PostGraduate 🎓| MW

نكمل كلامنا ومع اخر بوست عن الاستقبال 😉😌

🏵 الريسس
برضه من اكتر الحاجات الي هتتعلموا فيها، الشفتات فيها ساعات بتبقى هادية وساعات بتقلب مرة واحده على حسب.

الريسس هي عناية مركزة مؤقتة، العيان فيها يإما بيتنقل عناية تانية يقعد فيها، يا إما بيدخل الملاحظة، ومنها ع العنبر، يا إما بيموت. 😔

🏵 دورك فيها كطبيب امتياز حاجات بالإيد، تركب قسطرة، تعمل ecg, تسحب abg, او تروح تعمل تبليغة.

🔗 التعليم فيها كويس لما تركز مع الحالة اللي داخلة من ساعة ما دخلت اتعملها ايه واتحطلها ايه ومشيت ازاي واحدة واحدة كدة، وكانت داخلة شكلها عامل ازاي خلى النايب اللي في الفرز يحولها ريسس.

الريسس فيه us كمان 😁
- لو قفت جمب النايب وهو بيعمله مرة على مرة هتلقط كام حاجة

🎯 الCPR وما أدراك ما الCPR, لو الشفت قلب هتلاقي نفسك بتعمل CPR ٥٠ مرة في اليوم، وساعات يبقى فيه شفت هادي مبتعملش ولا مرة بس ده مش كتير.
- احنا فيه مرة نادينا كل زمايلنا اللي في الاستقبال من الترياج وملاحظة حريم وملاحظة رجال علشان ييجوا يشتغلوا معانا من كتر الشفت ما كان قالب.

🖇 الملاحظة
الملاحظات بقى اهدى شوية، بتدخل فيها الحالة اللي متحولة ملاحظة او كشف من الترياج، اللي متحول ملاحظة بيقعد في اوضه الملاحظة ده اللي بتشتغل عليه، واللي متحول كشف بيقعد في الاوض اللي ع الناحية التانية دي يستني لما الدكتور بتاعه ينزل (التبليغة يعني)
في الملاحظات بقى رغم انها ارخم شوية ، الشغل فيها اتقل، يعني بتركب قساطر كتير ، بتسحب abg بالهبل، بتودي تحاليل وتجيبها، تعمل ecg كتير، تعمل كل ربع ساعة تبليغة، ممكن تروح بنك الدم وهكذا.

🔗 الا انه ممكن تستفيد منها بشكل منظم شوية، هتتعلم مع الوقت لو النايب اللي معاك كويس وعايز يعلمك، تمشي مع كل حالة ازاي وتعملها ايه،

🎯 كان معانا نايبة الله يباركلها كان حظنا انها بتنزل مع جروبنا في ايامنا، اول شفتين قعدت تعلمنا ازاي نشتغل مع الحالة، ناخد هيستوري صح، نعمل رسم قلب امتى، نسحب غازات امتى، محتاجة تبليغة ايه نبلغهالها وهكذا، فكنا بعد كام شفت عارفين الشغل وبنعمل الحاجة من نفسنا، بنروح ناخد منها consultation بس لو هتأكد ع الكلام او لو عاوزة تزود حاجة.

🏵 طب فرضا النايب اللي معاك مبيعلمكش، انت اتعلم ، مش صعب خااالص، ولا هي لوغاريتمات، هي سكيمة كدة وانت بتمشي عليها وهتلاقي الموضوع سهل جدا وبيتحفظ.

🏵 ممكن كمان تقف مع الدكتور اللي جاي تبليغة من اي قسم وتشوفه بيكشف ازاي وبيعمل ايه، وساعات بيكونوا كويسين جدا وبيشرحوا برضه.

❤10👍9

15.7K views17:03