لفتني اقتباس قاس يقول:
"قد يكون سبب عدم نمو بستانك ؛ أنه في كل مرة تنبت فيه زهرة تقطفها لأحدهم لتثبت له أنك .. مزارع !

إتزن و كُن مزارعك أولاً 🦋."

لُطفًا 🤎

لو القناة عندكم على الكتم 🔕، شيلوه

أنا متعمد ما أنزل إعلانات ولا حاجات تزعجكم ، و عشان كدا بتمنى توصلكم المنشورات أول بأول
فعّلوا الإشعارات ، و دمتم في لُطف 🌿

‏"لدي قناعة أن التسخير و الخير الذي يأتيك فجأة دون مقدمات ، و الحفظ الذي يحيطك و يحفظك من سوء الحياة ، ليس إلا مكافأة لك على أعمال و خيرات عملتها بنفس طيبة ، و دون قصد ، كمساعدة محتاج ، ابتسامة في وجه غريب ، جبر خاطر ، إطعام حيوان ، أو سقاية نبتة ، أعمال لم تكلفك إلا نية صادقة 🌟🌱."

و في نهاية المطاف ، بعد ما موج السنين يكسر جواك ألف خاطر و خاطر .. بتلقى روحك رست أخيرًا في مرفأ هادئ 🤎!

مرفأ هادي .. بتلقى فيه قلبك تعب من المشافاة ، و فرّد اصابعينهُ من اللهفة ..

لا بقيت تجري ورا أشخاص قرروا يفتّشوا درب بعيد منك ، لا بقيت تحسب في دفتر الأيام منو السأل في غيابك اتطمئن عليك ، و منو الطلع من بابك و نسى العشرة

حتى الخذلان اللي كان ساكن في ضلوعك .. بقى مجرد غيمة مرّت ، و نست شكل المطر 💘

ما بتعود تفتش في العيون عن نية ، ولا في الكلام عن طمأنينة .. و ما بتعود تخاف من الشخص المستني منك هفوة عشان يبني فوقها حكم كامل عليك .

خلاص الفتيل اتملى ..
ح تصل مرحلة انك اكتفيت بذاتك

بتصفي حساباتك مع الدنيا .. و تقفل كل الدفاتر ، إلا دفتر السلام مع نفسك

بتعاين للحياة زي البحر ؛ الموج يجي ، يضرب الشاطئ ، و يرجع .. و البحر يفضل بحر .. ناس تجي ، و ناس تمشي ، ناس طالعة .. و ناس نازلة
و إنت بقيت ما عندك رغبة إلا في راحة بالك ، و ستر خاطرك ، و سكينة تسكن في قلبك و بس

#على_هامش_اللطف

بتكتشف ، بعد عمر كامل من الركض ، إن أعظم انتصار ما كان إنك تكسب الناس .. هو إنك أخيرًا ما بقيت تخسر نفسك❤.

🏷 مُحمّد حاتِم

مذكّراتي من الضفة الأخرى ❤️:

لستُ ناسيًا كيف كنتِ سَندي في أشد أيامي و لحظاتي صعوبةً .. و لن انسى كيف كنتِ تُشدّينَ على يدي و تثبّتين فؤادي لأعبر تلك الامتحانات ؛ ولا كيف احتضنتِ انطفائي و عنيتِ بي ، في وقتٍ كنتُ أجرُّ فيهِ خطايَ نحو لجانِ الامتحان بالمكابدة

اتذكّرُ ذلك كلَّه ، و قد أثبتِّ لي أنكِ لا تستحقين مجرّد ورودٍ يُطوّقها الفناء .. إنّما تستحقين نجمةً تُقتَطف لكِ من علياءِ السماء 🩵."

- M. Hatim

💌 إلى قلبك اللطيف: ❤️

لاحظت الوقت عنده موهبة غريبة بس جميلة ودافية ..
بطفّي كل الحرائق البتفتكر إنها حتفضل مولعة طول عمرك

أيّ حاجة كنت ماسك فيها بآخر ما تبقى من أصابعك ، و بتموت ألف مرة من فكرة إنها تفوت ، ح يجي يوم و تتلفت وراك و تستغرب : كيف كنت غرقان للحد دا ؟ كيف كنت غافل للدرجة دي !.
كيف انا كنت مع ناس زي ديل ؟👌

الناس اللي كان فُراقهم بقطّع ليك خلفة خاطرك ، و الكنت بتبكي اللهفة ليهم لحد ما عيونك تجف ، الايام بتمشي .. و الوجع اللي كان ساكن في ضلوعك في الأول ببقى بالتدريج مجرّد غيمة عبرت سماءك

و تلف الأيام لفتها ، لين ما تكتشف انك بقيت ما بتدوّر لأخبار عنهم ، ما بهمّك يمشوا وين ، و حتى اساميهم بتبقى أطياف باهتة و منسية
الزمن ركنها في آخر الذاكرة ، في مكان ما بوصلهُ الحنين 🤎

عند المُنتهى .. حتكتشف إن الزمن كان بعالجك ، و إنت فاكر إنو بزيد وجعك

بمشي براحة على أماكن انكسارك .. و بغزل من الصبر ثوبًا ، يكسوها برفق .. لين ما تلقى قلبك رجع يدق من غير ما يسأل عن الراحلين 💜

@Ritalutf

‏"أنت روح ، يؤثر فيك كل شيء ، تزهر في أَماكن و تذبل في أخرى ..
تجرحك الأيام و تتعافى ، تصيبك بعض المواسم بالجفاف لكنك ترتوي حين تمطر ، تبدو أجمل في أَيام و أقَل في أُخرى ، تتعب و تخونك المرايا أحيانًا ، ليس ذلك مرضًا أبدًا ، أنت على ما يرام أنت روح 🩷.."

