فتحة عزاء الليله الخامسه ... الانصار ...

اضل طول العمر انصب عزيه
حسينا وا حسينا وا حسيناه
_______________________

لانصاره الدمع هالليله ....يهلي
يودهم گلبي من ايام .. يهلي
ياربعي ويهل شبان .....يهلي
يلا اعله الانصار انشد عزيه ....
حسينا وا حسينا وا حسيناه
_______________________

اجو لحسين چن آيه ...ورايه
ابچفهم قدمو دمهم ...ورايه
العيش اشلونه گاللهم ..ورايه
جهنم والحياه گالو سويه ....
حسينا وا حسينا وا حسيناه
_______________________

يگلبي اعله الفدو لحسين ...ون حيل
واحدهم گضاه العطش ....وانحل
وبگو مثل الجبل مالان ....وانحل
اواحدهم تمنه ايموت ميه ......
حسينا وا حسينا وا حسيناه
_______________________

طاحو والدمع منه ...تلاله
واحد واحد فاتحه ...تلاله
اويلي والشمر لمن ..تل اله
ذكر أنصاره ودموعه جريه
حسينا وا حسينا وا حسيناه
_______________________

يتلّه والوجه ع الگاع ...يزهر
ناده ياحبيب وجون ..ي زهير
الواحد من مثلكم كون..يزهر
ويرد ويشوف شنهو الصار بيه
حسينا وا حسينا وا حسيناه
_______________________

ابو فاطمه الطائي

الليله الخامسه
الانصار
القصيده الاولى

انصار .. بعيونهم اجمل عشگ
انصار .. يحسين دونك تختنگ
انصار .. واگلوبهم لمن تدگ
يا اباعبدالله ... يااباعبدالله .. يااباعبدالله
______________________

انصار من طينت عشگ . الله خالقهم الك . ياحسين
لعيونهم انت الضوه .ويتنفسونك بالهوه .عاشگين
مارادو أموال اولد . وياك رادو للخلد ذاهبين
ما همهم الغالي الثمن . يشهد عليهم كل زمن .خالصين

ارواح .. لهذا العشگ دفعو ثمن
ارواح .. يحسين رادوك الوطن
انصار.... وياك لا ما تفترگ
يا ابا عبدالله ..يا ابا عبدالله
______________________

برواحهم مامش دغش . وگلوبهم لاما تغش . للتريد
لحسينهم لبّو فرض . واسياد صارو بالأرض . مو عبيد
واحدهم الموت اشتره . امغالب يقدم منحره . كل شهيد
يتسابقون اعله الوفه . اهل العشگ والمعرفه . للوحيد

يحسين .. لبيك صاحو من دعه
يحسين .. واحدهم الموته سعه
انصار .. رايتهم ابعز اتفخگ
يا ابا عبدالله ... يا ابا عبدالله
______________________

من سمعو الزبنب بچت . أرواحهم غيره حچت . ياحبيب
هالحره چنها خايفه . تبچي ودمعها نازفه . للغريب
لن شيخ الانصار ابعجل . يمشي لبنت خير العمل . بالنحيب
يحلف ابسبع الگنطره . الطف تخليها تره . چن لهيب

خدام . وبسيوفنه شوفي العجب
خدام . والله مانعرف تعب
انصار . مادام ينبض هالعرگ
يا ابا عبدالله .. يا ابا عبدالله
______________________.

امغزر اويانه الملح . باچر تشوفين الصبح . وشيصير
نگلب يمين ابميسره . انوگف اميه بالسره . ع السعير
اوشيبات ابوچ المرتضه . الموت بيهم نفرضه . بالنفير
نفتح طريق المختصر . بين الطفوف اويه السقر . باليسير

جموع . نمحيهم ابلمحة نظر
جموع . مايبقه من عدهم اثر
انصار . نسحگهم العينچ سحگ
يا ابا عبدالله . يا ابا عبدالله
______________________

عباس بالخيمه وسمع . جر سيفه بيمينه وطلع .ك الشرار
امفرّع ويلهب جمر . ينشد يزينب مالامر . شنهو صار
گالتله يانعم الاخو . انصاركم ليه انتخو . بالبدار
يابعد طولي وشيلتي . شو خايفه من ليلتي . گلبي نار

ياحيف . گاللها شيال اللوه
ياحيف . اتخافين واشتم الهوه
انصار . العدوان نطبگهم طبگ
يا ابا عبدالله .. يا ابا عبدالله
______________________

لنصار سمعو ماجره . وگلوبهم متوجره. للخدور
مابينهم خلو عهد . مايضل من عدهم احد . والنحور
ابحب الحسين اتسودنو . وابحبهم ال الله دنو. بالسرور
واحد ال واحد بالاثر . ماتو مثل غصن الشجر . والبخور

احباب .. لحسينهم كلهم فدو
احباب .. الله يهاوهم غدو
انصار .. وانطاهم الغرب وشرگ
يا ابا عبدالله ... يا ابا عبدالله
______________________

ابو فاطمة الطائي

الليله الخامسه
الانصار
القصيده الثانيه

ياليتنا نرجع بعد ..للحومه ونجدد عهد
وانموت لاجلك يالسبط. سبعين موته بالعدد
__________________

يحسين انصارك وذر فوگ التراب امگطعه
برواحهم حسره بقت بين الخيم والمشرعه
موته ومدامعهم تهل كل واحد ايصب مدمعه
لمن يشوفونك تون واحدهم الربه دعه

يامحيي الاموات ابأمر ..بس يوم ردلنه العمر
شوف الحسين ابيا وضع .. ماعنده ناصر لا مدد
__________________

العيسى احييت اشكثر يامحيي أصحاب الكهف
رجعنه ربي النصرته ذابل يبس ريجه ونشف
وتبچي رقيه من العطش ماتحمل اربات الترف
للسيف بينه اشگد هوه والمندفن بارض النجف

الموت واحد ماكفه ..وعابس جنونه ماشفه
ولابن مضاهر يكتفي من موته وحده بالشدد
__________________

ارواحنه عن الجسد اتفارگن بالموزمه
لاكنها يحسين السبط ماترضه تصعد للسمه
محتاره شتقدم عذر لو صدفه شافت فاطمه
اتگللها متنه من الصبح وعفنه الحسين اويه الضمه

چا ليش متو بالعجل . شنقدم الها بس خجل
زحمه اشنجاوب للطهر انگللها خلينا نرد
__________________

للسمه ماهي ماشيه ارواحنه ولا صاعده
انچان مابينه حرب ولا للسيوف امعاوده
خلينه بس نشبع بچي لاطفالك المتشرده
والزينب انسيل الدمع لمن تروح ويه العده

