توتولموش کؤنلومو، جام ایله شادان ائیله‌مک اولماز،
ال ایله پوسته‌نین آغزینی خندان ائیله‌مک اولماز.

نه سؤزدور بو کی، اول صاحب نظر زُهّاد،
قارا تورپاغی هرگز آب حیوان ائیله‌مک اولماز؟

بولود قیلان کیمی جولان، وورار دا ایلدیریم تیغی،
کؤنول پرده‌لرینده عشقی پنهان ائیله‌مک اولماز.

قیلیج گر ایچسه عالم قانینی، سیرابلیق بیلمز،
سنی عشّاق قتلیندن پشیمان ائیله‌مک اولماز.

منیم گؤز یاشیمی، چیخ‌گیل، فلکلردن تماشا قیل!
حبابِ قصرلر ایچینده توفان ائیله‌مک اولماز.

منِ مجنونی عاقیل ائیله‌مک مومکون دئییل، ناصح!
سؤز ایله مُشکِ نابی قان کی، بیر قان ائیله‌مک اولماز!

ختادان کئچدی جیران قانینی مُشک ائیله‌دی «صائب».
دئمه: عصیانی طاعت، کُفرو ایمان ائیله‌مک اولماز!...

#صائب_تبریزی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

حکومت ائوی‌نین قارشی‌سینداکی
"توتا" سؤیکه‌نمیشدی بیر علیل عسگر.
صدقه اومانا باخمیردی باکی،
سایمازجا کئچیردی یولدان اؤتن‌لر...

آخشامدان کوکره‌ییب اَسن کولک‌ده
چکمیشدی ایچینه دلی سسی‌نی.
علیل یانا-یانا قارغی توتک‌ده،
چالیردی "قاراباغ شکسته‌سی‌نی"

اَلیمی شست ایله جیبیمه سالدیم،
دیکسیندی بارماغیم، تیتره‌دی قولوم.
حیرصیمدن قورویوب، یئریمده قالدیم،
اوستومده دئییلدی اؤینه‌لیک پولوم.

آغزیمدا آلیشیب یاندی دیل-دوداق،
"توت" یاخدی اَلیمین اوتانماغینا.
گؤی‌دن یارپاق آتدی بیر ساری یارپاق
بیزدن پای اومانین بوش پاپاغینا


#شاهمار_اکبرزاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیزیم گؤروش یئری خسته‌خانایدی
یاتێردی، سوْروشدوم، یوْخ ایدی کئفی
داها من آتایدیم، او دا آنایدی
منیم اؤز عایله‌م، اونون اؤز ائوی

گؤروشوب اَیلَشدیک بوردا اوز-اوزه،
صُحبت ائله‌مه‌یه سؤز آختاریردیق
دوزو، مات قالمیشدیق بیر- بیریمیزه
اوجاغی سؤندوروب کؤز آختاریردیق

ایندی اؤز بختیمیز، اؤز طالعیمیـز
بو گؤروش ایلک عشقه سوْن حُرمت ایدی
اوْتاقدا یاناشێ اَیلَشمه‌ییمیز
حیاتدا آیرێلێق علامتی‌یدی

دۆنیادا سئوگی‌ده، محبت ده وار
آما، اوّلجه‌دن سؤز دئمک اوْلمور
دۆنیادا ائله بیل بیر قیسمت ده وار
ائه، بلکه، قیسمت‌دن چوخ یئمک اولمور

قولاق آس ائفیردن گلن بیر سسه
"سعادت هر کسین اؤز الینده‌دیر"
سعادت هر کسین اؤز الینده‌سه،
بیزیم چکدیییمیز اضطراب ندیر؟

دئییرلر، داغ چاپار انسان ایسته‌سه
دۆنیانین ازلی قانونو بودور
بیز کی، ایسته‌ییریک، آما نه ایسه
دونیادا یئنه‌ده بیز دئین اوْلمور

او باخیر اۆزۆمه گؤزونده حسرت،
تۇتۇلۇب بولودلو بیر سحر کیمی
یاشاییر دونیادا بیر ایلک محبت،
آتالی - آنالی یئتیم‌لر کیمی...

