درده سالدین، یوخ سؤزوم، ائی شوخ، درمانین هانی؟!
وئردیگین آلدین الیمدن، باشقا احسانین هانی؟

وعده وئردین: یاز گلر بیر گون تالانمیش باغلارا،
بولبولو یاسدان چیخاردان شانلی مهمانین هانی؟

قار-بوران، سروین یاشیل قانین توتوبدور شیشه‌یه،
دیوی تختیندن سالان جانا، سلیمانین هانی؟!

من ده «صابر»‌تک، مسلمان هاردا گؤرسم قورخورام،
فکری قان-قان اولمایان -یارب!- مسلمانین هانی؟!

من او مجنونم، خیالیمدان بیابانلیق کئچیر،
گؤز گؤزو گؤرمور قارانلیقدان، بیابانین هانی؟

جان وئرن چوخ، قان آلان توخ، بیر سوران یوخ: عاصما!-
بو داماردا سئیر ائدن، جانان وئرن، قانین هانی؟...

#عاصم_اردبیلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

گولورسن اوزومه نئیله‌ییم آخی،
ترسینه توتولان ایش قویوب فلک.
سنین گؤزلرینه شؤهرت عشقینی،
منیم گؤزلریمه یاش قویوب فلک.

دینکیش قادین کیمی گولمه آی عارسیز؛
منی ده او قدر دوشونمه وارسیز.
سنین بدنینه بزکلی قارپیز،
منیم بدنیمه باش قویوب فلک.

فلکین الیله ائنن اوجالمیر!
گوونمه پولونا او روشوت آلمیر!
حوکمو کس‌ها- کسلیک هئچ کیمه قالمیر،
چوخ خانیمانلاری بوش قویوب فلک.

بهمن بیل سیررینی فیتنه فئللرین،
زهر وار آلتیندا شیرین دیللرین.
قارانلیق کؤکسونه چوخ قاتیللرین،
اورک عوضینه داش قویوب فلک...

#بهمن_وطن_اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سَدد چَکیب سینه‌مه غَملر اوردوسو
شَهَرلردن بئتر تالاناسی‌یام
قَلبیم ائله دولوب، ائله کؤوره‌لیب
بیرجه چینقی دوشسه قالاناسی‌یام

جاوانلیق باغینین گولو سولماسین
سئوگی داغلارینی دومان آلماسین
آی ائللر دَردیمه دَیَن اولماسین
داشقین چایلار کیمی بولاناسی‌یام

دئ کیم دؤزر بَهمن کیمی ظولمه؟
یالان دئسم دویون وورون دیلیمه
بو چاغیمدا بیر دوست دوشسه اَلیمه
یوز دفعه باشینا دولاناسی‌یام.

#بهمن_وطن‌اوغلو


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

یار قلبیمه یول سالسا گتیررم؛ نئجه گلمز؟!
عشقیم‌له سازین چالسا، گتیررم؛ نئجه گلمز؟!

آختارسام اؤزوم، تاپسام اؤزوم، بیر دیله توتسام...،
کؤنلوم گؤیولون آلسا... گتیررم؛ نئجه گلمز؟!

گولسوز قورو اوتلاردی سالان آیریلیغی؛ یار-
یوللار تیکانین یولسا... گتیررم؛ نئجه گلمز؟!

سؤندورمه اومود شمعینی ای غافیل! او سئوگیم-
دردیمله یانیب سولسا...گتیررم؛ نئجه گلمز؟!

سیرداشیم اؤزو بیر ده کی جان قِئیدینه یالنیز-
دیوانه صفت قالسا، گتیررم؛ نئجه گلمز؟!

بو رسمدی کی آی یئرینه، گون، گئجه گلمز.
گر جذبه ی عشق اولسا گتیررم؛ نئجه گلمز؟!

سن دردینی آچ سٶیله «دادا» سئیلی سرشکی
گؤزلردن اورک دولسا...گتیررم؛ نئجه گلمز؟!

#دادا_بیلوردی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سئوگیلیم، بیر بیلمه‌دین سنسیز نه مؤحنت چکمیشم!
بی‌وجود اغیارلردن چوخ اذیّت چکمیشم.

ذؤوق وصلین خاطیره گلدیکجه، غمدن آغلارام،
اؤزگه بیر جانانه سانما دیلده حسرت چکمیشم!

مَه جمالین گؤرمه‌یه بیگانه فورصت وئرمه‌دی،
صوبح اولونجا هر گئجه، کویوندا نؤوبت چکمیشم.

