسج وزهرة البنفسج وعطر البنفسج وإحساس البنفسج.. عندما أرتدي البنفسج تصبح الحياة عندى بنفسجية يراودني شعور بالتحلق في فضاء نقي كله احساس بالحب والجمال والأمل وكل الأشياء المفرحة.. عندما ارتدي البنفسج أصبح أنثي استثنائية تنتشي فرحا لانوثتها برقة ورومانسية.. بعزة وقوة.. بزهو وجمال.. حالة البنفسج عندى حالة من الانتشاء اغوص فيها وحدى بعالمي حيث تأتيني الهاماتي الفنية سراعا تتجلي أمام مرأى عنيني فتكتسي الدنيا بألوان البنفسج ويرقص الكون فرحا طفولي الملامح حينها فقط أملا الدنيا ضجيجا وفرحا.. رقصا وعزفا بأغنية البنفسج🎻... طلعت لقيت كم غفير من الناس😳وكلهم بقو يعاينوا لي لما خجلت🙈شروق قالت لي شوشو اختي انتي طالعة نجمة ⭐مشاء الله تبارك الله حضنتي شديد كل سنة وانتي طيبة وإن شاء الله أشوفك عروسة طالة علينا بكل فرحة زى م عودتينا دايما😘وقعدنا نبكي جات شيرى هييي انتي وهي م تعملوها لي دراما هندية يلا يا شوشو الناس منتظرنك عشان تطفي الشمعة..
سنة حلوة يا جميل سنة يا جميل 🎼🎹🕯افففف اييييييييييي👏👏👏👏👏👏حضنتي أمي شديد وبكت معاي قالت ليهم يا جماعة شذي بتي دى اول فرحتي دى شذي عمري ونور عيوني💜 وخالي أمين الخال والاب الحنون جاب لي أجمل هدية مجموعة ألوان بروفيشنال من زمان عجباني لقيت أسعارها عالية خليتها خالو أمين حبيب قلبي💜وهدية شيرى اختي تؤم روحي ❤كانت رررهيبة ومجدى خطيب شروق هو العمل شغل الزينة دا كلو مع شروق وشيرى وجاب لي لوح جميل جدا زول ذووووق يااااخ وكل المعازيم م قصرو طلع احلي عيد ميلاد لأنو عندى أجمل واحن اسرة وأجمل أصدقاء.. المحبة والمودة من نعم الله أحمد الله كثيرا انو خصاني بمحبة الناس حولي بجد حسسوني اني انا مهمة في حياتهم قدر شنو م عندى مهم عيد الميلاد والهيلمانة دى بقدر م عندى اهم لمة الناس و الفرحة الفي عيونهم.. احبكم جميعا أسرتي واصدقائى 😍💜...
عملت لي خالى امين مجسم حلو هدية عشان بقي مدير فرع في بنك دخلت البيت لقيت شروق قاعدة براها قلت ليها وين أمي وشيرى قالت لي مشو عرس صاحب شيرى..غايتو أمي وشيرى اصلو م بعقلو من الحفلات دى☹ انا ماشة ناس خالو أمين أودي ليهو الهدية دى... استني يا شوشو امشي معاك عايزين نخش كدا نسمع ليك أميرة مرة خالي تقول ليهو..

#يتبع

#زهرة_البنفسج

-7-
اميرة بتتكلم مع امين خالي بتقول ليهو انت يا امين مخلي اختك وبناتها ديل علي كيفهم م بتسالهم خالص كل واحدة ماشة علي كيفها واسا عيد الميلاد دا شنو دي فوضي شديدة واصلا كان لي شذي دي م في زول يقول ليها تلت التلاتة كم والشغل تجي فيهو انصاص الليالي خالي بقول ليها يا اميرة خليك في حالك ديل بناتي ومافيهن كلمة.. طبعا انا وشروق بيقينا نعاين لي بعض اتهجمنا من كلامها لانها قدامنا اخر ظرافة وتضحك في وشنا وبي ورانا تعمل كدا انا كنت بشوف تعابير وجها لما واحدة فينا تنجح ولا تحصل لينا فرحة لكن سبحان الله م قايلاها بالصورة دي احسن الزول البعاديك عديييل لكن اب وشين دا خطر عليك دا بحفر ليك بي تحت قلت لي شرق يلا نمشي خالي بمشي ليهو بكرة في البنك اوديها ليهو م مشكلة شروق قالت لي يوم سمعتها بتقول لي نوسة انتي لسا حاتلة لي في الجامعة وشذي اتخرجت واشتغلت وكمان ماسكة البيت ياخ م تبقي مسؤولة شوية هردتي لي قلبي قلت ليها نوسة غايتو الله يعينها لانو امها عاملاها زي الريموت تمشي فيها يمين وشمال لما طمست شخصيتها غايتو خالي م يستاهل المرة دي ياخ مرة فارغة وراسها فاضي ومتبعة سيرة الناس يلا م عندنا شغلة بيها خليها تصطفل نحنا الحمد الله نيتنا بيضا وعلي قول حبوبة الله يرحمها النية البيضة بتاكل السودا ارحكي يا اختي نظبط لينا عشا وندردش شوية لما يجو صعاليك بنو امية 😂..م كلمتك يا شوشو انا ومجدي ناوين نزوج السنة دي ...اشي اشي يا ختي متين القرارت دي امي وشيري لو سمعوك بكتموك😷اكيد حيقولي ليك لما تخلصي والعرس عايز ليهو ترتيب وووو يطلعو ليك ستين حاجة عايزين يعملوها ...عشان كدا يا شوشو انا فتحت معاك الموضوع اول انتي رايك شنو? ....والله يا شروقة انا م عندي مشكلة لكن انتو مرتبين حالكم كويس دا زواج م خطوبة يا شروقة بعدين دي اخر سنة خلصي وبعدين اتزوجي ..مجدي قال لي امتحني من بيتنا عشان اشرح ليك كوبس وتكوني مستقرة ...اشي اشي يا عيني علي الحب يا جميل😍يعني عندنا م مستقرة يا بت☹....هههههه م كدا يا شوشو لكن انا بقصد استقرار الزواج🙈ياخ انا عندي اجمل اسرة مستقرة وحنينة 😍...بطلي بكش خلاص زعلانين مش م عايزة تقعدي معانا 😔شروقة انا والله مبسوطة منكم ومن علاقتكم الحلوة المتينة وانكم متفاهمين شديد ومجدي ولد مافي منو في احترامو وتهذيبو وشهامتو لكن بس لازم ترتبو وضعكم كويس اولا مراسيم العرس والسكن وووو دا كلو م ساهل خصوصا هو ياداب خريج قالت لي مجدي مرتب الامور دي من اتخطبنا شغال ليل نهار وكمان موضوع البيت مفروغ منو حنسكن في شقة ماجد اخوهو سافر امريكا وسلم مجدي المفتاح بي عفشها عشان كدا مجدي نشط في موضوع العرس دا هسا انا عايزة امهد الموضوع لي امي عايزاك تساعديني انا طبعا معتمدة علي مقدرتك القناعية ....شروقة حبيتي يااخ الف مبروك وربنا يتم ليك علي الخير طالما انتو مرتبين حالكم علي بركة الله والناقص اختك بتمو😎انا عندي كم شروقة ...شوشو يا احلي اخت كم احبكك😍😘..خلاص انا بكرة بتصل عليهو وبرتب معاهو الامور قبل م نكلم ريا وسكينة 🤓😂...صحي صدقتي ريا وسكينة ديل بخربو بلد 😁يلا يا بيبي تصحبي علي خير انا نعست😴 ...تلاقي الخير يا عروسة😍 انا مع شروقة نسيت تلفوني لقيت ليك رصة مكالمات من ضمنهم لقيت جميس صديقي العزيز ومي بت الناس المرطبين😎..جميس طوالي ضرب وين يا بت انتي جادعة تلفونك دا لو م بعرفك يا شادي بقول امكن خالطة😆طبعا اصحابي مسمني شادي 😑بعد ونسات كدا كلمني بي موضوع تريزا اخته وبعد داك رجعت لي مي لقيت صوتها حزين قلت ليها خير مالك? بس البت اتفقعت بالبكا قالت لي زولي الكلمتك بيهو قال مهاجر اروبا يعني تاني م حاشوفو😭..خلاص يا مي م تنكدي علي روحك بعدين خلي الولد يشق طريقه طالما الطريق مسدود بينكم يعني حتي لو قعد هنا م حيصل تغير في الموضوع فبعده احسن ليك واحسن ليهو شوية كدا حتنسيهو وتنشغلي بحياتك لو كان في زرة امل كنت قلت ليك اتمسكي بي حبك لكن عندكم الموضوع استحالة ان شاء الله يجيك زول ينسيك دا كلو قالت لي ما اظن اقدر انساهو لاني بحبه يا شذي لكن بعيش زي م الناس عايشة...حننتني وقطعت لي قلبي💔 ما عارفة ليه موضوع البت دي انا شاغلني كدا سرحت كدا جو ريا وسكينة هاجمين علي طبعا م عرفتهم 😳 نانسي وليلي علوي😂قلت ليهم انتو عملتو عملية تجميل ☺شيري قالت لي اتغيرنا مش كدا 😋شيري خبيرة التجميل اييييي👏شفتي كيف اختك رهيبة لكن عرس يا شذي مباااالغة ...سمح يا بتي ان شاء الله عرسك يااارب🙏 .ماماتي الحلوة بكرة جايانا ضيفة تنزل عندنا ..

