if (female feeling safe next to a real man) was a picture=

كلام سليم

الاحتياجات في العلاقات الإنسانية قائمة كبيرة وفي منها مشترك وكلها مهمة..
لكن في بعض الاحتياجات لو مش متوفرة يعتبر العلاقة منتهية (أو مريضة وماشية على فولتارين لو مستمرة)

عن احتياج الرجل بشكل خاص لو حضراتكم تلاحظوا عملت سؤالين، لأنه علاقة الرجل بوالدته وأي أنثى ف حياته غير علاقته بشريكته...
الاحتياجات في منها مشترك أكيد بين جميع أنواع العلاقات لكن في حاجات عنده في المقدمة مع زوجته ممكن ميكونش منتظرنا أوي من والدته مثلا... والعكس صحيح

يعني لو زوجته مدحته في جلسة عائلية ازاي هو رجل كريم وحنون وأب صالح وذكرت مواقف كمثال، هيكون وقْعها عليه مختلف عن لو والدته قدمت نفس الفعل، رغم إنه الاتنين مشاعر احترام (وتقدير بشكل خاص)

الناس بقت بتشارك حاجات ومعلومات مينفعش تطلع برا باب البيت..
تبقى ماشي تحس إنك دخلت حياتهم بالغلط..
معدش حد عارف ايه اللي نشاركه للعامة، ايه للدايرة المحيطة، ايه للأصدقاء المقربين، ايه لشخص واحد ف الحياة، ايه مينفعش حد غيرك أنت وربنا تعرفوه...

الناس اتجننت والله

محتاج تنام براحتك ف الأجازة...
منبه أخوك رقم 15 اللي مش بيصحى عليه=

بستمتع بالأجواء وهدوء الصبح وروقانه

مُخّي= ثم سقط قالب الورود على رأس أحد المارّة..

"The saddest thing in life is wasted talent"

السؤال اللي كل ما أروح ف مكان يتبعتلي=

ممكن أرد رد مختصر لكن أفضّل الإجابة التفصيلية عشان الصورة تكون واضحة بالنسبالك وبالنسبة للي بيقرأ...

في مصطلح جديد اكتشفته اسمه أنماط التدين، في تعريفات وتقسيمات كتير ليه لكن اللي حاباكِ تعرفيه من ملاحظاتك حواليكِ وبناءً على (الظاهر فقط)
▪️الفئة (أ) اللي الكل بيقولوا عليهم ملتزمين بالمعنى الجديد، يظهر عليهم السمت الديني زي اللحية والنقاب أو الخمار، ويمكن كمان الحجاب يكون كله أسود
وغالبا طلاب علم
▪️الفئة (ب) اللي يمكن في الشباب مش مربي لحيته، ولا بيصلي في المسجد، وفي البنات يمكن مختمرة ويمكن لا
لكن أساسيات الدين كلها موجودة
▪️الثالث ضايع خالص والدين مش في باله أصلا

طبعا في مراتب كتير جدا، ولا يصح نرتب الناس بمنازلهم عند الله على مزاجنا لكني اتكلمت بالظاهر واللي عاوزة حضراتكم تفهموه..

ممكن يبقى حد من النوع أ اللي ظاهره وسمته التدين لكن أساسيات الدين مش موجودة، واللي محتاجاها في الزواج بالمناسبة..
وممكن من (ب) يكون موجود فيهم كل أساسيات الدين لكنهم بالمعنى الجديد بتاع العصر ده (مش ملتزمين)

عشان كده لما بنت تسألني السؤال ده أقولها (يعني ايه ملتزم) وأكتشف إنها بتركز في حاجات لا تفيدها كزوجة ولا تفيد البيت في شيء بشكل مباشر، وده يقودنا لنقطة تانية وقاعدة وهي
إنه أي حاجة محتارين فيها هل تقبلوها أو لا، اسألوا نفسكم السؤال الآتي (هل هيكون بيني وبينه/ها مشاكل يومية بسبب الموضوع ده؟)
وننزل للواقع، وبصوا حواليكم للمتزوجين والحياة العملية الحقيقية، مش للصورة اللي في أذهاننا ي جماعة عن الكابل الإسلامي وإنه هيعلّمك علوم شرعية وهتسبحوا على إيدين بعض والكلام ده..