«بی‌وفالیق رسمینی ترک ائت!» دئدیم، ترک ائتمه‌دین.
سندن اؤترو یالواریب اغیاره مینّت چکمیشم.

وصل یار اولماز میسّر هر بلاکش عاشیقه،
من صداقتله بو یولدا چوخ موصیبت چکمیشم.

اؤزگه‌نی دیندیردی اؤز یاریم، منی دیندیرمه‌دی،
ایندی گؤر «واحید»! خجالتدن نه ذیلّت چکمیشم.!...

#علی‌آقا_واحید

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اویما هر زولفی قارا  سئوگیلی جانانه کؤنول
بو وفاسیزلار ائدرلر سنی دیوانه کؤنول

مومکون اولدوقجا چالیش یانمایاسان عشق اودونا       
شمع‌دن گؤرنه چکیر هر گئجه پروانه کؤنول      

سن هله عشق کمندین‌ده اسیر اولمامیسان
اویما مجنون کیمی هر زولفی پریشانه کؤنول

گول‌ده اولسایدی وفا  خاریله یار اولمازیدی
بولبولون آهی یاییلمازدی گولوستانه کؤنول

آشينا اولماق عبث‌دیر بو پری چوهره‌‌لره
یئنه بیرگون اولاجاق‌لار سنه بیگانه کؤنول

سئودیگین اولسا زولیخای زامان  سن یوسیف           
فکرائدیب سالدیراجاق‌دیر سنی زيندانه  کؤنول

واحید‌ین عؤمرو بوتون نازلی گوزل‌لرله كئچیب
بو حقیقت سؤزو ظن ائیله‌‌مه افسانه کؤنول


#علی_آقا_واحید

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سن‌سیز چکیلن هر نفس‌یم‌ زوردو سینمده
قلبیم سنه بئل باغلادی کیم! ووردو سینمده

دوست- دوشمانا سینماز بیری‌یم،قوی دئیه هر کس
سئوگین قارا کَندیر آچیلان توردو سینمده

کؤنلوم قوشو هاردان-هارا گؤر اوچدو سنین چون
عشقین یوواسین تئز-تله‌سیک قوردو سینمده

دوشمز نه بیلیر سئوگی‌یه دوشمک نه دئمک‌دیر!؟
گوندوز-گئجه- هردم! چالینان شوردو سینمده

سس‌سیزجه سوکوتلاردا سارالدیم‌سا اونوتما،
کؤز-کؤز قاباران دویغولاریم قوردو سینمده

گؤز یاشلاری اولمور منه مرحم، نه بیلیدیم،
قلبیم‌ده یئر آچمیش سارا، کار- کوردو سینمده

دردین منی ائتمیش شهه‌رین روسواسی، اولسون!
ائتمیر کی شیکایت منی چوخ! یوردو سینمده...

بیلدین می نه‌لر چکدی گؤزوم،یول‌لار الین‌ده؟
هر دم سنی من‌دن اوماراق، سوردو سینمده

یان! یان! اوره‌ییم سن سؤز ائشیتمزسن آغیلدان
مین آرزی-دیلک ناله‌سی،سیر- گوردو سینمده


#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

کامال گزسن ائل سؤزون‌دن سؤز گوتور
هی دانشما ائل ایچینده من گرک
قریبه بیر حیات اونو دویماغا
یوز اؤلچه‌سن، بیر بیچه‌سن سن گرک

سویوق عشقین زیروه‌سی‌نی قار آلار
یئرسیز صحبت اوره‌ک لری یارالار
ساختا گولوش دوداق‌لاری پارالار
دوغرو گولوش دوغرو دیل‌دن شأن گرک

باغبان‌سیز باغ بیلیرسن کی باغ اولماز
قره صفت هئی یوماق‌لا آغ اولماز
هر سینه‌سی قالتاق‌لی داغ، داغ اولماز
داغ باشین‌دا دومان گرک چن گرک

یالان‌چی‌لار قورودونو نم ساتار
آغیر آلار آلدیغینی کم ساتار
اعتبارسیز یار-یارینا غم ساتار
دوست-دوستونا یار-یارینا، تن گرک

من «ستتارام» آلدانمارام خور یادا
باش ایمه‌رم هر شهرته هر آدا
دئوه‌چی‌له دوست اولانین دونیادا
عشقی بؤیوک دروازه‌سی گَن گرک!...

