قعد ف الكرسي المواجه المحامي طوالي وقال ليه : انت وريت زول غيري بالشرط الكتبو جدي ؟
محمود طلع منديل قماشي ومسح بيه حبات العرق الباردة وقال ليه بي تمتيم : ا ا انا ب ب بس وريت سيف
_ انا مش قلت ليك ماف اي زول يعرف ؟ مش حذرتك ولا شيطان م يعرف ؟
_ ل لكن د دا حقو يا ا استاذ م م م ميكال.
ضحك بطريقة خلت محمود ينقز ف قعدتو 😂😂😂
وفحأة ملامح وشو بدت تتغير : وانا كلمتك انو هو م يعرفو سواء حقو او غيرو.
وائل : ميكال الكلام واضح قال ليك لازم يعرفو ودا حقو.
ميكال : اسكت انت ماف زول سألك( غايتو وائل دا تقريبا اكتر زول جبهتو بتطير)
وائل هز راسو باستنكار وسكت.
ميكال وهو بعاين للمحامي : انت مرفود وماف اي تعامل مع

اك من يوم الليلة
محمود وقف بي خلعه : ن نعم ؟؟؟؟ ك كيف يعني الكلام دا ؟ انا هنا من زمن جدك كان حي هسه ببساطه حتنهي لي كل شغلي معاكم ؟
_ وجدي هسه ميت.... الله يرحمو وانا المسؤول هنا.... وكلامي واضح على م اعتقد... شكرا ليك واتفضل عشان م عندي وقت.
دنقر شال شنطتو وعاين لي وائل وبعدها طلع.
وائل وهو بيهز راسو : ميكال الحصل دا م صح.
_ عاين انا هسه قافله معاي وم عايز اي كلام معاك... سيف جا ؟
_ ميكال... استاذ محمود دا شغال هنا من زمن ابوك وجدك فدا م اسلوب ليك
_ ودا شي م بخصك.... نهائي م بخصك... هسه وريني سيف جا ؟
_ اي موجود.
مشا ناحية الكنبه الخاتي فيها جكتو...شالو وطلع.
اتوجه ناحية الطابق التحت...
ودخل لي سكرتيرة سيف الوقفت على حيلها لمن شافتو.
طوالي مشا على الباب وفتحو.
سيف كان قاعد وبيتكلم ف التلفون...
ميكال جا وقعد ف الكرسي المقابلو..... طبعا سيف حسا انو ف شي واتوتر.... وانهى مكالمتو بسرعه.... ختا سماعة التلفون وابتسم ابتسامه مصطنعه : اهلا يا ولد عمي تشرب شي ؟
_ م جيت عشان اشرب منك شي... جيت عشان اسألك سؤال واحد بس وجاوب لي على قد سؤالي.
_ اتفضل
_ انت كراجل يعني😏.... بتوري مدامك بي حاجات العائلة الشخصية والمابتهمها ف شي لي ؟؟؟؟ والمدام مشاء الله عليها... عندها قدرة خارقة على نشر الاخبار.
_ انت قاصد شنو ؟
_ محمود المحامي.... وراك بشرط جدي الاساسي عشان انا ابقى المسؤول الاول عن الشركه دي صح ؟ واللي هو اتزوج ف ظرف شهر بس وزواجي يدوم لمدة سنه وفي حالة اخليت بالشرط دا انت الحتكون مسؤول بدلي صح ؟
_اها
_ انت كلمت وجدان و وجدان كلمت نور ومشاء الله يعني انت عارف حركات النسوان 😏
سيف وهو بصلح كرفتتو بتوتر : وجدان زوجتي ومن حقها تعرف كل شي.
ميكال ضرب طرف المكتب بيدو بطريقة خلعت وائل : حقوقكم دي بعيد عني.... وانا من حقي وصية جدي م يعرف بيها كل من هب ودب.... انا امي عشه م كلمتها ولا اخواتي.... وملتزم وساكت عن النقطه دي... وحرمك المصون تجي تطلع الكلام دا ؟
_ انت مكبر الموضوع يا ميكال دا شي بسيط.
_ والله ؟ قلت لي بسيط ؟؟؟؟ ممممممممممم... صدقني يا سيف انت طول عمرك م حتتغير.... حتفضل كدا بس وانت فاهم قصدي.
_ خلاص يا ميكال انا ححاسب وجدان على العملتو.
_ هه تحاسبها 😂.... الخوف تحاسبك هي.
_ انت قصدك شنو ؟
_ ابدا م قصدي شي... ع العموم اعمل البتشوفو صح مع انو م حيفرق بي شي.... عن اذنك يااااا مدير.
طلع وخلا سيف صدرو بيغلي من كمية الغل والكراهيه البيضمرها لي ميكال.
من زمن كانو اطفال صغار...سيف قوموه على المقارنه بينو وبين ولد عمو... امو كانت دايما بتقارن بينهم وعايزة ولدها يكون احسن من ميكال بأي طريقة ودي كانت النتيجه.... الكراهيه و الحقد على ميكال.... ونرجع ونقول لي كل الاهالي عليكم الله ابعدو من المقارنات لانكم غير بتخلقو تشوه وحقد جوا اولادكم م بتعملو شي.
_________
بي هناك توتيل لبست العباية الجابوها ليها..... كانت انيقة شديد وتصميمها جميل.... لبستها واتحجب بالطرحه وطلعت مع سارة.
كانت ساكته وبتفكر في ابوها وامها... عرفت لي ميكال م وراها اسم المستشفى عشان م تمشي ليهم.... م كانت عارفة تتصرف كيف..... حتى امها م عندها تلفون عشان تضرب ليها فيه.
قطع الهدوء صوت سارة وهي بتقول : ماشاء الله صراحة مستر ميكال بيعرف يختار 😂💜.
ابتسمت وهي بتقول بصوت هادئ : تسلمي يارب.
_ يسلم غاليك يا عروسة.... يلا شوفي حوديك اول شي تشوفي فساتين الزفاف.... تختاري فستانك وبعدها نمشي نشوف باقي الحاجات.
_ طيب.
سارة وقفت بيها قدام محل بتاع زفافات نزلت وهي بتقول : ديل فساتينهم جميله شديدة بيطلبوها من لندن انا متأكدة حتلقي البيعجبك هنا.
توتيل اندهشت لمن شافت المحل من جوه عامل كيف.... من حيث الديكور والاضاءة والموظفات الفيه وتعاملهم.
بس م كان فيها الحماس حق العروسات داك.... نظراتها للفساتين كانت باهته.... وم ابدت تفاعل زي م سارة كانت متوقعه.

سارة بدت تساعد فيها واختارت ليها كم فستان..... توتيل رفضتهم بحجة انها محجبه..... سارة اعجبت بيها شديد... واجتهدت معاها ف الاختيار لحدي م لقو ليها الفستان المناسب.
سارة خلصت كل الحاجات المفروض تعملها عشان يستلمو الفستان وبعدها طلعو..... ودتها محلات تانيه للهدوم.... بقت بتطقم ليها كل لبسة بي حاجاتها كامله.... ركزت ليها على الدريسات👗 لانها محجبه.
سارة : استايلك ف البناطلين شنو ؟
_ م بلبسها.
سارة وهي بتضحك : م تخافي حاجيب ليك بناطلين تنفع مع الحجاب بتاعك..... بعدين انتي عروسة يعني دي فرصتك 😂..... اقول ليك شي.... بس انتي سيبي لي نفسك وانا حظبطك والله.
بعد م اشترت ليها الهدوم وفي حاجات طلبتها ليها.... ودتها محلات اللانجري عشان تختار..... توتيل قربت تدوخ لمن شافت الفساتين
سارة : اخليك هنا على راحتك اختاري حاجاتك العايزاها انا نص ساعه وبجيك
_ عايني.... ماف داعي.... انا اصلا يعني الهدوم دي م بلبسها.
_ كيف يع

ني م بتلبسيه😀
_ ع.... عديل... يعني انا
سارة قاطعتها وهي بتضحك : انا عارفاك خايفة ومتوترة م تخافي.... اهم شي خليك ريلاكس يلا اختاري حاجاتك مسافة اجيك 😉.
توتيل عاينت ليها لحدي م اختفت.... م كانت قادرة تفهمها انها اصلا م حتحتاج للحاجات دي ومستحيل تلبسها لي ميكال.
بقت بتتلفت واي شي درعه بالنسبة ليها اكتر من التاني...جاتها واحدة من البنات الفي محل لمن حست بيها جايطه وم عارفة تعمل شنو.
البت بي ابتسامه : مبروك ليك يا عروسة
توتيل وهي بتصلح طرحتها : الله يبارك فيك
_ حسيت بيك متوترة وم عارفة تختاري شنو.... وريني مزاجك وانا حساعدك.
_ عايني شفتي اكتر شي طويل ومحتشم ومقفل دا بيلزمني.
_ طيب طلبك عندي.
البت لفت معاها وخلتها تعزل الحاجات العلى مزاجها..... هنا توتيل حست بالراحه بعد م ختو ليها الحاجات البي ذوقها.
في اللحظات ديك سارة جات راجعه : اها خلاص اخترتي ؟
_اي 😊
_ طيب الحمدلله.... فاضل لينا اخر شي ليوم الليلة واللي هو البودي شوب والميكب.
سارة عزتتتتتتتتها بي اللوشنات والعطور والصوابين والشامبوهات ومعظمها من حاجات فكتوريا سكريت.... وجابت ليها ميكب حلو تقدر تستعملو.
بعدها رجعتها البيت واتمنت ليها يوم سعيد.
توتيل بقت بتعاين للكمية حقت الاكياس المختوته ف الكنبه.
طلعت الطرحه وفكت شعرها الجا نازل بنعومه لحد نهاية ضهرها.
شالت انفاسها بهدوء وهي بتفكر في الحياة الجديدة الحتعيشها... وهل حتقدر تستحمل للنهاية ؟
فجأة صوت بطنها البتكركب من الجوع قطع عليها تفكيرها.
ختت يدها فيها وربتت عليها قامت على جهة المطبخ شالت كباية وكبت من الكولار شربت ورجعت قعدت ف كنبتها .... كانت جعانه شديد شوفتها للاكل امبارح... لكن برضو ابت تهبش ف مطبخو او تشوف ليها شي تاكلو.
شوية كدا حست بالدموع ف عيونها.... حست بشفقه على حالها... اتذكرت بيتهم وسيدة والجيران والاهل... بالاضافة لي انو كانت مشتاقه لي امها وابوها شديد وعايزة تتطمن عليهم لكن م عارفة كيف.
_____
ماما عشه وجواهر ولجين وجويرية كانو قاعدين ف الحديقة لمن ميكال جا داخل عليهم....
كان الجو مغيم وحلو.... طلع النضارة ورماها في التربيزة وجرا كرسي وقعد معاهم.... اتجول بي نظراتو بين وشوشهم : خير قعدتكم م مطمنه.
ماما عشه : بري ماف اي شي 😁
_ مممممممممممممم
جواهر : مبروك العقد
_ الله يبارك فيك
_ واخر المستجدات شنو ؟
_ العرس بعد 3 ايام
ماما عشه : اجججججي واحنا نجهز حاجاتنا متين.
_ حاجات شنو ؟؟؟
_ العرس حيكون كدا ساي يعني مش ف حاجات حتتعمل وحفلات حتتحدد ؟
_ حتقولي لي حنه ؟
_ اها
_ حقول ليك لا
_ لي ؟
_ وريتك م عايز حنه وحاجات زي دي الزفاف وجرتك وخلاص.
_ وانت لي مقفلة علينا كدا ؟ احنا عرسك دا منتظرنو من متين 😑
_ معليش عقبال تفرحي بالبنات وتعملي ليهم العايزاهو.
جواهر : والعروس م شفناها ولا وريتنا شي عنها.
ميكال وهو بيخلف رجلو : عايزة تعرفي عنها شنو ؟( عاد مسيخا 🙂)
_ اسمها ؟ هي من وين ؟ بت ناس منو؟
_ اسمها توتيل الطيب.
_ تو شنو ؟؟؟؟
_ ت و ت ي ل
ماما عشه وهي بتلوي بوزها : من قلة الاسامي يعني غايتو محن... الجواب باين من عنوانو
جواهر بتردد : انت استعجلت يا ميكال ولسا عندك فرصة تختار واحدة كويسة وبتليق بيك.
_ انا طلبت رايك ؟؟؟ حتزوجها انا صح ؟
لجين وقفت علي حيلها ومشت عليه ضمتو من على جهة ضهرو : مبروك يا ميكال ربنا يتم ليك بالعافيه.
ختا يدو في يدها : تسلمي
جواهر بلعت الرد ف حنانها وسكتت.
ماما عشه : ولحقت تعزم الناس ؟
_ اي
وقف على حيلو وشال نضارتو : عن اذنكم انا تعبان حطلع انوم شوية.
اول م بعد منهم.

