#ما_تنمحي••

أولوياتنا في العلاقَات أيَّاً كانت -صداقَة ، إرتبَاط ، معارِف...إلخ- بتختلف من زُول للتانِي
في مننَا من عندو الأمان أهمّ شَرط في أي علاقَة ، في البيهمهُم السَّند ، ناس أهم حاجة عندهَا التفاهُم ، وناس تانية معيارهُم الوحِيد هو الصِدق وهكذَا...
بَس مهما إختلفنا في المفاهيم دِي ، نقطة إننا نظَل مُحتفظين بشخصيتنَا الحقيقية رغم تأثيِر الطرف التاني ، دي نقطة مُهمّة جداً..
مرات بدُون ما نحس بنلقى نفسنا بقينَا نُسخة من زول معيّن ، بالتدرّيج بتبدأ إهتماماتنا تنحسِر ، حاجاتنا البتشبهنَا بتتراجَع ، تفاصِيلنا البسيطة البتميّزنا بتتلاشَى ، حاجات كتير كُنا بنحبها حنبدأ نكرهها لأنو الطرف التاني ما بيحبها ، حاجات كتيِر كنا بنكرهَا بنبدأ نتقبّلها ونخليها جزء من حياتنا لأنو الطرف التاني بيحبّها..
كلّ دا عشان نلفِت إنتباه ، نقرِّب مسافة ، نزيد من حصيلَة النقاط المشتركَة المتشابهة بيناتنَا ، نحِل خلاف...إلخ
نفسيَاً نحن بنعمل كدا عشَان خايفيِن إننا نفقِد الشخص دا ، خايفِين يملّ مننا أو ينفُر أو يحس بعدَم الإلفة معانَا
بس عمرنَا ما بنفكِّر إنو الإنسان دا ممكن كمان يملّ لأنو نحن بقينا زيُو ، خلاص مافي جديد .. أهو نحن نسخَة محدَّثة من شخصيتُو ، هواياتو هِوايتنَا ، طريقة لبسو طريقَة لبسنا ، طريقة كلامو ياها طريقة كلامنا...
هل حيستمِر معانا!
هل في إنسان في الدُنيا دي بيقدر يتحمّل يعيش للأبد مع نسخة تانيَة من نفسو!
الشعُور القوي تجاه أي إنسان تانِي ، شعُور مدمّر وخطير بطريقة لطيفَة
لأنو ما حاجة بتقدّر تتحكّم فيها ، ولأنو -ظاهرياً- بيديك مردُود محفّز وردّات فعل إيجابية من الطرف التاني بتخليك تستمِر .. بس كدا إنتَ قاعد تفقِد في هويتَك وإنت راضِي ومُبتسِم
ما حقول ليك أبعد من أي علاقَة من النوع دا ، بس خلي بالك من نفسَك ، خلي عندَك نقطة رجُوع لذاتك ، خلي عندك ثوابِت ومبادِئ راسخَة ما تكسرها أبداً عشان أي زول
وأعرِف إنو البيحبّك -أيّاً كان- ما بيطمُس شخصيتَك ، ما بيغمُر صِفاتَك .. البيحبَّك حيتقبّلك زي ما إنت بعيوبَك وبمحاسنَك ، حينصحَك ، حيوجِّهك بس ما حيضغَط عليك
في الدُنيا دي حتمرّ بناس كتيِر ، وحتحِب ناس كتيِر ، ولو حتفضل تتغيّر وتتلوّن كل مرّة عشان تكسب وِد إنسان معيّن حتلقَى نفسك في النهايَة مافِي ، حتصَل مُنهَك ومليَان صفَات ما بتمُت لحقيقتك بصِلَة ، بإختصَار هويتَك حتصبِح مشّوهة!
عشان كِدا الإختلاف رحمَة
ممكن نلاقِي ناس بتشبهنَا في حاجات كتِير ودي حاجة حلوة ما دام التشابُه كان موجُود أصلاً حتى قبل ما نتلاقى ، بس حنظلُم نفسنَا من أول لحظَة نفكّر فيها بإننا نتشبّه بزُول تاني لمجرّد إننا بنحبُو أو لأي سبب كان..
جميل لو إننا نحبّ إختلافنا عن بعَض
نضيف لي بعَض ونآخد كتير من بعَض
بس لا ننمحي ولا نفقِد ذواتنَا ، لأنو بلا شَك كتيرين جداً البحبُونا زَي ما نحنَ
#مريم_الشيخ🌸



●

#السؤال_الأكثر_تكراراً:
●كيف إعرف إنو الشَاب القدامي معجب بي أو عايز يرتبط بي (إرتباط زواج ما الشغل الحايم في الجامعات دا)؟
●الإجابة الوحيدة والأوحد والأونلِي ون:
لمَن يقول ليك الكلام دَا بي خشمو!
بسسس!
مافي واحده تجِي تقول لي:
لمَّح لي
وأشَّر لي
وبشَّر لي
ولمَن مِرضتا إتصل لي
ووقف معَاي في بكاء حبوبتِي
وجاب لي شيِت دكتورة فوزيه
ودَفع لي في المواصَلات..!
دي كلها أحدَاث طبيعية ممكن يعملها لي أي زميله/صديقه/أخت/زميله عمل..ألخ
من واقع مَبدأ الرجُوله والشَّهامه!
● لو عايزِك يا بِت الناس بيقول ليك بي خشمو
لَو عندو صعوبات في النُطق بكتبها ليك في ورقه
لو أُمي ما بيقرا ولا بيكتب بسجلها ليك في أوديو..!
ما عايزة أسمع كلمة (لمح لي) دي تاني!
كلمه (لمح لي) شنو ، ما عايزة أسمعا.!
●إنتِ الملِكه ست الستات ، يجِي ويقعد معَاك ، ويعرق ويتكبكَب ، ويتمتم ويشرب قزازه البارد كلها في شفطة واحدة من شِدة التوتر ويتمتم تاني ويقول ليك:
(يا فِلانه أنا بحبك وأديني عايز رقم تلفون أبوك)
(صَفرَاء فَاقِعُ لَونهَا تَسِّرُ النَاظِرِين)
ما تقبلي بي أي حاجه أقل من كِدا
ما تتنازلي عن اللحظَات دي
ما تفتشِي عن خُطط عشان تجيبيهو بيها
ما تتصلي مليون مرَّة في اليوم وهو ما يرد ليك وتقولي إحتمال ما شاف المليون مكالمه كدي أحاول للمرة المليون وواحد!
- إتصلتي وما رد
ما تتصلي تاني
رساتِي وطنَش ما ترسلي تاني
لو عايِز يتصل ليك أو يرسِل بيعرف يوصل ليك كيف ولو كنتي في آخر الدنيا!
#أذر_وايز
فااا إنتِ منووورة بيت أبوك معززه ومكرمه ، زوله شاطره وجمِيله وقدامك الحيَاة كلها ، أقرِي ، سَافري ، عيشِي
لمن يجِي الزُول البيستاهل يشاركِك الحاجَات دي
● #السؤال_الأكثر_تكراراً (نمبر2):
● لييي الزوله دي بتتعامل معاي كدا ، أنا ما وعدتها بي شي!
- شوف يا مَان:
لو ما بتحبها ما توعدها!
لو ما بتحبها ما تقرِّب منها ولا تدخُل محيط حياتها وصحباتها وأهلها!
لو ما حـ تتزوجها ، ما تتصل ليها وترسل ليها علي راس كل سَاعه وأكلتي شنو؟ وشربتي شنو؟ ورجعتي البيت ولا لسه؟ والرجَّعك منو! "إنت كُمساري؟"
لو ما ناوي تِجاهها خير ما تلخبط حياتها خلي موقفك واضِح من البداية الله يرضى عليك ياخ
ولو أهلك ما حـ يوافقوا عليها ما تعلقها بيك خالِص
لو أمَّك عايزاك لي بِت خالتك ما تقرِّب منها!
لو ظروفك المادِيه ما بتسمح بالعرس صارحها عدِيل!
شوفها بتقيف معاك ولا لا؟
(أنا من هسا بقول ليك حـ تقيف معاك)
ولو ما حـ تواصل معاها ما تدخل حياتها من البداية
ولمن تدخل حياتها ما تختَفي فجأة!
ما تحاوِطها من كل الجِهات وتتونس وتتونس وتعشمها وفجأة تقول ما بقدَر أقول ليها عشَان ما أكسر قلبها!
قلبها بيتكسر لمن فجأة تجي وفجأة تمشي .. فاهم!
لاهي عرفت إنت جيت ليي ولا مشيت ليه!
الحاجه دي كعبه شديد!
فاااا ما تعملوها رجاءً..!
أشرح ليها ووريها أسبابك(نحن النساء الغموض بيشُقينا شقا)
- راعِي لبنات الناس عشان عندك أخوات هسي وحـ يكون عندك بنات بعدين
فااااشنو يا تجي دغري يا لا
#صفية_مصطفى🌸


-

عارفِين لييي مُعظم #العلاقات_السودانية (زواج ، حب أو خطوبة) فاشلة وخالية من البرَكة ليي!!
السبب التناقضات الفي كل العلاقَات

تعال النوريكم كيف! 🙂
- البت عايزه عرِيس مُلتزم وبصلي الصلوات الـ5 في المسجد وعلي خُلق ،
وهي بتحب واحد معشِّمها بالزواج وهو بتكلم معاها 24 ساعه في اليوم من غير ما يقُوم يصلِّي وآخر مره مشى المسجد كان من الجمعَة الفاتت ولسّه الفَجر بصليهو الساعة 8!!!!! ، ومستعِد يفوِّت الصلاة عشان مُحاضرَة ولا موضوع دنيوي عادِي ما فارقة معاه
👈(تناقُض)

- الولَد عايز حبِيبتو -والمصطلح ده زاتو غلط ونحن فاهمنو غلط وفي المكان الغلَط- ما علينا المُهم يلا عايزها تقطعهَا مع كل الأولاد -حتى أولاد اهلها- بس هو ما بقدَر يقطعها مع زمِيلاتو وصاحباتو من الجامعة والفيس
👈 (تناقُض)

- البِت ما عايزة عرِس أقل من عرس صاحبتها الكلَّف 800 ألف (مليون بالقديم) ، بس هي بتحِب واحد مرتبو 800 ج ، يعني مُحتاج يلم مرتب 800 شهر من غير ما ياكل ولا يشرب .. يعني تقريباً 66 سنة من غير أكل ولا شراب عشان يكون زي ما هي عايزاه
👈 (تناقُض)

