#بيت_الزار
بقلم: فاطمة قسم الله

الجزء 24

مشيت فتحت البيت والنسوان بدن يدخلن وانا بقيت مراقبة البت بعاين ليها ساي .. هي كانت ساااكتة وبس مدنقرة في الارض وخالتها سايقاها من يدها زي الما بتعرف تمشي براها .. اشوف ليك كل واحدة جدعت توبا ولابسة لبس براها .. قاعدة تجيني الضحكة والله ما بقدر امسكها لكن بخاف من حريرة تتقلب فيني مرفعين زي ما كانت ماما بتقول لينا .. دخلت الغرفة غيرت هدومي وشلت لي منكير احمر كدا اتمكرته.. المرة دي اتريحته شديد وعملت روج احمر كتير .. ولبسته خلخالي البكشكش ووقفت في المراية ركبت الزمام وفكيت شعري وبقيت اعاين لي روحي في المراية وبقيت اغني ماشة تكشكش من تحت خلخال فوق زمام مدهش اجي ياالبرقش .. وقرقرقر بقيت اضحك زي حريرة عاجباني الضحكة .. خشيمك الودعة نصك الرقاص قمة الروعة واتلفت يمين وشمال واعاين لي روحي في المراية عااااجباني واغني .. هزي يا قطعة شوف عيوني الناس مسكتم خلعة وكش كش .. اموووااااح سلمت علي روحي براي وجيت طالعة النسوان كلهن بقن يعاين لي .. وريحة البخور كان طاقة والعجب ريحة الخمرة والصندلية والارياح دي قوية كانت .. بقيت شماري تقيل النصيحة عيوني تلاقط يمين وشمال اعاين في النسوان لقيتن ليك مكحلات عيونن سووود والحواجب مخططه سودااا والشعر دا مجلط اسود وملان زيت .. الممشطاه واللافاه بي تحت اضانا .. ومعظمن كانن لابسات خلخالات وزمامات .. وواحدات بضحكن عندهن سنون دهب .. اللون الاحمر كان اكتر واللابسات الطربوش البزكرني بي الديك .. شميت لي ريحة ما ياها اتلفته لقيت ليك واحدة محكرة وتشرب في السجارة البشم ريحتا عند ابوي .. اشتهيتا الساعة ديك وكنت عايزة اشربا بس تاني قلت كفاية الصعود والشيشة جابت ليها سجار يا رهام .. الساعة تلاتة جات ومواعيد الزار .. حريرة جات داخلة المرة دي كانت لابسة زي الخواجات ولابسة بدلة وشايلة سجارة في يدا ودخلن معاها النسوان البساعدنا .. قالت دستووور لي الاسياد وجيبو الضيافة ..

يتبع....

#بيت_الزار
بقلم: فاطمة قسم الله

الجزء 23

الليلة الاربعاء حفلة الظار التانية لي .. حريرة قالت لي لولية حفلة ظارا الاحد والاربعاء تتعمل لي مرتين وببقي كويسة .. من جواي قلت ليها هو انا اصلا كويسة إنتي المرضتيني بالغصب وهسي بقيت ما براي .. اها من الصباح قمنا للتجهيزات وزي المرة الفاتت نضفنا البرندة وجبنا البروش الحمر والخدر والتمايم والكشاكيش والدلوكة والنقارة وجهزنا البخور العدني والجاولي والمر الحجازي والعودية .. بعد جهزنا الحاجات قعدنا تحت شجرة النيم ولمة الجبنة .. قلت لي حريرة انتي يا خالتو ماما قالت لي مرة ان الزار دا حرام وهو سحر وجن .. حريرة قامت من مكانها واتلبشت وقالت لي هوووووي ما تلعبي مع الاسياد بضروك .. خوفتني قلت ليها سمح .. الساعة اتنين جات.. النسوان بدو يدخلو علي البيت واتلملمو ويتونسو ويتحاكو ويضاحكن واحدة قالت امس اتجننت علي راجلي قلت ليه ظاري قال داير سلسل دهب وتوب لونو احمر .. النسوان قعدن يضحكن وحريرة قرقرقر قالت ليها الله يجازي محنك في دي .. جات واحدة من النسوان داخلة ومعاها بت من شفتها انا قلت ماشاءالله .. النسوان بقن بتهامسن بي تحت تحت .. مش دي بت رقية العروس مالا خالتا جابتا .. واحدة ردت عليها قال ليها اجي انتي قاعدة وين ما عرفتي بالحصل ليها ماقالو سايقنها من شيخ لي شيخ في النهاية قررو ليها الزار .. سعدية ردت ليهن العين الشافتا ما زكرت الله البنية صغيرونة ما شافت شي .. مسكني الفضول اعرف مالا البنية زي ما قالو .. جيت اتحكرت جمب حريرة وسألتها براحة انتي يا حريرة مالا البت الجات داخلة مع الخالة دي قالو متزوجة .. قالت لي زينة البنات زنوبة أكان دايرا واحد زميل ابوا تاجر والبنية الوقت داك كانت ياداب عمرا اتناشر سنة اعماما ما وافقو علا كانت سماحة البنوت كلها فيها .. وقت وصلت لي سنكم كدي اتقدم ليها وداعمها الكبير ووافقو عليه .. الراجل يوم العرس الكان ختبا في الاول جا سكران وقال لي ابوها ترفضني انا مال وهدوم وعز وتديها لي وداخوك وانحنا صحبة عمر الا ما حا تضوق العافية وانا كلمتك ومشي .. بعد عرسوها البنية بقت شوفت عينك دي لا بتنضم لا بتتكلم ومرضانة السنة كلها من دكتور لي دكتور ومن شيخ لي شيخ ما خلو ليها محل .. علا جاتني خالتا يوم دق زارك كانت حاضراه وقت شافتك قالت لي بجيبا ليك .. قلت ليها العلاج عندي جيبيا .. قلت ليها اهااا مسكينة والله ما تستاهل .. عاينت لي نفسي قلت الحمدلله بس تاني اتخلعته قلت الليلة ما يقوم عثمان يختني في راسو ويعمل لي كدا ... حريرة لكزتني قالت لي قومي افتحي البرندة خلي النسوان يدخلن لي جوه وقومي غيري هديماتك ديل المواعيد جات ...

يتبع.....

#بيت_الزار
بقلم: فاطمة قسم الله

الجزء 24

مشيت فتحت البيت والنسوان بدن يدخلن وانا بقيت مراقبة البت بعاين ليها ساي .. هي كانت ساااكتة وبس مدنقرة في الارض وخالتها سايقاها من يدها زي الما بتعرف تمشي براها .. اشوف ليك كل واحدة جدعت توبا ولابسة لبس براها .. قاعدة تجيني الضحكة والله ما بقدر امسكها لكن بخاف من حريرة تتقلب فيني مرفعين زي ما كانت ماما بتقول لينا .. دخلت الغرفة غيرت هدومي وشلت لي منكير احمر كدا اتمكرته.. المرة دي اتريحته شديد وعملت روج احمر كتير .. ولبسته خلخالي البكشكش ووقفت في المراية ركبت الزمام وفكيت شعري وبقيت اعاين لي روحي في المراية وبقيت اغني ماشة تكشكش من تحت خلخال فوق زمام مدهش اجي ياالبرقش .. وقرقرقر بقيت اضحك زي حريرة عاجباني الضحكة .. خشيمك الودعة نصك الرقاص قمة الروعة واتلفت يمين وشمال واعاين لي روحي في المراية عااااجباني واغني .. هزي يا قطعة شوف عيوني الناس مسكتم خلعة وكش كش .. اموووااااح سلمت علي روحي براي وجيت طالعة النسوان كلهن بقن يعاين لي .. وريحة البخور كان طاقة والعجب ريحة الخمرة والصندلية والارياح دي قوية كانت .. بقيت شماري تقيل النصيحة عيوني تلاقط يمين وشمال اعاين في النسوان لقيتن ليك مكحلات عيونن سووود والحواجب مخططه سودااا والشعر دا مجلط اسود وملان زيت .. الممشطاه واللافاه بي تحت اضانا .. ومعظمن كانن لابسات خلخالات وزمامات .. وواحدات بضحكن عندهن سنون دهب .. اللون الاحمر كان اكتر واللابسات الطربوش البزكرني بي الديك .. شميت لي ريحة ما ياها اتلفته لقيت ليك واحدة محكرة وتشرب في السجارة البشم ريحتا عند ابوي .. اشتهيتا الساعة ديك وكنت عايزة اشربا بس تاني قلت كفاية الصعود والشيشة جابت ليها سجار يا رهام .. الساعة تلاتة جات ومواعيد الزار .. حريرة جات داخلة المرة دي كانت لابسة زي الخواجات ولابسة بدلة وشايلة سجارة في يدا ودخلن معاها النسوان البساعدنا .. قالت دستووور لي الاسياد وجيبو الضيافة ..

يتبع....

