مؤمنة إنه الشاي بلبن بيبقى واو لما الشاي متوسط والسكر قليل

عندنا دكتور ف الكلية تحس وأنت قاعد معاه إنك ف خطبة الجمعة..
الدكتور الوحيد اللي متتمناش تقعد قدام ف محاضراته..

يكون بيشرح حاجة وصوته رايق... يسكت ثانيتين.. عشان يديك أحلى (كنا بنقول..) ×200% فوليوم بوستر بوم الطخ برو ماكس تجيب أجلك وأجل مايكات المدرج

من أكتر الحاجات اللي الأشخاص الإيجابيين بيكرهوها وبيواحهوا صعوبة في التصالح معاها هي إحساس الحزن.

رغم إنه الطبيعي محدش بيحب يكون حزين لكن الشخص اللي مقبل على الحياة بكل ما أوتي من قوة، وشايف الحلو في كل حاجة وحشة، لما بيزعل بيكون مش مستوعب ليه هو زعلان، كأنه مش من حقه يكون حزين، كأنه (خُلق ليبتسم) فقط...
ولأنه يدرك كويس جدا مدى جمال شعور السعادة والإيجابية والحب والتفاؤل، يمكن عشان كده بيكون حابب فترة الحزن دي تاخد أقصر وقت ممكن معاه!

ففي اللحظات اللي زي دي أحب أفكرك يا عزيزي الحزين المتفائل، خلي مشاعرك تاخد وقتها، تقبل إنسانيتك اللي جزء منها تقبل حالك مع الأيام، تقبل إنك مش قادر تقوم من السرير، وإنه الشخص اللي طول الوقت بيضحك ويفرّح غيره.. أوقات بيحتاج حد يفرحه عادي، تقبل إنه التنفس بقى صعب عليك، والحركة البسيطة زي رفع إيدك بقت مرهقة وبتحتاج طاقة كبيرة منك..
متستسلمش للحزن، ولا تستسلم لأسبابه، لكن تقبله..
خليك رحيم بنفسك ورءوف بيها، ولا تحملها ما لا تطيق من الإيجابية المزيفة ودفن مشاعرك بدلا من التصالح معها ومحاول حل مشكلاتك..
وأرجوك متضحكش كتير بشكل هستيري كمحاولات فاشلة لتحسين نفسيتك، ولا تعمل من الحاجات اللي بتزعلك ميمز وتسخر من نفسك أو من العالم في كل حاجة كأنك مجنون..
هي مرحلة، فقط دعها تمر بسلام بأقل جلد ذات ممكن، مع الكثير والكثير من محاولات احتواء نفسك ومشاعرك، والطبطبة لو قدرت.
متبقاش أنت وأسباب الحزن على نفسك، متبقاش أكبر عدو ليك وأنت بتحاول تكون أكبر داعم للكل.

لو حد مش عارف يبحث ازاي عن فيديوهات القرآن في القناة يا كرام

كان أحد السلف بيقول إنه شاف رجل بيعمل ذنب فاحتقره في نفسه (يعني مراحش أحرجه ولا عايره) إلا أنه حُرم بسببها قيام الليل 40 ليلة!

كل ما أفتكر الكلام ده كله أحس إني ف معادلة صعبة..
الموضوع كأنه لعنة تُصيبك!
وبقيت خايفة من مجرد إحساس احتقار شخص بسبب معصية أو إني أشوف إني أحسن لمجرد إني معملتهاش..

يجدعان ده أنا قلت على الشيبسي بطعم الليمون الحلو يععع وبقى ده طعمي المفضل، والخمار الفرنسي شكله وحش وبقيت عاوزة كل خماراتي شبهه... معدش غير إني أتجوز مهندس أو أجيب نيش وأُعلن قائمة هزائمي وأعتزل الحياة

فـ صدقني، لما تشوف شخص بيعمل حاجة وتحس إنه ايه ده هو ازاي كده، خد نفس عميق، ابتسم وقول (أنا مالي)، مرة ف مرة وهتبقى زالفل وتبطل تطلع أحكام على خلق الله.
ولو هي ذنوب خد نفس برده، وادعيله بالهداية، بعدين اقعد بقى خمس ست ركعات قيام كده بتعيط إنه ربنا ميوقعكش ف الذنب، وخمسة ستة بتدعي لنفسك بالثبات وتنسب الفضل لربنا ف هدايتك وتطلع نفسك والإيجو والأنا والذات وكل الحاجات دي من المعادلة..

