عجيب ما شاء الله!
عشان كده كانت عادة العرب يرسلوا أطفالهم الذكور إلى البادية في بداية النشأة..

واضح في الفيديو بوادر صفات رجولة ما شاء الله رغم صغر سنه، زي ايه؟
-ثقته في نفسه
-شخصية قوية (من طريقة كلامه ومزاحه)
-الفصاحة وحسن المنطق وده ظاهر جدا
-سرعة البديهة (واضح من ردوده)

مفيش حاجة تقدر تقول فيها حسن تدبير ورجاحة عقل لأنه طبعا صغير السن+ الفيديو محدود، لكنك تقدر تتنبأ ببساطة شخصيته هتكون عاملة ازاي لو توفرت نفس البيئة اللي خلته كده (طبعا بمشيئة المولى سبحانه)

▪️تنشئة الطفل الذكر على النعومة الزائدة خطأ كبير في التربية..
الطفل الذكر غالبا طبيعته كثير الحركة وممكن يعمل مشاكل عادي، لكن ايه اللي بيحصل؟

اقعد ساكت ي بودي متتحركش من مكانك
قول آسف لـ مودي (مودي هو اللي ضاربه)
مفيش خروج ولعب
اوعى تجيلي بمشاكل مع صحابك
شتيمة وضرب من الأب والأم أو كليهما، وأحيانا قدام الأخوات أو صحابه كمان (شخصية الطفل وصورته قدام نفسه ف البتنجان)

الطفل لما يتحط في مشاكل= هيتعلم يدافع عن نفسه..
مش بنقول الطفل يبقى بتاع مشاكل، بنتكلم ف الشقاوة العادية، يعني حركته ف الطبيعي أكتر من البنت+ احتكاكه بصحابه الولاد أكتر..
مينفعش نكبتها، مينفعش نخليه (مؤدب زي البنات) الكلمة اللي دايما بسمعها والناس فاكرة إنه لما تمدح ولد بيها يبقى برافو عليه، لكن دي تدمير..

النعومة والرقة والهدوء والتزين= للبنات
الخشونة والحركة والقيادة والمبادرة= للولاد

عشان لازم الولد يوجد في حياته أنشطة ذكورية منذ طفولته...
ولما يكبر شوية لازم أهله (خاصة الأب) يشتغلوا على تنمية الصفات الرجولية دي فيه، زي إنه يتعود يحمل عن والدته حاجة ثقيلة قدر استطاعته حتى لو الأم قادرة تحملها.. مثالا لا حصرا..
وإنه لما يكبر كمان شوية ويقدر يشتغل لازم يشتغل ولو شغل عائده المادي بسيط جدا لكنه يتعود يتحرك...
ووالده ياخده معاه طبعا منذ نعومة أظافره للمسجد، المشاوير، القعدات العرفية.. أي حاحة فيها رجالة... يكون ملازم ليه أكتر من والدته..

لكني أشعر بالأسف لما ألاقي ولد عنده ١٢ سنة بيترك صحابه وقاعد مع والدته في قعدة نسائية، بل والدته لسه -بالمعني الحرفي- بتأكّله بإيديها... مش مرة من باب الأمومة، تؤتؤ.. مش بيعرف ياكل غير كده

مدمر ليه كمان لو كل حياته دراسة فقط (حتى لو بيكون الأول كل سنة)
لازم يتعود يختلط بـ (العالم الخارجي) من وهو طفل.. لأنه ده هيكون دوره لما يكبر= إنه يحمي أهل بيته من العالم الخارجي.
الرجولة بتتبنى كده ي جماعة..
هيحميهم ازاي أو يُحسن التصرف في المواقف.. وهو مش عارف يجيب حقه ولا يمشي وسط الـ (رجالة) مستقبَلًا..

لازم يتعلم الفرق بين كونه محترم ومؤدب ومسلم بحق، وبين كونه مستضعَف

لكن اللي بيحصل؟
أم متحكمة جدا أو أب دوره غائب+ طفل ضعيف=
-شاب مش عارف يتكلم كلمتين على بعض
-شاب عنده ٣٠ سنة لسه بياخد مصروفه من والده وقاعد عالقهوة
-متزوج دوره غائب عن الأسرة كأب وزوج
-متزوج منتظر زوجته تصرف عليه
-شخص مش بيغير على أهل بيته (لأنه كان بيتهان كل ما يعلق على لبس أخته أو والدته، فـ بدل ما يتاخد كلامه بعين الاعتبار ويتم مناقشته بالعقل، كان يتقاله أنت فاكر نفسك بقيت راجل علينا ولا ايه)

وغيرها الأمثلة لا تعد، لكن لو ركزت بتلاقيها..

عالعموم الحديث يطول لكن الفيديو لفت نظري للنقطة دي، فقارنت بين طريقة نشأة وتربية الطفل ده وبين النماذج اللي بنشوفها في العشرينات والتلاتينات لا تكاد تصل لنصف صفات رجولته..

-على الهامش

-من غير العادل مقارنة طفل نشأ في البادية بطفل مرفّه في المدينة.. لكن المقصود وضحته لحضراتكم...
-في كلام كتير يتقال في امتى الطفل يعفو وامتى ياخد حقه وازاي ياخد حقه أصلا.. لكن مش ده موضع كلامنا دلوقتي..
-الرجولة هي مجموعة صفات، يعني مش بالعمر خالص.. فأنا هنا بتكلم عن الصفات اللي ظاهرة= صفات رجولة واضحة

#نصيحة #للكرام #للكريمات #تربية

الفيديو ده قد يبان كوميدي لكنه يوضح المعنى المقصود والفرق الواضح في طريقة التربية..

