کوئی دیکھے تو میری نے نوازی
نفس ہندی مقام نغمہ تازی!

نگہ آلودۂ انداز افرنگ!
طبیعت غزنوی قسمت ایازی!


(علامہ اقبالؒ)


📢@Rekhta

ہم آپ ہی کو اپنا مقصود جانتے ہیں
اپنے سوائے کس کو موجود جانتے ہیں

عجز و نیاز اپنا اپنی طرف ہے سارا
اس مشت خاک کو ہم مسجود جانتے ہیں

صورت پذیر ہم بن ہرگز نہیں وے مانے
اہل نظر ہمیں کو معبود جانتے ہیں

عشق ان کی عقل کو ہے جو ماسوا ہمارے
ناچیز جانتے ہیں نا بود جانتے ہیں

اپنی ہی سیر کرنے ہم جلوہ گر ہوئے تھے
اس رمز کو ولیکن معدود جانتے ہیں

یا رب کسے ہے ناقہ ہر غنچہ اس چمن کا
راہ وفا کو ہم تو مسدود جانتے ہیں

یہ ظلم بے نہایت دشوار تر کہ خوباں
بد وضعیوں کو اپنی محمود جانتے ہیں

کیا جانے داب صحبت از خویش رفتگاں کا
مجلس میں شیخ صاحب کچھ کود جانتے ہیں

مر کر بھی ہاتھ آوے تو میرؔ مفت ہے وہ
جی کے زیان کو بھی ہم سود جانتے ہیں

(میر تقی میرؔ)


📣 @Rekhta

گرا نہ آنکھ سے آنسو فریب قسمت پر
سکون جس سے ہو وہ اضطراب پیدا کر

مژہ میں روک لے آنسو کہ دل ہو آئینہ
ستارے توڑ دے اور آفتاب پیدا کر

جوشؔ ملیح آبادی
@Rekhta

برابر سے بچ کر گزر جانے والے
یہ نالے نہیں بے اثر جانے والے

نہیں جانتے کچھ کہ جانا کہاں ہے
چلے جا رہے ہیں مگر جانے والے

مرے دل کی بیتابیاں بھی لیے جا
دبے پاؤں منہ پھیر کر جانے والے

ترے اک اشارے پہ ساکت کھڑے ہیں
نہیں کہہ کے سب سے گزر جانے والے

محبت میں ہم تو جیے ہیں جییں گے
وہ ہوں گے کوئی اور مر جانے والے

(جگرؔ مرادآبادی)