جواهر : ميكال دا م معقولة يكون سخيف كدا ياخ.
ماما عشه : احححححي انا يا مغسسسسستي.
جوري : يا جماعه come down انتو صراحه مكبرين الموضوع يعني خلاص هو عايز كدا.
لجين : اخيرا زول يقول كلام كويس.
ماما عشه : اتلهي منك ليها... انا واختكم م بنتكلم من راسنا يا غبيانات.... لمن تشوفو الاولاد معرسين بنات العوايل والناس الاكابر وانتو اخوكم جايب ليو واحدة اي كلام ساي قال شنو قال من قريه اتلقي الحرف م بتعرف تفكو.... تكون وسخانه وريحتا بهايم بهايم وجعانه بعدين بتبقى ليكم خجله.
جوري بانفعال : ooooooh god
لجين : يعني ميكال م بيعرف يختار يا ماما عشه ؟
ماما عشه : اسمعن هنا البت لمن تجي تورنها وش الككو م تتعاملو معاها نهائي والله الا نكرها القعدة والبيت ونخليها تطلق... ونشوف ليه واحدة بي مزاجنا ونعرسها ليه.
لجين وهي بترفع يدها : من هسه المسخره دي انا م معاكم فيها.
ماما عشه : انتي بالنيني قومي تقوم قيامتك اصلا م بتسمعي الكلام.
طبعا جوري راسها خفيف البقولو ليها بتعملو.... والحبوبة وجواهر منهم خوف يا ترى توتيل حيحصل ليها شنو وسط الناس الناوية ليها دي ؟
لي بكره
نهاية الحلقة الخامسه

عـٰٓشَٰـُـٰٓآقَٰـُـٰٓ آلَٰـُـٰٓرﯛ̲୭آيَٰـُـٰٓآتَٰـُـٰٓ:
#القروية_والوحش
🌸العروس السجينه
_6_
علا صوت تلفون وجدان الكانت نايمه بي عمق.... فتحت عيونها وجرت التلفون بسرعه من الكومودينه قبل م بتها تصحى وردت بصوت هامس: الو
جاها صوت نور البتبكي.
وجدان اتخلعت وقعدت بسرعه : نور بسم الله ف شنو مالك يا بت ؟
_ وجدان 😭😭😭
_ يا بت مالك في شنو ؟؟؟؟ ف زول من اهلك حصل ليه شي ؟
_ م ميكال 😭😭😭
وجدان وهي بتشيل انفاسها : لا حول ولا قوة الا بالله... يا بت خلعتيني 💔
_ خلاص يا وجدان خلاص عرس 💔... حتتهنا بيه واحده غيري 💔.
_ كدي استهدي بالله.
_ م قادرة اصدق يا وجدان والله م قادرة اصدق لي مشا عرس واحدة تانيه.....مفروض انا اكون مرتو... انا اولى بيه 😭😭😭.
وجدان بخبث : امسحي دموعك دي يا حيوانه واهدي...
اول شي ميكال اي شي طلبو منك عملتيه ليه لانك غبية فاكيد هسه حيمشي يشوف ليه واحدة تانيه.... شي جديد انتي عارفاهو بحب التغيير وبي نفسك بتقولي كل مره ف علاقة جديدة.... بعدين زواجو دا زواج عارفاهو انتي غرضو شنو.... فاكيد حيكون شاف ليه واحدة واتفق معاها وحيطلقها بعد الفتره بتاعت شرط جدو بعدين يا جميل حتى كان عرس في شي اسمو شلب.... تقلعيهو قلع منها.... م حتكون اسمح منك ولا احسن منك ف شي.... اهدي حبيبتي وامسحي دموعك دي واستكيني.... ميكال عرسو بعد 3 ايام بس.... ظبطي نفسك واقشري للعرس كانو ماف اي شي.... وبعدها مرتو دي بنتصرف معاها.
نور وهي بتشيل انفاسها : طيب.... طيب يا وجدان لكن كان شفتي قلبي موجوع كيف 💔💔💔
_ معليش استحملي الكم يوم ديل وبعدها الوجع دا حيروح... وحيبقى حقك هسه بس اهدي وخليك قوية.... انتي وين هسه ؟
_ انا ف البيت.
_ خلاص اخدي ليك نومه وارتاحي وم تفكري ف الموضوع دا كتير طيب.
_ ححاول
_ لا مش تحاولي انا عايزاك م تفكري فيو خاااالص اتفقنا ؟
_خلاص طيب
_ شاطره حبيبتي.... بضرب ليك بعدين.
_ تمام
_ يلا سلام
_ الله يسلمك.
_____
كانت قاعدة ف المصلاية حقتها وبتصلي ف صلاة العصر.... بعد م خلصت سبحت ودعت وبعدها قامت.
كانت لابسة توب هزاز وتحتو قميص جابتهم معاها من بيتهم.
طبعا م لقت ليها مصلاية فصلت ف الارضية.
بعد م خلصت صلاتها مشت بفضول ف ارجاء الشقه الواسعه البتتكون من 3 غرف ملحقة بحمامتها وصالة كبيرة ومطبخ انجليزي..... وصلت لحد البلكونه وبقت واقفة قدام بابها الزجاجي وبتعاين للشارع.
حست بصوت حاجه وراها.
قبلت بسرعه ولثواتي حست بي انو الدم هرب من عروقها ولونها شحب من شدة الخوف.... لمن شافتو واقف قدامها وشايل علبة حقت شعير ف يدو وبعاين ف العلبه كانو بيقرا محتوياتها.
قال ليها من دون م يرفع نظرو : انا لي قرابة الخمس دقايق هنا وماشاء الله م حسيتي بي.
بلعت ريقها وم قدرت تتكلم من شدة الخوف السيطر عليها.... كيف دخل من دون م تحس بيه.
رفع عيونو وقال ليها بطريقة مستفزة : شنو يا حلوة ؟ الكديسة اكلت لسانك ؟؟؟؟
_ انت كيف تدخل فجأة كدا من دون م حتى توضح انك جيت.
شرب الشعير في جرعه واحدة وطبق على العلبة بيدو لحد م بقت مطفجة : اعتقد دا بيتي انا.... يعني ادخل واطلع منو زي م عايز و وقت م عايز.
سكتت وهي بتعاين للارض بي احراج.
حست بي نظراتو الباردة المحتقره بتخترقها..... فجأة في صوت طغى على الهدوء الحصل لثواني.... صوت اتمنت الارض تنشق وتبلعها بعدو.... كان صوت كركبة بطنها البتكورك من الجوووووووع.
رفع حاجبو وهو بعاين ليها... وهي بقت بتتنحنح في محاولة منها عشان م يركز على الصوت حق عصافير بطنها.
كتف يدينو قدام صدرو : بالمناسبة ماف داعي تجوعي نفسك.... التلاجه فيها اكل.
_ انا طلبت منك اكل ؟ بعدين انا م جعانه
ضحك بمسخره :هه اي واضح م جعانه.... الاصوات الطالعه دي اكبر دليل على صدق كلامك.
صلحت لفت توبها وهي مدنقره و اتحركت من جمب البلكونه.... بس وقفت باستغراب لمن عارض ليها بجسمو.
رفعت عيونها وعاينت ليه.... بالرغم من طولها الواصل لي 170 سم.... حست بي انها ولا شي جمبو.
الزراير الاولى من قميصو كانت فاتحه وبينت طول رقبتو ولونو الاسمر الجذاب... عيونو العسلية الداكنه كانت فيها نظرات م طمنتها خالص.
رجعت لي ورا وحست انو حيلها م شايلها من شدة الخوف منو بس م بينت ليه.
ابتسم ابتسامه جانبيه هادئة لمن حسا بتأثير نظراتو فيها.
قال ليها بصوت خشن : بعترف اني م جربت البنات الهادئات والخجولات زيك بس شكلها حتكون تجربه ممتعه شديد.
حاولت تتجاوز كلماتو الجاتها زي طعنة السكين : انت بتعلن للحرب باين.... لكن ابشرك م حتربح.... انا م زي البنات الانت بتعرفهم.... وزي م قلت ليك انا بكرهك وبديت احسب للايام الحتفصلني عنك.

_ ممممممممم حلو.... بحب التحديات بالذات مع البنات... بس م شايفه انك صغيرة شديد على كلامك دا ؟
_ شايفة كلامي كبير عليك واحتمال زاتو م تقدر تستوعبو.
ضحك بصوت عالي مستفز : باين انك م ساهله زي م كنت مفتكرك.... بس شنو.... انا م بحب الزول الواثق ف نفسو اكتر من اللازم.... اعملي حسابك عشاااااان م عايز اوريك وشي التاني....

وطبعا دا حسب تعاملك.... ممكن اكون معاك الجنتل مان وممكن اكون معاك الباد مان.... فانا شايف انو تتعاملي معاي باحتراس شوية.
سكتت لمن اتذكرت ابوها وانو ف المستشفى واتمنت لو م اتفاصحت معاه عشان تخليه يوديها ليهم.
بلعت ريقها وشالت نفس طويل : انا عايزة ازور ابوي.
اصدر صوت بي خشمو : نه نه نه... ماف زيارة خليك هنا الليلة.
_ طيب حتخليني اشوفو متين ؟
_ لمن مزاجي يحكم
_ ياخ حرام عليك دا ابوي.
هز راسه باستياء : هشششش... انا براي مصدع م تعلي صوتك.
_ طيب انا اسفه... انا اشتقت ليه وعايزة اشوفو... ارجوك خليني ازورو
قالت جملتها الاخيره والدموع غرقت عيونها.
ميل راسو يمين وشمال وهو بعاين ليها وارتسمت ابتسامه سخرية صغيرة ف وشو : شكلك حلو وانتي بتترجي فيني....مشاء الله كلكم كدا... الواحدة من م ترفض ليها طلب تنزل كم دمعة تمساح لزوم التأثير بس معليش حبيبي انا م بتأثر.
دموعها نزلت لمن حست بالعجز وهي م عارفة تقنعو كيف عشان يوديها... قالت ليه بصوت مهزوز وبغيظ : انت حقير... حقير ومريض ياخ.
فجأة حست بيه مسك يدينها الاتنين ورجعها لورا ومسك فكها بيدو بسرعه رهيبة لدرجة م اداها وقت تدافع عن نفسها وتبعدو عنها.
ميكال بنظرات باردة بالرغم من ملامح الغضب الظهرت ف وشو : هي..... م تتجاوزي حدودك... عشان م اخليك تنعلي ابو اليوم الولدوك فيك.... انتي باين انك لسا م عرفتيني كويس.... انا ماف زول بيتجرأ يقول لي الكلمتين القلتيهم ديل.... تجي انتي يا شافعه ما بتسوي ولا شي تتكلمي معاي كدا ؟
مسح دمعتها الجات نازلة.
رفع ليها صباعو المسح بيه دمعتها : والله اخليك تبكي بدل الدموع دي دم.... عشان كدا روقي والزمي حدك.... مفهوم ؟
سكتت.
قال ليها بنهره : بتكلم معاك.
هزت راسها بخوف....فكاها وصلح هدومو.
ميكال : اول شي اكلي ليك شي حركات الجوع دي م بتنفع معاي... لازم تحافظي على صحتك ف السنه دي لحدي م استلم الادارة رسميا وبعدها لو عايزة تموتي نفسك موتيها في ستين... وبكره الساعه 9 حتجيك سارة عشان توديك تتصوري عشان تطلعي الجواز... وبالله البسي من الهدوم الجابتها ليك.... انا اللوكال والتياب والحاجات العجيبه دي م بتنفع معاي.
اتوجه ناحية الباب وطلع....
قعدت ف الارض ودموعها نازلة بغزارة من شدة الاهانه الحست بيها معاهو 💔.
حست انها سجينه مكسورة مظلومه💔... وهو السجان المابيرحم بتاعها.
م عرفت مرا كم من الوقت وهي قاعده ف الارض..... في النهاية استغفرت ومسحت دموعها وقامت بي ارهاق وهي بتتجاوز شعور التنميل الحست بيه سرى ف جسمها.
مشت ببطئ ناحية الحمام الدخلتو الصباح.
عاينت لي وشها ف المراية....كان لونها شااااحب بالاضافه للحمرة الطغت على خدودها وانفها من شدة البكاء.
غسلت وشها وجففتو بطرف توبها وطلعت.....
بدت تحس بالوهن وانو طاقتها على وشك النفاذ... اتوجهت ناحية المطبخ.
لقت صحن كبير فيه كمية من الفواكه... مدت يدها وشالت ليها تفاحه..... ومن شدة جوعها كملتها ف ثواني.
لمن فتحت التلاجه لقتها مليانه بالاكل والمشروبات.
شالت ليها علبة لبن بنكهة الفراولة..... وشالت تفاحه تانيه ومشت ناحية الكنبه القاعده فيها من م وصلت.... بدت تاكل وتشرب ف اللبن وتفكر..... هل تتعامل معاه كويس وتمسك لسانها عشان تقدر تخليه يوديها لاهلها ولا تتعامل معاه بالمعامله البيستحقها.
بيدها الرقيقة مسحت دموع الشفقه البتحرق في عيونها وم قادرة توقفها...
كيف فجأة من دون مقدمات حياتها اتبدلت كدا وبقت وحيده وغريبة وسجينه لي زول بارد جدا وم عندو قلب💔.
رفعت عيونها لي فوق وهي بتقول بصوت هامس مخنوق : يارب... انا عبدتك اللما عندها لا حول ولا قوة.... ياربي الطف بي وقويني وصبرني يارب..... انا راضية باي شي تكتبو لي وم معترضة على قضائك وقدرك لكن الطف بي يارب العباد.... الطف بي انا م عندي غيرك يا الله 💔.
_____
هنااااك في القرية...
سيدة كانت قاعده وبتعاين لي بيت ناس توتيل البقا فاضي: ياربي هسه يا توتيل الحاصل عليك شنو ف البلد الغريبة والناس الغريبة دي 💔.... الله يغطي عليك يا بت امي.
_ سيدة يا بت سيدة
_ ايوة يا يابا
_ سويلنا جبنه سريع احمد دا جانا وقال دايرلو جبنه
_ احمد 😍؟ سمح يا يابا سمح بسويها ليكم هسه دي.
جرت ناحية المطبخ وبدت تجهز ف حاجاتها وف االحظات دي بالذات فقدت توتيل الكانت حتشغلها ليها لو كانت معاها همست وهي بتقلي ف البن الريحتو بدت تسيطر على المكان : يا حليلك يا توتيل 💔.

