أخيرا المصريين هيلاقوا مناسبة يقولوا بيها كل سنة وأنت طيب بدل ما بيدخلوها هي و(أمك عاملة ايه) ف كل محادثة مش عارفين يفتحوا فيها كلام 😂
كل عام وأنتم بخير حال يا كرام 🫵🏻

للحذف أو للذكرى والفائدة

النهاردة أول مرة ف حياتي أخرج لصلاة العيد..
وأنا ماشية مع أختي وقفنا راجل من اللي بيبيعوا فشار وتسالي على عربيات متحركة وكان ماشي معاكس لينا، وقفنا ودعى لينا كتير وقالنا وهو بيزعق بتحسر كده وماشي (أنتم أكتر اتنين محترمين شوفتهم النهاردة وأكتر ناس لبسها محترم ويفرح القلب، ربنا يحفظكم ويثبتكم...)

قولتله على راسي ي عمي ربنا يكرمك، وكان موقف لطيف جدا..

ومن أسبوع كنت عند محل بشتري حاجة، فالبائع ده بتعامل معاه من شهور لكن أول مرة يسألني حاجة، بيقولي أنت ف طب بشري؟ قولتله أيوة ليه، قالي أصله رَبّى..

مكنتش فاهمة الكلمة لكن أختي شرحت إنه بيقول بابا ربّاك يعني..
الراجل ده من بداية تعاملي معاه حسيت فيه نظرة غريبة للمنتقبات عموما، وكان متعمد يؤذيني ف النقطة دي، زي إنه يبينلي إنه اتخض مني، أو يقولي يا أختاه وهكذا..
مكنتش بهتم ولا بوجع دماغي عشان محتاجة من عنده حاجات، باخدها وأمشي وخلاص..
لكن مع الوقت تعامله اتحسن بشكل ملحوظ رغم عدم بذل أي مجهود مني... لكن حسيتها الفكرة المأخوذة عن المنتقبات والمحجبات عموما...

نفس الفكرة الغريبة بالظبط مع بنت زميلتي، ولما اتعرفنا عن قرب وتبادلنا أفكارنا أكتر من مرة قالتلي (أنت غيرتِ فكرتي عن المنتقبات)

الشخص ده عموما مكنش محتاج حد ينفي الفكرة، كان محتاج حد ميأكدهاش مش أكتر.

كل مرة بيحصل موقف مشابه بيكون كأنه أول مرة...
وبيكون موقف يخالطه مشاعر إننا كنا نموذج كويس وعكس صورة كويسة للدين زي ما كانوا شيوخنا بيقولولنا، لكن مختلط بمشاعر حزن إنه بقى ده الشاذ عن الناس والغريب وغير المعروف لدرجة إنه بقى ملحوظ وملفت إنهم يلاقوا حد طيّب الخلق، أو بنت حسنة الملبس...

ونسأل الله الهداية والستر

المهم يا جماعة إنه شيء لطيف إنه الإنسان لما يشوفك يشكر أهلك ويدعيلهم...
حاجة تفرح القلب لأهلك قبلك الحقيقة..
قول (رب اجعلني خيرا مما يظنون واغفر لي ما لا يعلمون ولا تؤاخذني بما يقولون) ثم احمد الله على ستره الجميل اللي مغرّقك.. وشكرا

معرفش ليه بحس إنه القناة دي خفيفة وعددها صغير بالنسبة لعابر وغانية فبقدر أتكلم فيها في مساحات متفرقة، عشان كده قلت إنها كـ صفحة فيس أو أرشيف بدون التزام بنوع محتوى معين، ولا إني ألتزم بكلمة محتوى أصلا أو إنها تكون شيء مفيد... فكرة إنها صفحة بيضاء للكتابة والتعبير والمشاركة وتدوين الأفكار وإن تناقضت...

ومش حباها تكبر الحقيقة، إلّا أنْ يرى الله غير ذلك

أخيرا لقيت حاجة بحبها ف أوقات فراغي
-امتحان السبت يااااا
=أخيرا لقيت حاجة بحبها ف أوقات فراغي

في بعض اللحظات كنت أتمنى لو أُوتيت ملَكة كتابة الشعر، لأنه مش هيوصف اللي نفسي أقوله غير بيت فصيح.. أبثّ فيه كل المشاعر اللي جوايا بعدين أهدى وأتطمن...

مهما كانت الكتابة النثرية أو العامية حلوة ومعبرة في كثيرٍ من الأحيان.. مجرد الكتابة يعني على الورق..
لكن يظل للشعر مكانته وهيبته.. وقربُه للنفس.

close enough 🙂

المُبهر بالنسبالي في قصة مجنون ليلى، إنه على الرغم من هذا الكَمّ من الشوق، واستطاعته التمكن من ليلى أو غيرها في الحرام... إلا إنه حبه كان عفيف، لم يمسّها، لم يتلصص على بيتها مثلا ويسترق النظر، لم يكتب فيها قصائد غزل صريح..

كل ما كتبه كان غزل عفيف يوضح فيه مدى ألمه لابتعادها فقط..