📣 @Rekhra

دن کی صورت نظر آتے ہی مری رات ہوئی
بازی آغاز نہ پائی تھی کہ شہ مات ہوئی

زندگی بھی نہیں سمجھی مرے مر مٹنے کو موت بھی پوچھتی پھرتی ہے یہ کیا بات ہوئی


حفیظ جالندھری


📢 @Rekhta

آغاز تو ہوتا ہے انجام نہیں ہوتا
جب میری کہانی میں وہ نام نہیں ہوتا

جب زلف کی کالک میں گھل جائے کوئی راہی
بدنام سہی لیکن گمنام نہیں ہوتا

ہنس ہنس کے جواں دل کے ہم کیوں نہ چنیں ٹکڑے
ہر شخص کی قسمت میں انعام نہیں ہوتا

دل توڑ دیا اس نے یہ کہہ کے نگاہوں سے
پتھر سے جو ٹکرائے وہ جام نہیں ہوتا

دن ڈوبے ہے یا ڈوبی بارات لیے کشتی
ساحل پہ مگر کوئی کہرام نہیں ہوتا


☜❦ ​مینا کماری​ ‏❦☞
​وفات 31/03/1972​


📢 @Rekhta

منھ پر اس آفتاب کے ہے یہ نقاب کیا
پردہ رہا ہے کون سا ہم سے حجاب کیا

اے ابرتر یہ گریہ ہمارا ہے دیدنی
برسے ہے آج صبح سے چشم پرآب کیا

دم گنتے گنتے اپنی کوئی جان کیوں نہ دو
وہ پاس آن بیٹھے کسو کے حساب کیا

سو بار اس کے کوچے تلک جاتے ہیں چلے
دل ہے اگر بجا تو یہ ہے اضطراب کیا

بس اب نہ منھ کھلائو ہمارا ڈھکے رہو
محشر کو ہم سوال کریں تو جواب کیا

دوزخ سو عاشقوں کو تو دوزخ نہیں رہا
اب واں گئے پہ ٹھہرے ہے دیکھیں عذاب کیا

ہم جل کے ایک راکھ کی ڈھیری بھی ہو گئے
ہے اب تکلف آگے جلے گا کباب کیا

ہستی ہے اپنے طور پہ جوں بحر جوش میں
گرداب کیسا موج کہاں ہے حباب کیا

دیکھا پلک اٹھاکے تو پایا نہ کچھ اثر
اے عمر برق جلوہ گئی تو شتاب کیا

ہر چند میرؔ بستی کے لوگوں سے ہے نفور
پر ہائے آدمی ہے وہ خانہ خراب کیا


میر تقی میرؔ


📢 @Rekhta

‌

آدمی، آدمی سے ملتا ہے
دل مگر کم کسی سے ملتا ہے

بھول جاتا ہوں میں ستم اس کے
وہ کچھ اس سادگی سے ملتا ہے

مل کے بھی جو کبھی نہیں ملتا
ٹوٹ کر دل اسی سے ملتا ہے

آج کیا بات ہے که پھولوں کا؟
رنگ تیری ہنسی سے ملتا ہے

سلسله فتنۂ قیامت کا
تیری خوش قامتی سے ملتا ہے

کاروبار جہاں سنورتے ہیں
ہوش جب بے خودی سے ملتا ہے

روح کو بهی مزا محبت کا
دل کی ہمسائگی سے ملتا ہے

جگر مراد آبادی

📢 @Rekhta

دل کو تسکین یار لے ڈوبی
اس چمن کو بہار لے ڈوبی

اشک تو پی گئے ہم ان کے حضور
آہ بے اختیار لے ڈوبی

عشق کے کاروبار کو اکثر
گرمی کاروبار لے ڈوبی

حال غم ان سے بار بار کہا
اور ہنسی بار بار لے ڈوبی

تیرے ہر مشورے کو اے ناصح
آج پھر یاد یار لے ڈوبی

چار دن کا ہی ساتھ تھا لیکن
زندگی اے خمارؔ لے ڈوبی


خمارؔ بارہ بنکوی


📣 @Rekhta

ستون دار پہ رکھتے چلو سروں کے چراغ
جہاں تلک یہ ستم کی سیاہ رات چلے


مجروحؔ سلطانپوری


📣 @Rekhta

عمل سے زندگی بنتی ہے جنت بھی جہنم بھی
یہ خاکی اپنی فطرت میں نہ نوری ہے نہ ناری ہے


(علامہ اقبالؒ)

📢 @Rekhta

ہم نے سینے سے لگایا دل نہ اپنا بن سکا
مسکرا کر تم نے دیکھا دل تمہارا ہو گیا

جگرؔ مرادآبادی
@Rekhta

لب خاموش سے افشا ہوگا
راز ہر رنگ میں رسوا ہوگا

دل کے صحرا میں چلی سرد ہوا
ابر گلزار پہ برسا ہوگا

تم نہیں تھے تو سر بام خیال
یاد کا کوئی ستارہ ہوگا

کس توقع پہ کسی کو دیکھیں
کوئی تم سے بھی حسیں کیا ہوگا

زینت حلقۂ آغوش بنو
دور بیٹھو گے تو چرچا ہوگا

جس بھی فن کار کا شہکار ہو تم
اس نے صدیوں تمہیں سوچا ہوگا

آج کی رات بھی تنہا ہی کٹی
آج کے دن بھی اندھیرا ہوگا

کس قدر کرب سے چٹکی ہے کلی
شاخ سے گل کوئی ٹوٹا ہوگا

عمر بھر روئے فقط اس دن
رات بھیگی تو اجالا ہوگا

ساری دنیا ہمیں پہچانتی ہے
کوئی ہم سا بھی نہ تنہا ہوگا

احمد ندیمؔ قاسمی


📣 @Rekhta

نہ پوچھو مجھ سے لذت خانماں برباد رہنے کی
نشیمن سیکڑوں میں نے بنا کر پھونک ڈالے ہیں


(علامہ اقبالؒ)

📢 @Rekhta

غیر ممکن ہے ترے گھر کے گلابوں کا شمار
میرے رستے ہوئے زخموں کے حسابوں کی طرح

پروین شاکر


📣 @Rekhta

ہم شیخ نہ لیڈر نہ مصاحب نہ صحافی
جو خود نہیں کرتے وہ ہدایت نہ کریں گے

فیض احمد فیض

📢 @Rekhta

ذہن میں یاد کے گھر ٹوٹنے لگتے ہیں شہاب
لوگ ہوجاتے ہیں جی جی کے پرانے کتنے

مصطفی شہاب

📢 @Rekhta

‏تمہاری یاد کے جب زخم بھرنے لگتےہیں
کسی بہانے تمہیں یاد کرنے لگتے ہیں

فیض احمد فیض
@Rekhta

مے بھی ہے مینا بھی ہے ساغر بھی ہے ساقی نہیں
دل میں آتا ہے لگا دیں آگ مے خانے کو ہم

نظیر اکبرآبادی


📣 @Rekhta