تم فتح باب التسجيل المبكر لكورس 21 على المنصة، سنبدأ فيه باذن الله بعد 15 يوم

تواصلت مع احمد فتحي وتم التنسيق على عمل مناظرة، قريبا ساعلن عن موعدها، ارجو من الجميع احترام الطرف الاخر وعدم تجاوز حدود الاحترام، الهدف من المناظرة هو توعية الناس لا اكثر، وبالنهاية كل واحد ربنا خلقله عقل ليقيم الشي اللي بناسبة ، بكرر ، ارجو احترام الطرف الاخر سواء هنا او خلال المناظرة

السلام عليكم ورحمة الله استاذ محمد
مابعرف كيف ممكن اتشكرك وبصراحة الكلمات مو ممكن توفيك حقك ابدا
عنا بسورية شركة اتصالات اسمها سيرياتيل
من قوانين الشركة انهن مابيقبلو الا شخص يكون معاه شهادة او يكون بسنة التخرج حصرا
قدمت عليها وبصراحة ماكان عندي امل انو رح انقبل
حكو معي اول مرة مشان المقابلة ونزلت قابلت شب وصبية وسألوني كتير اسئلة ورب العالمين شاهد على حكيي انو يا استاذ كلشي سالوه انت عاطينا ياه بكورساتك حتى لو ماحكيتلنا ياه بشكل صريح انو هاد الشي مننسأل عنه بس انت عاطينا ياه وجاوبتن على كل الاسئلة بكل ثقة ومن دون اي تلبك او تردد ابدا وبكل المواضيع (الكود و الداتابيز وال OOP وكلشي)
كتير انعجبوا فيني انو انا سنة تانية بالجامعة بس مع هيك اثبتت حالي بفضل الله بعدين بفضلك وقالولي منتواصل معك
رجعت عالبيت وبعد فترة مانا طويلة تواصلوا معي مشان بلش بالشغل اول فترة تدريب متل اي شركة والي يومين تقريبا تحت
والله يا استاذ كل كلمة عم تحكيها عم تكون صحيحة وفعلا بس تتأسس صح بتكون قادر تتعلم اي فريموورك بمدة كتير قصيرة وبكون كتير سهلة بالاخير المفاهيم وحدة
ماقصرت معي من اول ما بلشت اتعلم معك والحمدلله انو رب العالمين دلني على هاد الطريق وماخلاني ضيع سنين من حياتي وانا مابعرف شو اعمل
بالنهاية كورساتك لاغنى عنها ولولاها ولا يمكن بخمس سنين كنت اوصل لهي المرحلة
حاليا عم اثبت حالي تحت وبكل لحظة عم ندعيلك انا واهلي وبتمنى تفتخر بطلابك انو الحمدلله عم ينطلقوا ويأثبتوا حالهن بفضل الله بعدين بفضلك
شكرا من القلب يا استاذ والله يرحم والديك ويجزيك كل الخير♥️🌹

اتمنى لكم كلكم التوفيق ، اقسم بالله لما بشوف حد نجح بحياته كأني اجاني مليون دولار