#نریمان_حسن‌زاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

#عزت_طهماسبی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سندن نه گیزله‌دیم، قیسقانجام یامان.
سن منی سئوسن ده دونيالار قدر،
يانيمدا گؤرمه‌سم سنی بيرجه آن،
گؤزومون يوخوسو چکیلیب گئدر.

دئميرم بؤيوكدور بو طبيعتيم،
بلكه ده، بلكه ده بو بير آزاردير.
قلبینه دَيمه‌سین سؤزوم-صؤحبتيم،
سنده محبّت ده، ناموس دا واردیر.

سنین وفانا دا اینانیرام من،
آنجاق نه اولسون کی بؤیوکدور شهر،
اؤزون ده حدّيندن آرتيق گؤزلسن،
ديديب پارچالاییر منی شوبهه‌لر.

#صمد_وورغون

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سوکوتا بورونوب یوللارلا آنلار
گؤیلرده ساللاییب قاشین قاباغین
گئتمک ایسته ییرسن آددیمین گلمیر
گؤزومه باغلی دیر سنین آیاغین

اوخلانیب گؤزومه گؤزلرین سنین
باخیشین جالاییر کؤنلومه سازاق
آیریلیق ناغیلین اوخویورام من
هر کیپریک چالاندا دؤنور بیر واراق

جومورام کؤنلونه آی دنیز گؤزلوم
کؤنلون دالغالانیب چاغلاییر منی
آدیمی سیلیرسن بو گون بختیندن
گؤزلر داملا-داملا آغلاییر منی

بو گون سن گئدیرسن کدرلی‌یم من
دونوبدور آغزیمدا فریادیم سؤزوم
یوخ،یوخ! آغلاماییر دالینجا سنین
اوغور اولسون دئیه سو سپیر گؤزوم

نه واختسیز کؤچورسن سونقور باخیشلیم
هاچان یازدا کؤچور گؤللرین قازی
آی ایپک قانادلیم سن کی بیر داها
قاییتمایاجاقسان نئلیرم یازی

داشلاردا آغلاییر ویداع مارشینا
یوللاردا دوشونوب سون نییتینی
آیاقلا آرزیمی خوش گونه قوووش
ایسته رم دونیادا سعادتینی

دئمیشدیم آنانا:"سئودیییم گؤزل
سیزین قیزینیزدیر،منیم اولاجاق"
بیلمزدیم ساچین تک باخدیم قارادی
آرزی چیچکلریم بیر گون سولاجاق

منیمسه بختیمدن بئله گلیبدیر
هئچ آلوو بئله جه منی یاخمادی
اوچدو آرزیلاردان تیکدیییم بینا
ییخیلمیش تاواندان توز دا قالخمادی

گئتدین بخت ائوینه یولون اوغورلو
ظن ائتمه اؤز الیم،اؤز باشیم اولدو
گئتدین می حیاتین اوغوللو،قیزلی
منیمسه سیرداشیم گؤز یاشیم اولدو

گؤز یاشیم جواهیر،گؤز یاشیم اینجی
دایان،گئتمه دایان دردینی آلیم
آغارمیش ساچیمین ساپینا دوزوب
بو سون یادگاری بوینونا سالیم

آتالار دئییبلر:"حیاتین یولو،
یاری قیسمت اولسا یاری همت دیر"
اولدوقجا چالیشدیم چاتمادیم سنه
خوشبخت اول گؤزلیم،بودا قیسمت‌دیر

الویداع دئییرم تیترک دوداقلا
لاکین آرزیم،عشقیم دومانا دؤنور
سؤزلریم آسانجا قوپور دیلیمدن
آنجاق گؤروشوموز گومانا دؤنور

کؤکسومده قیزیلدان بیر سارای سالدیم
یاشارسان عؤمورلوک دیله ییمده سن
گؤزومدن گئتسنده اوزاق دئییلسن
رویالاریمداسان،اوره ییمده سن

#حسن_اومود_اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

پاییزلا قیش آراسیندا بیر فصیل وار
آدینی " آغلاماق فصیلی" قویورام.
او فصیلده:
کؤنول کئچمیش‌لردن داها چوخ
ماوی‌یه یاخین‌دیر...