-الولد يحِب ويتكسّر في بت دُفعتو في الجامعة ، وعلى الأغلب هي في نفس عمرو تقريباً وبعد 4 سنة هي تحِس نفسها بايرة وكايسة عريس وهو يادووب بفتش لي محل يقضي فيهو الخِدمة الوطنية وما لاقي خلي كمان يسكِّنها أو يتزوجها
👈 (تناقُض)

- البِت تعمل علاقة بطّالة (عافاكم الله) مع ولد قبل الزواج ، وتقول الخائن ما عرسّني ، لأ والغريبه كمان البنات يتعاطفوا معاها ، ده إسمو زنا يا (شيخة) وإنتو الإتنين مفروض تتجلدوا 100 جلدة بغضَّ النظر هو حلف ليك إنو حيعرسك ولا عمل شنو
ما الكلام واضح لمن ربنا قال :
{الزَّانِيَةُ وَالزّانِي.... }
يعني ما قدَّم البت عبثاً ، لأنو الموافقة عليها هي ، وجايز الإغراء منها كمان (في الجانب ده ما مقصرات ، واللِّبس اللهم حدِّث ولا حرج!!!)
وجاء في آية السرقه قال (السَّارِق والسَّارِقَة) لأنو كسب العيش علي الرجل فإتقدّم في الآية

- البت عارفة الخلوَه بالرجُل حرام ، بس ها عايزة تقعُد معاهو براها في العربية بالليل ولا في بيت فاضِي ولا حته ميتة
ولا في مكان معزُول في الجامعة عشان يحلُّو مشاكلهم ولا يشرحُو الشيت الفِلاني ، وهي عاااارفه كويسة الحاجه دي غلط×غلط وممكن تتطوّر لأبعد من كدا ، وتجي تطلعيهو قليل أدب في النهايَة ، عايزة يعنِي تجسّي نبضو وتعرفي لياتو درجة إنتِ مرغوبة!!! معليش يا ستي
رغم إنكم التنين غلطانين ، بس صدقيني الخسران في النهاية حيكون إنتِ وبس!
👈(تناقُض)

- الولَد يعمل السبعة وذِمتها وما يخلي دابة في الارض إلا ويقل أدبو معاها ، بس لمن يتزوج عايز واحدة بطهارة "مريم العذراء"
👈(تناقُض)
لا يا شِفِت ، طيب البنات الإنتا خربتهُم ديل حيمشو للناس المُحترَمين! لا يا حلو ، حيجوك بنات خربهُم غيرك..
وفي البقول ليك ما أنا تُبتا خلاص الحمدُ لله وإن شاء الله حتجيني واحدة مُحترمَة
لا يا ظرِيف حتجيك واحدة قليلة أدب ، بس زيك كمان ، غلطانة وتايبَة
ما هو ربنا عند وعدُو لمن قال في سُورة النور :
(الخَبِيثاتُ للخَبِيثِينَ والخَبِيثُونَ للخَبِيثَاتِ والطيِبَاتُ للطَيِبِينَ والطَيِبُونَ للطَيِبَاتِ ...)

- المتزوِجة عايزة تعمل علاقه وتحب كمان من وراء زوجها بدعوى إنو زوجها ما رومانسي وماشغال بيها ومهملها و..إلخ إلخ ، لا وكمان بتحب وبتغِير كمان
ده أم أبو (التناقُض) ذاتو
الحياة ما مشَت مع زوجك إتطلقي ، مشرُوع ليكِ
أخير كلام النَّاس من غضَب ربنا!

#عارفين
عمرنا ما حنكُون في علاقَات سليمة ومُعافاة لو ما حلينا التناقُضات دي👆

#إنتي..
من البداية شوفي زُولك الفيهو مواصفاتِك الفعلاً عايزاها ، والحتتحملي عيوبُو ، والحيفهمك وتفهميهو ، وما تعتمدِي علي أي كلام بقولو ، بتعرفيهو بأفعالو ومواقفو وردات فعلو التلقائية ، وأعرفِي إنو أي مُخالفة تعمليها عشان خاطرو إتاكدي إنو حيحسِبها عليك وحيتذكرا ليك أوقات الخلاف ، وإنتِ الحتدفعي تمنها
ده طبعاً غير إنك ما راعيتي لمراقبة ربنا ليك وقتها.. ودي حسابها براه

#إنتا..
ما تعمل فِيها شِفِت ومقطِّعها ومافي زول غيرك وصل آخرها ، صدقني أي حاجه مهما كانت صغيرة وما بتسوى تسويها في بنات الناس بترجَع ليك كاملة مكملة ، راقب بس أخواتك وبناتك كويس..

#الناس تخُت عقلها في راسها وتبدأ تعالِج التناقضات دي وتتعامل معاها
وأي شئ أطلبوه بالحلاَل ورِضا ربنا ، مدام في طريق سليِم وفي النُور .. البوديك علي الشقا والضلام شنو!!!



#لقائله💛

مهما كان الشخص اللي واقف قدامك ببان ان قوي صدقني ممكن يتهدى عادي بالضغوط النفسية، ووممكن يحصل ليه احتراق نفسي من الداخل ..

👈🏼 فالامراض والمشاكل والقعد النفسية ما بتجي من العدم حتي لو وراثية، الحاجات دي كلها بتجي من متغيرات البيئة والضغوط النفسية اللي بتجي خلف بعضها ..

فلمن تكون ماسك جوالك " وتبدا تعلق تعليق تافه لحدا _ او تسيئ لبنت او ولد _ او تقلل من قيمة شخص" بتكون مبسوط لانك طلعت الانسان الكعب اللي جواك بس صدقني بتعليقاتك دي بتكون دمرت الانسان داك اكتر مما هو مدمر ..

لمن يكون عندك صاحب وتبدا " تقلل من قيمته وسط اصحابه او زميلاته _ او لمن تكرر ليه كلمات انك فاشل او مش نافع وعمرك ماحاتتقدم" صدقني انت صادق هنا لان هو مش فاشل بس كلامك واستهتارك وتقليلك من شانه حايخليه فاشل وحايدمره نفسيا ..

👈🏼 الكلمة الطيبة لو ما كانت بتفرق ما كانت بقت صدقة ولا كان الانسان بياخد عليها اجر لمن يقولها ..

فصدقنى الشتائم ، والالفاظ الكعبة ، والتقليل من الشخص التاني ، وتدمير المعنويات ، واحباط الاخرين دي كلها ممكن تكون حاجات هينة وعادية بالنسبة ليك لانك مش شايف اثارها ولا اتقالت ليك ..

بس صدقني اثارها النفسية عاليه شديد علي الشخص اللي بتقولها ليه وممكن تخليه ينتحر " علشان انت بعدين تجي تعلق وتقول ايمانه ضعيف" فهو مش ايمانه ضعيف بس انت ما خليت ليه مفر في الدنيا دي غير الانتحار ..

👈🏼 فلو انت مش قادر تقول كلام طيب ولا قادر تساعد حدا في حل مشكلة معينة " ما تتكلم ولا تقلل من حجم مشكلته ولا تبرهن ليه ان الماري بيه عادي لان صدقني انت ماعائش معاناته ولا عارف الالم النفسي اللي جواه" فلو ماعندك الحل اسكت وصدقني سكاتك حايكون راحه ليك وليه ..


فانتقوا كلماتكم وانتقوا عباراتكم وماتحاولوا تقللوا من قيمة شخص او شكل شخص او حتى قدرات شخص لان صدقوني انتم ماعارفين اللي جوه الشخص ده ولا حاسين بالالم اللي جواه فما تدمر حياته اكتر مماهي مدمرة ولا تقلل من قيمته اكتر ممماهو شايفها كدا ..

🔶 وبالنسبة ليك انت/ي " لمن تكون في علاقة مع شخص بقلل من قيمتك او قدراتك او حتي بيحبطك يبقي لازم تقول ليه STOP وتوقفه عند حده حتي لو كان الشخص ده اخوك او امك او ابوك او اي شخص بعني ليك شي غالي، لان صدقني ماف دين بيرضي لشخص ان يتالم نفسيا، وماف دين بيرضي الاهانة لشخص، وماف دين بيرضي ان الشخص يكون عبد لغير الله"

فانت ما مجبر تستمر في علاقة بتطلع اسوء ما فيك، ولا مجبر انك تستحمل شخص بيزلك ويهينك يوميا، ولا مجبر تحترم شخص اكبر منك وهو بيسيئ ليك يوميا " صدقني انت مامجبر علي كل الحاجات دي فلازم توقفها بنفسك لان مافيش حدا حايوقفها غيرك"

البسيئ ليك ما بيشوف نفسه غلطان بيكون فاكر ان هو بيعمل في الصح ..
والبقلل من قيمتك ما حايوقف لان حايفكر انك مش مهتم ..
والبحبط فيك حايواصل في كدا علشان عمرك ماتتقدم عليه ..
والبيقلل من قيمتك ما حايبطل ده ..

فعلشان كدا ما تنتظر ديل يتصلحوا ولا تنتظرهم في يوم من الايام يتغيروا، بالعكس لازم تقيف قدامهم وتوقفهم عند حدهم " وطريقة ايقاف كل شخص بتختلف عن التاني، فالصديق اسلوب ايقافه بختلف عن الحبيب، واسلوب الكلام مع الاهل بيختلف عن اسلوب الكللام مع الاصحاب" فعلشان كدا اختار الاسلوب المناسب علشان تخلي اي شخص من ديل يبطل يقلل من قيمتك او يسيئ ليك " لانك اتولدت حر ما اتولدت عبد لحدا غير الله"


"فاقطعوا كل العلاقات البتقلل من قيمتكم ومن شخصياتكم حتي لو ما حاتلقوا غيرها لان راحتكم النفسية ورضاكم اهم من كل شي في الدنيا دي "

#Mohammed_Omer
#yes_you_can

انا مش عارف اسمك ولا عمرك ولا حتى محل سكنك ولا عارف اسرتك ولا حتى صحابك ..
واكيد مدام مش عارف ديلك، فاكيد مش حاكون عارف شعورك دي الوقتي ولا عارف نظرتك اتجاه نفسك ولا عارف قدراتك ولا عيوبك ولا حتى مميزاتك ..

بس عارف ..

انك " انسان" زيي ما واحد " بتزعل مرات _ وبتضحك مرات تانية _ وبتبكي مرات _ وبتضعف مرات _ وفيك عيوب كتيرة _ واكيد عندك مميزات برضو" ..

وعارف برضو انك انسان ناقص لا كامل ولا مثالي ففيك الجانب اللي وحش فيك وفيك برضو الجانب الحلو فيك ..