______
علا صوت ضحكة وائل المستغربة : نعم ؟ كيف يعني انا ومرتي نسافر معاكم ؟
ميكال وهو بيحرك الملعقة الزجاجية ف كباية النسكافيه : عديل.... انت ومرتك تسافرو معانا... اعتبرها اجازة وتغيير
_ والله ياريت ياخ لكن الكلام دا م جاي انت ف نظر الناس عريس...يعني يقولو ساق صحبو معاه شهر العسل
_ وانت مالك ومال الناس ؟ الناس غير الكلام عندهم شنو.
_ والله يا ميكال حيرتني.. الكلام دا م بجي وبعدين انت نسيت مرتي ف الشهور الاخيره من الحم

ل ؟ يعني متوقعها ف اي لحظة تولد
ميكال : خلاص طيب على كيفك
_ هسه انت حاجاتك كلها خلاص جهزتها ؟
_ اي.
_ اهلك شافو العروسة ؟
_ حيشوفوها بالزفاف و خلاص.
_ممممممم على كل حال الله يكمل ليك بالخير
_ امين... لكن م تحسسني بالله انو زواج جادي وكدا وبالخير وبتاع... كلها سنه وترجع.
_ اللهم تحسب متزوج هسه.
_ اسوء شي
وائل وهو بيضحك : اتلقي هسه حبيباتك ديلك الوجع شاقي قلبهم عليك 😂😂😂
ميكال بغرور : حقهم والله.
_ هسه يا ميكال م خايف انك تتعلق بتوتيل ف السنه دي وبعدين م تقدر تطلقها ؟
ضحك بعد ماشاف الجدية ف وش وائل : كيف يعني اتعلق بيها ؟ يعني السؤال دا لو جا من غيرك كان اتقبلتو والله 😂.... انت اكتر زول عارفني كويس.... وانا اتزوجت دي بالذات عشان بعدين م يشبكوني لا م تطلقها وبتاع... عارف انو م حيتقبلوها وسطهم.
_ بتعرف تفكر 😂.
_دا كلامك 😆
_ ححجز ليك ف الكروز لاين... بس طلع الجواز ليها بسرعه عليك الله.
_ بكره سارة حتجي تسوقها وتصورها... مستني متين الموضوع دا يخلص وارتاح.
_ تاني م عندك اي هم... السنه تكمل وكدا انت المسؤول الرسمي يا زعيييم.
____
صباح اليوم التالي :
سارة جات لي توتيل استغربت من شكلها الباهت واثار التعب البااادية في وشها.... وبدت تتكلم معاها ف انها لازم تهتم بنفسها وكدا م صح وبتاع.
حست بي انو ف شي غلط كانو غاصبنها ع الزواج بس م اتكلمت وساقتها عشان تجهز حاجاتها.
بعد م صورتها ودتها كوفير عشان يظبطوها.... قصو ليها شعرها شوية وعملو ليها الحاجات الروتينه البيعملوها لي اي عروس.
وسارة اهتمت بي انو تأكلها وتخليها تشرب عصاير عشان الشحوب الفي وشها دا يزح شوية.
حاولت تعرف السبب المبقيها كدا لكن م قدرت.
م كانت عارفة انو العروس الصغيرة مغصوبة على الزواج عشان اهلها ومحرومة من شوفة ابوها وامها القتلها شوقها ليهم
_________
🌸🌸🌸🌸🌸🌸🌸🌸🌸🌸🌸🌸🌸🌸🌸🌸
يوم الزفاف :
كمية كبيرة من رجال الاعمال واصحاب المؤسسات واسرهم والاصحاب والاقارب كانو حاضرين الزفاف الاسطوري لي حفيد عبد العظيم الشرقي الكبير.
الصالة كانت منظمه ومزينه بطريقة مبهره....والورد الطبيعي الاحمر والابيض كان هو الراعي الرسمي حق التزيين 🌸.
والشمعدانات الزجاجية كانت ملفته للانظار.
كان زفاف منظم شديد.
الاضاءة بقت هادية كدليل على انو العروس وصلت.
الانظار اتوجهت ناحية البوابة الزجاجية الكبيرة.
كل الناس كانو عايزين يشوفو المحظوظة الاتكتب ليها ميكال الشرقي.... خصوصا النسوان الكانو بيتمنوهو لي بناتهم.
الفوتوغرافرس جهزو كميراتهم عشان م تفوت عليهم ولا لقطه ليها.
طبعا اكتر شخصيات كانت واقفة بترقب عشان يشوفوها هم ماما عشه واخوات ميكال التلاته ونور و وجدان.
الناس الماقدرو يوصلو للعروسة بأنظارهم بقو بعاينو ف الشاشة الكبيرة.
لي ثواني بس الناس اصابتهم دهشة لمن شافوها.
كانت لابسة فستان زفاف فخم لونو اوف وايت....ماسك من جهة الصدر والبطن ونازلة منفوش لي تحت ومن ورا عندو ذيل طويل... فيهو لمعه خفيفة.....و مححبه بي طرحة ناعمه ورقيقة بلون الفستان ولابسة طوق ورد ابيض.
المكياج بتاعها كان متقن وبسيط ظهر ملامحها الحاده الجميله.
كانت مبتسمه كانها سعيدة... والابتسامه ظهرت الغمازات الكسرت خلق الله.
وطبعا النسوان والبنات البيموتو ف الشناف م لقو ليها شي يهبشوها منو.
جات داخله بموسيقى هادئة كانت حاجه كدا تحبس الانفاس.
ميكال كان واقف مع وائل ف نص الصالة.
لابس بدلة تكسيدو رمادية في قمممممة الاناقة م قميص ابيض وصديري رمادي.
كان بي وقفتو وطولو بيدي احساس بالهيبة وعندو حضور كدا.
مشا ناحيتها بخطوات هادئة وابتسم ليها.... كانو بحبها وميت فيها.... وهي بادلتو الابتسامه وبقت بتعاين للارضية.
وهي بتتذكر ف كلماتو القالها ليها قبل م توصل( بالله لمن توصلي ابتسمي... خلي الناس كلها تحس بيك مبسوطه دا طبعا لو عايزاني اوديك تزوري ابوك ف المستشفى واتذكري انو في مية واحدة غيرك نفسها لو كانت ف مكانك ف اللحظات دي 😏)
كانو الاتنين قمة الرهابة 😭.... وعدسات المصورين م رحمتهم.

ميكال انحنى لي قدام شوية وباس راسها قبل م يمسك يدها ويتوجه بيها لي جوه وهنا نور قربت تبكي من الغيره.
ظهرت دموع في عيون توتيل وهي بتعاين للوجوه البتراقب فيها.... اتمنت على الاقل لو امها تجي تحضر زفافها.... كانت وحيده لا صحبه لا خاله لا عمه 💔.
الناس افتكرت دموعها دموع فرح.... لانو ابتسامتها الرزينه كانت طاغيه.
مشا بيها لحدي م وقف عشان يرقص معاها الاسلو تحت انغام غنية beauty and the beast.
بهدوء بقت بتتحرك بنفس الطريقة البيتحرك بيها هو.
يدها الصغيرة غاصت في يدو الكبيرة.... ويدها التانيه كانت في كتفو ويدو هو كانت ف خصرها النحيف.
ظهر التوتر في وشها.... اما هو كان بيوزع ف ابتسامتو للناس ويرجع يعاين ليها تاني.
ممكن نقول انهم الاتنين اجادو التمثيليه.
الوحيده الظهرت الابتسامه في وشها وكانت سعيدة لجين.
الحفلة كانت استعراض رهيب

للفساتين الغالية والبدل.
بعد م خلصو رقصتهم مشو ناحية القعدة حقتهم المزينها ليهم كانهم ملوك.
شوية بدت الحفله... ميكال قام من جمبها والناس بقت مشغولة مع الفنانين الجو والاغاني والرقيص.
جو الناس سلمو عليها وباركو ليها...ومن ضمنهم لجين : مبرووووك
ردت عليها بابتسامه : الله يبارك فيك
_ انا لجين اخت ميكال...طبعا م عرفنا عليك لكن م مشكله بنعوض كل شي 😂💜.
_ ان شاااء الله 😊
_ ماشاء الله طالعه جميله شديد 😍.
_ تسلمي يارب 💜
بعدها مشت....
توتيل لاحظت للبت البتعاين ليها بطريقة م مريحه..... وشوية كدا جات عشان تسلم عليها..... كانت لابسة ليها فستان ابيض اوف شولدر على جسمها وجاي حلو مع لونها الاسمر وشعرها عاملاه ضنب حصان وميكبها بسيط شديد.... طبعا دي نور 🙂.
صلحت فستانها وطلعت ليها : مبروك
_ الله يبارك فيك.
_ انا نور... حبيبة ميكال.
توتيل سكتت وبقت بتعاين ليها باستغراب.
نور مكمله : بالمناسبة هو م عرسك حبا فيكي
_ عارفة كل شي
_ طيب كويس.... اتهني بي ايامك دي معاهو لانو اي شي حيرجع لي اصحابو يا حلوة تمام؟
قطع الكلام المرا الجات تبارك... وتوتيل لقتها فرصة تتجاوز بيها كلام نور.
نور عاينت ليها بغل من فوق لي تحت ومشت لي ميكال الكان واقف مع وائل والناس بتجي تبارك ليه.
نكزتو في ضهرو من ورا عشان يتلفت عليها.
وفعلا قبل عليها.
عاينت ليه بنظره متفحصه من شعرو لي جزمتو الجلدية السوداء
_مبروك
_ الله يبارك فيك
كان برد عليها بابتسام كانو ماف اااااي شي حاصل.
بعدها نور رجعت مكانها وقعدت جمب وجدان.
وجدان وهي بتعدل توبها الحريري فوق راسها بطريقة خلت اساورها الدهبية تتحرك وتعمل صوت : غايتو هسه البنت دي م اسمح منك يا نور( كضاااابه يا رابحه)
_ القسمه بس اعمل شنو.
_ يا متخلفه قلت ليك انتي عارفة السبب الاتزوجها بيه.... وبعدين حبيبتي البنات الفالحات والقادرات الزمن دا بقلعو الرجال من نسوانهم البحبوهم خلي يكون معرسه زي نظام بس شوفوني عرست.
_ لكن كيف يا وجدان ؟
وحدان بخباثة : بس انتي اصبري لي وروقي وبردي دمك.... يمين كان م خليناها تعرف احنا منو يبقى م اسمي وجدان.
_غايتو يا وجدان انا م عارفة من دونك كنت حاعمل شنو.
وجدان وهي بتضحك : 😂😂😂😂 يلا لا فرفشي وم تشيلي اي هم كلو بظبط مع الايام
_ ان شاء الله.
بعد حفله طويلة وممتعه جدا وزي ما يقولو حابسة للانفاس.
بدت الصالة تفضى شوية شوية لحدي م كل الناس مشت الا ناس بسيطين واللي هم وائل ومرتو والبنات وماما عشه والعرسان ووجدان وسيف.
طبعا لحدي هسه من اهل ميكال غير لجين السلمت عليها ماف اي زول جاها.
لجين جات عليها وهي مبستمه : ميكال منتظرك برا خليني اساعدك عشان الفستان تقيل.
بادلتها الابتسامه : طيب.
فعلا لجين ساعدتها لحدي م طلعو برا لقت عربية مارسيدس سوداء واقفه وميكال متكل على الباب وبيتكلم مع وائل.
ميكال اول م شافها وقف بي استقامه وهو بقول لي اختو : شكرا ع التوصيلة.
ضحكت : ولو ياخ.
توتيل ركبت ورا عشان فستانها م بتقدر تقعد بيه قدام واتفاجأة بي لجين برضو ركبت معاها.
وشوية كدا حصلهم ميكال..... كان سايق وخشمو م فتحو معاهم ولا حتى عاين ليهم بالمراية.
لجين : رجلك رجل خير يا لولا... انا وانتي حنكون اول اتنين ندخل البيت القديم.
_ البيت القديم ؟
_ شنو يا ميكال م حكيت ليها ؟
هز ليها راسو وهو بعاين بالمراية الجانبية للشارع( ابو دا برود )
_ طبعا البيت القديم دا الكنا عايشين كللللنا فيه واتولدنا فيه من زمان.... بس قدم.... وبعد م جدو الله يرحمو مات قبل 3 شهور طلعنا منو وسكنا ف بيت تاني لزوم يصينوه لينا وكدا وهسه الصيانه خلصت الحمدلله.... وراجعين ليه.... انا متأكده حتحبيه شديد.
توتيل ابتسمت ابتسامه مشرقه : ان شاء الله
فضلو الاتنين يتونسو لحدي م وصلو.

لجين قالت بيت... لكن دا م بيت..... توتيل اتخلعت من الحاجه القدامها.... اكتر شي مناسب لي وصفو لفظ قصر.
كانت مساحتو وااااااسعه شديد.... وقريب شديد من النيل
وفيهو 3 ابواب.... باب لدخول الناس وباب لدخول العربات وباب خلفي بيودي على النيل.
بتكون من 3 طوابق.... وفيهو مسبح كبير.... وحديقه منظمه بتتوسطها ممرات من الحصى واعمدة انارة قصيرة.
كان مطلي باللون الابيض.... وحاجه كدا ف منتهى العتاقة والفخامه.
كانت الانوار بتاعتو مضاءة... دخلو التلاته.... ميكال تلفونو ضرب وفضل برا.
اما توتيل ولجين خشو جوا.
الطابق الارضي كان استقبال بس.... صالة واااااسعه فيها ثريا ضخمه متدلية من الثقف.... وسجادات ايرانيه.... واطقم جلوس انيقه.... وطاولة حقت طعام كبيييييرة.... والحيط كانت فيها مجموعه من اللوحات الزيتيه المبهره... ومطبخ انجليزي في الزاوية.... وحمامين واوضة صغيره.... وف النص في سلم كبيييييير حلزوني
اما الطوابق الفوق فكانت مقسمه لسكنهم هم.
لجين وهي بتخت يدها ف راسها : صراحة كدا انا تعبانه شديد ومصدعه ريتا حتوريك سكنك وين.
غمزت وهي بتقول ليها : ليلة سعيدة يا عروسة 😉.
توتيل بامتنان : شكرا ليك
_ م بيناتنا ش