#يتبع

#زهرة_البنفسج


-8-
امي قالت لي ضيفة من وين دي كمان؟ قلت ليها أخت زميلي جميس جاية من جوبا مسافرة أوربا... اها مالو حبابا عشرة بلا كشرة.. تسلميلي يا ماماتي الحلوة 😘😘مشيت انوم لكن بقيت أفكر في كلام الهجرة والموضوع بقي لي غريب وبعيد لكن صحي فيني أحلام وردية قربت تموت جواي تاورت تاني وبقت احلم لما نمت.. الصباح طلعت بدرى لأني اليوم عندى كم حاجة عايزة اعملا ومجدى كمان جايني ومي كمان رسلت لي مسج قالت لي جاينك انا وزولي قلت ليها تشرفوني قلت كدى أشوف الولد البكي البت دي كنت مشوقة اشوفو لكن تاني اعتذرت قالت قال عندو مشاوير كتيرة مزحوم يلا ذاتو وفرو انا ذاتي مزحومة شديد جاني مجدى من الصباح الولد شفقان علي العرس قعد معاي خططنا لقيتو ليك خطير مجهز لي كل شي.. مجدى انا في موضوع كدا في رأسي عايزة استشيرك فيهو... خير إن شاءالله يكون موضوع عريس ☺... عريس في عينك العريس انت دا😃انا عايزة اسافر أروبا.. أروبا دى كيف يا شذي زيارة يعني؟... هجرة عدييل عن طريق ليبيا... يا بت انتي جادة ولا بتهظري؟!.... لا جادة معاااك لكن م كلمت زول جاية صحبتي من الجنوب وانا ماشه معاها... يا بت ماشة معاها دى حسستيني ماشة امدرمان!!! دى أروبا وهجرة غير شرعية انتي مستوعبة الأمر دا؟؟!! الكلام دا فيهو مخاطرة ومرمطة وموت أوعي شيلي الفكرة من رأسك تماما مفهوم... لي يا مجدى ياخ بدل تشجعني تقول لي كدا انا قلت خلاص اتقوى بيك تجي تقفل لي الباب في وشي... اشجعك شنو انتي مجنونة ولا قنعانة من نفسك!!! بعدين الجنوبين ديل عندهم عادى الهجرة دى زى السلام عليكم لكن عندنا هنا الولد لو قال ماشي زى الهجرة دى البيت كلو يقيف ليهو خلي البت كمان أنسي الفكرة تماما.. طبعا م حبيت تاني اناقشه لأني عارفة مجدى صعب شوية لكن الفكرة خلاص استحوذت علي بس باقي التخطيط ليها بقيت أفكر كدا عمو حمزة بقي ينادى فيني يا شذي في بت دايراك من شفتها عرفتها أخت جميس قالت لي انتي شذي قلت ليها ايوا تريزا طوالي سلمت عليها وطلعنا مشينا البيت ناس بيتنا استقبلوها بي احتفال هي ذاتها مشاء الله زولة مرحة ودمها خفيف بشكل ملامحها جميلة وهادئة ملامح الزاندا الجميلة ديك ذات القوام الممشوق والوجه الرقيق تفاصيل وشها حلوة شديد طبعا استلمتها شيرى قالت لي تريزا دى حتكون صحبتي لما تسافر لانو عندى أخوات دمهم تقيل بشكل 😏.... مبروك عليك الصحبة يا تريزا بس رأسك حيوجعك استحملي قالت لي انتي اطلعي منها نحنا بنتفق😅..اتغدينا وقلت ليهم خلو تريزا تاخد راحتها قالت لي خلاص تعالي اوريك شمارات صاحبك😄اتونسنا كدا قلت ليها يا تريزا انتي ما خايفة من السفر وخصوصا انو فيهو مغامرة قالت لي ابدا جون زوجي مبسط لي الحكاية جدا صاح فيها خوف وتوجس لكن انا الناس البعرفهم طلعو كدا كلهم وصلو بخير الحمد الله قلت ليها طمنتيني الله يطمنك انا يا تريزا قررت اسافر معاك عاينت لي بدهشة شديدة...انتي جادة يا شذي... أيوة جادة وكمان شديد وعايزاكي تديني تفاصيل اكتر واكتر بكل صغيرة وكبيرة قالت لي جميس عارف الكلام دا قالت ليها لا لانو م كنت متأكدة من قرارى لكن بتصل أكلمه المهم م تجيبي سيرة لي أمي وشيري تمام يلا اخليك تنومي.. مجدى جا كلم أمي وخالي أمين بي موضوع العرس وشرح ليهم اي شي خالي أمين قال ليهو طالما أنتو متفقين واموركم واضحة نحنا م بنقيف في سعادتكم ربنا يوفقكم ويسعدكم علي بركة الله واقفين أنا وشروق برانا مجدى سألني شذى بقيتي علي شنو في الموضوع قلت ليهو بقيت عليهو تب بإذن الله... يا زولة انتي قدر القرار دا قلت ليهو قدرو وزيادة كمان... شروق قالت لي موضوع شنو دا مجدى عارفو ونحنا م عارفينو قلت ليها بعدين بكلمك... الفترة دى بقينا في تجهيز عرس شروق وجية تريزا دى جات في محلها بالرغم انو شيرى م ادتنا فرصة خااالص فيها كل يوم يتلبسو ويمرقو يوم عرس ويوم منتزهات ويوم رحلات غايتو اتفسحت مع شيرى زمان كل يوم شكلة معانا انا وشروق لما تلقانا كدا تسوق أمي معاها عشان كدا لما لقت تريزا زيها م صدقت عدتها كلها حوامة والعجب مشاوير السوق عشان العرس شيرى اليوم والتاني في السوق طبعا شروق قعدت في الدخان وبيتنا بقي إحساس عرس وبهجة وفرحة وامي وشيري مصرين عليها ترقص وهي رافضة والشكلة والجوطة قلت لي شيرى انتي لما تعرسي ارقصي واقلبي الهوبه خليها شروق كل يوم عاملة لينا وجع رأس انا طبعا مشغوولة بي موضوع السفر لكن أمي نقشتني قالت لي شذي يا بتي اليومين دى انتي م عاجباني في شنو؟ بتحبي 😍... ماماتي الحلوة حاحكي ليك الموضوع لكن بلييييز م تعصبي 😣أنا عايزة أسافر مع تريزا أروبا!! سجمي يا بتي أنتي قنعتي من روحك. دى ماشة بالبحر وفيها غرق وموت بري م بخليك تمشي نهائي الكلام دا مفهوم م أكرر الكلام دا يلا خلي الكلام الفارغ دا عندنا ستين حاجة دايرين نعملا😡

