بداية بسيطه كدا ......
من أفضل الsites الموجودة والل بتوفر source محترم لمعلومات Evidence based هي UpToDate..
الل ميعرفش ,في donation program تقدر تقدم فيه طلب وبيوفرولك أكسيس مجاني لمدة سنة قابل للتجديد..
دا لنك للتقديم:
https://www.better-evidence.org/

اهلا اهلا 🕵‍♂❤️

في البداية القناه هنا هيكون عباره عن بعض الهشتاجات وطبعا هيكون في بوست مثبت كالعاده
ولكن في البدايه عاوزين نحط عناوين رئيسيه للهشتاجات كدا .
#امتياز
#طرق_السفر
#مصري_انا
#توضيحات
#Research

طبعا دول بشكل مبدأى .. وهنزيد عليهم واحده واحده ❤️
وهنعمل برضوا جروب تليجرام علشان لو حد حابب يزود معلومه او بعرف معلومه ❤️
( وياريت بلاش يكون في اسئله خارج المحتوي الحالي )

لينك الجروب
https://t.me/+0MXoHqKVXIw1Yjk0

واحنا مش مستعجلين علي حاجه ❤️🙊

وهنحاول نخلي كل حاجه بتنزل في فيديوهات برضوا ... لذالك اعمل اشتراك لقناه اليوتيوب دي

https://youtube.com/@medicine-way?si=XCnCECb86Zp78YT1
متكسلوش

بسم الله نبدأ علي خير ❤️❤️🕵️‍♂️

#PostGrad_MW
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄

الترتيب الي هنمشي بيه في داتا الامتياز كلها الآتي

1. نصايح عامه للامتياز ( قبل البدايه )
https://t.me/PostGrad_Med/1260
..
2. داتا الامتياز بشكل عام الكتب العربيه والاجنبيه والفيديوهات العامه ( نزلنا كتير منها مسبقا علي قناتنا الرئيسيه )
https://t.me/PostGrad_Med/1487
..
3. داتا الامتياز مقسمه علي الروندات الرئيسية والاسبيشيالات
https://t.me/PostGrad_Med/2757
..
4. نصائح عامة للتعلم والشغل (الفلوث) في الإمتياز
5. افضل ترشيحات لكورسات سواء مجانيه او مدفوعه
https://t.me/PostGrad_Med/2484
..
6. التطبيقات الهامه لطبيب الامتياز
7. نظام الامتياز في أنحاء الجمهوريه
8. إمتحان مزاولة المهنة (في أخر الإمتياز)

ملحوظة -: طبعا زي ما انتم متعودين إننا بننزل اكتر من مصدر واكتر من حاجه للنقطة الواحده وانت اسمع الي ترتاح ليه والي تفضله

والحل دايما في الفهرس الي بنعمله ❤️🕵️‍♂️

نصايح هامه لأطباء الامتياز 👇👇🕵‍♂
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2

نصائح هامة لأطباء الامتياز 🌹 كلام من القلب ❤️كاملة ❤️.mp4
د. مصطفي صبرا

أفضل 26 نصيحه كتابية قبل بدايه الامتياز :-

1- لو ليك نيابه جامعه ببوست او من غير بوست ( يعني مجموعلك يضمنلك نيابه جامعه ) ريح اول شهرين و بعد كده حاول تشبط في التخصصات اللي ناوي عليها في الجامعه صحتك بعد فرمه الامتحانات مهمه و متدخلش ع الحامي

2- لو انت عارف ان هيبقي ليك نيابه جامعه في تخصص زي التخدير او الطوارئ او الرعايه يعني اواخر النيابات و انت متردد هتكمل ف الجامعه و لا لأ يبقي من دلوقتي تجرب التخصصات دي عشان متجيش وقت قعده النيابات و تسأل زمايلك هو التخدير حلو و لا وحش ؟! طيب ما تجربه بنفسك من الاول و قرر , عشان تشوف هتكمل في سكه الجامعه و لا الصحه

3- لو ملكش نيابه جامعه خد اول شهرين في تخصص الجراحه او الطوارئ دي التخصصات اللي هتقوي قلبك عشان تقف في الاستقبال و تتعلم بسرعه و تقدر تسد في اي مكان تنزله

4- لو ملكش نيابه جامعه و كده كده هتشرف ف الصحه يبقي خد امتيازك في مكان يخليك تعرف تاكل عيش بعدين و تعرف منه تحدد اولوياتك في التخصص زي المستشفيات التعليمه مثلا او المستشفيات العام الكبيره الموجوده في المحافظات

5- ابعد خالص عن الشغل في الرعايه او الحضانات و لو بتفكر فيها كبرايفت اقل حاجه ترشق 6 شهور متواصله ف الرعايه او الحضانه و برضو نصيحه بلاش تشتغلها لان مشاكلها القانونيه كتيره و انت مش معاك اي ترخيص مزاوله فممكن تلبس ف الحيطه بكل سهوله لانك عريان و غير مؤهل و القانون لا يحميك✋

6 - لحد دفعه 2017 كان مرتب الامتياز لا يتجاوز في احسن الحالات 500 جنيه ف الشهر , دلوقتي في جامعات كتير بتطبق حافز الامتياز ب حوالي 2000 ج ( بغض النظر عن العاقه جامعه المنصوره 😆 ) ف انت مش متسربع علي البرايفت قد ما تتسربع علي اختيار تخصصك اللي هتكمل فيه حياتك ( و دي المشكله الكبرى بعد الامتياز )

7- لو مش ناوي تكمل في مصر , و ظروفك تسمح للسفر بره يبقي تسيبك من اللي فات و تحط خيار اللغه و اي مسار اجنبي قدام عينك

8- لو ظروفك الماديه معقوله يبقي من غير ما تفكر ذاكر oet و بعدها بلاب 1 و 2 و ربنا يكرمك و في خلال سنتين تكلمنا من مانشيستر 😌

9- لو مش ليك مزاج لانجلترا تقدر تفكر في المانيا لغه و مستوي b2 في الالماني و جرب نصيبك و قدم بس سكه انجلترا اسهل شويه

10 - لو ظروفك الماديه حلوه فكر في المعادله الامريكيه و الامور بقت ايسر فيها حاليا عن الاول و تقدر تشوف كل المسارات دي ف اكتر من جروب ع الفيس

11- لو ظروفك الماديه حلوه خالص سيب الطب 🙂🤚

12 - لو سمعت الناس كلها بتقولك انبسط و فسح و انتخ في الامتياز اسمع كلامه اول شهرين بس و بعدها فكر في مستقبلك عشان الايام بتجري و هتلاقي نفسك داخل علي مسارات مختلفه في الصحه سواء زميل مكلف او ممارس عام او نيابه جامعه الخ الخ ف احسم تخصصاتك من بدري بعدها هتحسم تخصصك لوحدك بسهوله

13- - متشلش شغل نايب في مستشفي عام او مركزي لوحدك حتي لو هيديك نص وزنه فلوس عشان المشاكل هنا كتيره اللهم بلغت ووقت الجد محدش هينفعك ✋