صباح الخير لُطفًا 🤩🤩

عارف؟

بعد كل خازوق تاخده في علاقة كنت خاتي فيها روحك بكامل طبيعتك ،
ح تتغير حاجة جوّاك و للأبد .. و مهما كان التغيير دا مُنْهِك ، فهوَ لازم كان يحصل.

ح تبطّل تبقى ذاك البني آدم العبيط اللي بصدق اول كلمة حلوة .. و بترمي بطوله في أول سكة أمان مزيفة .

بيختلق جوّاك نوع من الاستغناء ؛ و ابدًا ما قسوة ولا كره للناس .. دي حالة ناضجة بتنوّر بصيرتك ، بتخلّيك تعاين للناس بعين مجردة .. و تسند قلبك بعد طول ميل.

كل الخيبات على قسوتها ما كانت إلا دواء مُر لطيش المشاعر و تسرّع العاطفة ، صدمة حامية بتفتح عينك من عمى العاطفة .. و بتزيدك حكمة في معرفة المعادن .


​عشان كدا ، الخُذلان، الوجع، إلخ... إلخ...

ديل ما كانوا خسارة .. هم ثمن الوعي. بخلّوك اتقل
استغناؤك أتم.. و بيرسموا مسافة أمان عريضة بينك وبين كل شخص بحاول يقرب منك بعاطفة عابرة ❤️

#بعض_من_اللطف

​"إننا لا ننضجُ بالسنواتِ يا صديقي ، بل بجهنمَ صغيرةٍ نمرُّ بها داخل أرواحنا .. نسيرُ فيها بعيونٍ معصوبة ، و نخرجُ منها ببصيرةٍ تسعُ الكائنَ كلَّه 🤩."


🏷 مُحمّد حاتِم

‏"في دروب الحياة ستَعتَرِضُنا معارك صغيرة لا وزن لها ، و جِدالات فارغة لا تَزيدُنا إلا إنهاكًا ، و صراعات تستهلك الروح بلا جدوى .. فلنُحسِن اختِيار مواضِع خُطانا ، و لنَجعَل جُهدَنا و عُمرَنا فيما يُثمِر و يُزهِر.. فما المرء إلا حيث يَضَع نفسه 🤍🤩."

صباح الخير لُطفًا..

🔘النقطة الأولى

عايز اتكلم في موضوع بسيط

لُطفًا يا جميلين
لو بتعجبكم النصوص دي وتنسخوها وتنشروها في قنواتكم !.
ما تحذفوا وسم اسم الكاتب .. لانو والله متعوب عليها النصوص دي ..
وما صح تنشر نصوص شخص وتحذف الاسم حقه منها !!
ماف مشكلة انكم تاخدوا النصوص .. لكن شيلوها بإسم كاتبها .. لانو بكون تعب فيها

فضلًا، اتركوا وسم اسم الكاتب كما هو


🔘النقطة التانية :

في حاجات كتيرة جاهزة ، عندي كتابات كتيرة والله قاعدة.. بس بخاف انشرها وما ألقى لا مشاهدات لا دعم .. وانا اصلًا تعبت فيها
ف عشان كدا بنشر ليكم اشياء بسيطة لين ما اقدر انشر القناة في قناة كبيرة ويجوني أعضاء اكتر
ان شاءالله .. و عشان القناة ما تكون مزعجة ما ح أضيفها للستة قنوات .. لأنو اللستة مزعجة جدًّا

ودمتم سالمين وفي زحام من النعم أينما كنتم 🪐🤎

" لم أبتعد لأنني قسوتُ فجأة ، بل لأنني تعبتُ من تجميع المبررات لشيءٍ كان واضحًا منذ البداية .. كبرتُ لدرجةٍ جعلتني أرى الأفعال كحقائق مجردة ، لا تشوبها الأمنيات 💚 ! ."


​في آخر المشوار ، بعد ما العواصف تهدأ و الوعود الساي تتلاشى في الهواء ..

في حقيقة قاسية جدًّا وهي : انو مافي زول بظلمك من دون قصد بصورة متكررة
كل زول عارف نفسه كويس هو بعمل فشنو ..

ف التصرفات ما بتطلع عفوية لمّا تتكرر بنفس النمط ، و الخُذلان لمّا يبقى عادة .. دا بكون قرار ضمني انو خاطرك و قدرك عند الشخص دا ما عندهم القيمة اللي كنت بتتخيلها .