لرقيه خل نشبع بچي . مبيوگ من عدها الحچي
اذانها تگطر دمه . والباگ ترچيه شرد
__________________

سبعين روح اعله النهر تمشي اتوسل بالجره
واتگله ياماي استحي اسكينه شوف امرمره
مابيها تگعد لاتگف شادها سبع الگنطره
لا ماي لا عمها رجع ماتدري شنهو الاخره

ياعمي شنهو الاخرك ..مابيه حيل اتنطرك
ارجعلي ماريد العذب . بس شوفتك تسوه الشهد
__________________

ارواح عدنا اتحيرت مابينك وبين السبي
يبن النبي يمك تضل لو تطلع ويه الأجنبي
املاك الله اتنزلت لينه تگول اتاهبي
للجنه لا كنها درت جنة عدن يم العبي

ارواح بينه اتفرهدن..ماهو لأجل جنة عدن
بس ترضه يحسين وكفى والباري اعلينه شهد
__________________

ابو فاطمة الطائي

فتحة عزاء الليله السادسه

اضل طول العمر انصب عزيه
حسينا وا حسينا وا حسيناه
_______________________

سادس ليله يم مسلم ..نحيها
كعبه وسيرته واجب ...نحيها
وطوعه الحيته نگصد ..نحيها
نلبي له ابدمع هاي المسيه
حسينا وا حسينا وا حسيناه
_______________________

شهم مغوار هم يحمل ...وجاهه
ابكتاب احسين متعني ...وجاها
الكوفه . بنار بتاره ....وجاهه
چنه حيدره ابسوح المنيه
حسينا وا حسينا وا حسيناه
_______________________

سكتو من حچه ومامش ..ولا. ها
الرگاب السيفه ضل يثبت .. ولاها
لچن وسفه العطش روحه ..ولاها
وطاح ابغدر زمرة آل اميه
حسينا وا حسينا وا حسيناه
_______________________

ضل يصفج عليه السبط ..راحات
يمسلم بالدهر ماشفت ..راحات
اعيونه يم حميده بدمع ..راحت
كسر ضهري ابوچ اشلون بيه
حسينا وا حسينا وا حسيناه
_______________________

اتگله
لابچيله بدمع مو ماي ..لا دم
أبويه والعمر بجفاه .. لادام
حزني لو اوزعه البوم ...لآدم
تصل حصه ويضل ثلثين بيه
حسينا وا حسينا وا حسيناه
_______________________

ابو فاطمه الطائي

الليله السادسه
مسلم بن عقيل
القصيده الاولى

يلّي تنشدون عليه ابكل لغه
آنه أبن الحروب أبن الوغه
مسلم آنه بختصار .. نسخه يعني لذو الفقار
______________________

مسلم مرسول الغيره . الحيدر مايشبه غيره .حلم ويصعب تفسيره
والكوفه بيها اشسوه
واحد لاجن مو واحد . چنه الكرار يجاهد . موت وبيهم متواعد
يبرج سيفه ويتلوه
منطق موت ابچفينه . للخانو عهد حسينه . يحمل والسيف ايعينه
صارو لاحول وقوه

نازل عليهم غضب من السمه
للي يخونون عهد بن فاطمه
مالكم فيها قرار . نسخه يعني لذو الفقار
______________________

يرفع وياهم صوته . احياء انتم لو موته . وين الكلمه المبخوته
چم اكتاب الوديتو
مو گلتوله اقبل لينه .من هالضالم ملينه . وللبيعه انمد ايدينه
شنهو الصار ارتديتو
يالخسرانين الدارين . بعتو الدين ابدينارين . طبع البيكم غدارين
ويه الضالم رديتو

گلتلوله أقبل حسينا مرحبا
وسليتو السيوف عليه عجبا
للحرب وجيتو نار . نسخه يعني لذو الفقار
______________________

ليش احسين تغدرونه . ونفس الهادي تدرونه. ولبن ازياد اتبيعونه
مابيكم ذرة غيره
جاييني ابالاف اسيوف . كل ضنكم يدخلني الخوف . وهذا العندي ما مألوف
والخوف أجهل تفسيره
ياجهال ابفن السيف . اشدراكم من اين وكيف . آنه العندي اعلوم الحيف
بالروس اعرف توشيره

آنه البلحروب تره استاذي علي
يعني التقدم إليه يبتلي
ابعيني يتجادح شرار . نسخه يعني لذو الفقار
______________________

لحسين افديه ابروحي . ويا يامحله اجروحي . ياكوفه ابغيضچ روحي
مابايع غير احسيني
ديني مايكمل دونه . أحكام الله ايسمونه
قبلة توحيدي اعيونه
واليوم اوفيله ابديني
خل يسمع بن مرجانه . آنه الموت وعنوانه . وين الجيش وميدانه
وين الراد ايلاگيني

ولد السقيفه ي اشبتاه الزلم
بيميني السيف وب اليسرى ختم
ختم النار البوار .نسخه يعني لذو الفقار
______________________

للتاريخ اكتب سيره . عن الصار وتفسيره . وروس المابيهن غيره
وعليكم تبقه اللعنه
ويه احسين وأنصاره . اسمي باقي وبتاره . وتعرف هذا اوآثاره
نفس الموته وفد معنه
وبتخلد ذكر الطوعه . ام الهامه المرفوعة . تسوه الكوفه المجموعه .ابموقفها ابهاي المحنه

طوعه ويه الانصار نعم الها اسم
من عدها والله سبع مية نعم
اختارت ونعم الخيار . نسخه يعني لذو الفقار
______________________

بس سيف البيده اينصره . راعبهم يمنه ويسره . لاكن بعيونه الحسره
لحسين ابنص إحساسه
من يضرب مايخطي الرأس .ويمر ابروحه الاحساس . كون هنا هسه العباس
واستشعر جمر أنفاسه
چا بالكوفه اتفيض دموم . وعليهم الحساب يگوم . انصعد جمله اعله القيوم يعني كلشي بمقياسه

وتبقه حميده فلا انشوف اليتم
ولا ناعي يوصل يهيج للألم
وتسدل اجروحي الستار . نسخه يعني لذو الالفقار
______________________


ابو فاطمة الطائي

الليله السادسه
مسلم بن عقيل
القصيده الثانيه وهذي القصيده اخترنا أن يكون موضوعها مختلف نوعا ما .
لان اغلب خدمة الحسين عليه السلام يتحدثون عن شجاعة مسلم .عن غربة مسلم . عن المواقف الصعبة التي عاشها . ولا نرى من يتحدث عن جوده وكرمه وأنه باب من أبواب الله تعالى سيما وهو سليل الدوحة الهاشميه
..............................................