#نزار_قبانی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اذن وئر کؤنلۆنون بیربوجاغیْندا
سیْغینیم دینجه‌لیم بیرقوْناق کیمی
یا دا آل کؤنلۆنون باش کؤشه‌سینه
اَیله‌نیم ارکؤیۆن بیر اوُشاق کیمی

اذن وئر یاش اوْلوُم دوْلوم گؤزۆنه
سۆزولوم گؤزۆندن دۆشوم اۆزونه
سۆرونوم اۆزومو قوْیوُم ایزینه
یولوندا یورولموش بیر آیاق کیمی

اذن وئر اوْووُجوندا سالیم یوُوامی
گیزلی درمان ائدیم گیزلی یارامی
سؤیکه‌نیم سئوگینه تاپیم چارامی
سازاقدان اَییلن بیر بوداق کیمی

اذن وئر یازیلیم آلین یازیندا
دالیم خیالینا قالیم یادیندا
قیزاریم نارکیمین عشقین اوْدوُندا
حسرتدن تیتره‌ین بیر دوْداق کیمی
  
کؤنۆلم بۆرونم پاییز دونونا
وورا خزان یئلی گلم اوْیوُنا
یوْروُلام اوْیوُندان دۆشم یوْلوُنا
بوداقدان قیریلان بیریارپاق کیمی

#کؤنول_عبدی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بو دونیادان دویماق اولمور، ایلاهی،
آمان آللاه، دونیا نئجه شیریندی
فصیل گؤزل، هفته گؤزل، آی گؤزل،
آمان آللاه، دونیا نئجه شیریندی.

کیم بختیندن، طالعیندن یاریدی،
کیمین بختی آخیراجان ساریدی.
دونیا چیچک، اینسان اوغلو آریدی،
آمان آللاه، دونیا نئجه شیریندی.

گؤیلره باخ، گؤیو گونلو یاغیشلی،
یئرلره باخ، یئری گوللو، ناخیشلی.
گؤزللری تولک طرلان باخیشلی،
آمان آللاه، دونیا نئجه شیریندی.

باخماق اوچون بره سی وار، بندی وار،
گزمک اوچون شهری وار، کندی وار.
شکری وار، پته یی وار، قندی وار،
آمان آللاه، دونیا نئجه شیریندی.

سسلی گلن سس سیز اؤلمک ایسته میر،
هئچ بیر جانلی اؤلوب ایتمک ایسته میر.
هاممی گلیر، گلن گئتمک ایسته میر،
آمان آللاه، دونیا نئجه شیریندی.

#زلیمخان_یعقوب

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

دولدور اوره‌یینی سئوینج‌له دولدور،
بو حیات ائنیشلی-یوخوشلو یولدور
حیات دا،  سئوینج ده-کَدَر ده بولدور
هانسینی گؤتورسن، اؤز قیسمتین‌دیر

سئوینج آختاریرسان، آل ، یاساق دئییل
درد چکن اورک‌دن ، درد قاچاق دئییل
دونیا ایکی رنگ دیر، تکجه آغ دئییل
بیرینی گؤتورسن جهالتین‌دیر!

"بختیار"بیلدین‌می سن کیمسن- نه‌سن؟!
دئ هانسی روزگاردیر باشیندان اَسَن؟!
دونیانین یاسینا  قَح_قَح  چَکمه‌‌سن
دونیانین  تویو  دا  موصیبتین دیر!

#بختیار_واهاب‌زاده

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

درده سالدین، یوخ سؤزوم، ائی شوخ، درمانین هانی؟!
وئردیگین آلدین الیمدن، باشقا احسانین هانی؟

وعده وئردین: یاز گلر بیر گون تالانمیش باغلارا،
بولبولو یاسدان چیخاردان شانلی مهمانین هانی؟

قار-بوران، سروین یاشیل قانین توتوبدور شیشه‌یه،
دیوی تختیندن سالان جانا، سلیمانین هانی؟!

