شلون ينتشر فايروس كورونا ؟
او بتعبير ادق ال COVID-19


الطريقة الاكثر شيوعا للانتقال هي من شخص لشخص
ف لمن تشوفون احد مريض او ديكح حاولوا تبتعدون عنه مسافة مترين لان خلال المترين ممكن ينتقل الفايروس اذا واحد عطس او كح
و اي واحد و خصوصا بهلفترة المفروض لمن يعطس او يكح يستخدم كلينكس و يذبها بالزبل
او اذا ممتوفر كلينكس الواحد لازم يكح او يعطس بالمرفق¹

و اكيد ينتقل عن طريق الاسطح العامة (يعني مثلا رحلة او يدة باب او ميز وايشي ممكن يستخدمه اكثر من شخص)
و اكيد ينتقل عن طريق النركيلة بالكهاوي بكل سهولة

زين شوكت يكون ال COVID-19 معدي؟

الشخص يكون معدي اكثر لمن هو باقصى مراحل المرض و مبينة عليه الاعراض

لكن ممكن ينتقل خلال فترة الحضانة الي هي من يومين الى اسبوعين (يعني ممكن انه انت طبيعي جدا بس انت مصاب بالفيروس بس الاعراض بعدها ممبينة عليك)
*خطر الانتقال خلال فترة الحضانة غير مؤكد الى الان بس اكو شكم حالة مسجلة تدل على هلشي + هاي مو الطريقة الاساس للانتشار

و بشكل عام كل فيروس الة سرعة و سهولة للانتشار
الكورونا فايروس او ال COVID-19 من الفيروسات الكلش سهلة الانتشار

شنو أعراض ال COVID-19 ( الكورونا )؟

الأعراض نفس اعراض النشلة او الحمى
تشمل
ارتفاع درجة الحرارة
كحة
و ضيق بالتنفس


و لمن يتقدم الفايروس ممكن يسبب pneumonia و acute respiratory infection
و بنسبة 20% يسبب الموت


حاليا الأعراض تبين خلال يومين الى اسبوعين

اكو علاج لل COVID-19 (الكورونا)؟

لا ماكو اي علاج ولا لقاح حاليا (اكو شركات دتشتغل علموضوع حاليا و ال NIH كالت حنسوي لقاح بالشهر الجاية)

بس لمن يتعرض الشخص للفيروس ف رح يتقدم الدعم لجسمه علمود يكدر يقاومه
مثلا ينطوه سوائل و ادوية تخفف درجة حرارة جسمه و يحطوه على جهاز تنفس اذا عندة مشكلة بالتنفس

شلون تقي نفسك من فايروس COVID-19 (Coronavirus|فايروس كورونا)

تتجنب الاقتراب من الناس المرضى (و بالنسبة للمرضى يفضل يبقون ببيوتهم و ميروحون للأماكن العامة)

تتجنب لمس عينيك و خشمك و حلكك (لان الأغشية هاي كلش بسهولة يدخل منها الفايروس الي ممكن يكون على ايدك)

اعطس او كح بكلينكس او بلمرفق مالتك¹

تنظيف الاسطح الي تستخدمها خصوصا اذا بمكان عام باستخدام سائل تنظيف او كلينكس مرطب يحتوي على نسبة كحول

غسل اليد بالمي و الصابون لمدة متقل عن 20 ثانية خصوصا بعد الحمام و قبل الاكل و بعد ما تكح او تعطس بالكلينكس و اذا ايدك مبينة وصخة هم لازم تغسلها
و اذا ممتوفر هلشي ف تكدر تستخدم مناديل مرطبة تحتوي على نسبة 60% كحول على الاقل


وشي مهم هو عدم التدخين بنراكيل الكهاوي الي عشرطعش نفر يستخدمها باليوم
والي عندة فيب لا يخلي احد يدخن بيها





*و لا تكول انه ميهمني الفايروس
لمن تنصاب بالفايروس ف مراح تنصاب بس انت
رح تصيب عائلتك و اصدقائك و الناس الي حواليك و تكون ناقل للمرض فضيع
و ممكن تكون ايدك بيها الفايروس مثلا و تنقله لغيرك وانت متنصاب بيه
ف السالفة مو شي شخصي
شي يأثر على كل المجتمع ف اتمنى الكل يتعامل وية الوضع بجدية أكثر