رحمه وابهيئة بشر ..اسمه بالكون انتشر
هذا ابو حميده
اليدگ بابه ابعسر .. لاهله يرجع باليسر
هذا ابو حميده
____________________

سيدي اليوم اعتنيتك والدمع يتلاله
ارد اواسيك اواعزّي السبط واعياله
گلبي ودّاني الحظرتك والحزن مرساله
گلّي يم مسلم تلاگلي كل محمد وآله

تلگه فاطم وي علي ..الحزن بيهم جلي
شاحب الصميده
والذي اعليهم يمر ..لاهله يرجع باليسر
هذا ابو حميده
____________________

أن بعد العسرِ يسرٱ بالصحن اقراها
وادري باليسرٱ يمسلم يمنتك معناها
اشلون مامد ايدي واعرف انت تتلگاها
ه‍يچ انت ايدك كريمه جل من سواها

انت وحده امن النعم... الله بيك اعلينه عم
چا شنو النربده
ماترد ابأي عذر ..لاهله يرجع باليسر
هذا ابو حميده
____________________

ياغريب الكوفه اجيتك معتني بهمومي
الحاجه يم غيرك احسها توگف ابّلعومي
ما امد الغيرك ايدي لو ابيع اهدومي
يلي تشبه جود حيدر عاين عله ارسومي

گاضي عمري بالدمع ..لابن عمك والضلع
والبقت وحيده
والمشت فوگ الجمر ..لاهله يرجع باليسر
هذا ابو حميده
____________________

سيدي ابدمعة حميده هالبقت ملهوفه
لاتشوف اوياها ابوها ولا حسين اتشوفه
ولا ابو فاضل شبگها امگطعات اچفوفه
امحلفك لخاطر جفنها واشكثر بي خوفه

كون تتوسط الي ..يم الحسين الولي
ايعدني من عبيده
گله يرجوك اشكثر..لاهله يرجع باليسر
هذا ابو حميده
____________________

ياسفير احزاني كلّش هالامر شاغلني
الليل يشهدلي السهرته واستمع كل وني
آنه غير حسين شملك ياهو اليعرفني
خاف اموت وماهو راضي عني وامزاعلني

مسلم ابدمعة هظم ..اطلب الموته ابلطم
هذا ما أريده
ابمجلسه اشمحله العمر ..لاهله يرجع باليسر
هذا ابو حميده
____________________

خل اعيش اسنيني خادم والملك ماريده
بس اريدن يمه أصبح محبس ابچف ايده
مسلم وهذا رجائي والطلب مازيده
وانت گضّاي الكلايف هاذي ماهي اجديده


سيدي وكلّي امل ..عني يرضه وانقبل ..
گلبي هذا عيده
وبعد لا عيد انتظر..لاهله يرجع باليسر
هذا ابو حميده
____________________

ابو فاطمة الطائي

الغديريه المباركه
نبارك لكم جميعا عيد الله الأكبر


عاجل .. مرسوم ديواني صدر من السمه
عاجل .. والي يصير اعله الخلگ حامي الحمه
الله يامحله الخبر .. ياشيعه
الله يامحله الخبر .. يا شيعه
_______________________


بثمنطعش ذي الحجه صار الولي تعيينه
أعلنها طه اعله الناس جمعهم اعله ايدينه
واگف على احداج النوگ ولازم علي ابچفينه
گال الذي يريد الدين هذا اليكمل دينه

حيدر .. مابيني وبينه ابد كل فاصله
حيدر .. الله من نور الجلاله امفصله
والأمر منه قد صدر .. ياشيعه
الله يامحله الخبر ...ياشيعه
_______________________

مؤتمر سوّاه للناس بيوم الغدير إعلانه
أمر الله هذا ومامور واجب علي تبيانه
النعمه ماتمت يوم لو لا علي وإحسانه
بافضاله يشهد جبريل وكل حرف من قرآنه

واضح .. تنصيب الله الحيدره مثل الشمس
واضح .. ماهي وراثه ولا تصح شورة همس
وبالدليل المعتبر .. ياشيعه
الله يامحله الخبر .. ياشيعه
_______________________

اتلوگ الولابه بس اله وامفصّله اعله ارسومه
التاج متعني وجاه. و ايبوس اباديه وهدومه
وخل يسمع العنده اشكال من عندي هل معلومه
حيدر امير اعله الكون گبل آدم وكل يومه

ثابت .. عيد الغدير اويه العرش نفس الصنع
ثابت .. آدم ونوح وكل نبي علگو شمع
كل نبي گلبه ابتشر .. ياشيعه
الله يامحله الخبر .. ياشيعه
______________________

بيعت علينه الكرار عيد الله يعني الأكبر
غصبا على هذا وذاك حيدر علينه اتأمر
للماقبل أحنه انگول شوف اصلك ليا منكر
رد لامك انشدها اعليك شوف انت من يا مصدر

دايم ..الينكر ولاية حيدره اباصله خلل
دايم .. والي يحبه طاهرا من الأزل
لله حمدا والشكر ...ياشيعه
الله يامحله الخبر ...ياشيعه
_______________________

للمرتضى الله اختار والبيعه نص رباني
اليوم أكملت الدين نص ثابت ابقرآني
الله اليوصيني اعليه وعله العشگ رباني
چا شلي باوّل معتوٌه ايوصي ابغدر للثاني

رابع .. هذا يامجنون عدهم اربعه
رابع .. علي وغير مابشر الله ارفعه
والبقو كلهم حدر .. ياشيعه
الله يامحله الخبر ..يا شيعه
_______________________

ياسيدي وجينه اليوم انبايعك وانهنّي
وجبنالك انواع اورود بسمك عشگ ونغني
مبروك حيدر مبروك ي الحبك امجننّي
بس انت اريدك محبوب خل ترحل الكل عني

امبارك .. تستاهل اعيوني هديه ياعلي
امبارك .. فدوه يروحولك عمامي وكل هلي
فدوه الك كل البشر .. ياشيعه
الله يامحله الخبر .... ياشيعه
_______________________

ابو فاطمة الطائي

ابوذيات غديريه

گلب البي علي لاتضن .... بي عاه (( عاهه ))
رابح ما خسر فد يوم .... بيعاه
العلي بالسمه هذا اليوم ... بيعه
وانه امبايعه بثنين اديه .......