#ستار_گل‌محمدی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

ساخلادیم بیر عؤمور سینه‌م‌ده دردی
سایسان نیسگیللریم دونیا قدردی
دئییرلر بو دونیا گلدی گئدردی
هیجرانلا اوز- اوزه قالان من اولدوم

شئه‌لی بنؤشه‌نی دسته باغلادیم
سنی گلن‌لردن هئی سوراغلادیم
قاییتمادین اوره‌ییمده آغلادیم
دسته گول الینده سولان من اولدوم

حسرتله گئجه‌نی ائیله‌دیم سحر
گؤزله‌دیم یاتمادیم دئدیم یار گلر
اینتیظار اؤلومدن، بتردیر بتر
جانیمی اودلارا سالان من اولدوم

سنی خاطیرلاییب داریخدیم یامان
چکیرم دردینی من زامان زامان
سارالیب سولموشام حسرتدن اینان
عؤمرومون باغچاسی تالان من اولدوم

باهاردیر بورونوب شئه‌له چمن‌لر
بیرلشدی باهارلا بوتون سئوه‌ن‌لر
بیرجه سن یوباندین گلدی گئدن‌لر
عطرینی گوللردن آلان من اولدوم

#حسن_معرفت

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر اؤلوم بورجوم وار یارادانیما
نئچه یۆز مین دیلک، آلاجاغیم وار
نه آلیر بورجونو، نه بورجون وئریر
بللی دیر، آسیلی قالاجاغیم وار

تانریمین گرک‌دیر اۆزو آغ اولسون
گۆنلرین قاراسین دوْنوما بیچیب
آجیلار-چیله‌لر اولوب قنیمیم
آسیلیب یاخامدان قانیمی ایچیب

سارالیب وارلیغیم، سولوب منلیگیم
اوخشاییر ساچیمی پاییز اللری
اؤزومده دوستاغام، اؤزومه اوگئی
گؤز آچیب دنیایا گلندن بری...

#فرزین_نقی‌یان

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

عوض ائله فصیل‌لردن بیرینی،
ایلده بیرجه دفعه سن ده قاییت گل!
باهار اول، پاییز اول، نه اولورسان اول،
ایلده بیرجه دفعه سن ده قاییت گل!

قوربانام سنینله قیش گلن گونه،
قار، یاغیش عؤمرومه خوش گلن گونه.
قوشول یاشیم اوسته یاش گلن گونه،
ایلده بیرجه دفعه سن ده قاییت گل!

یئنه ده بیر داغین اتک یئرینده،
سنی گؤزله‌ییرم چیچک یئرینده.
گیزلن بیر چیچه‌یین لچک یئرینده،
ایلده بیرجه دفعه سن ده قاییت گل!

دردینی سینه‌مده بیتیرن گون‌تک،
سنی گؤزلریمدن ایتیرن گون‌تک،
ائله گئدیشینی گتیرن گون‌تک،
ایلده بیرجه دفعه سن ده قاییت گل!

قاییت کی، عؤمرومده توی بایرام اولسون،
گلدییین او هفته، آی بایرام اولسون،
منه ده بیر دفعه قوی بایرام اولسون،
ایلده بیرجه دفعه سن ده قاییت گل!

«والئه»ام، گئتدییین فصیل ده گلیر،
دونیایا بیر یئنی نسیل ده گلیر،
وطنسیز عؤمرومه بیر ایل ده گلیر،
ایلده بیرجه دفعه سن ده قاییت گل!...

#والئه_قوجا

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سونرا چوخ شئيه اينانديم،
قازانداكى قوزو كيمى
سونرا کؤتويه جن يانديم
بير فحله  پاپريزى كيمى

سونرا سنين يئرين گلدى،
آجى گلدى شيرين گلدى
توى گئجه سى اؤزون آسان
قونشونون  لال قيزی كيمى

سونرا توختارسان دئديلر
ياراما دوز دؤشه-ديلر
دوز نه دوز يازيق اورمونون،
ياراسينين دوزو كيمى

سونرا درديم سورالاندى،
كلمه-كلمه ديليم ياندى
ياندى تبريزين باكى سي،
باكی نين تبريزى كيمى

سونرا دا من شاعير اولدوم
دَن-دَن ساققاليمى يولدوم
سؤزوم هايدا-كويده ايتدى
دَييرمان خوروزو كيمى

