طَال البِعاد وقلبي ليس يَحتملُ
ما عاد لي في الهوى مِن بَعدكم أملُ


#قصيدة

بعد الركض الطويل لأميال، واللهث في عدة اتجاهات بين مجهولٍ وغيرِ مفهومٍ ومطلوب....، وبعد نفاذ كل الحيل والزّاد وضياع البوصلة والتّيه وكل الحاجات دي.. هتقف مع نفسك شوية
هتلاقي إنك مش قادر تكمل، هتلاقي رجليك ترتجف وأنت شايف المجهول وغير المفهوم والمطلوب وكل حاجة بتجري كعادتهم لكن لوجود أشياء عديدة كامنة في داخلك هتلاقي إنك يمكن مش لأول مرة هتستسلم وتقعد..
هتفقد الأمل وهتسمع كلام اللي بيقولوا اليأس راحة، هتبطل تعمل معادلات وتحليلات عشان تخلي الركض القادم أكثر نجاحًا.. وتقرر تاخد نفس عميق من غير ما نحس إنك محتاج تلاحق حاجة.

وهنا هتدرك إنه أحيانا الأمر يمكن أكبر من قدرتك، وإنك موجود ف مفترق طرق مخترتش تكون فيه لكنك مضطر تكمل.. وبينما أنت مش قادر تكمل ومش قادر متكملش.. وفي نفس الوقت طريقك مش هيمشيه غيرك، هتختار تستند لربنا، هتشكره على إسلامك، واستسلامك
وتستسلم لفكرة إنه في حاجات ف الحياة مش هتقدر عليها ليس ظلمًا إنك اتحطيت فيها بما لا يناسب تحملك.. بل لاعتقادك إنك هتقدر عليها لوحدك بدون مَن بيده ملكوت السماوات والأرض.
فـ اعمل shut down، شيل الفيشة، بطل تجري وأنت تعبان ومرهق، بطل تعمل معادلات صعبة.
عالأقل لو اخترت تكمل الطريق للمرة الألف، يكون حِملك أخفّ، ونَفَسَك أهدى، وخطواتك ثابتة، وغير مستوحش.

#نــص

"لا أملُّ ثوبي ما وسعني، ولا أملُّ زوجتي ما أحسنت عشرتي، ولا أملُّ دابَّتي ما حَمَلَتْني؛ إنَّ الملال من سيِّىء الأخلاق"

-عمرو بن العاص

قفشت نفسي النهاردة وأنا بقارن نفسي بحد وإنجازاته بعد ما وعدت نفسي مش هعمل كده تاني..

من سنتين تقريبا كنت بحكي لحد حاجة فـ قالي أنت ليه حاطة نفسك مكانه وبتقيسي عليه؟ بيئته غير بيئتك، ظروفه غير ظروفك، شخصيته غير شخصيتك، حياته كلها غير حياتك..
and it was like..
هي دي يجماعة.. هي دي.
كان وَقعها عليا مختلف لأنها ف الموقف نفسه..
أحيانا كتير الشخص مش بيكون مدرك مشكلته حتى لو بيسمعها يوميا وبيشوفها على كل جدران الشوارع ولا يُسقطها على نفسه وفاكر إنها ممكن عند ناس تانية لكنه زالفل (مع اختلاف المثال وحجم المشكلة طبعا)
ولما بيسمع نفس النصيحة ف الوقت الصح بتكون حاجة بتنور فجأة في ذهنه..

المهم أول ما أبو المخاميخ ييجي يسوّحك ويدخلك ف حوارات جلد الذات والتيت والشريط ف حياة الناس ويبعدك عن حياتك... قوله هوب هوب رايح فين؟ أنت مسمعتش إنه بيئته غـ.....


#نــص

الفقد هو نداء اليقظة الذي يذكرنا بقيمة ما بين أيدينا من النعم.

ولا تعرف قيمة النعمة شخصًا كانت أو شيئًا إلا إذا أحدقت بك حوادث الخسران توشك أن تنزعها من بين يديك.