من ده «صابر»‌تک، مسلمان هاردا گؤرسم قورخورام،
فکری قان-قان اولمایان -یارب!- مسلمانین هانی؟!

من او مجنونم، خیالیمدان بیابانلیق کئچیر،
گؤز گؤزو گؤرمور قارانلیقدان، بیابانین هانی؟

جان وئرن چوخ، قان آلان توخ، بیر سوران یوخ: عاصما!-
بو داماردا سئیر ائدن، جانان وئرن، قانین هانی؟...

#عاصم_اردبیلی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

گولورسن اوزومه نئیله‌ییم آخی،
ترسینه توتولان ایش قویوب فلک.
سنین گؤزلرینه شؤهرت عشقینی،
منیم گؤزلریمه یاش قویوب فلک.

دینکیش قادین کیمی گولمه آی عارسیز؛
منی ده او قدر دوشونمه وارسیز.
سنین بدنینه بزکلی قارپیز،
منیم بدنیمه باش قویوب فلک.

فلکین الیله ائنن اوجالمیر!
گوونمه پولونا او روشوت آلمیر!
حوکمو کس‌ها- کسلیک هئچ کیمه قالمیر،
چوخ خانیمانلاری بوش قویوب فلک.

بهمن بیل سیررینی فیتنه فئللرین،
زهر وار آلتیندا شیرین دیللرین.
قارانلیق کؤکسونه چوخ قاتیللرین،
اورک عوضینه داش قویوب فلک...

#بهمن_وطن_اوغلو

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سَدد چَکیب سینه‌مه غَملر اوردوسو
شَهَرلردن بئتر تالاناسی‌یام
قَلبیم ائله دولوب، ائله کؤوره‌لیب
بیرجه چینقی دوشسه قالاناسی‌یام

جاوانلیق باغینین گولو سولماسین
سئوگی داغلارینی دومان آلماسین
آی ائللر دَردیمه دَیَن اولماسین
داشقین چایلار کیمی بولاناسی‌یام

دئ کیم دؤزر بَهمن کیمی ظولمه؟
یالان دئسم دویون وورون دیلیمه
بو چاغیمدا بیر دوست دوشسه اَلیمه
یوز دفعه باشینا دولاناسی‌یام.

#بهمن_وطن‌اوغلو


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

یار قلبیمه یول سالسا گتیررم؛ نئجه گلمز؟!
عشقیم‌له سازین چالسا، گتیررم؛ نئجه گلمز؟!

آختارسام اؤزوم، تاپسام اؤزوم، بیر دیله توتسام...،
کؤنلوم گؤیولون آلسا... گتیررم؛ نئجه گلمز؟!

گولسوز قورو اوتلاردی سالان آیریلیغی؛ یار-
یوللار تیکانین یولسا... گتیررم؛ نئجه گلمز؟!

سؤندورمه اومود شمعینی ای غافیل! او سئوگیم-
دردیمله یانیب سولسا...گتیررم؛ نئجه گلمز؟!

سیرداشیم اؤزو بیر ده کی جان قِئیدینه یالنیز-
دیوانه صفت قالسا، گتیررم؛ نئجه گلمز؟!

بو رسمدی کی آی یئرینه، گون، گئجه گلمز.
گر جذبه ی عشق اولسا گتیررم؛ نئجه گلمز؟!

سن دردینی آچ سٶیله «دادا» سئیلی سرشکی
گؤزلردن اورک دولسا...گتیررم؛ نئجه گلمز؟!

#دادا_بیلوردی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سئوگیلیم، بیر بیلمه‌دین سنسیز نه مؤحنت چکمیشم!
بی‌وجود اغیارلردن چوخ اذیّت چکمیشم.

ذؤوق وصلین خاطیره گلدیکجه، غمدن آغلارام،
اؤزگه بیر جانانه سانما دیلده حسرت چکمیشم!

مَه جمالین گؤرمه‌یه بیگانه فورصت وئرمه‌دی،
صوبح اولونجا هر گئجه، کویوندا نؤوبت چکمیشم.