كر والله 😍
اتلفتت وراها وهي بتنده : ريتا.
جات الشغالة : ايوه ماما لجين
_ ودي العروس سكنها
_ طيب ماما
عاينت لي توتيل : تعالي وراي
توتيل تابعتها وهي بتعاين حوالينها ف ذهول.
لحد م وصلتها لباب ابنوسي كبير.
عاينت حوالينها باعجاب شديد للمكان وتنسيقو والعفش اي شي كان مرتب وفي مكانو.
دخلتها الاوضة.
الاوضة كان جميلة ومريحه وبيطغي عليها اللون الرمادي الفاتح... واضاءتها دافئة.
فيها نافذة فرنسية فاتحه على النيل....
وسرير ضخم على جمباتو في كومودينات فيها ابجورات.... بالاضافة لي تسريحه راقية وكنبه وشاشة تلفزونيه كبيره.
في 3 ابواب.... واحد بيأدي للحمام.... والتاني لغرفه صغيره فيها رفوف وضلف وادراج للملابس والاحذية.... والتالته حقت البلكونه.
كان في ريحه حلوة طاغيه ع المكان.... خلت توتيل تحس بي روقان وهدوء... لكن دا كلو راح لمن سمعت صوت الباب بتفتح.
قبلت وراها بسرعه... شالت انفاسها وهي بتعاين ليه بتوتر : انت جابك هنا شنو ؟
طلع الجكت وبدا يفك في الكبك حق يدين القميص وفي ابتسامه خبيثه في وشو : عريس جاي لي عروستو حيكون ف شنو ؟
اتراجعت لي ورا : عاين.... ماف شي بخليك تجي هنا.... واحنا زواجنا م زواج زي م انت عايز انا حدي هنا 12 شهر وراجعه لي اهلي... وبعدين.... وبعدين انت يعني ب... بيتكم ماشاء الله ك ك كبير ممكن تشوف ليكك اي اوضه ت تانيه تنوم فيها غير دي.
فك ازارار قميصو الفوق وكان حاسي بسعاده عجيبه وهو شايف الخوف ف عيونها : هه... 12 شهر حخليك تقعدي ساي يعني ؟ وماف شي اسمو زواجنا م زواج زي م انت عايز.... هو غيروه ولا شنو ؟
جراها من يدها عليو.... وبي يدو التانيه جرا حجابها وكشف شعرها.
عاين لي شعرها الاسود اللامع وبي سرعه جرا الشريطه للافنو ليها بيها... وشعرها جا نازل كانو شلال.
مد خشمو وهو مميل راسو لليمين شوية بطريقة كانو بقول ليها م بطال.
اخد خصلة منو ولفاها في صباعو وختاها ليها في كتفها... نظراتو المتفحصة كانت م مريحه ليها.
اما هي كانت واقفه زي الصنم وم قادرة تتحرك وجسمها كلو بيرجف.
سبتها بيدينو من كتافينها وهو بيضحك بي مسخره: كأنك فرخ صغير مرشوش بي موية.
دنقر شوية وعانقها..... وهو بيستنشق ريحة شعرها....كان محتويها بين يدينو وبدا يفك في زارير فستانها 🙊
من دون مقدمات حسا بيها بتلزو منها وفجأة في صوت هز المكان.
كان صوت يدها وهي بترزع فيه حلاة كف لمن خلتو واقف متصلب وبعاين ليها من دون اي تعابير بادية ف وشو.... جا صوتها مرتجف وهي بتقول ليه : معقول وصلت للدرجه دي ؟؟؟؟
فاكر نفسك عشان سلبتني بقروشك حياتي معناها حتسلبني اي حاجه تانيه ؟ لا معليش ياخ.... اهدا وصحصح وفوق لنفسك.... الحركات دي تسويها للبنات البتعرفن ولا حبيبتك الخليتها لكن م بتعملها لي انا ولا حتقدر لي..... وم حخليك اصلا تخت يدك علي طالما اني م راضيه عشان كدا لو سمحت كفاية الشلتو مني..... خليني ف حالي وم تقرب لي.... زي م انت قلت لي شكلك لسا م عرفتيني كويس.... انا كمان شكلك لسا م عرفتني كويس.
نهاية الحلقة السادسة

عـٰٓشَٰـُـٰٓآقَٰـُـٰٓ آلَٰـُـٰٓرﯛ̲୭آيَٰـُـٰٓآتَٰـُـٰٓ:
#القروية_والوحش
🌸مؤامره للعروس
_7_
لثواني بس لاحظت للعرق الظهر ف جبهتو.... ولي حركة كف يدو البيحرك فيه كانو حيكبس فيها بنيه 👊
حلقها جف... وحليها برد ورجولها بقت م شايلاها من شدة الخوف وحست انها خلاص النهاية.... حيمسكها ويرد ليها الكف بي 100 كف على كل خد.
قرب منها كأنو انسان الي.... ماف اي ملامح ف وشو بتعكس انو هو جواه ف شنو.... وخطواتو واسعه وهادئه.... كانو نمر رشيق وخطير عايز يصطاد فريسة...عرفت انو فات الاوان عشان تهرب او تبدي اي ردة فعل دفاعيه لو اتعرض ليها.
فضل يقرب عليها وهي راجعه منو لورا لحد م في النهاية ضهرها اصطدم بي باب غرفة الملابس.
شهقت برعب لمن لقت يدو بتتخلل شعرها.... وفجأة شهقة الرعب اتحولت لي شهقة الللم لمن شدا على شعرها بقوة رهيبة لدرجة انها حست انو شعرها حينزل في يدو.
قال ليها بصوت هامس ظهر الغضب بين نبراتو : انتي بصفتك منو بتمدي يدك علي؟
ظهرت الدموع في عيونها...
م كانت قادرة تتكلم او تقول اي شي 💔.
شد شعرها اكتر بطريقة خلتها تصرخ.....
علا صوتو وهو بيعيد ليها السؤال : انتي بصفتك منو عشان ترفعي يدك علي ؟ ها ؟ انتي صدقتي نفسك ولا شنو ؟
مسكها من فكها وقرب بوشو عليها..... عيونو البتطلع شرار كانت ف عيونها الاتملت دموع : انااا ميكال عبد العظيم الشرقي ماااف زول بيتجرأ يرفع عينو ف عيني تجي واحدة زيك م تطول ولا شي ولا بتجي جمبي تمد يدها علي ؟ انتي فاكراني حمشيها ليك.
طلع صوتها المخنوق : حاعمل كدا تاني لو فكرت تهبشني... العايزو دا على جثتي.
رخا يدو شوية من شعرها وهو بيعاين ليها بتهديد : نعم ؟
_انت.... انت م حتقدر تسلبني كل شي م حسمح ليك.... انا م حسمح ليك.
فجأة من دون مقدمات حست بيدو بتتمدا على اكتاف فستانها.... وبي كل سهولة وبساطه مزقها ليها بوحشية 💔.
دموعها جرت وهي بتقول ليه بانهيار : لا عليك الله.
مسكت اطراف الفستان الاتقطعت بيدينها عشان كتافها م تظهر..... اما هو ابتسم بشماته وحاوطها بيدينو وقرب ناحية اضانها وهمس ليها بطريقه وقحه ومتعجرفة : عايني يا حلوة انا لو عايز منك شي حشيلو من جوه عين ابو اهلك اتفقنا ؟ م انتي البتخوفي ميكال الشرقي او بتهدديه.... م اتولد البيشوف نفسو علي...انتي هسه مرتي وواجب عليك وغصبا عن عين الجابوك تحترميني مفهوم.
ابتسامتو كانت خبيثة ومرعبه.
ردت عليه من بين دموعها : انت قايل نفسك مخلوق بي طين براك ؟؟؟ بتستقوى على الاضعف منك والاداك القوة دي الله وزي م اداك ليها ف ثواني ممكن يسلبك ليها.... شغال تدوس ف التحتك لحدي م حيجي يوم حتداس فيه برضو... اتقي الله ياخ... وانت اخر زول تتكلم عن الاحترام..والجابوني م سألوك فلو سمحت م تجيب سيرتهم.
فكو اتصلب وهو بيراقبها بنظراتو المريبه.... لاحظت للابتسامه الصغيره الكان غرضها استفزازي الاترسمت بهدوء في وشو رجع يدينو الكان محاوطها بيها وبقا بفتح ف زراير قميصو.... وبشرتو السمراء بقت بتتوهج تحت الضو.... لاحظ لي بصرها الاتخفض للارض عشان م تعاين ليه....جفلت لمن ربت على راسها ونزل بيدو لحنكها... داعبو ليها برفق وهو بيقول بصوت زي فحيح الثعابين نشر الرعب ف جسمها المرهق : باين انو حظي السيئ رماني ف واحدة سليطة لسان ولسانها بيقطر سم لكن صبرا صبرا.
زحاها بيدو بقسوة من الباب الكانت متكله عليه بضهرها وفتحو... دخل وجا طالع وهو شايل ليه ملابس نوم.... كانت لسا واقفة مدنقره راسها والدموع منهمرة من عيونها البريئة 💔.
اتوجه ناحية الحمام قبل م يقول ليها : م اجي القاك قدام وشي عشان م حيحصل خير.
رفعت راسها يادوب لمن سمعت صوت باب الحمام بيتقفل بقوووة.
سحبت اكبر مقدار من الهواء وختت يدها ق قلبها البقا بضرب بي سرعه....دنقرت وشالت الطرحة الكانت محجبه بيها.... وحست بي العروق الفي رقبتها حتنفجر بسبب صوتها الكاتماهو ودموعها البتحاول تكبحها بي القوة.
قعدت ف الكنبه وبدت تمسح ف اثار الدموع الفي وشها م كانت عايزاه يشوفها خالص.
ميلت راسها على يد الكنبه كانت مرررهقة بمعنى الكلمه جسديا ونفسيا... ميكال اتأخر ف الحمام.... وهي المسكينه كانت منكمشه على نفسها بسبب برودة الغرفه وعدم الامان الحاسا بيه....حاولت بي كل مقدرتها م تنوم لكن النوم غفلها ولا اراديا استسلمت ليهو.
مرت ساعاات وهي نايمه بالوضع دا.... لحدي م فتحت عيونها على صوت رشات عطر.
فتحت عيونها ببطئ واعتدلت ف قعدتها ويدها تلقائيا مشت ناحية رقبتها المتيبسة من النومة الغلط.
الستاير كانت مرفوعه من من الشباك عشان اشعة الشمس الصباحيه تدخل للاوضه.
عيونها اتسبتت على الواقف قدام المراية وبلبس في ساعتو.

بلعت ريقها لمن قبل عليها... كان لابس قميص ابيض وبنطلون اسود.
رمقها بنظراتو المتفحصة وهو بقول بصوت صارم : اخيرا صحيتي ؟ انا م شفت لو واحدة بتنوم بعمق قدر دا.
مسحت وشها بكفها وفضلت السكات.
اما هو اتوجه ناحية السرير وشال البلوفر الاسود ولبسو.... ادا نفسو نظره اخيره ف المراية وبعدها طلع وهي هنا شالت انفاسها باسترخاااااء.
ماما عشه كانت قاعدة فاتح

ة التلفزيون وبتشرب ف الشاي
وسبحتها ف يدها.... اول م شافتو قالت ليه بصوت عالي : صبحية مباركه يا عريس.
قعد ف الكنبه جمبها : بارك الله فيك.
_ على وين يا ابوي ؟
_ ماشي الشغل
ختت كباية الشاي بي خلعه وهي بتقول : اججججججججي عاد دا كلام ؟؟؟؟ في عريس اول يوم ليهو يطلع طوالي يمشي شغلو ؟ وبعدين الليلة الجرتق حقك.
_ والله عادي عندي شغل مهم بقضيه وبجي راجع.
لوت بوزها : مششششم غايتو محن ربنا يورينا نهايتك شنو 😑.
قال ليها ببرود : عايز شاي
_ سمح.... مش الشاي دا ؟ بكبو ليك.
_ لا لا خلي ريتا تكبو لي كوباية مقفولة.
_ لي يعني م عايز تشرب معاي ؟
_ معليش مشغول لازم اتحرك بسرعه.
_ غايتو يا ولدي الله يهديك.... لكن انت بتعمل الفي راسك بس.
بعدها ندهت على ريتا عشان تعمل ليهو الشاي.
شوية كدا ريتا جات وناولتو الكباية وهو طوالي نزل.
كان ماسك الكباية بيد ومفتاح العربية بيد.... مشا طويل لحد م حصل عربيتو.... فتحها وركب واتحرك وم انتبه للعيون المراقباه.
وجدان كانت واقفه ف البلكونه وشافتو لمن طلع.... ختت يدها في خدها وهي بتقول : اجججججي اجججججي اجججججي....دا المارقو شنو هسه.
جرت جوه بسرعه وشالت تلفونها وضربت لي نور.
جاها صوت نور النعسان: الو
وجدان : انتي وين يا هناية ؟
_ ف البيت لي ف شنو ؟
_ بري شايفه العريس مرق ولابس فورمال... مع انو من المتعارف عليه انو هسه مفروض يكون نايم.
_ غريبة....تفتكري يكون جاي الشغل ؟
_طبعا حيكون جاي الشغل حيكون ماشي وين بهدومو دي..... كدي اتظبطي واجري على شغلك.... ولو لقيتيه اياك تنداحي كلمة ورد غطاها.... مسافه امشي اشوف السنيورة العرسها.
_ سمح سمح....وعليك الله وريني لمن تشوفيها شكلها كيف ولابسة شنو
_ طييييب من عيوني... اجري على شغلك.
قفلت الخط ورمت التلفون ف التسريحه ودخلت الحمام اخدت ليها دش سريع واتسوكت ولمت شعرها واتعطرت بعد م لبست دراعه انيقه.... ولبست شبشبها حق الفرو ومشت على اتجاه شقة توتيل.... عشان تطقس وتتشمشر.
دقت الباب وم امداها تنتظر كتير الا وتوتيل فاتحه ليها الباب.
طوالي مسكتها وحضنتها : صبحية مباركه ي العروس 😍
ردت عليها بابتسامه : الله يبارك فيك.... اتفضلي
كانت متلفحه بتوب عادي وماف ريحة ملفته زي حقت العروسات فيها.
دخلت وهي بتعاين للديكور حق الشقه ووجعها جوه قلبها لمن حست بيه احلى من حق شقتها.
قعدت وخلفت رجلها : اها كيف كانت ليلتك ؟
_ الحمدلله
_ اتلاقيك تعبااااانه ومعسمه من وقفة امس حقت العرس.
_ اي والله
_ يلا خلاص ليلة وانتهت
_ الحمدلله
_ طبعا م عرفتك علي... انا وجدان زوجة سيف ود عم ميكال.
_ ايواااا اتشرفنا
_ شرف الله قدرك حبيبتي.... غايتو ان شاء الله نبقى صحبات سوا 😂😂😂
_ ان شاء الله.
وطت صوتها بطريقه دراميه وهي بتنحني لقدام شوية : لكن عاد ياختي بيني وبينك كدا الله يعينك على حمواتك وراجلك....صعبيييييين وكعبين.
توتيل وهي بتحاول تمسك نفسها: كيف يعني ؟
_ ميكال دا بتاع نسوااااااااااان... منتهي كلو كلو... الكلام بيني وبينك حبيبتي سمح ؟ ماف زول يعرف...... واخواتو ديل اعووووذ بالله من غضب الله حموات حموات يعني ماف كلام فققققققر ماشي على اتنين.... لئيمات وحاقدات وبتاعات مشاكل اووووعك تأتمنيهم على نفسك او على اسرارك حاولي اتجنبيهم بقدددددر الامكان.... لانهم زي م قلت ليك.
وجدان حست بي احراج لمن لقت توتيل م اتفاعلت معاها ف الكلام....م كانت عارفة انها من النوع النادر الما بحب القطيعه ونقل القوالات وقالو وقلنا.
اتحنحت وهي بتضحك : غايتو معليش صدمتك من البداية لكن قلت بس عشان تعرفي وكدا يعني.
توتيل هزت راسها بابتسامه كمجامله بس.
_ صحي جابو ليك مهر كم ؟ 😂
_ والله م عارفة المهر كم ولا سألت منو
_ عاد دا كلام 😏.... لكن مشاء الله قالو ميكال عزاك بطقوم الذهب
_ اي
_مشاء الله حبيبتي ربنا يزيد ويبارك عليك
_ تسلمي ان شاء الله
_ مستعده للجرتك بعدين ؟
_اي الحمدلله
وجدان بهمس : عاد حاجه عشه عايزة تتبوبر بعدين من هسه العمال بدو يجو عشان يرتبو الحديقة ويزينوها.... عاد دي كمان ام ميكال تعتبر ربتو هي من طفولتو ومرة كدا لديحه وسغيله وبتموت ف الفشخره والبوبار.
_ حجه عشه ؟ غريبة م شفتها