#يتبع

#زهرة_البنفسج

-9-
خلي الكلام الفارغ دا😥أمي صدمتني دا حلمي يا جماعة من يومي وانا بحلم للسفر الي لندن وكنت بقول إن شاء الله يجبني عريس يوديني هناك😂لكن عرساني كلهم محلييين😑ماذا أفعل بحلمي وطموحي الذي تغلل بداخلي لندن هي المهد الصالح لهذا الطموح الجامح فني ومعارضي واملي الواعد ينبوع سعادتي.. آه يا أمي لو تعلمين حلمي لتركتيني اذهب حافية القدمين الطموح وحده من يجعل المرء يهيم علي وجهه كما العاشق الولهان كما كان شاعرنا الطموح يهيم ضربا في الصحراء يفتش عن طموحه الجامح ويتحول في أشعاره مع سيف الدولة الحمداني يبتغي العلا في دولته والمجد في مدحه زمنا طويلا.. منز صغري وانا معجبه بالمتنبئ واشعاره وبيته الذي يقول فيه...
علي قدر أهل العزم تأتى العزائم..
وتأتي علي قدر الكرام المكارم..
وتعظم في عين الصغير صغارها.. وتصغر في عين العظيم العظائم😎.. هذا البيت هو من جعلني أسبق جيلي في التفكير وفي التمسك باهدافي وطموحاتي برغم صعوبة الأمر وكيفية الوصول إليه إلا انه ظل يراودني حتي بت اشوفو في أحلامي كتير😅علماء النفس يقولون إذا كان حلمك كبيرا وهدفك بعيد المنال اجعله نصب عينك وردده كثيرا بداخلك سيكون هو فقط همك وشغلك الشاغل حينها ستتزلل الصعاب ويسهل الطريق إليه كما فعلت انا الآن ربنا جاب لي تريزا دى من السماء عشان هي تبقي لي السبب.. ولندن بالنسبة لي كسيف الدولة للمتنبئ.. رغم حبي لوطني إلا انني لا استطيع أن احمي حلمي فهناك من يقتلون الحلم في مهده الأول يمارسون القمع والخنق لذا قررت الرحيل بحلمي بعيدا عن موطني وهل هذا سهلا؟؟ ليس سهلا علي المرء أن يترك وطنه وأهله .. فالوطن هو الملاذ والحضن الدافئ هو برغم الوجع الفييهو لكنه مصدر الدفئ لبرودة مشاعرنا الباااااردة فكم التهبت نيران عشقه اناسا مثلو التاريخ وانارو الطريق وكسرو متاريس الطريق ليثبتو لنا انه هو السودان وهو من يفتح ذراعيه ويضمنا بحنان لا يفرز واحد منا ابدا... ما هنت يا سوداننا يوما علينا😎.. رغم صوبة المشوار ورغم ضرورة التيار.. عزيز انت يا وطني رغم قساوة المنحن!!... أمي طبعا من خوفها علي م ادتني مجال للنقاش قلت لازم اعمل جدعة كبيرة في عرس شروقة عشان ترضي عني شوية وتلين😂... لقيتهم عاملين مؤتمر القمة وشروق زعلانة قالت أمي وشيرى قالو ليها إلا نحجز في صالة راقية للعرس ونسبة للمعازم هلاي كلاس تبع شيرى😎 لازم نتبع الأوامر انا الحمد الله ربنا خصاني بصفة احمد الله عليها وسيلة الإقناع يعني لساني حلو😊😍حتي في الشغل لما اشتغل حاجة لي زبون قبل م يشوف شغلي بطريقة كلامي بقتنع طوالى.. أولا بديت بي شيرى قلت ليها انا عارفة يا شيرى يا اختي انتي عايزة الحاجة السمحة لي شروق لكن كمان برضو الناس ديل عندهم حسابات م عايزين نتخطاها عشان م نخرب عليهم بعدين انتي ياخ لما تعرسي ان شاء الله تعمليهو في قصر القيروان مافي حد واقف في طريقك انتي خليك في الشئ البتحبيهو الميك اب والفستان والحاجات الانتي بتفهمي فيها دى باقي الأشياء دى خليها لي انا إن شاء الله حيطلع احلي عرس ومجدى زاتو مخطط كويس م تشيلو هم خاااالص وانتي كمان يا ماماتي الحلوة المال الجابهو الناس ديل بيكفي الحمدالله انتو بس رووقو المنقة ممكن نجيب خيمة حلوة ومكيفة وانا من عندى بعمل فيها إضافات ما سألة في السنبلة ذاتو المهم أمي قالت لي عاد يا شذي كان خزلتينا بننخنقك😬.. عندنا زميلنا صاحبنا شديد عندهم محل مناسبات راقي اتصلت عليهو اسأله قال لي احلي خبر عايز تزوج أخيرا يا شادى😆قلت ليهو أخيرا لقيت عروسة مرطبة عقبال ليك يا زميل😅فقال لي م عندك أي مشكلة يا شذي هسا بحجزا ليك كمان قال لي فيها كوشة وعشا فاخر جدا يعني الحمد الله الأمور ماشة كويس خالص..الحمد الله تريزا ساعدتنا كتير عملت لينا جدعات حلوة لحنة شروق اجدعو جديع هي وشيري وكانت الحنة روووعة... الخيمة طلعت مباااالغة عملت فيها شغل فني جميل والعجب الكوشة اضفت فيها فنيات طلعت أكثر من روعة يااااخ العرس كله طلع رووووعة والعجب شروقة طلعت نجفة بعد الجرتق طوالي العرسان مسافرين وانا طبعا بودع في شروق وعايزة اتفقع من البكا لانو انا تقريبا رتبت أموري كلها م باقي كتير لسفرنا بكيت لما رأسي وجعني مشيت طوالى انوم لانو تعبت شديد في العرس شلت التلفون قلت أشوف الحاصل شنو ألقي ليك رسالة من مي كاتبة لي سافر يا شذي وسافرت معه روحي تركني وحيدة أحمل ذكرى حبي له كم أتحرك شوقا لرؤياه الجميلة لا أستطيع نسيانه فحبه يجرى في دمي... مي كمان وجعت لي قلبي اكتر مما هو موجوع على فراق اهلي💔😥