«بی‌وفالیق رسمینی ترک ائت!» دئدیم، ترک ائتمه‌دین.
سندن اؤترو یالواریب اغیاره مینّت چکمیشم.

وصل یار اولماز میسّر هر بلاکش عاشیقه،
من صداقتله بو یولدا چوخ موصیبت چکمیشم.

اؤزگه‌نی دیندیردی اؤز یاریم، منی دیندیرمه‌دی،
ایندی گؤر «واحید»! خجالتدن نه ذیلّت چکمیشم.!...

#علی‌آقا_واحید

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

اویما هر زولفی قارا  سئوگیلی جانانه کؤنول
بو وفاسیزلار ائدرلر سنی دیوانه کؤنول

مومکون اولدوقجا چالیش یانمایاسان عشق اودونا       
شمع‌دن گؤرنه چکیر هر گئجه پروانه کؤنول      

سن هله عشق کمندین‌ده اسیر اولمامیسان
اویما مجنون کیمی هر زولفی پریشانه کؤنول

گول‌ده اولسایدی وفا  خاریله یار اولمازیدی
بولبولون آهی یاییلمازدی گولوستانه کؤنول

آشينا اولماق عبث‌دیر بو پری چوهره‌‌لره
یئنه بیرگون اولاجاق‌لار سنه بیگانه کؤنول

سئودیگین اولسا زولیخای زامان  سن یوسیف           
فکرائدیب سالدیراجاق‌دیر سنی زيندانه  کؤنول

واحید‌ین عؤمرو بوتون نازلی گوزل‌لرله كئچیب
بو حقیقت سؤزو ظن ائیله‌‌مه افسانه کؤنول


#علی_آقا_واحید

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

سن‌سیز چکیلن هر نفس‌یم‌ زوردو سینمده
قلبیم سنه بئل باغلادی کیم! ووردو سینمده

دوست- دوشمانا سینماز بیری‌یم،قوی دئیه هر کس
سئوگین قارا کَندیر آچیلان توردو سینمده

کؤنلوم قوشو هاردان-هارا گؤر اوچدو سنین چون
عشقین یوواسین تئز-تله‌سیک قوردو سینمده

دوشمز نه بیلیر سئوگی‌یه دوشمک نه دئمک‌دیر!؟
گوندوز-گئجه- هردم! چالینان شوردو سینمده

سس‌سیزجه سوکوتلاردا سارالدیم‌سا اونوتما،
کؤز-کؤز قاباران دویغولاریم قوردو سینمده

گؤز یاشلاری اولمور منه مرحم، نه بیلیدیم،
قلبیم‌ده یئر آچمیش سارا، کار- کوردو سینمده

دردین منی ائتمیش شهه‌رین روسواسی، اولسون!
ائتمیر کی شیکایت منی چوخ! یوردو سینمده...

بیلدین می نه‌لر چکدی گؤزوم،یول‌لار الین‌ده؟
هر دم سنی من‌دن اوماراق، سوردو سینمده

یان! یان! اوره‌ییم سن سؤز ائشیتمزسن آغیلدان
مین آرزی-دیلک ناله‌سی،سیر- گوردو سینمده


#مهدی_سربازی_علمداری


╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

کامال گزسن ائل سؤزون‌دن سؤز گوتور
هی دانشما ائل ایچینده من گرک
قریبه بیر حیات اونو دویماغا
یوز اؤلچه‌سن، بیر بیچه‌سن سن گرک

سویوق عشقین زیروه‌سی‌نی قار آلار
یئرسیز صحبت اوره‌ک لری یارالار
ساختا گولوش دوداق‌لاری پارالار
دوغرو گولوش دوغرو دیل‌دن شأن گرک

باغبان‌سیز باغ بیلیرسن کی باغ اولماز
قره صفت هئی یوماق‌لا آغ اولماز
هر سینه‌سی قالتاق‌لی داغ، داغ اولماز
داغ باشین‌دا دومان گرک چن گرک

یالان‌چی‌لار قورودونو نم ساتار
آغیر آلار آلدیغینی کم ساتار
اعتبارسیز یار-یارینا غم ساتار
دوست-دوستونا یار-یارینا، تن گرک

من «ستتارام» آلدانمارام خور یادا
باش ایمه‌رم هر شهرته هر آدا
دئوه‌چی‌له دوست اولانین دونیادا
عشقی بؤیوک دروازه‌سی گَن گرک!...