_ م سلمت عليك ؟
_ لا
_ بيني وبينك كدا ومعليش يعني هي زعلانه م عايزاك لي ولدها قالت.
توتيل سكتت وحست بكسرة خاطر.
وجدان وهي بتقيف : اعذريني حبيبتي لازم امشي لكن بجيك تاني... وبعدين شنو قبل م تمشي بعدين للخبيره عشان تمكيجك وتلبسك بي ساعه كدا رسلي لي البت عندي ليك ماسك لوشك اقصد قناع البمسحوهو ف الوش دا مبااااالغه بنور ليك وشك وبنضرو.... هسه لونك بااااهت كدا شكلو من تعب امبارح.
_ خلاص تمام بخليها تجيبو لي منك
_ يلا م استغني مع السلامه
_ الله يسلمك
وقدمتها للباب.
وطبعا وجدان كانت مبسوطه بحرب الاعصاب العملتها لي توتيل دي.
اول م طلعت من شقتها عاينت للباب حقها بقرف وهي بتقول : اله يحرق حشاااااك زي م حرقتي قلب نور( دعوتك دي السقف م

بتحصلو )
مشت طوالي
تحت مكان ماما عشه بتكون قاعده.
لقتها فاتحه التلفزيون وبتحضر كالعادة.
وجدان: ماما عشه صباح النور
عاينت ليها من فوق لي تحت : الجنما 😒.... من متين ياختي ردتيني وبتقولي لي ماما كمان.
وجدان وهي بتقعد جمبها : لي كدا يا ماما عشه وانا جاياك بي نفس مفتوحه 🙁💔
_ نفس مفتوحه لي شنو ياختي ان شاء الله خير 😒.
وجدان وقفت على حيلها : حالتي كنت جايا انبهك من مرت حفيدك لكن خلاص لو كدا سديتي نفسي من الكلام.
مسكتها من يدها عشان تقعد : اقعدي يا بت.... انتي م بتقدري انو الزول مرات نفسيتو بتكون تعبانه ؟؟؟؟ وبكون زهجان وبجيب كلام خارم بارم من راسو ؟ معليش... اقعدي اقعدي قولي لي في شنو 😁.
قعدت وعيونها بتلمع بخبث شالت انفاسها وهي بتتكلم بهمس : غايتو وقعتكم سوداء.... العروس جيت اصبح عليها قابلتني ليك جنس مقابله التقول قتلت ليها زول.... مشتحه نخرينها وجضومها وتتأفأف والكلام ببرود يلطش ندمت اني جيت اصبح عليها.
_ اججججججي؟ هي خلاص صدقت نفسها ولا شنو ؟
_ لا دا كلو كوم والكلام القالتو لي كوم تاني خااااالص
_ قالت ليك شنو ؟
_ قالت لي العريس امو واخواتو شكلهن مفترياااات ولئيمات واحده فيهن بالغلط م جاتني سلمت علي ولا باركت لي وشكلهم كدا ناس بوبااااااااااار وتفشخر.
ماما عشه بانفعال : يا سلااااام شوف الوسخه الجايبنها من نص البهايم مرق ليها لسان..... اي مفتريات وبي حقنا وبوبار وتفشخر برضو بحقنا يا فقر الله اعلم عملتي لي ولدنا شنو خليتي يعاين ليك يا تربية الجوع..... تصبر لي يمين بالله م اخليها.
_ اهدي اهدي يا ماما عشه م تعصبي وتتلفي اعصابك لناس م بتستاهل عليك الله.
_ والله اطلع اكسر ليها راسا بعصايتي دي
_ لا لا يا ماما عشه النبي فيك اهدي... نوع دي عايزين زول دمو بااااااارد ويرد ليها الكلام بالمطاعنات.
_ يطعنو قلبها بسكين نار شاحده الله.
_ غايتو بالجد يا ماما عشه ميكال باااااالغ فيها لا شبهو لا مستواه
_ هو ميكال بسمع كلام زول ؟ كلامك دا بالنقطه والحرف قلتو ليه لكن هو راسو صخره.... العايزو بس بيعملو.
_ غايتو كان عندي ليو عروووووس حلاااااتا سممممممحه وبت ناس وشغالة معاو ف المكتب لكن خساره.
_ دي منو ياختي
_ صحبتي اسمها نور.
_ دي البنيه الواقفه معاك كانت ف العرس دي ؟
_ اي
_ ممممممممممم.... غايتو قسمتو معاها بت الكلب دي.... اصلي لا ردتها لا بلعتها.... لحدي م نشوف نهايتهم الاتنين شنو.
_ غايتو
سكتو شوية وتاني ماما عشه قالت : عليك الله يا بنت قالت احنا كعبات ولئيمات وناس بوبار ؟
_ اي والله
_ ببو يشق كبدتها بركة اللانام لا اكل طعام حسبي الله ونعم الوكيل فيها.... اححححححي انا يا مغستي 😬.
وجدان ابتسمت بخبث لمن شافت رد فعل ماما عشه العنيف.
وقفت على حيلها : عن اذنك يا ماما عشه لولو بتي بتكون صحت انا طالعه ليها.
_ امشي يا بتي امشي.
وبسرعه طلعت فوق لي بتها.
__________
نظرات الموظفين المستغربه احاطت بي ميكال لمن جا داخل احساس انو عريس وكدا الجابو شنو.
حسا باسترخاء اول م وصل الطابق الفيه مكتبو لانو كان هادئ شديد م زي بقية الطوابق المكتظه بالموظفين وصوت الازعاج شديد.
مشا بخطوات هادئة ودخل مكتبو.... لقا نور ف وشو... وكالعادة متأنقه شديد.... م قدرت تشيل عيونها منو.... نظرات الاعجاب كانت واضحه جدا.
قال ليها : صباح الخير
دنقرت راسها : صباح النور... الجابك المكتب شنو ؟ من المفترض انك عريس
_ عندي شوية قلت اخلصو عشات اتفرغ
_ تتفرغ لي شنو ؟
_ لي مرتي
_ كان م عرس عدي من وشك 😒... شنو اتفرغ لمرتي وبتاع.
ابتسم لمن حسا بالغيره ف كلامها : انتي زعلانه كدا لي ؟
_ انا م زعلانه بس كلامك مستفز صراحة.
مشا يدو ف وشها برفق : اعاصبك يا حلوة.
عيونها ثبتت في عيونو العسلية وحست بي نفسها كأنها مخدرة بنظراتو.
استعادة وعينها لمن قال ليها : الملف حق المستثمرين القطريين دخلي لي جوه... واطلبي لي وائل بأسرع م يمكن

_ طيب
وقفت مراقباهو بنظراتها لحدي م دخل مكتبو.
بعدها اتوجهت ناحية الدولاب الزجاجي الفيه الملفات وقبل م تدخل ليه الملف ضربت لي وائل عشان يجيه.
وائل م اخد وقت الا وهو واقف قدامو : الله الله ؟ بالنسبة لي انك عريس وجاي طوالي تداوم دا شنو دا ؟ 😂 والله دي مغتربين السعودية البيجو يعرسو ويرجعو طوالي م بكونو عملوها.
_ خالف تذكر
_ مممممم كلام جميل.... وجاي لي يعني هسه في شنو الجابك دا ؟
رما الملف لي وائل : دا الجابني.
كان راجع بكرسيه لي ورا وهو بيمشي ف يدو في شنبو ومراقب وائل البيقرا ف الاوراق بي اهتمام.... قبل م يصفر ف النهاية تصفيرة اعجاب.
_صفقة جميلة جدا جدا والله.
_ كدي وريني اخبار المشروع الزراعي كيف؟
_ ماشي فل الفل م تخاف.
_ الحمدلله
سكتو الاتنين شوية قبل م وائل يقول :
اها ليلتك امبارح كانت كيف ؟
_ جميلة جدا الحمدلله 😊( دا طبعا بأمارة الكف اللي حضرتك اخدتو )
_ 😂😂😂😂😂😂 يعنيييي ؟
_ يعني شنو ؟
_ فاهمني انت
_ اسكت اسكت.

_ طيب سمعا وطاعه
_كملت اجراءات السفر ؟
_ اي... اسبوع ان شاء الله وتقومو رحلة حلوة شديد وممتعه.
_ تتذكر الايام الخوالي لمن سافرنا سوا ؟
_ بالجد ايام خوالي 😂... الله يرحم
_ كانت حلوة ومغامرات.
_ خلاص م تفتح علي المواجع
_ هسه انت م ندمان ؟
_ على شنو ؟
_ انت عرست وخلاص فقدت حريتك
_ والله صراحة يا ميكال لا 😂.... بالعكس ياخ.... انا ندمان على السنين القضيتها بدون عرس.... اي نعم هو فيه حاجات مرات بتزهج لكن برضو حلو.... لمن تتزوح ليك واحدة بتحبك وبتحترمك وممكن تعمل اي شي عشان ترضيك ومهتمه بيك وبتخاف عليك بتتسائل انا لي م دخلت العالم دا من زمان....تلقاها واقفة ف ضهرك ف الحلوة والمره وسانداك ف كل وقت وانت بالتالي بتكون عايز ترد ليها جميلها دا فبتجتهد ف شغلك اكتر عشان توفر ليها كل شي هي عايزاو... وبتلقى نفسك مستعد تجيب ليها نجوم السماء لو عايزة.... الناس البيقولو انو العرس دا م حلو م اختارو شريكاتهم صح... ولا هم ف نفسهم م مسؤولين وم قدرو يستحملو.
_ دا شنو كلام العميقين دا
_ حقيقة يا معلم
_ ممممممممم.... قلت ليك
_ اها
_ م نفسك تجي معاي انت ومرتك
_ ميكال مرتي حامل ف الشهور الاخيره اقسم بالله بطنها 3 امتار م حتقدر تسافر.... بعد م تولد وتقوم بالسلامه ان شاء الله وربنا كتب سفره تانيه بنجي معاك.
_ تمام.
_ هسه كدي سؤال.... نور قدرت تتقبل الموضوع
_ موضوع شنو كمان
_ زواجك يعني
_ م تتقبلو بصفتها منو ؟ عاين م عندي ليها اييييي شي... وموريها ومفهما.... كونها تخت حاجه من نفسها دا شي هي حره فيه وبرجع ليها براها.
______
توتيل كانت قاعدة في اوضتها لمن الباب دق.... قامت وفتحتو لقتها لجين.... لا اراديا الابتسامه الحلوة ارتسمت فوشها: صباح الخييير
_ صباح النور 💜... قلت اجي اصبح عليك واشوفك لو محتاجه شي.
_ تسلمي يارب اتفضلي عليك الله.
لجين دخلت وتوتيل جبرتها تدخل اوضة نومها.
لجين قعدت ف الكنبه وتوتيل ف طرف السرير.
لجين : لي لابسة التوب دا 😂.. وين البجامات والحركات.
_ صراحة كدا دا الشي الوحيد المريح بالنسبة لي.
_ لا لا انتي عروسة دي ايامك حتقضيها كلها تياب ؟ شنو رايك انثق ليك لبسات تلبسيها.
_ طيب م عندي مشكله.
دخلت معاها الاوضة الصغيرة الفيها الهدوم.
وبدت تطلع ليها في الحاجات وتقول ليها البسي دي مع دي وسرحي شعرك كدا واعملي ميكب كدا...
لحدي م في النهاية قعدت جمبها ف السرير : ماشين شهر العسل وين ؟
_ والله م عارفه
_ ميكال م وراك 😂
_ لا والله 😅
_ 😂😂😂😂 واي منو غتيت ياخ.... طبعا ميكال دا يا توتيل م عارفة اشرح ليك كيف.... هو اي بارد كدا وعندو شوية سخافه لكن برضو انسان جميل 😂.... بعدين شنو مرات عايزك تفهميهو بسكاتو.... يعني احنا مرات م بتكلم معانا زاتو بي نظراتو بس بوصل ليك الهو عايزو وانتي العليك تنفذي عشان م يزعل منك وزعلو كعب..... اخواتي مرات بتغاظو منو بسبب الحركات دي بس انا بفهمو ف النهاية هو بمقام بابا الله يرحمو.
توتيل : الله يرحمو ويخليكم لبعض.
_ امين يارب.... انتو اتلاقيتو كيف 😅
_ ا بس... بس هو جا يشتري الارض هلتنا وشافني هناك
_ وحب من اول نظرة وكدا 🙊
_ اي 😂
_ ربنا يخليكم لبعض
توتيل وهي بتبتسم ابتسامه مزيفة : امين يارب.
_ انتي بعدين حتمشي للخبيرة الساعه كم ؟
_ زي 5 كدا
_ حيسوقك ليها منو ؟
_ بت اسمها سارة
_ ايواااا حلو... شكلو الجرتق حيكون حلو شديد ماما عشه مجتهده فيهو..... ماما عشه دي طبعا ام بابا الله يرحمو... م جاتك ؟
_ لا والله.
_ اهااا... بتكون.... بتكون مشغولة وكدا لكن بتجيك ان شاء الله.... وعندي اخواتي اتنين جويرية بنقول ليها جوري دي اخر العنقود.. وجواهر دي البعد الكبيره.