14- ياريت لو تعمل لنفسك لوج بوك و تسجل فيه الحاجات اللي هتشتغلها خصوصا المانيوال او الورك شوب اللي هتحضرها و تخلي حد من سنايرك يمضيلك عليها و يأكلش ( يختملك ) كمان يبقي افضل ,, علي يوتيوب ابحث ازاي تعمل لوج بوك ف مجالك الطبي

15 - لازم تفهم انك كأمتياز غير مسؤل قانونيا عن اي مريض انت مسماك طبيب تدريب , فمتصدرش نفسك ف مشاكل مع المرضى من قريب او بعيد او تمضي علي حاجه انت مش عارفها او تدخل نفسك ف حوارات لا تخصك

16- مفيش بنت بتشيل ولد فى امتياز و لو شالته هتبقى مستنيه انها تردله الشيفت شفتين فى اقرب فرصه 😐 ف متحاولش

17 - لو حابب تتعلم اساسيات الباطنات روح الساحل التعليمى او المستشفيات التعليمه بالتحديد , لو عايز تتعلم اساسيات الجراحه روح احمد ماهر , المطريه , ام المصريين , الهرم , اى مستشفى عليها ريت عالى هتتعلم بسهوله الخناقات مبتبطلش و الحوادث شغاله ليل نهار

18- من بدايه الامتياز هتباتى ف المستشفى ف انسى خالص جو يا جماعه احنا " female " و مينفعش نبات فمتحطيش فى بالك ان فى حد هيشيل نبطشياتك انسى 😀

19- حاول تاخد الشيفتات مع اصحابك على قد ما تقدر لانهم بس اللى هيشلوا مكانك لو حصلك حاجه او هيشيلوكى لو انتى حامل او بتولدي او بتجهزي فرحك او زعلانه مع خطيبك 😌

20- امسك اي كتاب من سلسله oxford و خليه في جيبك حسب التخصص اللي انت عايز تذاكره

21- لو طلبت معاك تشتغل عندك شغل clincal data entry / شركات التامين الطبيه / شركات البترول / شغل internal في المستشفيات / شغل في السياحه زي الفنادق

22- لو وقتك يسمح ممكن تذاكر و تمتحن تويفل محلي " مصري يعني " عشان هتحتاجه في الزماله المصريه بعدين و ده صلاحيته سنتين من وقت الحصول عليه باسكور اعلى من 500

23-ابعد عن النواب الجناير لانهم فيهم اللى مكفيهم و هتلاقى نصهم بيفكر ف الاستقاله و نصهم التانى بيكلم نفسه 😷 فعايز تاخد معلومه او خبره اسال الميدسنيور او السناير نفسهم ع طول

24- انت بتاع الABG و المعامل و النتايج و خد العيان وديه الاشعه و هاته من الاشعه و احزقى يا مدام و حامل رايه الامبو باج 😆بس المهم تتعلم من كل حاجه بتعملها متضيعش وقتك هباءا منثورا

25- علاقتك بنواب الجامعه خليها ف اطار محدد هيعلمك اهلا و سهلا ملكش حاجه تانيه عنده ، مش هيعلمك و هيعاملك بقله قيمه او بأي طريقه غير محترمه تسيبك منه خالص و ملهوش حاجه عندك , انت محترم مع المحترم فقط بغض النظر عن التعليم من عدمه
26 - الامتياز هو احسن وقت تقدر تخطب او تتجوز فيه ,لان فيه مساحه وقت كبيره تقدر تتحرك من خلالها بعد كده مفيش , ع الاقل تلاقي اصحابك فاضيين فيحضروا فرحكم 😅🤚

توضيح سنة الامتياز( تسجيل صوتي )

#نصايح_للامتياز 1️⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
السلام عليكم يا شباب يا رب تكونوا بخير 🌸🌸
البوست ده هكلمكم فيه عن نظام السنة ككل هيمشي ازاي ، ومع الوقت هنزل تفاصيل اكتر في بوستات جاية
بعد ما تستلموا الامتياز ، وكل واحد هياخد اشارته، هتنزل التقسيمة بتاعتكم، فايل اكسل كدة مكتوب فيه اساميكم بترتيب المجموع وقصاد كل واحد رقم مجموعته، وترتيب الروتيشنز بتاعته.
انتوا كدفعة بتتقسموا ٦ مجموعات، الجروب اللي انت هتبقى فيه وليكن انت طلعت جروب ٤ مثلا، دول الناس اللي انت هتكمل معاهم لاخر السنة هتمشوا مع بعض روتيشن روتيشن، الروتيشنز دي اغلبكم عارفها، شهرين باطنة، شهرين اطفال، شهرين استقبال وتخدير، شهرين جراحة، شهرين نسا، وشهرين اسبشيالات
جوة الجروب الكبير ده بقى بترجعوا تتقسموا لجروبات تانية اصغر، بس التقسيمة دي بتختلف من روتيشن لروتيشن، بعض الاقسام بتوزع بترتيب الكشف والبعض لا، فوارد جدا الجروب الصغير اللي يبقى معاك في روتيشن يكونوا معاك في روتيشن تاني معظمهم او كلهم
اول ما تعرف انت جروب ايه، هتعملوا جروب واتس اب كبير تكونوا عليه كلكم من غير نواب، تتكلموا فيه براحتكم
بعدين تشوف ايه القسم اللي انت فيه، وتبدأ تتواصل مع حد من النواب علشان تعرف ايه نظام الشفتات وهيبقوا عايزين كام واحد. بعدين هتقسموها عليكم في الجروب وتعرف انت عليك كام شفت في الشهر او الشهرين. الشفتات دي انت ملزم بيها، بمعنى انك لازم تحضر احتراما لزمايلك ولو مش قادر بتنزل دروب وهنتكلم عن الدروبات في بوست منفصل ان شاء الله. طبعا هيكون فيه مناوشات ع الجدول، حاول متشدش مع زمايلك على حوار الجدول ده، لان زي ما قلتلك ممكن زميلك ده تصادفه في راوند تاني ومش حلو يكون اللي ما بينكم تاتشات، وفي نفس الوقت الموضوع مش مستاهل في الاخر. ومهم كمان تكون صداقات وعلاقات طيبة مع زمايلك اللي ان شاء الله هتكمل معاهم سنين قدام. انت اساسا في الامتياز هتلاقي نفسك بتكتشف دفعتك لأول مرة ودي حاجة كويسة جدا، بتاكلوا مع بعض وبتقضوا وقت طويل مع بعض، لو فعلا قدرت تكون صداقة كويسة في السنة دي هتكسب كتير.
اخر حاجة استمتعوا جدا بالأجازة، علشان تدخلوا فترة الشغل عندكم طاقة تكملوا.
لو احتجتم أي حاجة اسألوا هنا ع الجروب أنا تحت أمركم أي وقت.