#يتبع

#زهرة_البنفسج


-10-
كيف الوداع لما يحين وقت السفر😥...
أمي بعد تعب رضيت لي لكن برضو كانت حزينة علي فراقي لأني بنتها البكر بنفكر سوا ونخطط سوا صاح هي بتمشي أمورها مع شيري لكن في حاجات عقلانية إلا انا أكون معاهم وخصوصا انو خالي أمين م فاضي لينا كتير المهم اقنعتها وما كان الإقناع بسهولة بعد دخلت جون زوج تريزا وشرح ليها الحاصل كلو المهم بعد تعب اقتنعت لكن كانت متغيرة مني شوية وانا زاتي لما خلاص بقيت علي السفر بقي لي بمبي... أصحابي عملو لي قعدة كااااربة في شارع النيل كان وداعا حافلا ممزوجا بشجن وانفعالات وجدانية حزينة 😰لكن كالعادة لطفو الجو عشان مافي زول يبكي😭😆.. أمي طبعا جهزت لي أي حاجة م خلت شي قلت ليها م تعبي روحك انا بمشي حالي قالت لي كيفن اخليك تمشي ساااي كدا كان قمتي روحتي من الطريق لازم يكون عندك زاد 😄والله لكن بجد حاجاتها دى نفعتني نفع شديد ياااخ الأمهات ديل نعمة عظيمة💜.... بكرة بإذن الله مسافرة وانا زى ام العروس داخلة ومارقة تريزا قالت عايزة تنوم من بدرى وانا نمت حاضنة أمي وشيرى م قادرة افارقهم والله قلبي مقطوع💔.. لكن اعمل شنو لازم اسافر واصبر عشان أحقق حلمي الحمد الله رب العالمين عندي عائلة جميلة ومتفهمة ابدا م وقفوا في طريقي آي صاااح هم عارضوا لكن بعد شافوا وجهة نظرى في الموضوع واصراري الشديد علي الأمر وافقوا لأنهم شافوا امكن تكون مصدر سعادتي في ذلك فالعائلات الذين يقفون عقبة لنجاح ابنائهم بحجة خوفهم عليهم هم بالعكس بدمرونهم بذلك لأنهم بكونو شقو طريقا آخر ليس برغبتهم وإنما برغبة ذويهم لذلك باؤوا بالفشل... لا تخنقوا رغبات ابناءكم بل اتركوهم لرغابتهم ثم راقبوهم بالنصح والمشورة كدا بحسو بالثقة في انفسهم وأن لهم كيان ذاتي لوحدهم... فالعقبة الأولي في وجه تطور الفرد هي العائلة... عائلتي هي من دعمت نجاحي معنويا وماديا لهم كل الحب💜... قبل أن انووم بقيت اعاين مرة لي أمي ومرة لي شيرى أصابني قلق وتوجس من بكرة بقيت مغمضة عيوني واتلو في سورة الانشراح كلما تعبت وضاق صدرى اظل اتلو هذه السورة سبحان الله بعدها ينشرح صدرى ويزول همي وعسري.. ثم تبسمت وتذكرت مقولة الأديب الروسي ليو تولستوي فأنا من عشاق كتاباته(يجب أن تنهضي من فراشك في ساعة مبكرة.. وأن تقولي لي نفسك... انا قوية... انا سعيدة ).. ظللت اردد انا قوية انا سعيدة لما نمت أمي صحتني شذى.. شذي.. قمت مخلوعة قالت لي سجمي يا بتي السفر دا عايز يجننك صحيت لقيتك تقولي انا سعيدة انا قوية 😂😂😂.. عقلي الباطن شغال زى الطاحونة🤓... كويس قمت ومشيت صحيت تريزا اجهزنا خلاص وشيرى كانت كلمت لينا الولد بتاع الغمزة😉داك شكلهم بقو فرد😆م قصر وصلنا.. ياااااخ والله شيرى اختي أبت تتفكك مني تبكي باعلي صوتها لما قربت اخلي السفر زاتو😔.. تريزا قالت ليها يا بت انتي عبيطة بس تصل هناك وكل يوم معاك تاني بالصورة والصوت لما تزهجي منها.. قالت ليها م بتكون زي هي معاي احضنها واشم ريحتها... قلت ليها يا شيرى ياااخ كل يوم بتقولي لي عطورك الزي نسوان الظار دى اوعي تجي تحضنيني خليكي بعيد.. هسا انتي خليكي بعيدة مني☹قعدنا نضحك كلنا... وداعا أيها السودان العظيم✋