#بيت_الزار
بقلم: فاطمة قسم الله

الجزء 27

انتهت دقة الظار والنسوان مشن كل واحدة علي بيتا .. من التعب ما قدرنا نلملم الحاجات .. حريرة قالت لي مافي ليك طلعة من هنا الا بعد تلاتة ايام .. عملنا ليك الكرامة وبقيتي كويسة .. اتبسطه شديد .. لكن خفته في نفس الوقت قلت ليها يعني ما حا نعمل ظار تاني .. قالتلي الرجبية و تاني الا بعد رمضان .. قلت ليها لشنو .. قالت لي الجن والشياطين وأرواح الزار بتكون مقبوضة في رمضان .. ونهرتني قالت لي انا ما قلت ليك بطلي اسئلتك الكتيرة دي يوم بتعملي لينا بلوة بيها .. سكته وقلبي بقي بدق دق دق دق ..

انشغلنا تاني في تجهيزات عرس ترتيل .. والليلة كان عمل الريحة النحكي ليكم كانت كيف .. اي شي بتعمل في بيت ناس جدي بكون تحت شجر النيم عشان الضل بتاعو .. فرشنا الفرشات واتلملمن النسوان الناديناهم جري بحبن الحاجات دي عارفات الشمارات والقطيعة ورمي الودع وشراب الجبنة كلها بتكون فيها .. جابو الصينية الكبيرة مليانة ارايح .. بقو يفرزو فيهن .. قالو دي بسموها الارياح اللينة ختوها بي جمبة.. فلور دي مور، سوار دي باريس ، ريف دور ، قلامور ، بت السودان .. اها الحاجات الجافة زحوها بي الجمبة التانية .. خشب الصندل ، المسك ، الضفره ، المحلب ، القرنفل ، الحبهان .. ودي قالو عليها ارياح زيتية ختوها في النص الصندلية ، المجموع ، السرتية ، المحلبية .. وحاجات تانية ما عرفتها هي شنو .. سعدية قالت لي قومي اعملي الجبنة زهجوني بيها زاتي .. ولعت النار وختيت الطوة .. غسلت البن وكبيتو في الطوة ومعاه حبيبة سكر .. دقيت الهبهان والجنزبيل ناااعم .. مسافة قلا البن النسوان قالن يشمموهم ريحتو .. في سري قلت ليهم يشمكم المرفعين .. دقيت البن وبخرت الفناجين وكبيت ليهن الجبنة معاها بلح .. بدو يعملو في الريحة اها شفتهم عملو خمرة المسك قالو عليها كدا شفتهم لخبطو مسك مطحون وصندلية وفلوردامور كبوهن في فتيل وقفلوهن قالو لي اسبوع عشان الريحة تمسك .. البخور برضو شفتو وقت عملوه قلت ليكم بقيت شمشارة اي شي عايزة اشوفو بعملو كيف كنت محكرة في نصهم اعاين عاجباني الحكاية .. عملو بخور الشاف .. كسرو الشاف طوال طوال لي اعواد صغيرة كدي .. وختو في النار ليمون وسكر وموية .. اها بعد تقلت شوية كبو فيها الشاف وبقو يقلبو فيه لما اتحمر .. بقي لي زي الكابين فيه عسل اشتهيتو ... هههههه اها اواصل ليكم تاني جابو مسك .. سرتيه .. موية القرنفل.. ضفرة مسحونة وكبوهن في الشاف وخلوهن شوية ونزلوهن من النار وقفلوهن وقالو لي سعدية تاني كبي فين شوية ريحة .. عملو تاني بخور الصندل قالو زيو بس بكترو الصندلية .. وعلمو ليها خمرة الضفرة .. الريحة ما اقول ليكم عليها شلت اتمسحت منها دخلت مزاجي قلت لي حريرة الا تديني منها .. لكن لقيت لي نهرة بس قالو دي للمتزوجات ما لي البنات .. لويت ليها خشمي وسكته .. السرة قالت لينا مالكن ساكتات كدي قومن دقو الدلوكة وغنن ... قلت ليها سمح النجيبا وقمته ...

يتبع....

#بيت_الزار
بقلم: فاطمة قسم الله

الجزء 28

المرا البتعلم رقيص العروس جات جريت جري بحب الحاجات دي بقيت .. جبت الدلوكة كنت خاتاها في الشمس من الصباح عشان تشد .. جبنا ترتيل وكانت خجلانة .. ياالله جريناها لما حريرة ادتا نهرة بقينا نضحك عليها .. السرة شالت الدلوكة وبقت تدق وتغني ونحن نصفق معاها

حنانا النسا اهلو ما نسانا

حباني لو رقتو بوصف الشفتو

انا بقيت ازغرد ايوووووي يوووووي يووووووي

وغنيت معاها

هييي يا حباني كان رقتو انا بوصف الشفتو وبقيت اهز بي اكتافي ارقص

الجعلي البريدو دا بشبه علوية أختو

ايووووووووي

حنانة والصفقة مالا تعبانة

زدنا الصفقة زيادة اطق طق طقق طق

ايووي يووي يوووووووي

انتي يا ترتيل غلبك الرقيص .. انا رقصت احسن منها .. سعدية قعدت تنهر فيها يابت بطلي العوارة دي الاتربت بره البلد تعرف ترقص احسن منك .. عايزة النسوان ياكلن وشنا قومي اترفعي واتعدلي وارقصي عديل .. نشيل ونعيد ونقع ونقوم ومرات نضحك ومرات نقعد شوية .. لما اليوم خت وانتهي..

الاسبوعين عدت سريع وعرس ترتيل جا .. من الصباح الجوطة والطلعة والدخلة .. صحينا قبل اذان الصبح .. اول دخلته لبست لي فستان بنفسجي واتمكيجته وثبته شعري بي مشبك ولبست لي كشاكيش في يدي وطلعته ليهم تاني .. نجهز في الحاجات لي رقيص العروس فرشنا السراير وجبنا البخور .. والحلاوة والبلح المرشوش بي جوز الهند والفشار .. والحوش فرشناه بالرملة ورشيناه بالموية .. والزغاريد مالية الحلة من الصباح والنسوان ديل انكسرن فينا جو لي رقيص العروس يشوفوها كان فيها عيب ولا حاجة للشمارات .. قفلنا باب الحوش وجابو الفنانة بي دفوفن ودلاليكن ..

جابو العروس وكانو ملبسنها توب قرمصيص احمر لي وشها مغطينو قعدت في الارض علي الفرشة كانت حفيانة ..

والدلوكة قامت دق ادق دق صفقة يا البنوت زغرووووته يا ام العروس ايوووووووي يوووووي يوووووي بقو يغنو

وقومي ياعروس وقومي بي مهل

مسكت طرف التوب من فوق وتحت بي الجمبة وبدت تقوم براحة براحة مع الغنية

وسيبي الدلال وخلي الخجل ومافي

زول غريب وكل الناس اهل

ايوووووي يووووي مع صوت الصفقة اطق طق والدلوكة والغنية والبخور الحلو مالي المكان

ياعريس عن اذنك بصراحه

العروس دار ترقص في الساحه

امروقو الفركه الجميل ظهر

والدلوكة زادت زيادة والزغاريد لما العروس بقت ترقص شديد يمين وشمال وتجري لي قدام وترجع لي ورا وتهز قدام وورا وتنزل لي تحت وتقوم تاني

ووووب ... وووب شالو التوب هي شيلو التوب ايووووي يووووي واحدة قامت جرت منها التوب والزغاريد دي شرطت الحلة ايووووووي يووووووي يووووووي يوووووووووي .. كانت لابسة فستان سيتان بمبي قصير والنسوان بقن يتهامسن بي تحت تحت .. هي ماشاءلله سعدية وحريرة سمننها اكانت ضعيفوونة .. سماحة البنات عليها

اقعلهو التوب ... جيبوهو التوب

هي قولو ماشاءالله .. عروسنا ماشاءالله

الفنانة قالت حصوة في عين الما بتقول ما شاءلله .. قرقرقر النسوان بقن يضحكن اجي اجي

ايووووووووي فكيت الزغرودة معاهم ..

يتبع....

#بيت_الزار
بقلم: فاطمة قسم الله

الجزء 29

انتهي رقيص العروس .. والعزومة كانت فطور بس لي الغدا الناس كانت بتجي والبيت ملان .. العصر جا العريس جو مسيرنو بي الدلوكة والزغاريد .. لبسنا العروس توب احمر وعملت ليها مكياج بسيط وطلعناها العريس نزل ساق مرتو قالو ماشين الخرطوم بقعدو تلاتة ايام وبجو .. طلعناهم بالزغاريد والنسوان بقن يبكن وانا زاتي بكيت معاهم .. اليوم عدي سريع زي ما كان في شي .. واتلمينا انا وبنات اعمامي ننضف ونضاير ونلملم في الحاجات ضهرنا اتكسر ونضفنا البيوت وكنسنا الحيشان نمنا لي الساعة واحدة صباح زي الميتين من الشغل ..

مرت الايام قريب شهر ونص وعملنا حفلة الرجبية وكانت غير .. جو فيه خيوت كتييرة .. واحدة راكبنها السحاحير وااااي دي قطعت قلبي وقدر ما اتزكرا بهلوس بيها وبقيت ما بنوم براي .. وقت خيتا جا اتجننت فينا المرا بقت بتمشي علي يديها وعلي ركبيا وشكل عيونا اتغير واكلت اللحم الني وشربت دم الخروف .. والعجب المرا الراكبا التربي رقدت زي كأنها ميتة وغطوها وكفنوها وبقت تنفخ في بطنا لي فوق بطريقة غريبة ما بعرفا كيف .. وفي خيوت تاني كتييرة جات الفلاتيه والبرناوي ونمر الكندو وازرق بنده ديل العرفتهم من حريرة وخفت منهن شديد .. تتزكرو البت الجات خالتا تعالجا ديك جات تاني حضرت معانا الرجبية اتسمرت في مكانا بقت واقفة زي العمود وما رقصت وبقن مساعدات الشيخة يقولن ما نزلت ليي غيرو الدقة كبو البخور .. ما حصل ليها شي في النهاية غيرو لي واحدة تانية .. لكن شفته حريرة قالت ليها جيبيها كل مرة خيتا بجي براه تاني ..