#نصايح_للامتياز 2⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
ازاي تستفيد من النايب اللي معاك؟؟

فيه معلومات كتير ممكن تطلع بيها من النايب اللي معاك عالشفت، بس شوية حاجات كدة تخلى بالك منها.
أولا لازم تعرف هل النايب ده بيعلّم والا لا، فيه نواب معروف انهم بيعلموا وبيشرحوا، معروفين بالاسم، دول الزقلهم طبعا وحاول تاخد منهم معلومات على قد ما تقدر. طب لو انا مش عارف النايب ده نظامه ايه؟، اتعامل معاه شوية وانت هتقدر تحدد هل عنده قابلية انه هو يعلمك والا لا.
لما تيجي تسأله على معلومة، نقي الوقت المناسب اللي تكلمه فيه ميكونش فيه متضايق او متعصب او بيجري هنا وهنا يخلص حاجة. ممكن تيجي تسأله برضه ميردش عليك، وده مش معناه انه وحش، ممكن زي ما قلنا الوقت مش مناسب، وممكن جدا يكون مبيعرفش يشرح، وممكن يكون معندوش معلومة اصلا.
فيه نايب ممكن تسأله مرة واتنين ميردش او ميديش أهمية، بس في التالته لو عنده معلومة هيرد عليك ويهتم، لانه ساعتها هيعرف انك interested and insisted وهيعلمك.
النايت، غالبا الشفتات النايت لو النايب موجود معاك ع الشفت هتعرف تتعلم احسن م اللونج، لان بطبيعة الحال الدنيا أهدى شوية.
النواب انواع، فيه نايب يكون عنده skill يعرف يعلمهالك، بس معندوش معلومات، وفيه نايب الskills بتاعته مش قد كدة، لكنه بحر ، استفيد من كل واحد على حسب هتقدر تاخد منه إيه.
عموما في الطب لازم يكون عندك concept ان محدش هيسقيك العلم بالمعلقة، لازم انت اللي تدور وتعلم نفسك بنفسك، متديش إيحاء للنايب برضه انك مستني شرحه هو وخلاص، جرب كدة قوله انا قريت كذا وكذا ولقيت كذا، او مش فاهم كذا، هتبينله انك بتدور ع المعلومة، حتى لو قلتله انا دورت وملقتش حاجة او مفهمتش حاجة، مجرد ما تقوله انك دورت، هيبقى متحمس اكتر انه يشرحلك ويديك كل اللي عنده.

#نصايح_للامتياز 3️⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
ازاي استغل سنة الامتياز كويس؟

ده يعتبر أهم بوست في كل اللي فات وكل اللي جاي
سنة الامتياز أصلا سنة تدريبية بحتة، والغرض منها انك تطلع من مود الطالب لمود الدكتور. فهي transitional كدة بين مرحلتين، ومع الانتقال ده وارد طبعا جدا انك تاخد وقت على ما تتأقلم، بس ده هييجي بسرعة جدا متقلقش.
عموما السنة دي بتبقى ماشية في ٤ اتجاهات لا خامس لهم. يإما شغل برايفت، ياإما تحضير لسفر، ياإما تعليم واستكشاف ، يا إما راحة وأنتخة.
لازم يكون عندك خطة لنفسك انت ناوي تعمل ايه السنة دي، لان لو انت مش حاطط لنفسك خطة من الاول التيار اللي هيمشيك وهتفاجأ ان السنة عدت بسرعة جدا وانت مش عارف هي عدت في ايه.
١) لو شغلك برايفت من الاول وفلوس، يبقى انت كدة لازم تذاكر كتب السوق ودول معروفين، وتذاكرلك كام فيديو معاهم، وتنزل ترمي نفسك في الاستقبال وطوارئ الجراحة علشان تقدر تشيل شفتات طوارئ خارجية. الحرام والحلال في الحتة دي أنا مش هفتي فيها طبعا هسيبك لضميرك.
الشغل بييجي ازاي؟ علاقات، انت بتبقى عارف حد غالبا من الدفعة الاكبر او حتى دفعتك شغال في مكان ما، بيجيبك معاه، او بتاخد مكانه بعد ما يمشي.
وانت نازل البرايفت حاول تتعلم من الناس الاكبر منك، دايما اسأل مفيش حد كبير عن السؤال، واسأل كمان على قواعد البرايفت علشان محدش يضحك عليك.
ده mainly for males
لانه رأيي الشخصي شغل الطوارئ البرايفت محتاج اكتر Male, بالنسبة للبنات ففيه شغل أهدى شوية ومناسب أكتر، زي شغل الليزر، والداخلى، والمدارس، والباراميديكال زي الاندلسيةو سموحة الدولى (دول اللي انا اعرفهم) . هتلاقوا فرص بتنزل بس زي ما قلت لازم تدوروا وتعملوا علاقات كتير علشان هو ده اللي بيجيب الشغل.
غالبا لو انت اشتغلت خصوصا لو من اول السنة ، هتتسحل في الشغل وهتسيب نفسك ليه، وهتنسى الامتياز وهتنزله دروبات، وهتعمل فلوس.

٢) الطريق التاني هو طريق السفر. للأسف السكك المتاحة كتيرة اوي، ومن كترها بتحيّر الناس، بتعمل analysis paralysis. مقدرش اقولك طبعا اختار ايه، كل واحد وله ظروفه اللي تمشيه في طريق معين، لكن عموما الطرق المعروفة هي أمريكا وانجلترا وألمانيا، والخليج بس ده بعدين مش دلوقتي، وفيه دول ياما ممكن تروحها برضه زي الدنمارك واستراليا ودول كتير ممكن تدور بقى براحتك وتشوف دنيتهم، انا بس بقولك ان الحياة مش أمريكا وانجلترا وخلاص.
هنا انا بفترض معاك انك قررت تسافر، ومش كدة وبس انت عارف انت عايز تروح انهي دولة بالظبط، وعارف قدراتك المادية لان اي سفر عايز فلوس. هنا توكل على الله ومتضيعش وقت في حاجة تانية غير المذاكرة وامتحاناتك واللغة وبس.

٣) دي سكة اللي هيقعد هنا في مصر، او حتى مش مقرر انه يسافر دلوقتي. هنا أنا بنصحك تتعلم، وده لو احنا كنا في ظروف تانية كنت قلتلك متعملش أي حاجة من اللي فاتت دي غير انك تتعلم في سنة الامتياز. بس للاسف الدنيا مش وردي أوي كدة وبتضطرنا ناخد طريق معين في الحياة.
كونك بتتعلم اي علم في العموم والطب بالخصوص ده شرف ليك بجد، وإجابة عن سؤال يوم القيامة شبابك ووقتك وصحتك ضيعتهم في إيه، احتسب النية علشان تاخد الثواب، و اسأل ربنا دايما ينور بصيرتك ويزيدك علم.
اتعلم ازاي
فيه بوست مخصوص هنزله عن الموضوع ده منفصل ان شاء الله.

٤) راحة وأنتخة
دي السكة الرابعة، اللي قد تبدو للوهلة الاولى ولا حاجة، بس هي فعلا هدف يحترم. لو انت قررت تريح السنة دي وتاخدها بريك كدة في النص ، أنا أحييك وبشدة. السنة دي أصلا هي السنة الوحيدة اللي انت معلكش أي مسئولية فيها، تمتع بهذه الخاصية السحرية على قد ما تقدر. لو مقرر انك ترتاح فعلا السنة دي، افصل بجد، اتفسح وعيد ترميم علاقاتك الاجتماعية لو كانت اتأثرت من سنين الكلية العجاف(وهي غالبا اتأثرت) ، نمي موهبتك او اكتشفها لو معندكش، سافر، اعمل كل اللي تقدر عليه وكل اللي كان نفسك فيه ايام الكلية ومعرفتش تعمله. م الاخر عيش حياتك ع الاخر وافصل عن كل حاجة.