_ ماشاء الله
_ انتي عمرك كم يا توتيل ؟ معليش اكتر سؤال بتكرهو اي بت 😂
_ لا لا عادي... عمري 22
_ حلووو انا اكبر منك بسنه وراجلك اكبر منك بعشره سنوات 😂.... صراحة فرق شوية كبير لكن حتكونو متفاهمين... م اعتقد حتواحهو مشكله فكريه وكدا بسبب العمر.
_ صح كلامك.
_ معليش كلامي كتير 😅.
_ لا والله هو انا لاقيه زول اتكلم معاه.
_ طيب شكلك كدا مرهقة.... التلاجه ف المطبخ حتلقي فيها عصاير اشربي عشان بعدين تكون نايره كدا 😌💜.... واخدي ليك ريست م تتعبي نفسك 🙁.... عروستنا الحلوة لازم تكوني قمراية بعدين واصلا حتكوني قمراية.
_ طيب ان شاء الله 😂💜.
لجين وهي بتقيف : يلا عن اذنك لي بعدين.
_ اتفضلي.
قدمتها لحدي الباب وبعدها رجعت قعدت ف الكنبه.... زحت التوب من راسها وشالت نفس عميق وهي بترجع بضهرها لي ورا.... بغض النظر عن كل الحاصل حست بي انو لجين دي طيبه..... وشوية الدموع لقت مكان ف عيونها لمن اتذكرت امها وابوها الطولت شديد منهم وم عارفة الحاصل عليهم شنو 💔.
لجين وهي نازلة من شقة توتيل لاقت جواهر الابتسمت بسخف : كنتي معاها يا حلوة ؟ 😏
_ اي 🙂
_ طيب م تخففي دمك وتعمل الظريقة المتقبلاها لانو كدا كدا مصيرها تمشي من هنا.
_ كدي سيبينا من دا هي كعروس

وقاعده ف بيتك مش مفروض انك تمشي على الاقل تقولي ليها مبروك
جواهر باستعلاء : هه.... شنو ؟ اناااااا اقول لي دي مبروك ؟ هو انا موافقة بيها اصلا عشان ابارك ليك.
_ معرساها انتي ؟؟؟ خلاص اتقبلي الامر الواقع.... اخوك فضلها على كل البنات واختارها هي خلاص.
_ اخوي عيونو معميه وحيرجع لطبيعتو قريب.
_ انتي المفروض ترجعي لطبيعتك وتسيبي الاستعلاء والتكبر الفاضي الانتي فيه دا... وانا متأكدة الجملتين ديل على بعضهم كدا م حتقدري تقوليهم ليه شطارتك ف المساكين بس.
_ هششششش استكيني وروقي شوية اعاصابك ي جميل سواء رفضتي او رضيتي البنت دي مصيرها تطلع من هنا وتجي واحدة من مستوانا تكون مكانها
_ عايني الغلط م منك... الغلط مني انا لانو بتكلم معاك عن اذنك 😒.
وتابعت طريقها لي اوضتها.
اما توتيل كانت تعبانه ونعسانه من ليلة امس خصوصا انها م نامت كويس.
مشت باتجاه الكنبه.... ورقدت وطوالي نامت.... م عرفت مره كم من الوقت لمن الباب دقا... قامت بي سرعه وفتحتو لقتها وجدان وكانت شايله ليها علبة صغيرة فيها حاجه زهرية وفرشه.
وجدان : م اكون ازعجتك دي القناع لي وشك اتأخرتي قلت اجيبو لي انا.
_ معليش والله شالتني نومه.
_ لا ولا يهمك عارفاك حتكوني مرهقة وتعبانه ادخلي خليني اعملو ليك.
توتيل رجعت التوب لورا شوية.... و وجدان عملت ليها الماسك ف وشها : خليه نص ساعه واغسليه تمام ؟ اياك تطلعيه عشان يدي المفعول
_ طيب.
_ انا حامشي عشان بتي صغيرة م بتقعد كتير من غيري.
_ خلاص طيب.
توتيل بدت تحس بي سخانه كدا ف وشها.... وكأنو ف نمل بقرص فيها.... استحملت لكن بعد شوية بقا ليها حار شديد حست وشها حيتسلخ.
جرت جري ع الحمام اول م ختت موية ف وشها الاحساس حق السخانه والقريص اضاعف زيادة....قربت تصرخ من الالم.
م عرفت وحدان ختت ليها شنو ف وشها.
جرت شالت فوطه ومشت التلاجه كبت موية باااااردة فيها وبدت تنضف ف وشها براحه براحه.... الموية الباردة شديد م حرقتها لحدي م في النهاية شالت الماسك كلو.
طلعت مكعبات تلج وختتهم ف الفوطه وبقت بتمشي على وشها.
لمن عاينت لي نفسها ف المراية لقت وشها داري دممممم.... بقا احمممممممممممممر شديد وظاهر انو متهيج.
طلعت بره ودموعها بدت تنزل لا اراديا 💔💔💔💔💔.
عاينت للساعه لقتها 4 ونص شوية وسارة حتجيها.... وحتمشي كيف بمنظرها دا.
بي هناك وجدان كانت شايله التلفون وبتتكلم مع نور : 😂😂😂😂😂😂😂 العروس الجميلة حنشوف الليلة حتكون عامله كيف ف عرسها.... اديتك ماسك مدة صلاحيتو منتهية وكبيت ليها فيه شوية حاجات كدا افضل حجبها 😂 الليلة وشها حيتسلخ.
_ بركه خليه اليتسلخ.
_ عايزاك بعدين تكون زاااابطه ف الجرتق عشان لمن يشوفك يتحسر ويندم على انو فوتك من يدو.
_ خلاص طيب بقشر وبتظبط.... وهي حضرتها حتتمكيج ف البيت ولا حيوديوها لخبيره
_ حيودوها لخبيره طبعا.... وم اعتقد يقدر يمكيحوها لانو وشها لو خختو ليها فيه اي شي حيتسلخ 😂😂😂😂😂😂
_ حبيييييييييبتي يا وجدان بردتي لي دمي شوية منها( حسبي الله ونعم الوكيل)
نهاية الحلقة السابعه

عـٰٓشَٰـُـٰٓآقَٰـُـٰٓ آلَٰـُـٰٓرﯛ̲୭آيَٰـُـٰٓآتَٰـُـٰٓ:
#القروية_والوحش
-٨-

🌸اسيرة الوحش
توتيل كانت قاعده وخاتا الفوطه الفيها تلج ف وشها وم عارفة تتصرف كيف....
سمعت صوت نغمة التلفون علت.... مشت بي سرعه شالتو وردت.... ودي كانت ساره.
_ الو... يا عروسة انا تحت يلا انزلي لي.
_ انا لسا م جهزت والله يا سارة و وشي متهيج شديد واحمر وحارقني
_ وشك مالو ؟؟؟ عملتي ليه شي ولا هاج براو.
_ غايتو زوجة سيف ود عم ميكال جات قالت لي عملت ليك قناع... عملتو لي ف وشي وبس وحاتك النار مسكت ف وشي.... ولمن غسلتو بالموية زاد اكتر.... الا نضفتو بموية باردة.
_ لا حول ولا قوة الا بالله... طيب اسمعيني.... البسي هدومك وانزلي لي تحت سريع قبل م الوقت يفوت.
_ طيب
قفلت التلفون ومشت لبست ليها هدوم بي سرعه وفتحت الباب عشان تطلع لقت وجدان ف وشها.
وجدان عملت نفسها مخلوعه : هيييي دا شنو دا وشك مالو 😵
_ والله من م عملت القناع الاديتيني ليهو دا بقا كدا.
_ واااااي انتي عارفة بشرتك بتكون حساسة شديد... انا بعملو دايما نهائي م عمل لي اي شي.... ولا تكوني بتستعملي كريمات وش حاره عشان كدا.
_ ابدا يا وجدان م بعمل كريمات.... لكن على قولك بتكوني بشرتي اتحسست منو
_ كر عليكي حبيبتي.... هسه ماشا وين ؟
_ ماشا لي سارة تحت
_ ايوااا خلاص اتفضلي م اعطلك
_ طيب عن اذنك
مشت منها ووجدان راقبتها بنظراتها الخبيثه.
توتيل نزلت بهدوء تحت واتحركت ناحية البوابة الدخلت بيها امس.... لقت سارة واقفة ليها بره.
سارة حاولت تخفي دهشتها عشان م توتر توتيل باعتبار انها عروس وكدا.
قالت ليها بنبرات مطمنه : م تخافي م تخافي هسه كنت بتكلم مع صحبتي دكتورة وورتني مرهم ان شاء الله حيلطف ليك بشرتك ويزح التهيج والاحمرار الشديد دا.
_ طيب.
ركبتو الاتنين.... وفعلا سارة جابت ليها المرهم وعملتو وبعدها مشو المركز.
_______
سيدة كانت قاعده تحت الشجره وضاربه الهمبريب مع بنات الحله وببشربو ف الجبنه.
واحده من البنات : عاد توتيل من يوم عرست قطعتو معانا ناااشف التلفون دا م شالتو وضربت.
سيدة : اتن عارفات ظروفها الخلتا م تضرب 😒... بعدين من متين العروسات بضربن يسألن من الناس البت عروسة جديدة اسبوع م كملتو
_ هيا اختي مالك زعلانه كدي انا بتكلم ساي
واحدة تانيه : لكن عرست ليها راجل الصلاة على النبي محظوظه.
سيدة : هه الله عالم الهي عايشاه هسه
_ قصدك شنو آ سيدة
_ لا ياختي م قاصدة شي صبي لي جبنه تاني.
_ عك الله يا بنوت م اشتقتن ليها ؟
واحدة تانيه :اي والله يا حليلها زي م يقولو نوارة الفريق.... كانت بتضحكنا وتونسنا.
_ وحات اسم الله قدر م اجي ماره بي بيتهم قلبي دا لامن يوجعني والدمعه دي تنزل مني.
سيدة : خلاص عليكن الله يا بناات م تبكني غيرن سيرتا... الله يسعدها وين م كانت.
_ هي هي كدي دقيقه 🙊... سمعتن الخبر 😂... قاليك عباس ختب سكينه بت خالتي التومه.
_ اجججججي ؟ البت صغيره عليو
_ يا بت قالتلو م دايراك... قالت دايرة تقرا
سيدة : بركه.... هو عباس دي منو المعولقه البتقبلبو دي... فقر خلاس.
_ وامو شايفاهو ليك ماف راجل متلو... سيد الناس لي حدهم.
_ صحي القرد في عين امو غزال
علت صوت ضحكاتهم.
واحدة تالته : كدي سيبكن من سيرة عباس....احمد 🙈 لسا ماف واحدة عجبتو ما داير يختب بعد دا ؟
سيدة بقت مركزة ف الونسه بس بدون م تتكلم 😂😍
_ عاد محظوظة البيختاره 😭.
_ امو الايامات دي شايفاها مصاحبانا شكلي كدي عجبتها
_ يا بت امي تعجبي في شنو بتفتك دي اسكتي ساي
_ اتي متغاااااايزة مني.... كبي لي جبنه ياختي خليني انشرب.
سيدة : اي منك ليها اشربن الحبنه وبطلن الكلام ف اولاد الناس.
_ هسه م كنا بنتكلم ف عباس 😏
_ عباس دا م ود ناس آ بت امي 😒.... غيرن الموضوع هدا زاتو اختو جايا علينا.
___________
الساعة كانت 8 م لمن الضيوف من فئة النساء بدو يوفدو لحديقة القصر المقام فيها الجرتق.
وجدان واقفة مع ماما عشه وبتستقبل ف الضيفات.... كان قاشره بتوب الحرير والحنه الرسم والاساور الدهبية تشيل وتكشكش فيها.
طبعا زي م قلنا ماما عشه بتاعت بوباااااااااااااااااار.
عشان كدا عملت حاجات خرافية للجرتق..... وجدان ابتسمت لمن شافت نور جايه داخله.... كانت لابسة فستان اسود لحدي تحت ركبتها بشوية ومنفوش فيه لمعه بالفضي وعامله شعرها ويڤي.
وجدان : ماشاء الله ماشاء الله منووورة.
نور بي ضحكه : بنوووورك.
_ تعالي تعالي سلمي على ماما عشه.
وقفتها قدامها وهي بتقول : ماما عشه دي صحبتي نور😊.
ماما عشه بعد نظرة متفحصه : ازيك يا بتي ان شاء الله كويسة.
_ الحمدلله بألف خير... مبروك لي ميكال