يسوم الغالي مثلك فلا ....... مر سوم
علي ونورك ابساگ العرش .. مرسوم
الك من الله هذا صدر .......مرسوم
يگول انت الولي الهاي البريه .....

توم الهادي وي حيدر ..... اخن بخ
عطور اتگول عالدنيا ب... خن بخ
علي ومن يوم گالولك ... بخن بخ
ولهسه الروح فرحانه وزهيه ....

أنه الماخذت فرحه بيوم .. مو لاي
عدل وياك يمشي الگلب .. مو لاي
شريد من الله وانت الصرت ...مولاي
ياهو المثلي حيدر تاج إليه ....

ماهمني اليگول الضيم .... شو رآه
ولو هالروح تلطم لطم .......شورآه
اليهمني الگال هذا الأمر ... شوراه
ولك ياشورى يم حامي الحميه...

ابو فاطمة الطائي

هوسات للغديريه

موش ابنادم العلاك الله الصعّدك عالي
بس انت التلوگ عليك تغدي اعله الخلگ والي
مجنون اليگول اعليك رابع انت ي الغالي

ها الاول انت الاول
غصبا ع الكل ياكرار
_______________________

من دون البشر مولاي انت التاج يحلالك
علي انت العشگ ونروح فدوه الشوفت اخيالك
البيهم ياعلي قاسوك ما يسوون لنعالك

انت الحاكم انت
شنهو فلان وشنهو فلان

_______________________

مدري العيد بالبيعه مدري انت يحيدر عيد
عيدين وصفن فد يوم من الله بعد شنريد
اتبايع عدنه هاي انحور موش انبايعك بالايد

مبارك ليك امبارك
ياكرار اعليك التاج
_______________________

بيك انت كمال الدين واتمام النعم كلها
بيك انت رضا الرحمن اول انت وآخرها
والمايعجبها هذا القول خلها وي الحقد خلها

باچر يم النار اتفرفح
كلها ادخيلك يابو حسين

_______________________

بيان من السمه صادر كلش هام مضمونه
بلّغ يامحمّد بيّه وفنّ الّي يرفضونه
الوادم كلها كون اليوم حيدر علي ايوالونه

القائد هو القائد
وهاي الوادم بس خدام
_______________________

ابو فاطمة الطائي

فتحة عزاء الليله السابعه

اضل طول العمر انصب عزيه
حسينا وا حسينا وا حسيناه
_______________________

المصاب الليله هد حيلي ..وعظماي
يروحي ابونتچ زيدي ...وعظماي
واعض ماشفت گبله ...وعض ماي
يگله الجنه يم خيمة رقيه..
حسينا وا حسينا وا حسيناه
_______________________

حزن يعگوب روحي ما..كفلها
لزينب لمن امضيعه ال ..كفلها
كف طايح عله الشاطي ..كف الها
يودع من بعد حين المنيه
حسينا وا حسينا وا حسيناه
_______________________

ابمدامعنه انتوضه ...وانتجدد
وشما اسمع مصابه .ونتي جدد
يجفني للگمر هل ...وانت جدد
دموعك للترك زينب سبيه
_______________________

يريت ادموعي من لطمي ..اخلها
وتموت الروح لو بيدي ... اخلها
لمصاب الفاجده بالطف ...اخ لها
غدت تنحب عليه ابكل مسيه
حسينا وا حسينا وا حسيناه
_______________________

تگله والدمع بيها ...ترس واد
متني من كثرهم طگهم..تره اسود
ابدليلي للمنيه أصبح ...ترس ود
ابغيابك لچن شو شحت عليه
حسينا وا حسينا وا حسيناه
_______________________

ابو فاطمه الطائي

الليله السابعه
ابا الفضل
القصيده الاولى

بالليل اجيتك يالگمر وبگلبي اعتاب
ماناوي ترجعلي صدگ ؟؟ريحني بجواب
يالماخذ الصبر .....ما احمل الهجر
_____________________

من المخيم للنهر..متعنيه مكسورة ظهر ..كل خطوه صارتلي شهر..
واسحل بلجدام

اگعدلي يابعد النفس ..خافن يفگدوني الحرس ..من سوطهم متني انترس
ما احمل الام

معقوله انت لو وهم ..چا وين چفك والعلم ..شمسوي بيك انت السهم
بعيونك ينام

عباس حيلي انتهى لمن شفت هامتك
الله واكبر يخي بيه اشعلت حاطمه
تتركني ماحسبت واتمدد اعله النهر
نايم يطول الحلو واعيوني ما نايمه

المن اسولف بعد ياملحة الدار
اگعدلي ساعة عتب بردلي النار
واتهنه بالگبر ....ما احمل الهجر
______________________

ماشوف اجيت من الالم... اعيوني حمره وچنها دم ..بيها رماد من الخيم ..
ما وچدك زين

ليل وضلام ابلا ضوه..راسك وجسمك مو سوه ..ع الريحه دلالي هوه..
ثاريها چفين

ع الگاع چفك واصبعه..يأشر لي صوب المشرعه. اهناك اخوج ومصرعه
لو ردتي تلگين

شبّعني چفك بچي ذكّرني ابغيرتك
ذكّرني لمن چنت بوجودك امدلله
والحال هسا صبح ازرگ يخويه المتن
والشمر حارس علي يتناوب وحرمله

راووني انجوم الضهر ياكافلي الناس
واكثر هظمني الي نشد چا وينه عباس

ما يطفي الجمر ...ما احمل الهجر
______________________

ياغيرة الله اعله الارض ..ردتك إليه تنتهض .وتشوفهم طول بعرض ..گامو يفزعون

واحد الواحدبشره ..ايگله سبع الگنطره..الهامه منه مطشره ..لا لا تخافون
للخيمه چفتتني الغرب ..بين الشتم بين الضرب ..واعيوني مضيعه الدرب ..گدما يضربون


الچانت الحد امس ماشافت خيال الي
متجمعه اعله الدرب واتعاين لحالتي
الفلسين ماتنشره اعليه اتامّر غدت
حيل افرحو ياگمر لمن جرت دمعتي

السوط مهما ثگل ياكافلي يهون
اليوجعني خويه أشد نظرات العيون
ياذيني هالامر ...ما احمل هجر
______________________

ليل واحسّن بالخطر ..وياك اسولف مختصر..من بعد جيتك للنهر ..شفت العجايب

ابضهريه ليل الله نزل ..الضوه وافاه الأجل ..كلشي اشوفنّه اشتعل ..نار ومصايب

دخان كلها غيمت ..وامتون طفله ورمت ..للموت چنها سلمت ..فوگ الترايب

وياي اريدك ترد ياكافلي للحرم
وحده اعله وحده طبگ امچتفات بحبل
يتباچن أمن الوجع ومن الجره ابكربله
وحده تون للولد وحده تون للطفل