لازم في اول السنة تحدد موقفك انت هتمشي في انهي سكة من دول او لو حتى عندك طريق تاني. المهم تبقى عارف والاهم تبقى كاتب، اعمل ورقة صغيرة كدة في محفظتك علشان تبص عليها كل شوية، اكتب فيها خطتك لل٦ شهور الجايين ايا كانت وتعالي بعد ٦ شهور شوف انت نفذت ايه وايه اللي ناقص وايه الي محتاج يتعدل. بره بيعلموهم الحكاية دي من صغرهم علشان كدة عندهم دايما الconcept بتاع انهم يطوروا من نفسهم باستمرار.
اي خطة هتعملها لازم يكون فيها plan A &plan B بحيث انه لو الاولى منفعتش، ابتدي امشي في التانية. يعني مثلا انت كنت مقرر تسافر امريكا وبتحضر لمعادلاتها، وحصل سبب ما سواء شخصي او عام زي ان الدولار غلي مثلا، خلاك مش عارف تكمل في الطريق ده ، خلاص throw it out واشتغل ع الخطة البديلة.

#نصايح_للامتياز 4⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
ازاي اتعلم في سنة الامتياز؟؟

انا هقولك تتعلم وتزود معلوماتك علشان دماغك متركنش ودي اهم حاجة، كدة والا كدة كونك دكتور فانت مضطر تذاكر تاني وتالت ورابع ولحد ما تموت.
الحاجة التانية، هي رضاك الشخصي عن نفسك، لما يبقى عندك معلومة كدة من كل حاجة، ده هيزود ثقتك بنفسك جدا، خصوصا لما حد من قرايبك يسألك على حاجة وتعرف ترد عليه او توجهه صح.
احلى طريقة تتعلم بيها عموما، هو اولا انك تشوف الحالة ع الطبيعة "رأي العين" مع كلمتين كدة من النايب يقولك الخطوط العريضة للحالة وبيتعملها ايه وكدة حتى لو ملقطش منهم غير كلمتين، وبعدين تاخد الموضوع ده لما تروح تدور عليه تسمع فيديو تقرا كلمتين من اي حتة. ساعتها المعلومة هتطبع في ذهنك. هتبقى مبسوط جدا لما تشوف الحالة دي تاني وتلقطها ما انت شفتها قبل كدة.
بعد كدة بقى ممكن تنزل كتاب من كتب الامتياز كدة تتسلى فيه طول السنة، ودول بالهبل وموجودين في كل حتة.
ممكن انت طبعا تكون اصلا بتذاكر لمعادلة ما وده هيكون منظم اكترو systematic اكتر ، وممكن تذاكر من مصادر المعادلات لنفسك حتى من غير ما تكون عايز تسافر.
فيه اقسام معينة انت لما تنزلها هتستفيد منها اجباري، زي الاستقبال وطوارئ الجراحة اللي هتتعلم فيها الخياطة.
لكن فيه في دهاليز المستشفى حتت مبتتنزلش ضمن البرنامج التدريبي بتاعنا وبالتالي محدش بيهوب ناحيتها بس هي مهمة. حاول تنزل كل حتة في المستشفى وتتعلم منها. أصلا كونك امتياز ده بيديك صلاحية تدخل أي مكان في المستشفى بعد كدة مش هتعرف، فاستغل الحتة دي كويس.
الميري مثلا ، انزل في العيادات الخارجية كلها، اعرف جدول العيادات من الأمن بره، وخصص يوم لكل عيادة تنزلها مرة ع الاقل، وشوف الجو هناك والحالات في العيادة شكلها ايه واسأل النايب لو فيه حاجة مش فاهمها غالبا بيكون كويس وبيرد عليك.
كذلك في الشاطبي عدي على كل العيادات اللي تحت سواء في النسا او في الاطفال.
الاسبشيالات هتنزل قسمين من ١٦ قسم، طب والباقي؟ انزل شوفهم بنفسك ع الطبيعة الدنيا فيه ايه.

علّم غيرك
دي حاجة في غاية الاهمية ، لازم يكون عندك المبدأ ده من صغرك، العلم في الاول وفي الآخر أمانة بتتنقل من جيل لجيل. تخيّل ان انت لو قلت لحد معلومة أو شرحتهاله، كل مرة بيستخدم فيها المعلومة دي انت بتاخد ثوابها، وكل مريض هينتفع من خلالها انت بتاخد ثوابه (علم ينتفع به)
غير كدة وكدة، المعلومة اللي انت بتشرحها هي أكتر واحدة بتثبت في دماغك بعد كدة

هيتعملكم اورينتيشن أول السنة، هيدوكم فيه كود كدة خاص بجامعة اسكندرية ل Incision Academy ده موقع عليه شوية كورسات مجانية علشان الكود. ممكن برضه في اي يوم اجازة تاخدلك كورس، بحيث على آخر السنة تكون خلصت عدد محترم تزوده في السي في بتاعك.

فيه تطبيق حلو جدا اسمه Anki Cards
للي ميعرفهوش، ده تطبيق مذاكرة، من اسمه كدة عبارة عن كروت، وكل كارت له تصنيف، انت اللي بتصنفه تحت العنوان اللي انت عايزه، الكارت انت اللي بتكتبه ، كل كارت له وش وضهر، بتكتب في الوش السؤال وفي الضهر الاجابة، بتذاكر منه ازاي بقى؟ هو بيطلعلك عدد معين من الكروت في اليوم، بيطلعلك وش الكارت وانت تخمن الاجابة وبعدين تضغط علشان تشوفها، وعلى حسب هل جبتها صح او لا او جزء منها بيديك تحت اربع اختيارات لاربع توقيتات مختلفة يظهرلك فيها الكارت ده من تاني.
يعني مثلا انا خمنت الاجابة صح جدا، يبقى دوس على الاختيار الابعد خالص وليكن بعد شهر، او انا مخمنتش ولا كلمة من الاجابة، فهدوس على أقرب اختيار وليكن بعد ٥ دقايق يظهرلك الكارت تاني. لو عايز تفاصيل اكتر افتح اليويتوب هتلاقي tutorials كتيرة. دي طريقة فعّاله جدا في التعلم، لانها معتمدة على التكرار ودي أفضل حاجة تتعلم بيها.

#نصايح_للامتياز 5⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
علاقتك باللي حواليك؟

عامةً خلال السنة دي انت بتتعامل مع ٤ اشخاص
النايب اللي معاك
زمايلك
التمريض
المريض وأهله
كل حد من دول عايز تعامل مختلف عن التاني.