#نادر_الهى

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

نه‌لر اثبات ائتدی بو حیات منه
سئون سئودیینی اونودا...گؤردوم
بیر سنی ایتیرمک قورخوسو واردی
اونودا یاشادیم، اونودا گؤردوم

دردیمی توپلاسام قالانار بیر داغ
روح چیخیر بدن‌دن قالدیرا بیلمیر
شعرده واراغی دولدورور آنجاق
اورک بوشلوغونو دولدورا بیلمیر

عاغیلسیز دییلم، دلی دییلم
عاغلیم سن‌ده قالیب، سنین‌له گئدیب
ساچینین تئلین‌دن آسیلیب قالیب
بۆتون خیاللاریم انتحار ائدیب

قازاندین سونون‌دا تبریک ائدیرم
ایندی باده قالدیر اؤز شرفینه
من ایسه فکریمی توپلویوم بیرآز
داغیلیب اوتاغین هر طرفینه...

#میرشن_عزیزاو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

قاییت اوشاقلیغیم قاییت بیر آنلیق،
ایتن گونلریمی تاپماق ایسته‌رم
مینیم آخشام اوستو قارغی آتیما
یول‌لاردان،یول‌لارا چاپماق ایسته‌رم

قاییت اوشاقلیغیم قاییت بیر آنلیق
یئریییب، ییخیلیب، قاچماق ایسته‌رم
سحرلر چیینیم‌ده  مکتب چانتاسی
صینیف اوتاغینی آچماق ایسته‌رم

قاییت اوشاقلیغیم قاییت بیر آنلیق
من سنی باغریما باسماق ایسته‌رم
ننه‌مین ساخلانجی آلا چاتییلا
آغاجدان یئللنجک آسماق ایسته‌رم

قاییت اوشاقلیغیم قاییت بیر آنلیق
سن نییه تئز کئچدین؟ بیلمک ایسته‌رم
حیات شیرین ایمیش! من بو دونیایا
یئنی‌دن دوغولوب گلمک ایسته‌رم

#حسین_عاریف

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

ایلک باخیش‌دا دئییل؛
سون باخیش‌دادیر سئوگی!
آیریلارکن،
سنه نئجه باخیرسا،
او قدر سئومیشدیر سنی!...

#ناظیم_حیکمت

گئجه‌نیز دینج💫🌚

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اوزاق‌دان اوزاغا سئویشن گؤزل
دومان‌لی‌گؤزلری بولودا باغلا
بیر غزل، بیر قوشما، بیر گرایلی یاز
شعرینین سونون‌دا منی سوراغلا

بیر داملا سایاغی قوناق اول بیزه
قوی بولود آغلاسین، پنجره دولسون
یاریلسین سینه‌سی قارا تورپاغین
سئوگیمیز گونشین گؤز یاشی اولسون

سئویشه-سئویشه، گؤی‌قورشاغین‌دان
قوشولاق آغ یئله، زیروه‌دن آشاق
گؤز-گوزه، ال-اله، آغری داغین‌دان
بو گئجه دومان‌لی بیر ماهنی قوشاق

من اولوم دلی داغ، سن ده اول یاغیش
یاغیش‌دا جیم‌-جیلاق ایسلانام گرک!
گولون قول‌لارینا شئه سوزن کیمی
سوزوب کیپریگین‌دن آسلانام گرک!

اوزاق‌دان اوزاغا سئویشن گؤزل
دیله گل، آرزیمیز سئله دونمه‌میش
بیر یانیق کرمی یارانماق‌دادیر
گل-آپار ،آلیشیب کوله دونمه‌میش!...

#دومان_بختیاری

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

آیاقلاشا بیلمه‌دیم سنین‌له،
سونون‌دا،
یالقیزلیق منیم اولدو!
بیریسی منی گؤزله‌مه‌دن،
غرور آددیم‌لارینی
داها دا یئیین‌لت‌دی...
چوخ اوزاقلاشدیق،
بئله گؤز یاشلارینی أله‌ین قدر
دایان-دایان دئیه
مله‌ین قدر
کؤنول-کؤنول
له‌له‌ین قدر...
هئچ بیلمه‌دی،
اؤزو ایله نه‌لر آپاردی
بوس-بوتون بیر سئوگینی
سینم‌دن قوپاردی
اون‌دان سونرا یاشام گولونج اولدو
دردلی قلبیمه
اون‌دان سونرا،
پاییزلاندی بوتون وارلیغیم،
ایندی،
سئوگی‌دن سؤز گئدرکن
هئچ اوزلو باشا دوشمزلر کیمی،
توموب،
یالنیز دوداقلارین ترپه‌نیشینی ایزله‌ییرم
نه‌دن سؤز گئدیر گؤرن؟
گؤزلریمه پای دوشن  چن‌دن می؟
خایالیم‌دا کی گلین گلن‌دن می؟
من‌دن می؟
سن‌دن می؟
دؤنوب دالینا باخمایان گئدن دن می!؟...