رمضان قرب حضرته عواست الابري واللمة بتاعتو وعرفته كيف يكوجنو ويعوسوه .. رمضان جا والحال اتغير نهائي .. اول رمضان لي اصومو وكان متعب قربت افطر كان ما ابوي ختي لي اخواني التؤم يراقبوني .. اول يوم في رمضان مسكني صداع عايز يقتلني .. الله يجازيك يا حريرة كلو منك شبكتيني في جبنة وصعود وشيشة وزار تاني حا تشبكيني في شنو .. من الصباح ضبحو خروف وقطعنا اللحمة وقسمنا منها للجيران والباقي قسمناه في اكياس ودخلناه التلاجة .. لحدي نص النهار خلاص انا انتهيت كلو كلو من الصيام طلعت بره رشيت تحت الشجرة ورشيت السرير ورقدته .. جو نسوان اعمامي يجهزو للافطار .. ختو العصيدة والبليلة وعملو ملاح التقلية .. ورمو الطعمية .. وعملو سلطة الروب .. بلو البلح .. والحلو مر والابري الابيض .. وعملو الكركدي .. قطعت الليمون وختيتو عشان اخلطو قريب الافطار .. جهزنا الحاجات كلها .. وقت خلاص الافطار قرب جو شالو الفرشات من جوه عشان يفرشوها بره .. مشيت اتاوق بالباب اشوف الحاصل شنو .. لقيت ليك الرجال ديل كتار بره وكل زول شايل فرشاتو فرشوهم في الشارع في شكل طولي .. من شفته ابوي جري جيت داخلة .. جيت خلطه الليمون وكبيت العصاير في الجكوك وختيت الصينية وجبته كبابي الاستيل رصيتهم وختيت المويات .. ختو الصواني وختو العصيدة والملاح وعملو اللحمة بالصحن الكبير .. والبليلة والبلح .. ختيت الموية للجبنة والشاي في النار والبن دقيتو جاهز .. بقينا منتظرين الاذان وكنت عطشانة ومصدعة صداع .. بقيت سامعة صوت الناس بره رمضان كريم رمضان كريم تصومو وتفطرو علي خير .. الجو كان كيف كيف متغير من الايام العادية في ريحة كدا حلوة وريحة البليلة حاجة كدا ما قادرة اوصفا كيف المهم حلوة .. اتزكرت ايام رمضان في السعودية ودبي ما زي هنا .. كنا بنقعد في السفرة والاكلات ما زي دي كان بكون في دجاج . وشوربات . وفطاير . وسمبوكسة . وسلطات ..دا غير الحلويات والعصاير الكتيرة مانجو وبرتقال وجوافة وفيمتو وعصاير معلبة .. مع إنو هنا الحاجات دي مافي بس حبيت اللمة بتاعت الناس والبساطة المدية ريحة حلوة وكل الناس تضحك وتتونس مبسوطة .. الاذان اذن وانتبهته اني سارحة من فترة بتزكر .. فطرنا وقمنا صلينا المغرب ودي كان اول مرة اصلي لي صلاة .. ما عرفت اصلي كيف بس كنت بعمل زي ما بعملو .. بعدها عملنا ليهم الجبنة والشاي شالوها بره .. مشيت دخلته جوه الليلة من الصباح فاقدة الصعود ختيت منو حتي ارتحته واخدت لي نومة كدا ما صحيت الا لما صحوني لي صلاة التراويح قالو بصلوها في الجامع لبسته عباية وطرحة ومشيت معاهم ...

لما جيت دخلت الجامع حسيت بي قلبي بدق شديد ويدي تلجو اول مرة ادخلو ومع صوت الاذان بقيت برجف واصابعي ورجولي نملو كدا .. حسيت بي رهبة ما عادية .. دخلته وقفت مع النسوان الواقفات ولما الصلاة بدت كنت مخنوقة شديد .. الركعات الاولي مشت وصوت التلاوة بقيت ببكي واني ما قادرة اواصل الصلاة .. قطعتها وطلعت بره وجيت راجعة البيت ودخلته جوه وبقيت ببكي ما عارفة مالي..

يتبع....

#بيت_الزار
بقلم: فاطمة قسم الله

الجزء 30

الاسبوع الاول كان نفس الشي ما قدرت اتم الصلاة وفي البيت اصلي اوقات والباقي ما بصلي .. يوم كنت قاعدة جا ابوي لقاني قال لي قومي اقري قران .. ما عرفت اقول ليه شنو اها وقعد كمان ..حالتي كنت عايزة امشيه ساي لكن قبضني .. مشيت اتوضيت وجبت المصحف لبست التوب وفتحت اول سورة قريت الفاتحة .. وبعدها كانت البقرا بقيت اقرا فيها وانا بقرا بعد شوية حسيت بي غمة وضيق صدر ماسكني شديد ونفس ما قادرة اتنفسو .. قفلت المصحف وطلعته اشم لي هوا بره .. استمرت الايام ومشت ورمضان قرب ينتهي وانا في نفس الحال حسيت اني ملخبطه شديد وبقيت بحلم بي احلام مزعجة شي ثعابين وعقارب وحاجات مخيفة .. مرات بقوم بصرخ وببكي من النوم .. وكل ما امشي الجامع بالقوة حتي اقدر اكمل صلاة التراويح ومرات ما اقدر بطلع .. كل يوم نفس الشي في رمضان بحصل وبالليل بتكون لمة الجبنة والونسة وبنلعب صفرجت بالمصاص بتاع البلح .. ومرات بنلعب لعبة الحفرة بنجيب حجارة صغار او اللالوب وبنحفر حفرة وبنختهم فيها وبكون في حجر كبير بنشيلو في يدنا وبنبدا نطلع بيه الحجارة الصغار دي وكل مرة ننقص واحد بس بي شرط ما نغلط ويقع مننا ولا بكون دور واحدة تانية وكدا.. الاسبوع الاخير من رمضان اتغيرت كتير بقيت ما حابة الصعود والودع وحكاية الظار دي وكم مرة بمشي الخلوة بالصباح الشيخة بتدي دروس بتتكلم عن المحرمات والكباير و بتجيب زكرتهم اتعلمت حاجات كتيرة عن ديني ما كنت عارفاها واهم شي مشيت للشيخة علمتني كيف اعرف اصلي وحكت لي عن السيرة النبوية وعن الصحابة والانبياء وزوجات الرسول .. كنت فرحانة شديد اني عرفت الحاجات دي .. وحبيت رمضان واتمنيتو ما يخلص وينتهي لاني بديت ارتاح فيه وقلبي بقي صافي .. بس بقيت بصدع اليوم كلو قلت امكن من الصيام لكن بعد افطر واشرب الجبنة واخت الصعود برضو ما بروح بقي .. وبجيني وجع ضهر شديد ما عارفة من شنو بغلبني مرات اقوم من السرير .. ووجع بطن يمسكني نص النهار وبالليل واستفراغ بدون سبب .. ولاحظت لي شعري بقي يتساقط شديد .. ورجولي ديل بتمسكني فيهم سخانة لما اقوم من النوم .. اول اتجاهلت الموضوع بس تاني الاعراض بدت تذيد لي .. بقيت ابكي شالوني ودوني المركز الصحي وفحص لي قال ما عندي حاجة .. عمي قال لي ابوي امكن من الصيام وشغل البيت ساي .. رجعوني البيت فطروني اول ابيت افطر بس فطروني بالغصب .. ابوي ساقني للشيخة بتاعت الجامع وحكي ليها الحاصل لي .. دخلتني في الخلوة وقعدت تتكلم معاي البحصل لي شنو .. قلت ليها ما عارفة في النوم بشوف اشكال بتخوف وكلاب وثعابين بتكون جارية وراي علي طول .. المهم الشيخة نادت ابوي وقالت لي ما تخاف بقرا ليها قرآن كل يوم بس جيبا لي وان شاءالله بتبقي كويسة ما عندها حاجة بس تواصل معاي في القران وتقراه في البيت .. بعد طلعنا منها ابوي مسكني من يدي وقال لي اوعي تجيبي سيرة لي زول لا حريرة ولا سعدية ولا بنات عمك اني جبتك لي شيخة قرآن .. قلت ليه حاضر .. جيت داخلة البيت لقيتم قاعدين في الجبنة حريرة قالت لي مشيتي وين .. قلت ليها كنت مع اخواني التؤم .. دخلته جوه طلعته التلفون واتزكرت ماما لي ما قاعدة تتصل بي .. اتصلت عليها لقيت الرقم مغلق .. قلت امكن تلفونا مخلص شحن برجع ليها تاني .. عدي اليوم وخلاص بعد كدا العيد دخلنا في تجهيزاتو .. النسوان مافي واحدة بتمشي السوق .. اولاد اعمامي بجو من الخرطوم وبجيبو ليهم الكسوة انتي وحظك شينة تشيليها وتسكتي ما بتفتحي خشمك .. عشان كدا البشتنة حاصلة في الهدوم .. الحمدلله اخواني زوقهم كان حلو جابو لي فساتين عجبتني .. خبزنا الخبايز وعملنا العروكات والادخنت والشالت جسما والاتحننت والرسمت .. جا العيد ومن بالليل كنسنا الحيشان ونضفنا .. الصباح فرشنا الملايات وبخرنا البيت .. الله اكبر الله اكبر لا اله الا الله الله اكبر الله اكبر ولله الحمد .. حااااجة كدا تشرح النفس ياالله حسيت بي اني عملت انجاز كبييير صمته وهسي فطرته وصليت مبسووووطة بالتغيير دا ..دخلنا لبسنا الجديد واتمكيجته ومكيجت بنات اعمامي كلهم بي العروس .. ملينا الشيالات بالحلاوة والخبايز وملينا جكوك العصير .. وبقينا منتظرين الناس يجو من صلاة العيد .. في القري بجوك داخلين اول يباركو ليك من الصلاة طوالي ما زي لما كنت بره ماف زول بجيك .. الناس دخلو علينا والتباريك كل سنة وانتو طيبين وعيدكم مبارك .. وان شاءالله السنة الجاية في بيتك وبي اولادك .. كان يوم جميييل بي لمة الناس والبخور والريحة الحلوة احساس الاهل حواليك .. دخلته جوه طلعته التلفون اتصلت بي ماما برضو مقفول .. اتصلت بي خالو رد علي بارك لي وباركت ليه وسألني من حالي واخواني .. شاكلتو قلت ليه لي يا خالو ما بتسأل مننا ولا ماما ما بتتصل بي .. تلفونا مقفول لشنو .. سكت اول ما رد علي .. خوفني قلت ليه يا خالو في شنو ماما مالا في حاجة حصلت ليها ولا الحصل شنو .. قال لي امك سافرت والله ابوظبي ليها قريب اسبوعين وبتعرس هناك الشه