#يتبع

#زهرة_البنفسج

11
تعد ليبيا وجهة عدد كبير من المهاجرين القادمين.. خاصة من دول جنوب الصحراء الإفريقية عن طريق شبكات من المهربين موجودة في السودان والنيجر تتعاون مع شبكات تهريب أخري موزعة داخل المدن الليبية وتنطلق رحلات التهريب من الشواطئ الليبية غرب البلاد خاصة صبراته ومصراتة وزوارة... لم أكن اعرف أن طريق الهجرة شاقا ومرعبا الي هذه الدرجة كان فوق التحمل..عندما وصلنا مدينة زوارة والتقينا بالمهربين وتم احتجازنا حتي يحين موعد الهجرة ورغم ما يصل الي مسامعنا من حالات غرق المهاجرين الا أن ذلك لم يردعنا عن مواصلة المجازفة.. هنالك عائلات بأكملها رجالا ونساءا وأطفال صغار ورضع ومئات الآخرين من الراغبين في الهجرة و الباحثين عن حلم الوصول الي أوروبا وأغلبهم من جنسيات أفريقية... كان ثمن الرحلة 800دولار وأحيانا تصل الي 1200دولار علي حسب المهربين.. تدفع قبل الصعود الي السيارة التي ستنقلتا الي الشاطئ.. في حدود منتصف الليل قدمت شاحنة واقلتنا الي الشاطئ وهي من الشاحنات المخصصة للتبريد تجمدنا داخلها.. الشاحنة ماشة وانا طوالي اتذكرت مسلسل سورى كدا كان بحكي عن الهجرة الي أروبا طبعا سوريا بعد الحروب دى كلهم فرو هناك سواق الشاحنة عمل حادث ومافي زول انقذهم ماتو متجمدين.. لما اتذكرت المشهد دا قلت خلاص يا شذي اشهدى علي روحك ودى النهاية تاني بقيت أدعي واقرأ دعاء السفر كتير هديت حبة من الخوف وبقيت متماسكة كان هذا اكتر موقف خوفني ونحنا في الشاحنة دي.. كنا حوالي 50شخصا لن أنسي هذه اللحظات وستبقى في ذاكرتي ما حييت.. الوصول الي الشاطئ لم يكن نهاية الرحلة البرية مشينا سيرا علي الأقدام حوالي 10دقائق في المياه لنجد في انتظارنا زوارق مطاطية تكفلت بنقلنا الي المركب المخصص لرحلة العبور الي الضفة الأخرى من المتوسط.. ثم نقلنا دفعات علي امتداد الساعتين حتي نجتمع كلنا في هذا المركب ثم اقتيادنا الي الشاطئ واجبرنا من التخلص علي كل امتعتنا والهواتف النقالة وذلك من أجل تفادى أي حمولة زائدة علي المركب قد تؤدى الي الغرق في البحر.. كانت المخاطرة حقيقية واحتمال الموت كبيرا جدا.. واكتر ما حز في نفسي أن المهربين كانو يعاملونا كأننا بضاعة.. في حدود الساعة الساعة الثالثة صباحا أطلق القبطان محركات المركب.. البحر هادئ والطقس بااارد وظلام الليل حااالك اي إنارة من المركب قد تسبب في الكشف الي أمره.. يخيم الصمت علي المهاجرين الكل يفكر في مصيره وفي نهاية هذه المغامرة ويعانق أحلامه.. وأنا بجد خفت اتخيلت ان المركب حدث ليهو ثقب والموية دخلت وغرقنا وطلعونا جثث زى ما نشوف ونسمع عن الهجرة الغير شرعية وكيف الناس بتموت زى الصراصير في عرض البحر.. بقيت مرة اعاين في وجوه الناس ومرة في البحر وبقيت اقول هسه انا كان مالي ومال حرق الأعصاب دا مش كان أكون في بيتنا معززة مكرمة بين أحضان أمي العزيزة وجالت في خاطرى حلتنا وناس حلتنا واتذكرت حسين سيد الدكان وشكلتي معاهو لما اجي اشيل منو الفول اقول ليهو هسه فولك دا بشبع ليهو طفل زيد الفول دا شوية يوم رسمتو وهو ببيع في الفول وخاتي في الكمشة خمس فولات بس وطفل صغير بقول ليهو اديني فول بي خمسة جنيه يا عمو حسين وريتو الرسمة وقعد يقول لي والله يا بت الطاهر انتي سواتك دي بطفشي مني الزبائن دحين ما تسوي كدا وانا اقول ليهو لو صلحت بيعك م بعمل سواتي لكن لو م صلحتو بالحيل بعملا يقول لي خلاص بصلحو يا اخونا الشافعة دى المسلطة علي شنو؟ 🤔😂😂جننته جن واتذكرت جارتنا نفيسة انا وشيرى مسمنها نفيسة مستلمة لأنها بتستلم المواضيع طوالي واي شمار في الحلة جايبة خبرو برضو رسمتها مرة هي جارية وشايلا سفنجتها الكحلية ديك لاحقة شمار تحصلو شافت الرسمة قالت لي وووب علي يا بت شادية خبارك معولقاني كدا قلت ليها شفتي يا خالتي نفيسة كل البباري الشمارات بتعولق كدا لكن لو خليتها برسمك رسمة مجيهة قالت لي سمح يا بت شادية عاد زين بخليها كدي النشوف تجيهني كيفن😅😅يا حليلهم كم كنت أحبهم وأمسك ريشتي فى رسمهم بكل حب وأولاد حلتنا الكانو بجننو البنات بالمشاغلة كل يوم بقول ليهم برسم ليكم لوحة وعندى معرض كبير بمشي اعرض فيهو لوحاتي وانتو اول لوحة بتكونو بهددهم طوالي 😆.. وكم شخصيات جالت بفكرى وانا في عرض البحر المظلم.. تاني قبلت علي البحر.. يا بحر قم حرك تحرك او فعد نحو ابتداءك فالنهايات البعيدة لا تحد.. قد سألت البحر يوما هل انا يا بحر منك.. يا بحر لا لا تغدر بنا فأنت الكريم وانت الوفي.. ومرة اعاين لجوه الناس إلا أركز شديد من شدة الظلام ولمحت عينين لامعتين قريبتين مني بعد تمعن عرفتو شاب في مقتبل العمر عيونو تلمع زى كديستنا😹😹لكن عجبتني تلك العينين.. عاينت لي تريزا لقيتا مطمئنة لي الآخر عجبا لهذه الفتاة الشجاعة كم كانت معي نعم الرفيقة في هذه الرحلة المؤلمة😢.. مرات تجيني لحظات جنون أود أن أصرخ بملء صوتي ثم أعود ادراجي وأخيرا اهتدي بالقرآن اقرأ كل ما جالت في خاطرى سورة وادعي كثيرا كثيرا.... كنت علي

هذه الحالة 10ساعات من بداية الرحلة ثم دخل المركب الي المياه الإيطالية الحمد الله رب العالمين الحمد الله الذي بنعمته تتم الصالحات وصلنا الي السواحل الإيطالية.. الكل لم يصدق بعد كل هذا العناء وهذا الشقاء... ثم ذهبنا الي الفنادق وهناك تفرق الناس طبعا بعد وصلنا إيطاليا جون كان معانا خطوة بخطوة وفي زول في إيطاليا حيستقبلنا ويكون دليلنا حتي نصل الي بريطانيا.. في إيطاليا تمعنت في الشابان القطعو فيني ديل وفي واحد ياهو زاتو اب عيون لامعة زى كديستنا نويت له شرا حارسمو وابشع بيهو☹تاني قلت يا شذي مالك ومالو خلي الشر😡الحمدالله انك وصلتي بالسلامة تاني تشوفي خلقتو دى وين😑... المهم ما بعرف مصير الناس تاني من إيطاليا دى شنو؟ قعدو قبلهم ولا فرتكو زينا في باقي الدول الأوربية.... أنا وتريزا الزول ركبنا القطار والي لندن.... الي حلمي المرتجي.. 😎