النواب مش كلهم وحشين، هتلاقي نايب بيقول شكرا ومن فضلك ولو سمحت، ونواب تانيين بيطلبوا باسلوب تاني، دايما حط في بالك انه النواب اللي بتحتك بيهم مباشرة وبيدوك ديوتيز دول الجناير اللي هما اكتر ناس مطحونة ومحطوط عليهم، فراعي ده شوية. لكن مش معنى كلامى طبعا انك تقبل أي تجاوز منه في حقك، او تقبل انه مثلا يعاملك بطريقة وحشة قدام التمريض او العيان. ده غالبا مبيحصلش وانا مشفتهاش ومسمعتش عنها. اقصى حاجة ممكن تحصل هي انك تشد مع النايب شوية بخصوص الشغل او الحضور او انكم مش موجودين ع الشفت، حاجة كدة. بس في أي حال م الاحوال متقبلش انه يقلل منك.
ورغم ذلك في نواب غاية في الاحترام والادب، انا اذكر انه في جروب ما النايب عزمنا على شاي، احنا الامتياز اللي معاه يعني، رغم انها حاجة بسيطة بس كانت لفتة لطيفة منه جدا، رغن انه هو هو اللي بيكلفنا بديوتيز بعد كدة وساعات بيزعق برضه وكل حاجة ومع ذلك مكناش بنتضايق منه.

زمايلك
، دايما دايما دايما خلى الاحترام هو أساس التعامل ما بينكم هتستريحوا طول السنة. سواء في الجدول او في الشغل، ومتقللش من قيمة زميلك قصاد أي حد، واديله احترامه قدام العيان علشان العيان يحترمكم، يعني ناديه يا دكتور، ولو عندك تعليق على حاجة هو بيعملها، تقولهاله بينك وبينه لكن مش قدام حد أبدا.
ملحوظة، للاسف قد يحدث جدا انه زميلك اللي معاك ع الشفت يكون مبيشتغلش. بيحصل كتير. طبعا انا مبتكلمش عن اللي عنده ظروف او مريض او او، انا قصدي السليم المعافى اللي مبيشتغلش كسلا وترفعا. ده بالذات اوعى تخليه ميشتغلش وانت معاه ع الشفت، لان ببساطة انت زيك زيه، بتقبضوا في الآخر نفس المرتب. فكل حاجة انت تعملها هو يعمل زيها، كل ساعة راحة ياخدها انت تاخد زيها، يا كدة يا تشتكي للنايب رسميا وترفض عدم المساواة اللي بيحصل.
حاجة انسانية برضه، ساعات كتير جدا هتلاقي ناس كاتبة ع الجروب انها عايزة تبدل شفت والا حاجة، لو انت فاضي والموضوع تمام بدّل انت كدة بتفك كرب عن زميلك وبتقضي حاجته.

التمريض.....
وما أدراك ما التمريض، وبالذات تمريض الشاطبي.
طبعا دي مشكلة معروفة منذ قديم الازل الخلاف اللي بيحصل بين الدكتور والتمريض، خصوصا في وضعنا اننا لسة متخرجين او متخرجناش، وصغيرين في السن، ومش عارفين نظام الشغل، بينما هما كبار وقدام ممكن الواحدة فيهم تبقى قد والدتك مثلا. لكن أرجع واقولك برضه الاحترام هو مربط الفرس. كل ما تخلى الاحترام هو اللي بيحدد علاقتك بأي حد كل ما تكون مستريح أكتر. تقبل شوية انهم يبقوا عارفين الشغل عنك لأن زي ما قلتلك دول ناس قدام في الشغلانة. تودد قليلا ميضرش، لكن متسمحش بأي تجاوز، ولو حصل اشتكي على طول وصعّد الموضوع. عموما الشخص هو اللي بيحدد ازاي الناس تتعامل معاه، انت مثلا هتشوف بنفسك فيه نواب التمريض بيخاف منه، وواحد تاني بيحترموه، وواح تاني بيهزروا معاه بزيادة ، وواحد رابع واخدين عليه اوي زيادة عن اللزوم وهكذا فالموضوع راجع ليك برضه.

المريض
هنا بقى هقولك خلى الرحمة هي الاساس، العيان اللي لجأ لمستشفى حكومي ده علشان يتعالج عيان مهروس، بلاش تيجي عليه هو كمان، احترمه، اصبر عليه، ناديله باسمه وابتسمله، هوّن عليه ولو بكلمة، طمنه. انت في موضع يخلي كل حاجة بتعملها بتاخد عليها جبال حسنات.
ومع ذلك برضه فيه عيانين معينين كدة عايزين تعامل خاص، دول اللي هما سوري في اللفظ "بلطجية" ، تنسى كل الكلام اللي قلتلهولك ده معاه، وتديله حقه وبس في انه يتعالج، لكن غير كدة لا.
ونصيحة للبنات، لو حسيتي في أي لحظة انه العيان اللي هتتعاملى معاه من النوعية السابق ذكرها اعتذري بلطف عن المهمة اللي هتعمليها بالذات لو خياطة، ووكليها لحد من زمايلك الولاد اللي معاكي ع الشفت او ممكن تعملوها انتوا ال ٢، او قولى للنايب.

#نصايح_للامتياز 6⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄
يعني ايه دروبات؟

