ساخلادیم بیر عؤمور سینه‌م‌ده دردی
سایسان نیسگیللریم دونیا قدردی
دئییرلر بو دونیا گلدی گئدردی
هیجرانلا اوز- اوزه قالان من اولدوم

شئه‌لی بنؤشه‌نی دسته باغلادیم
سنی گلن‌لردن هئی سوراغلادیم
قاییتمادین اوره‌ییمده آغلادیم
دسته گول الینده سولان من اولدوم

حسرتله گئجه‌نی ائیله‌دیم سحر
گؤزله‌دیم یاتمادیم دئدیم یار گلر
اینتیظار اؤلومدن، بتردیر بتر
جانیمی اودلارا سالان من اولدوم

سنی خاطیرلاییب داریخدیم یامان
چکیرم دردینی من زامان زامان
سارالیب سولموشام حسرتدن اینان
عؤمرومون باغچاسی تالان من اولدوم

باهاردیر بورونوب شئه‌له چمن‌لر
بیرلشدی باهارلا بوتون سئوه‌ن‌لر
بیرجه سن یوباندین گلدی گئدن‌لر
عطرینی گوللردن آلان من اولدوم

#حسن_معرفت

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر اؤلوم بورجوم وار یارادانیما
نئچه یۆز مین دیلک، آلاجاغیم وار
نه آلیر بورجونو، نه بورجون وئریر
بللی دیر، آسیلی قالاجاغیم وار

تانریمین گرک‌دیر اۆزو آغ اولسون
گۆنلرین قاراسین دوْنوما بیچیب
آجیلار-چیله‌لر اولوب قنیمیم
آسیلیب یاخامدان قانیمی ایچیب

سارالیب وارلیغیم، سولوب منلیگیم
اوخشاییر ساچیمی پاییز اللری
اؤزومده دوستاغام، اؤزومه اوگئی
گؤز آچیب دنیایا گلندن بری...

#فرزین_نقی‌یان

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

عوض ائله فصیل‌لردن بیرینی،
ایلده بیرجه دفعه سن ده قاییت گل!
باهار اول، پاییز اول، نه اولورسان اول،
ایلده بیرجه دفعه سن ده قاییت گل!

قوربانام سنینله قیش گلن گونه،
قار، یاغیش عؤمرومه خوش گلن گونه.
قوشول یاشیم اوسته یاش گلن گونه،
ایلده بیرجه دفعه سن ده قاییت گل!

یئنه ده بیر داغین اتک یئرینده،
سنی گؤزله‌ییرم چیچک یئرینده.
گیزلن بیر چیچه‌یین لچک یئرینده،
ایلده بیرجه دفعه سن ده قاییت گل!

دردینی سینه‌مده بیتیرن گون‌تک،
سنی گؤزلریمدن ایتیرن گون‌تک،
ائله گئدیشینی گتیرن گون‌تک،
ایلده بیرجه دفعه سن ده قاییت گل!

قاییت کی، عؤمرومده توی بایرام اولسون،
گلدییین او هفته، آی بایرام اولسون،
منه ده بیر دفعه قوی بایرام اولسون،
ایلده بیرجه دفعه سن ده قاییت گل!

«والئه»ام، گئتدییین فصیل ده گلیر،
دونیایا بیر یئنی نسیل ده گلیر،
وطنسیز عؤمرومه بیر ایل ده گلیر،
ایلده بیرجه دفعه سن ده قاییت گل!...

#والئه_قوجا

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سونرا چوخ شئيه اينانديم،
قازانداكى قوزو كيمى
سونرا کؤتويه جن يانديم
بير فحله  پاپريزى كيمى

سونرا سنين يئرين گلدى،
آجى گلدى شيرين گلدى
توى گئجه سى اؤزون آسان
قونشونون  لال قيزی كيمى

سونرا توختارسان دئديلر
ياراما دوز دؤشه-ديلر
دوز نه دوز يازيق اورمونون،
ياراسينين دوزو كيمى

سونرا درديم سورالاندى،
كلمه-كلمه ديليم ياندى
ياندى تبريزين باكى سي،
باكی نين تبريزى كيمى