وطول مافيك عيوب اكيد فيك مميزات ..

وعارف انهم سمعوك " انك فاشل _ وانك ما حاتقدر _ وانك عمرك ماتنجح _ وانك عاطل _ وانك بايرة .. الخ" بس صدقني عارف انك اكبر من كل الاتقال عنك ..

وعارف ان جواك في شخصية حلوة وحلوة شديد للشخص البشوفها صح .

وعارف ان في يوم من الايام حاتقدر تسكت كل الالسن اللي ازعجتك واللي حاتزعجك ..

وعارف ان حاتلاقي الشخص اللي بيشبهك واللي بيقدرك ويحترمك زي ما انت ..

وعارف برضو " ان انت ما زي ما انت فاكر" بالعكس انت اكبر من نظرتك اتجاه نفسك ...


👈🏼 فصدقني مهما سمعت ومهما صدقت ومهما شفت حاتظل انت انت وحاتظل افضل انسان بالنسبة لشخصك وحاتظل مميز بشخصيتك الحقيقية " لان ربنا خلقنا مختلفين وخلق كل شخص فينا بميزات مختلفة عن الثاني"

_ فما تحاول تكون شخص غيرك، ولا تحاول تقارن حالك بشخص تاني، ولا تحاول تصدق كل كلمة بتتقال ليك لان انت مش عارف نفوس الاشخاص اللي بتقول ليك الكلام الوحش ده ..

فانت مميز بشخصيتك وانت مميز لانك انت وانت مميز لانك قدرت تصمد وتصبر لغايه المرحلة دي، وانت مميز لانك قادر تحقق حاجات كبيييرة، وانت مميز لان شخصيتك فريدة، وانت ممييز لانك حاليا بتقرا وبتضحك وبتبتسم مع نفسك 💙🌸

" ماتكون الشخصية الانا دايرها ليك ولا تكون الشخصية الدايرنها ليك الاخرين بالعكس كون الشخصية الدايرها انت وارضي بكل حاجة فيك من عيوبك لحدي مميزاتك ومن شكلك لحدي اخلاقك"

#Mohammed_Omer
#yes_you_can

داير اتكلم عن الانتحار بشكل تاني ..

ربنا حرم الانتحار " لان نفسك عليها حق عليك وحقها ده انك مش تاذيها ولا تعمل اي حاجة تضرها نفسيا او جسديا"

بس كلنا عارفين ده بس ربنا حرم الانتحار " لان كان عارف ان حاتجي علينا لحظات بنقرر فيها ننتحر لان في اللحظات دي بنكون شايفين كل الطرق اللي امامنا اتقفلت فما بنلقي حل غير ان ننتحر من وجهه نظرنا"

_ بس لا الانتحار مش الحل لان لو كان الحل ربنا ما كان حرمه ابدا " فالانتحار حرام لان بعد تبدا في عملية الانتحار مش حاتقدر ترجع تاني وتصلح الحصل"

وفي سؤال اتسال لاغلب الناس الحاولت تنتحر اي الفكرة اللس كانت في راسك بعد بديت تقتل في نفسك؟

ردهم دايما كان بيكون " ان الانتحار فكرة غبية، وان عرفنا ان هو مش الحل" والناس ديل لو ما انقذوهم في اخر لحظه ما كانوا قدروا يغيروا من حياتهم بعد كانوا شايفين ان الانتحار هو الحل ..

👈🏼 عارف ان الانتحار حرام ليه برضو؟ " حرام لان عندك القدرة تغير اللي بيجرا ليك ويحصل ليك ده بدون تنتحر" وصدقني اي موقف بتمر بيه وبتكون شايف ان ماعنده اي حل " خليك فاكر ان عنده حل بس انت ما شايف الحل ده"

_ فالانتحار عمره ما كان حل " لان حايحرمك من فرصة تغيير حياتك بمجرد ما تقدم عليه"

_ والانتحار عمره ما كان حل " لان حاياذي النفس بتاعتك اللي ربنا حرم عليك انك تاذيها"

_ والانتحار عمره ما حل " لانك حاتفقد الدارين بمجرذ ما تقدم عليه"

_ والانتحار عمره ما حل لان " حرام شرعا"

👈🏼 فلمن تحس ان الطرق اتقفلت عليك، وتحس انك مش عارف تعمل ايه او تختار ايه علشان تنقذ نفسك وتنتشلها من الاحساس البائس اللي بتمر بيه ده " خليك عارف في اللحظه دي انك قادر تنتشلها وانك قادر تنقذها وانك قادر تغير من حياتك دي بالكامل بقرار واحد انت حاتاخده واكيد القرار ده انت حاتعرفه لمن تمر باللحظه دي"

_ فما تنتحر ولا تفكر تنتحر " لان صدقني مهما كان اللي بتمر بيه ده ما بيعني انك كدا او حاتعيش باقي حياتك كدا"

_ ولا تفكر تنتحر " لان صدقني برضو الحل موجود وفي فرص كتييرة ممكن تغير حياتك لواقع افضل واجمل"

_ وماتنتحر " لان نفسك ما تستاهل انها تموت بسبي ظروف او مشاكل نفسية محددة بالعكس ده مفروض انك تواجه كل الظروف دي وتقولها لا نفسي عزيزة ومستحيل اذيها"


👈🏼 ففي الف حل ممكن تاخذه بنفسك ويغير من حياتك واول الحلول دي ..

_ انك تلجا لطبيب او اخصائي نفسي " لمن تحس ان فكرة الانتحار دي بقت مسيطرة عليك" وكونك تلجا لاخصائي ده ما بيعني ايمانك ضعيف بالعكس لان ربنا اوجد الاخصائي ده علشان يساعدك ..

_ ولازم تعرف برضو ان حياتك حاتتغير والامك حاتنتهي ومهما كانت شدة الموقف اللي انت ماري بيه ده اعرف انك اقوي منه وانك قادر تطلع منه بارادتك لانك قوي مش ضعيف زي ما انت مفتكر ..

_ وماتلوم حالك علشان فكرت بالانتحار ولا تجلد نفسك " علشان سمعت او حسيت ان اللي بفكر بالانتحار ده انسان ضعيف وايمانه ضعيف" بالعكس انت انسان وعلشان فكرت بده يبقي مفروض تلجا لاخصائي علشان يساعدك بعد ربنا وينتشلك من الوضع اللي انت فيه .


" فصدقني انت قادر انك تخلق لنفسك حياة جديدة، وقادرة انك تصنع حياة اجمل من اللي فاتت، وقادر توقف كل الظروف والمشاكل اللي بتمر بيها، وقادر تنتشل نفسك من المشاكل الحالية، واذا انت مش قادر تعمل كل ده بنفسك فصدقني مافيش عيب لمن تلجا لاخصائي او طبيب نفسي علشان يساعدك "

#Mohammed_Omer
#Yes_You_Can

س سؤال : انا يا محمذ دايرة اتغير، او داير اطلع اجمل نسخة ففيني واكون انسانة غير فكيف اقدر اعمل كدا لاني حاولت وفشلت؟

ج جواب : كونك تكوني دايرة تتغيري، او تعملي تحديث لنفسك وتكوني نسخه افضل من نفسك ده شي حلو جدا 💙

_ بس ده ما بكفي " ده ما حايخليك تتغيري ولا حايساعدك كتير لان الرغبة مش كل حاجة"!

_ فكبداية انتي لازم تحددي دايرة تغيري شنو؟ او معايير النسخه الافضل بالنسبة ليك شنو؟ " لان كلمة تغيير وكلمة نسخه افضل ديل كلمات فضفاضة فلمن تقولي دايره تعمليهم ما حاتقدري تعمليهم ما لم تحددي"

_ فانتي شخصية مركبة ومكونة من الاف الصفات والعادات " فعلشان كدا لمن تكوني دايرة تتغيري يبقي لزاما عليك تحددي دايرة تغيري شنو بالضبط"

اضرب ليك مثال :

_ الليله لمن تجي وتقولي دايرة تتغيري ما حاتقدري تتغيري " وده مش علشان انتي ماعندك الارادة بالعكس ده علشان انتي ما حددتي دايرة تغيري شنو في شخصيتك دي ...!"

فهل دايرة تغيري : " علاقتك بربنا وتحسينها اكتر _ ولا دايرة ترفعي من ثقتك بنفسك _ ولا دايرة تغيري علاقاتك مع اهلك وصحابك _ ولا دايرة تتخلصي من عادة سيئة زي الكذب او العادة السرية او او . الخ"

فانتي لمن تحددي دايرة تغيري شنو حاتقدري تغيريه اما لم ما تحددي دايرة تغيري شنو فماحاتقدري تغيري حاجة؛ وده لان انتي حاتكوني ملخومة بالف عادة وصفة دايرة تغيريهم سواء دايرة تكتسبيهم او تتخلصي منهم فده بيعمل ليك تشتت وبيستنذف طاقتك قبل ما تبدي ..

المثال :

الليله لو قلتي دايرة اقرا ما بتقري عارفة ليه " لانك ماحددتي دايرة تقري شنو فلمن تجي تقري حاتلقي روحك كل دقيقة بتختار في كتاب مختلف، وكل ما تمسكي كتاب حاتخليه علشان تقدري اللي بعديه"

بس لمن تحددي دايرة تقري اي كتاب " هنا بتقدري تقري حتي لو حاتقري 10 صفحات بس حاتلقي روحك قريتي لانك ببساطة حددتي الكتاب اللي دايرة تقريه فكذلك الوضع مع التغيير"

👈🏼 اما بالنسبة لرغبتك في انك تكوني شخص احسن من ذاتك فده شي جميل ..

بس داير اسالك؟ الشخصية اللي دايرة تكونيها شنو؟ هل عارفة صفاتها؟ او هل عارفة عاداتها؟ ولا هل عارفاها كيف بتتصرف؟

وشخصيتك الحالية دي مالها؟ عيبها شنو؟ والناقصها شنو؟ ومحتاجة تعديل وين؟

فاذا مالقيتي اجابات للاسئلة الفوق دي ما حاتقدري تغيري شخصيتك بالكامل لانك ببساطة مش عارفة الشخصية اللي دايرة تكونيها " وعاملة زي بتاع الطيارة السائق ليه طيارة في الجو بس مش عارف فيها جاز ولا لا، ولا عارف هو ماشي وين، ولا عارف حاينزل وين فحايظل دائر ودائر كدا في الجو لغايه ما الطيارة تقع وجازها يخلص ويموت"

👈🏼 فالحل يا آنسة يا عزيزة انتي .. 💙

• انك تحددي في البداية الحاجة اللي دايرة تغيريها شنو في نفسك " كذبك _ سلوكك _ خوفك شنو بالضبط" ..