#يتبع

#زهرة_البنفسج

-12-
لندن عاصمة الضباب!!!
هناك علاقة متينة بين السودان ولندن.. بحكم المستعمر الانجليزى فثقافتنا كانت انجليزية في العهد الماضي.. فكم من الأدباء والسياسيين والمفكرين السودانين درسو في لندن واقامو بها... كنت مشوقة أشوف الهايدبارك... وقصر باكنجهام.. ساعة لندن.. برج لندن... نهر التايمز.. وشغفي اكتر بالمتاحف في لندن... وكمان عايزة اشوف خط هيثرو بتاع الفاتح جبرا القادانا بيهو😂😂... لندن بلد جميلة شديد بالرغم الحشود ال فيها لكن الإنجليز ناس منظمين شديد... انا بعتبر حظي حلو شديد لأني كنت مع تريزا و نزلت معاهم طوالي وجون زول مشاء الله عليهو شغال كويس وعندو شقة حلوة ووضعو كويس قلت ليهو طيب لي م رسلت لي تريزا فيزة وتجي معززة مكرمة قال لي حاولت كتير بس الورق م طلع في النهاية قلت ليها نختصر الموضوع وتعالي انا كمان زمان جيت كدا والحمد الله هسه عملت علاقات ووضعي كويس الايام الأولي م مقصر معانا اتفسحنا وم خلينا شي...جون عرفني بي انجليزية لزيزة كدا اسمها صوفيا عندها كشك بتاع ورد وزينة وكلمها عشان اشتغل معاها فرحبت بي طوالي انا طبعا لغتي الإنجليزية كويسة خالص درست كمية معاهد وأكاد اتقنها تماما عشان كدا م كانت عندى مشكلة لغة...بديت الشغل مع صوفيا وبما انو أقرب حاجة لي اندمجت فيهو بسرعة وهي زاتها شغلي عجبها شديد شافتني بستهلك البنفسج كتير قامت علقت لي انو معظم شغلي بزهور البنفسج وزينة البنفسج 😅قالت لي انتي زول رومانتك😍.. انا م شفت حبيبك يجي هنا خالص.. ضحكت وقلت ليها انا م عندى حبيب انا لوحدى😰.. اندهشت وقالت لي كيف شذي ما يكون عندك حبيب ضرورى يكون عندك حبيب عشان إنتي أنثي حلو... انا أنثي حلوة 😆ياااخ انتو احلي شعب😍 في السودان مسمني شادي زاتو نسيت الانوثة🐸😂.. صوفيا زولة جميلة ناجحة في شغلها بجد استفدت منها كتير هي زاتها حبتني شديد كنت بضغط روحي شديد في الشغل عشان اعمل قروش اكتر واعتمد علي نفسي.. وخاصة كنت عايزة أجر لي سكن صغيروني كدا لانو بجد ما معقولة أكون مع الناس ديل طوالي حبيبك لو عسل م تلحسو😐بقيت أفكر في موضوع السكن دا كيف؟؟ ....الكشك دا بقرب من جامعة يوم زهجانة كدا قلت امشي اتضهب شوية قدام الجامعة فترت قعدت لي في بينش كدا بعد شوية جات واحدة قعدت جنبي م ركزت ليها لكن لما اتكلمت طوالي عاينت ليها لقيتها ملامحها سودانية ياااخ السودانين ديل ماركة مسجلة 😂😂😂اصلو م تهفي منهم هي ذاتها قفلت وسلمت علي بي انجليزية طوالي رديت ليها بالسوداني قامت ضحكت قالت لي بتدرسي هنا قلت ليها لا انا فنانة تشكيلية قالت لي تمام انا بحضر في الدكتوراة قلت ليها مشاء الله ربنا يوفقك يا محاسن الصدف لقيتها مأجرة شقة وعايزة زولة كويسة تشاركها في السكن عشان تخفف عليها المنصرفات قلت ليها ياااخ انتي جيتني من السماء اسمها نادين عثمان وانا كدا مشكلتي اتحلت بي معرفتي بي نادين طوالي طرت طيران لي تريزا قلت ليها يلا سريع لمي معاي حاجاتي عشان انا لقيت سكن كويس وقريب من الشغل.. طبعا دقت جرس قلت ليها مافي نقاش لانو بجد م قصرتو معاي نهائي انا م عارفه أشكركم كيف💜جات معاي ولاقينا نادين اتعرفت بيها وقعدت حبة ومشت.. نادين بت جدعة مستواهم المادي عالي درست اقتصاد في السودان وجات لندن لرسالة الماجستير والدكتورة بقت لي نعم الأخت م كان في تكليف ولا حواجز حتي نعرف بعض اكتر.. هي زاتها زولة عملية شديد.. نادين بقت خبيرة بي لندن بحكم سنوات الماستر وهسه الدكتوراه.. طبعا انا مليت ليها الشقة كلها الوان ولوحات عايزة ارسم وارسم عشان اعصر كل شتات الغربة عايزة افجر هذا البركان الفني الجواي.. نادين قالت يلا نمشي المتحف البريطاني وكمان عايزة أعرفك علي خطيبي جا ليهو يومين في لندن شغال بيزنس علي الطريقة الصاح مشاء الله 😎.. الي المتحف.

#يتبع

#زهرة_البنفسج

-13-
مشينا المتحف ونادين اتصلت علي خطيبها معتصم انو يجينا هناك يااااخ لكن هو متحف رأسي لفة من الجمال والروعة😇ونحنا لافين كدا أشوف ليك الفنان التشكيلي المشهور راشد دياب م صدقت مشيت عليهو طوالى يا استاذ يا استاذ.... مرحبا انت معاي؟ قلت ليهو ايوا مش انت الأستاذ راشد دياب يااخ والله انا محظوظة شديد اني قابلتك اليوم انا فنانة تشكيلية أسمى شذي الطاهر ولي فترة هنا في لندن ومن المعجبين شديد بي فنك ومعارضك العالمية والمحلية.. رحب بي شديد وقال لي هسة عندنا معرض عن الفلكلور السوداني بخص كل الفنانين والمبدعين السودانيين والجالية السودانية في لندن قلت ليهو انا عندي أعمال كتيرة تخص الفلكلور قال لي كويس خالص انا من الناس البشجعو الشباب الزيكم تعالي ورينا إبداعاتك واداني كرته وكنت عايزة أطير من الفرح 😍😎نسيت ليك نادين وخطيبها زاتو😅.. نادين عرفتني علي خطيبها قالي شايفك مع راشد دياب لكن انت جيتي كبيرة طوالى☺.. قلت ليهو الحمد الله هذا من فضل ربي هووووي ما تسحرني عين الراجل فيها فيها مناجل😆قعد يضحك ضحك قال لي انتي بت حبوبات شكلك😄قلت ايون عشان كدا خلي بالك من ندوش دى اليوم التزعلا حبوبة بتجيك بي عكازها☹...قعد يضحك ضحك ظررريف ياااخ معتصم قال لينا خلاص الليلة عازمكم عشا فاخر.. نادين قالت ليهو م كلمتك لاقيت طحنية اتصل علي واتقابلنا كم مرة لسه في جنو داك ولسة مع الطحنية بي زبادي ضرب علي قال لي عازمك غداء لقيتو عامل لي زبادى بي طحنية قلت ليهو يااااخ م مكن يعني تكون لسا معلق في الزبادى بي الطحنية دى يا ولد فوق انت الآن في لندن😂ولد مجنون خلاص... ههههههه اي كلمني قال لي مشيت لي نادين وجكستها وخلاص ح ادردقك يا حبة نحنا هنا مع بعض انت خليك مكنكش في السودان هههههه.... اي لسانو طويل خلاص لكن ما شفتو يا معتصم مشاء الله بقي آخر وسامة.... هووووي يا بت تقوليها في وشي😡.. قلت ليهم إنت وهي انا لا بعرف زبادى لا بعرف رووب بالله لما تكونو براكم اتكلمو عن شخصيتكم العجيبة دى قعدو يضحكوا معتصم قال لي نادين رأيك شنو نشربكه مع شذي دى اصلو بي لسانو الطويل دا خليها توريهو نجوم عز الضهر😣.....اي والله صدقت يا معتصم هسه اضرب ليهو خليهو يجينا هنا معتصم اتصل وين يا مان شوقنا طحنية ياااخ اه عازمك عشا مخير غايتو ضيعت الفرصة كنت حتلاقي بت مزة نص عمرك ضاع.... قال مضغوط شديد في الشغل م بقدر يجي قال ليك يخسي يا حاسدة م بتعرفيني بي المزز ليه فلاحتك بس تجيبي لي السحلية بتاعتك دى😂... وب علي منو صاحبك دا لسانو طويل بشكل دى أميمة يا معتصم معاي في القسم كل م يلاقني تكون معاي😆.. قلت ليهم زولكم النجاض دا لموني فيهو انا بنظمو ليكم وبشهيو الطحنية والزبادى بتاعتو دى ☹😅معتصم قال لي خلاص مبروك عليك من هسا استلميهو😊اتعشينا واتونسنا كتير بعدين معتصم وصلنا البيت ظبطت لي شاي كااارب كدا نادين كانت بتتكلم مع معتصم قالت لي معتصم عايزاك طوالي قلت ليهو يعني الزول م يشتاق ليك ولا شنو ادينا فرصة نهضم شوقنا شوية م معقولة هسا شوفنا خلقتك تاني تمعطنا بي التلفون😐😂... أنا زاتي قلت كدا يااااخ انتي المزة بتاعتي ياها زاتها😍😂😂😂... انت الزبادى و الطحنية الليلة وقعت في شر أعمالك ☹جيتني بي كرعينك استحمل الجاييك هسة نويت ليك بي رسمه تجنن قال لي رسليها لي واتس دا رقمي سجليهو عندك... شربنا الشاي وكل واحدة مشت تشوف مشاغلها اشتريت لي مجموعة ألوان رهيبة قعدت أرسم تاني اتذكرت الولد الطحنية رسمتو هو بياكل في طحنية بي زبادي والشرفة ظاهرة فيهو لما الزبادي عامل ليهو شنبات😤 وسحلية مارة بي جنبو نظام قرفانة منو🐸🙊😂😂😂غايتو بشتنتو بشتنة صورت اللوحة ورسلت ليهو الصورة طوالي.. ناديت ندوش قلت ليها تعالي شوفي صاحبكم ضحكت لمن دمعت قالت لي وووب علي منك يا شذوية قولعتي جنس عولاق 😱والعجب اميمة هي زاتها قرفانة منو🙊😂😂😂قلت ليها ايوة عشان سخر منها عولقتو كدا😱😐قالت لي النصيحة يا شذي الولد قرض شديد لكن تصدقي ملامحه قريبة لي رسمتك دى زى كأنك شوفتيهو قلت ليها انا رسمتو علي واحد كدا كان غايظني لسوء حظه عتر فيني😑ندوش صورتها قالت ترسلا لي معتصم 😂😂شوية كدا تلفوني ضرب... قلت الو جاتني ضحكة حلوة😂😂😍