دعونا لا ننسى كمان إنه (أحبُّ شيءٍ إلى الإنسان ما مُنعَ)، وهل هناك أحبُّ للإنسان من الحب؟ فما بالك إن مُنع كما في حالة مجنون ليلى؟

على الرغم إنه العشق داء، داء صعب التخلص منه.. لدرجة كُتبت فيه الكتب التي تذمّه وتحذر الناس منه زي (ذم الهوى) ولدرجة موت الناس كمدا وحزنا في طريقه زي ما في (مصارع العشاق).. داء يجب الحرص منه والفرار وغض البصر والسمع...

لكن بالرغم برده من وجود الكثير اللي عصى الله في محبوبه، لكن وجود مئات النماذج في شتى العصور اللي تؤكد مقولة (من يُحب بصِدق، لا يعصي الله فيمن أحب)...

والأمر غير مرتبط فقط بالخوف على المحبوب، بل مرتبط بمعاني شرعية كتيرة جدا.. زي المجاهدة، التقوى، العفة، ضبط النفس..

حتى إنه علي القيرواني بعد ما يال قصيدة طويلة عريضة غزلية في الآخر كتب ايه؟
=الحُبُّ أعَفُّ ذَويهِ أنا
غيرِي بالباطِلِ يُفْسِدهُ

وعلى ذكر الموضوع، استوقفتني القصص اللي في كتاب روضة المحبين لابن القيم في الباب ده، لفصل بعنوان (عفاف المحبين مع أحبابهم) أرسلت الفصل منفصل لمن يحب الاطلاع..

في النهاية أحب أقول... كلما دعتك نفسُك لمُحرَّم (مهما أحببتَه) قل: (اللهم اكفِني بحلالك عن حرامك)


#نــص

نسيت الباب ده كمان حلو جدا (باب فيمن ترك محبوبه حراما فبذل له حلالا، أو أعاضه الله خيرا منه)

جميل إنك تقرأ النوع ده من القصص لما تشعر بالضعف، خاصة اللي في علاقة محرمة أو بيفكر يدخل علاقة محرمة..

بقولكم ايه
الكتاب كامل اهو لو حد مش لاقيه، جميل خاصة آخر أبوابه اللي أخدت منها ما سبق..

#كتب
#ترشيح

(أعوام) هو وقتٌ طويلٌ لتغيير الكثير، لكن ليس بما يكفي...
ليس بَعد..

موضوع رغي الستات طلع له أساس علمي ترى 😂

عشان التوضيح... الدكتور بيقول إنه المنطقة المسئولة عن الكلام في المخ حجمها أكبر في الستات أكتر من الرجالة وفي أبحاث بتقول إنه ليها مناطق زيادة كمان بتساعدها، عشان كده بتلاقي البنات رغاية أكتر من الولاد بكتير

عارف لما خلايا مخّك تتجنن لدرجة تنزل عليك الأفكار كالسّيل وأنت بتتكلم فتتكلم بسرعة ×2 عشان تلحق متنساش حاجة...
أو تخطر ببالك عشرات الأفكار والخطط بنفس الوقت فيحصل نوع من الضوضاء والـ burning وتحس إنه مخك بدأ يسخن، وفجأة السلوك تلمّس ويحصل إيرور وتنسى أنت مين لـ فيمتو ثانية؟

=متلازمة مؤقتة باين..
بتظهر من الساعة ٢ ونص الفجر كده وهتنتهي بمزاجها بقى..
مش هتنفذ أي فكرة غير بنسبة ١% مثلا
اللي هو ايش هذا ايه اللي حصل
بحس إني خارجة من خناقة لكن مبسوطة عامتن

ي ويلك لو حصلت وأنت رايح تنام..
حصلتلي مرة وأنا ف ثانوي كنت محتاجة deeply أكتب مقال عبثي جتلي فكرته وأنا رايحة أنام، قولت هصحى أكتبه محصلش حاجة
٣ ساعات عالسرير وفي النهاية قومت زي الـ شطورة كتبته عشان أقدر أنام..

تدافع الأفكار (وإن كانت عبثية) شيء لذيذ، لكن مرهق جدا للي ده أسلوب حياته، خاصة لو ف وقت غلط..

يعني ايه عبثي؟
يعني حاجات تافهة، زي إنك تخلق سيناريو وتضحك عليه، ميمز على مواقف قدامك أو حاجات افتكترتها من العصر القرمزي
حاجات تخلي حد من عيلتك يدخل فجأة يلاقيك بتضحك لوحدك يبصلك بصة استغراب ويمشي..
طب لو فكروني دلوقتي مجنونة؟ لو فكروني بفكر ف حد؟
ليه كده يابو المخاميخ ليه تجيبلنا الكلام والظنون ي حبيبي ليه كده ي عسل
............
كان في مرة أختي شافت مقال طويل جدا تقولي أكيد فضلتي فيه يومين، أنا مستحيل أقرأ كل ده..
متعرفش إني الوقت اللي باخده ف تصحيح الأخطاء الإملائية (نتيجة سرعة الكتابة) أكتر من وقت المقال نفسه، بحس الوقت مش كافي في لحظة التدافع دي، ومجرد ما مخي يهدأ مش بفتكر حاجة فبضطر أكتب كل حاجة مهمة

حد ممكن يقول ايه العبط ده
=بيس خلاص متاخدش بالك

قلتُ يا رسولَ اللهِ ما النَّجاةُ؟
قال:
أمسِكْ عليكَ لسانَكَ،
وليسعْكَ بيتُك،
وابكِ على خطيئتِكَ

-عقبة بن عامر [من سنن الترمذي]