_ الله يبارك فيك يا بتي عقبالك ان شاء الله
نور بضحكه : تسلمي
مشت مع وجدان القعدتها في واحدة من التربيزات القريبة للجلسة حقت العرسان : اقعدي هنا عشان تشوفي هناية 😂😂😂😂😂😂.
شوية كدا الدلوكه بدت تلبع 😂.. والفنانه بقت بتغني.
النسوان شغالين يجو يسلمو على ماما عشه ويباركو ليها ويسلمو على البنات اخواتو الكا

نو متأنقات وراسمين ابتسامات رزينه.
نور اعتدلت ف قعدتها وبقت بتعاين بي فضول لمن ميكال جا داخل وكان ماسك توتيل من يدها.
وشها كان مغطى.....والناس كلها بتعاين ليها عايزين يشوفوها طلعت كيف.
لحدي م وصلو قريب للجلسة والنسوان الكبار بقو بقولو ليه اكشف وشها.
زحا القرمصيص المغطي وشها براااااحه.
وطبعا الكاميرا مركزة على وشها.
غايتو لمن وشها اتكشف الناس دي لمن شهقت..... العيون الواسعه والرموش الطويلة والحواجب الطويلة المقوسة.... واهم شي الغمازتين الظاهرين مع الابتسامه.
كانو عاملين ليها ميكب ترابي هادئ وروج احمر شوية غامق..... وشعرها لانو ماف رجال مفكوك.
كانت جميلة شديد مع توبها الاحمر والاكسسوار اللابساه.
والنسوان يشيلو ويزغرتو ويقولو لي ماما عشه : عاد عروسكم ماشاء الله.
نور عاينت لي وجدان... وظهر الغيظ ف وشهم الاتنين.... ونور لمن غلبتها القعده خصوصا لمن بدو يجرتقو فيهم....لجين كانت واقفة جمبهم ومبسووووطه وتصور فيهم اما الباقيات لاويات بوزهم.... جوري بس امعه ماشا ورا جواهر البتقولو ليها بتعملو.... اختها لاغيه ليها شخصيتها.
بعديها بدو يوزعو ف الفال للبنات والنسوان... ورجعت الفنانه تصدح من جديد.... ميكال اداهم كم بشيره كدا وبعدها طلع لي وائل الكان منتظرو برا ف العربية.
وائل وهو برفع صباعو : ابشر يا عريس ☝.
بشر ليهو باستهبال وركب معاهو.
وجدان جات قعدت جمب نور.
نور : بخصوص قلتي لي وشها اتسلخ وبتاع 😒
_ والله العظيم وشها لمن شفتو ينعل قفاها احمر ووارم م عارفاها عملت شنو.
_ اخخخخ لمن شفتو ماسكها من يدها وداخل بيها قربت اقوم اقتلها واكل كبدها ني.. الله لا بارك فيها
_ لسا عندنا حاجات كتيره نعملها عشان نأذيها ونبعدها منو ونجيبو ليك.... بس خلي الايام الهي محسوبة فيها عروسة دي تنتهي.
_ اها وحيوديها شهر عسل ؟
_ طبعا.
_ انا اولى منها 💔.... انا بحبو وصابرة سنين عشان يكون لي بغض النظر عن كل شي كان بيعملو... تجي ف النهاية تشيلو هي 💔 تفوز بيهو هي بالبساطه دا وتحسب انها زوجتو وتعيش معاه ف نفس المكان وتشوفو اليوم كلو.... حاسداها عليه والله حاسداها انا احق بيه 💔
وجدان بنظرات شفقة : م فات شي... انا مش قلت ليك خليك قوية ؟ تشوفي بعيونك حيحصل ليها شنو.... وزاتو عشه الفقر م قبلانا بيها ولاااا طايقاها...يعني الله يعلم زاتو لو كملت سنتها دي معاهو.
_ غايتو بس ربنا يصبرني.
توتيل كانت قاعده وشايفة نظرات الحسد من بعض البنات ليها.... كانت عارفة انو في كم واحدة متمنيات لو كانو ف مكانها هسه... وهم م عارفين انو هي ممكن تعمل اي شي عشان تكون ف مكانهم بعيدا عن الوحش البقا مهيمن على حياتها 💔.
مرت الساعات حقت حفلة الجرتق والناس استمتعت فيها.... وبعدها الضيوف بدو يودعو.
لجين طلعت مع توتيل عشان تساعدها ف فك الجدلة والاكسسوارات.
ملصت توبها ودخلت الحمام عشان تغسل المكياج من وشها .
لمت شعرها بمشبك وجات طالعه.
لجين : جعانه يا توتيل ؟ اكلم ريتا تجيب ليك اكل ؟
_ ممكن
_ خلاص طيب انا زاتي بالمره باكل معاك 😂☝.... يلا مسافة تاخدي ليك دش وتغيري هدومك
_ تمام
رجعت تاني اخدت ليها دش منعشششش ❄❄❄
جففت جسمها ووشها ولبست بجامة حلوة ومحترمه وجات طالعه من الاوضه للصاله... لقت لجين مستنياها بالاكل وبدو ياكلو.
لجين : طلعتي حلوة شديييييد بالجدلة
توتيل بضحكه : شكرا 😅💜.... طبعا قبيل وشي بقت عليه حالة لا يعلم بيها الا الله
_ مالو ؟ 😵
_ وجدان ادتني قناع عملتو قرب يحرق لي وشي
لجين باستغراب : وجدان ؟؟؟ هي اصلا من متين بتتعامل مع الناس ؟ عازلة نفسها وراجلها من البيت كلو..... غريبة.... والقناع حق شنو ؟
_ والله م عارفة.... بس لونو بمبي كدا وقالت لي م تطلعيه الا يتم نص ساعه... حكاية ربع ساعه كدا حسيت بي وشي دا الناااااار طوالي مشيت غسلتو واحساس الحرق زاد مع الموية الا عملت موية باردة وتلج..... ووشي بقا ورام واحممممممممممممممممممممممر.
_سلامتك ان شاء الله
_ الله يسلمك
_ وعملتي شنو عشان يهدا؟
_ سارة جابت لي مرهم.
_ احسن اتصرفت... اي الحمدلله.
كملو اكلهم و ونستهم وبعدها لجين اتمنت لي توتيل ليلة سعيدة وطلعت.
توتيل كانت تعبانه شدييييييد ونعسانه..... طوالي شالت ليها بطانيه صغيره ومشت رقدت في كنبتها... م اخدت كتير وطوالي نامت .

طبعا الكنبه صغيره وم مريحة... جاتها صحيه كدا فجأة... لقت رقبتها متيبسة وجسمها معسم عسيم السنين.
عاينت للساعه لقتها 2 صباحا.... والسرير كان فاضي وميكال مافيش....
ولا هظرت طوالي شالت مخدتها ورقدت ف السرير اتمغت فيهو بأريحيه كدا.... كان ناعم ومريييييييح وختت راسها نااااااامت....
لحدي م جا الصباح... فتحت عيونها بي كسل وهي بتتثائب اول مرة تنوم نومه مريحه من م جات الخرطوم.
عيونها اتوسعت باستغراب لمن بدت تستوعب الحاصل.... عاينت بي خلعه لليد الرجالية المحاوطاها..... بلعت ريقها وهي بتحاول تطرد ف الافكار البدت تتوارد ليها.
اول م رفعت راسها اكتشفت انها كانت نايمه ف احضانو.
شهقت وه

ي بتنط من السرير بطريقة خلتو هو زاتو يصحى من النوم.
قالت ليها باندفاع : انت المرقدك ف سريري شنو ؟
عاين ليها ف البداية باستغراب... لكن تاني ابتسم ابتسامه نعسانه وهو بقول ليها : م اعتقد زول طولو اتجاوز المية وتسعين حيقدر ينوم ف الكنبه الصغيره دي و بعدين انتي النمتي ف سريري.... واحمدي الله انتي اتصرفت معاك بنبالة لمن رقدت جمبك وانتي بنفسك جيتي ختيتي راسك ف صدري شكلك قايلاني مخده.
_ انت مستحيل تكون زول طبيعي ك كيف نفسك سمحت ليك كان على الاقل تحترم انو انا تعبانه عشان كدي نمت ف السرير... وانت كان ممكن تشوف ليك اي سرير تاني ماشاء الله بيتكم كبير.
قعد وهي بيتمطى وبيتثائب : والله انا حر انوم ف المكان العايزو بعدين لي انوم ف اوضة براي ومرتي هنا.
_ انا مرتك على الورق بس انت اتزوجتني عشان شي وانا اتزوجتك عشان شي تاني فاي واحد يحترم حاجات التاني لحدي م السنه دي تتم.... واعرف اني م حخليك تقرب لي لاني بكرهك.
قال ليها ببرود : اوكي اذا كدا معناها انا حوقعك ف حبي.
_ هه 😏...هو انت بتعرف الحب ؟؟؟ امثالك بيلوثوه بعمايلهم( قاصدة نور لانها مفتكره انها حبيبة ميكال وهو سابها وعرس غيرها)
_ فعلا م بعرف الحب ولا بأمن بيه... لكن ف شي اسمو جاذبية وكيمياء بين الناس.
_ دي فلسفاات مختلقة انت عشان تبرر عمايلك 😊.
عاين ليها مساااااافه قبل م يقوم من السرير ويقول ليها : انتي مناسبة شديد لغروري.
ودخل الحمام.
مشت يدها ف شعرها بعصبية.... وخدودها اخدت لون احمر ناجم عن غيظ وغضب وخجل.
قعدت ف طرف الكنبه بعد م شالت ليها طرحه اتلفحت بيها وبقت منتظراه يطلع.
جا طالع بعد مسافة وهو لافي بشكيرو ف خصرو.... جا ماري قدامها... سمع صوتها الهامس وهي بتقول استغفر الله العظيم.
اتفاجأت بيه رجع ليها تاني وقعد قدامها وهو بقول ليها : حتدخلي الجنه بسببي ان شاء الله.... غيري هدومك وانزلي لي تحت
م عاينت ليه شالت ليها غيار وطوالي دخلت الحمام.
هو لبس هدومو واتريح ونزل تحت.... لقا الجماعه كلهم قاعدين مع ماما عشه.... وبشربو ف شاييهم.
قعد جمبها.... الكنبه بتاعتها البتقعد فيها كان فيها قعدتين م بترضى اي زول يقعد فيها الا ميكال.
عاينت ليه وهي بتلوي بوزها : وين ست الحسان ؟؟؟؟ لسا نايمه ؟؟؟
_ لا صحت بس ف الحمام
_ ممممممممم
جوري : اها يا ميكال مسافرين وين ؟
_ مسافرين بكروز( سفينه بتزور عدة بلدان... تختار الوجهة العايزها مثلا اوربا بتسافر كم بلد اوربي.... اسيا بتمشي بلدان اسيوية.... وكمان في للأمريكيتين.... وهي احلى وم مكلفة زي الطيارة لو عايز تزور اي بلد براها)
وجدان حمرت لي سيف 😒.... وهو بلع ريقو وعاين ليها بخلعه( بيخاف منها )
لجين : حتقضو كم يوم ؟
_ يعني 11 او 12 يوم بالكتير.
_ لي ايام بسيطه كدا ؟
_ اول شي الشغل.... تاني شي اصلا دي الايام المحدده للرحلة.
_ اهااااا ربنا يوديكم ويجيبكم بالسلامه
_ الله يسلمك
ماما عشه : مخير الله.... غايتو صحي الدنيا حظوظ.
نغمة تلفون ميكال علت وطوالي شال تلفونو وقام من جمبهم.
ف اللحظات دي توتيل جات نازلة.... كانت لابسة عباية خليجيه جميلة ومحجبه.
وجدان بتصنع : هيا العروووووووس صباح الخييير
كلهم قبلو عليها...
ماما عشه وجواهر رمقوها بنظرات مقرفة.
لجين : تعالي يا توتيل.
جات عليهم وهي بتقول : السلام عليكم
ردو عليها السلام.
لمن جات مارة بجمب ماما عشه سمعتها وهي بتقول بهمس لكن مسموع : عولاق السنين.
قعدت جمب لجين وهي ساكته.
ماما عشه : انتي انصارية سنه يا بتي ؟
توتيل : انا ؟
_ اي اتي ف غيرك ؟
_ آ لا
_ وشنو العبايات ؟؟؟ العارفاه انو العروسات بلبسو التياب.
ابتسمت وهي بتقول ليها : خالف تذكر.
_ مممممم... طبعا انا حبوبة ميكال ام ابو.... عشة الشرقي
_ اتشرفنا
_ ودا سيف ود عمو ودي طبعا زوجتو... والتلاته ديل جواهر وجوري و لجين اخواتو بنات ابوه.
ابتسمت ليهم ابتسامه بريئة وحست بي عدم الراحه ف نصهم.
ماما عشه متابعه : وصحي اتعرفتو على بعض كيف ؟

_ بس اتقابلنا لمن جا يشتري الارض الاحنا فيها وبس.
_ و بس ؟؟؟ دي كل القصة ؟؟؟؟
جواهر : م مصدقة ولا شنو يا ماما عشه ؟
_ لا يا بتي مصدقة الزمن دا اي شي ممكن يحصل.... بقو بجيبوهم من الرواكيب والغنم للقصور والعربات.
جواهر ضحكت كانو قالو نكته مضحكه... ووجدان ابتسمت بشماته من كلام ماما عشه.
توتيل بقت بتعاين ليها... وحست دموعها شوية وحتنزل.... كان نفسها انهم يعرفو انو هي متزوجاه لي.... والفايدة الهو طالع بيها من ورا الزواج دا.
نزلت عيونها للارض.... وقلبها وجعها شديد من الكلام
لجين اتحرجت شديد وزعلت من الكلام وم عرفت تتصرف او تقول شنو.
ميكال جا راجع لمن شافها قاعده قال ليها : نمشي بعد دا ؟
م كانت عارفة عايز يسوقها وين... لكن هزت ليه راسها.... اي مكان حيكون ارحم من القعده دي.
ميكال : خلاص يلا.
قامت وهي بتقول : عن اذنكم.
مشت بوراه وهي ساكته.... لحدي م وصلو للعربية.... اصلها لا اتكلمت ولا فتحت خشمها بس فضلت ساكته وجملة ماما عشه بت

رن ف اضانها.
ميكال وصل بيها لي مستشفى رويال كير ونزل... وهي ماشه وراه وم عارفة هو حيعمل شنو.
وقف قدام باب اوضة وعاين ليها وبعدها فتح الباب.... اول م فتح الباب شافت ابوها راقد.... وامها قاعده ف الكنبه قريب منو.
قلبها ضرباتو زادت ودموعها لا اراديا نزلت لمن شافت احن اتنين عليها.... حست بالامان منتشر ف المنطقه دي وبي سرعه دخلت... امها اول م شافتها وقفت : توتيل 😍
_ يما
ارتمت ف احضان امها الكانت نسخه شبيها ليها.... ميكال عرف انو هي وارثة جمالها من وين.
الام وبتها كانو مشتاقين لبعضهم موت.... توتيل باست راس امها ورجعت حاضناها تاني كأنها م مصدقه انو بالجد امها واقفه قدامها.
نهاية الحلقة التامنه.