سونرا دا من شاعير اولدوم
دَن-دَن ساققاليمى يولدوم
سؤزوم هايدا-كويده ايتدى
دَييرمان خوروزو كيمى

#نادر_الهى

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

نه‌لر اثبات ائتدی بو حیات منه
سئون سئودیینی اونودا...گؤردوم
بیر سنی ایتیرمک قورخوسو واردی
اونودا یاشادیم، اونودا گؤردوم

دردیمی توپلاسام قالانار بیر داغ
روح چیخیر بدن‌دن قالدیرا بیلمیر
شعرده واراغی دولدورور آنجاق
اورک بوشلوغونو دولدورا بیلمیر

عاغیلسیز دییلم، دلی دییلم
عاغلیم سن‌ده قالیب، سنین‌له گئدیب
ساچینین تئلین‌دن آسیلیب قالیب
بۆتون خیاللاریم انتحار ائدیب

قازاندین سونون‌دا تبریک ائدیرم
ایندی باده قالدیر اؤز شرفینه
من ایسه فکریمی توپلویوم بیرآز
داغیلیب اوتاغین هر طرفینه...

#میرشن_عزیزاو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

قاییت اوشاقلیغیم قاییت بیر آنلیق،
ایتن گونلریمی تاپماق ایسته‌رم
مینیم آخشام اوستو قارغی آتیما
یول‌لاردان،یول‌لارا چاپماق ایسته‌رم

قاییت اوشاقلیغیم قاییت بیر آنلیق
یئریییب، ییخیلیب، قاچماق ایسته‌رم
سحرلر چیینیم‌ده  مکتب چانتاسی
صینیف اوتاغینی آچماق ایسته‌رم

قاییت اوشاقلیغیم قاییت بیر آنلیق
من سنی باغریما باسماق ایسته‌رم
ننه‌مین ساخلانجی آلا چاتییلا
آغاجدان یئللنجک آسماق ایسته‌رم

قاییت اوشاقلیغیم قاییت بیر آنلیق
سن نییه تئز کئچدین؟ بیلمک ایسته‌رم
حیات شیرین ایمیش! من بو دونیایا
یئنی‌دن دوغولوب گلمک ایسته‌رم

#حسین_عاریف

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

ایلک باخیش‌دا دئییل؛
سون باخیش‌دادیر سئوگی!
آیریلارکن،
سنه نئجه باخیرسا،
او قدر سئومیشدیر سنی!...

#ناظیم_حیکمت

گئجه‌نیز دینج💫🌚

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اوزاق‌دان اوزاغا سئویشن گؤزل
دومان‌لی‌گؤزلری بولودا باغلا
بیر غزل، بیر قوشما، بیر گرایلی یاز
شعرینین سونون‌دا منی سوراغلا

بیر داملا سایاغی قوناق اول بیزه
قوی بولود آغلاسین، پنجره دولسون
یاریلسین سینه‌سی قارا تورپاغین
سئوگیمیز گونشین گؤز یاشی اولسون

سئویشه-سئویشه، گؤی‌قورشاغین‌دان
قوشولاق آغ یئله، زیروه‌دن آشاق
گؤز-گوزه، ال-اله، آغری داغین‌دان
بو گئجه دومان‌لی بیر ماهنی قوشاق

من اولوم دلی داغ، سن ده اول یاغیش
یاغیش‌دا جیم‌-جیلاق ایسلانام گرک!
گولون قول‌لارینا شئه سوزن کیمی
سوزوب کیپریگین‌دن آسلانام گرک!

اوزاق‌دان اوزاغا سئویشن گؤزل
دیله گل، آرزیمیز سئله دونمه‌میش
بیر یانیق کرمی یارانماق‌دادیر
گل-آپار ،آلیشیب کوله دونمه‌میش!...