• بعد تحددي العادة الدايرة التغيريها يبقي طوالي تشتغلي عليها " بانك تبدي تقللي منها بالتدريج يعني لو بتمارسي العادة السرية يوميا يبقي في الاسبوع الاول قللي يوم، ولاسبوع التاني يومين، والتالت 3 ايام لغايه ما تصلي للمرحلة البتقدري فيها ماتمارسي لمدة اسبوع ..

• افضل طريقة لتغيير عادة كعبة هو العمل علي عادة جديدة " يعني في مثال العادة السرية اللي في النقطة الفوق مش طلبت منك تقللي يوم كل اسبوع وكل اسبوع بتزيدي اليوم ده يلا في الايام المش حاتمارسي فيها حاتحاولي تعملي حاجة سمحه وكويسة بتديك شعور افضل وممتع زي شعور العادة، يعني تتكلمي مع صديق او ترسمي او تكتبي او تقري قرءان، او تقري كتاب معين، او تتعلمي طبخة او او .. الخ

• لازم تعرفي ان التغييير محتاج وقت فما تستعجلي للنتائج وماتلومي نفسك اذا فشلتي لان الفشل شي وارد بس بعد كل فشل وكل سقوط اعرفي الاسباب وماتقعي فيها تاني خالص 💙

• اخر حاجة الصبر بس 💙🌸

👈🏼 اما لنسبة لانك دايرة تكوني شخصية احسن فيبقي لازم تعرفي ..

ان الشخصية الاحسن بتتكون من اجزاء والاجزاء دي ياها " عاداتك _ وتصرفاتك _ وسلوكك _ وافكارك _ ومشاعرك"

فعلشان تبقي شخصية احسن لازم تعدلي من ...

• افكارك لازم تخلي افكازك بتتوافق مع الشخصية الدايرة تكونيها " فانتي مش دايرة تكوني مميزة يبقي فكري زي تفكير البنت اللي مميزة"

• تصرفاتك مش دايرة تصرفاتك تتغير وتبقي غير " يبقي اتصرفي زي تصرفات الشخصية الانتي دايرة تكونيها بس اهم شي شخصيتك تكون خاصة بيك مش تقلدي زول معين ولا تقارني نفسك مع حدا معين"

• سلوكك خلي حركاتك وسلوكياتك بتتوافق مع الشخصية الانتي دايرة تكونيها " فما ممكن تقولي دايرة ابقي بنت هادئة وانتي يوميا بتجوطي في اي زول!، ولا ممكن تقولي دايرة ابقي شخصية قراءة وبتحب القراءة وانتي ما بتفتحي كتاب اصلا"

• مشاعرك ومشاعرك دي بتخليها تنضج عن طريق القراءة والخبرات " فكل ماتقري كتاب مشاعرك بترتقي نتيجة لارتقاء افكارك، وكل ما تتعرضي لخبرات مؤلمة او جميلة في الحياة افكارك حاتتغير وبالتالي مشاعرك برضو" فاذا مشاعرك مرتبطة بافكارك 💙

• عاداتك

مش دايرة تكوني زولة نشيطة ومش كسولة خالص يبقي لازم تخلي عاداتك بتتوافق مع الحاجة دي " فماممكن تكون رغبتك انك دايرة تكون نشيطة وبتصحي الساعة 10 " فلازم عاداتك تكون متوافقة مع شخصيتك اللي دايراها .

واخرا وليس اخيرا ..

لازم تصبري ثم تصبري ثم تصبري " لان مافيش تغير بتم بين يوم وليله، ولا بين اسبوع او شهر، لانك هنا دايرة تغيري اغلب صفاتك فاكيد ده محتاج زمن فلازم تكوني صبورة وصدقيني حاتحسي بالتحسن بعد كل اسبوع"

_ ايضا لازم تعرفي " مدام دايرة تكوني نسخه افضل من نفسك ما تنتظري حاجة تحصل علشان تخليك كدا، بالعكس ابدي من هسي وعيشي زي شخصيتك الدايرة تكوني زيها وتلقائيا مع الزمن حاتلقي روحك بقيتي زيها ما واحد"


#Mohamed_Omer
#Yes_You_Can 💪 #مشكلة_وحل

#مودة_ورحمة••{8}❤

لازِم أنبِّه هِنا إنو الهدف الأول من السلسلة دي هو التَوعِية ، ولا حياء في العِلم ، نحن عايزين نطلع من السّلسلة دي بعقلية جدِيدة وبفهَم أوسع من اللي إتلقيناهُو في مدارسنا وعادات وتقالِيد مجتمعنَا ، وبالتالِي الإنسان مُطالب بإنو يكون عندو وعِي دينِي على الأقل حول أهمّ المواضيع العامة والخّاصة في حياتو
بوستنا الليلَة عن #ليلة_الدخلة💕
واللي لخّصتها ليكم من كتاب يوميات مأذون لأحمد بدر
آي الواحد أمو بتوصيهُو ، والبَت أمها بتجيِّها وتديها محاضرة طويلة عرِيضة ، بس نحنا هنا دايرين نشُوف الدين قال شنو عن الموضُوع دا ، وهل فِي حاجات مستحبّة مثلاً وحاجات تانية مفترَض نتجنّبها!!

#نصائِح_مهمة🗓
♥️ القاعدَة الأولى عشان الليلة دِي تبقى جميلة -وتعدِّي على خير😄- ما تسمع كلام المتزوجين من قبلَك خصوصاً البهوِّلوا ليك الموضُوع ، وما محتاج حتى تعتمِد علي أي معلومة قريتا أو سمعتها من قبل ، الموضُوع بسيط .. خلِيك على طبيعتَك وفطرة ربنَا اللي فطرَك إنتَ وهِي عليها ، لو عايز تستشير إستشير أهل الحكمة والثِقة ما تلطش من طرَف وتسمع كلام أي زول والسلام

♥️ أعمل حسابَك الأمر محتاج إسّتحضار نِية إتباعاً لهدي النبِي عليه الصلاة والسّلام علشان ربنَا يبارك ليكم في الليلة دي ، وتحتَسب الأجر على إن لقاءك بزوجتك إبتغاء لوجه ربنا ولإسعادهَا ولعفّة نفسك وروحَك ولذُرية طيبَة حتى يكون لقاؤكم في ميزَان حسناتكم ، لقوله ﷺ : {وفِي بضع أحدكُم صدقَة} قالوا : يا رسُول الله أياتِي أحدنا شهوته ويكونُ له فِيها أجراً؟ قال : {أرأيتُم لو وضعهَا في حرامٍ أكان عليه فيها وِزر؟ فكذلِك إن وضعهَا في الحلال كان لهُ أجر}
صُمتوا طويل عن الحرَام ، وحان وقت الإفطار على الحلال فصياماً مقبولاً وإفطاراً شهياً♥️

♥️ استحبَّ بعض أهل العِلم صلاة ركعتَين قبل البِناء بالزوجة ولم يرِد هذا في سُنة النبي وإنما ورد عن بعض الصَّحابة مثل أبي سعيد مُولّى أبي أسيد ، عبد الله بن مسعُود وأبو ذر الغفاري وحذيفة بن اليمان..
ولكن وردَ في السُّنة الدُعاء -ولم يُحدَّد وقته فإن شاء دعا به قبل صلاته الركعتين أو بعدها- ، يضعُ يده على مقدم رأسها ويقُول :
{اللَّهُم إنِّي أسألُكَ خَيرَهَا وخَيرَ ما جَبَلتَهَا عَليهِ وأعُوذُ بِكَ مِن شَرِّهَا وشَرّ مَا جَبَلتَهَا عَلَيهِ} رواه أبو داؤد وحسّنه الألباني

♥️ تجمَّل / تجمَّلي
في الليلة دي خليك زي القمر ليلة التمام ، أهو دا من بين خلق الله كلهم أكتر بني آدم يستحِق يشُوف أجمَل ما فِيك ، إتزينوا لبعض ، ولا فرق في ذلك بينَك وبينهَا ، فزي إنت ما بتحبّ أنك تشوفها جمِيلَة فهي أيضاً بتحب إنها تشوفك جمِيل
وردَ أن ابن مسعُود أنه كان يتزيّن لزوجته ويقول : "إنِّي أحِبّ أن ترانِي جمِيلاً"

♥️ مُراعَاة حيائَها .. فمِن حكمة الرّجُل أن يتفهَّم طبيعَة المرأة المعاه ، وإنو النِّساء جُبِلنَ على الحياء والعِّفة ، وأنَّ العلاقة الحمِيمة -الجسدِية- لابُدّ ليها من تمهِيد وتدرُّج حتى لا تنفُر الزوجَة أو تخَاف ، وإتذَكّر دوماً أن الإنطبَاع الأول يدُوم
جاء في القُرآن {وقَدِّمُوا لأَنفُسَكُم..} والمعنَى إنك تمهِّد للعلاقَة دي بالمُلاطفَة والمُداعبة والتقبِيل ، فقد كانَ النَّبي ﷺ يلاعِب أهله -زوجته- ويُقبِّلهَا ، وقد روى أنس عن النَّبي ﷺ : { لا يقعنَّ أحدكُم على امرأتهِ كما تقَع البهِيمَة ، وليكُن بينهُما رسُول} قيل : وما الرسّول يا رسول الله؟ ، قال : {القُبلَة والكلام}
- ويجِب على الزوجين تجنُّب كل ما يثِير الغرِيزَة بطرق الحرَام -من مُشاهدَات وكلِمَات محرّمة- فإن ذلك يجلُب الوِزر والخزِي والإثم
وراعِي لنقطة العلاقة ليست لطرفٍ دونَ الآخر ، بل لطرفين يشترِكا فيها لإمتاع بعضهُما فلا بُدّ من فهم ما يحبّه الطرَف الآخر حتى تستمِر العلاقة وتستقِيم

♥️ {نِسَاؤُكُم حَرثٌ لَكُم…}
يجوزُ للرّجل إتيان زوجته في -قبلها- من أيّ جهةٍ يشاء وفي ذلك أحاديثٌ كثيرة ، وحين نزلت الآية : {نِسَاؤُكُم حَرثٌ لكُم فأتُوا حَرثَكُم أنَّى شِئتُم..} قال رسُول الله ﷺ : {مُقبِلة ومُدبِرة إذا كان ذلِك في الفرَج} رواه البخاري ومسلم