رمله شمعها ماطفه تنعه يجسام
وعبدالله امه اموهدنه ماتقبل تنام
بگماطه تفر ...ما احمل هجر
______________________

والدي حماي الحمه..وتفاحه امي من السمه..تاليها اديه امورمه ..من عت الحبال

عباس شحچيلك هظم..السوط واصل للعظم ..للغيض ماينفع كظم ..الحگ يكفال

ماترضه لو مسني الهوه ..بالضلمه تصبحلي ضوه ..دگعد وشاهد نينوه ..شمسويه بالحال

آنه الاميره چنت وأملاك إليه خدم
وجبريل هم يستحي لو راد بيتي يطب
تاليها شوف الدهر ياخويه بيه اشعمل
امشي بيسر وانسبي والي سبوني الغرب

ياريت موتي يحل واتوسد اتراب
ولا امشي خطوه بيسر واخواني غياب
واعيوني تدر ..ما احمل هجر
______________________

ابشيبة امك يانفل ..يل ماكو مثلك من كفل .للعجده بس انت تفل .. ياصاحب الماي

من الله مرفوع الرتب..ادريك تستاهل عتب ..واحچيلك اش الله كتب . عندي حچي هواي

عاتبتك وگلبي برد ..اوراح اودعك للابد ..بلرايح لواحد أحد ..وأنه بلا راي

سلم عله امي وعلي وگللهم المعذره
اجدام زينب تره مشوهن اعله الجمر
گللهم الليل كلف لمن وحيده المره
گللهم بلا اهل لا طارش الي يمر

مسك الختام لحيدره بلغ تحيات
لاهيه عدله وتضل لاهي من الأموات
گله اشتنتظر ....ما احمل هجر

______________________

ابو فاطمة الطائي

الليله السابعه
ابا الفضل
القصيده الثانيه

ياشمس انزلي .. زينب ابلا ولي
سندها .. تندها .. ردلي ياكافلي
_______________________

ياشمس زينب بقت بلطف وحدها
حسره تأخذها اوألف حسره تردها
طايح اعله الشط گمر چاين سندها
اتعاين الطوله وجرت دمعه اعله خدها

صدت اعله النهر . . يلكسرت الضهر
يمبعد .. علي رد . غيرك آنه اش ألي
_______________________

عانت اهواي الغريبه منچ اهموم
ياشمس حرچ حرگ من عدها الرسوم
وابضواچ اعليها صارت تنظر الگوم
اتصيح وين الليل ريته يلفي ويدوم

ربي ليلك ستر . . بالضلام انستر
ذبحني .جرحني . الي ينظر علي
_______________________

حايره بس تدعي ربها وصارت اتنوح
اتگله اريد الليل يلفي يخفي لجروح
روحي يم عباس ربي رادت اتروح
بلكي من يعرفني اجيته بي ترد روح

عندي ويّا عتب . . ارد اگله اشعجب
عفتني .. اعله متني . السياط اتغلي
_______________________.
افتح عيونك ينايم ردلي وشوف
تدري بيه اشصار تدري اشگد شفت خوف
تدري چم مره اعله نحري خلو اسيوف
وآنه حرمه ابلايه والي ابطرگ الچفوف

والچفوف انچون .. . بلسياط التون
ينايم .. شتايم ..عله امي اوعلي
_______________________

عله اخيتك يابوفاضل فكّ العيون
شوفني ابيا حال اجيتك شوف المتون
تدري من بعدك يكافل حالي اشلون
زاد عمري ابنص نهار اسنين وقرون

خويه حته الطفل .. . صار چنه كهل
مصايب .. نوايب .. هدمت منزلي
_______________________

يا ابو الغيره لحگتك واطلب الرأي
آنه بلله اشلون بيه وياهو وياي
يعني ترضه الشمر يبقه رايح اوجاي
وآنه اروح اميسره ومرافگه اعداي

تقبل آنه اطب . . أب دواوين غرب
اذيه .. سبيه. .رايحه ابلا ولي
_______________________


ابو فاطمة الطائي

فتحة عزاء الليله الثامنه

اضل طول العمر انصب عزيه
حسينا وا حسينا وا حسيناه
_______________________

الليالي بالمصايب ...جاسمني
وجفني النوم ابدما ..جاسه مني
ثامن ليله اون ول ...جاسم اني
عريس اويزفوه للمنيه
حسينا وا حسينا وا حسيناه
_______________________

متحني ابتراب الطف ..ورمله
ويم رأسه اگعدن زينب ..ورمله
بچن حدما جفنهن قد...ورم له
وابيض غده من عظم الرزيه ...
حسينا وا حسينا وا حسيناه
_______________________

ضهري انكسر راسي ..شاب إليه
عمري المنذبح مو ...شاب إليه
مصابه ابروحي جمره ...شاب إليه
وحرگ كلشي ابكياني ابهالمسيه
حسينا وا حسينا وا حسيناه
_______________________

ردت بيديه ازفنه ..واحني
راح اوزود الوني ...وحني
اخذ عمري ونظر عيني..واحني
وصفيت ابلا ذخر وبلا تچيه
حسينا وا حسينا وا حسيناه
_______________________

ذابل من عطش غصنه ...وعوده
وليدي اليوفي لو واعد .وعوده
يربي ارجوك الي رده ...وعوده
وأخذ عمري ابداله وحن عليه
حسينا وا حسينا وا حسيناه
_______________________

ابو فاطمه الطائي

الليله الثامنه
القاسم عليه السلام
القصيده الاولى


قل اعوذ برب الناس
من شر اعيون الارجاس
حنه وزفه وشمعه وياس اعليهن خاف يحسدونه
_______________________

ياجاسم يمه اعله اعيونك صلّه الباري وما احلاهن
بيهن عشت آمال اسنيني سبحان الرب السواهن
لو فرحن ياگاع اتلمني فرحان اشعر كلشي وياهن
ولو بعيونك الگه الدمعه اعيوني ماتن الگاهن

يانبضة گلبي الحيران
نايم ليش اعله التربان
چا وين ارسوم العرسان .حته الحنه اتغير لونه
_______________________

ماحسبت احساب افراگك ياغصن امخضر بسنيني
حضرت العرسك صينيه احرسها كل يوم ابعيني
احجاب اعليها أو تعويذه خافن هالناس ابحسدوني
ياجاسم يلطولك هيبه تاليها اعليك ايواسوني