فرغ كل المخزون بإيدهُ

و ثمة أشخاص بفتكروا اننا بنغيّر معاملتنا فجأة .. فجأة انو قلوبنا بتقسى بين يوم و ليلة .. ما مدركين ابدًا إنو لكل زول "مخزون حنيّة و غلاوة ! "

بيت كبير من العشم بنبنيهُ بصبرنا و تغاضينا عن الهفوات الصغيرة .. كتير بنغمض عيونا من الأخطاء و بنعمل رايحين .. بنفتش للمبررات كتير جدًّا ، تحس نفسك عوير عديل
و انت بتقول : لا بكرة حيكون احسن و سوي و ح يفهمني

في نفس الوقت الخذلان يتكرر اكتر واكتر وببرود حاد ، الزول القدامك بكون بيده بفرّغ في الرصيد دا نقطة نقطة .. بيهدم في البيت اللي بنيته داك

كل خيبة جديدة بتمسح حتة من صورته السمحة الكانت مرسومة في قلبك ..

كل تصرف رخيص بنزل مقامه عندك درجتين لورا ..
لين ما يوم تصحى الصباح تلقى انك ما طايق الإنسان دا كُلُّ كُلُّ ..
خلاص الرصيد الفضل ليهُ جوا صدرك بقى صفرًا كبيرًا و موجعًا 👌

عارف لمّا تطلع فوق برج فيه ٢٥ دور .. وتجي واقع من هناك ؟
يلا دا ما صعب.. الأصعب هو "السقوط من العين."

صعب شديد تعاين لزول كنت بتشوفه كبير كبر الكوكب دا كله بحجمه الهائل دا ، و فجأة بأفعاله ونوياه تشوفه صغر لدرجة الاستغراب

عرفت انو نحنا بنزعل شديد و بننكسر من الاشخاص الخذلونا .. والله لا عشان هم من دهب ولا عشان هم احسن ناس ..
عشان نحنا كنا بنحاول نصلّح في اشياء ما بتخصنا .. ضيعنا وقتنا في خلق ما بتستاهل

في مقولة ذكرتني بالكلام دا ..
"كنت بصلّح في المراية و جرحتني في النهاية ."

بنحاول نكون اللون الوردي لناس ما بستاهلوا إلا اللون الرمادي أو الأسود .. و وقت حقيقتهم تظهر لينا !. هنا نحنا الناس الكنا اللون الوردي ليهم ؟ ح نسيح زعل .

ح تعدّي عليك لحظة ح تسكت .. و كل أفكارك بتقول ليهو : "انت هسي بقيت شخص عادي جدًّا ، و ما بتستاهل حتى اننا نتناقش في الوجعني شنو ."

اعرف انو النفوس بتتعرى بالأفعال
الأيام بتعلّمك انو الوشوش الجميلة دي و الرصيد اللفظي ما بيعنوا أي حاجة لو ما كان عندهم أفعال صادقة

الناس هي البتحدد تقعد وين في حياتنا ، هي البتختار بتصرفاتها و مواقفها اليومية إذا كانت ح تفضل تاج فوق الراس ولا ح تتحوّل لمجرد اسماء عابرة في قائمة الغرباء ..

و دايمًا النهايات ما بتجي بالخصام .. او بصوت عالي ؛ النهايات بتخش بهدوء لما تقفل الباب براحة ..
و ترجع خطوتين لورا .. وتعاين للزول دا هو بنزل من نظرك حبة حبة
لين ما يتلاشى طيفه تمامًا


#على_هامش_اللطف 🤎!

الشفاء و الراحة النفسية ح تذوقهم لمّا توقف عن تجميل أفعال الناس ، لمّا تتقبل الحقيقة زي ما هي : الزول العايز يفضل في حياتك بصدق ؟ ح يحافظ على خاطرك ، و زعلك ما حيهون عليه ،

و الزول البستسهل كسر خاطرك ، الأفضل تسيبه يتصغر بأفعاله بعيد عن مدارك ، و توفر حنيتك و دفئك دا للناس البتعرف قيمة العشرة ، السند ، الودّ الصادق 🤎📌."

#محمد_حاتم.

💌 إلى قلبك اللطيف ❤️

صباح الخير لُطفًا ❤️🌻

في حاجات كتيرة في حياتنا ما بنقدر نغيّرها .. لكن دايمًا بنقدر نختار كيف نتعامل معاها

ممكن تخلي موقف واحد يسرق منك يوم كامل ، و ممكن تعتبره مجرد صفحة و اتقفلت.

ممكن تخلّي كلمة جارحة تعيش جوّاك سنين ، و ممكن تقرر إنها ما تستحق كل المساحة دي من قلبك ❤️..
الحياة ما بتقيف عشان حاجة اتأخرت ، ولا عشان باب اتقفل .. وبرضو ولا عشان شخص اختار يمشي و يخليك في المُنتصف المُميت

دايمًا في بداية جديدة ، و هي أجمل بكتير

فخلِّي آمالك أكبر من مخاوفك ، و ثقتك في ربنا أكبر من كل الاحتمالات البتقلقك 🌸.

@Ritalutf