#يتبع

#زهرة_البنفسج

-14-
قلت آلو... اسمع ضحكتو والعجب صوته.. صوته دافئ وحنون قال لي لكن بالغتي فيني ليه كدا انا عملت ليك شنو لما تبشتنيتي كدا😤😂.. قلت ليهو عجبتك الرسمة انا كنت متأكدة انها حتعجبك☺.. قال لي لسا انتي زايدة في وجعي يعنى😢لكن م قلتي لي انتي شفتيني في خيالك ولا شنو بجد الصورة تشبهني شديد شكلك حلمتي بي اعترفي سريع😍.. ههههها ما تحلم بالشتاء الدافئ يا اخوي وكت احلم. احلم بيك انت ☹بس كان في زول جواي غايظني وقلت اكيد بتكون شبهو رسمتك عليهو🤓قال لي دا حبيبك😍.... حبيب شنو دا آخر من يكون حبيبي اقول ليك زول غايظني😬تقول لي حبيبك انت ما تفهم😑... قال لي مش قلتي جواك البكون جواك دا معناهو حبيبك او أعز عزيز كويس انك تشبيهني بي زول جواك برضو خطوة حلوة.... ياااخ الولد دا مرض دا الشنو اللايوق دا😐.. قال لي علي العموم خلاص عرفت... قلت ليهو عرفت شنو قال لي عرفت انو انا جواك😆... خلاني بجد اضحك قال الحمد الله الضحكتي ياااخ ضحكتك دى بالدنيا قلت ليهو لا بالله صدقتك يا طحنية.. قال شفتي كيف سمتيني حاجة حلوة😍قلت ليهو بس انا بكره الطحنية.. قال لي م مشكله ياااخ الكره زاتو أنواع في كره بؤدى الي حب وفي كره بؤدى الي كره شكلك من النوع الأول انتي😍.. قلت ليهو ادمو شكلك عايز تعمل لي فيها فيلسوف زمانه بالله انا ما ناقصة معطة🤓.. قال لي ادمو دا شنو هههه... قلت ليهو دا اسمك😆انا زاتي ما عارفة اسمك منو؟! قال لي برضو حلو يعني دلعتيني كمان مش قلت ليك انتي حبيتيني 😍طيب انتي اسمك منو.. ما ح أوريك انت جلطتني عارف نفسك قال لي سلامتك من الجلطة يا حوايتي.. قلت ليهو حوايتي😳.. قال لي أيوة دا اسمك هههههه... ادمو شكلك انت ما عندك موضوع يلا مع السلامة وما عايزة اشوف وشك دا نهائي.... قال لي انتي شفتيني وخلاص شفتيني في احلامك😍😊... غايتو ولد معااااط... لكن بيني وبينكم لزيز ووننسته حلوة 😊قفلت لقيتو مرسل لي واتس الوجه😭😭😭كاتب لي حوايتي نزلت مني دمعة عشان قلتي ما عايزة أشوفك بس انا عايز اشوفك في كل لحظة وكل ثانية.. حوايتي الجميلة كوني دائما بخير لأنك انتي من تجلبين الخير لحياتي💜... قلت دا مالو شكلو عندو حمي😟... اتصلت علي شيرى قالت لي ما شفتي يا شذي عم علي وقعت فيهو الحيطة وكسر رجلو والترقوة وحبوبة سميرة ماتت كان شفتي نحنا لينا كم يوم م روقنا... كر علي يا شيرى شنو الأخبار المحزنة دى 😢.. قالت لي لكن في خبر حلو حيفرحك شروق حامل ☺... يا سلام أجمل خبر يعني حابقي خالة😍.. هي ومجدى أمس اتصلو علي ما كلموني والخط قطع قلت أرجع ليهم انشغلت... قالت لي تكون كانت عايزة تكلمك انا كمان اليومين دى بجهز لي التخريج فقدتك والله يا شيرى 😔.. حبيبتي م تزعلي بكون معاك خطوة بي خطوة وحتكوني احلي خريجة 😊.. قفلت منها نادين قالت لي لكن م خليتو شمار طاير في الحلة😅.. طبعا يا شذي معتصم اتفقع من الضحك في رسمتك قال لي شذي قدرت عليهو ههههههه... اها استعدادك كيف لي المعرض؟؟ ... ماشة كويس ولسه في زمن عندى أفكار حلوة عايزة ارسما... طيب يا بيبي بالتوفيق عندى قراية بالكوووم... جاتني رسالة من ادمو كاتب لي نجمتي صاحية؟ 😍... قلت ليهو نجمة البحر ولا نجمة السماء؟؟.. قال لي انتي عايزة شنو؟.. نجمة البحر عشان اغطس حجرك يا بيبي😐... يا سلام بيبي دى حلوة منك مش قلت ليك انتي ماشة معاي طحينة بس😍... م تفرح تقول بكرة العيد😃.. تاني قام اتصل قال لي من عرفتك أيامي كلها بقت اعياد😍... ههههها شكلك حناك ونوعك دا م بياكل معاي عيش😑... م مشكلة يا ستي خلينا ناكل طحينة بس😆... ضحكني بجد عبيط ياااااخ... يا سلام علي الضحكة الحلوة هسا بتعملي في شنو؟ برسم عندى معرض قريب عن الفلكلور السوداني... تمام والله عندى ليك أفكار حلوة... وجرت المكالمة لوش الفجر م قدرت اقفل منو صوته دافئ وافكاره حلوة بجد اداني افكار حلوة افادتني كتير.. كلامه ساحر كلماته تخش جوا القلب 💜لكن مع ذلك غيااااااظ☹😂.. قمت صليت وقريت قرآن ونمت حبة عشان امشي الشغل.. صحيت لقيت رسالة منو.. كاتب لي..
من انتي؟! سوف تمر أيامي وانسجها ستارا... من انتي؟! نجمتي... حوايتي... انثتي... حيثما تكونين فشوقي إليك يستعر استعارا...
اتفضلي إذنك معاك... فجي المسامات وادخلي... 💜... ومقطع صوتي غنية محمود عبد العزيز دى👆😍😍... غلبني الكلام!!! طلعت الشغل صوفيا قالت لي في حاجات أمشي جيبها.. وأنا جاية لاقيت زول في المترو م كنت متوقعة اني اشوفو نهائي..!!
يتبع#