افتكر إنه الشخص اللي بتحتقره ده، وقع ف المعصية دي عشان هو مش حضرتك، ظروفه غير ظروفك، بيئته غير بيئتك، شخصيته غير شخصيتك، اللي يفتنه غير اللي يفتنك..
ثم مين قال حتى إنك لو اتحطيت ف اختبار قدام المعصية دي مش هتعملها؟
صلي عالنبي ف قلبك كده ولما تيجي تقول لالالالالا أنا عوووومري ما أعمل كده، اقعد ساكت

أمراض القلوب كتيرة جدا، منها العُجب وهي إنه الإنسان يشوف نفسه واو بسبب أعماله الصالحة
فتخيل بقى تشوف أعمالك+ تحتقر ذنوبك وتنساها وتركز ف تصيّد أخطاء غيرك، أو حتى تشوفها بالصدفة فتحس إنك أحسن منه لمجرد ربنا لسه مكشفش ستره عن ذنوبك أو إنك موقعتش ف نفس الذنب!!!

طب تخيل بقى يبقى الذنب اللي هو بيعمله سيئاته بسيطة مقارنة بسيئات حضرتك في ميزان ربنا لأنه يمكن بيعمله ويتوب ويندم وحاسس إنه فعلا مقصر وبيعمل حسنات أكتر عشان يكفّر عنه، بينما حضرتك مستصغر ذنوبك وشايف إنه عادي يعني (لمجرد إنها لم تُكشَف مثلا)
هل أنت عارف كل حاجة عنه؟ هل أنت تعلم قلبه وإيمانياته؟

الموضوع كبير حضرتك.
الموضوع كبير ومحتاج الإنسان ينقّي قلبه كده ويستهدي بالله ويشوف الناس كلهم عبيد لله باختلاف ابتلاءاتهم وذنوبهم ووزن الذنوب دي عند ربنا أصلا.
اللي يقدر يعمله إنه ينصح أخيه المسلم بهدوء ورحمة ثم يمضي..
ويعرف إنه المعادلة كبيرة وهو مش طرف فيها أصلا عشان يعقل كده ويبطل يصنّف الناس ف قربهم إلى الله على مزاجه.

الإنسان بقى يشوف حاجات عجيبة مش فقط بين المسلمين ف العموم اللي المفروض (رحماء بينهم)..
ده بقى بين أفراد الفئة اللي المفروض أصحاب الدين وفئة الملتزمين واللي بيتكلموا باسم ربنا أحيانا!

#واخدبالك
#نصيحة

أحيانا لما برجع لحاجات قديمة كتبتها بقول لنفسي: أما كلام لوز العنب والله يولاد، مين اللي كتبه بقى

الإنسان نَسِيّ، بلاقي معاني كتيرة نسيتها وافتقدتها بل وأتفاجأ إنها كانت موجودة ذات يوم، وحتى لو حل محلّها معاني أخرى (يمكن أفضل أو أسوأ) لكن إنك تنسلخ من أفكارك لدرجة تنسى إنها كانت جزء منك، شيء عجيب..

عشان كده أقول مهم نراجع نفسنا..
عشان نتابع تطورنا بـوَعي ونُبدّل المعاني اللي عاوزين نتخلص منها دي بنفسنا، بتحكم مننا.. لو هي أشياء غير طيبة.
ولو هي أشياء طيبة ونسيت نفسك وتركتها للأيام بدون ما تجدد إيمانك بيها أو بدون البعد عن كل ما ينافيها، أخشى أن تتبدل عليك بلا وعيٍ منك، أخشى في النهاية أن تنسلخ من كل ما تؤمن به تِباعًا، حتى تنسلخ من نفسك بشكلٍ لا تُفضّله ثم تعود لتسأل نفسك (أنا مين؟)

مرة لوز العنب ومرة ايه اللي كنت بقوله ده واهي ماشية

محتاجة أفلتر القنوات عامتن

ازاي بس ي عمو..
دول مأكدين لنا إنه المشكلة في خروج المرأة مش أكتر، وإنه العمل من البيت مناسب لفطرة المرأة 😔✋🏻

هي فطرة المرأة ملهاش حد يسأل عليها ولا ايه يخوانا

يارب الناس اللي من النوع ده إما تنقرض أو يشوفوا حياتهم ويسيبوا المرأة ف حالها..
أيوة يعني ده محتوى حضرتك؟

الدنيا كبيرة أوي وواسعة أوي
وعاوزين يمشوا الناس كلها على مسطرتهم وإلا تبقى منتكسة الفطرة وناشز وبتنجان
الأمثلة لو قعدنا نذكرها مش هيكفيها ساعات ولا حصر، ويطلع واحد من ورا الشاشة ينظّر على ناس وخلاص لأسباب غريبة كامنة في نفسه..
ربنا يهدي، ويبعد البنات اللي مش فاهمة وبتقتنع بأي حد بيقول قال الله وقال الرسول ويحرّف على مزاجه عشان خايفة على نفسها تكون بتعصي ربنا..