يعني انت عندك شفت اي حاجة في اي قسم، ومش عاوز او مش قادر تروح بتنزله دروب بحيث حد يروح بدالك ويشتغل شغلك وياخد مقابل مادي.
كام يعني؟
التسعيرة المتعارف عليها واللي هتتفقوا عليها كدفعة . كل شفت وقصاده السعر بتاعه. وبتبعت للشخص فلوسه غالبا فودافون كاش.
أي شفت بيتنزل دروب؟
غالبا مفيش مشكلة الا في الاقسام اللي معروف ان مفهاش دروبات، زي الرمد مثلا في الاسبشيالات، ساعات فيه نواب بيغلسوا وبيقولوا محدش ينزل دروبات بس دي متغيرة من وقت للتاني. وساعات مثلا قسم زي الفاسكولار بيحب اللي ينزله يبقى عارف شغلهم، فلو انت منزل دروب اول اسبوع او اسبوعين في الشهرين عادي كدة كدة كل اللي في الجروب بيبقى جديد وبيتعلم الشغل، لكن لو بعد نص الشهر الاولاني نزّل حد يكون نزل قبل كدة وعارف الشغل.
كذلك في طرقة الجراحة، نزّل حد بيعرف يخيط علشان ساعات الشفت بيقلب وبيبقى فيه خياطات كتيرة.
طب لو عايز انزّل دروب انزّله ازاي؟
بتعملوا جروب لدفعتكم وتنزلوا عليه، مثلا هكتب دروب جراحة عنبر اورام لونج النهاردة، هتلاقي المتاح بيبعتلك ع الخاص، بعد ما تتفق معاه بتكتب عالجروب تيكن علشان محدش يبعتلك تاني وبتعتذر انك مقدرتش ترد على كل الناس وعطيت الدروب لأول واحد.
شوية ملحوظات صغيرة:
ياريت لو منزل دروب متتأخرش في الدفع على صاحبه، لأن اللي بينزل بدالك ده ربنا أعلم بظروفه ممكن يكون محتاج الفلوس وانت متعرفش.
في نفس الوقت لو انت اللي نازل الدروب، اطلب فلوسك بكل أدب وبدون الحاح، غالبا اللي بينزل دروب ده بيبقى عنده ظرف ، فأرجوك احترم ده وسيبه هو لما يكون قادر يبعتلك هيبعتلك.
لو حد هينزّل دروب، يا ريت يتأكد ان اللي هينزله ده يكون بيشتغل علشان ميضايقش زمايله اللي معاه ع الشفت. انت في الاول وفي الاخر منزل الدروب علشان خاطر زمايلك اللي معاك ع الشفت ميشيلوش الشغل لوحدهم، لكن النواب كدة كدة معهمش جدولكم.
لو فيه امضا زي الاستقبال، بينزل ولد مكان ولد وبنت مكان بنت.
رجاء شخصي مني يعني، اللي عايز ينزّل دروب ينزله قبلها بفترة، بلاش حتة دروب "دلوقتي" ، "حالا"، "حد يكون في الميري"، "دلوقتتتتتت" وكل الكلام ده، انا عارفة طبعا انه وارد يكون الواحد نازل الشفت وحصله ظرف دلوقتي فمضطر ينزّل الدروب دلوقتي، تمام . لكن لو فيه فرصة انك تنزل الدروب قبلها بيوم او بكام ساعة حتى يكون أفضل.
برضه حاجة ذوقية، انه اللي عايز ينزّل دروب، ينزله ع الجروب الصغير بتاعه الاول قبل ما ينزّله ع الجروب الكبير خالص اللي فيه الدفعة كلها. منها انت بتضمن ان الشخص اللي نازل هيبقى معاك كدة كدة وبالتالي النايب مش هيعرف انك منزل دروب، ومنها انك احترمت زمايلك وعرضت عليهم الاول حد منهم ياخده، وقدرتهم وعرفتهم بالمرة انك مش جاي ومنزل دروب، بدل ما تنزل دروب ويتأخر مثلا ويقعدوا يدوروا عليك وتليفونك يبقى مفهوش شبكة والحوارات دي.
برضه وانت منزّل دروب اتأكد انه بتاع شغل ، مش هينزل يرمي الشغل على زمايلك اللي في الشفت. أكيد طبعا انت لما تيجي تنزل حد مش هتعرف تقيم الحتة دي، بس ع الاقل قول لزمايلك بعد الشفت ها ايه الاخبار؟ الراجل كويس واشتغل والا ايه، بحيث لو قالولك انه مشتغلش او زوغ كتير وما الى ذلك تعمل حسابك متنزلوش تاني.
الدروب بيقعد لاخر الشفت، يعني لو النايب قال حد يروح وحد يقعد، الدروب هو اللي بيقعد.
مش معنى ان حد نازل دروب يبقى يشتغل اكتر من اللي ع الشفت اساسي، الشغل يتقسم عليكم بعدل ربنا. ولو اللي ع الشفت اساسي خدوا ريست الدروب كمان ياخد ريست زيه زيهم.
برضه هتلاقي ناس بتشيل شفتين مع بعض في نفس الوقت، انا مش ضد الموضوع provided انه الشخص هيسد في ال ٢، لو تمام ومش هيقصر في الشغل وهيشتغل زي باقي الناس اللي معاه ع الشفت اوكي، لكن لو زوغ في واحد او مشتغلش كدة حرام وزمايله اللي ع الشفت اللي زوغ منه هيبقوا متضايقين طبعا وهيشيلوا الشغل لوحدهم.
هل فيه حاجات تانية بتنزل دروب؟
اه، زي الامضا في النسا، و المحاضرات واللوج بوك وبرضه ليهم تسعيرة اتفقوا عليها كلكم.
هل ممكن انزل الشهر كله او الشهرين دروب ؟
اه بس ساعتها التسعيرة هتختلف، لو الشهر فيه شفتات ياما وحسبتها لقيتها ان انت لما تنزله فرداني شفت شفت هيبقى فرق بسيط، ممكن ساعتها يبقى ع المرتب. أما لو كانت الشفتات عددها قليل هتحاسب على عدد الشفتات، واللي ينزل الشهر برضه ممكن يتفق مع اللي هينزل على اللوج بوك يعملهوله. أهم حاجة أهم حاجة انك تتفق مع اللي نازل قبل أي حاجة علشان ميحصلش مشاكل بعد كدة.