♥️ لا يجُوز لك بأي حالٍ من الأحوال أن تأتي امرأتك في الدُبُر ، لأن دا حرام وإثمه عظيِم وفي ذلك أحاديثٌ كثِيرَة منها ، أنه رُوي عن النّبي ﷺ أنه قال : {ملعُونٌ من يأتِي النِّساء في محاشّهن} - أي أدبارهُن

♥️ يجب على الرِّجال اجتنَاب النِّساء في حال الحَيض ، وفي زمن النّبي ﷺ كانوا يجتنِبون النّساء في المحيض ويأتونهُن في أدبارِهنّ فأنزَل الله الآية :
{ويَسأَلُونَكَ عَنِ المَحِيض قُل هُوَ أذَىً فَاعتَزِلُوا النِّساءَ فِي المَحيِضِ ولا تَقرَبُوهُنَّ حَتَّى يَطهَرنَ...}
وقَد روى أبي هُريرَة عن النَّبي ﷺ أنه قَال : { مَن أتَى حائِضاً أو امرأةٌ فِي دُبُرِها ، أو كاهِناً فصدّقهُ بما يقُول ، فقَد كفرَ بما أُنزِل على محمّد}
فشوف العقوبَات المترادفة دي ، ودا لأن في هذا الفِعل مخالفَة للف

ِطرة ومقارفة لما تأباه النفُوس السوية لأنه محل خرُوج القذارة ، كما أنه فِيه تفويت لحظّ المرأة من اللذّة وغير ذلك مما يؤكد حُرمة هذا الأمر
فسبحان الله لاحظ سعَة الدين دا وإهتمامو لأدّق التفاصِيل

♥️ ماذَا بعد العلاقَة الحمِيمة -الجِمَاع-!!
من الأشياء القاتِلة في الحياة الزّوجية أن يترُك الرّجُل زوجتهُ بعدما ينتهِي من العلاقَة الحمِيمة مباشرةً أو العكس أن تترُك المرأة زوجها بعد العلاقة ؛ فيحس الطرَف الآخر أنه كان مجرّد وسيلَة للمُتعَة وبعد ما شريكه أخد اللي عايزو يديرُ عنو ظهرو وينشغِل منو
والتصرُّف دا مهيِن للرُوح جداً ؛ الزواج مش مجرّد علاقة حميمة وبس ومُش محصور في غُرفة النُّوم .. لازم تعرِف إنك مسؤول عن عفاف روح واستغنائها ، دا ربنَا لمن ذكَر العلاقة الجسدية في القُرآن بين سيدنَا آدم وأمنا حواء قال :
{فلَّمَا تغشَّاهَا حمَلت حَملاً خَفِيفَاً..}
وتغشّاها وردت في المعاجِم : غطّاها ، سادَ أرجَاءهَا ، انتشَر فِيهَا
غطاء وسِتر وانتشَار في كل الرّوح ، هُنّ لباسٌ لكُم وأنتُم لباسٌ لهُنّ ، متخيّل إنها سِترَك وأمانَك وسندَك ، مش مجرّد جسَد وانتهَت الرّغبة فِيه .. أو شهوة ساعة وراحَت!
فانتبِه إذا انتهيتَ من العلاقَة الحمِيمة أن تُلاطِفا بعضكُما ، إحتضِنها ، وتحدّث معها واسئلهَا ما يرُوقِك وما لا يرُوقكِ في هذه العلاقَة

♥️ النقطة دي ما مُحتاجَة توصِية ، إياكُم اللي يحصَل جوه غرفة النُوم يطلَع برا ليها لا على سبيل الجد ولا المُزَاح ، فذلك فِعلٌ يبغضهُ الله ، لقولَه ﷺ عن أبي سعيدٍ الخُدري : {إنّ من أعظَم الأمانة عِندالله يوم القِيامة الرّجلُ يفضِي إلى امرأتهِ وتُفضِي إليه ثم ينشُر سرّها} ، وينطبِق ذلك على المرأة أيضاً

♥️ حسبما وردَ في حديث النبي فإنه يسنّ للرجُل إذا جامَع زوجته ، ثم أراد معاودَة الجِماع مرةً ثانية أن يتوضأ بينهُما وضوءً -وإن اغتسَل فهو أكمَل-
- وفي فتوى لإبن عثيمين بيقول فيها إنو : يجوز له أن يعود بدون وضوء "وهذه أدنى المراتِب"
وقد أُمِرَ الرّجُل بذلك دون المرأة
ويجوزُ للزوجين أن يغتسِلا معاً من جِماعٍ أو دونه ، ويجوزُ لها النظر إلى بدن بعضهِما دون تفصِيل ولا حرَج ولا كراهِية لهما في ذلك
وقد روى البُخارِي عن عائشة قالَت :
"كنتُ أغتسِلُ أنا والنّبي ﷺ من إناءٍ واحِد"
- بالنسّبة لغُسل المرأة بعد الجِماع ، فيمكنها أن تغتسل الغسل الكامِل وهُو مستحَب ، أو تنوِي الغُسل -فإذا دخلت تحت الدش مباشرةً- وعمّمت جسدهَا بالماء مع رأسها ، فذلك يجزئ عنها "يكفيها" ولا تنقُض ضفيرتها
حسبما وردَ عن عائشة رضي الله عنها حينما ردّت على ما يفعله عبد الله بن عمرو إذ كان يأمر نساءه بأن ينقضن ضفيرتهنّ عند الإغتسال ، فقد قالت : (لقد كنتُ أغتسل أنا والرسول ﷺ من إناءٍ واحد ولا أزيدُ على أن أفرغ على رأسي ثلاث إفراغات)
وبالتالي :
-لم تكن تنقض ضغيرتها عند الإغتسال
- وأيضاً لغسل الجنابة سُنن مستحبّة إن لم تَفعلها ، ونوَت رفع الجنابة ثم عمّمت الجِسم كله بالماء مع الرأس والرجلين صح الإغتسال
المهم
يجب أن لا يناما إلا على إحدى الطهارتين (الوضُوء أو الغُسل)
والغُسل واجب بعد الجِماع عشان الواحد يرجَع يؤدي فرضو من صلاة وصُوم وغيرو♥️

• لغاية هنا نكون وصلنا لنهاية البوست ، ونتلاقا في البوست الجاي بإذن الله ، بعد أول سنة زواج

لخصّه ورتّبه :
#مريم_الشيخ♥️
https://m.facebook.com/story.php?story_fbid=934842343676509&id=100014522556820


•

منو فيكم حضر فيلم "حلم العمر" لحمادة هلال؟

دائماً بقول النجاح (طريقة تفكير) عشان كدا تعالو شوية نطلع من جو الكلام العلمي الكل مرة بكتبو ونفكر خارج الصندوق ونشوف قصة الفلم دا شنو؟

ما قصدي القصة الظاهرة للجميع ، لا
خلونا نشوف ما وراء الفلم وكمية العبر والقصص الفيه والفيلم دا دخلو بيك شنو؟
كل واحد يعتبر نفسو حمادة هِلال و خلونا نشوف أي واحد واقف وين و الناقصو شنو عشان حياتو تتختم بتحقيق حلم عمرو .

بدأ الفلم لمن حمادة هِلال قرر يحسن وضعو وإتخذ قرار شجاع جداً بإنو يخلي منطقتو الإتربا فيها من صغير عشان يمش "مصر" لأنو عرف إنو طول ما هو في الإسماعيلية ما حيقدر يحقق حلمو .
طيب إنت عملت شنو؟ طلعت من منطقة ال comfortzone ولا لسة بتتفرج علي إنجازات الناس ونفسك تنجز؟
طلعت من جو الإحباط المسيطر عليك و إتحركت نحو حلمك ولا لسة شايف إنو ما منك فايدة وعمرك ما حتقدر تتغير؟

☆المشهد التاني كان لمن واجهو إعتراض ومخاوف من إمو بس هو فضل متمسك برأيو .
المشهد دا بذكرك بشنو؟
كورس كان نفسك تخشو وأهلك رفضو ، تخصص نفسك تخشو وأهلك رفضو ، حاجات كتيرة كان نفسك تعملها بس أهلك رفضو ، بس نجي للسؤال ، هل حاربت عشان تعمل الحاجة النفسك فيها دي؟ هل حاولت تقنعهم ولا إستسلمت طوالي؟
ما بذكرك بحاجات كان نفسك تعملها ومكسل وبتبرر لنفسك إنو اهلك ما حيخلوك؟
جربت بدائل ولا خلاص متكل علي شماعة إنو أهلي ما حيخلوني؟

☆المشهد التالت كان لمن إتصدم حمادة هلال بواقع المنطقة العارض عشانها أمو ، ولقي الأسعار ضعف ما كانت عليه في منطقتو الأولي ، بعد ما كان فاكر إنو أول ما حيترك المنقطة الكان عايش فيها وضعهم المادي حيتحسن وحيلقي شغل طوالي إتصدم بواقع تاني خالص ، بس ما إستسلم
لقي فرصة عمل أقل من الكان متوقعها بس وافق عشان حلمو الكبير.
المشهد دا بزكرك بشنو؟
عند أول عتبة واجهتك وقفت تكمل ولا قلت كلام أهلي طلع صح عشان كدا احسن أرجع وأرضى بالواقع؟
ولا رفضت فرصة جاتك لأنو كبريائك ما سمح ليك ترضي بيها؟

☆المشهد الرابع لمن لقي نص حلمو "نور" البنت الحباها او ممكن نقول فتاة أحلامو ، المن بعدها بدت تنهال عليه المشاكل بسببها ، في جملة قالتها نور ل أحمد "حمادة هلال" بتعبر عن حال الكتير مننا ، قالتو
إنت جبان ومُصر تعيش دور الضحية عشان كدا الدنيا حتفضل تجي عليك وانت حتوطي ليها في كل مرة عشان جبان وخواف .
تتذكر لمن كنت بتقول أنا لو عندي قروش كنت هسي بقيت زول عابر ؟ بس انا ما عندي قروش عشان كدا حفضل فاشل طول عمري !
ولا تتزكر لمن كنت شايفانو اهلك هم اكبر عائق ليك وبسببهم طول عمرك ما حتمش لقدام!
ولا بتتزكر طول حياتك الفاتت بتضع اللوم علي مدرستك علي استاذك علي وضعك الاجتماعي وعلي البيئة الإنت فيها ..الخ
تتذكر لمن خفت تقرا تخصص جديد ؟ ولا البيزنس حقك اللأن ما شاف النور لأنك خايف
عرفت لي إنت للأن ما مشيت لقدام؟
لأنك جبان وخواف وعايش دور الضحية ، وطول ما إنت عايش الدور دا عمرك ما حتتطور .