#ستار_گل‌محمدی

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

ساخلادیم بیر عؤمور سینه‌م‌ده دردی
سایسان نیسگیللریم دونیا قدردی
دئییرلر بو دونیا گلدی گئدردی
هیجرانلا اوز- اوزه قالان من اولدوم

شئه‌لی بنؤشه‌نی دسته باغلادیم
سنی گلن‌لردن هئی سوراغلادیم
قاییتمادین اوره‌ییمده آغلادیم
دسته گول الینده سولان من اولدوم

حسرتله گئجه‌نی ائیله‌دیم سحر
گؤزله‌دیم یاتمادیم دئدیم یار گلر
اینتیظار اؤلومدن، بتردیر بتر
جانیمی اودلارا سالان من اولدوم

سنی خاطیرلاییب داریخدیم یامان
چکیرم دردینی من زامان زامان
سارالیب سولموشام حسرتدن اینان
عؤمرومون باغچاسی تالان من اولدوم

باهاردیر بورونوب شئه‌له چمن‌لر
بیرلشدی باهارلا بوتون سئوه‌ن‌لر
بیرجه سن یوباندین گلدی گئدن‌لر
عطرینی گوللردن آلان من اولدوم

#حسن_معرفت

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

بیر اؤلوم بورجوم وار یارادانیما
نئچه یۆز مین دیلک، آلاجاغیم وار
نه آلیر بورجونو، نه بورجون وئریر
بللی دیر، آسیلی قالاجاغیم وار

تانریمین گرک‌دیر اۆزو آغ اولسون
گۆنلرین قاراسین دوْنوما بیچیب
آجیلار-چیله‌لر اولوب قنیمیم
آسیلیب یاخامدان قانیمی ایچیب

سارالیب وارلیغیم، سولوب منلیگیم
اوخشاییر ساچیمی پاییز اللری
اؤزومده دوستاغام، اؤزومه اوگئی
گؤز آچیب دنیایا گلندن بری...

#فرزین_نقی‌یان

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯

عوض ائله فصیل‌لردن بیرینی،
ایلده بیرجه دفعه سن ده قاییت گل!
باهار اول، پاییز اول، نه اولورسان اول،
ایلده بیرجه دفعه سن ده قاییت گل!

قوربانام سنینله قیش گلن گونه،
قار، یاغیش عؤمرومه خوش گلن گونه.
قوشول یاشیم اوسته یاش گلن گونه،
ایلده بیرجه دفعه سن ده قاییت گل!

یئنه ده بیر داغین اتک یئرینده،
سنی گؤزله‌ییرم چیچک یئرینده.
گیزلن بیر چیچه‌یین لچک یئرینده،
ایلده بیرجه دفعه سن ده قاییت گل!

دردینی سینه‌مده بیتیرن گون‌تک،
سنی گؤزلریمدن ایتیرن گون‌تک،
ائله گئدیشینی گتیرن گون‌تک،
ایلده بیرجه دفعه سن ده قاییت گل!

قاییت کی، عؤمرومده توی بایرام اولسون،
گلدییین او هفته، آی بایرام اولسون،
منه ده بیر دفعه قوی بایرام اولسون،
ایلده بیرجه دفعه سن ده قاییت گل!

«والئه»ام، گئتدییین فصیل ده گلیر،
دونیایا بیر یئنی نسیل ده گلیر،
وطنسیز عؤمرومه بیر ایل ده گلیر،
ایلده بیرجه دفعه سن ده قاییت گل!...

#والئه_قوجا

╭━━━ ◉ ✦ ◉ ━━━╮ 
│      @poemistic         │ 
╰━━━ ◉ ✦ ◉ ━━━╯