ر الجاي .. ما عارفة ما قدرت ارد عليه اتصدمته شديد من ماما ولا حتي كلفت نفسها تسأل عني او تجي تسوقني وانا الكنت مأملة فيها ومنتظرة الايام تفوت عشان اجيها بعد انتهي من حريرة .. قفلت التلفون ولا رديت علي خالو .. هم اصلا ما شغالين بينا مع انهم مرتاحين بس ولا كأنو نحن اولاد أختهم .. قشيت دموعي وقت حسيت بي حركة وراي اتلفته لقيتو اخوي الكبير .. قال لي وين انتي جيت ابارك ليك العيد ما مشتاقة لي اخوانك بعد الغيبة دي .. ما قدرت امسك نفسي جيت جارية حضنتو وبقيت ابكي لما اتشرقته ووشي وعيوني حمرو .. زحاني منو وعاين لي بي خلعة قال لي مالك في شنو الزعلك منو او في زول عمل ليك حاجة .. هزيت ليه راسي .. قال لي رهام مالك قولي لي في شنو .. قلت ليه ماما .. اتخلع اكتر وقال لي مالا في شي حصل ليها انطقي .. قلت ليه سافرت وحا تعرس في الايام الجاية دي .. بقي بعاين لي ووشو اتقلب بقي زعلان قال لي عرفتي من وين .. حكيت ليه قصة التلفون واني اتصلت بي خالي هو الحكي لي .. قال لي ما تبكي ويلا غسلي وشك وتعالي طالعة وما تحكي لي زول انتي فاهمة .. قلت ليه حاضر عملت القال عليه وصلحت مكياجي وطلعته قعدته .. ختينا الفطور فطرنا وبقيت ساكنة ممحنة بعاين ليهم بس بتونسو وبحكو .. كان بالي في حتة تانية ..

جات بت مرة عمي المطلقة دي ما قاعدة احبها ولا هي بتحبني .. قالت لينا عندي ليكم خبر مفاجأة .. حريرة قالت ليها اها بشرينا .. قالت ليهم جاني عريس .. سعدية ايوووي يوووي ساجورك فكه اخيرا منو دا .. عاينت لي وقالت ليها عمر ود عمي علي .. ايوووووي يوووووي يوووووي حريرة فكت الزغاريد ونسوان عمي معاها .. وانا ولا اتكلمته بس قمته مادة بوزي مترين وصارة وطلعته علي الديوان بقيت بنادي في اخوي عمر عمر عمر .. جاني طالع بتكوركي مالك في ضيوف انا مش قلت ليك ما تجي بي الديوان هنا .. قلت ليه انت صحي خطبته بت عمي المطلقة دي .. قال لي اي في شنو هسي .. قلت ليه ابوي عارف وموافق ؟ قال لي اي وقرينا الفاتحة هسي وعمي موافق .. قلت ليه انا ما موافقة دي اكبر منك وعندها بنات قدري عديل كيف يعني عايز تعرسا .. قال لي ياخ انتي مالك انا بحبها وما عندي مانع وما اسمعك بتقولي الكلام دا تاني انتي فاهمة .. صريت وشي وقلت ليه ما فاهمة وانا ما موافقة وما بتعرسها وجيت داخلة جوه ودمي فاير بغلي..

يتبع....

#بيت_الزار
بقلم: فاطمة قسم الله

الجزء 31

بمشي للشيخة زي ما قالت لي..

كنت بمشي يومي تاني بقيت بمشي يوم ورا يوم ..متابعة معاها وبقيت كويسة الحمدلله الاحلام المزعجة ديك بقت ما بتجيني والتزمت اقرا سورة البقرة وبقرا قران يومي ومواصلة في صلاتي .. بديت ازح من حريرة ومن قعدات الودع حبة حبة .. الظار بتجبرني ليه ما علي كيفي .. كنت بتخنق منو ورجعت اشم ريحة البخور العفنة تاني لما اكون فيه قلت اصبر لما اتم اتفاقي معاها .. عمر اخوي الكبير كلم ابوي بإنو ماما حا تعرس طبعا جاط وكورك وماشاءالله اعمامي ونسوانهم لقوها موضوع ما خلو ليها شي نبزوها وجابو سيرتا بالشين .. ما قدرت ارد عليهم ولا جاوبته بس قمته دخلته جوه .. رجعت معاملتم لي زي اول كعبة نضافة وخدمة وكواريك زهجت وكرهت البيت .. وتعبته اكتر لما اخوي عقد علي بت عمي المطلقة دي .. ابيت اطلع احضر معاهم ولا عملت شي ولا باركت ليه كنت زعلانة منو .. ساقا بي بناتا وسمعت اشتري ليه بيت في الخرطوم .. اتخيلو يشتري ليها بيت ويقعد بناتا معاها وانا اختو ولا اشتغل بي ولا جا ودعني زاتو .. قبل اصحي من الصدمة دي جاتني صدمة اقوي منها تاني ابوي عقد علي اخت حريرة بت أمها كنت عايزة اتشل .. وفي دا مشي سكن معاهم في القري التانية ابعد من قريتنا دي بي ساعة كدا عشان بيتهم فاضي .. اسبوعين بقيت ببكي وصمته من الاكل .. ابيت امشي معاه .. يعني من حريرة لي أختها ياربي انا عملت شنو في حياتي عشان دا يحصل لي .. اخوي الكبير واخواني التانين اخبارهم اتقطعت مني .. بقو ما بجو الحلة .. في يوم ونحن راقدين بره جا عمي مخلوع بنادي فيني يا رهام يارهام .. قلت ليه في شنو يا عمي .. قال لي اخونك التؤم معاك .. قلت ليه لالا من قبيل ما شفتهم .. بقي يقول لا اله الا الله فاتو وين .. اتخلعنا كلنا وقمنا نفتش عليهم .. فتشنا البيت دا ما خلينا جحر فيه تحت السراير وجوه الدواليب والتكل بي هناك والزريبة بتاعت البقر .. فتشو الحلة دي كلها بيت بيت الناس طلعت تدور عليهم شايلين البطاريات والفوانيس بكوركو وبنادو عليهم .. بقيت ابكي لما غلبني امشي جاني هبوط وقعته شالوني جابوني المركز ركبو لي درب .. ببكي وبقول ياحليلكم يا اخواني الليلة مشيتو وين .. جيبو لي اخواني انا عايزة اخواني .. جيبو لي ماما وبابا .. و اصرخ جاتني هستريا وبكورك وابكي .. ادوني حقنة تاني نمته ما صحيت الا الصباح .. فتحته عيوني ياالله كانو متورمات قمته مهجومة من السرير لقيت ابوي قاعد واخواني الكبار ما عارفاهم جو بتين .. قلت ليهم لقيتوهم .. ما ردو علي .. قعدته ابكي واكورك تاني وحسي راح بقي اجش اجش ما قادرة اتكلم .. ابوي ما استحمل بكاي قام طلع .. نادو لي المساعد الطبي .. اداني حقنة مهدئة تاني .. اعمامي بقو يقولو لي استغفري يابتي بتلقو ان شاءالله بس انتي ادعي .. تلاتة يوم نحن لا شفنا نوم ولا اكل ولا راحة حايمين يفتشو في اخواني .. كنت راقدة جوه وشايلة المصحف بقرا فيه .. سمعت صوت الكواريك والبكي والصريخ والليلة وووووب ووووب .. جيت طالعة جارية لقيت ابوي اعمامي متكلنو وهو ما قادر يقيف علي حيلو ويقولو ليه استغفر يا علي قول استغفر الله قضاء وقدر .. جيت جارية اكورك ومنططه عيوني واتخلعت بقيت اصرخ في شنو في شنو الحصل شنو اخواني مالم يا عمي قول لي .. قال لي يابتي مش انتي مؤمن بالله الله اخد امانتو وربنا يصبركم .. قلت ليه اخد امانتو كيف يعني .. انت بتقول في شنو يا عمي .. اخواني وين .. اخوي الكبير قعد يبكي وقال لي لقوهم غرقانين في الخزان .. كأنو نزلت فيني صاقعة الساعة ديك اي شي شفتو طشاش طشاش صوتي اتخنق والارض بقت لافة بي .. وقعت علي الارض وبقيت اشيل في التراب واكب فيني وببكي وبصرخ وبقول ووووب علي وااااي انا من اخواني الليلة فقدتهم .. اخواني يا ابوي ما بنشوفهم تاني .. ابوي مسكني وبقي يبكي معاي .. ساقوني بالقوة زحوني منو ودخلوني جوه .. كل ما اتزكرهم بقعد ابكي واصرخ واجري بره اتدردق في الواطا جيبو لي اخواني الليلة اخواني ماتو الليلة احييي انا الببرد قلبي شنو من اخواني .. شيخة الخلوة جات علي قومتني ومسكتني من يدي دخلتني جوه وبقت تتكلم معاي كلامها ريحني شديد وطمني وبدون احس لقيت روحي رقدته في حضنها وبقيت ببكي .. بقت تقرا لي في قرآن وتستغفر وتسبح لي .. جات حريرة وانا عارفاها ما بتحبها قومتني منها وساقتني دخلتني الغرفة جوه .. قعدته اسبح بي يدي واستغفر وادعي ليهم بالرحمة والمغفرة وقلبي موجوع شديد كان زي بطعنو فيني بي سكاكين من جوه .. ابوي تعب شديد ومرض مرض حار لما من السرير بقي ما بقدر يقوم .. دخلته اعمل ليه عصير وجيت طالعة اسمع ليك نسوان عمي ومرة ابوي شمتانين فينا .. قالت ليها البركة يستاهلو البحصل فيهم ونفسي اشوف المرا الشايفة حالا ديك لما الخبر يصل ليها اشوفا تاني بترفع نخرتا دي وين ياها الا تنزلا في التراب دا مصيرا ليه .. قالت ليها هسي الرمة دا عايز يتكسر لي هنا دا كلو منك يا حريرة عرستي لي وهسي شكلو حا يلحق