ايگلولي اوليدچ شو نام
الله يعوضج يم جسام
مكتوب الگلبچ ينضام والدمعه ابعينچ مرهونه
_______________________

يمه اگعدلي وخل نسولف يلعايفني وجفنك غافي
نايم ع التربان اعليمن چا حضنك ماهو دافي
اشگد هزيت ابمهدك تذكر ماتن من الهز اچتافي
حاسبتك ذخر لايامي چا يمته تردلي وتوافي

اگعد يمه وشوف الحال
مسبيه امشي ويه الچتال
اعجيّز مچتوفه وبحبال . والراسك بس تربي اعيوني
_______________________

ياصوغة ربي من الجنه يامن چنت الجسمي الروح
چنت احسب عرسك بي افرح وبالحنه الريحان ايفوح
ليش آنه اوليدي اوعافيتي ايزفونه الوادم مذبوح
والحنه المن يابعد امك وچفوفك متروسه اجروح

اگعد يمه وشوف اشلون
ملتمين الي يزفون
چا ربعك شنهو ايهوسون .مو گتلي ربعي ايزفوني
_______________________

يايوسف روحي العاشگتك ياحلم المابي تفسير
لا غايب واترجاه يرجع لاهو الطايح وسط البير
يوسف روحي امطبر حسنه ومطبرين اعضاه تطبير
عميت عيني اعليك وليدي عطشان وهيج انت اتصير

الخياله اعليك تدور
وضهر احسين أصبح مكسور
يا اكلف طعنه ابعاشور . رادو لحسين ايطعنونه
_______________________

اوف اشسوت بيه الدنيا ياجاسم يمه انشل حيلي
لحسين انت امضحي اسنينك هنيالك آنه اظلم ليلي
لاماخذني وياك أو اخلص ولا انت الباقي اتباريلي
آنه وعمتك بس ضلينه ابچي اعليها ودم تبچيلي

ياجاسم يمه الله اوياك
امحالل ماهوب إرباك
سلملي عله الزهره هناك . وگللها لحسين اخذوني
_______________________

ابو فاطمة الطائي

الليله الثامنه
القاسم عليه السلام
القصيده الثانيه


رمله الجسام اتعاين
من واگف وسط الحومه
اتهلّهله وتجري العين . چن فرحانه ومهضومه
_______________________

ياقرة عين الزهراء ياروح السبط المسموم
اموصيني ابوك اعليك رادك ذخر لهذا اليوم
گال ابعاشور اتودّيه گبل احسين ايفيض دموم
وعمك هذا اوحيّد صار سل سيفك دون المظلوم

روح العمك يوليدي
وياك امشي لو بيدي
گلب امك يصبح نصين . تغلي ابنارين دمومه

_______________________

گلب امك أصبح محتار ومتيه مايدري الرأي
مرات انظرلك مغوار ارفع راسي ابعلو اسماي
ومرات انظرلك عريس محروم ويتعاله ابچاي
مدري افرح مدري ابچي اعليك مدري انشدلك عن چف ماي

وعيونك صرت ابحيره
موقف يصعب تفسيره
وين امشي ياجاسم وين . وآنه الثكله اوملچومه
_______________________

مدري ابصينيتك احتار مدري ابسيف ودرعه وطاس
شاب انت وچنك ريحان وماترحم يايمه الناس
اتبسّم ليها وگال اليوم مو يوم افراح و اعراس
انطيني السيف وشوفي اليوم راح افعل فعل العباس

ذاك احسين ابلا ناصر
عطشان ويكسر خاطر
وين الگاله الماي الحين . وآنه اليابس زردومه
_______________________

انطيني السيف وشوفي اليوم ارفع راسچ بالميدان
كون اسگيهم بيدي الموت آنه ابنچ وين الفرسان
قست الحومه وكل الجيش شسع انعالي اكبر چان
ماهمني الموت اوهميت من شفت احسيني عطشان

شوفي مفطوره اشفافه
ومتغير حيل اوصافه
والتمت ضده الصوبين . والنار أضحت مضرومه
_______________________

اتگله امودع بالله وروح ياروح امك ياجسام
هذا اعله امك جن مكتوب كون اسهر ليل ومانام
مكتوب اعليه افرح بيك يوليدي بس بالاحلام
وشمعاتك والحنه وياس تتفرهد بيد الظلام

يمه اقسملك بالمعبود
كل عمري أصبح فرهود
والحال أصبح لاموزين . گلبي الخايف لتلومه
_______________________

في مان الله گلها وراح يايمه ولو صار الصار
لو جابو نعشي وشفتيه متوذر جسمي وطشار
ابهلهوله اتلگيني ارجوچ حسبيني جايج خطار
اوّي عمتي ضلي ابكل حال بيها لوذي من الأخطار

هيه العباس الثاني
تتكفلكم واتعاني
لو مچتوفات الچفين ..ومن الراحه محرومه
_______________________


ابو فاطمة الطائي

فتحة عزاء الليله التاسعه
الاكبر صلوات ربي عليه

اضل طول العمر انصب عزيه
حسينا وا حسينا وا حسيناه

فتحة عزاء الليله التاسعه

اضل طول العمر انصب عزيه
حسينا وا حسينا وا حسيناه
______________________

يفاطم سجلي هذا الليل ... تسعه
وعيوني للدمع ماعاد ..... تسعه
للاكبر روحي بالحسرات... تسعه
شبيه المصطفى فوگ الوطيه
حسينا وا حسينا وا حسيناه
______________________

ازغار الشيعه تبچيله ...والكبار
الجلال انحنه يم اسمه ..والإكبار
شبيه الهادي يتسمه ...الأكبر
ابجمال اعيونه متكحله الثريه
حسينا وا حسينا وا حسيناه
______________________

دليلي اينوح بنهاره... وليلاه
ابمصابه الي الونه ..والي الآه
اويلي شلون.هالليله ... وليلاه
تودع للولد سوده عليه
حسينا وا حسينا وا حسيناه
______________________

الدمع مافرّج الشده ...ولا حل
صبر ماعندي يايمه ...ولا حيل
يريت الليل ما چلچل ...ولا حل
عليه . والنفس لازال بيه
______________________

الدهر ليّه المصايب دوم .. يبناي
وزماني اعله الطفوف اليوم .. يبناي
كلشي انه حسبته احساب ... يبني
لچن ماحسبت دفنك بديه
حسينا وا حسينا وا حسيناه
______________________