#دومان_بختیاری

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

آیاقلاشا بیلمه‌دیم سنین‌له،
سونون‌دا،
یالقیزلیق منیم اولدو!
بیریسی منی گؤزله‌مه‌دن،
غرور آددیم‌لارینی
داها دا یئیین‌لت‌دی...
چوخ اوزاقلاشدیق،
بئله گؤز یاشلارینی أله‌ین قدر
دایان-دایان دئیه
مله‌ین قدر
کؤنول-کؤنول
له‌له‌ین قدر...
هئچ بیلمه‌دی،
اؤزو ایله نه‌لر آپاردی
بوس-بوتون بیر سئوگینی
سینم‌دن قوپاردی
اون‌دان سونرا یاشام گولونج اولدو
دردلی قلبیمه
اون‌دان سونرا،
پاییزلاندی بوتون وارلیغیم،
ایندی،
سئوگی‌دن سؤز گئدرکن
هئچ اوزلو باشا دوشمزلر کیمی،
توموب،
یالنیز دوداقلارین ترپه‌نیشینی ایزله‌ییرم
نه‌دن سؤز گئدیر گؤرن؟
گؤزلریمه پای دوشن  چن‌دن می؟
خایالیم‌دا کی گلین گلن‌دن می؟
من‌دن می؟
سن‌دن می؟
دؤنوب دالینا باخمایان گئدن دن می!؟...

#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

من سنه آی دئمرم آی سنه چاتماز گؤزلیم
سنه حسرتده قالان دونیانی دادماز گؤزلیم

کؤنلومون تک گولوسن فخر ائدیرم ناز بویووا
عشقیوه حئیران اولان دای سنی آتماز گؤزلیم

قوی گؤزون قبله‌سینه هر گئجه من سجده قیلیم
زاهیدین سجده‌سی بو سجدیه چاتماز گؤزلیم

آتگینان غم کدری روی نگارینله گولوش
عاقیل اینسان باهارا غملری قاتماز گؤزلیم

سن خیال ائیله‌مه کی گل گئدیشین یوخ ثمری
اولماسا گئت گلیمیز غم گونی باتماز گؤزلیم

مجنونون مثلی منم، چشم خومارین دلیسی
لیلی مجنونه بئله عشوه‌نی ساتماز گؤزلیم...

#استاد_شهریار

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بو حایات نه قدر چتین بیر ایشدی
بلکه‌ده بیلمیرم، بیلدیییم قدر
گؤزلریم گوزگوده اوزومه دوشدو
گؤردوم آغلاییرام، گولدویوم قدر

دونیادا منیم‌ تک آزان اولماییب
اؤزوندن بو قدر بئزَن اولماییب
بلکه‌ ده هئچ زامان یازان اولماییب
بئینیمده اولانی سیلدیییم قدر

سینمیشدیم اؤزومله توتوشمادیم من
چوخ یاندیم حایاتدا، هئچ پیشمه‌دیم من
بیلن یوخ، یورولدوم، یئتیشمه‌دیم من
بلکه گئتمه‌میشم، گلدیییم قدر

گئتدیییم، یاشامین یانلیش یولودور
بیلن یوخ ایچیمی، قورخو دولودور
آنلادیم‌کی حایاتدا، تک گرچک بودور
و من یاشامیرام اؤلدویوم قدر....


#آردا_خانی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

آچاندا ساچینین هؤروگون هر دم،
ایسته‌رم اللریم داراغین اولسون.
کاش آلا جانیمی شیرین سؤزلرين،
سئويرم جللاديم دوداغين اولسون.

بيلميرم هاياندا قاريشيب باشين،
كاش گلیب گؤره‌سن گؤزومون ياشين
راضييام سئوگیلیم او قلم قاشین،
کؤنلومو يارماغا پیچاغین اولسون.

هئچ گناه گؤرمورم سن وفاسيزدا،
آغاج ياپراغینی دانار پاییزدا.
انصافدی من دورام کوچه_قاپیزدا...
اؤزگه‌سی ائویزده قوناغین اولسون؟

بو سئوگی سیرریمی یاییب عالمه،
دؤنده‌ريب دونيامی بير جهننمه.
ازلدن يارادان دئييبدير غمه:
مهرانين سينه‌سی اوتاغين اولسون...!

#مهران_عباسیان

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سنسیز داریخمیشدیم، چیخدیم داغلارا
گؤردوم کی بوکولوب گول لر آغلاییر !
کؤنلوم کؤچ ائیله دی اؤتن چاغلارا،
سانکی حسرتین دن ایل لر آغلاییر !

سوردوم قایالاردان_سوردوم داشلاردان،
سوردوم بولبول لردن، اوچن قوشلاردان،
سوردوم حسرتیندن آخان یاشلاردان،
گؤردوم کی هیجریندن سئل لر آغلاییر !