☆المشهد الخامس لمن لقي زول يؤمن بيه كشخص وكمقدرة ، لمن لقي زول يرجع يشعل الشمعة الإنطفت جواه ، وحتي لمن الزول دا قرب يبعد عنو ما قعد يندب في حظو ، لا
حاول معاه بالمرة والإتنين لحد ما أقنعو.
المشهد دا بزكرك بشنو؟
يمكن لسة ما يكون زكرك بحاجة لأنك لسة ما وصلت المرحلة دي ، او لأنو إنت للأن مخلي الإحباط يسيطر عليك .
او يمكن زكرك لمن جا الشخص اليؤمن بيك او جات الفرصة الأولي بس إنت ما إتعرفت عليها لأنو لسة جواك خوف وعدم ثقة بنفسك .

☆المشهد السادس لمن حمادة هلال خسر نور وبقت من نصيب زول تاني بس بسبب خوفو .
دا بذكرك بشنو؟
كم مرة خسرت اشخاص انت بتحبهم لأنك خائف ؟ او لأنك إنت شايف إنك ما بتستاهل؟
كم مرة الفرصة الإنت بتتمناها جات لعندك بس إنت رفضت لأنك خايف؟

☆المشهد السابع والأخير لمن حمادة هلال حقق حلمو وبقا بطل العالم في الملاكمة ، لمن أبو نور الكان بستهتر بحلمو بقا أول المشجعين ليه ، لمن قال:
"وعدتك أبقا حاجة وبقيت أنا البطل"

المشهد دا ما اعتقد بذكر بشيئ غير حلمك القاعد للأن في رفوف الانتظار منتظر إنك تعبرو ..
حلمك البسبب خوفك بدأ ييأسس منك وحبة حبة بقا ما بهمك وبقيت شايف إنو كلام فاضي .
المشهد الأخير لازم تاخد منو رسالة مهمة جدا:
الناس عمرهم ما حيؤمنو بيك وحيفضلو يستهترو بحلمك لحد ما تحققو ، ومن بعدها حتلقاهم واقفين جنبك .
أعرف ان. الوقوف البتمارسو دا ما حيضر زول غيرك .

مشاهِد الفلم أكتر من كدا والعبر الفيها أكتر بكتير بس ما عاوزة البوست يطول أكتر من كدا ، دي كانت محاولة بسيطة عشان أدعم ليكم إنو #النجاح "طريقة تفكير"
ممكن وإنت بتحضر في الفلم تبص علي المشاكل الواجهت حمادة هلال دي وتقول سبحان الله نفس مشاكلي وتبدأ تملي حياتك فقر وتحطيم ، ولمن تجي اللقطة النهائية وهو بحقق حلمو حتقول لنفسك ياخ دا فلم خيالي ساي .
شايف إنت بتدمر نفسك بنفسك كيف؟
الفلم لمن عبر عن واقعك الأليم رضيت بيه
بس أول ما بدأ يسلط الضوء عل

ي نقاط ضعفك قلت عليه مجرد سناريو وحبر علي ورق!
حاول فكر دائماً بطريقة صحية إيجابية ، إستقل المواقف الحوليك وحللها وطلع فيها الإيجابية بس واجدع السلبية وحبة حبة من زول متشائم حتبقي زول إيجابي.

#ملاحظة
علي فكرة أنا إتعمدت أطرح القصة دي بطريقة أسئلة ، لأنو معظمنا بهرب من إنو يسأل نفسو ويجواب علي الأسئلة ، عشان كدا بطل هروب وأمسك ورقة وقلم جاوب علي الأسئلة دي وإكتشف مخاوفك ونقاط ضعفك وإتغلب عليها.

لو إنت وصلت لهنا خليني أقول ليك هنيئاً لك ، وإنت قادر تحقق حلمك ، أنسي الفات وأبدأ من هسي ، خلي الفلم دا قائد وملجأ ، كل ما تيأس إتزكر نهايتو .
كل ما تواجهك مشكلة إتزكر كيف أحمد إتغلب عليها عشان بس يصل لحلمو .
ماف شي بغلبك بس بطل تنظر الأمور بسلبية وإتزكر إنو النجاح
#طريقة_تفكير

#مااهي
#مهاد_مكاوي

ﺗﻘﺮﻳﺒًﺎ ﻛﻠﻨﺎ ﻟﻤﺎ ﻧﻜﻮﻥ ﺯﻫﺠﺎﻧﻴﻦ ﻭﻣﺘﻀﺎﻳﻘﻴﻦ ﻭﻗﺎﻓﻠﺔ ﻣﻌﺎﻧﺎ ﺑﻨﺘﺒﻊ ﺃﺳﻠﻮﺏ
" ﺍﺩﻋﻮ ﻟﻲ، ﻭﻗﺎﻟﻮﺍ ﻟﻲ ﻛﻼﻡ ﺇﻳﺠﺎﺑﻲ، ﻭﻓﺮﺣﻮﻧﻲ ﺑﺤﺎﺟﺔ "
ﺍﻟﻤﻬﻢ ﺑﻨﺸﺤﺪ ﻓﻲ ﺍلإﺳﺘﻴﺖ ﻭﺍﻟﻔﻴﺲ ﺍﻟﻔﺮﺡ .
ﻃﻴﺐ ﺟﺮﺑﺘﻮا ﺗﻜﺴﺮﻭﺍ ﻗﺎﻋﺪﺓ ‏« ﻓﺎﻗﺪ ﺍﻟﺸﻲﺀ ﻻ ﻳُﻌﻄﻴﻪ ‏»
ﻭﺗﻤﻨﺤﻮﺍ ﺍﻟﻔﺮﺡ ﻭﺍﻟﻄﺎﻗﺔ ﺍﻹﻳﺠﺎﺑﻴﺔ ﻓﻲ ﻋﺰ ﺣﻮﺟﺘﻜﻢ ﻟﻴﻬﺎ؟!
ﺡ ﺍﺣﻜﻲ ﻟﻴﻜﻢ
ﻣﻮﻗﻒ ﺃﻭﻝ :
ﻛﻨﺖ ﻣﻊ ﺻﺤﺒﺘﻲ ﺑﺎﻟﻮﺍﺗﺲ ﺑﺸﻜﻲ ﻟﻴﻬﺎ ﺇﻧﻲ ﺯﻫﺠﺎﻧﺔ ﻭﻣﺎ ﻗﺎﺩﺭﺓ ﺃﻋﻤﻞ ﺃﻱ ﺣﺎﺟﺔ ﻓﺎﻗﺪﺓ ﺍﻟﺸﻐﻒ، ﻃﻮﺍﻟﻲ ﻫﻲ ﻓﺘﺤﺖ ﻟﻲ ﺳﻠﺴﻠﺔ ﺷﻜﺎﻭﻱ _ ﻭﺑﻘﻴﺖ ﺃﻧﺎ ﺍﻟﻤﺤﺘﺎﺟﺔ ﺩﻋﻢ ﻭﻛﻼﻡ ﺣﻠﻮ _ ﺑﺼﺒﺮ ﻓﻴﻬﺎ ﻭﺑﻤﻸﻫﺎ ﻃﺎﻗﺔ ﺇﻳﺠﺎﺑﻴﺔ، ﺑﻘﻮﻝ ﻟﻴﻬﺎ ﻛﻼﻡ ﺗﺤﻔﻴﺰﻱ ﺗﻠﻘﺎﺋﻴًﺎ ﻛﺪﺍ ﻟﻘﻴﺖ ﻧﻔﺴﻲ ﺇﺗﺤﻤﺴﺖ ﻭﻗﻤﺖ ﺃﻧﺠﺰﺕ ﻛﻞ ﺍﻟﺤﺎﺟﺎﺕ ﺍﻟﻤﺨﻄﻄﺔ ﻟﻴﻬﺎ ﻟﻠﻴﻮﻡ .
ﻣﻮﻗﻒ ﺗﺎﻧﻲ :
ﺑﺘﻜﻠﻢ ﻣﻊ ﺃﻣﻲ ﻋﻦ ﺍﻟﻘﺮﺍﻳﺔ ﻭﺍﻟﺘﻌﺐ ﺇﻧﻲ ﻣﺎ ﻗﺎﺩﺭﺓ ﺃﺭﻛﺰ، ﺟﺎﺕ ﺃﺧﺘﻲ ﺍﻟﻤﻤﺘﺤﻨﺔ ﺗﺎﻟﺘﻪ ﺗﺸﻜﻲ ﺑﻨﻔﺲ ﺍﻟﺠﺮﺳﺔ، ﻓﺠﺄﺓ ﻟﻘﻴﺖ ﺭﻭﺣﻲ ﺑﻤﺸﻲ ﺑﻜﺘﺐ ﻟﻴﻬﺎ ﻓﻲ ﻭﺭﻕ ﻋﺒﺎﺭﺍﺕ ﺗﺤﻔﻴﺰﻱ ﻭ ﻛﻼﻡ ﺇﻳﺠﺎﺑﻲ ﻭﻗﺼﺺ ﻗﺼﻴﺮﺓ ﻛﺪﺍ ﻋﻦ ﺍﻟﻨﺎﺟﺤﻴﻦ ﻓﻲ ﺑﺮﻃﻤﺎﻥ ﻓﺮﺡ ﻣﻨﺰﻟﻲ ﺍﻟﺼﻨﻊ، ﻛﻤﻴﺔ ﺍﻟﻔﺮﺡ ﺍﻟﺪﺧﻠﺘﻮ ﻓﻴﻬﺎ ﻭﺍﻟﺪﻋﻮﺍﺕ، ﻛﻞ شيء ﻛﺎﻥ ﻛﻔﻴﻞ إﻧﻮ ﻳﻔﺮﺣﻨﻲ أﺧﺮ ﺍﻟﻴﻮﻡ .
ﻣﻮﻗﻒ ﺗﺎﻟﺖ :
ﻣﻦ ﺗﻨﺸﻨﺔ ﺃﺧﺘﻲ ﺩﻱ ﺟﺎﺗﻨﻲ ﻓﻜﺮﺓ ﺃﻣﺸﻲ ﻟﻨﺎﺱ ﺗﺎﻟﺘﻪ ﺍﻟﻤﻤﺘﺤﻨﻴﻦ ﻓﻲ ﻣﺪﺭﺳﺘﻨﺎ ﺍﻟﺜﺎﻧﻮﻳﺔ، ﻛﻠﻤﺘﻪ ﺍﺗﻨﻴﻦ ﻣﻦ ﺻﺤﺒﺎﺗﻲ ﻭﻣﺸﻴﻨﺎ ﻟﻴﻬﻢ، ﺃﺗﻜﻤﻠﻨﺎ ﻣﻌﺎﻫﻢ، ﺣﻔﺰﻧﺎﻫﻢ، ﺣﻜﻴﻨﺎ ﻟﻴﻬﻢ ﻗﺼﺺ ﻧﺠﺎﺡ ﻧﺤﻦ ﺃﺣﻮﺝ ﻟﻴﻬﺎ ﻭﺍﻟﻠﻪ ﺑﺲ ﺑﻜﻼﻣﻨﺎ ﻟﻴﻬﻢ ﺷﺤﻨﺎ ﻧﻔﺴﻨﺎ ﺑﺮﺿﻮ ﺇﻳﺠﺎﺑﻴﺔ .
ﻣﻮﻗﻒ ﺭﺍﺑﻊ :
ﻛﻨﺖ ﻣﺘﻀﺎﻳﻘﺔ ﻣﻦ ﺣﺎﺟﺔ ﻭﻣﻬﻤﻮﻣﺔ ﺑﻴﻬﺎ ﺷﺪﻳﺪ، ﻟﺪﺭﺟﺔ ﺇﻧﻲ ﻓﺎﺗﺤﺔ ﺍﻟﻮﺍﺗﺲ ﺑﻘﻠﺐ ﻓﻲ ﺍﻟﺮﺳﺎﺋﻞ ﻣﻦ ﻏﻴﺮ ﺃﺭﺩ ﻋﻠﻰ ﺃﻱ ﺯﻭﻝ، ﻓﺎﺫﺍ ﺑﻲ ﺃﻣﺸﻲ ﻋﻠﻰ ﺍلإﺳﺘﻴﺖ ﺑﻨﻴﺔ ﺃﺷﺤﺪ ﺍﻟﺪﻋﻮﺍﺕ ﺑﺮﺿﻮ😂💔
ﺍﻟﻤﻬﻢ ﻟﻘﻴﺖ ﺭﻭﺣﻲ ﺑﻜﺘﺐ " ﺃﺭﺳﻞ ﻧﻘﻄﺔ ﻓﻲ ﺣﺎﺟﺔ ﺟﻤﻴﻠﺔ "
ﻟﻘﻴﺖ ﺍﻟﻮﺍﺗﺲ ﻛﻠﻮ ﻧﻘﺎﻁ ﻣﺎ ﺷﺎﺀ ﺍﻟﻠﻪ، ﺍﻟﻤﻬﻢ ﺃﻱ ﺯﻭﻝ ﺭﺳﻞ ﻛﺘﺒﺖ ﻟﻴﻪ ﻗﺪﺭ ﺷﻨﻮ ﺇﻧﻮ ﻋﻈﻴﻢ ﻭﺇﻧﻮ ﻗﺎﺩﺭ، ﺇﻧﻮ ﺡ ﺃﻛﻮﻥ ﻧﺎﺟﺢ ﻭﻣﺘﻤﻴﺰ ﻭﻳﺤﻘﻖ ﺃﺣﻼﻣﻮ، ﻟﻜﻞ ﻛﻠﻤﺔ ﻛﺘﺒﺘﻬﺎ ﻟﺰﻭﻝ ﻛﺎﻧﺖ ﻧﺎﺑﻌﺔ ﻣﻦ ﻗﻠﺒﻲ، ﺭﻏﻢ ﺇﻧﻮ ﻳﺪﻱ ﻭﺟﻌﺘﻨﻲ ﻣﻦ ﺍﻟﻜﺘﺎﺑﺔ😂
ﺑﺲ ﺣﺮﻓﻴًﺎ ﺍﻧﺎ ﺳﻌﺪﺕ ﺑﺮﺩﻭﺩ ﺃﻓﻌﺎﻟﻬﻢ ﻭﺑﺪﻋﻮﺍﺗﻬﻢ ﻟﻲ ﺧﻠﺘﻨﻲ ﺃﻧﻮﻡ ﻣﺒﺴﻮﻃﺔ. 💜