اولادو واتحبس في صمة خشمي ساي .. قالت ليها تتحبسي شنو كفاية لاميك ليك عشرة سنوات مافي زول عبرك .. بخرة بخرتين يقوم زي الطلقة .. زي ما عرستو ليك بيهم بقومو ليك بيهن .. اتلحلحي انتي كمان وجيبي ليك من ولدو دا وليد باقي ما فاضية ليك كل يوم اديك في البخرات والمحايات تثبتيه بيهن .. قالت ليها واختو الفقرية دي شايفاها بقت ماسكة مع شيخة الجامع وعثمان خبرو شنو معاها .. سعدية قالت ليها المطوفش دا داير ليه قرصة اضان الا اصبري ليها كشحة بتجيب راسا بكرا دي بتجي جارية تحت رجليه .. رجعته ورا طقشته الصينية عملت كش .. حريرة قالت مني .. السرة دي انتي .. اتسحبته براحة ودموعي في عيني من الكلام السمعتو دا وقلت ليهم حسبي الله عليكم الله لا وراكم يوم حلو زي ما عملتو فينا .. جيت داخلة لي ابوي اديتو العصير قال لي منو .. قلت ليه ابوي دي انا رهام قوم اشرب العصير .. شرب ورقد تاني .. بقيت اتكلم معاه بس كل مرة يقول لي انتي منو .. قلت ليه ابوي مالك انت بتنسي ولا شنو .. قال لي لالا .. ما كان كويس نهائي .. طلعته ببكي بس جيت ماشة الديوان لاقاني عمي الكبير قال لي ماشة وين .. قلت ليه لي اخوي .. نهرني وقال لي ارجعي خشي لي جوه برا قلت ادب النهار كلو طالعة بره الشارع وتاني اشوفك تمرقي لي بره كان الله يحلك مني أدخلي .. دخلته الغرفة وقعدته ابكي ابكي لما دموعي حسيتا نشفت .. تاني يوم اخوي ساق مرتو ورجع واخواني رجعو معاه .. وابوي ساقو عمي مع مرتو ودوه .. بقيت براي وحسيت بأني مكسورة ومافي زول يحميني منهم .. رجعنا تاني زي ما كان وحريرة دورت الظار وغصبا عني بعملو معاها .. عادي نمشي للشيوخ نقعد معاهم شهر وشهرين نخدم تحتهم .. وبعد اتعدلته وبقيت بصلي وبقرا قرآن رجعت تاني رهام الاولي .. واتسببت للشيخة طردوها من الحلة قالو بتقوي البنات عليهم وانا عارفة دا كلو من راس حريرة..

يتبع....

#بيت_الزار
بقلم: فاطمة قسم الله

الجزء 32

عارفين من كترت ما بقيت مدمنة للظار والشيوخ يوم قاعدة لقيت اني بقي عمري 21 سنة يعني لي في القرية خمسة سنوات شفتو السنين دي بتجري كيف من دون الزول يحس بيها .. ضيعت عمري في اللاشي .. بقيت اليد اليمين لي حريرة ومرات بقوم بي حفلة الظار براي كلها بعمل حفلات ظار خاصة وعامة وكمان بقيت برمي الودع وكتير انا وحريرة والسرة بنسافر القري التانية عشان نرمي الودع ونشيل عليه قروش .. اخبار اخواني انقطعت نهائي بقو ما بجو القرية .. وابوي بقي درويش من اخواني التؤم ماتو .. عارفين يعني شنو درويش ؟ يعني زول الله بقي في اي مكان بمشي وبقعد وبنوم ما جايب للدنيا خبر .. يدخل اي حتة عشان ياكل او يشرب .. اول اعمامي كانو بتابعوه وبجيبوه تاني بقو ما شغالين بيه .. ومرتو الفقر دي ولا اشتغلت بالفارقة .. وانا ما في يدي حاجة بس بدعي انو الله يحفظو ويحميه .. اخوي عمر الكبير سمعت من اعمامي مشي كوستي وبقي تاجر هناك وساق معاه العقربة مرتو دي .. اما اخواني التانين ديلك ما عارفاهم ميتين ولا حيين .. ماما من يوم مشت ما اظنها جات ولا عارفة اولادا ماتو ولا عارفة عننا شي .. بعد مرض ابوي سرقته من حريرة قروش اتسحبته امشي الدكان اشوف لي رصيد اتصل علي خالي احكي ليه يكلم ماما .. ما كنت عارفة انو عثمان شافني شايلة التلفون مشي بي وراي من دون احس بيه وجا جاريني من شعري ضربني وكفتني وجو تمو الباقي في البيت .. قلعو مني الموبايل .. وبقيت زي الخدامة في البيت ملطشة ليهم .. ما قادرة استحمل الزل والاهانة منهم دا كلو عشان بكرهو ماما .. ضيعونا وضيعو حياتنا الحلوة بقت لي خيال خيال زي الحلم وفي لحظة صحيت منو .. وآخر الاتوصلو ليه جو اتفقو من وراي دايرين يعرسوني لي عثمان قالو خلاص كبرته ومافي زول بعرسني غير ود عمي يغتي قدحو .. سمعت الكلام بالصدفة وقلت انا ما خسرانة شي تاني وجيت واجهت اعمامي وهو قاعد قلت ليهم انا تميت اكتر من ١٨ سنة يعني ولي لي نفسي براي وانا ما بعرس عثمان كان تدفنوني وما عايزة اعرس زاتي .. اعمامي جاطو فيني وعمو ابراهيم لحقني كف بي يدو اتزكرته ماما ورديت ليه الكف .. جا عثمان العامل فيها راجل ويتراجل علي مرا ضربني لما نزفته .. قربته اموت واتمنيت اني اموت في اللحظة ديك .. كتمو علي القصة وجابو المساعد الطبي في البيت كان كل يوم بجي يغير لي الجرح ويمشي .. حريرة قالت ليهم ديل الاسياد ضروها لانو بقت ما بتلبي طلباتهم وبقت معاكساهم وابت تسمع كلامي .. خلوها لي بسوقا لي فكي نقعد التلاتة شهور واجيبا ليك ست بيت .. كنت مغلوبة علي امري ودمعتي في عيني .. شلنا هدومنا وجينا الغرب لي فكي من الفكية قالو معروف بعالج .. وانا شديدة ما عندي شي بس حسد حريرة وسعدية الخلاهم عايزين يدمروني بأي طريقة .. كفاية شتتو ناس بيتنا ودمرو حياتنا .. ولسه عايزة تضرني بعد العملتو فيني .. سافرنا والمشوار كان بعيد خلاص جينا للغرب .. جينا لي سيد الريحة الفتح خشم البقرة زي ما قالت حريرة أصلا بتأمن بيهم اكتر من الله .. قعدنا اسبوع ما قدرنا ندخل من كترت الناس الشفناهم ديل كل زول جاي يشوف نفسو .. المشلول العايز يمشي .. والعيانة .. والمجنون المربطينو بره ومخلينو في الشمس .. البت العايزة تعرس ودي انطبقت فيني حريرة جايباني عشان قالت راكبني جن عاشق ما بخليني ادور العرس (بسم الله الرحمن الرحيم) وفي المطلقة العايزة تادب طليقا .. والعايزة تضر جارتا عشان قالت فيها كلام .. والدايرة تربط راجلا عشان ما يعرس فيها .. والخاته عينا في راجل ودايرة تعرسو .. بقينا منتظرين دورنا بنوم في البروش وفي الارض ساي لما ما نلقي لينا مكان .. ناكل في الكسرة بي البليلة وباكل فيها مجبورة من الجوع .. نشرب في موية الحفير ما عندهم موية .. بقينا زي الحمير والغنم واحد بنشرب معاهم .. انا بقرف وبستفرغها وبضطر اشربا غصبا عني .. قالو دا علاج .. وحريرة تشيل في الطين من جمب الحفير وغصبا عني اكلو معاها قالت كان الشي الفيني دا يفك مني .. بعد شهر من القعاد حتي قدرنا ندخل عند الفكي .. من جينا داخلين كانت الواطا شوية مضلمة وريحة البخور بس طلعنا شباشبنا ودخلنا حفيانين .. سلمنا علي يدو ورجلو وقعدنا في الواطا .. قال لي حريرة بي إسما البنية مالا يا حريرة .. قالت ليه خير يا شيخنا خير علا جيناك للعرس البت ما عايزة تعرس وانا قلت راكبا جن عاشق ولا شيتن ما معروف واحدة كتبتا ولا شربتا حاجة .. جيناك من بعيد خلاث كان تشوفلنا الخيرة بتاعتا .. بقيت من جواي بتعوز وخايفة .. رمي البخور .. شال ليه ورقة كدا وبقي يعمل ليه في رموز ما فهمت منها شي ولفاها وقال ليها بخريها بيها .. وطلع ليه باقة فيها حاجة لونا بنية كدا قال ليها وتشرب من دي .. وارجعو لي تاني .. طلعنا منو وزي ما قال ليها الفكي بخرة صباح وبخرة مساء وبالليل بشرب من الموية اللونا كيف كيف دي .. بدت ترجع لي الهلاويس ديك تاني الثعابين السودا النازل من سنونا دم والعقارب والكلام والعب الاسود