هسة سؤال الموسم
الاقنعة شنو سالفتها

*الصور الي داستخدمها هي من ال WHO و للاستخدام العام

شنو الاقنعة الي تفيد علمود الفايروس؟
قناع ال N-95 هو الي رح يقيك من الفايروس
القناع الدسبوزبل المنتشر ممكن يفيد لكن بنسبة قليلة

هذا القناع مو سهل التنفس بيه و يصير حار بالاستعمال لذلك مو سهل للكل يستخدمه
و اذا متحس اكو فرق بالتنفس ولا بتضييق التنفس من القناع معناها لابسة غلط

و الصورة هاي توضيح كيوت بسيط لكل قناع و شيفيد

شوكت تحتاج تستخدم الماسك؟

للناس الاصحاء و مبيهم شي ميحتاج تستخدمون القناع الا اذا جنتوا دتعتنون بشخص مريض(حتى لو بس نشلة) او احد من المرضى قريب عليك او من اهلك و عايشين بنفس البيت


اذا دتعاني من الكحة و العطاس ف البس الماسك

بس اكو سالفة
لازم تعرف شلون تستخدم الماسك يلا تستخدمه لان اذا متعرف تستخدمه ف رح يضرك اكثر من ما يفيدك



https://youtu.be/Ded_AxFfJoQ

شلون تلبس القناع؟

اولشي لازم تغسل إيديك لمدة متقل عن 20 ثانية بالمي و الصابون او بجل للايدين بيه كحول بنسبة متقل عن 60% او مناديل مرطبة ايضا بنسبة كحول متقل عن 60%

غطي حلكك و خشمك بالماسك و تاكد انه ماكو فراغ او فتحة بين وجهك و الماسك
يعني لازم تكون المنطقة متغطاية صح

لا تلزم الماسك بايدك ابدا ابدا
لان الطبقة الخارجية من الماسك يتجمع عليها كلشي

و إذا لزمت الماسك بالغلط ف هم لازم تغسل إيديك لمدة متقل عن 20 ثانية بالمي و الصابون او تستخدم جل منظف للايدين بيه كحول بنسبة متقل عن 60% او مناديل مرطبة ايضا بنسبة كحول متقل عن 60&

استخدم قناع ممستعمل اول ميصير قناعك رطب و لا تستخدمه مرة لخ

لمن تنزع القناع لازم تنزعه من ورة (من الخيوط الي مثبتته باذنك او ورة راسك حسب نوع تثبيت القناع)
و ميصير تلزم القناع ابدا

و ايضا ورة متخلص لازم تغسل إيديك لمدة متقل عن 20 ثانية بالمي و الصابون او تستخدم جل منظف للايدين بيه كحول بنسبة 60& او مناديل مرطبة ايضا بنسبة كحول متقل عن 60%

و هذا فيديو كيوت على شلون واحد يستخدم القناع من ال WHO
https://youtu.be/lrvFrH_npQI

و رجاء لا تاخذون المعلومات من اي مكان
مو اي معلومة بالفيس لو تويتر لو الواتس اب لو التلي تصدكوها
امشوا على كلام ال WHO و ال CDC حصرا حصرا حصرا


هاي مصادر كلامي و للي يريد يقرة اكثر عن الموضوع

https://www.who.int/emergencies/diseases/novel-coronavirus-2019

https://www.cdc.gov/coronavirus/index.html

هلرسالة بالذات ياريت الكل يقراها و يدزها لكل الي يعرفهم لان هلشي مياثر بس على فرد واحد
يأثر على المجتمع

لمن تدزها لغيرك ممكن تقي عشرات الأشخاص من الاصابة بدون متدري
و الي ميدز هلكلام لكل ناس رح يطلعلة بعبع بالليل

+لاحقا رح أنزل بعد معلومات و كلام مغلوط و myths عن الكورونا