ويارب الناس دي تشوفلها حياة

"أهاااا، إذًا فهذا هو طبعي، وهذا هو أنا، لم أكن أعرف ذلك عنّي..."

حدّثني عن سعادة الإنسان حين يَكشفُ الله له خبيئةً في نفسِه!
يظل تائهًا حيرانَ لا يدري لِمَ يتصرف هكذا، وما هي دوافع وأسباب أفعالِه.. ويظل دهرًا يسألُ نفسَه هل هو مختلف؟ لماذا لا يُشبه الآخرين؟ ولماذا كلُّ هذا التعقيد في تكوينه هو بالذات؟ ولماذا لا يجد الإجابة عن الكثير من الأسئلة التي في نظره وجودية؟ هل هو غير طبيعي؟ هل هو مريض؟

ثم يكشف له اللهُ طبعَه، ويُريه أمر اختلافه، ويُعرّفه على نفسه... فتنكشف له الحقائق، وتُجاب أسئلتُه، وتُنار بصيرتُه.. ومع كل يوم من أيامه يُضاف حجرٌ إلى الأُحجِية، ويقترب من حلّ اللغز؛ لُغز نفسِه..

النفس البشرية معقدةٌ جدا، وفي تكوينها كواليسُ قد تمحوها الأيام، لكن أثرها باقٍ.. وهو ما قد يجعل أحدهم يبكي وحيدًا في الدياجي ويسأل نفسَه "لماذا أنا ما أنا عليه، وماذا يجب عليّ أن أفعل؟ وهل أغيّر نفسي أم أبقى كما أنا؟"

لذا، سَل الله أن يُعرّفك على نفسِك، وأن يُقرّبها منه، وأن يهديك الطريق الصحيح لمعاملتها والذي يوصلُك لحياة مستقرة، ثم منتهاها ومقرّها الجنة.

#نــص

♡"

عدّى مرحلة الفتى
عارف الفرق بين الألف المقصورة والياء

من ألطف الحاجات اللي ممكن ألاحظها في إنسان، إنه بيحاول جاهدًا ميوقّعش غيره في اللي هو وقع فيه...
كـ نوع من الحب، العطف، الشفقة، الرحمة.. أيا كان المُسمّى.

لو اتخذل من ناس كتير حواليه بيحاول يكون النقيض
لو مكنش حد بيسمعه بيكون مستمع جيد
لو اتعرض لإساءة أبويّة بيحاول يكون والد كويس
لو كان طول عمره خايف بيحاول يطمنك
لو الكل بيرفضه عشان عيب بسيط بيحاول يكون مساحة آمنة
ومثال آخر.. لو دفع فلوسه في حاجة متستحقش بيحاول يحذر حد بيفكر يشتريها
لو اتعلم درس ف الحياة بالطريقة الصعبة، هيتلبس شخصية الحكيم الصيني ويقدملك زتونة خبرته على طبق من ذهب عشان متغلطش غلطته (وبتغلط برده بس ده مش موضوعنا)

ومن خلال الملاحظة تلاقي إنه قاعدة (فاقد الشيء لا يعطيه) اتنسفت واتفسرت بطرق مختلفة واتخذت مناحي نفسية عديدة
ممكن يكون الشخص بيعمل ده عن وعي أو بدونه، لأنه فعلا مش حابب غيره يكرر تجربته الأليمة..
وممكن نوع من الشعور الإيجابي بيحصله لما يشوف غيره بيتم إنقاذه من أخطائه الشخصية، فيُسقط الموضوع على نفسه كحيلة إنه أنقذ نفسه في صورة الطرف الآخر..
وممكن يكون رغبة الإنسان في إنه يكون (المُنقذ) وشعوره إنه يملك زمام الموقف هم اللي يدفعوه

معرفش التفسير الحقيقة

أخشى فقط إنه النوع ده من الناس تنقلب عليه الصفة الطيبة دي ويقع في فخ محاولة إصلاح حاجات مش ف إيده ومش في مساحة تأثيره أو دوره إنه يعملها، فخ (I can fix it) بل يحس بتأنيب الضمير لو مقدرش يصلح الوضع اللي الآخر واقع فيه

أخشى كمان إنه يُبالغ في منح ما مُنع منه، فيمنحه في غير موضعه مع أشخاص خطأ أو في أوقات خطأ
أو يتم استغلاله وتنقلب عليه الصفة

لكن في العموم لما بلاحظ حاجة شبه دي بكون ممتنة للشخص، إنه اختار يكون شخص طبيعي لطيف بدل ما يكون مريض نفسيا ويكرر دائرة الأذى + بشوفها نوع من سلامة الصدر الحقيقة