التخين الما عندو راس دا .. بقوم اصرخ وابكي بس .. كرهتا حياتي شديد والمتاهة الدخلت فيها وما عايزة تنتهي دي .. نفسياتي بقت كعبة كعبة ساكتة وسرحانة علي طول باكل شوية وبنوم ولا اسرح تاني .. عدت التلاتة شهور ونحن داخلين وطالعين عند الفكي .. نادونا للجلسة الاخيرة بعد خلصته البخرات والمحاية دخلنا قال لي حريرة اني عندي عارض بمنعني من العرس والعلاج بسيط ما محتاج قعاد قال ليها تاكل الظهرة (الظهرة البظهرو بيها الهدوم البيض او الجلاليب) .. من دون انتبه لي روحي قلت ليه ظهرة شنو الباكلا انت عايز تقتلني .. انتي يا حريرة صج ضربتني وقرصتني في يدي وبقت تتعزر للفكي اصلها صغيرة وعايشة بره السودان ما بتعرف حاجة اعفي ليها اعفي ليها وجرت سلمت علي يدو ورجليه .. قالت ليه اها وبتعمل شنو .. قال ليها بتطرد ليها الجان الساكنا والعارض الفيها .. قلت ليها ما باكل اي ظهرة ولا حاجة ما جاهلة انا .. .. قالت ليه اها يا يابا الشيخ البت عندية وما بتسمع الكلام ودايرنا تعرس القدرا بقن بي اولادن هسع .. قال ليها تاني مافي علاج الا الضرب بي سوط العنج عشان اطلع الجن الساكن فيها دا .. اتخلعته طوالي وشفته السوط معلق بي وراه بقيت منططه عيوني جابت ليها ضرب .. قلت ليه خلاص خلاص باكل الظهرة احسن ..حريرة طلعت القروش وغمتتها ليه تحت مخدتو غايتو شفتهم كتاااار .. من جواي قلت ليها الله ياخدك وينتقم منك يارب .. المهم رجعنا جينا تاني القرية الفقر دي بقيت ما قادرة اسكن فيها قدر ما اشوفا بتزكر اخواني الماتو وابوي ونفسيتي بتتعب زيادة لما بقيت ضعييفة ومسودة .. بقيت في موضوع كل يوم بخرات والسرة تسففني الظهرة بالغصب .. طعمها وريحتها كعببة زي حجارة البطارية البكونو نافدات ديلك وبطلعو مادة سودا كدا .. اول كنت بمسكا في خشمي بس بقت تفتحو لي عشان تشوفني لو ببلعا .. ووقت اكلها اليوم كلو بطني بتكون واجعاني شديد لما اتلولو منها وادردق في الارض .. قالت دا الجن الراكب فيني دا ما عايز يطلع .. بقيت كل يوم بستفرغ شي اسوود وما بقدر اكل كويس .. لما رقدته السرير ما بقدر اقوم ولا افتح عيوني بس بهضرب بي كوابيس وناس اشوفهم شايلين جنازة وشايلين حبالة قالو دايرين يشيلوني معاهم بقوم اصرخ واكورك وبقعد ارجف .. مافي زول بشتغل بي كتير غير يجيبو البخور والبخرات يبخروني برتاح بعدها وبنوم .. قمته يوم من الصباح وسامعة جوطه ودخلة وطلعة ماياها في البيت .. عندي حركة اني اتصنت براحة في الكلام البقولوه .. عرفته منهم انهم بجهزو لي عقدي ل عثمان وماعايزين يكلموني .. عملت روحي رايحة وجيت طالعة عليهم قلت ليهم الليلة مالكم جايطين قالو لي بت عمك صالحة جاها عريس وحددو العرس بكرا ان شاءالله بعد صلاة الجمعة .. هيي قلت ليهم مبروووك النمشي ابارك ليها ربنا يتم ليها علي الخير .. شفتو الخسة والحسد والحقد وصل بيهم وين .. قلته بعمل ليهم زي ما بعملو وكان اصدمهم صدمة عمرهم ..

يتبع...