وهتكتشفوا من السؤال ده إنه في حاجات مهمة تركتوها وتمسكتوا بحاجات أقل أهمية (كـ حياة زوجية)
يعني إنه الشخص عصبي، مش بيغض بصره، مش بيحترم أهل بيته ولا أي امرأة في حياته (وغيرها من الصفات)= ده ازاي تقبليه لأنه ملتحي أو طالب علم؟
ولو هي فيها صفة العند أو أيا كان، هل حضرتك تقبلها لمجرد إنها منتقبة؟
والنماذج دي موجودة في الحقيقة وشوفوا الواقع..
وبرده لو شخص بيصلّي، بيحترمك، يتحرّى الحلال والحرام في شغله وحياته في العموم، وشخص خلوق فعلا+ عِشرته طيبة، ترفضيه عشان مش طالب علم أو ملتحي أو حافظ متون؟

طبعا من حق أي حد يختار أي مواصفات، وفي العموم شيء جميل إنه يكون موجود كل الحاجات دي، لكن للأسف احنا في الدنيا اللي مش كاملة بالمناسبة، والفتن شديدة على الكل، فـ اللي كويس من جانب هتلاقوه مقصر في جانب تاني، ده المعظم..
فـ انزلوا الواقع شوية..

ناقشوا الأفكار نفسها، دي الحاجات اللي هتتكلموا فيها ي جماعة مش هتسألوا بعض في إسناد الأحاديث..
يعني لو شاب شايف إنه البنت مينفعش تروح جامعات أصلا ولا تشتغل، تمام براحته.. لكن أنت تكوني عارفة الكلام ده وهو عارف إنك موافقة عليه..
ناقشوا حياتكم أنتم، وشوفوا متوافقين كـ أشخاص هتعيشوا سوا ولا لا..
ناقشوا المال ومصدره، لاحظوا التقوى والأخلاق لأنه دي اللغة اللي هتتكلموا بيها، مش هتتكلموا بلغة مين قرأ قرآن أكتر من التاني النهاردة

وإن كان التنافس شيء طيب، وإن كان كل ده مطلوب.. لكنه ليس ما يقوم عليه البيت في الأساس، البيت لا يقوم على العبادات ومقدارها، بل يقوم على التعاملات بين الزوجين...
كل ما زادت عبادات أهل البيت يزداد بركة، لكن المقصود إنه ده اللي هيتم التصادم معاه يوميا بل كل دقيقة..

أتمنى تكون الفكرة وصلت رغم إنه الموضوع كبير جدا جدا ولا يتسع ليه بوست

شوفي المقطع ده
https://t.me/moroor_abir/405
+ في أكتر من صوتية اتنشروا في غانية قبل كده مهم تسمعيهم
https://t.me/c/1913972718/651

القهوة اللي قصادنا بتشغل أغاني قديمة طول الليل حتى ساعة الفجر، تقفل بس وقت الأذان ووقت ما يروحوا..

ي روقانك ي عمي، يمزاجك ي حجيجة وأنت مخليني أحلم بأم كلثوم بتشكيلي همومها كده

بطريقةٍ أو بأخرى تحس إنه المشي علاج..

كنت بقول إنه الفكرة في الأجواء...
كنت بتمشى معظم الوقت بالليل ومقتنعة إنه مفيش أحلى من الوقت ده، الطرق والشوارع مش مزدحمة نوعا ما، الجو هادي ورايق ومناسب لإسكات الأصوات والفوضى اللي في عقلك.. وحاجة كده تُذهب عنك إرهاق اليوم الطويل وعناؤه... ده أحلى وقت تتمشى فيه.

لحد ما جربت أرجع من الكلية وأتمشى بعد العصر لو اتأخرت، لقيت إنه الجو حلو، ضوء الشمس متوسط ومناسب لقيلولة عقلية رايقة، بيفكرك بإحساس الغروب رغم إنه لسه بدري، مش ممكن.. ده أحلى وقت تتمشى فيه..