عـٰٓشَٰـُـٰٓآقَٰـُـٰٓ آلَٰـُـٰٓرﯛ̲୭آيَٰـُـٰٓآتَٰـُـٰٓ:
#القروية_والوحش
-٩-

الطيب ابو توتيل صحا من نومتو بصوت توتيل وامها.... اول م شاف بنتو البحبها وشو نور من الفرحه واللون الباهت الكان فيه زح 💜.
مشت ليه وهي مبتسمه...مسكت يدو وباستها ليه.... وهو بيدو التانيه مسح على راسها.
_ كيفك يا ابوي ان شاء الله طيب
_ طيب بشوفتك يا بتي.
اتحول ببصرو للشاب الواقف جمب الباب : اتفضل اقعد يا ابني.
ميكال جا عليه : سلامتك يا حاج
_ الله يسلمك ان شاء الله.
اقبال( ام توتيل ) سلمت عليه.
قعد شوية واستأذن منهم وطلع بره.
توتيل كانت قاعده ف السرير جمب ابوها.
اقبال : يا بتي انقطعتي الكم يوم ديل وين ؟
_ والله يا امي م كنت عارفة ليكم درب 😣 ميكاال م وراني انتو ف ياتو مستشفى
_ عاذراكم يا بتي انتو ف النهاية عرسان.... اها وريني هو كيف زول كويس ونسابتك كيف ؟
_ الحمدلله ناس طيبين وكويسين وهو زاتو زول كويس شديد.
_ الحمدلله يا بتي الله اداك على قدر نيتك.
_ الحمدلله 💔... وانتي يا امي الايام دي قضيتيها كلها ف المستشفى.
_ اي يا بتي... وزاتو خلاص ابوك قرب يبقى كويس ماشي كويس ف العلاجات م بناخد وقت طويل ونرجع البلد تاني....
_ ان شاء الله ربنا يقومو بالسلامه.
قعدت وقت طويل اتكلمت مع امها واتونست معاها لحدي م نبهوهم انو وقت الزيارات انتهى.... توتيل ودعتهم وطلعت برا.
ميكال كان قاعد ف العربية.... وعيونو مركزة مع الطفل الصغير الهزيل الشايل مناديل وبحاول يبيع فيها.... كان مركز معاو لدرجة م انتبه لتوتيل الفتحت الباب وركبت.
بعد شوية انتبه من شرودو وعاين ليها.
كانت منزلة عيونها وقالت ليه : شكرا.
اتحرك وهو بقول : على ؟
_ لانك جبتني لي امي وابوي
_ اهااا.... لا العفو.... بس انا جبتك ليهم عشان تاني م حتشوفيهم
_ ن نعم ؟ كيفن م حشوفهم ؟
_ م قادر اشرح ليك المهم بس تاني م حتشوفيهم عشان م تقعدي تبريني ف الدخله والطلعه بي بدور اشوف اهلي .
سكتت شوية : يا ميكال
_ اها
_ عاين.... بما انو انا وانت اصلا كدا كدا زواجنا على ورق وانت عايزو عسان يوصلك لي شي وتقريبا كدا وصلتو فشنو رايك انو تخليني امشي.
_ كيف يعني
_ يعني انا ارجع لي اهلي وانت على اساس انك مسافر وانا جيت اهلي وبس.
_ بالمناسبة زواجي منك دا م عشان اوصل بيه للعايزو وبس ... لا كمان عشان اسكت بيه الناس الحشريين وحبوبتي.... ف طلبك مرفوض و اياك تقترحي علي طلب زي دا تاني.
_ لكن انا ابوي عيان ومحتاج لي هو وامي
هز كتافو : اها وانا مالي ؟ دخلي شنو ف النقطه دي.... دا م شي بيهمني كتير.... كلها كم شهر وتمشي ليهم وتشبعي منهم
كانت بتعاين ليه بذهول وهو بينطق بكلماتو القاسية : حسبي الله ونعم الوكيل.... انت لي كدا ؟؟؟؟ لي بتعمل كدا وبتستفيد شنو لمن ترمي كلامك البسم البدن دا
_ والله دا انا كدا واسلوبي كدا فتتقبليه م تتقبليه دي مشكلتك.
_ ربنا يكمل السنه دي سريع ويرحمني منك ومن لسانك.... خسارة الاسم فيك... ميكال دا اسم ملاك مذكور ف القرآن لكن انت اعوذ بالله اسوأ من الشيطان.
ضحك بصوت عالي : اوكي تمام.
فضلو ساكتين الاتنين لحد م وصلو.
توتيل طلعت فوق طوالي غيرت هدومها وقعدت ف الكنبه.... كانت زعلانه شديد من مطاعنات ماما عشه بجهة ومن تصرفات ميكال بجهة.
التعب اخد حقو منها وغفت.
صحت بصوت الباب بدق... مشت بسرعه وفتحتو لقتها لجين.
لجين : صحيتك من النوم شكلو 😅
_ لا عادي ولا يهمك
_ الغداء جاهز انزلي
_ لا لا انا م جعانه
_ لا والله مستحيل تكوني م جعانه 🙁... عليك الله ارح
_ والله العظيم م جعانه... اكلت اصلا
_اكلتي ؟ اكلتي وين ؟
_ آ آ ميكال وداني محل واكلت
_ مممم خيانات وكدا 😂
_ اي 😂😂😂😂
_ عايزة اقول ليك شي
_ اتفضلي
_ مممممم... م تزعلي من كلام ماما عشه القبيل والله هي طيبه شديد بس بتجدع الكلام ساي من دون م تخلي بالها.
_ حصل خير 😊
_ م تزعلي طيب ؟؟؟
_ لا لا ماف اي زعل
_ بالمناسبة انا مسافره بورتسودان بكره الفجر
_ ربنا يوصلك بالسلامه ان شاء الله.
_ الله يسلمك حبيبتي 😍
_ وحترجعي متين ؟
_ حاخد شهر
توتيل جواها حست بالحزن عشان هي حتمشي تخليها... من م جات هنا ماف زول مهتم بيها ومحترمها زي لجين.
_ استمتعي 😍
_ ان شاء الله وانتي برضو استمتعي بالهني مون حقك 😂
_ ان شاء الله 😂
_ يلا م اعطلك.... عن اذنك
_ اتفضلي
وطلعت من شقتها وتوتيل قفلت بابها ورجعت لكنبتها.
فجأة الملل الذي لا يطاق حاصرها من كل جهة 😢.... فتحت التلفزيون وبقت بتتفرج.
لجين نزلت تحت للقاعدين ف السفره عشان ياكلو.
ماما عشه : اها وينا المحروسة 😒
_ قالت اكلت.
_ اكلت وين ان شاء الله ؟

_ مع ميكال
ميكال عاين ليها ببرود كان مستغرب لكن مبيعرفش يعبر بملامح وشو 😁
_ ممممممممممممم... خلاص اقعدي اكلي.
قعدت وبدو ياكلو.... بعدها ميكال طلع فوق اوضتو.
لقاها قاعده وبتحضر.
قال ليها وهو بيطلع ف ساعتو : قلتي اكلتي معاي!
عاينت ليه وم ردت.
اتوجه ناحية التلفزيون وقفلو : قلت ليك وم حكرر كلامي تاني حركات تجوعي نفسك وكدا دي م تعمليها لي هنا.... ر

ب بعد تكملي سنتك اعملي العايزاه ف نفسك
غطت وشها بيدينها بلا مبالاة : وانا م جعانه.... وم عايزة اكل في مشكله ؟؟؟؟ لو سمحت خليني ف حالي
ابتسم باستهتار : اخر مره قلتي لي فيها كلام زي دا صوت بطنك وصل الشارع..... بطلي الدور الداخله فيه دا اتلقيك ميته من الجوع حركات البنات دي انا بعرفها.... ع العموم انا جبت ليك اكل حتلقيه ف المطبخ.
دخل شال ليه هدوم ومشا على الحمام.
توتيل حلفت ستين يمين كان تاكل شي منهم... قامت فتحت التلفزيون تاني وفضلت قاعده.
صوت تلفون ميكال علا... وميكال محكر ف الحمام والتلفون يشييييل ويضرب ويشششششل ويضرب.
توتيل ولا هوبت نحوه.
بعد مسافه كدا هو جا طالع من الحمام.... مشا على التلفون الكان لسا بيضرب ورد : الو
شوية نبرت صوتو اتغيرت : نعم ؟ شنو ؟
توتيل بقت مركزة معاه وبتعاين ليه.
_ اهدا اههههدا م تخاف اوكي تمام تمام انا هسه بوصلها.... اوكي تمام انت بس تعال المستشفى...ياخ م تخاف قلت ليك خلاص مع السلامه.
بلعت ريقها وهي بتقول ليه لا اراديا : في شنو ؟
شال مفاتيحو بسرعه : زوجة وائل بتولد وهو بعيد شديد من البيت... وهي ماف زول معاها.
_ ممكن اجي معاك ؟
_ اوكي بس اطلعي سريع.
لبست العباية الكانت لابساها وجرت بوراه.
ركبو العربية وقبل م يتحرك قال ليها : اربطي حزام الامان.
بقت بتتلفت تربطو من وين.
هز راسو وانحنى عليها..... كتمت انفاسها وهي بترجع بي ضهرها لورا عشان م يلمسها... ربطو ليها سريع واتحرك.
كان سايق بسرعه وبيتخطى ف العربات وعمال يشتم ف اي زول يعارض ليه 😂🙊.
وهي بس بالعه لسانها..... عاينت لي جنبة وشو.... كانت ملامحو بتعكس كمية من البرود الرهيب.
قبل عليها وهي طوالي رجعت بي بصرها قدامها 😂( توتيل تسترق النظرات 😂)
لحدي م ف النهاية وصل العمارة الساكن فيها وائل.
نزل بي سرعه وتوتيل نزلت بوراه.
وصل لحدي الطابق التالت وبقا بيضرب ف الجرس.
توتيل : هي كيف حتقدر تفتح الباب ؟
لثواني بدرت لي ميكال انو هي قاعده في سريرها وبتتوجع وبتبكي وم قادرة تقوم...وف الحالة دي الا يكسر الباب.
بس م الساعه التفتح ليهم الباب.
كانت لابسة ليها جلابية خليجيه انيقة وديك يا الحنه والتسريحه و الطرحه والمكيب الخفيف وشايلة شنطة حاجات البيبي.
توتيل وميكال بقو بعاينو ليها كدا : 😳
ابتسمت وهي بتقول ليهم : والله العظييييم انا كويسة وعارفة وائل حيكون قلقكم علي.... بس انا ضربت ليه لمن حسيت بي رفسات كدا وهو اتخلع وبقا ملبوش وقال لي حتولدي هسه معناها وانا حضرب لي ميكال يجيك وم اداني فرصة زاتو اتم ليه كلامي.
ميكال وهو بشيل انفاسو : وائل حسسني انك شوية وحتموتي نفسو قايم ويكورك قدرتو
_ معليش يا ميكال انت عارفو براك 😂.
ظهرت ملامح الم ف وشها وتاني زحت: خلاص بس وقت وصلتوني ودوني المستشفى... عشان دكتورتي قالت اجي.
ميكال : طيب يلا.
توتيل شالت منها الشنطه وساعدتها تنزل السلم.
ركبت ورا وتوتيل ركبت قدام وميكال اتوجه على المستشفى.
رضا( زوجة وائل) : ميكال.... بس معليش ممكن تسرع ؟
ميكال وهو بعاين ليها بالمراية :مالك ؟
_ بقت واجعاني شديد.... اسرع عليك الله 😭.
_ طيب طيب امسكي نفسك.
داس بنزين وفلاااا بيهم.
وصلو المستشفى وهنا زولتنا خلاص حالتها بقت صعبه.... وشها بقا شاحب وشفايفها بقت جافه وعيونها بقت واقعه.
قعدوها ف كرسي نقال وجرو بيها على غرفة التوليد.
ميكال وتوتيل فضلو قاعدين برا ف الاستقبال.
شوية كدا جاهم وائل مفحط لمن اتزحلق في السراميك.
ميكال : اهدا.... دخلوها غرفة التوليد اقعد من دون ولا كلمه ومتفهم اي شي انا 🙂
وائل وهو بشيل ف انفاسو : تعبت ؟
_ لا لا مرتك شجاعه م جرسه زيك.
توتيل : ربنا يطمنك عليها
_ امين يارب امين امين امين.
فضل يتحرك ماشي وجاي.... جاي وماشي.
ميكال قام وجا قعدو ف الكرسي : اهدا ممكن ؟
_ يا ميكال عشان انت م في مكاني ياخ.
_ طيب برضو اهدا البتعمل فيه دا م حيعمل شي استكين لحدي م طفلك يطلع.
_ طيب بحاول.
قال جملتو وهو بقيف على حيلو ورجع للحركه حقت يمشي ويجي تاني 😂.
مضى الوقت زي السنين الطويلة بالنسبة ليهم لحدي م جات الممرضة وهي شايلة البيبي وبتقول ليهم : مبروك عليكم الولد.
وائل وهو بعاين لي ميكال : ولدي انا ؟ انا بقيت ابو ؟