#بيت_الزار
بقلم: فاطمة قسم الله

الجزء 33

قعدته افكر يا رهام تعملي شنو مستحيل انا اسكت واخليهم يعملو العايزنو فيني انا رهام علي الكنت مفتحة وما بخلي حقي بسهولة يجو العجايز ديل ويلعبن بي .. وصلته لي فكرة مجنونة شديد وبقيت ادعي ياالله ياربي كون معاي لو مسكوني فيها ياهو بقتلوني وبدفنوني حية .. كنت خايفة شديد شلته طرحتي وبي ورا البيت براحة اتسحبته ونطيت الحيطة ما بقدر اطلع بشوفوني وهم قاعدين تحت شجرة النيم .. جيت لي سيد الدكان قلت ليه سلام عليكم .. قال لي بت علي الليلة زارتني البركة و العافية .. قلت ليه يا عمو انا عايزة اتكلم تلفون وطلعته السلسل العندي قلت ليه دا دهب والله العظيم هاك ليه بس خليني اكلم خالي اشتقت ليه وطولت منو وقعدت ابكي .. قال لي يابتي كان بي يدي ما اخليك في بيت الظار الفقر دا الله يغتس حجرهم ما عاجبنا لكن نسوي شنو الاقوي منك بدوسك تحت رجليه وعندنا هنا الجهل غالب.. يابتي ابوك راجلا ما هين بس وقعلو في ناس ما بخافو الله .. وياهو دمرولو حياتو .. الله يستر عليك .. هاك التلفون انضمي وعلي الطلاق ما بشيل منك شي خير ابوك كان واصلنا وقت الضيقة ما برد ليهو زول .. شلت التلفون واتصلته بي خالي حكيت ليه القدرت عليه وانو بكرا عايزين يعقدو لي علي عثمان وانا ما عايزاه ولا عايزة اقعد تاني في القرية .. قلت ليه تعال لي الساعة واحدة بالليل وانا بنتظرك بره جمب الترعة عليك الله يا خالو ما تنساني انا بقيت ما قادرة استحمل اكتر .. اتفقت معاه علي الكلام ورجعت التلفون لي عمو سيد الدكان وقلت ليه ادعو لي معاك وبس ما تكلم زول اني جيتك هنا لانو ما بخلوني وانا طلعت بالدس منهم .. قال لي الله يسهل طريقك يابتي ويخارجك من البيت الهم دا .. جيت راجعة واتزكرته اول ما جيت اني اتعاملت معاه كعب وهسي هو بقي لي سبب وساعدني الله يغفر لي حقو ويساعدو قدر ما ساعدني .. ركبته الحيطة تاني وبقيت اردد في حسبي الله سيؤتينا الله من فضله انا الي الله راغبون علمتني ليها شيخة الخلوة قالت لي بتسهل امرك .. وبقرا في يس وجعلنا من بين ايديهم سدا ومن خلفهم سدا .. لما دخلته جوه الغرفة قلت ياالله ما يكون زول جا داخل هنا وما لقاني .. اليوم كلو كنت خايفة وشغالة استغفر واردد في الدعاء دا وربنا يسهلا لي اطلع دون زول يحس بي .. منتظره الليل يجي بس وانا علي اعصابي متوترة .. ما طلعته نهائي عليهم الا وقت الاكل بس وخشمي عندي .. لما الساعة اتناشر ونص جات حسيت بي روحي عايزة اموت من الخوف وكل شوية امشي الحمام .. لقيتهم في الحوش كلهم نايمين عاينت فيهم كويس .. دخلته تاني وختيت المخدة وغتيتا بي التوب وفتحته الشباك وشلته النملي وطلعت بيه براحة بي ورا البيت .. من كترت نط الحيط بقيت خبرة فيهم .. نطيت ولفيت الطرحة في وشي ظهرت عيوني بس الجو كان بارد وانا كنت خايفة مووت .. صوت الكلاب هو هو هووو .. الحلة دي صانة تخوف والضلام في كل مكان مافي لمبة .. امشي وين انا بقيت ماشة سريع سريع وكل مرة بتلفت وراي وقلبي بعمل دق دق دق وشغالة بسم الله الرحمن الرحيم .. اعوز بالله من الشيطان الرجيم .. يارب يارب .. وقت خلاص وصلته نهاية الحلة ورا قمته جارية وجاني احساس انو في حاجة وراي حا تنط فيني تمسكني بقيت بتخيل غايتو في اشباح وحاجات زي دي .. وصوت الضفادع والجنادب يخوف زيادة .. وصلته جمب الترع وبقيت منتظره واعصابي خلاص انتهت كلو كلو ما قادرة انتظر حا يغمي علي .. يارب يارب وينك ياخالو ما تجي سريع .. لما شفته نور عربية من هناك كنت عايزة اصرخ بقيت انطط في مكاني وجريت ما انتظرته يصلني لحقتو قبلي يجيني وفتحت الباب ومع خوفي قلت ليه يا خالو امشي امشي ارجع سريع سريع حتي ولا سلمته عليه ولا عاينت ليه كويس .. بعد مشيت مسافة من القرية حتي سلمت عليه ورقدته علي كتفو اتكلم معاي قال لي رهام قولي بسم الله في شنو .. قعدته في الكرسي بقيت ببكي وقلت ليه يا خالو انت ما عارف الحصل لي شنو عندهم وهسي طلعت وما عارفين وحكيت ليه كل الحصل .. بقي مصدوم وبكي لما عرف اخواني ماتو .. قال لي رهام نحن ما عارفين بتين حصل الكلام وين ابوك واخوانك .. انا كان حاولت اتصل بيك لكن التلفون مقفول بجيني .. ولا اخوانك ما عارف اصل ليهم .. امك عايزة تتجنن عليكم .. قلت ليه لو كانت متزكرانا كانت جات ساقتني ما بغلبا ما عايزة اتزكر امي .. حكيت ليه الحصل لي ابوي شنو وانو بقي درويش ما بعرف زول .. خالو بقي استغفر واتعوز .. تاني نمته وصلنا الخرطوم الساعة سبعة صباح جابني البيت .. دخلته غرفة ماما ونمته فيها تاني ما صحيت الا بي خالو لما جا صحاني الساعة كانت اتنين بعد صلاة الجمعة .. اخدت لي حمام وفطرته وشربت عصير ورقدته في مكاني .. خالو جاني داخل طلع لي قروش قال لي قومي ارح ماشين السوق اشتري ليك هدوم والحاجات الناقصاك .. طلعنا وجينا مول الواحة اشتريت ما خليت شي ومشينا عفراء اشتريت برضو حاجات كتيرة .. قاعدة احب خالي شديد لانو حنين ما زي الباقيين ما بسألو عننا واصلا كلهم بره

السودان في اوروبا .. عدت سنة كنت مبسووووطة شديد ورجعت رهام الزمان اخبار الحلة من يوم شردته داك انقطعت مني ما عارفة عنهم حاجة.. خالو دخلني مدرسة ثانوية في الخرطوم مع اني تميت 22 .. جينا فتشنا دواليب ماما لقينا ورقنا شالو ومشي المدرسة وداه ليهم قبلوني من اولي ثانوي .. لما وصلت تالتة ثانوي ماما جات .. كنا قاعدين جرس الباب ضرب قلت لي خالو انا انا بفتح وجريت علي الباب لما فتحتو لقيتا ماما ما كان في اي رد فعل مني بس بقيت بعاين ليها .. قالت لي رهام بتي وقعدت تبكي جرتني عليها وحضتني شديد ما حسيت بي اي شي بجزبني ليها كأنها ما أمي قالت لي في شنو ما اشتقتي لي ماما حبيبتك .. لما شفته عمو راجلا ما رديت عليها دخلت جوه علي طول .. خالو جا سلم عليهم وقال ليها معليش اصلك انتي خليتيها وعمرها 16 سنة عايزاها تكون كيف معاك اصبري ليها كم يوم وبترجع ليك .. خالو حكي لي امي انو اولادا التؤم اتوفو غرقو في الخزان امي بقت تكورك ووقعت في الواطا تضرب بي يديها علي راسا سمعت صوتها جيت طالعة بقيت اكورك فيها قلت ليها انتي السبب عارفة لشنو لانك خليتينا واخترتي حياتك .. انتي دمرتينا ودمرتي اخواني وابوي لما بقيتي انانية وشفتي مصلحة نفسك عرستي وسافرتي بره وكل يوم في مكان مسافرة تتفسحي ..لا اتزكرتي بتك البقت بتاعت ظار وشيوخ ولا طريتي اولادك الكلهم ضاعو هسي ما عارفة عنهم شي .. كان علي ولدك الكبير قالو مشي كوستي وعرس بت عمي اكبر منو وبي بناتا عارفة جابتو كيف ؟ جابتو بالشيوخ والكتابات يا امي ولا اقول ليك يا ماما زي زمان .. واخواني التانين لي سنين برضو منهم ما عارفة اذا حيين ولا ميتين برضو .. وراجلك القديم طبعا بقي درويش يعني لو وقفتي قدامو ما بعرفك .. شفتي يا ماما حياتنا ادمرت كيف وكلو بي سبب في لحظة انانية منك عشان جارية ورا القروش والراحة .. بقيت ابكي واكورك وعايزة اطلع كل الجواي في العملتو فينا..

يتبع.....