بعدين جربت أنزل بعد الفجر أتمشى، الطرق مش بس فاضية، ده مفيش غير الكلاب الضالة ي فندم.. وبيني وبينك كنت حابة أنزل بالكروكس من غير ما حد يحسسني إني weird لكن ده مش موضوعنا.
مش عاوزة أحكيلك بقى على الساعة رايح جاي وأنت شايف الشمس بتظهر واحدة واحدة، حاجة تجنن... أجواء مناسبة لإسكات الأصوات برده شغال...
تؤتؤ.. موش مومكن... ده بجد بقى أحلى وقت تتمشى فيه..

وكنت فاكرة إنه الحاجة الحلو في المشي إنه تتمشى مع حد بتحبه لساعات طويلة.. لحد ما تُدركوا إنه مش بس الوقت سرقكم وأنتم بتتكلموا، ده المكان كمان سرقكم، فتلاقوا بعضكم تايهين ف مكان مكنش مُخطط تروحوا ليه، ويمكن تتوهوا توهان لذيذ..
وإنه المشي مع اللي بتحبهم أحسن حاجة ترجّع العلاقات من جديد، كأنه كل خطوة بتخطوها تُذكّركم بكل خطوة من البداية في علاقتكم، كأنكم بتستعيدوا العلاقة من بدايتها، كأنكم بترجعوها تاني.. حتى لو مش هتتكلموا كتير.. مجرد فكرة وجودكم ماشيين في طريق واحد ومحدش بيسبق التاني بل مبسوطين وأنتم ماشيين تاتا تاتا.. كأنها رسالة غير مباشرة (أنا هنا جنبك، ومش هسبقك، ولا هسيبك وأمشي)

لحد ما في مرة كنت بتمشى مع حبايبي ولقيت الجو لطيف فقولتهم طيب ي جماعة سيبوني أنا والكلاب الضالة لوحدنا شوية.. ولقيت إنه المشي لوحدك.. أما ده شيء لذيذ لذاذة!

بعدين أدركت إنه المشي الهادي في حد ذاته حاجة مريحة، مُطَمئِنة، كل مرة ليها طعم ولذّة وذكرى مختلفين باختلاف المكان والزمان والرفيق... ويمكن الموضوع تحسه أوي لما تبقى مخنوق وضايقة بيك الدنيا فتقول (أنا خارج أتمشى أشم هوا)..
والفكرة إنه شيء غير مكلف أبدا

طبعا نفسي أجرب الجري بقى بعد الفجر وكده، لكن إما هتخلى عن ديني، أو هأجّر كوخ بـ معزتين على جبل وأعيشلي يومين فيهم.. وبصراحة الموضوع لا يستحق عادي هصرف نظر..

المهم لو طلبتوا رأيي... قللوا كلام فون، قللوا قعدات كافيهات ومطاعم... انزلوا اتمشوا ي جماعة في توقيت بتحبّوه (احم... وتكونوا رايقين فيه عشان متتخانقوش مع بعض في الشارع)

وبسكده

#نــص

صورة ريحتها هواء نقي

وعليكم السلام ورحمة الله وبركاته

1⃣ بسيطة جدا
▪️يتابع نفسه باستمرار، عن طريق الكتابة مش مجرد التفكير.. ويحلل مواقف ويشوف ايه الحاجات اللي حاسس إني مش كويس فيها والعكس
طب لو مش عارف؟
=يشوف ايه أكتر حاجة الناس (المقربين) بيمدحوني بيها ف دي مميزاتي من وجهة نظرهم، وايه اللي بيعلقوا عليه باستمرار وبيتضايقوا منه ويمكن نتخانق بسببه

▪️اسأليهم، ببساطة
وطبعا حد أمين مقرب (ومش عبيط)
اللي هو في قعدة روقان، تفتكروا ايه عيوبي واللي محتاجة أصلحه

وبقول حد مقرب= يعني في تعامل مستمر ويعرفك عن قرب، مش حد قابلتيه وعلاقتكم سطحية بيجمعكم سلامو عليكو بس..
ده لا يفقه شيء عنك ومش عنده حكم كافي أبدا عليكِ

2⃣ يعرف حدوده كويس وحدود غيره، يسعى إنه ميؤذيش حد بأي نوع إيذاء نفسي أو لفظي أو جسدي (والحاجات المؤذية بتكون واضحة)
ولا يقبل إنه حد يتخطى حدوده ويؤذيه بأي شكل تحت أي مسمى في العلاقة (كله بالأدب والهدوء)

