ياللي عليك ضلوع صدري موصّاه
‏تضيق، لكن تاسعك كل ما جيت

‏مرات أدور لك على عذْر وألقاه
‏ومرات يا قربي من النار والزيت

‏ولو ادري إن بعض الهقاوي معاناه
‏كان اختصرت العنوه وما تهقويت

‏كِبْرت ياليت الين صارت حلالاه
‏الموت لو ترجع حلالاه ياليت

مزيد الوسمي

بدايتها تراني معتبرها رحلة استكشاف
‏و لا أدري كيف وصّلنا الطريق لوضعنا الحالي

صالح النشيرا

كل عام وأنتم بخير..
عاد عيّدكم🩶

ياملّ عينٍ في محاجيرها شوك
والقلب له عن لذة النوم دكاك
لا دك في قلبي من الهم داكوك
جاوبت طربات الحمايم على الراك
تراه ماينفعك عمك ولا اخوك
لا صار ما تقضي لزومك بيمناك
وربعك اليا بان الخلل فيك باعوك
أقرب قريبٍ لك من الناس يشناك
وأن كثر مالك صدقوا لك وطاعوك
وأن قل مابيديك شانت سجايك
لو تطلب الماء عندهم كان ما اسقوك
أبعد مزارك عن وطنهم ومرباك

لا تلومه لو تشوف الصمت ذنبٍ من ذنوبه
‏وش يقول اللي يشوف احساسه أكبر من كلامه

واحدٍ مهما تضيق بعينه الأرض الرحوبه
‏مايبين في عيون الناس ضعفه وانهزامه

سلطان حجاب

يا قلبي اللي ما قدرت الحق جزاك
أسف على جور الليالي والسنين
ما عاد باقي لك من الماضي هذاك
إلا بقايا من شعور ومن حنين
يا كثر ما علمتك ولا الله هداك
لا هي بـ لا مرة ولا مرتين
أغلب مشاكلك الكبيرة من وفاك
ما عاد لي قدرة لتلويح اليدين
والإنتظار أحيان نوع من الهلاك
مثله مثل نقص الغذاء والأكسجين

عبدالله السراهيد

عليك السلام ورحمته والسلوم سلوم
‏ما زال الغلا بنيانه مقيم ومشيّد

‏لو أني حزينٍ من سواياك هاك اليوم
‏لكني حريص إن جيت ما جيت متصيّد

‏أنا داري إن وجه المحبه ماهوب يشوم
‏تسيّد عليه العبد واستعبد السيّد

‏لاشفت الغزال اللي موالف بعير القوم
‏يسوقه لو إن ماهوب مربوط ومقيّد

مزيد الوسمي

يامل قلبٍ يسج وفيه دولاجه
من هاجسٍ بالضماير قام يدرجها
في معزلٍ عن جميع الخلق وازعاجه
ما أسمع من الناس لو تكثر لجالجها
ما غير اهوجس تقول مضيعٍٍ حاجه
وأخذ وأسّند على روحي واهرّجها
وأدوج لو كان ما رجلي بدوّّاجه
أدّله النفس لين الله يفرجها
تفرج لعين ليا نامت بسوهاجه
تجهز عليها الطواري لين تزعجها
بالصدر ضيقة ونوم العين هملاجه
عينٍ من العام والسهر متوّلجها
نوبٍ سهرها شديد ونوب نهاجه
مّرّ تكنّ الدموع ومر تزعجها

ليت الغرابيل جتني من عدوٍ لي
اما تقاضيت ولا بيتقاضى لي
لكن من واحدٍ ذكره غناةٍ لي
ولا زلت أحبه وبحبه ولا أبالي
خلوني أسج عن موضوعه أحسن لي
ولا الغلا والله إن يبطي وهو غالي

موادعك صعب وأصعب منه نسيانك
لكن من المستحيل أقولك تكفى
لا زلت مركب وجابك حظ ربانك
وأنا البحر لاني الشاطئ ولا المرفا
يا قلبي إن طعت شوري صك بيبانك
وأكتب على قلبك المكسور للمنفى
محدٍ يحس بمشاعر ثورة أحزانك
حتى حبيبك أخذ من صحتك وأقفى

محمد بن مريبد

ماهو بكيفك تواصلني وتقطعني
إما غلا بينٍ أو فضّها سيرة

حمد السعيد

أحر من وقع السيوف وأشد من طعن الرْمَاح
‏لا صار فيك الهم باين وأنت صامل تنكره

‏وجتك الجروح الغابره تفزع مع جداد الجرَاح
‏همٍ مسك حبل الوريد وهمٍ آخر ينحره

عماد بن محمد

القلب يكسره اللسان ولا تجبره اليدين
ماهو بعظمٍ كل يوم تكسره وتجبره

تمكن صالح النشيرا بِهذا البيت من وصف شِدّة تأثير الكلام على النفس ببلاغة، وجسّده بطريقة تحاكي الواقع المريّر.