جهان گؤزلریمده قارالدی او آن
گونش پرده لندی، دولاندی دومان
بو یاشلی گؤزلریم گؤردوم او زامان
سوناسی اورکوشن گؤل لر آغلاییر !

نه مجنونو قالدی_نه ده لئیلی سی
یاندی خان کرمی_یاندی اصلی سی
نئچه ناکام لارین آهی _ ناله سی
سوزولوب سازیما تئل لر آغلاییر!

#گولایه_شینیخلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

شهرده؛
دوز دا ساتیلیر،
چؤره‌ک ده،
آما دوز- چؤره‌ک ساتیلمیر!..

#ووقار_نعمت

گئجه‌نیز دینج🌚💫

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

گؤزۆمۆ دۆنیایا آچاندان بری
منی مین بلایا سالدی بو دۆنیا
هرآن عذاب وئریب سیخدی قلبیمی
شاه‌مار ایلان کیمی چالدی بودۆنیا.

نییه اؤز کؤنلۆمۆ دۆنیایا وئردیم
قلبیمین قاپیسین قمیله هؤردۆم
من اؤزۆم کوْر اولموش گؤزۆمله گؤردۆم
کیمه نه وئرمیشدی آلدی بو دۆنیا.

سیزه سؤزدانیشیم دردلی سینم‌دن
سنسیز اولان قوصصه ، قمدن، ورمدن
چاراسیز مجنوندان، دردلی کرمدن
بیزلره یادگار قالدی بودۆنیا.

اووچو یاددان آتماز داغ نیشاناسین
بۆلبۆل اونودارمی باغ نیشاناسین
«خوشنامین» ساچینا آغ نیشاناسین
اۆره‌یی یانمادی سالدی بو دۆنیا.

#خوشنام


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اویان اوره‌ییمین مجنون سسینه!
دلی‌یم، دولویام دنیزجه‌سینه.
باخ زلال بیر عشقین معجزه‌سینه!
گؤزلریم دولاندا پیالا کیمی.

سن ای سودان دورو اینجه بیر خیال!
گوجون وار گل منی اؤز الیندن آل!
ساچیندا تئل اولدوم یاناغیندا خال،
سنینچون یاناندان، بیر لالا کیمی.

"یورغون"ون سن آلدین دینین ایمانین،
یاندیردین جییه رین، کؤورلتدین جانین،
گل آل قوینون اوستده؛ عؤمرون قالانین...
قوی یاتیم قوینوندا بیر بالا کیمی.

#فرمان_فرضی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

گئتمه ترسا بالاسی منده سنه سایه گلیم 
دامنین‌دن یاپیشیم سنله کلیسایه گلیم

اذن وئر توی گئجه‌سی من ده سنه دایه گلیم   
ال قاتاندا سنه مشاطه٬ تماشایه گلیم

سن بو مهتاب گئجسه‌سی سئیره چیخان بیر سرو اول  
اذن وئر٬ منده دالیجاق سورونوب سایه گلیم

منه‌ده باخدین اوشهلا گوزوله، من قارا گون 
جرأتیم اولمادی بیر کلمه تمنایه گلیم

من جهنم ده ده باش یاسدیقا قویسام سنی‌لن   
هئچ آییلمام کی دوروب جنت مأوایه گلیم

ننه قارنیندادا سن‌له إکیز اولسایدیم اگر    
ایسته‌مزدیم دوغولوب بیرده بو دونیایه گلیم

سن یاتیب جنتی رؤیاده گؤرنده گئجه‌لر 
منده جنتده قوش اوللام٬ کی او رؤیایه گلیم

قیتلیق ایل‌لر یاغیشی‌تک قورویوب گؤز یاشیمیز  
کوی عشقین‌ده گرک بیرده مصلایه گلیم

سنده صحرایه مارالار کیمی بیر چیخ٬ نولی کی؟  
منده بیر صیده چیخانلار کیمی صحرایه گلیم

آلاهوندان سن اگر قورخماییب٬ اولسان ترسا  
قورخورام من ده دؤنوب دین مسیحایه گلیم

شیخ صنعان کیمی دونقوز اوتاریب ایللر‌جه     
سنی بیر گؤرمک اوچون معبد ترسایه گلیم

یوخ صنم آنلامادیم٬ آنلامادیم٬ حاشا من    
بوراخیم مسجدیمی٬ سن‌له کلیسایه گلیم!