ابو فاطمه الطائي

الليله التاسعه
الاكبر صلوات ربي عليه
القصيده الاولى


يمفارگني وضليت اسهر
من اذكر وجهك اتذكّر
انا اعطيناك الكوثر . يمه الأكبر . يمه الأكبر
_______________________

ما انسه اوداعك لو لحظه عايش بالوجدان
كل ليله اتصوّر هالموقف لمّن بالميدان
چبد احسين اوچبدك يمه مشتعله ابنيران
يبچي اعليك وتبچيله انت وبچيتو القرآن

انحب ودموعي دم احمر
يمه اشلون اتروح امطبر
اوجهك بالتربان اتعفر . يمه الأكبر . يمه الأكبر
_______________________

من گد ما عطشان وذابل بعيونك متشوف
اشفافك يبست وآنه اگليبي يابس من الخوف
نازل للحومه وتنتظرك يمه آلاف اسيوف
وي كل خطوه التبعد عني ارفع ل الله اچفوف

يارب ارحم يارب استر
وليدي افديه ابدم المنحر
يبعد عني لا ما اگدر . يمه الأكبر . يمه الأكبر
_______________________

بالميدان انت وما اعرف يمك شنهو الصار
اسمع ضجه ومن يمي اوگع واصرخ ياستار
وانظر وجه احسين اوانشد ماعندك اخبار
ايگلي ادعيله اوليدچ يمكن مايرجع للدار

ضل ايحوم احسين ويفتر
مخطوف ولونه أصبح اصفر
وانه اعله الموقف اتفكر . يمه الأكبر . يمه الأكبر
_______________________

شفت احسين اويفرك بيده ويصفج راح ابراح
ياليله اوليدچ بالحومه اتوذر چنه اوطاح
اعروگ اگليبي گطعهن ماضل بي سباح
حته الطير الطاير ينحب لجلي ون وناح

گلب احسين اعله ابنه اتوجر
ليفوگ ايصد واعيونه اتخر
يارب اشهد گلبي اتفسر . يمه الأكبر . يمه الأكبر
_______________________

يارب انت اعليهم شاهد ضل ينحب وايگول
من غير الأكبر بالدنيا يشبه للمرسول
چنه الهادي فوگ الغبره متوذر مچتول
وجاب اوليده يم الخيمه ياويلي محمول

اتمدد وياه ويتحسر
ايشم اخدوده ايشم المنحر
استرجع كبّر واستغفر . يمه الأكبر . يمه الأكبر
_______________________

يمه الأكبر بس فك عينك رد اعليه اجواب
ياجرح امخليك امفرفح دليني اعله اصواب
بالشيله اجروحك اضمدها وامسحن بحجاب
يمه اگعد خافن يسبوني ويضربوني اجناب

چنك والصبح اذا أسفر
امك مسبيه ويه الابتر
اگعد اگعد ها يمشكر . يمه الأكبر . يمه الأكبر
_______________________


ابو فاطمة الطائي

الليله التاسعه
الاكبر صلوات ربي عليه
القصيده الثانيه


آخ اشلون اوداع ... ونّت منّه الگاع
اوداع احسين ويه الأكبر
ورّث جمره ابليلى وتسعر
آخ اشلون اوداع..........
_______________________

اوداع احسين ويه وليده تخشع منّه اجبال
جسم ايودع روح أتصور يعني اشلون الحال
اموادع بس نضرات ودمعه والدمعات اثگال
احسين ايشم نحر اوليده بس مشدوه البال

ترجف كل اعضاه ... آ يالاكبر آه
تدري اگليبي اعليك اتفطر
واعله افراگك لا ما اگدر
آخ اشلون اوداع ........
_______________________

امشابگ طاحو فوگ الغبره بچّوها الاملاك
من ترحل عني يوليدي ميت يعني وياك
ياگطعة چبدي العطشانه يالذبلانه اشفاك
انسه الروح وانسه انفاسي ما اگدر انساك

يبني اشلون الراي ... وين الگالك ماي
مثلك عطشان آنه واكثر
والشط بيني وبينه العسكر
آخ اشلون اوداع ..........
_______________________

ايگله اطلب من عندك رخصه انزل للميدان
يسعر گلبي مثل الجمره وشيطفي النيران
ديني انت ولازم عن ديني اتقدم قربان
عطشان السيف وخل يروي من روس العدوان

بس گلي مرخوص ... ارد احصد هالروس
بيميني آنه الموت الاحمر
شوف اشلون انزل اتبختر
آخ اشلون اوداع ..........
_______________________

محروس ابعين الله ايگله اتقدم يبني وروح
بس مر اعله امك ودعها تنتظرك وتنوح
كل خطوه انت التبعد عنها تترك بيها اجروح
وكل شهگة حسره اعله افراگك تطلع منها الروح

امك بيها شلون ... ماضل عدها اعيون
من خيمه الخيمه اتضل تفتر
تلهج بسمك كلسه وتعثر
آخ اشلون اوداع .........
_______________________

مر الخيمة امه الأكبر ناداها بإحساس
يامن تحت اجدامج حنه يا اطيب انفاس
اوليدچ آنه وتدريني بالطف رفعة راس
ودعيني ومرفوعة هامه خل تنظر هالناس

انهد منها الحيل ... صاحت ويلي اويل
يمه اعليك اشلون اتصبر
يمه افديلك هذا المنحر
آخ اشلون اوداع .......
_______________________

ودعها وطالع للحومه چن جدّه الكرار
موت وبيهم صاعد نازل خلاهم طشار
لاكن بسهام انهد حيله وبضربة غدار
طاح الأكبر كلهم صاحو وانتشرت اخبار

من فوگ التربان ... سلم ع العطشان
ولن احسين ابدمه اتعفر
استرجع ربه بدمعه وكبر
آخ اشلون اوداع ........
_______________________

ابو فاطمة الطائي

فتحة عزاء الليله العاشره

اضل طول العمر انصب عزيه
حسينا وا حسينا وا حسيناه
______________________

مثل زينب اريد انحب . واناوين
تگله چنكم اعزمتو ....وناوين
اموادع . للمنيه انتم ...ونا وين
انطي الوجه المن يا شفيه
حسينا وا حسينا وا حسيناه
______________________

أمن اودعكم بعد ياعيش ... يمره
وعندي بالصدر مو گلب ... يمره
يريت الموت عمري ايكون... يمره
تگله واندفن بالغاضريه ....
حسينا وا حسينا وا حسيناه
______________________

يمن لوصافك الحلوه ....هوه الله
وداعي وياك لو اودع ...هوه الله
اختنگت ابغيبتك يشهد ...هو الله
واجر النفس چني من الثريه
حسينا وا حسينا وا حسيناه
______________________

