شبكة نشطاء روﭺ آﭬـا

ايييه... انتصرنا.. فعلاً ..نعم. 😂

332 views07:49

318 views07:50

الساعة الرابعة فجراً وانا بحاول اغفى بعد يومين متعبين جداً نفسياً وروحياً وعقلياًً ، عم بعاني من حالة ضربة شمس وتسبب بحرارة وتشنجات صدرية عادةً بعانيها لما كون متعرضة لضغط او توتر ( شبيها بنوبة قلبية) ( آخر مرة صار فيني هيك كان باعتقال الي قبل سنتين )

قبل ٣ ساعات حاولت اتجه لأقرب مشفى من مكان اقامتي في دمشق لحتى اخد علاج او حل للحرارة
بأمان الله عم قود سيارتي يلي الها معي ٦ سنوات تقريباً وهي نمرة قامشلو ( بنمرة مستخرجة من مؤسسات الادارة الذاتية)نفسها يلي تم سرقتها من شخص في يوم الزلزال وتسليمها لقائد ميليشا الدفاع الوطني التابع لنظام الاسد في الحسكة وقتها

سيارتي اشتريتها وجمركتها ورخصتها بمدينتي يلي كنت مقيمة فيها قبل سقوط النظام وثاني ايام السقوط اتجهت من قامشلو لدمشق بنفس السيارة والنمرة ورفعت لي القبعة وما تعرضت لشي.. لكن ..
وصلت لحاجز للأمن العام بالمنطقة المقيمة فيها
وإذ فوراً العسكري تطلع ع النمرة وتغيرت كل ملامح وجهه وايماءاته
وطلب مني الرخصة، الهوية، شهادة السواقة وهوية المصور ، عطيته كل شي ، حكى اتصال وقال نمرتها قامشلي ابعتلي دورية ، قلتله لو سمحت أنا سولين محمد امين صحفية وهاد مصوري معي فيني افهم شو عم يصير ؟
بلش العسكري يصور نمرة سيارتي وكل الثبوتيات ،
أنا بلشت قله فهمني شو في لساعدك، قال خلي المصور ينزل بدي حاكيه كلمتين ، رفضت وطلبت منه يحكي الكلمتين قدامي او يخبرنا شوفي ، طلب مني اصف السيارة عند السيارة العسكرية لبين ما توصل السيارة يلي طالبها ، طلب يفتش السيارة ، قلتله تمام تفضل ، ساعدته خلص تفتيش وخبرني ليش السيارة بلا نمرة آخر شي قلتله النمرة الأمامية موجودة ليكها والورانية لا وقعت وليكها بالباكاج،
جادلني العسكري ليش سيارتي باسم ابوي ،قلتله طبيعي لانه في اجراءات كتير للمواصلات والوالد فضل هالشي مشان ما اروح واجي للمواصلات ، قال اتصلي بابوكي!!!! قلتله الساعة ١٢ ابوي نايم كيف دقله ومشان شو ؟ قال اتصلي وفتحي صوت وصورة ، قلتله فهم علي شو عم تحكي ، قارن بين اسمي بالهوية والرخصة ح تشوف الاسم واحد ، رجع قال روحي جيبي ابوكي خلي يجي لهون ؟ قلتله والدي موجود بقامشلي ، كيف رح جيبه لهون ؟ قال ماني شايف قدامي كل القامشلي والدير والرقة ، قلتله طول بالك شو دخل هي بهي ؟ وعصب ، أنا اتصلت مع مسؤول إعلامي بالمنطقة ، والشب لباني وبعت سيارة لعندي فيها ( شيخ )
الله يجزيه الخير قال تفضلي روحي للسيارة وسوء تفاهم والله معك
قلتله لا بدي افهم ليش مصور ثبوتياتي وسيارتي وطلب مكالمة مع والدي وشو دخل أنا من قامشلي ونمرتي قامشلو؟

رجع قال الشيخ توكلي واسفين روحي ، قلتله عطيني اوراقي ،
وانا عم باخد اوراقي والشيخ سأل العسكري ليش نزلتوها ووقفتوها … بالحرف الواحد قالها العسكري ( بسببها تهجرت من منطقتي الي ١٠ سنين ) الشيخ رجع حاول يلومه ويهديه ( العسكري نزل سلاحه لحتى يسلمه بمعنى ترك الخدمة وقال ما بقبل إذا ما اقدر احكي كلمة ع الحاجز )

تمت اهانتي بالكلام والاتهامات بمجرد نمرة سيارتي ونفوسي قامشلي ،
هالشخص عرفت من لهجته هو ديري ( ومابعرف كيف ممكن انسى انه اتهمني اني هجرته من بيته ) ماكان في مجال اشرحله اني ضليت لأكثر من ٧ سنوات بكامل ريف ديرالزور والرقة ادعمها إعلامياً وإنسانياً وبكامل قدرتي بمنظمات المجتمع المدني والصحافة وناصرت النساء والفتيات والشباب وكل مظلوم وكنت متهمة من قبل أبناء قومي اني منحازة ومتعاطفة مع ديرالزور والرقة ومهمشة قوميتي ومنطقتي ، ويلي يعرفني من قريب ومتابعني اني من ١٤ سنة لهلا ما وقفت من العمل والنشاط خدمة لكل سوريا ولكل المناطق يلي صرنا ندفع التمن وننهان لانه نحن من فلان مدينة ،

أنا كتير متعبة وحاسة بخطر ع حياتي ومتخوفة من الصور يلي اخدها للسيارة ولهويتي وكل ثبوتياتي يلي كان الي ١٤ سنة ماني قادرة طالعها ع حواجز

وانه ينتقم بتصرف فردي منه خاصة اني عرفت ح يتحاسب لانه تعامل معي بهي الطريقة

ثاني موقف مسيء أتعرض اله خلال يومين متتالين
لأول مرة بيجيني شعور الخطر والتوتر لدرجة التفكير انه ح غير مكاني اقامتي الحالية لحتى ما امرق من هي الحواجز الكتيرة يلي عشرين مرة بنمرق جنبها بحكم طبيعة عملي

نحن بحاجة لأشخاص يعرفوا حدودهم بالتدخل والكلام ويعرفوا مهامهم وما يشوهو صورة كل الأشخاص يلي لابسين متلهم
الي تجربة صعبة جداً من الخوف والتوتر والاعتقالات بالمناطق السورية الأخرى قبل سقوط النظام وأبداً مارح اقبل الاهانة وأبداً مارح اسكت دفاعاً عن كرامتي وكلمة الحق
صعب علي وانا عم بكتب كل هاد وانشره
لكن حاسة بخطر لأول مرة وما عم بقدر انسى كيف دم هالعسكري فار وممكن يشوفني بأي مكان ومابعرف شو ممكن يعمل كمان وهو بدون البدلة العسكرية .

........
صاحب السيارة

.......
تعليق
ليس هكذا تُبنى الأوطان

330 views07:51