وهذا من نكد الإنسان إذا كثيرًا ما يمرق سهم الفقد فلا ينفعك أنك قد أدركت قيمة النعمة بعد إذ وقع خسرانها.

-مـنـقـول

الإنسان اللي بيسمح للناس تتجاوز معاه مش طيب، ومش حبّوب، ومش مريح في التعامل..
اللي بيسمح إنه حد يتخطى حدوده مع الوقت يصبح شخص مَهين، محدش بيحترمه، غير جذاب، بلا كرامة (مَداس بالعامية)

وضع الحدود مش معناه تكون شخص وَقِح ولا عنيف، بل معناه بكل بساطة وبلا تعقيد إنه في حدّ معين مهما كان الشخص اللي قدامك مين مينفعش يتجاوزه..

وبتتقال كده بوضوح بأكثر من طريقة..
-يمكن باختصار (لا، مش مناسب معايا)
-يمكن بهزار خفيف لكن حازم
-يمكن مع ابتسامة هادئة واثقة في جملة واحدة وأحيانا كلمة واحدة

بِلا تبرير لأسباب
بِلا نبرة صوت مهتزة
بِلا اعتذار (أصل معلش مش هسمح ليك تشتمني عشان أنا بتقمص خالص)
بِلا شعور بالذنب إنك سمحت متتهانش بأي شكل تراه (أنت) لا يليق بيك

مرة كان في شخص كبير طلب يشوف شيء خاص من مقتنياتي وكان مصرّ ومينفعش أكون وقحة بأي شكل لأنه كبير في السن.. كل اللي على لساني (على راسي والله يا فلان/ة بس مينفعش) وبدأ يشتغل استهزاء وتقليل شوية حلوين على أساس يستفزني وأقبل، لكن كل اللي صدر مني نبرة حازمة بكل احترام (مش هينفع) وفي الآخر الشخص اللي اعتذر إنه ضغط عليا


النهاردة في بنت هزرت معايا بطريقة معينة معجبتنيش وكنا في تجمع بنات كتير وهي متعودة تهزر كده مع الكل لكني مش متعودة الأسلوب ده معايا.. قلت بنفس النبرة (مش بحب حد يعمل معايا كذا)
هي انسحبت واتوترت لأنها وسط البنات وأخدت جانب، روحتلها قولت (أنا مش قصدي أجرح مشاعرك لكن مش بحب كذا) لأنه البنت عزيزة عليا واتراضت عادي من غير ما أعتذر لأني مغلطتش..
لكن في نفس الوقت مقبلش بأي إهانة ولو بسيطة لمجرد أخاف أحرج حد أو ما شابه..

الأمثلة للتوضيح مش أكتر عشان لا يُفهَم إنك لازم تخسر الناس باسم الحدود

المهم... بوضوح كده أتكلم عن حدودي ولا أعني الطرف الآخر، يعني ايه؟
-مش بحب حد يهزر معايا بشتيمة ي محترم
وليس(أنت مش هتبطل هزارك السخيف ده) مع القليل من الهاها اعتقادا إنك بتهدّي الجو عشان حضرته ميزعلش إنك زعلت لما هو شتمك!
-مش مناسب معايا نخرج النهاردة (ممكن تضيف كان نفسي نخرج ومفتقدك جدا وأي حاجة تدل إنه عزيز عليك، لكن مش اعتذار على مضض)
-مش هقدر أتناقش معاك وأنت بتعلي صوتك كده

وأيا كان الحاجة طالما مش مناسبة معاك شخصيا= متخليش حد يجبرك تقبلها أو تعملها

محدش بيزعل من رفضك لتخطي حدودك إلا اللي عاوز يتخطاها..
ده زي ما قولت مش معناه تكون وقح أبدا، لكن مش معناه برده تكون بتقبل بحاجة خوفا من الإحراج، أصل هيقولوا عليا ايه، أصل هيزعل لو قولت كذا..

