اللّي مالحقش يسجّل قبل في منصة كورسيرا التعليمية حيفتحُوا التسجيل مِن جديد 💻📚💜:
(وكورسيرا لو حد ماسمعش بيها هي منصة تعليم الكتروني عن بعد، فيها مجموعة مساقات تعليمية من مختلف المجالات من جامعات عالمية حيفيدكم في الc,v متاعكم هلبا لو خديتوا كورسات منها)..

"يمكن التسجل فى المنصة التعليمية الاكاديمية University of Tripoli on Coursera باستخدام الرابط التالي :

‏https://bit.ly/2Vv7tKd

مع العلم ان :
•منظومة التسجيل فى المنصة تبدأ فى إستقبال الطلبات على تمام الساعة 8:00م.

•يمكن استخدام اي بريد الكتروني فى نموذج التسجيل.

•فى حال استقبال عدد أكبر من المتاح للجامعة ستكون الاولوية لأعضاء هيئة التدريس وللطلبة المسجلين حاليا وخصوصا الذين لديهم بريد الكترونى رسمي خاص بجامعة طرابلس.

•يرجى الانتباه فى كتابة البريد الالكترونى لأنه سيتم ارسال دعوة المشاركة الى العنوان البريدى الذى تم تسجيله فى النموذج.

•يمكن إعادة التسجيل لكل من قام بالتسجيل فى الجولة الاولى التى تم تنفيذها قبل عدة ايام ولم يتمكن من الاشتراك فى المنصة.

بالتوفيق لجميع."

_نقلاً عن اتحاد طلبة جامعة طرابلس

- العرض لطلبة جامعة طرابلس بمختلف الكليات.
- بالنسبة للدفعات اللي ما عندهاش رقم قيد يقدروا يسيبوا خانة رقم القيد فاضية.
- بعد تسجلوا تابعوا بريدكم الإلكتروني لأن حيجيكم عليه المسج اللي بتخشوا منه للمنصة.
- المنصة فيها مختلف أنواع التخصصات ومن جامعات عالمية وجزء كبير من الكورسات توفر في شهادة معترف بيها وتقدر تفيدكم سواء في السيرة الذاتية مستقبلاً أو حالياً بأنها ممكن توفر لكم فرصة عمل..

ما تضيعوش الفرصة من يديكم بالتسويف أو القلق اللي ماليشي داعي لأنها فرصة قوية هلبا 💙

( إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ) 💙

شخصياً، بادية من فترة نتعلم في لغة فرنسية على Duolingo وحنزيد نكثف تعليمي ليها الفترة هذه، ونزلت لكم ريفيو ع البرنامج فوق ..

- المهارة الجديدة اللي بدأت فيها هي "الذكاء العاطفي" وهذا شيء للأمانة ينقصني جداً 😓 فعندي رغبة أني نطوره بما أني فاضية، وأعتقد النقطة هذه تنقص الكثير مننا ..
المهارة بدأت في تعلمها من منصة إدراك وهذا الرابط:

https://www.edraak.org/specialization/specialization/ei-v1/

بعون الله حنحكي لكم عليها قريباً شن الفائدة منها ولمن موجهة .. 💙

- وحنجرب الRope jumping أو "نط الحبل" كرياضة منزلية بما أنه محجورين في الحوش وحياتي حتبدا أكل وبدون حركة 😂
ولو لقيت قناة على اليوتيوب محتواها مفيد حنقول لكم بعون الله ..
أنتم بس الزموا بيوتكم وكثفوا الدعاء..💙

ولو استفدتوا مني في حاجة انشروها 🌚💙

بالنسبة لممارسة الرياضة، فكلنا نعرفوا أهمية الرياضة وفوائدها:
- تقوية المناعة
- تقليل خطر الإصابة بأمراض القلب
- تقليل نسبة الشحوم في الجسم وزيادة الكتلة العضلية
وتطول القائمة.