#زهرة_البنفسج

-15-
في الميترو أشوف الولد أبو عيون لامعة وكمان شايل ليهو ديوان شعر لي بدر شاكر السياب يقرأ فيهو هو م لاحظ لي لكن انا ركزت فيهو اتكهربت منو يعني هو كمان جا لندن 😐قلت يا شذي يعني هي لندن حقتك براك أمة لا الله إلا الله كلها هنا مالك ومالو يكون في لندن ولا السما الأحمر لكن برضو واجعني كلامه عني قلبي قال لي امشي شيلي منو الكتاب واخبطي في وشو اعملي فيها مجنونة😂😂كمان قال بقرأ شعر هو بعرف يشعر الثقيل دا 😣اشيل وأحمر ليهو لما نزلت وهو مع كتابه ما جايب خبر مشيت الكشك انتهيت من شغلي وقلت اغشي تريزا لأني طولت منها أبت اصلا تفكني كلمتها بي الولد ضحكت قالت لي شكلو الولد دا وراك وراك قلت ليها يلا انا امشي عشان ماشة السوق مع نادين عايزة اشترى حاجات لي شيرى معتصم خطيبها مسافر بكرة قالت لي دقيقة اديك الفستان انا من السودان كلمتها قلت ليها فستان التخريج علي اشتريت ليها فستان رررهيب بي جزمته وطقمه غايتو تريزا دى زولة عسل بشكل 💜قلت ليها خلاص ريحتيني بس انا بشترى ليها الميك آب.. اتلاقينا انا ونادين اشترينا حاجاتنا وعندنا أغراض لي البيت جبناهم معانا قالت لي معتصم عازمني عشا إلا تمشي معانا قلت ليها امشي انتي يا ختي م ابقي ليك حقنة دا عشا وداع قالت لي خلاص بنضرب لي ادمو وتكوني معاهو قلت ليها ياااخ مزاجي م رايق امشي انتي انبسطي💜بعد تجو راجعين بودع معتصم.. غلفت حاجات شيرى كويس واشتريت حاجات بيبي لي شروق😘😘قلت امشي أرتب افكاري وارسم شوية جاتني لوحة حلوة كدا شفتها في غرب السودان لما مشينا ايام الكلية بديت ارسم كدا تلفوني ضرب لقيتو ادمو سلمت عليهو قال لي مالو صوتك الليلة م عاجبني قلت ليهو مافي شي بس الليلة كان يوم مرهق الشغل كتير ومشيت السوق مرتين تعب بس قال لي طيب عايز اشوفك الليلة قلت ليهو بجد م عندى مزاااج قال لي يعني انتي ما عايزة تشوفيني؟؟... لا م كدا لكن بجد مرهقة وعايزة أنجز شغلي عشان المعرض قرررب غير كدا الليلة لاقيت زول قفل لي نفسي😑... طيب انا ذنبي شنو؟ ربطاني معاهو لي شنو؟ ولا دا الزول الجواك😏... ادمو ممكن م نتكلم في الموضوع دا لانو بجد بنفرزني ويجب كسافتي😣... م بخليك الا توريني الزول دا منو؟ ومالو معااك؟.. ياخ انا زاتو م بعرفه ولا عايزة اعرفه معليش ممكن نتكلم بعدين... يااخ م تزعلي صارة لي وشك دا تشبهي لورى عمك الزبير😣.... ههههههه لورى عمك الزبير دا شنو كمان؟.... لورى عمك الزبير دا لورى قديم ومكركب من شدة قدمه لما معالمه مطموسة وهو مصر عليهو يشغلو واليوم التاني معانا في الورشة وم مقتنع انو هو فاقد الصلاحية زاتو... هههه انت كنت شغال في ورشة ولا شنو؟ أيوة انا مهندس ميكانيكي كان عندى ورشة لكن قرفت من الشغل واتفكفكت وجيت هنا... م مشكلة هنا الفرص أوسع بس طول بالك... اطول بالي زى لورى عمك الزبير😆... غايتو الله يكون في عونه عمو الزبير دا جننته معاك😅😅... ايوا كدا اضحكي وخلي الدنيا تضحك😊يلا اسيبك ترسمي عايزينك تكوني الأولي يا دافينشي لو احتجيتي اي حاجة م تتردى وراك رجل يا بت😎... سمح بس نحنا م عندنا رجال بياكلو الزبادى بالطحنية نحنا رجالنا بياكلو الشطة الحاااارة بي الدكوة😜😂... اصبري بوريك الشطة الحارة دي كيف؟ 😡بس اشوفك... هههه طيب يلا سلام... رفعت ضغطه لكن والله عرف يمتص زهجي ذكرني خالي بي دافينشي دي💜.. اشتغلت كتير قلت أرتاح حبة جاتني فكرة جهنمية أنو أرسم عمك الزبير ولوريهو القديم خصوصا اللوارى الزمان دى بقت منقرضة رسلت لي ادمو الزبير ولوريهو بشبهو كدا؟... رسل لي ما بوريك شوفي ليك واحد شطة يوريك 😏... م مشكلة خليك اللورى اصلا معروف وعمك الزبير برسم ملامح حسين سيد الدكان😆... هووي يا بت كمان جابت ليها سيد دكان 😣غايتو بت غياااظة خلاص عندى صورة محتفظ بيها برسلا ليك م عايز لي ضهب في الدكاكين مفهوم😡... حااضر..عجبتني الهرشة 😅يااااخ ادمو دعمني كتير بأفكاره وبالمعنويات💜.. جات نادين قالت لي معتصم عايز يسلم عليك.. اوو فنانتنا العظيمة مشتاااقون كتير فتحتي خط بهناك وفتحتي لينا😉لكن أمورك ماشة طحنية😍😂 .. واااي اصلا بكره الطحنية وادمو كرهني ليها اكتر ☹.. هههه اسمو الجديد رهيب شديد يا شذي تاني حنسميهو كدا.. جبت ليهو الشنطة ادتو تلفون شيرى ودعنا ومشي.. نادين قالت لي انا تعبانة عايزة انوم تصبحي علي خير😘.. تلاقي الخير😘..


#يتبع