الذكورة والأنوثة مختلفين تماما...
عشان تكون البنت أنثى فطرتها سوية= لازم تتشبع نعومة
وعشان يكون الولد رجل فطرته سوية= لازم يتشبع خشونة

(طبعا مع الموازنة بين الناحيتين وامتى تظهر كل صفة فيهم وهكذا)

▪️بما إننا بنتكلم عن تنشئة الرجل... مهم بالنسبالي أقول للبنات إنها بعد ما تختار رجل (مالي عينها) شخصيا كرجل.. لازم تتخيله كأب لأولادها.
لأنه في الغالب ولادك الذكور هيطلعوا نسخة مصغرة من أبوهم لأنه التربية بالقدوة.. فـ اللي طفلك هيشوف والده بيعمله= هيعمله بلا وعي.
فـ قبل ما تختاري بودي ومودي ف هيئة شاب عشريني عشان بتحبيه... شوفي أنت عاوزة ابنك يكون شبهه ولا لا..

اتكلمنا كتير يومين متتاليين..
فيها انقطاع فترة كالعادة ولا ايه الدنيا

ليلة خسوف..
الجو بارد..
ضغط نفسي..
ليل طويل..
محدش غيرك صاحي..

أجواء موحشة بكل المقاييس، لكن أول ما الشيطان يلعب ف دماغك ويخليك تيأس وتعيط.. اقف شوية كده ... عشان تديله أحلى (نو) ف وشه وبعدين تحاربه بالدعاء والصلاة عالنبي..

صلوا عالنبي، النهاردة مش الجمعة بس صلوا عالنبي وحَوقِلوا ي جماعة يمكن ربنا ينجدنا

#أنشودة

صوت القرآن في الشوارع والبيوت بعد الفجر... من أكتر الحاجات المؤنسة اللي ممكن تحصل وترجّعك لإحساس دفء محسيتهوش من أيام إذاعة القرآن عند أجدادك.

مَن استأنس بالقرآن ما استوحش والله..

ما شاء الله..

[ويا قوم ما لي أدعوكم إلى النجاة...]
✨سورة غافر

#قرآن

سنة رابعة خلصت الحمد لله☝️🏻
كانت سنة جميلة لذيذة هتوحشنا وهنفتقد موادها ومحاضراتها (بكذب)

إحدى الركائز الكبرى لبناء العلاقات وتثبيتها: تأمين المخاوف.

يدخلُ الإنسانُ العلاقة؛ وفي نفسه تساؤلات يلتمس لها جوابًا؛ ومخاوفَ يبتغي لها أمانًا..

أن تقرأ ما في نفس الآخر من مخاوف؛ فتبث في نفسه الأمان.. تلك دعامة كبرى لهذه العلاقة.

لما تقدم النبي ﷺ لأم سلمة سردت عليها تساؤلاتها ومخاوف نفسها، فقالت:

«1) ولكني امرأة في غيرة شديدة فأخاف أن ترى مني شيئا يعذبني الله به،
2) وأنا امرأة قد دخلت في السن،
3) وأنا ذات عيال».

فكان منه ﷺ أن أجاب تساؤلاتها، وأمّن مخاوفها، فقال:

«أما ما ذكرت من الغيرة فسوف يذهبها الله عز وجل منك،
وأما ما ذكرت من السن فقد أصابني مثل الذي أصابك،
وأما ما ذكرت من العيال فإنما عيالك عيالي».

يؤانس عائشة، تحكي له قصة إحدى عشرة امرأة مع أزواجهن، فتمر القصة كاملة مرور الكرام، غير شيء مخوف؛ أن أبا زرع طلّق أم زرع.
فذكر النبي ﷺ أنه كان لها كما كان أبو زرع في الفضل والإحسان، ثم أمّن خوفها وهو أنه لا يطلّقها كما طلّق أبو زرعٍ أمَّ زرعٍ.

فالتمِسْ تلك المخاوف، وأمِّنها؛ تَفُز بقلبٍ يخفق بحبك، ولسان يهتف بذكرك؛ فتَسعد، وتُسعد.

تقول شونتي فيلدهان:

«الشيء الذي يؤرق المرأة هو قلقها الذي يدفعها إلى التساؤل باستمرار: هل أنا شخص محبوب أم لا؟

والشيء الذي يؤرق الرجل ويدفعه إلى التساؤل باستمرار: هل أنا على قدر المسئولية أم لا؟».. تلك بعض المخاوف.

-مـنـقـول

مفيش ضغط امتحانات لمدة شهر عالأقل، عندي وقت أمارس هواياتي، عندي وقت أقعد مع نفسي وأهلي، عندي وقت أخرج مع صحابي، مفيش سبب طارئ للسهر، كوباية شاي من غير ساعتين الجد..
يااااه.. قد ايه الدنيا لذيذة ورايقة من غير دراسة.
الحمد لله على نعمة الأجازة والله... دي مكنتش عيشة

كلام حقيقي جدا..
جرّب الاستمرار على الصلاة على الحبيب وشوف همومك تزول وقلبك يهدأ ويطمئن ازاي بأمر المولى سبحانه..

مش لازم يكون النهاردة الجمعة يعني يا كرام، صلوا على الحبيب.

#أنشودة

الله!

[..قُل إِنَّ الأَمرَ كُلَّهُ لِلَّهِ..]

دايما أصوات الصلاة ف المساجد ف العشاء بتفكرني بالتراويح..
الإنسان مفتقد رمضان وإيمانيات رمضان وكل حاجة ف رمضان..
اللهم بلغنا إياه في عفوٍ وعافية.

بعد ثلاثة عشر عامًا*

إنه يقترب..

الإحساس اللي هيجيلك هدية من ربنا بلا سبب لمجرد تسليمك الكامل لأمره لأنه مفيش حل تاني أحسن=