على حسب ما مرني ومن تجارب الاولين
وجهة نظر ويجوز فيها الاتفاق والانقسام

اترك مسافه بينك وبين الاخرين
بعض البشر ودك حدود المعرفه معهم سلام

أصمت ولاتحرص على كثر الكلام الصمت زين
الي سكوته ساتره يمكن يعريه الكلام

واذا تكلمت احذر تكون اطول المتكلمين
السالفه لاطولت يقل معها الاهتمام

وأمزح ومزح باللسان أخير من مزح الايدين
مزح الرجال العاقله على حدود الاحترام

وأضحك ولاتضحك برفع الصوت رفع الصوت شين
من الادب والذوق عند الضحك ضحك بابتسام

وأكرم وبيبان الكرم واجد ولا يحتاج دين
ترا الرجال إكرامها ماهوب في كثر الطعام

وأحلم ولا تعجل ولاتغضب ولاتشري بدين
شاور ولو رايك معك لاشرت عداك الملام

واذا شريت بدين لاتبطي على المتجملين
كلٍ حلاله غالي عنده ولو هو مايسام

لاجاك مديونك معه بعض الوفاء وبعضه لحين
استد بالي جاك وش دراك لله الدوام

ترا التغافل فيه لذه وانشد المتغافلين
لاجات كلمه توجع أطلقها مع سرب الحمام

وارضى اذا جاك الرضى لو العذر ماهو سمين
ترا التسامح ميزة الساده رفيعين المقام

صادق واذا صادقت ماجربت ماصدقت لين
أما يطول بك السهر ولا يطيب لك المنام

أصدق مع نفسك وتلقى نفسك من الصادقين
النفس خيل بليس لاتعطيه نفسك واللجام

اذا نصحت أنصح خفى لاتفضحه فالحاظرين
ترا الرجال يقودها لين الحكي قود الخطام

ولاتواضع في حظور العالم المتكبرين
تعامل بنفس الطريقه معهم ونفس النظام

وأخلاقك وتواضعك عامل بها المتواضعين
نصف الادب مجامله جامل ولاتجامل لئام

واذا تسولف عن طموحاتك للمتفرغين ؟
كنك تسولف لنصارى فالحلال وفالحرام

والعمر ماهو فرصة وحده ولافرصتين
مع كل مطلع شمس لك فرصه وخطوه للامام

هذا ولا زلنا تعلمنا اللليالي والسنين
والعلم خير من الجهل والنور جلاي الظلام .

- علي بن رفده .

القصيده المسكّته .

عن كل دربنّ عليه النفس أمّاره
‏تردنا شيمه الشيبان و لحاها.

وصييِة :
أن كان ما ضويت علمٍ يجمل
فلا تضوي علم يحرج قبيله .

وفق الله صاحبٍ بـ الرفاقـة ما يبور .

عسى الله يعطي كل طيب على ظنه .

‏نرتجي من صادق غيوم الوصل وسميه
‏تنعش إللي مدهرٍ قلبه وحاله ذاوي .

‏طويلين بال ودايم نسامح الغالين
‏ولا حنا من اللي لا زعل دوّر الزله .

‏"عسى المدلهم الحادر البارق الرعاد
‏تدلا على دار الوليف هماليله".
ㅤㅤ

خيّل على نجد قاصيها ودانيها
‏البرق يبرق وخير المزن همالي .

‏" نطيب لو عيّت ليالينا تطيب
‏بفضلٍ من اللي جمّل الحال و لَطف ".

‏اهل العلوم البايخه والتبجاح
‏اوحيت او ما اوحيتهم خلف متني

‏علي من العراف خلان الامداح
‏اللي من هروج القفيا حمتني .

ان جيت من طيبك مجمل ومشكور
‏وان رحت ما تكثر عليك الحسايف .

‏رافق رفيقٍ يجي ظنك على ظنه .

يالله أنا طالبك خاطر سمح و طول بال
‏يسعفني أسايـر زماني واقوى بلاويّـه

‏وقفنا على باب الأمل وقفت المحتاج
‏ورجينا كريمٍ ماهوب يصكّ بيبانه

‏يناجيه عبده وما يرده سحا واحراج
‏ويطلبه من فضله ومدّته واحسانه

‏عسى مقبلات الأيام يسر ورخا وافراج
‏وعسى ما مضى يمحاه عفوه وغفرانه

‏كرام النفوس اليا لحقها خطا الّغالين
‏تطوف خطا الغالين من عّز ومروه .

‏بيتٍ بلا شيبّان يا شينه وقل حلاه
لو إنه يتبارق ما تحلى تباريقه .

‏في دبرة الوالي تزين التصاريف
‏يالله عسى كل المقابـيل خيره .

‏طالبك يالله جهدٍ بذلته لايضيع
‏ياكريمٍ مايخيب رجاء عبدٍ رجاه .

‏ماسفَهت من العقول الا الخلي
‏وما حقرت من الكلام الا النبيح .