الدمع هليله ويه الجفن ... عاشر
وأحس ابروحي تطلع يوم .. عاشر
يخويه امنين اجاني منين ..عاشور
وعلي ماخله ابد كل حيل بيه
حسينا وا حسينا وا حسيناه
______________________

الدهر غير الهظم ليه ... شيبني ؟
وداع حسين والكافل .... شيبني
يروحي لكربله بلا .... شيبني
ذبحني العاشر وما خله بيه
حسينا وا حسينا وا حسيناه
______________________

ابو فاطمه الطائي

الليلة العاشرة
عبدالله الرضيع
القصيده الاولى


يعبدالله يبني الارض ضأگت عليه
بآچر اخافن تروح انت امن اديه
بآچر وين اضمك ... ياشريان امك
يعبدالله يبني ...يعبدالله يبني
_______________________

هسه هاي اشلون ليله بيها ما اعرف شجاني
چتها آخر ليله هاذي چنه متحزم زماني
اعيوني بس اتشوف لوعه واحد ايودعله ثاني
وآنه يمه حيلي يرجف ماعفت مهدك ثواني

عيوني اعله مهدك وادورلي چاره
انومك . اگعد العگل تيه قراره
مدري ابحضني المك . ياشريان امك
يعبدالله يبني .. يعبدالله يبني
_______________________

يمه نام اوبالعوافي راح اضل يمك اساهر
ولاتفز امنين ارضعك يابسه حته المحاجر
خل احسب وين اضمك لو طلع مصباح باچر
بالمخيم خاف تجفل لو عله صوت الخوافر

اوديك للحسين اخاف اتذبحه اميه
اعله زينب اوديك خطر يمها واذيه
خاف ايسيل دمك .. ياشريان امك
يعبدالله يبني ... يعبدالله يبني
_______________________

نام يمه آنه ازهك نام يوليدي ابعوافي
راح الوليلك نعاوي يمه فدوه اشلون غافي
شاب راسي وآنه افكر باللحد ماضنه دافي
خاف مني اتروح ضامي ويجري يمك ماي صافي

يعبدالله نحرك سهم ماضنه يحمل
ياربي سترك افراگ اوليدي يكتل
يحني اضلوعي همك .. ياشريان امك
يعبدالله يبني .. يعبدالله يبني
_______________________

كلسه راي ايصير عندي ومره اضل ماعندي راي
مره اگولن انخه عمك بلكن ايدبرلي ماي
ومره احسب للشريعه اركض اوانته معاي
ولوسهم شفته اعتنالك أنه اضمنًك وراي

يعبدالله تذبح الخواطر هالمسيه
امنين اجتني رزيه ابسد رزيه
محله الموته يمك ... ياشريان امك
يعبدالله يبني .. يعبدالله يبني
_______________________

ليلي يطول يمه ريته وكون لا يطلع صباحه
احسين اشوفه ايودع أهله ابخيمة الحره مناحه
بذني اسمعها تگله خويه احچيلي الصراحه
باچر اتردلي واشوفك لو بعد ما النه راحه

واسمع يگلها حرب بالغاضريه
ولامنها يسلم رضيعي وهاي هيه
ييمه اشلون اسلمك . ياشريان امك
يعبدالله يبني .. يعبدالله يبني
_______________________

من سمعته گلبي أيس شيبت لمن سمعته
مره انظر وجهك انت مره اصد لحسين سكته
شاف حالي واعتنالك وباسك وخرت دمعته
يارباب ايعينچ الله باچر اوليدج دفنته

عبدالله شحچي متت لو صح بديه
معقوله هاذي الك آخر مسيه
يالمني اليألمك .. ياشريان امك
يعبدالله يبني .. يعبدالله يبني
_______________________


ابو فاطمة الطائي

الليلة العاشرة
الوداع
القصيده الثانيه
على لحن قصيدة(( يازمن وين الاحباب )) للحاج باسم الكربلائي

ابليلة الصار الوداع
زينب انترست أوجاع
منها كل العمر ضاع
_______________________

ليلة اوداع الهواشم هالمسيه
منظر ايبچي الصخر بالغاضريه
لمن التمو سوه ويه الهاشمية
حارت اشتحچي ومدامعها جريه

يالاعز امن العيون
عني باچر ترحلون
جروحي اعليكم اوساع
منها كل العمر ضاع
_______________________

اتعاين اعله احسين وابخدينه دمعه
صارت اتلم الحچي گوه اوتجمعه
اتگله شحچي وعمري ذايب شمعه شمعه
ريت عمري ابهالمسيه كون اودعه

كربلا اجتني امنين
گطعت گلبي نصين
والهجر يفطر الگاع
منها كل العمر ضاع
_______________________

ايگلها يانبظة دليلي اوشوف العيون
دين جدي المصطفى ابشرياني مرهون
آنه لو ماموت يرجع دين فرعون
ولا يذكرونه المحمد لا يأذنون

يندثر دين الاسلام
وينتشر دين الأصنام
وتحكم الوادم اضباع
منها كل العمر ضاع
_______________________

اتگله روح اوداعة الله . الله وياك
آنه ادري بدين جدي خويه بحماك
بس تعال اقنعلي گلبي اشلون ينساك
شلون افهم عيني تنسى ابليل طرواك

انت مو واحد اوياي
انت واحد من اعضاي
للگلب نفس الطباع
منها كل العمر ضاع
_______________________

صدت الكتر الگمر واتهل العيون
اتگله خويه اشراح اسوي من ترحلون
خايفه امن اسياطهم تمردلي المتون
شلون لو بالزهره ياخويه يشتمون

ياگمر انظر اوشوف
بيه شمسوي الخوف
ينتحب گلبي اولاع
منها كل العمر ضاع
_______________________

ياعزيزة الله ارحمي گلبي ايفور
حيل ماعندي ايحمل دمعات الخدور
آنه كلي الكربله يالحره منذور
لازم اتشوفين علشط راسي مطبور

ع الرمح راسي اوياچ
يبچي لو يسمع ابچاچ
يلحزن گلبچ اشراع
منها كل العمر ضاع
_______________________

آنه گتلك خايفه لتگول مدري
مالي غيرك ياعمد صيوان خدري
اشلون اروح اميسره محتاره بمري
آنه اطب ديوان خويه بتالي عمري

اتاشر اعليه هالناس
هاذي كافلها عباس
منعرف باجمل اطباع
منها كل العمر ضاع
_______________________

ابو فاطمة الطائي