ﺍﻟﺤﺎﺟﺔ ﺍﻟﻌﺎﻳﺰﺓ ﺃﻗﻮﻟﻬﺎ ﺃﺻﻨﻌﻮﺍ ﺍﻟﻔﺮﺡ ﻳﺨﻮﺍﻧﺎ، ﻭﺃﺷﻴﻌﻮﺍ ﺍﻹﻳﺠﺎﺑﻴﺔ، ﺣﺎﻭﻟﻮﺍ ﺗﻤﻨﺤﻮﺍ ﺍﻟﺴﻌﺎﺩﺓ ﻟﻠﻨﺎﺱ، ﺫﻛّﺮ ﺩﺍﺋﻤًﺎ ﺃﺻﺤﺎﺑﻚ ﻭﺃﺧﻮﺍﻧﻚ ﺑﺈﻧﺠﺎﺯﺍﺗﻬﻢ، ﻭﺑﻨﺠﺎﺣﺎﺗﻬﻢ، ﺑﺄﺣﻼﻣﻬﻢ، ﺃﺷﺤﻨﻬﻢ ﺷﻐﻒ ﻭﺣﻤﺎﺱ، ﺍﻟﻔﺘﺮﺓ ﺩﻱ ﻧﺤﻦ ﺃﺣﻮﺝ ﻟﻠﻜﻠﻤﺔ ﺍﻟﻄﻴﺒﺔ ﻣﻦ أﻱ ﺷﻲﺀ ﺗﺎﻧﻲ، ﻭاﺗﺬﻛﺮﻭﺍ ﺍﻟﻜﻠﻤﺔ ﺍﻟﻄﻴّﺒﺔ ﺻﺪﻗﺔ 💜.
ﺡ ﺍﺧﺘﻢ ﺑﺎﻟﻌﺒﺎﺭﺓ ﺍﻟﺒﺤﺒﻬﺎ ﺷﺪﻳﺪ ﻛﻨﺼﻴﺤﺔ ﻟﻴﻜﻢ .

" ﺃﺷﻴﻌﻮﺍ ﺍﻟﺤُﺐَّ ﻳﺎ ﺳَﺎﺩﺓ "💜

#هبة_مبارك |@ehagaa

أرشيف

#مودة_ورحمة••{9}
كترتُو عليكم مش 😂👋..
بس والله إلا ما يجِي يوم وتحتاجُوا ليهم
عموماً البوست طويل بس ممكن نقول إنو دا أظرف بوست في السلسة دي😂💛

خلَاص شهر العسَل خلَّص ، وأيام الدّلع والحلاوة عدَّت .. وكل واحِد الفيهُو إتعرفَت ، وجينَا للواقِع ، للحياة الزوجيَة الحقيقيَة
أول سنَة دي هي حجَر الأساس لبِناء حياة زوجِية مُستقرّة ، وكلما كان الحجَر ده متِين كلما ما كان البِناء سليِم وحيتحمّل الضغط والصعُوبات والعقبَات
بعد الزَّواج وفي أول سنةً تحديداً بتظهر حواجِز كتيرة في طريق السّعادة الزوجِية ، وأصلاً لازم تعرفوا إنو الطريق دا ما مليَان ورُود وقلوب حمراء إيڤري وير😓💕 وإنما إنتوا اللي حتهوِّنوه على بعض ، إنتوا اللي حتحطمُوا الحواجِز دي وتخلوه ملاذ آمن ومساحَة دافِئة

🌸 أول الحواجِز دي هو اختِلاف الطِباع..
كل واحِد إتربى في بيئة مختلفَة ، إمكن بعادات وتقالِيد مختلفة وجمَعكُم النصيب تحت سقف واحِد ، فعشان ما تنصدمُوا ببعَض وبالإختلاف البيظهَر من المعاملة عن قُرب وتصلوا لخيار الإنفصَال .. لازم تفهمُوا إنو مافي زول كامِل ، فالحياة الزوجيَة ما قائمة على التناسِخ في الآراء والأفكار والإعتقادات وإنما على التكامُل ، إنو كل واحِد يكمّل نقص التانِي ، علشان تعيش مع شَخص مختلِف عنّك دايماً خُت قدامك نقاط القُوة والجمال فيه ، في حديث للنبِي ﷺ بيقول فيه : {لا يفرك مؤمِن مؤمِنة ، إن كرِه منها خُلق رضِيَ منها آخر}
يعني بإختصَار أعملوا موازنة بين العيُوب والمزايا ، إفتكروا الحاجات الحلوة لبعَض مش دايماً السيئة وبس
آي هو عصَبي بس حنين ، صح هِي طلباتها كتيرة بس بتحترم كلمتِي...إلخ

🌸 الحاجِز التاني هو تدَّخُل الأهَل
ومن هسِي بقول ليكم ما تخلُّوا زول يعرف عنكُم غير كُل خِير مهما كان -ربنَا حيسامحكُم عالكذبات الزي دِي😄-
عشان تدَخُّل الأهل الكتِير بيخلِق فجوة كبيرة بينكُم وبيكبِّر الموضُوع زيادة ، حتى في مشاكِل مرات إنتوا تنسوهَا وأهلكم يفضلُوا متذكرينهَا ليكم كدَا طول العُمُر😂 ، بس طبعاً ممكِن أحياناً تستشيروهُم -تلميحاً لا تصريحاً- ، وكمان مثلاً لو هو بيضربِك أو بسِئ ليك جِداً .. يبقى هنا تدخُّل الأهل لازم قبل ما يتطوّر الوضِع ، إنتِ أمانة في رقبتُو ما عربية إشتراها ويعمل فيها اللي عايزو

🌸 الحاجِز التالت هو المقارنَة بالعلاقات السابِقة..
مثلاً ، غالباً .. غالباً لو فيكُم واحد كان على علاقَة سابقة -سواءً خطبة أو زواج أو حتى علاقة حُب- بيقعُد يقارِن ، خطيبتي الزمان كانت وكانت ، راجلي المات كان وكان ، طليقي كان وكان...إلخ ، الموضُوع دا مهين جداً ، لأنو ماف زول بيقبَل يقارنُوه بحبيب قديم ولاّ زوج سابِق
فاااشنو الماضِي ماضِي والحاضِر حاضِر
(سامعه زول قال الماضي حاضر -دا إسم مسلسل كوري يا جماعة-😂 ، تحية للكيبوبر)