باهي في الحجر الصحي حالياً وبما أنا محبوسين في الحوش وفيه اللي منزلهم صغير جداً أو يسكنوا في شقة وماعندهمش وسع يقدروا يتمشوا فيه شن الحل؟

خلي نوضَّح نقطة قبل ما نقترح عليكم أي شيء، اللي يبي شيء حيلقى طريقة عشان يوصل له، فأنت لو بجديات تبي تحسن صحتك ومزاجك وهيئتك حتلقى طريقة وحتبطل تدور مبرارات.

وكحافز ليكم امشوا طلعوا الميزان وشوفوا قديش وصل وزنكم وحتلقوا رواحكم طووول تدوروا في حل 🌚😂

التمارين الرياضية اللي تقدروا تمارسوها منزلياً، بدون أدوات تذكر وفي أي حجرة:

- نط الحبل:
الرياضة هذه تصنف تحت رياضات الكارديو: اللي يرفعوا نبضات القلب أثناء ممارستها.

حتفيدكم في:
- فقدان الوزن
- تقليل خطر الإصابة بأمراض القلب والشرايين.

- حتحتاج حبل طبعاً (أي حبل) -


يتبع.. 💁‍♀😂

( إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ) 💙

1 رمضان 💙🌙

" وَإِذَا سَأَلَكَ عِبَادِي عَنِّي فَإِنِّي قَرِيبٌ ۖ أُجِيبُ دَعْوَةَ الدَّاعِ إِذَا دَعَانِ ۖ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ "

بنحكي لكم على رفيقي الدائم خلال شهر رمضان .. 💙✨

تطبيق Golden Quran هو تطبيق مصحف إلكتروني.
آلية عمله سهلة جداً وأنت تقرأ تحس كأنك تقرأ من مصحف ورقي.
مع البرنامج ينزل التفسير الميسر وتقدروا تنزلوا تفاسير أخرى لو تحبوا.
فيه هلبا إضافات حلوة، زي الأربعين النووية، التذكير بسورة الكهف كل جمعة.

متوفر على Android و ال iOS ..

واللي يخلي فيّ نفضل استخدامه في رمضان هو تفسير الآيات، أسباب النزول، ومعاني الكلمات.
لأن وأني نقرأ أحياناً تقابلني آيات ما نفهمش معناها أو الغرض منها، أو ما نفهمش معنى كلمة فيها وبدل ما نتجاهل الشيء هذا أو ندير علامة على الآية وننسى نشوف تفسيرها هكي التفسير في نفس المصحف وبضغطة نقدر نقراه ونكمل باقي قراءتي بعدها بسهولة ❤️

التواصل غير العنيف لغة الحياة، مارشال بي. روزنبرج:

نوع الكتاب: تنمية ذاتية
عدد الصفحات: 223

كتاب خفيف جداً ولطيف، حيكون مفيد جداً لو كنت تبي تحسن من طرق التواصل عندك.

فكرة الكتاب مبنية على 4 نقاط حيدربك كيف تستخدمها وتفهمها عشان تحسن من تواصلك وتعرف تعبر على مشاعرك وأفكارك وتتفهم مشاعر الآخرين بشكل أفضل، النقاط تتمثل في التعبير عن:
- ما لاحظته
- ما شعرت به
- ما تحتاجه
- ما تطلبه

الكتاب مليان أمثلة وتطبيقات من الواقع وملخصات للأفكار المهمة عشان تثبت.
وشخصياً بدأت في تطبيق الخطوات المذكورة في الكتاب في -بعض محادثاتي- وللأمانة لقيت نتيجة جميلة.

لغوياً: الترجمة جميلة جداً واللغة سليمة ومريحة 💙

( إِنَّ اللَّهَ وَمَلائِكَتَهُ يُصَلُّونَ عَلَى النَّبِيِّ يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا ) 💙

8 رمضان 💙🌙

" وَمَن أَعرَضَ عَن ذِكرِي فَإِنَّ لَهُ مَعِيشَةً ضَنكَاً وَنَحشُرُهُ يَومَ القِيامَةِ أَعمَی "

" قَال رَبِّ لِمَ حَشَرتَنِي أَعمَى وَقَد كُنتُ بَصِيراً "

"قَالَ كَذَلِكَ أَتَتكَ آيَتُنَا فَنَسِيتَهَا وَكَذَلِكَ اليَومَ تُنسَى"