انا ياللي تظن أني بدونك ما أحسن التدبير
‏هجرتك وأشتعل نور الحياة وزانت أوضاعي

‏فلا شكرًا على وقتك ولا أعذرني على التقصير
‏أنا من يوم فارقتك تلاشت معظم أوجاعي

فيصل القاضي

صديت عنك والله أن ودي أرتاح
لو كنت من بين المخاليق شفّي
ما باقي من عمر الغلا كثر ما راح
والحب الأول من زمان متوفّي
لو إن حبك لأعذب الشعر مفتاح
لكن علينا عيب طرد المقفّي
نظمت لك شعر الغزل نظم مسباح
شعرٍ عن أسراري وبوحي يكفّي
وسلمت لك قلبي وعقلي بملواح
وأحتجت لك .. ولا لقيتك بصفّي

محمد بن مريبد

إي والله إنك من أحلام العمر لكن
‏ما كل الأحلام تستاهل نحقّقها

مستحيل ترجع الدنيا مكانة شخص غالي
ساعة إنه طاح من عيني مثل ساعة وفاته

لا أنتهى عمر الغلا .. وأقفت عن ديارك رحالي
لك يمين بالله أني ما أتنازل بالتفاته

صدة الخذلان ما فيها غرور ولا تعالي
يتجرع مرها اللي حبك بكل إستماته

هارب من الكلمة اللي لو قدرت تقولها لي
وين بلقى كلمةٍ تبعث شعوري من رفاته

ودي أرحل بالحياة الباقية وأبقى لحالي
قبل أصير الميت اللي ما يعزى في مماته

عويد النجود

نصيبي من الحب الحقيقي قصيد وطيف
الأول بيبقى لي والآخر بيتركني
ثقيل الحزن لا صار في كل ليلة ضيف
ليا رحت أدور للفرح درب يمسكني
ومن كثر ماني فاقد الضحك مدري كيف
تمنيت لو الشر البلية يضحكني
تحلويت طعم العزلة اللي ماهي بالكيف
مشاعر قديمة بالمحبة تشككني
جديد الغلا ياليت لو تمسح الأرشيف
الأرشيف كذبة بأسم الأشواق تنهكني
الأحباب قبلك في حياتي سحابة صيف
تبريت من ماضي مع الغير يشبكني
تغانم وعطني من شعورك بكم وكيف
وفالقلب ثبتني وبالبال حركني
ولا توقف العاقل على حفة التخريف
عيونك تطمني وضحكتك تربكني
إذا كنت تجهلني فأخذ مني التعريف
أنا درب ما تقدر بوجهين تسلكني
بعيدًا عن التشبيه والكبر والتصنيف
يحق لك بأنك تفاخر يوم تملكني
أنا لك حقيقة ما هي بشك ولا زيف
ولغيرك سرابٍ يبطي فيوم يدركني
ولو غرتك نفسك وزينك .. ورحت معيف
وفي حرب جس النبض حاولت تشركني
أحط لغرورك حد، وأقولك يا حيف
هقيتك بتنجيني وأشوفك بتهلكني
تراني عزيز النفس ماني حلال ضعيف
ما ياقاف عليك العمر كانك بتتركني

عادل الحرفة

جيتك أنا بليلة شتاء
تهزني ريّح الشمال

ودعتني قبل السلام
وهذا ترى كل الكلام
اللي حصل بينك وبيني

تخيل!


اليوم

لعيوني السماء والشمس
والأرض البعيد

اليوم

ولغيرك أنا يطري على
بالي القصيد


سلم أبرد السلام
وهذا ترى كل الكلام
اللي حصل بينك وبيني

تخيل

كنت واقع كثر ما كنت وهم وخيال
‏يا رهين الضلوع اللي نفذ صبرها

‏كسرة الخاطر اللي ما عليها جدال
‏طيف ذكراك ما يقدر على جبرها

‏لو على قولك إن أحلامنا لا تزال
‏وش موقفني البارح على قبرها

‏المحبة ما كنت أشوفها راس مال
‏كنت أشوف الحياة الفانية عبرها

‏راح منها شعور وراح منها وصال
‏لين دار الزمان وراحت بكبرها

‏سهل ترجع على خبري هذيك الليال
‏البلا من يرجعني .. على خبرها