3⃣ في سلسلة الحدود في العلاقات بتاعت د عماء رشاد عثمان، حلوة جدا
في برده حلقات بناء الشخصية القوية لـ ياسر الحزيمي
دول اللي حاضرين في ذهني لكن سلسلة الحدود مهمة

#صـراحـة

when you have a lot to say but
محادثة السفهاء والكذابين والمُجادلين مَظلمةٌ لنفسك ومضيعة لوقتك=

كل عام وأنتم بخير حال يا كرام 🫵🏻

وكالعادة نقول إنه الأعياد فرصة كبيرة لعودة العلاقات وإصلاح ما أفسدته طنط النمّامة اللي بتوقع بين الناس، كلم حبايبك مفيش وقت للتفسير..

كلمهم فون مش رسالة جماعية تقضية واجب، أنت هتعمل في كل حاجة جميع ما سبق حتى دي!

سبحان من جعل لنا أعيادًا يجماعة والله..

يلا، تتهنوا برفقة من تحبون 🩵

طيب يبن الحلال متتقدمش لبنت أكتر من مرة ومتسمعش كلام البنات دي..
إنك تتقدم أكتر من مرة (مع رفض البنت والأهل ليك)
آه بيقلل منك

طب لو حضرتك حابب تتزوج البنت دي بالذات، امتى تتقدم تاني؟

▪️لو المانع من الرفض مكنش لشخصك، يعني لو كان كمثال بسبب دراستها ممكن تتقدم بعد ما تخلص الدراسة (المانع معدش موجود خلاص)
▪️لو ظروفك المادية اتحسنت بشكل ملحوظ وكانت هي سبب الرفض (وطبعا طبعا محدش من الأهل قلل من ظروفك أو كرامتك من البداية، لكن ده السبب اللي كان واضح ليك)
▪️لو كان الرفض بسبب سوء تفاهم وخلاص المعادلة اتحلت

وطبعا يكون في فترة زمنية محترمة بين المرتين اللي تتقدم فيهم، وكمان شرط أساسي ميكونش حد جه على كرامتك بأي شكل + الرفض مكنش من البنت وأهلها

-طيب الرفض قاطع؟ أو حد جه على كرامتي؟ أو اتقدمت تاني واترفضت برده؟
=متتقدمش تاني واسمعها مني ومتسألش ليه

الخير في الأمة كتير هتلاقي غيرها، ربنا أكيد يعلم إنها مش خير ليك..

حتى لو هي كويسة أوي؟
=آه
-حتى لو بحبها أوي؟
=آه

إنك تتقدم ف حد ذاته= عملت اللي عليك وطلبتها في الحلال..
وحضرتك مش مضطر تتحمل إهانة من حد عشان تثبتلها حبك

وللبنات حبايبي
بطلوا تسمعوا مسلسلات تركية وكورية وتقرأوا روايات رومانسية، وابعدوا عن التريندات والبلوجرز

وشكرًا

#عابر
#للكرام

نسيت أقول كلمة للبنات..
مش معنى إنه الشخص اتقدملك كتير، أو إنه بيحبك أوي وعاوزك فعلا، إنك تتزوجيه وتقبليه.
الحب لوحده مش كافي، وإنه بيضحي عشانك أو بييجي على نفسه عشان تكونوا سوا.. برده مش كافي لو في سبب حقيقي لرفضك ليه من البداية، سبب منطقي ويستحق الرفض...

متفهمة إنه البنات بتحب تحس إنه حد بيحبها أوي، ومتفهمة إنه فكرة (مش عاوز غيري) فكرة رومانسية وبتحبوها وكل حاجة..
لكن متخلوش مشاعركم في الوقت ده، وفكرة الاهتمام الرهيب والحب الأسطوري يضغطوا عليكم ويلغوا عقولكم.
لما تلاقي عيوبه اللي رفضتيه عشانها من أول مرة (ومتغيرتش) لسه موجودة بعد الزواج وبتظهرلك وتعملي نفسك مُتفاجئة... وقتها هتزعلي أوي

حطي ف بالك (مش معنى إنه عاوزني، إنه مناسب ليا)