#نصايح_للامتياز 7⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄

**الأطفال

ده راوند خفيف من حيث عدد الشفتات، يعني اكتر واحد هياخد ٦ او ٧ شفتات في الشهر، وده اللي جروبه يعني ناقص اقل من زمايله.
انتوا بتتوزعوا ع العمارة ، الاقسام اللي موجودة: كارديو وريسبايراتوري، وغدد، و GIT .....
وبعدين جوة القسم الواحد بتتقسموا A B C
هتكلموا النايب علشان تعرفوا هما عايزين كام واحد في اللونج وكام في النايت وهيقولكم على النظام بحيث ان كل يوم يبقى فيه ناس من جروب ع اللونج، وناس م الجروب التاني ع النايت، والتالت اوف، وهكذا بقى بتبدلوا مع بعض
الشفتات لونج ونايت فقط، ولو انت هيماتولوجي بيبقى فيه شفتات عيادة مورنينج
الكارديو والريسبايراتوري احلى اقسام، لونجاتهم مبتقعدش للاخر وكذلك النايت، بس ده على دفعتنا خلي بالك لان مود كل قسم بيتغير من وقت للتاني على حسب النواب الموجودين.
الشغل في العنبر بيور ديرتي ، بتودي تحاليل بتجيب تحاليل، اشعات بقى بالهبل، وفيتلة كتير،، ،،
الاستقبال، كل قسم بيبقى ليه يوم استقبال في الاسبوع، بتعرفوه من النايب لما تسألوه ع النظام علشان تعملوا الجدول، شفتات الاستقبال بتبقى اتقل م العنبر، برضه بوست الاستقبال تقيل، اللي هو اليوم اللي بعد يوم الاستقبال، بيبقى فيهAdmissions ياما م اليوم اللي قبله غالبا وده اللي بيخلى الشغل تقيل. انا بقولكم النقطة ده علشان وانتوا بتعملوا الجدول تبقوا عارفين اللي واخد شفتين استقبال مثلا يتشال من عليه شفت عنبر علشان ميبقاش فيه ظلم.
للاسف بقى فيه شفتات NICU ، كل اسبوع بياخدوا واحد من كل جروب من كل قسم يعملوا بيهم جروب، الجروب ده بيبقى عنده شفتات نيكيو من اليوم الفلاني لليوم الفلاني.
طب الناس دي بتتاخد ازاي؟
بترتيب الكشف، يعني لما الكشوفات تنزل اول ٨ في الكشف يعملوا حسابهم ان ليهم شفتات نيكيو خلال الشهرين بتوع الاطفال كل اسبوع واحد بيروح، وباقي زمايلهم في الكشف مالهمش.
طب ايه طبيعة الشغل؟
مش هكذب عليكم، شفتات النيكيو هي اتقل شفتات في الامتياز بامتياز. هو شفت لونج او نايت عادي من ٨ ل ٨، بس الشغل فيه مبيهداش سواء في اللونج بتبقوا ٣ او ٢ في النايت. انا بقولكم كدة علشان تبقوا عارفين من قبل ما تروحوا وتعملوا حسابكم.
بتشتغلوا في النورمال تحت اللي هي طرقة الولادة، بيبقى فيه نواب مبتسرين بيستقبلوا الطفل بعد الولادة قاعدين تحت، كذلك في الCS فوق في الدور التاني، ووحدة المبتسرين نفسها في الدور الاول ع اليمين اخر الطرقة، فيها وحدات أ والاكستنشن والدرس و د، ميهمكش هتسأل عليهم اما تروح وهتعرف اماكنهم.
انتوا بتعملوا جروب والنواب اللي شغالة كلها بتدخل عليه، ولما بيعوزوا حاجة بيكتبوا عالجروب حد يطلعلهم، الشغل كله تحاليل تتودى او تتجاب، تجيب رضعات، سناسر.... بيور ديرتي.
للاسف مفيش مكان تقعدوا فيه، اللي كان بيبقى عنده نيكيو، لو ، لو عنده وقت فاضي بيقعد مع زمايله تحت في الاوضة بتاعة الامتياز اللي في طرقة الولادة.
طبعا بما ان شفتات النيكيو دي اتقل شفتات، فبتتعامل زي الاستقبال، يعني اللي بياخد شفتين نيكيو الشهر ده يتشال من عليه شفتين الاستقبال بتوع الشهر.
فيه شفتات رضاعة طبيعية كمان اتضافت مؤخرا، بس للاسف معنديش معلومات عنها لان الجروب بتاعي ماخدهاش.
طب اتعلم ازاي في الاطفال.
للاسف الاطفال هي اقل الراوندات تعليما، كلها بيور ديرتي زي ما اتفقنا،، لكن في النص ساعات بتحصل حاجات كويسة.
المرور ممكن تمر معاهم الصبح في العنبر تسمعلك كام كلمه، لكن من رأيي ده مش أحسن حاجة تعملها.
ساعات فيه نواب في بعض الاقسام بيقعدوا بعد المرور الصبح او بالليل مع الجناير يشرحولهم، ده ممكن تستفاد منه.
فيه نواب بيعملوا جروب واتس اب يشرحوا فيه، ده حلو برضه.
هتتعلم اختبار حساسية الalbumin وانت في العنبر هتعمله كتير. وهتشوف العيال اللي بيبقوا محطوطين في العناية المتوسطة وعينك تلقط امتى الولد يكون critical وامتى يكون stable
( كل دور بيبقى فيه اوضه اسمها عناية متوسطة دي من اسمها كدة مهياش عادية زي العنبر ومهياش intensive اوي زي العناية، الاوضة دي اللي لو فيها حالات عندكوا هي دي اللي بتقعدوا جمبها بالليل تفيتلوها وتobserve )