🌸 الحاجِز الرابع
التعلُّق الكبير بالأهل ، في أول سنة الواحد بكون ما قادر ينسى سريرو ولا طبِيخ أمو وبيفقِد قعداتو الطويلَة مع أصحابو ، فمرات من الشغُل مثلاً الواحد جرررري علي بيت أهلو
ولا تلقاها هي دايماً ماشة بين ناس أمها ، وكل مشكلَة كبيرَة ولا صغيرة شايلة هدومهَا ومقضية الإسبوع عند أهلها..
أها يخوااانا متين حتقعدُوا تتفاهمُوا مع بعَض وتبدوا حياتكُم!😑
كل وقت بتبعدُو فيهو عن بعض -من غير عُذر حقيقي- بيخلق فجوة بينكم مع الأيام ما حتقدرُوا تسدّوها..
فااا سيبكُم من الإتعودتُوا عليهو في بيت أهاليكُم ، وحاولُوا تشكِّلوا لغة جدِيدة خاصة بيكم إنتوا وبحياتكُم الجاية
أول سنَة دي قلِّلوا زيارات لبيت العيلَة بالله قدر الإمكان ، وحاولوا أفهموا بعض كويِّس بدون أي تدخُّل خارجِي😙💕

🌸 الحاجز الخامِس هو التعوُّد..
تجي تنومِي في أمان الله فتصحي الصباح وإنتِ مسؤولة عن فردة الشُراب الكُحلي لشخص آخر على الكوكب😂 ، قبلها ما كنتي مسؤُولة غير عن نفسِك ، قبلها ما كان عندك إلتزامَات تجاه زول غيرَك ، وفجأة بتلقى نفسك مسؤول عن زول تاني ، أكل وشراب وحُب وإحتواء وإكتفاء وتلبية رغبَات...إلخ ، فاااشنو الواحِد يصبُر .. الصبُر جبُر ، وشوية شوية حتتأقلمُوا علي بعَض وتكون المسؤولية جزء أساسي من حياتكُم

🌸 الحاجِز الخامِس التعجُّل..
يعني الواحد بكون دايرهَا تتغير بين ليلة وضُحاها ، وهي دايراه يبطِل عادات معينة بين ليلة وضُحاها ، لازم نراعي لإنو الطرف التاني دا بنِي آدم برضو وعاش جزء كبير من حياتُو على الطبِع الإنت مش راضيهو فيه ، ما بُنِي في سنين لا يتغيّر في أيام .. فالنُصح بالمعرُوف وبالهداوَة
والتقبُّل ثم التقبُّل ثم التقبُّل

🌸 تغيير الأولويات..
الواحد طول عمرو عندُو أولويات بيرتب عليها حياتو حسب أهميتها أهلَك ، شُغلَك ، أصحابَك ، الجمب ، الكورة...إلخ
بس هنا الوضع إختلَف ، بقيت مسؤول عن زوجة وبيت وقريباً عن أسرَة ، فلازم يحتلّوا مكانة مُناسبة بين مشغولياتَك الكتيرة دي ، المكانة اللي تكفيهُم وتشبَع رغباتهم بما يرضِيهم قد ما تقدَر
وما تهمِل مرتَك لمن ت

فتِش الإحتواء والأمان عن حد غيرَك ، إياك تفقد الأمان فيك وتحس بالغُربة وهي جمبّك
وإنتِ برضو طبعاً ، لو كنتي شغالة ما تهملِي بيتِك ، وحتى لو كنتِ سيدة أعمال وما عندِك وقت للطبيخ والفهم دا خلي عندك إن شاء يوم في الإسبوع تعملي ليهو حاجة من يدك ، رتبي أولوياتِك كويس وما تقصري تب وإلا حيدبِّلوا فيك🙆

#نصائح_لطيفة_عالماشِي💛 :

🌸 لو دوختِي في أي وقت وإنتِ راكبة عربيتُو وعايزة ترجِّعِي حاجة أكلتيها في بطنِك -الله يديِك أب عربية قولي آمين😂- خليهو يركُن بالجمبة ، دا عادي ممكن يفتح ليكِ جيبو ترجِّعي فيهو بس العربية لاااااsorry sorry .. مااا حيسامحِك😂

🌸 الأفلام غير الواقِع ، يعني لمن يكون قاعد يحضَر في كورة مهمّة ما تجي تقاطعيهو وتعديها ماشة جاية قدام وشُو وفجأة تتذكرِي ليهو كل الحاجات المهمة الكنتي ناسياهَا وتتذكري المسلسل الناسياهو من شهَر عالـ mbc4 ، يااخي لو طلعتِي حامل زاتو ما تقولي ليهو الخبَر دا وهو مركِّز مع الماتش ، معليش بس أجّلي المواضيع دي بعد الكُورة عشان ما تسمعي رد ما يعجبِك(ما تقولي ما كلّمتِك😂!!)

🌸 إياكِ تكوني نِد لأمه ، الراجل الصالح مستحِيل يرضِيكي على حساب أمه مهما كَان بحبِّك ، خليك ذكية حبيبتي أنا وأكسبِي حماتِك تفوزي بيهو وتفوزي بيها💕

🌸🌸🌸🌸🌸🌸🌸🌸🌸🌸🌸🌸🌸🌸🌸🌸

الدكتور #كرِيم_الشَّادلي في كتابُو (لم يخبرُونا بهذا قبل أن نتزوَّج) بيقول نصائح حلوة شديد -وظريفة في نفس الوقِت- جبت ليكم منَّها :
🌸 بمجرّد أن يُغلَق عليكما بابٌ واحِد ، حاوِل أن توطِّن نفسَك على أنه ليسَ في الإمكان أفضل مما كان ، زمن الإختيارَات إنتهِى ، فلترضَى بما هِيَ عليه ولترض هيَ بما أنتَ عليه

🌸ما تدخُل الزواج بقيَم المُجتمع وتجارُب الآخرين ، إكتشِف بنفسَك فرُبما ما كان شراً لغيرَك خيرٌ لَك

🌸 لن تتصرَّف زوجتك كرجُل ، ولن تتفهّمك كما يفعَل صديقَك أشرَف ، فأشرف هو أشرَف حيفكّر معاك بعقلانية كالعادَة ، وزوجتَك هي زوجتَك ، عقلها بين ضلوعهَا وعاطفتها
ودا ما معناه إنك ما تستشيرهَا ، بس بلاش تقارِنها بأصحابَك

🌸 ما تقلَق لما تتهمَك بإنك ما بتحبَّها عشان نسيت تجيب (الزبادِي ، الكريمَة الوصّتك ليها ، حفاظات الأطفال...إلخ) ، إبتسم بس وما تنسَى تجيبهم المرة الجاية ، أوعى تنسَى😂

🌸 لو هي إشترَت ليك حاجة ولا أشارَت ليك إنك تشتريها وعجبَت أصحابك ، كلمهَا ، الحاجة دِي ممكن تبسطهَا جداً ، ماف زول ما بيحب المديِح على إختياراتو سبيشلي النسوان😂

🌸 ما معنَى إنها صدّقت كذبتَك إنها صدقتها فِعلاً ، ما تتمادِى وتستهِين بذكائها لأنها حتكشفَك حتكشِفَك😂✌️

🌸 مهما كانَت مرتَك طيبة ومتديِّنة وجاهلة بالتكنولوجيا حتعرف الباسويرد بتاعك حتعرِفو .. كيف؟؟ ما تسألني😂

🌸 ما تسخَر من هوايتها ولو كانت تافهَه في نظرَك ، بالعكس ذكرهَا بموعد الحلقَة رقم 216 من برنامج الطبخ ، جيب ليها ألوان للماندالا ، بإختصار أدعمها💛

🌸 لو حكَت ليك أي أسرار (عنّها ، عن أهلهَا...) إياك تستخدمها ضدّها وقت الزعَل ، ما حتحكي ليك تاني

🌸 لمن تسألك من يُومك ، خليك جاهِز بقصة ترويهَا ليها ، إجابات من نوع (الحمدُ لله ، عادي ، ماشي الحال...إلخ) هي آخر ما تودّ سماعه (بإختصار أرغي يا برنس😂)

🌸 دايماً إحتفِظ بهدية في مكان خفِي ، إلّا ما يجي يُوم وتحتاجهَا لمن تنسى مُناسبة من قائمة المُناسبات البتعني ليها كتير (يوم ميلادها ، ذكرى زواجكُم...إلخ) طلّعها ليها براحَة وخليك شِفِت ما تنسى تلومها (معقولة بس أنسى اليُوم دا😂💕)

🌸وضع الأتربة والأوساخ تحت السجّادة لا يعنِي إنكَ قمت بالتنظيف ، وكذلك الموضوع بالنسبة لأخطائك -ما تنساهَا بعد تعدّي المُشكلة بتكون قاعدة عندها في الإرشِيف- فاستعِد للكلام عنها في المشاكل الجاية🙊

🌸 في حاجات كتِيرة مهمّة بالنسبة ليها (الإحترام ، تقدير جُهدها ، تفهُّم مشاعرها...إلخ) ، وإحساسها بالأمان -ودا الأهم- فمهما كنت غاضب ما تزعزع الإحساس دا "ما تهدِّدها مثلاً" ، حاول إتجاوز عنها قدر الإمكان لأنو فطرتهَا وتركيبتها النفسِية رقيقة وبتختلِف عنك شديد

🌸 أعلم أننا كرِجال نحب المرأة الرشيقة -عدا الشعب السوداني طبعاً😂- فدايرها إنجلينا جولي أبقى ليها براد بيت ، مع العلم إنو أنجلينا ما مهرودة في المطبَخ وعندها ميزانية وفراغ بتمشِي فيهو للتمرين

🌸 حاول دايماً تعبّر عن ضيقَك من إعجابات سِهَام وكومنتات دُعاء و..إلخ عالفيس بوك ، أخبرها دائماً إنك ما راضِيان والله عن كدا😂 -بإختصَار احترِم غيرتهَا-

🌸 دايماً مهما إنشغلتُوا خلوا عندكُم وقت خاص بيكُم ، يوم في الشهَر تطلعُوا فيهو ، تتعشُّوا برا ، تتمشُّوا مثلاً ويا حبذا لو مسكتَ يدها وإنتوا برا البيت بدل ما تخليها جارية جري عشان تقدر تمش جمبك ، تفاصِيل بسيطة بس بتفرِق جداً💕

🌸 وآخر حاجة بنصحك بيها..
حافِظ على رصيد الأمان بينكُم ، الأمان أدفى وأعمَق من الحُب ، ودا الحتتذكروه لو الدنيا إتقفلت في وشّكُم
👇