ولا معناه برده ترفض كل حاجة من باب خالف تُعرَف وتكون غير مهذب في المطلق!
مجرد بترفض الحاجة اللي لو حصلت هتكون مش مرتاح في وجودها.
وبس

ده باختصار كده من غير أمثلة كتير..

معًا لوضع الحدوددد
معًا... لحياة صحية (بصوت بتاع الإعلانات)


#نــص

أراكَ هجرتني هجرًا طويلًا
‏وَما عَوّدْتَني منْ قَبلُ ذاكَا

‏عَهِدْتُكَ لا تُطيقُ الصّبرَ عني
‏وَتَعصي في وَدادِي مَنْ نَهاكَا

#قصيدة

الدنيا تَضيق وتتّسع بقدر الونَس فيها والله..
اللهم آنِس كلَّ مستوحش، وآنِس بك كلَّ مستوحش.

رجعت أبوءُ إليك بسِرّي
وأنت العليم بكل السِّرارِ


▪️المقطع بجودة وحجم أقل

#أنشودة

الجزء الذي أحب ♡

"يا غائبًا ذكرُه في القلب مُحتضَرُ
صبرتَ عني وما لي عنك مصطبَرُ

كُن حيث ما شِئتَ من قُربٍ ومن بعد
فالقلبُ يرعاكَ إن لم يرعَكَ النظرُ"

🎙أحمد الطبيب

#قصيدة

أعتقد إنه كل ما الإنسان يكبر وينضج هيتوقف عن محاولة تغيير الآخر بأي شكلٍ كان..
إما ييأس بعد محاولات عديدة، أو يدرك أخيرا إنه ده خارج نطاق تأثيره..

يمكن يحاول ياخد ردة فعل مختلفة/ يساعد بحاجات بسيطة.. لكن مش يغير الشخص، وفي نفس الوقت لا يحمّل نفسه عبء تغييره ولا ردة فعله أصلا..

كمثال، لو بيتعامل مع شخص عصبي وقرر يكمل معاه سواء صداقة أو أي نوع من العلاقات...
-اللي في نطاق تأثيره:
من خلال معرفته بيه يلاحظ ايه اللي بيعصبه ويتجنبه- يلاحظ ايه اللي بيخلي عصبيته تهدأ ويعمله- يفهّمه إنه في حد معين مينفعش يتجاوزه معاه وقت ما يتعصب وإنه يتأذى من كذا وكذا- لما هو يتعصب لا يلقي اللوم على نفسه في أصغر أسباب عصبيته.
+ ميفضلش عايش حياته على أمل إنه هيتغير (خاصة بسببه) لكن يحاولوا يُديروا الموضوع مع بعض..

-طيب لو مش قادر يتعامل معاه خاصة لو يتأذى منه؟
=يتركه

الخطاب الموجه للطرف الآخر بقى (العصبي كالمثال) مختلف خالص.. هيكون خطاب من نوع ازاي يدير مشاعره ويتحكم في انفعالاته وووو.

لكن بتكلم عنك أنت..
هل هتقدر تغير حاجة مش نابعة منه؟ لا
هل أنت مسئول إنه بيتعصب من كل صغيرة؟ لا
هل أنت مسئول عن تربيته وإصلاح عيوبه؟ برده لا

عموما أنا مؤمنة بجملة (اليأس راحة) ف النقطة دي..
خاصة لو علاقة بالوالدين أو المجتمع... ناس من مئات السنين معتقدة حاجة معينة، ومن عشرات السنين متبنية صفة معينة...
كل ما تحاول تحمّل نفسك عبء تغيير ده= هتتعب أكتر.
كل ما عرفت تتأقلم أسرع وتتجنب نقاط الصدام= ترتاح أكتر.