#بيت_الزار
بقلم: فاطمة قسم الله

الجزء 34

بي كل بجاحة راجلا اب صلعة دا كمان رد علي قال لي يابت خلي عندك ادب انتي ما مؤدبة ولا شنو دي امك اتكلمي عديل معاها .. رديت عليه وانا بقيت ما واعية لاني اتزكرت كل الحصل لينا قلت ليه انت السبب الشتته اسرتنا اطلع بره الله ياخدك عايز مننا شنو بعد فرقت امي وابوي من بعض .. بقيت اصرخ واكورك مسكتني هستيريا ما عادية لما وقعت علي الارض مغمي علي .. شالوني جرو بي المستشفي ركبو لي درب وادوني حقنة مهدئة .. قالو دخلته في حالة صدمة عصبية .. عملو لي فحوصات كتيرة دخلته في صدمة تاني التحاليل ظهرت انو مادة سامة دخلت جسمي واتلفت كلية ولو ما ربنا ستر كانت الكلية التانية زاتا حا تتأثر وكنت حا اموت .. قلت للدكتور اني كنت باكل الظهرة بتاعت الهدوم بقي يقول لي يابتي انتي جادة لا حولا ولا قوة الا بالله انتي عايزة تنتحري لي ؟ قلت ليه يا دكتور ما عايزة انتحر وحكيت ليه قصة الفكي .. قال لي لازم نرفع فيهم قضية ونشتكي عليهم دا شروع في القتل لي نفس والله كاتب ليك عمر جديد.. عاينت لي خالي قلت ليه خالو عليك الله ما عايزة مشاكل ما عايزة اتزكرهم شوف ليك حل .. المهم اتكلم مع الدكتور وقال لينا بحترم قراركم ويوم تغيرو رايكم كلموني نبدا في الاجراءات ..بقو شغالين فيني دربات لاني لا باكل ولا بشرب بقيت كويسة بس عايشة بي كلية واحدة .. عدي كم شهر اتحسنته ورجعت تاني للمدرسة اتم قرايتي مرت سنتين حصلت 24 سنة وامتحنت سنة تالتة بي حالتي دي وجبت نسبة 59 والحمدلله اني جبتها كنت قايلة اني بسقط خالو طمني قال لي بقريك بالقروش ما تخافي.. امي اقول ليكم عليها انها رجعت مع راجلا سافرت ولا كأنو حصل شي او اني عيانة محتاجة ليها .. قعدت مع خالي هو الرباني وبقي مهتم بي انا بتو الما ولدها .. الساعة 12 بالليل قمته اشرب موية سمعته صوت رب حاجة عملت كدا علي غرفة خالو خفته قلته دا حرامي ولا شنو فتحته لمبات الهول وبقيت بنادي خالو خالو انت هنا .. الخدامة سمعت صوتي جات قلت ليها سمعت صوت شلته المزهرية وبقيت ماشة براحة وهي وراي شايلة ليها شطة في يدها وبنادي خالو خالو انت كويس .. وصلنا فتحت الباب لقينا خالو واقع في الارض واللابتوب واقع جمبو جيت جارية وبقيت برجف خالو خالو اتصلي بالاسعاف سريع .. قالت لي ما عارفاه قلت ليها شوفي النوته قمته جارية علي التلفون لقيت رقم الاسعاف اتصلت عليهم وصفته البيت وبي الخلعة رجعت تاني ختيت يدي علي مكان النبض يا خالو ما تموت ياخالو ما تموت وببكي وبرجف .. الاسعاف وصل وجريت معاها بي بجامة البيت وحفيانة ما عارفة روحي .. الساعة اربعة صباحا خالو اتوفي بي الزبحة الجاتو فجأة دي .. الله يسامحك يا خالو كم مرة بقول ليك بطل السجاير دي ما تشربا كتير.. كنت بكورك بي طول حسي ما عارفة انا وين لمتني ممرضة كتر خيرا هدتني ولبستني عباية وطرحة .. ساعدوني اولاد الحلال الصادفونا في المستشفي ما عرفته اصل لي زول من اهل امي ما بعرف عنهم شي .. واحد من الدكاترة وصفته ليه البيت رجعني شلته النوته بتاعت التلفونات بفتش فيها اتزكرت تلفون خالي مشيت جبتو لقيت رقم امي اتصلت عليها بقينا نبكي انا وهي المهم لقيت لي زول يكون جمبي في الصدمة الانا فيها دي .. لحدي نهاية اليوم كانو اهلو بدو يجو والبيت اتملا .. امي ما جات اعتزرت لي وقالت صعب تجي هسي الا بعد شهر .. بعد تم اسبوعين مشاكل الورثة بدت تظهر وكلهم حلا ليهم البيت .. لقيت مضايقات منهم وتحاريش من اولادهم .. بقيت بنوم وبقفل باب الغرفة .. مرة طلعته للبوتيك الجمبنا دا اشتري لي كريمات لقيت فيه واحدة شغالة المهم اتعارفنا قالت لي اسمها نسيبة وقلت ليها اسمي رهام بقينا نتونس ونتكلم قلت ليها بفتش لي في شغل .. قالت لي والله سيد البوتيك دا بفتش ليه لي واحدة تشتغل ليه في بوتيك فاتحو جديد .. قلت ليها عليك الله اتصلي عليه هسي اتصلت لي عليه والحمدلله بقي من نصيبي الشغل .. سنة كاملة وانا شغالة في البوتيك وبمشي وبجي في بيت خالو يوم رجعته من الشغل لقيت ناس واقفين كتار وبطلعو في العفش دخلته لقيتو اخو خالي من امو جا من امريكا قال لي بعنا البيت ويارهام يابتي اتكلمنا مع امك وحا ترسل ليك عشان تسوقك معاها والايام دي حا تقعدي مع خالتك لما جوازك وحاجاتك تجهز .. ما رديت ما خلاص اتعودت علي الصدمات دي شلت تلفوني او تلفون خالو مسكتو عندي واتصلت بي نسيبة قلت ليها جاية اقعد معاك كم يوم لما القي لي سكن .. هههههههه قعدت تضحك قالت لي يابت انا زاتي ساكنة براي طافشة من اهلي .. قلت ليها خلاص الاقيك وين قالت لي جاية البوتيك هسي افتحو انتظريني جمبو .. دخلته شلته هدومي لميتهم في شنطة وطلعته من البيت .. انتظرتها لما جات حكيت ليها الحصل معاي .. قالت لي يابت انتي مجنونة حد امو بره السودان وانتي عايزة تترزعي للهم دا .. قلت ليها انا ماماشة معاها بعد السنين دي كلها افتكرت انو ليها بت .. ما عندي اهل انا بتخليني اقعد معاك ولا امشي اشوف لي سكن براي قالت لي خلاص شنو

بهظر معاك تساعديني زاتي في الايجار بالنص .. قلت ليها موافقة .. عدت الايام واتملطشنا في الدنيا دي انا ونسيبة روحنا طلعت .. معرفتنا كانت كتييرة اشتغلنا في كوافير اتعلمت ارسم بالصبغة ونسيبة بتشيل الجسم في البيوت ومرات انا زاتي بمشي برسم في البيوت وبرمي لي النسوان الودع بس ما كنت بحب الحكاية لانو التحرش كان بحصل كتير وفي رجال نسوان لحقوني عديل وطلبو يدي للعرس غير الامور التانية.. خلينا الشغلة دي تاني لان الكوفيرات شغلها كعب وما بحترموك والفاظ كعبة بتتعلمي غصبا عنك .. اشتغلته تاني في استوديو بتاع تصوير كنت ماسكة الحسابات بس كمان خليتو سيد المحل بقي بضايقني .. واشتغلته في مكتبه كنت بطبع في الكمبيوتر وبرضو خليتا بسبب التحرش دا .. انا ما عارفة لي الناس معزباني فيها شنو لما البس ضيق واعمل مكياج حرية شخصية .. مع اني ما كنت راضية عن نفسي في الحاجة دي بس اعمل شنو الناس عايزة كدا تلبسي وتعملي الحركات دي يجو جاريين تحت كرعيك .. باكل في اللبانة وبرسم حواجبي وبتحنن وبرسم لي روحي ومرات بتدخن ولما اتونس مع زول نوع البرفع حاجب وانزل حاجب وبضحك بي صوت عالي وما بختشي من شي عادي بطلب من البعرفهم قروش وهدوم وتلفونات .. مش هم عايزين يتونسو ويضحكو يبقي الونسة ما بالمجان .. عرفته بالنت ضابط في الجمارك علاقتي بقت قوية معاه متزوج وبي اولادو كبار بقول لي والله يارهام كان ما ساي كنت حا اعرسك .. ما عايزة احبط نفسي واسألو من كلمة ما ساي دي شنو ؟ لانو عارفة الاجابة بتكون جارحة شديد .. اني ما عندي اهل وفاكة علي حل شعري ساي زي ما بقولو السودانين .. كتر خيرو برضو هو اللقي لينا شغل في وكالة سفر انا ونسيبة وهسي ثبتنا فيها والحمدلله حالنا بدا يتعدل من البهدلة .. جيتكم للبداية ودي قصتي بس لسه مع حكاية الشيوخ عشان اعرس ..كتار ما بريحوك من الاسئلة هي بعد السماحة دي مالك ما عرستي لي هسي ياهو الا كاتبنك امشي لي شيخ فلان وعلان قالو بعالج والله قبل تتمي شهر تعرسي ولسه قاعدة اها ما عرسته.. مشينا لي كم شيخ لاني بحلم بي احلام وكوبيس مزعجة لي درجة بكون دايرة اموت ما بقدر اتنفس ولوني دا ببقي اسوود فحم بس .. تابعت علاج مع شيخ طلع لي كفن اي كفن عديل قال لي ملوثنك انتي لا تعرسي لا تلدي لا تعرفي روحك بس تكوني لافة كدا .. وانا عرفته العمل لي كدا منو أكيد ناس حريرة وسعدية واعمامي .. عارفة اني حا ابقي كدا بس كمان املي في الله كبير انو مهما يحصل في الدنيا دي الله بياخد لي حقي .. طلعته بي أجمل صحبة عوضتني عن كل حاجة كعبة .. اختي وحبيبتي نسيبة الله ما يحرمنا من بعض بنفرق علي روحنا وبنطلع المنتزهات وبنمشي المولات ومدلعين روحنا .. بقيت بصلي وبقرا قرآن والحمدلله .. وعايشة حياتي مبسوطة كدا ماف زول بتحكم فيني .. صاح فاقدة لمة الاسرة .. لكن بكرا لما اعرس ان شاءالله بجيب اولاد كتار واعمل احلا اسرة وبيت .. اتحكرنا انا ونسيبة في نص الغرفة وجبنا ليك الهيتر شغلناه ختينا فيه التنكة للجبنة ما عندنا منقد هههه زي بتاع ناس حريرة .. جبنا المبخر بتاع الكهربا وبخور راقي كدا .. وولعنا سجاراتنا .. ضحكته لي نسيبة قلت ليها اقيفي ما بتفوت علي قمته فتحت الدولاب طلعت كيس هزيتو لي نسيبة بي يدي .. قالت لي قولي والله .. شلت مليت يدي وكشحتو في المبخر قلت ليها دستوووور كبو البخور وقعدنا نضحك ...

#

.

قد نلتقي

مع كل الود ❤

🎀 فاطمة قسم الله .. Daisy 🎀

ممكن ترسلو تعليقاتكم ع الروايه على معرف الكاتبه في تيلجرام @fatmagasmalla

رايكم في رواية #بيت_الزار

روايات سودانية 💗
طريقك نحو حب القراءة ❤️

التفاعل ضعيف