الفايدة الاكبر ع الاطلاق هي في الاستقبال تحت سواء في الin او في ال out. بس زي ما قتلتكم غالبا مش هتعرف تتعلم م الاستقبال لو انت ع الشفت علشان خاطر الشغل اللي بيبقى مطلوب منك. فلو عايز تتعلم بتنزل فولنتير . هتعرف مين السنيور اللي موجود في الاستقبال واقعد جمبه اتعلم منه، الاطفال فيها حاجات كتير تتعلمها بمجرد قاعدتك في الاستقبال، كمان الشاطبي الريت فيها فظيع جدا، بييجي فيها كل الحاجات النادرة اللي كنا بنشوفها في الكتب نظرا لانها بتستقبل اربع محافظات، ودي حاجة جميلة جدا هتخليك تشوف كل حاجة.

#نصايح_للامتياز 8⃣
#Emtyaz_MW
#PostGrad_Med
#Medicine_Way
▄▄▄▄▄▄▄▄

**النسا

انتوا بعد ما بتتقسموا كدفعة ٦ جروبات، الجروب بتاعكم زي ما قلنا بيبقى عارف هو هيبدأ بايه والشهرين اللي بعدهم عنده ايه وهكذا لغاية اخر الامتياز.
في النسا فيه ٦ وحدات، بتتقسموا على ال ٦ وحدات دول، وجوة كل وحدة بترجعوا تتقسموا تاني جروبات أصغر من A ل F
مثال
انا جروب ٢ ، ده الجروب الكبير الخالص
بعدين عرفت اني هبدأ نسا، اتوزعت على وحدة ٣ جروب F يبقى انا كدة جروبي 3F والجروب بيبقى فيه في المتوسط ٦، لو اقل من كدة اطلبوا من استاذ جودة يجيبلكم حد من الوافدين علشان تعرفوا تقسموا الشفتات عليكم. كدة معناها انه جروب x هيبقى فيه ٣ وجروب y هيبقى فيه 3 .
التقسيمة والجدول غالبا بينزلوا اول يوم في مارس، وبعد كدة بتنزل ليلتها الفجر 😂 واللي بتبعتهم دكتورة أميرة بدوي رئيسة القسم. وهتعملكم جروب تليجرام كبير للنسا وواحد تاني لبنك الدم. ونواب الكلينيكال باثولوجي هيعملوا جروب تاني واتس تسألوهم عليه.
على أيامنا كان فيه نظام x و y بمعني ان جروبكم الصغير خالص وليكن عدده ٦ ،اول ٣ منكم هيبقوا جروب x وال٣ التانيين هيبقوا y, وبتحضروا اسبوع واسبوع، يعني اسبوع ينزل x واللي بعده y واللي بعده x وهكذا
نظام الحضور بقى:
الجدول فيه كذا حاجة : المرور او العنبر ده فيه حضور عبارة عن مورنينج في الوحدة اللي انت فيها بتيجي فيه بدري شوية على ٨ والا حاجة، وتمضي عند السكرتيرة، بعدها النواب بقى بيبعتوك مشاوير، وساعات بيبقى فيه للاسف مشاوير للميري.
عامة شغل النسا خفيف اصلا، والشهرين دول يعتبروا دلع يعني، قبل ما يطبق نظام الx وال y ده كان الحضور مقرف وكل يوم تقريبا تيجي تمضي، فكان الناس بتاخدها في الصحة وتريح دماغها م الاول.
الطرقة، النواب بيبقوا عايزين ٢ من الجروب اللي عنده بوست بارتم، و٢من اللي عنده حوادث، و ٢ عمليات حوادث ده سواء لونج او نايت بحيث يكون الاجمالي في الطرقة ٦، ال ٦ دول بيشيلوا الشغل في اي حته، سواء تحت او فوق في العمليات، او حتى لو طلبوا حد في الليستة، وده باتفاق الجروب كله.
فلنفترض انه جروب 3F x عنده عمليات حوادث النهاردة لونج، ده معناه ان ال٣ هييجوا يمضوا عند السكرتيرةفي الوحدة بتاعتهم عادي، ٢ منهم هيكملوا الشفت وواحد يروح ، الشفت من ٨ ل ٨، النايت نفس الحكاية بس مبيبقاش فيه امضا.
الشغل في الطرقة كله غالبا دم، بتجيب دم، او بتجيب صفايح، ساعات بيطلبوا حد في للعمليات، بس عموما زي ما قلتلك الشغل في النسا أصلا مش كتير والشفت بيبقى خفيف خالص. وفي النايت ممكن تقسموا الشفت ما بينكم.
نيجي بقى للعيادات ،تنظيم أسرة وعقم وحمل .....الخ، كلها بتيجي الصبح تمضي عند السكرتيرةوتمشي، بس طبعا احنا مبنقولش كدة، المفروض اننا بنمضي وننزل تحت في العيادة نحضر عادي. وفيه امضا في العيادة تحت بس دي مش مهمة.
الاستقبال كذلك الصبح امضا بس، وكذلك الICU بتبقى امضا سكرتيرة الوحدة بس.
نايت الاستقبال ونايت الICU في الجدول ولا فيهم امضا ولا فيهم حضور ، فولا كأنك شايفهم.
مسموحلك بيومين عارضة خلال الشهرين بتوع الروتيشن. بتجيب ورقة اجازة العارضة من مكنبة ندا اللي في وش المستشفى، وتملاها وتسلمهالهم.
بالنسبة بقى لبنك الدم:
كل جروب بيبقى عنده يوم بنك دم في الشهر مثلا او يومين على حسب الجدول، اليوم ده الجروب كله بينزل فيه سواء جروب x اللي عليه الدور او y ، بيبقى فيه جروب واتس اب كدة بتدخلوا عليه كلكم ، نواب الكلينيكال باثولوجي بيبقوا معاكم فيه، بينزلوا التقسيمة بتاعتكم قبلها بيوم بالليل، انتوا ال ٦ بتتقسموا مورنينج وايفننج شاطبي وميري، بتأكدوا حضوركم بالليل ع الجروب ، التقسيمة النواب بيقسموها لكن انتوا ممكن تبدلوا عادي، بس تقولوا ع الجروب انكم مبدلين مع بعض ونايبة الكلينيكال باثولوجي تقول اوكي.
الشفت رسمي المورننيج من ٨ ل ٢، والايفننج من ٢ ل ٨، بس هما مبيبدأوش قبل ٨ ونص ٩، و الايفننج بيخلص ٧ بالكتير.
طب انت بتعمل ايه هناك؟
ولا اي حاجة، فيه ورقة كدة بيبقى الشخص اللي داخل يتبرع داخل بيها متدبس فيها صورة بطاقته، مكتوب فيها شوية اسئلة، تسألهاله ، وتزود عليها عنده برد او خلص من اقل من ٧ ايام ، كان بياخد مضاد حيوي من اقل من ٧ ايام، وبس، وفيه جايد كدة بيبعتوه الدكاترة اول الشهرين على جروب الواتس اب اقروه برضه، ولو مش عارفين نقبل العيان ده والا لا بتبعتوا للدكاترة على جروب الواتس اب وغالبا بيردوا.
نصيحة متقولوش على المواعيد للناس، يعني مثلا لو جالك حد وسألته بتشرب سجاير وقالك اه، سألته بتشرب حشيش قالك اه، هتقوله اخر مرة امتى ، هيقولك امبارح هتقوله مينفعش، لازم يكون عدى ٣ ايام على اخر مرة، هو كدة عرف المعلومة، هييجي بكرة الصبح يتبرع عادي ولما الدكتور اللي موجود يسأله هيقوله اسبوع بقى ما هو عرف المدة، فرجاء اعمل ديفير وخلاص من غير ما تعرفوهم المواعيد. انا عارفة انه عمل خير والله بس علشان الناس اللي هيتنقلها متتأذيش.

#نصايح_للامتياز 9⃣
#Emtyaz_MW
#PostGrad_Med
#Medicine_Way
#Mansour_Algazar
@Medicine_Way2
▄▄▄▄▄▄▄▄▄▄

**الباطنة

شهرين الباطنة شغلهم وسط، لا هما خفاف ولا هما تقال، هما بس يمكن شغلهم مقرف شوية علشان الdressing والحالات اللي بتبقى محجوزة بتبقى تعبانة، وحاجة بؤس شوية، لكن عموما الدنيا مش سيئة للدرجة.
الشفتات لونج ونايت ومورنينج
هتتوزعوا على عمارة الباطنة ، كل مجموعة في قسم، والشهر التاني بتبدلوا مع قسم انتوا عارفينه مسبقا
يعني الانودكراين و الGIT بيبدلوا مع بعض
الرينال و الجيرياتريك بيبدلوا مع بعض
الكبد و الروماتولوجي بيبدلوا مع بعض
السكر و الدم بيبدلوا مع بعض
عدد الشفتات في حدود ١٠ في المتوسط
الاقسام بتختلف بس فيه اقسام ممكن تروح الناس في الونج على ٦ او ٧ وفي النايت واحد يبات وواحد يمشي.
كان على دفعتنا الاندوكراين والGIT الطف الاقسام، لكن الموضوع ده مش ثابت زي ما اتفقنا، لان جم في شهر وغلسوا عليهم في الGIT فمفيش قاعدة ثابتة.
فيه يوم طوارئ كل اسبوع للقسم بتاعك، بيحتاجوا فيه واحد لونج وواحد نايت، ده مفهوش مرواح.
طبيعة الشغل ايه؟
سحوبات ABG وتحاليل وحجز أشعة وايكو وغيارات ECG وفيتلة..الشغل العادي يعني.
يوم الطوارئ انت وحظك، ممكن الدنيا تبقى هادية اوي وتقعد طول الشفت مبتعملش غير الكام حاجة البساط بتوع الصبح، لان النايب الي بيستلم الصبح بيعمل شوية حاجات كدة كروتين يعني، قياس ضغط تحاليل , abg كدة يعني.
بعدين باقي الشفت بقى انت وحظك زي ما قلتلك.
طب اتعلم ازاي في الباطنة؟
برضه للاسف التعليم مش أحسن حاجة ، ممكن تمر معاهم الصبح، هتستفيد شوية.
ممكن النايب يكون كويس ويشرحلك.
ممكن انت كل شفت كدة، تاخد تذكرة من التذاكر وتقرأها شوية وتشوف خط سير العيان ده من ساعة ما دخل الطوارى مثلا وبعدين اتحول عنبر لحد النهاردة. طبعا اكيد مش هتبقى فاهم أي حاجة، اسأل نايب يكون كويس كدة وبياخد ويدي معاك، هيفهمك ويشرحلك الحالة، وممكن يستفيض معاك في الشرح كمان لو موراهوش شغل.
انزل العيادة بتاعة القسم اللي انت فيه برضه وشوف ايه طبيعة الشغل هناك، العلاجات واساميها، اقرا اشعات، شوف العيان نفسه شكله ايه وعامل ازاي، حتى لو النايب اللي في العيادة مشرحلكش، انت هتستفيد من ملاحظتك.
في الطوارئ العيان ممكن يبقى قاعد كتير، لانه طوارئ الباطنة مش زي الاستقبال اللي مينفعش العيان يعدي عليه ٢٤ ساعة فيها، لا هنا عاظي هتلاقي عيانين مقيمين. شوف تذاكرهم كدة واسأل النايب لما ييجي يمر عليهم الصبح برضه هتعرف شوية معلومات.