#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

من سنه آی دئمرم آی سنه چاتماز گؤزلیم
سنه حسرتده قالان دونیانی دادماز گؤزلیم

کؤنلومون تک گولوسن فخر ائدیرم ناز بویووا
عشقیوه حئیران اولان دای سنی آتماز گؤزلیم

قوی گؤزون قبله‌سینه هر گئجه من سجده قیلیم
زاهیدین سجده‌سی بو سجدیه چاتماز گؤزلیم

آتگینان غم کدری روی نگارینله گولوش
عاقیل اینسان باهارا غملری قاتماز گؤزلیم

سن خیال ائیله‌مه کی گل گئدیشین یوخ ثمری
اولماسا گئت گلیمیز غم گونی باتماز گؤزلیم

مجنونون مثلی منم، چشم خومارین دلیسی
لیلی مجنونه بئله عشوه‌نی ساتماز گؤزلیم...

#استاد_شهریار

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بو حایات نه قدر چتین بیر ایشدی
بلکه‌ده بیلمیرم، بیلدیییم قدر
گؤزلریم گوزگوده اوزومه دوشدو
گؤردوم آغلاییرام، گولدویوم قدر

دونیادا منیم‌ تک آزان اولماییب
اؤزوندن بو قدر بئزَن اولماییب
بلکه‌ ده هئچ زامان یازان اولماییب
بئینیمده اولانی سیلدیییم قدر

سینمیشدیم اؤزومله توتوشمادیم من
چوخ یاندیم حایاتدا، هئچ پیشمه‌دیم من
بیلن یوخ، یورولدوم، یئتیشمه‌دیم من
بلکه گئتمه‌میشم، گلدیییم قدر

گئتدیییم، یاشامین یانلیش یولودور
بیلن یوخ ایچیمی، قورخو دولودور
آنلادیم‌کی حایاتدا، تک گرچک بودور
و من یاشامیرام اؤلدویوم قدر....


#آردا_خانی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

آچاندا ساچینین هؤروگون هر دم،
ایسته‌رم اللریم داراغین اولسون.
کاش آلا جانیمی شیرین سؤزلرين،
سئويرم جللاديم دوداغين اولسون.

بيلميرم هاياندا قاريشيب باشين،
كاش گلیب گؤره‌سن گؤزومون ياشين
راضييام سئوگیلیم او قلم قاشین،
کؤنلومو يارماغا پیچاغین اولسون.

هئچ گناه گؤرمورم سن وفاسيزدا،
آغاج ياپراغینی دانار پاییزدا.
انصافدی من دورام کوچه_قاپیزدا...
اؤزگه‌سی ائویزده قوناغین اولسون؟

بو سئوگی سیرریمی یاییب عالمه،
دؤنده‌ريب دونيامی بير جهننمه.
ازلدن يارادان دئييبدير غمه:
مهرانين سينه‌سی اوتاغين اولسون...!

#مهران_عباسیان

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سنسیز داریخمیشدیم، چیخدیم داغلارا
گؤردوم کی بوکولوب گول لر آغلاییر !
کؤنلوم کؤچ ائیله دی اؤتن چاغلارا،
سانکی حسرتین دن ایل لر آغلاییر !

سوردوم قایالاردان_سوردوم داشلاردان،
سوردوم بولبول لردن، اوچن قوشلاردان،
سوردوم حسرتیندن آخان یاشلاردان،
گؤردوم کی هیجریندن سئل لر آغلاییر !

جهان گؤزلریمده قارالدی او آن
گونش پرده لندی، دولاندی دومان
بو یاشلی گؤزلریم گؤردوم او زامان
سوناسی اورکوشن گؤل لر آغلاییر !

نه مجنونو قالدی_نه ده لئیلی سی
یاندی خان کرمی_یاندی اصلی سی
نئچه ناکام لارین آهی _ ناله سی
سوزولوب سازیما تئل لر آغلاییر!

#گولایه_شینیخلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