أعتقد كمان إنه من كِبر الإنسان ونرجسيته الفطرية (وأحيانا تصوراته الخاطئة) هو توقعاته المثالية عن تعاملات الناس معاه، فيكون مش مستوعب ازاي ممكن حد يعامله بالطريقة الفلانية، بل يعتقد إنه يقدر كمان يفصّله على مزاجه عشان يتعامل معاه بالطريقة اللي تنفع في نظره..
يبني هو غالبا مش مشخصنها معاك، هو طبعه كده..
هو ميكس على بعضه، تركيبة واحدة.. يا تاخدها كلها، يا تتركها كلها لو لا تطيق أو تُستنزَف وعندك خيار الترك..

الإنسان اللي أنت شايفه قدامك ده نتاج خبرات وبيئة وتربية وجينات وعقد نفسية ومواقف وحاجات كتير كوّنت الميكس اللي أنت شايفه ده..
عشان يغير حاجة فيه بجد= لازم هو اللي يريد كده بجد.
والرحلة دي مش قصيرة ولا سهلة بالمناسبة..

فـ تاني..
الإنسان اللي قدام حضرتك، اقبله كما هو، وإلا فدَعه.

هترتاح..
وتريّح.


#نــص

جميل..
أحيانا كمان من شدة قسوة الإنسان على نفسه، تغيب عنه مزاياه.. ميشوفش غير أسوأ ما فيه، بيحتاج يشوف نفسه في عيون غيره، ويحتاج تأكيد خارجي من حد بيحبه إنه شخص جميل ويتحب..

عشان كده متبطلش تقول للي بتحبهم إنك بتحبهم، ولا تتغاضى عن تصرفاتهم الجميلة البسيطة ف نظرهم...

امدحهم بلا مبالغة أو تصنع... ومتركزش مع عثراتهم= تتملك قلوبهم

لعل كلمة منك تُنبت في قلب اللي بتحبه الورود وهو مُجدِب وأنت لا تدري.

أتمنى أن نستمر في رؤيةِ الجمال في أدقِّ الأشياء وأقلّها لفتًا للنظر، أن نستمتع بدفِء الشمس ونستشعرَ عناقَها لأرواحِنا في الصباح الباكر، أن ننبهرَ بالتفاصيل، وأن نقفزَ فرحًا حين يتذكرُنا من نحب بشراء نَوع المثلجات الذي نفضّله.
أن نفرح لقدوم العيد، وتغلب السعادة بقدومه رغبتَنا في النوم على تعبِنا، وأن ننتظر السنة الدراسية الجديدة بكامل الشغف لمجرد تجربة الأقلام الجديدة.

أن نضحك كأن لم يضربنا الأستاذُ من نصف ساعة لأننا أكلنا قطعةَ خبزٍ وهو يشرح، وأن نبكي لتأذّي قطّ الجيران الذي نحب ثم نتناسى بمجرد تذوق كيكة البرتقال التي تصنعها الأمهات.

أتمنى ألا تُقتَل روحُ الطفل فينا، وألا تُغادرَنا الطفولةُ وإن غادرناها.

#نــص

رغم خَوفي مما هو آتٍ، ورغم دوام تساؤلاتي عما يُخبّؤُه لنا القدَر وتكتَنِزُه لنا الأيام... إلا أن الآيات الدافعة للتسليم تغلبُني، والمواقف التي أمّن الله بها مخاوفي سابقًا تجتمع عليّ لتُجدّدَ يقيني..
ذاك الذي نجّاني وآواني وآنسَ وَحشتي ولم أستشعر معنى
"أحنّ من أمي عليّ" إلا بقُربه، كيف ينتابني الشك للحظاتٍ من اختياراته المجهولة بالنسبة لي؟

أسأله أن يرزقني توكّل الطَّير كما قال الحبيب، وإن غدوتُ خِماصًا ولم أَرُح بِطانًا فكفَاني استشعارُ أُنسِه والطمأنينة التي تصاحب التوكل، لكن حاشاه أن يأتيه آملٌ في كَرمِه ويرُدَّهُ صِفرًا، حاشاه.

#نــص

الله!

[وسيقَ الذين اتقوا ربهم إلى الجنة زمرا..]

-الشيخ: أحمد طالب
-سورة الزمر

#قرآن