گل چیخاق طور تجلّایه٬ سن اول جلوه‌ی طور   
من ده موسی کیمی٬ اول طور تجلایه گلیم

شیردیر شهریارین شعری٬ الینده شمشیر 
کیم دئیه‌ر من بئله بیر شیر‌له دعوایه گلیم؟..

#استاد_شهریار

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر تیکه توتموشام؛
بال باخیشلاریندان،
ایللردیر گؤزوم توخدور...🩵🧡

#فریبا_مرتضایی

گئجه‌نیز کدرسیز🌚💫

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اونو سندن سوروشسالار، دئنن کی،
من ها عزيزله‌ديم، ناشی‌يدی، گئتدی.
کؤنلومون ايلک ياری، ايلک سئوگیسی‌یدی،
گؤزومون سون قطره ياشی‌یدی، گئتدی.

قالدی خیالیمدا حسرتین ایزی،
یامان دالغالاندی هیجران دنیزی!
اینسان اؤولادينين داش اورک‌لیسی،
نازلی گؤزَللرين باشی‌یدی، گئتدی.

قلبیمی سیخسا دا یار دؤنه-دؤنه،
«شوجاعت» كم باخماز محبّتينه.
من اونو سئویرم، سئویرم یئنه،
اونون اؤز كئفی‌یدی، خوشويدو، گئتدی...

#شوجاعت_کلبجرلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

جاوانلیغین محبتین عشقینه،
آغارمایین آی ساچلاریم، آماندی.
دوز ایلقارین صداقتین عشقینه‌،
آغارمایین آی ساچلاریم، آماندی.

حاق عاشیقی یارانیبدی غم چکه؛
اوره‌ییمه سالیب‌سینیز یوز لکه،
نه لازیمدی گؤزوم قانلی یاش تؤکه،
آغارمایین آی ساچلاریم، آماندی.

ائله بیلدیم داغ باشینی قار آلیب،
آیاز ووروب چیچکلری سارالیب،
گؤرن دئییر آشیق داها قوجالیب،
آغارمایین آی ساچلاریم آماندی.

«آزافلی»یام آغ ساققالیم بیر یانا؛
گنجلیک گئتدی  کؤنول اولدو ویرانا،
دئیه جکلر دؤزنمه‌دی هیجرانا،
آغارمایین آی ساچلاریم، آماندی...


#آزافلی_میکاییل

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

+ دئدیم: ای غنچه دهن، کونلومو قان ائیله‌میسن!
- دئدی: بی‌جا یئره عشقمده فغان ائیله‌میسن!

+ دئدیم: انصاف ائیله اینجیتمه منی عاشقینم...
- دئدی: گئت!، سرّیمی دونیایه عیان ائیله‌میسن

+ دئدیم: آغلاتما منی سرو بویون شوقینده!
- دئدی: گؤز یاشینی بیهوده روان ائیله‌میسن

+ دئدیم: آخر گوزلیم، باغ و بهاریم سنسن
- دئدی: سن عمرینی حسرتله خزان ائیله‌میسن

+ دئدیم: آز چکمه‌میشم گؤزلرینین حسرتینی
- دئدی: اؤز کونلونو یئرسیز نگران ائیله‌میسن

+ دئدیم: عشقینده اسیرم، منه بس خئیری نه‌دیر؟
- دئدی: اولده بو سووداده زیان ائیله‌میسن

+ دئدیم: عشق آتشی نیلر منه؟ قورخان دئییلم
- دئدی: بیچاره یانارسان! نه گومان ائیله میسن؟

+ دئدیم: ای گل! من ازلدن‌ده گوزه‌ل عاشقیم
- دئدی: سن روحینی عشق‌ائیله جوان ائیله‌میسن

+ دئدیم: هر گون سر کوی‌ینده دولانماقدر ایشیم
- دئدی: واحید" نه گوزه‌ل یئرده مکان ائیله‌میسن


#علی‌آقا_واحد

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