[إن الله وملائكته يصلون على النبي....]

🔍سورة الأحزاب
🎙علي جابر

#قرآن

هيكون شيء لطيف لو العلاقات الإنسانية بقت خفيفة ومريحة، أي علاقة إنسانية..
يعني مثلا أنت غلطت ف شخص، اعتذر ببساطة ومتكررش الغلط، هو برده يقبل الاعتذار وانتهى الموضوع وترجع العلاقة زالفل...
زعلت منه ف حاجة مش لازم تتقمص وتراكم الموضوع، ليه متروحش تقوله (أنا والله التصرف الفلاني امبارح محبيتهوش وحسيت إني متضايق فقولت مش حابب يكون بيني وبينك أي حساسية ف التعامل بعد كده، فقولتلك)؟
الطرف الآخر بيتضايق من تصرف معين أو كلمة معينة وقالك عليها، مش لازم كل شوية يكرر التنبيه، مش لازم تناقشه ف أسباب رفضه أصلا، هو بيتضايق من حاجة، ليه تكررها بينما ممكن ببساطة تقوله حاضر مش هعمل/ أقول كذا عشان خاطرك، مكنتش أعرف إنها بتضايقك؟
شوفت سهلة ازاي؟ بس ليه طبعا، لازم حوارات وألاعيب ومشاكل من حاجة صغنونة لا تذكر أصلا، عشان بس مش عاوز تعترف بغلطك!

طبعا إنك تتجاوز اللي ينفع تتجاوزه وتخليك شخص عسول ومريح، ده ف العلاقات اللي حابين تستمر، لكن مثلا طرفين ف رؤية شرعية لسه بيتعرفوا، أكيد لازم تاخدوا بالكم من كل كلمة، مش بالضرورة هتعلقوا على اللي فهمتوه، عشان تكون القعدة لطيفة، يكفي إنك فهمت نقطة معينة عنه طالما لا تستحق النقاش، لكن برده في حاجات لو ركزتوا هتلاقوا إنكم اكتشفتوا حاجات بدري وده أفضل للعلاقة بعد كده وهتوفر عليكم خطوات كتير...

وهكذا الموضوع والأمثلة كتير جدا، والله يا كرام في علاقات كده بتكون مريحة اللهم بارك يعني مش خايف تقول كلمة تتفهم غلط أو تتاخد من محمل تاني، مش خايف تشارك مشاعرك، مش خايف تعتذر يفكروك مُهان مثلا..
وعلى الصعيد الآخر في علاقات غير مريحة، ومع ذلك بتحبوا تفضلوا فيها، ونقولكم ابعدوا وبرده مصممين... يعني مثلا بنت تقول إنها صديقتها بتعمل حوارات وبتحاول تغيظها بالكلام وده اتكرر يعني ده طبعها، لكنها ايه؟ صاحبتها اه كله إلا الصداقة..
ايه اللي مخليها ف العلاقة دي؟ متقدرش تجاوب..
شخصيا لما بلاقي شخص كده تلقائيا بخلي علاقاتي سطحية معاه مهما كان عزيز، مبفهمش ف حوارات كيد البنات والعلاقات التوكسيك دي أبدا، ليه تجيب لنفسك وجع الدماغ لييييييه؟ ليه تفضل ف علاقة مش مريحة وتستهلك طاقتك 😠

المهم الخلاصة..
خليك شخص عسول ومريح، كل ما كنت كده.. كان رصيدك أكبر عند الطرف الآخر (طالما هو شخص سوي)..

-طيب هل العلاقات دي مستحيلة أو تصورات مثالية؟ لا
-هل هي موجودة بكثرة؟ برده لا
يعني بصراحة بلاقي حواليا النسبة الأكبر فيهم طرف هو المتفهم ومريح، والطرف الآخر بيستغل ده وييجي عليه..
لكن العلاقات السهلة موجودة وشوفتها برده، اللي مش مضطر تتكلف فيها، ولا تلبس ثوب غير ثوبك زي ما بيقولوا، ولا تعمل ألاعيب عشان بس تقول للطرف الآخر (ممكن تهتم بيا وتحسسني بوجودك؟).. الطرفين كده أصلا اللهم بارك، كل واحد حاسس بالتاني واحتياجاته ومتفهم مشاعره وبيقدرها و((كلاهما)) يسعى لنجاح العلاقة..

لكن بتكلم عشان لو أنت (الطرف الآخر) اللي هو مش لطيف، سهّل الدنيا على الناس حواليك، خلي الدنيا تمشي، عشان ميجيش يوم وتخسر حد جميل.

#واخدبالك
#نــص